1. Kay 33 watapi apóstol Pedro, ¿imata ruwanankutataj nerqa ashkha runasta?

KAY 33 watapi ashkha qharis, warmis ima Jerusalenman rerqanku. Paykunaqa tukuy llajtasmanta karqanku, sapa ujtaj waj parlayta parlarqanku. Maytataj tʼukorqanku wakin judiosta parlayninkupi parlajta uyarispa. Chantapis astawanraj tʼukorqanku chay judíos imatachus nisqankumanta chantá apóstol Pedro imastachus paykunaman nisqanmanta. Pedroqa nerqa Jesucristopi creespalla salvakuyta atisqankuta. Chaytaj paykunaj sonqonkuman chayarqa, chayrayku nerqanku: “¿Imatataj ruwasqaykuri?”, nispa. Pedrotaj paykunata nerqa: ‘Sapa ujniykichej bautizakuychej’, nispa (Hech. 2:37, 38).

2. ¿Imatá kay yachaqanapi yachakusun? (Kay revistaj tapanpi fotota qhawariy).

² Imachus chay diapi pasasqanqa tʼukunapajpuni karqa. Imajtinchus chay diallapi 3 mil runas jinapuni bautizakorqanku, Cristoj discipulosninmantaj tukorqanku. Ajinamanta Jesuspa kamachisqan juntʼakuyta qallarerqa. Payqa kamacherqa runasta discipulosninman tukuchinata. Jesuspa kamachisnenqa kunankama chayta ruwashallanchejpuni. Jinapis kay tiempopeqa, estudiosninchejta mana uj diallapichu bautismoman chayachinchej. Ichá estudionchejqa ashkha killaspi, chayrí watapi manachayrí aswan unaypiraj bautismoman chayanman. Yachanchej jina, uj estudiota bautismoman chayacheyqa mana atikullanchu. Kay yachaqanapi yachakusun, imaynatachus estudionchejta bautismoman chayananpaj yanapanata.

3. Mateo 28:19, 20 nisqanman jina, ¿imatá estudionchej ruwanan tiyan bautismoman chayananpaj?

³ Estudionchejqa niraj bautizakushaspa Bibliaj yachachisqanman jina kausakunan tiyan (Mateo 28:19, 20 leey). Estudionchej  yachakusqanman jina kausakun chayqa, rijchʼakun Jesuspa kikinchayninmanta “sumaj yuyayniyoj runaman”. Chay runaqa wasita ruwakunanpaj ukhuta allasqa, chhankata taripanankama (Mat. 7:24, 25; Luc. 6:47, 48). ¿Imaynatá estudionchejta yanapasunman yachakusqanman jina kausakunanpaj? Qhepan parrafospi kinsa yuyaychaykunata qhawarisun.

4. ¿Imaynatataj estudionchejta yanapasunman bautismoman chayananpaj? (“ Estudionchejta yanapana Diospa llajtanpi ñauparinanpaj” nisqa recuadrota qhawariy).

⁴ Estudionchejta yanapana bautismoman chayananpaj. ¿Imaynatá yanaparisunman? Kaypi piensarina. Chakipi karuta rinanchej kanman chayqa, ichá ñanta risqanchejman jina samarisunman. Ajinamanta mana saykʼusunmanchu, nitaj reparasunmanchu ancha karu kasqanta. Bibliamanta yachakojwanpis kikillantaj. Pay, Diospa llajtanpi ñauparinanpaj pisimanta pisi wakin imasta ruwanqa chayqa, bautismoman chayay facillla kasqanta reparanqa. Estudionchej ñauparinanpajqa payta yanapasunman, Wiñaypaj kusisqa kausakuy nisqa libropi, “Tarea” nisqa recuadrowan. Sapa yachaqanata tukuytawan estudionchejwan parlarina, imaynatachus chay yachaqanapi yachakusqan ñauparinanpaj yanapananmanta. Estudionchej imapichus ñauparinanta munanchej chaytaj “Waj tareas” nisqaman anotaykapusunman. Sapa yachaqanata tukuytawanqa estudionchejwan parlarinapuni imastachus pisi tiempollapi ruwananmanta, imastatajchus aswan qhepaman ruwananmanta.

5. Marcos 10:17-22 nisqanman jina, ¿imata ruwanantataj Jesús uj qhapaj runaman nerqa, chanta imaraykutaj?

⁵ Estudionchejta yanapana kausayninta cambiananpaj (Marcos 10:17-22 leey). Jesusqa uj qhapaj runata nerqa tukuy imasninta vendenanta, mana chayta ruwayta atinanta yachaspapis (Mar. 10:23). Chaytataj nerqa payta munakusqanrayku. Wakin kutisqa estudionchejta yachakusqanman jina ruwananta niyta  manchachikusunman, niraj wakichisqachu kashasqanta yuyasqanchejrayku. Runasqa mana atillankuchu ñaupa kausayninkuta saqepuyta, Diospa qosqan mosoj kausaywantaj pʼachallikuyta (Col. 3:9, 10). Jinapis estudionchejwan imapichus cambiananmanta parlarisun chayqa, ichapis cambianqapacha. Ajinamantaqa rikuchisun payta yanapayta munasqanchejta (Sal. 141:5; Pro. 27:17).

6. ¿Imaraykutaj estudionchejta tapurinapuni tiyan?

⁶ Estudionchejtaqa tapurinapuni yachakushasqanmanta imatachus yuyasqanta. Ajinamanta yachasun imatachus entiendesqanta, imatachus creesqantapis. Sapa kuti chayta ruwasun chayqa, imastachus pay mana japʼikuyta atillanchu, chay imasmanta parlariyta atillasun. Wiñaypaj kusisqa kausakuy nisqa libropeqa, estudionchej imatachus yuyasqanta yachanapaj ashkha tapuykuna tiyan. Tawa yachaqanapi, “Jehová Diosrí, ¿kusikunmanchu sutinta oqharejtinchej?” nisqa tapuy rikhurin. Jisqʼon yachaqanapitaj, “¿Imastataj Diosman willakuyta munawaj? Chayrí, ¿imastataj paymanta mañakuyta munawaj?” nisqa tapuykuna rikhurin. Estudionchejqa wakin tapuykunaman kutichinanpaj, ichá piensarinanraj kanqa. Chaypajtaj yanapasunman ima yachaqanatachus estudiashanchej chaypi rikhurej textosmanta, fotosmanta, dibujosmanta ima parlarispa.

7. ¿Imaraykutaj estudiosninchejman willarina hermanospa kausayninkumanta?

⁷ Estudionchej imatachus ruwananta sutʼita yachanña chayqa, chayta ruwananpaj waj hermanospa kausayninkumanta willarisunman. Mana reunionesman riyta atishanchu chayqa, Jehová Diosqa noqamanta llakikun nisqa videota rikuchisunman. Chaytaj kashan Wiñaypaj kusisqa kausakuy nisqa libroj 14 yachaqananpi, “Astawan yachakunaykipaj” nisqa recuadropi. Chay libroj wakin yachaqanasninpeqa, chay jina experiencias kashan, “Astawan yachakuna” nisqa recuadropi chayrí “Astawan yachakunaykipaj” nisqa recuadropi. * Chantapis estudionchejtaqa ama wajkunawan kikinchaspa ninachu: “Pay atin chayqa, qanpis atinki”, nispa. Astawanpis chaytaqa pay reparakunan tiyan. Chantapis estudionchejman sutʼincharisunman, chay videomanta hermanota chayri hermanata, imachus Bibliaj nisqanman jina kausakunanpaj yanapasqanta. Ichapis nisunman ima textochus yanapasqanta chayri imatachus ruwasqanta. Atikusqanman jinataj, nisunman imaynatachus Jehová chay videomanta hermanota chayri hermanata yanapasqanta.

8. ¿Imaynatá estudionchejta yanapasunman Jehovata munakunanpaj?

⁸ Estudionchejta yanapana Jehovata munakunanpaj. Chaypajtaj Jehová kʼacha kasqanmanta paywan parlarinapuni. Estudionchejqa yachanan tiyan Jehovaqa kusikuyniyoj Dios kasqanta, payta munakojkunatataj yanapasqanta (1 Tim. 1:11; Heb. 11:6). Chantapis estudionchejmanqa nina yachakusqanman jina kausakojtin allin rinanta, chaytapunitaj Jehová paypaj munasqanta (Isa. 48:17, 18). Estudionchejqa Jehová Diosta astawan munakusqanman jina, kausayninta cambiananpaj kallpachakonqa (1 Juan 5:3).

9. Marcos 10:29, 30 nisqanman jina, ¿imata yachaytaj estudionchejta yanapanqa bautismoman chayananpaj?

⁹ Estudionchejqa bautismoman yachananpaj, ashkha imasta saqenan kanqa. Wakin estudiosninchejqa, Jesuspa kikinchayninmanta  qhapaj runa jina ichá wakin imasninkuta saqenanku kanqa. Ichá wakenqa trabajonkuta saqepunanku kanqa, Diospa chejnisqan imaswan chajrusqa kasqanrayku. Wakintaj ichá amigosninkuta saqepunanku kanqa. Wakintajrí ichá sapallanku rikhurenqanku familiaresninku Jehovaj testigosninta mana allinpajchu qhawasqankurayku. Jesusqa nerqa wakin runas mana chay imasta saqeyta atinankuta. Jinapis nillarqataj, payta qhatejkunata Jehová Dios llajtanpi kʼacha familiawan bendecinanta (Marcos 10:29, 30 leey). Estudionchejta yanapana chay jina sumaj familiata Jehovaj llajtanpi tarinanpaj.

10. ¿Imatataj hermano Manuel nisqanmanta yachakunchej?

¹⁰ Estudionchejwan sumaj amigos kana. Payta imaynachus kashasqanta tapurinapuni. Ajinamanta rikuchisun yanapariytapuni munasqanchejta. Chaymanta parlaspa Mexicopi tiyakoj hermano Manuel nin: “Bibliamanta yachachiwaj hermanoqa, niraj estudiayta qallarishajtiyku, imaynachus kashasqayta tapuriwajpuni. Ajinamanta mana payta manchachikojchu kani, manaqa imatapis willarillaj kani. Payqa yanapaytapuni munawarqa”, nispa.

11. ¿Imaynatá estudionchejta yanapanman, paywan khuska karinapaj tiempochakusqanchej?

¹¹ Estudionchejwan karinapaj tiempochakuna, imaynatachus Jesuspis yachachisqasninwan kananpaj tiempochakoj, ajinata (Juan 3:22). Estudionchej yachakusqanman jina kausayninta cambiashan chayqa, wasinchejman wajyarisunman tecitota tomarinapaj, chayri mikhurinapaj manachayrí broadcastingta qhawarinapaj. Payqa mayta agradecekuwasun, astawanqa feriado diaspi wajyarikojtinchej. Ichapis payqa chay diaspi sapallan kashanman. Uganda suyupi tiyakoj Kazibwe sutiyoj hermano nin: “Jehovamantaqa mayta yachakorqani Bibliamanta yachachiwaj hermanowan karispa, pay Bibliamanta yachachiwajtin ima. Repararqani Jehovaqa kamachisninta mayta munakusqanta, paykunataj may kusisqa kasqankuta. Noqapis paykuna jina kayta munarqani”, nispa.

12. ¿Imaraykutaj estudionchejman waj hermanosta pusananchej tiyan?

 ¹² Estudionchejman sapa kuti waj hermanota pusana. Wakin kutisqa ichá yuyasunman, aswan fácil kasqanta estudionchejman sapallanchej rinanchej chayri kikin hermanollawanpuni rinanchej. Wakin kutisqa yuyasunman chayta ruway allillan kasqanta. Jinapis estudionchejman waj hermanosta pusasun chayqa, payta astawan yanapasun. Hermano Dimitri, Moldavia suyupi tiyakun. Pay nin: “Bibliamanta yachachiwaj hermano waj hermanosta pusamusqanqa mayta yanapawarqa. Imajtinchus sapa hermanoqa, estudiashajtiyku waj jinitamanta sutʼinchariwaj. Chaytaj reparachiwarqa, yachakusqayqa waj imaspipis yanapayta atiwasqanta. Chantapis mana anchata manchachikorqanichu ñaupaj kutipi reunionman rispa. Imajtinchus ashkha hermanosta, hermanasta ima rejserqaniña”, nispa.

13. ¿Imaraykutaj estudionchejta reunionesman rinanpaj yanaparinanchej tiyan?

¹³ Estudionchejta yanapana reunionesman rinanpaj. Jehovaqa kamachiwanchej, payta yupaychananchejpaj tantakunanchejtapuni (Heb. 10:24, 25). Chantapis hermanoswan hermanaswanqa familianchej jina kanku. Hermanosninchejwan reunionespi khuska kayqa, uj wasipi khuska mikhurikuy jina. Chayrayku estudionchejta reunionesman rinanpaj yanapaspaqa, bautismoman chayananpaj yanapashanchej. Jinapis ichá estudionchejqa, reunionesman riyta mana atillanqachu. Jina kajtin, ¿imaynatá Wiñaypaj kusisqa kausakuy nisqa librowan estudionchejta yanapasunman? Chayta qhepan parrafopi qhawarina.

14. ¿Imaynatataj estudionchejta yanapasunman reunionesman rinanpaj?

¹⁴ Estudionchej reunionesman riyta munananpaj kallpacharina, Wiñaypaj kusisqa kausakuy nisqa libroj 10 yachaqananwan. Niraj kay libro tukuchasqa kashajtin, wakin experienciayoj hermanosta nerqanku 10 yachaqanata estudiosninkuwan estudianankuta. Paykunataj nerqanku, estudiosninkuta mayta yanapasqanta reunionesman rinankupaj. Jinapis mana 10 yachaqanamanrajpunichu chayana tiyan estudionchejta reunionesman wajyarinapaj. Manaqa qallariymantapacha wajyarina. Chantapis sapa estudioqa waj jina llakiyniyoj, chayrayku reparana imapichus sapa estudio yanapata necesitasqanta, chayman jinataj yanaparina. Estudionchej manaraj reunionesman rishanchu chayqa, ama llakikunachu. Manaqa paywan pacienciakuna, wajyarinallapunitaj.

15. ¿Imastataj estudionchej manchachikunman?

¹⁵ Bibliata estudiayta qallarishaspaqa, ichá noqanchejpis Jehovaj testigon kayta manchachikorqanchej. Chantapis ichá yuyarqanchej ni jaykʼaj wasimanta wasi predicaj riyta atinanchejta. Chayrí ichá manchachikorqanchej familianchej, amigosninchej ima churanakunawanchejta. Chayrayku estudionchej imaynachus kashasqanta entiendenchej. Jesusqa nerqa, wakin runas chay imasta manchachikunankuta. Jinapis payqa, yachachisqasninta kallpacharqa Jehovata sirvinallankupajpuni (Mat. 10:16, 17, 27, 28). ¿Imaynatá Jesús yachachisqasninta mana manchachikunankupaj yanaparqa? ¿Imaynatá noqanchejpis pay jina ruwasunman? Chayta qhepan parrafospi qhawarisun.

16. ¿Imaynatá estudionchejta yanapasunman Bibliapi imatachus yachakushasqanta wajkunaman willarinanpaj?

¹⁶ Estudionchejta pisimanta pisi yachachina yachakusqanta wajkunaman willarinanpaj. Jesusqa yachachisqasninta predicamunankupaj kacharqa. Ichapis paykunaqa chayta ruwayta manchachikorqanku. Jinapis Jesusqa paykunata yanaparqa maymanchus rinankuta nispa, chantá imatachus willanankuta nispa  (Mat. 10:5-7). ¿Imaynatá Jesús jina ruwasunman? Estudionchejta predicananpaj yanaparispa. Chaypajqa ichapis tapurisunman: “Bibliapi kayta yachakusqayki, ¿pillatapis rejsisqasniykimanta yanapanmanchu?”, nispa. Chantá yanaparisunman imaynatachus chayta sutʼincharinanpaj. Wiñaypaj kusisqa kausakuy nisqa libropeqa, “Wakin runas ninku” chantá “Ichá wakin tapusonqanku” nisqa recuadros tiyan. Atikusqanman jinataj, chay recuadroswan yanapachikusunman estudionchejwan ensayanapaj. Ensayashaspaqa, yanaparina ima tapuymanpis Bibliawanpuni, kʼacha simiwantaj kutichiyta yachananpaj.

17. Mateo 10:19, 20, 29-31 versiculoswan, ¿imaynatá estudionchejta yanapasunman Jehová Diospi confiananpaj?

¹⁷ Estudionchejta yanapana Jehovapi confiananpaj. Jesusqa yachachisqasninman nerqa, Jehová paykunata munakusqanta, yanapanantataj (Mateo 10:19, 20, 29-31 leey). Estudionchejman nina paytapis Jehová yanapanallantataj. Chantapis payta yanaparina Jehová Diospi confiananpaj. Chaypajtaj paywan khuska orakushaspa, Jehovamanta mañapusunman imapichá kallpachakushan chaypi yanaparinanta. Hermanonchej Franciszekmanta parlarina. Payqa Polonia suyupi tiyakun, nintaj: “Bibliamanta yachachiwaj hermanoqa noqawan khuska orakushaspa, imapichá kallpachakusharqani, chaypi Dios yanaparinawanpaj mañapuwaj. Jehovaqa payta uyarerqa, chayrayku noqapis mañakuyta qallarerqani. Jehovaqa noqatapis uyarillawarqataj. Imajtinchus reunionesman, asambleaman ima rinaypaj mosoj trabajoypi permisota mañakojtiy, qollawarqanku”, nispa.

18. ¿Imaynatá Jehová qhawan paymanta runasman yachachinapaj kallpachakusqanchejta?

¹⁸ Jehovaqa mayta munakun Bibliamanta yachakojkunata. Chantapis payqa, allinpaj qhawan paymanta runasman yachachinapaj kallpachakusqanchejta. Chayraykutaj mayta munakuwanchej (Isa. 52:7). Jinapis ni piman Bibliamanta yachachishanchejchu chayqa, waj hermanosta estudiosninkuman acompañasunman. Ajinamanta estudiosta yanapasunman bautismoman chayanankupaj.