1. ¿Jerusalenman shamuj gentecunataca Jesuspaj discipulocunaca imata rurachuntaj nirca?

ACHCA cꞌaricuna, huarmicunami Jerusalenmanca viajashcacuna carca. Paicunaca chꞌican chꞌican llajtacunamanta, chꞌican chꞌican shimicunata parlajcunamantami carcacuna. Paicuna ña Jerusalenpi cajpica Jesusta catij judiocunaca chai gentecunapaj shimicunapimi predicai callarircacuna. Chaimi apóstol Pedropish Jesuspi feta charishpa quishpiri tucushcata intindichirca. Jerusalenman shamujcunapajca cai nishcacunami ashtahuan importante carca. Cai shimicunata uyashpami huaquincunaca: “¿Quishpiringapajca imatataj rurana canchij?” nircacuna. Chaimi apóstol Pedroca: “Jesucristopaj shutipi bautizarichij” nirca (Hechos 2:37, 38).

2. ¿Cai yachaipica imatataj yachashun? (Página 1-pi tiyaj fotota ricui).

² Chai qꞌuipaca 3.000 gentecuna bautizarishpami Jesusta cati callarircacuna. Chai punllamantami discipulocunaca Jesús mingashcata pajtachishpa catircacuna. Cai mingashcataca cunancamami pajtachishpa caticunchij. Cunan punllacunapica gentecunaca mana shuj punllallapi bautizarincunachu. Ashtahuanpish paicunamanca huaquin quillacunata, shuj huatata o huaquin huatacunatami yachachina minishtirin. Jesusta catijcunata rurangapajca achca esfuerzomi minishtirin. Chaimanta cai yachaipica yachacujcunata bautizarichun ima shina ayudanatami ricushun.

3. Mateo 28:19, 20-pi nishca shinaca ¿yachacujcunaca bautizaringapajca imatataj rurana can?

³ Yachacujca manaraj bautizarishpaca Biblia yachachishcacunatami paipaj causaipi pajtachina can (Mateo 28:19, 20-ta  liyipai). Chaita rurashpaca alli yuyayuj runa yacu rumi jahuapi ucujta allashpa huasita shayachij shinami canga (Mateo 7:24, 25; Lucas 6:47, 48). Cunanca yachacujcuna Biblia yachachishcacunata pajtachichun ayudangapaj quimsa yuyaicunata ricushun.

4. ¿Yachacujcuna imata rurachuntaj ayudana canchij? (“ Yachacujcuna metacunata churachun, pajtachichun ayudashunchij” nishca recuadrotapish ricui).

⁴ Yachacujcunata metacunata churachun ayudashunchij. ¿Imamantataj caita ruranaca importante can? Cai chꞌimbapuraipi yuyashunchij. Caru lugarman carropi viajacushpaca ñancunapimi asha asha shayarishpa, alaja Iugarcunata ricushpa viajanchij. Chashnami chayana lugarca mana carunman laya ricuringa. Chashnallataj yachacujcunapajca bautizaringapajca caru lugarman chayacushca shinami can. Pero paicunata asha asha, chꞌican chꞌican metacunata pajtachichun ayudajpica yachacujcunaca bautizarina mana sinchi cashcatami cuentata cungacuna. Yachacujcuna metacunata churachunca Huiñai huiñaita cushilla causai nishca libropimi “Caita rurai” nishca recuadrota ricuchina canchij. Cada yachaita tucuchishca qꞌuipaca “Caita rurai” nishca recuadrohuanmi yachacujtaca ima yachashcata pajtachichun ayudana canchij. Shinallataj “Can imata rurasha nishcata escribi” nishca parteta ricuchishpami shujtaj metacunata churachun ayudai tucunchij. Cada yachaita tucuchishca qꞌuipaca yachacujcuna metacunata asha asha churashpa pajtachichun ayudashunchij.

5. Marcos 10:17 al 22-pi nishca shinaca ¿Jesusca charij runataca imata rurachuntaj mandarca?

⁵ Yachacujcunataca paicunapaj causaipi cambiocunata rurachun ayudashunchij. (Marcos 10:17-22-ta liyipai). Jesusca shuj charij runataca pai imalla charishcacunata cꞌatuchunmi nirca. Chaita rurana sinchi cajpipish chaita rurachunmi animarca (Marcos  10:23). ¿Imamantataj chashna rurachun nirca? Paita cꞌuyashcamantami chaita rurachun nirca. Shinallataj ñucanchijpish yachacujcunataca cꞌuyaimantami paicunapaj causaipi cambiocunata rurachun ayudana canchij. Paicunapajca huaquinpica cambiocunata ruranaca achca tiempomi minishtiringa (Colosenses 3:9, 10). Pero mana cambiai tucungachu nishpaca mana yuyanachu canchij. Ashtahuanpish cambiocunata rurachun utca ayudajpica ima cambiocunatami rurai tucungacuna (Salmo 141:5; Proverbios 27:17).

6. ¿Imamantataj yachacujcunamanca tapuicunata rurana canchij?

⁶ Yachacujcuna imata yuyashcata, imata intindishcata yachangapajmi tapuicunata rurana canchij. Chaita rurashpaca yachacujcunahuan ima cambiocunata ruranamanta parlanaca jahuallami canga. Huiñai huiñaita cushilla causai nishca libropica yachacujcuna imata yuyashcata yachangapajmi huaquin tapuicuna tiyan. Por ejemplo, yachai 4-pica: “¿Jehová Diosca paipaj shutita nombrajpica ima shinashi sintiringa?” nishca tapuimi tiyan. Cutin yachai 9-pica: “¿Imatataj Yaya Diosman mañanata munanguiman?” nishca tapuimi tiyan. Callaripica yachacujcunaca cai tapuicunata cutichingapajca tiempotami minishtingacuna. Pero Bibliapaj versocunahuan, chai libropi tiyaj fotocunahuanmi cai tapuicunata cutichichunca ayudai tucunchij.

7. ¿Yachacujcunataca huauqui panicunapaj experienciata ricuchishpaca ima shinataj ayudana canchij?

⁷ Yachacujcuna cambiocunata rurachun huaquin huauqui panicunapaj experienciata ricuchishunchij. Por ejemplo, yachacujpaj tandanacuicunaman rina sinchi cajpica yachai 14-pi “Caicunatapish ricui” nishca partepi Jehovami ñucata ayudashca nishca videotami ricuchi tucunchij. Huiñai huiñaita cushilla causai nishca libropica “Caicunatapish ricui”, “Ashtahuan yachai” nishca partecunapimi huaquin huauqui panicunapaj experienciacuna tiyan. Chaitami ricuchi tucunchij. * Chai videocunata ricuchicushpaca yachacujcunataca: “Caishuj yachacujcunaca pudinmi. Canpish pudinguimi” nishpaca mana comparanachu canchij. Ashtahuanpish paillataj cambiocunata rurai tucushcata intindichunmi ayudana canchij. Chaipajca videopi ricurij huauqui o pani cambiangapaj imata rurashcata, mana cashpaca Jehová Dios ima shina ayudashcata o paicunata ima verso ayudashcata ricuchishunchij.

8. ¿Yachacujcunataca Jehová Diosta cꞌuyachunca ima shinataj ayudana canchij?

⁸ Yachacujcunataca Jehová Diosta cꞌuyachun ayudashunchij. Yachacujcunamanca Jehová Dios llaquij, cꞌuyaj, cushilla, ñucanchijta ayudaj Dios cashcata intindichishunchij (1 Timoteo 1:11; Hebreos 11:6). Shinallataj Biblia yachachishcacunata paicunapaj causaipi pajtachishpa ima beneficiocunata charinata yachachishunchij. Ashtahuancarin Jehová Diosman cꞌuyaita ricuchingapaj paita cazuna cashcatapish intindichishunchij (Isaías 48:17, 18). Yachacujcunaca Jehová Diosta ashtahuan cꞌuyashpaca paicunapaj causaipica ima cambiocunatapish rurangallami (1 Juan 5:3).

9. ¿Yachacujcunaca Yayitu Diosta sirvingapaj imacunata saquishpaca ima bendicioncunatataj charingacuna?

⁹ Yachacujcunaca bautizaringapajca huaquin cosascunatami saquina can. Huaquincunaca párrafo 5-pi parlashca joven shinami imalla charishca cosascunata saquina tucunga.  Cutin shujtajcunaca Dios mana munashca trabajotami saquina tucungacuna. Huaquincunaca Diosta mana cꞌuyaj amigocunamantapishmi caruyana tucungacuna. Cutin shujtajcunataca familiacunami Diosta sirvishcamanta pꞌiñancuna. Jesusca caicunata saquina mana jahualla cashcatami alli yacharca. Pero yachacujcuna Jehová Diosta sirvingapaj tucui cosascunata saquijpica Jehová Diosca cꞌuyaj familiatami cunga (Marcos 10:29, 30-ta liyipai). ¿Yachacujcunataca cai bendicionta chasquichunca ima shinataj ayudana canchij?

10. ¿Huauqui Manuelmantaca imatataj yachanchij?

¹⁰ Yachacujcunapaj amigos tucushunchij. Yachacujcunamanta de verdadtaj preocuparishunchij. México llajtamanta Manuel shuti huauquica: “Bibliamanta yachai callaricujpica ñucaman yachachijca manaraj Bibliata yachachishpami ñuca ima shina sintirishcata tapuj carca. Chashnami ñucaca tranquilo sintirircani. Ima shina sintirishcatapish paiman parlarcani. Pai ñucamanta de verastij preocuparishcatami cuentata curcani” ninmi.

11. ¿Imamantataj yachacujcunahuan pasangapajca tiempota surcuna canchij?

¹¹ Ima shinami Jesusca paipaj discipulocunahuan pasangapaj tiempota surcurca, chashnallatajmi ñucanchijpish yachacujcunahuan pasangapajca tiempota surcuna canchij (Juan 3:22). Yachacujcuna paicunapaj causaipi cambiocunata rurajpica ñucanchij huasiman cafecitota ubyangapaj o micungapaj invitashunchij. Mana cashpaca JW Broadcasting^® programata ricungapajpish invitashunchij. Paicunaca cai mundopaj fiestacuna tiyai horas paicunata ñucanchijhuan pasachun invitajpica agradicingacunami. Ashtahuancarin mana paicunalla cashcata sintingacunachu. Uganda llajtamanta huauqui Kazibweca: “Ñucaman yachachij estudiota cujpica achcatami yacharcani. Shinallataj paihuan pasachun invitajpi paipaj ejemplomantaca achcatami yacharcani. Chaimi Jehová Dios paita sirvijcunamanta preocuparishcata, paita sirvijcunapish cushilla causashcata yacharcani. Ñucaca cashna causaita charinatami munarcani” ninmi.

12. ¿Imamantataj yachachingapajca chꞌican huauqui panicunata invitana canchij?

 ¹² Yachacujmanca chꞌican chꞌican huauqui panicunahuan yachachinaman rishunchij. Maipica ñucanchijlla o shuj huauquihuan o shuj panillahuanmi Bibliamanta yachachinaman rinchij. Pero yachacujcunaca chꞌican chꞌican huauqui panicunahuan rijpimi ashtahuan yachangacuna. Moldavia llajtapi causaj huauqui Dimitrica: “Ñucaman yachachijta acompañaj huauqui panicunaca tucuicunami alajata yachachijcuna carca. Chashnami ima yachashcacunata ñuca causaipi ima shina pajtachinata ricurcani. Shinallataj achca huauqui panicunata rijsishcamantami punta cutin tandanacuiman rishpaca mana pingaita charircani” nircami.

13. ¿Imamantataj yachacujcunataca tandanacuicunaman richun ayudana canchij?

¹³ Yachacujcunataca tandanacuicunaman richun ayudashunchij. Tandanacuicunapimi Jehová Diosta adoranchij (Hebreos 10:24, 25). Ashtahuancarin huauqui panicunaca ñucanchij familiami can. Paicunahuan tandanacuicunapi cashpaca tandalla mishqui micunata micucuj shinami cashun. Yachacujcunata tandanacuicunaman richun ayudashpaca paicuna bautizarichunmi ayudashun. Pero ¿tandanacuicunaman rina paicunapaj sinchi cajpica ima shinataj Huiñai huiñaita cushilla causai nishca librohuan ayudai tucunchij?

14. ¿Yachacujcunata tandanacuicunaman richun animangapajca imatataj rurana canchij?

¹⁴ Yachacujcunata tandanacuicunaman richun ayudangapajca Huiñai huiñaita cushilla causai nishca libropi yachai 10-tami yachachina canchij. Cai librota ruracushpaca experienciata charij huauqui panicunatami yachai 10-huan pruebacunata rurachun mañarcacuna. Chashna yachai 10-manta yachachijpica achca yachacujcunami tandanacuicunamanca ri callarirca. Pero manaraj yachai 10-man chayashpapish yachacujcunataca tandanacuicunaman richunca invitanallami canchij. Shinapish cada estudiajcunami chꞌican chꞌican jarcaicunata charincuna. Chaimanta cada unota ima shina ayudanata ricushunchij. Paicuna tandanacuicunaman mana rijpipish ama desanimarishunchij. Ashtahuanpish pacienciahuan cutin cutin invitashpa catishunchij.

15. ¿Yachacujca imata rurangapajtaj tal vez manchaita charinga?

¹⁵ ¿Bibliamanta yachai callarishpaca testigo de Jehová canata mancharcanchijchu? Tal vez “ñucaca mana nunca predicai tucushachu” nishpachari mancharcanchij. Mana cashpaca “ñucanchij familiacuna, amigocunami Diosta sirvijpica ñucapaj contra tucunga” nishpami mancharcanchij. Chashna ñucanchijpish manchaita charishca cashpaca yachacujcuna ima shina sintirishcatami intindishun. Jesusca paipaj discipulocunataca: ‘Huaquincunaca manchaitami charinga. Pero manchai mishachunca mana saquinachu canguichij’ nircami (Mateo 10:16, 17, 27, 28). ¿Jesusca paita catijcuna manchaita mishachunca ima shinataj ayudarca? ¿Ñucanchijpish yachacujcunataca manchaita mishachunca ima shinataj ayudana canchij?

16. ¿Yachacuj ima yachashcata shujtajcunaman predicachunca ima shinataj yachachina canchij?

¹⁶ Yachacujcuna paicuna ima yachashcacunata shujtajcunaman predicachun ayudashunchij. Jesuspaj discipulocunaca Jesús huillachun nijpica manchashcangacunami. Pero Jesús maipi huillanata, ima shina huillanata yachachijpica paicunaca huillai tucurcacunami (Mateo 10:5-7). ¿Ima shinataj Jesuspaj ejemplota cati tucunchij? Yachacujcunataca ima shina o maipi predicachunmi ayudana canchij. Por ejemplo, yachacujtaca tapushunchij: “¿Pitataj Biblia yachachishcacunaca ayudai  tucun?”. Qꞌuipaca Huiñai huiñaita cushilla causai nishca libropi gentecuna ima nishcata, ima tapushcacunata ricuchishpami ima shina predicanata repasana canchij. Chashna repasacushpaca Bibliahuan, intindirinalla shimicunahuan, respetohuan yachachichunmi ayudana canchij.

17. ¿Mateo 10:19, 20, 29 al 31-pi nishcacunahuanca yachacujcunataca Jehová Diospi confiachunca ima shinataj ayudai tucunchij?

¹⁷ Yachacujcunata Jehová Diospi confiachun ayudashunchij. Jesusca paipaj discipulocunamanca: ‘Jehová Dios cancunata cꞌuyashcamantami tucuipi ayudanga’ nircami (Mateo 10:19, 20, 29-31-ta liyipai). Ñucanchijpish yachacujcunamanca Jehová Dios paicunata ayudanatami yuyachina canchij. Paicunahuan paicuna churashca metacunata pajtachichun Jehová Diosta mañashunchij. Chashnami paicunaca Jehová Diospi confiai callaringacuna. Poloniapi causaj huauqui Franciszekca: “Ñucaman yachachijca ñuca metacunata pajtachichunmi Jehová Diosta mañaj carca. Jehová Dios pai mañashcacunata cutichijta ricushpami ñucapish Yaya Diosta mañai callarircani. Por ejemplo, ñuca mushuj trabajopica tandanacuicunaman ringapajmi Jehová Diostaca ñuca jefe permisota cuchun nishpa mañarcani. Ñuca jefe permisota cujpica Jehová Dios ñuca mañashcacunata cutichishcatami cuentata curcani” ninmi.

18. ¿Bibliamanta yachachingapaj esforzarijpica Jehová Diosca ima shinataj sintirin?

¹⁸ Pero ¿Bibliamanta yachacujcunata mana charishpaca gentecuna bautizarichun ayudai tucunchijchu? Ari. Chaipajca huauqui panicunata Bibliamanta yachachingapaj acompañashunchij. Jehová Diosca Bibliamanta yachacujcunamantaca achcatami preocuparin. Chaimanta yachacujcunata Jehová Diospajman cꞌuchuyachun ayudajpica paica ñucanchijtaca achcatami valoranga (Isaías 52:7).