1. ¿Imata ruwanankupaqmi runakunata Pedro nirqa?

JERUSALEN llaqtamanmi huñunakururqaku achka nacionkunamanta huk rimayniyuq runakuna. Chay punchawmi wakin judiokuna chay runakunapa rimayninpi rimayta qallaykurqaku. Chaymantapas, apostol Pedrom nirqa salvasqa kanankupaqqa Jesuspi iñispanku paypa qatiqnin kanankupaq. Chaynata niptinmi chay runakunañataq nirqaku: “¿Imatataq ruwasaqku?”, nispanku. Chaymi Pedroñataq nirqa: “Bautizakuychik”, nispa (Hech. 2:37, 38).

2. ¿Imamantam kay yachachikuypi yachasun? (Qaway qaranpi kaq fotota).

² Chay punchawllam yaqa 3.000 runakuna bautizakuruspanku Jesuspa qatiqninña karqaku. Chaymantapacham Jesuspa qatiqninkunaqa llapallan runakunaman yachachiyta qallaykurqaku. Jesuspa kamachisqanta kasukuspam kunanpas runamasinchikkunaman yachachichkanchik. Ichaqa manam ñawpaqpi hinachu kamaslla bautizakunku. Bibliamanta yachachisqanchik runamasinchikkunaqa achka killamanta, watamanta utaq masmantam bautizakuymanqa chayanku. Chaypaqqa anchatam kallpanchakunanchik. Chaymi kay yachachikuypi yachasunchik bautizakuyman chayanankupaq imayna yanapanamanta.

3. Mateo 28:19, 20 nisqanman hinaqa, ¿imatam yachachisqanchik runa ruwanan bautizakuyman chayananpaq?

³ Manaraq bautizakuyman chayachkaspanmi runamasinchikqa yachasqanman hina kawsakunan (qaway Mateo 28:19, 20). Chayman hina kawsakuspanqa Jesuspa rimasqan yuyayniyuq runa hinam kanqa. Chay runaqa taqra rumipa  hawanpi wasinta hatarichinanpaqmi uku-ukuta aspirqa (Mat. 7:24, 25; Luc. 6:47, 48). Qatiqninpiyá yachaykusun yachasqanman hina kawsakunanpaq yachachisqanchik runamasinchikta imayna yanapanamanta.

4. ¿Imaynatam yachachisqanchikta yanapachwan bautizakuyman chayananpaq? (Qaway “ Yachachisqanchiktayá yanapasun astawan kallpanchakunanpaq” niqta).

⁴ Bautizakuyman chayananpaq imakunapi kallpanchakunanpaqyá yanapasun. Maytapas karu-karuta rispanchikqa pisiparuchwanmi. Ichaqa imatapas qawastin utaq samaristin riptinchikqa manam karu-karupaqñachu rikchakuwasun. Chaynam yachachisqanchik runamasinchikpaqpas bautizakuyman chayayninqa mana sasachu kanqa imatapas ruwananpaq yanapaptinchikqa. Chaypaqmi yanapachwan Kusisqa kawsakunapaq qillqapi “¿Imapaqmi kallpanchakuwaq?” niqwan. Hinaspam sapa yachachikuypa tukuyninpi nichwan chaypi nisqanman hina ruwananpaq. Imatapas hukta ruwananpaq nispanchikqa “Kallpanchakuwaqtaqmi” niqpim qillqachwan. Nisuntaqyá wakinta chaylla ruwananmanta, wakintañataq tiempopa risqanman hina ruwananmanta.

5. Marcos 10:17-22 nisqanman hinaqa, ¿imata ruwananpaqmi apu runata Jesus nirqa? ¿Imanasqam chaynata nirqa?

⁵ Yachasqanman hina kawsakunanpaqyá yanapasun (qaway Marcos 10:17-22). Jesusmi apu runata nirqa tukuy imanta rantikurunanpaq, chay ruwaynin sasa kananta yachaspanpas kuyasqanraykum chaynataqa nirqa (Mar. 10:23). Ichapas yachachisqanchiktaqa paypaq sasa kananta piensaspanchik manaraq ninchikchu bibliapa nisqanman hina kawsakunanpaqqa. Manamá iskay-kimsa punchawllamantachu Diospa munasqanman hinaqa kawsakunqa (Col. 3:9, 10). Chaywanpas qallariymanta chaypaq niptinchikqa kasukunanpaqmi kallpanchakunqa.  Allin kaqta ruwananpaq kallpanchaptinchikqa kuyaspanchik yanapay munasqanchiktam yachanqa (Sal. 141:5; Prov. 27:17).

6. ¿Imatam ruwananchik yachachisqanchik runapa ima piensasqanta utaq ima entiendesqanta yachanapaq? ¿Imanasqam chayqa ancha allin?

⁶ Chaymantapas, yachachisqanchik runamasinchiktam tapuchwan ima piensasqanta utaq ima entiendesqanta willawananchikpaq. Chayta ruwaptinchikqa manam sasachu kanqa paypaq sasa kaqkunamanta qipakunaman rimayqa. Kusisqa kawsakunapaq qillqanchikpim achka tapukuykuna kachkan yachachisqanchik runamasinchik ima piensasqanta niwananchikpaq. 4 kaq yachachikuypim nichkan: “¿Imaynataq Jehova Dios tarikunman sutinta rimaptiki?”, nispa. 9 kaq yachachikuypiñataqmi nichkan: “¿Imakunamantam Diosta mañakuwaq?”, nispa. Qallariypiqa manapaschá chayllachu niwasun ima piensasqantaqa. Chaymi yanapananchik ñawinchasqanchik textokunamanta hinaspa yachachikuypi rikuriq dibujokunamanta tapuspanchik.

7. ¿Imanasqataq yachachisqanchik runamasinchikman iñiqmasinchikkunamanta videokunata qawachinanchik?

⁷ Jehova Diospa munasqanman hina kawsakunanmanta cuentata qukuruptinqa chayman hina ruwananpaqmi kallpanchananchik hukkaqnin iñiqmasinchikmanta videota qawachispa. Kusisqa kawsakunapaq sutiyuq qillqanchikpim kachkan achka iñiqmasinchikkunamanta videokuna “Allinta yachanapaq” hinaspa “Astawan yachanapaq” niqpi. * Huñunakuykunaman manaraq hamuptinqa Jehova Diosqa manam saqiruwanchu niq videotam qawachichwan, chaymi kachkan 14 kaq yachachikuypi “Astawan yachanapaq” niqpi. Yachachisqanchiktaqa amayá nisunchu: “Pay atiptinqa qampas atiwaqmi”, nispaqa. Kikinmi chaymantaqa cuentata qukunan. Videota qawaruspam nichwan bibliapa nisqanman hina kawsakunanpaq videopi qawasqanchik iñiqmasinchik ima ruwasqanmanta. Nisuntaqyá Jehova Dios imayna yanapasqanmantapas.

8. ¿Imaynatam yachachisqanchik runamasinchikta yanapachwan Diosta kuyananpaq?

⁸ Diosta kuyananpaqyá yanapasun. Sapa yachachisqanchikpiyá Jehova Diosninchik imayna sunquyuq kasqanta nisun. Yanapasun kusikuq hinaspa maskaqninkunata mana saqiruq Dios kasqanmanta cuentata qukunanpaq (1 Tim. 1:11; Heb. 11:6). Nisuntaqyá Jehova Diosqa anchata kuyawaspanchik allinninchikpaq yachachiwasqanchiktapas (Is. 48:17, 18). Yachachisqanchik runamasinchikqa Diosta astawan kuyaspanmi kamachikuyninkunata kasukunqa (1 Juan 5:3).

9. ¿Imaynatam Marcos 10:29, 30 nisqan yachachisqanchikta yanapanman bautizakuyman chayananpaq?

⁹ Yachachisqanchik runamasinchik bautizakuyman chayananpaqqa yaqapaschá apu runata Jesuspa nisqanman hina imatapas saqinan kanqa. Yaqapaschá llamkaynintapas saqinan kanqa Diospa munasqanman hina mana kaptinqa. Yaqa lliw biblia estudiaqkunataqmi Diosta mana kuyaq amistadkunata saqinanku kanqa. Wakinkutañataqmi Diosta servisqankurayku ayllunku chiqnispanku saqirunku. Jesusqa nirqam chaykunaqa sasa kananmanta. Ichaqa nirqataqmi Jehova Diosqa serviqninkunapa tukuy ima ruwasqanta  mana qunqananmanta hinaspa llapallan iñiqmasinkuna ayllun hina kananmanta (qaway Marcos 10:29, 30). ¿Imaynatam yachachisqanchikta yanapachwan iñiqmasinchikkuna ayllunku hina kananpaq? Chaymantayá yachaykusun.

10. ¿Imatam yachanchik iñiqmasinchik Manuelpa nisqanmanta?

¹⁰ Amistadninyá kasun. Yachachisqanchik runamasinchikqa pay kuyasqanchiktam yachanan. Mexico nacionmanta iñiqmasinchik Manuelmi kaynata nin: “Bibliamanta yachachiwaqniyqa manaraq qallarichkaptiykum imaynalla kasqayta tapuwaq. Chaymi mana manchakuspay imamantapas willaq kani. Chaywanmi mana iskayrayarqanichu kuyawaspan yanapay munawasqanmanta”, nispa.

11. ¿Imanasqataq allin yachachisqanchik runamasinchikwan kuska kayninchik?

¹¹ Imaynam Jesuspas qatiqninkunawan kuska kananpaq tiempochakuq, chaynam ñuqanchikpas yachachisqanchik runamasinchikpaq tiempochakunanchik (Juan 3:22). Yachasqanman hinaña kawsakuptinqa nichwanmi wasinchikpi imallatapas mikunapaq utaq sapa killapaq lluqsimuq videota kuska qawananchikpaqpas. Astawanraqmi allin kanman runakunapa costumbrekuna utaq fiestakuna ruwasqanku punchawkunapi wasinchikpi kuska kanapaq niyqa, chaynapi sapallan hina mana tarikunanpaq. Uganda nacionmanta Kazibwe sutiyuq iñiqmasinchikmi nin: “Jehova Diosmantaqa yacharqani manam yachachiwaptillanchu, yacharqanitaqmi yachachiwaqniywan hinaspa huk iñiqkunawan kuska kaspaypas. Paykunata qawaspaymi yacharqani Jehova Diosqa serviqninkuna kusisqa kanankuta munasqanta. Ñuqapas paykuna hina kusisqa kawsakuytam munarqani”, nispa.

12. ¿Imanasqataq mana sapallanchikchu yachachiq rinanchik?

¹² Huk iñiqmasinchikkunapiwanyá yachachiq risun. Sapallanchik utaq huk  iñiqmasillanchikwan sapa kuti yachachiq rinamantaqa wakin iñiqmasinchikkunapiwanmi rinanchik. Chaynapim hukkunatapas riqsinqa, hinaspapas paykunamantam yachanqa. Moldavia nacionmanta Dimitri sutiyuq iñiqmasinchikmi nin: “Yachachiwaqniypa sapa hamuqmasinmantam anchata yacharqani. Paykunam yachachiwaq yachasqayta imayna kasukunaypaq. Achka iñiqkunataña riqsisqayraykutaqmi manaña pinqakurqanichu huñunakuyman riytapas”, nispa.

13. ¿Imanasqataq yachachisqanchik runamasinchikta yanapananchik huñunakuyman hamunanpaq?

¹³ Huñunakuyman hamunanpaqyá yanapasun. Huñunakuymanqa hamunchik Dios kamachiwasqanchikraykum hinaspa payta yupaychananchikpaqmi (Heb. 10:24, 25). Chaymantapas, iñiqmasinchikkunaqa Dios serviyninchikpi ayllunchikkunam kanku. Paykunawan huñunakuypi kayqa mikuyta kuska mikuchkay hinam. Yachachisqanchik runamasinchik huñunakuyman mana hamuspanqa manam bautizakuymanqa chayanqachu. Chaymi manaraq hamuptinqa Kusisqa kawsakunapaq qillqawan kallpanchachwan.

14. ¿Imaynatam yachachisqanchik runamasinchikta kallpanchachwan huñunakuyman hamunanpaq?

¹⁴ Kusisqa kawsakunapaq qillqapi 10 kaq yachachikuywanmi kallpanchachwan yachachisqanchik runamasinchik huñunakuyman hamunanpaq. Diosmanta unay wataña willakuq wakin iñiqmasinchikkunam chay yachachikuywan yachachisqanku runakunata yanaparqaku huñunakuyman hamunankupaq. Ichaqa manam 10 kaq yachachikuymanraqchu chayananchik huñunakuyman hamunanpaq ninanchikpaqqa, aswanqa qallariymantam ninanchik. Yachachisqanchik runamasinchikkunaqa manam chaynallachu kanku, chaymi sapakamata imayna yanapanapi yuyaymanananchik. Huñunakuyman manaraq hamuptinkuqa amayá hukmanyasunchu, hinallayá kallpanchasun.

15. ¿Imakunatataq manchakunman yachachisqanchik runamasinchik?

¹⁵ Diosmanta yachachiwaptinchikqa yaqapaschá manchakurqanchik Jehova Diospa testigon kayta. Ichapas nirqanchik: “Manachusmi ñuqaqa wasin-wasin willakuq riytaqa atiymanchu”, nispa. Utaqchá manchakurqanchik ayllunchikkuna utaq amistadninchikkuna Diosmanta yachasqanchikwan piñakunankuta piensaspanchik. Jesuspas nirqam wakin runakuna qallariypi manchakunankumanta. Chaymi qatiqninkunata kallpancharqa mana manchakuspanku Diosta servinankupaq (Mat. 10:16, 17, 27, 28). ¿Imaynatam qatiqninkunata Jesus yanaparqa mana manchakuq kanankupaq? ¿Imaynatam ñuqanchikpas yachachisqanchikta yanapachwan? Chaymantayá yachaykusun.

16. ¿Imaynatam yachachisqanchikta yanapachwan yachasqanmanta hukkunaman willananpaq?

¹⁶ Yachasqanmanta hukkunaman willananpaqyá yachachisun. Jesuspa qatiqninkunapas manchakurqakuchá willakunankupaq kamachiptinqa. Chaywanpas, Jesusqa pikunaman willakunankupaq hinaspa imaynata willakunankupaq nispanmi yanaparqa (Mat. 10:5-7). Ñuqanchikpas Jesusta qatipakuspaqa yachachisqanchik runamasinchiktam yanapachwan Diosmanta pikunaman willananpaq. Kaynatam nichwan: “¿Riqsinkichu pitapas Diosmanta yachay munaqta? ¿Pitataq allinta yanapanman bibliapa kayna nisqan?”, nispa. Chaynata nispam yanapachwan pisi rimayllapi imaynata yachachinanpaq.  Allintaqmi kanman Kusisqa kawsakunapaq qillqapi “Wakin runakunam ninku” niqwan imayna willakunanpaq yanapayninchikpas. Chaykunawanmi yachachichwan bibliata servichikuspan sumaqllata willakunanpaq.

17. ¿Imaynatam yachachisqanchikta Mateo 10:19, 20, 29-31 nisqanwan yanapachwan Diospi hapipakunanpaq?

¹⁷ Diospi hapipakunanpaqyá yanapasun. Jesusmi qatiqninkunata nirqa Jehova Diosqa kuyasqanrayku yanapananmanta (qaway Mateo 10:19, 20, 29-31). Ñuqanchikpas yachachisqanchik runamasinchiktam yuyarichinanchik Jehova Dios yanapananmanta. Diospi hapipakunanpaqmi yachachichwan payta yanapananpaq kuska mañakuspa. Polonia nacionmanta huk iñiqmasinchikmi nin: “Yachachiwaqniymi sapa kuti Diosta mañakuq imakunapi yanapawananpaq. Mañakusqanman hina yanapawaptinmi ñuqapas Diosta mañakuyta qallaykurqani. Jehova Diosmá yanapawarqa huñunakuykunaman rinaypaq patronniyta niptiy”, nispa.

18. ¿Imanasqataq Jehova Diosqa anchata kuyawanchik?

¹⁸ Mana pimanpas kunan bibliamanta yachachispanchikpas iñiqmasinchikkunata riysispam biblia estudiaqkunata yanapachwan bautizakuyman chayanankupaq. Taytanchik Jehova Diosqa anchatam kuyan yachachisqanchik runamasinchikkunataqa. Ñuqanchiktapas anchatataqmi kuyawanchik payman asuykunankupaq tukuyta ruwaspa yanapasqanchikrayku (Is. 52:7).