1. Eaa ta te au pipi a Iesu i akakite ki te urupu tangata kia rave?

KUA putuputu mai te urupu tangata, te tane e te vaine, mei te au enua tukeke e te au reo keke. Kua tupu tetai mea umere i tera rā. Kua kite tetai pae ngati Iuda i te tuatua i te reo o te aronga no te au enua tukeke mai! E mea umere tikai te reira, inara e puapinga atu kia kite tatou eaa ta te ngati Iuda i tuatua kia ratou, e eaa ta te apotetoro ko Petero i tuatua ki te katoatoa. Te kapiti maira te karere te ka akaora ia ratou me akaari ratou i te akarongo ki roto ia Iesu Karaiti. Kua pakia te ngakau o te tangata i teia karere e kua akakeu ia ratou kia ui: “Akapeea matou nei?” Akakite a Petero kia ratou: “Kia bapetizoia kotou ravarai.”​—Anga. 2:37, 38.

2. Eaa ta tatou ka uriuri i roto i teia atikara? (Akara i te tutu i te kapi mua.)

² Tei tupu i muri mai, e mea umere katoa te reira. E 3,000 tangata kua papetitoia ei pipi na Karaiti i tera rā. Ko te akamata anga teia o te angaanga ta Iesu i akaue mai, kia akariro i te tangata ei pipi. E te raveia nei rai te reira i teia rā. I teia tuatau, kare e rauka ia tatou i te tauturu i tetai tangata no tetai nga ora ua, e oti kua tau aia kia papetitoia. Penei ka pou te au marama me kore te mataiti no tetai tangata apii kia taeria ki tera turanga. Ka anoanoia te angaanga pakari, mei taau i kite mai i roto i taau apii Pipiria ki tetai tangata. I teia atikara, ka uriuri tatou eaa taau ka rave no te tauturu i te tangata apii Pipiria kia riro mai ei pipi papetitoia.

3. Ia Mataio 28:19, 20, eaa ta te tangata apii ka rave kia tau no te papetito?

³ I mua ake ka papetitoia ai te tangata apii Pipiria, ka anoanoia aia kia taangaanga i ta te Pipiria e apii maira. (E tatau ia Mataio 28:19, 20.) Me rave te tangata apii i te reira, ka aite aia ki te “tangata pakari” i roto i ta Iesu akatutuanga, tei patu i tona are ki runga i te papa. (Mata. 7:24, 25; Luka 6:47, 48) Akapeea tatou me tauturu i te tangata apii kia rave i tana e apii ra? Ka uriuri tatou e toru ravenga.

4. Akapeea tatou me tauturu i te tangata apii kia tau no te papetito? (Akara i te pia “ Tauturu i Taau Tangata Apii Kia Akanoo e Kia Itae i Tana au Akakoroanga.”)

⁴ Tauturu i taau tangata apii kia akanoo i tetai akakoroanga. Eaa koe ka rave ei i te reira? Akamanako i teia akatutuanga. Me ka aere koe ki tetai ngai mamao na runga i toou motoka, penei ka tāpu poto koe ki tetai au ngai. Kare i reira toou tere e riro ei mea taitaia. Mei te reira rai, me akanoo e me itae te tangata apii i te au akakoroanga poto, ka taeria iaia te akakoroanga kia papetito. Taangaanga i te tuanga “Akakoroanga” i roto i te puka Oraanga Mataora e Tuatau Ua Atu! no te tauturu iaia kia tere ki mua. I te openga o te au apii tataki tai, e uriuri akapeea te akakoroanga me tauturu iaia kia rave i tana e apii ra. Me e akakoroanga ke taau i manako mai ka tau kiaia, e tata i te reira ki te ngai “Mea ke.” E uriuri i te au akakoroanga poto e te mea maata ki taau tangata apii.

5. Ia Mareko 10:17-22, eaa ta Iesu i akakite ki te tangata apinganui kia rave, e no teaa ra?

⁵ Tauturu i taau tangata apii kia taui i tona oraanga. (E tatau ia Mareko 10:17-22.) Kite a Iesu e ka ngatā i te tangata  apinganui i te oko atu i tana au apinga. (Mare. 10:23) Akakite a Iesu kia taui aia i tona tu oraanga. No teaa ra? No to Iesu inangaro maata iaia. Tetai taime, kare tatou e akamaroiroi i te tangata apii kia taangaanga i tana e apii ra, no te mea penei kare aia i papa ake no te reira. Penei ka pou tetai tuatau no te tangata apii kia kopae i te tangata taito e kia akatangata ou iaia. (Kolo. 3:9, 10) Inara, ko te viviki ia koe i te uriuri i teia manako kiaia, ko te viviki atu ïa iaia i te akamata i te rave i te au tauianga. Me pera koe, te akaari ra koe i toou inangaro nona.​—Sala. 141:5; Mase. 27:17.

6. Eaa tatou ka ui ei i te au uianga kia kite i te manako o te tangata apii?

⁶ E mea puapinga kia ui tatou ki te tangata apii i tona manako no runga i te apii. E ui i te au uianga kia kite koe i tana i mārama e tana e irinaki ra. Me rave putuputu koe i te reira, ka māmā ia koe i te uriuri i te au tumu manako ngatā kiaia. E maata te au uianga i roto i te puka Oraanga Mataora e Tuatau Ua Atu! Ei akaraanga, i te apii 04, te ui ra: “Eaa to Iehova manako me kapiki koe i tona ingoa?” I te apii 09: “Eaa te au mea ka inangaro koe i te pure?” Penei, ka anoano te tangata apii i tetai taime no te akamanako akapeea aia me pau i teia au uianga. Ka rauka ia koe i te tereni iaia kia akamanako i te au irava e te au tutu i roto i te puka.

7. Akapeea tatou me taangaanga meitaki i te au tupuanga o tetai ke?

⁷ Me mārama taau tangata apii eaa tana ka rave, e akakite i tetai tupuanga no te akamaroiroi iaia kia rave i te reira. Ei akaraanga, me te ngatā ra i te tangata apii i te aere ki te au uipaanga, e akaari i te vitio Akono a Iehova Iaku i roto i te tuanga “Kimi Kimi” o te apii 14. I roto i te puka Oraanga Mataora e Tuatau Ua Atu!, ka kite mai koe i te au tupuanga i roto i te tuanga “Kimi Oonu” me kore “Kimi Kimi.” * Eiaa e akaaite i taau tangata apii ki tetai tangata ke na te karanga anga, “Me ka rauka iaia, ka rauka katoa ia koe.” E tuku iaia kia rave i tana uaorai ikianga. Inara, e uriuri i te au manako puapinga tei taangaanga te tangata i roto i te vitio. Pera te au irava e te au apinga tana i rave. Me ka rauka, e uriuri katoa akapeea a Iehova te tauturu anga i tera tangata.

8. Akapeea tatou me tauturu i te tangata apii kia inangaro maata ia Iehova?

⁸ Tauturu i taau tangata apii kia inangaro maata ia Iehova. Akapeea? E tauturu iaia kia kite i to Iehova au tu. Kia kite katoa e e Atua mataora a Iehova te ka tauturu i te aronga tei inangaro maata Iaia. (1 Timo. 1:11; Ebe. 11:6) Akakite ki te tangata apii i te puapinga te ka rauka me taangaanga aia i te reira, e kia akamārama e te akaata mai nei teia i to Iehova aroa nona. (Isa. 48:17, 18) Ka akakeuia te tangata apii kia rave i te au tauianga ka anoanoia, me inangaro maata aia ia Iehova.—1 Ioa. 5:3.

9. Ia Mareko 10:29, 30, eaa te ka tauturu i tetai tangata kia rave i te au akaatinga anga kia tau kia papetitoia?

⁹ Kia tau no te papetito, ka anoanoia te tangata apii kia rave i te au akaatinga  anga. Mei te tangata apinganui tei taikuia i mua ana, ka anoanoia te tangata apii kia akaruke i tetai au apinga materia. Me kare tana ngai angaanga e rotai ana ki te au kaveinga Pipiria, ka anoanoia aia kia taui i te reira. Kua akaruke tetai pae i to ratou au oa kare e inangaro ana ia Iehova. Tetai pae, kua kopaeia e to ratou kopu tangata kare e reka ana i te Au Kite o Iehova. Akakite a Iesu e ka ngatā i tetai pae i te rave i teia au akaatinga anga. Inara kua taputou mai aia e ko te aronga te ka aru iaia, kare ratou e taitaia. Ka oronga mai a Iehova i tetai kopu tangata pae vaerua no ratou. (E tatau ia Mareko 10:29, 30.) Akapeea koe me tauturu i taau tangata apii kia puapingaia mei teia apinga aroa?

10. Eaa taau i apii mai mei ta Manuel i tuatua?

¹⁰ Akatupu i te pirianga oa ki taau tangata apii. E mea puapinga kia akaari ki taau tangata apii e te manako ra koe iaia. No teea ra? Akamanako i te tuatua a Manuel tei noo i Mexico. Te akamaaraanga i te tuatau e apii ra aia i te Pipiria, karanga aia: “I mua ake i te au apii anga tataki tai, ka ui mai toku puapii e peea ua au. Kua tauturu teia iaku kia marū e kia rauka i te tuatua no runga i tetai ua atu apinga. Kite tikai au e te manako maira aia iaku.”

11. Akapeea ta tatou aronga apii e puapingaia ai me akapou ratou i tetai taime kia tatou?

¹¹ E akapou i tetai taime ki taau tangata apii, mei ta Iesu i rave ki tana au pipi. (Ioa. 3:22) Me ka rauka, e pati iaia ki toou kainga no te inu kaope, te kaikai me kore no te akarakara i te JW Broadcasting. Penei ka āriki aia i taau patianga i te au tuatau orote, me noo aia koia anake ua. Karanga a Kazibwe tei noo i Uganda, “Toku manako, e maata taku i apii mai no runga ia Iehova mei te akapouanga i tetai taime ki toku puapii, e mei te rave anga i taku apii Pipiria. Kite  mai au i to Iehova inangaro maata no tona iti tangata e to ratou tu mataora. Ko tera taku ka inangaro i roto i toku oraanga.”

12. Eaa tatou ka apai ei i te au taeake tukeke ki tetai apii Pipiria?

¹² Pati i te au taeake tukeke ki te apii Pipiria. Tetai taime, penei ka manako koe e māmā ake kia aere ko koe anake ua, me kore kia apai i taua taeake rai. Inara ka puapingaia te tangata apii me apai koe i te au taeake tukeke. Karanga a Dmitrii tei noo i Moldova, “Te au taeake tukeke tei aere mai ki taku apii, e tu umere tikai ta ratou akamārama anga i te au apii. Kua tauturu teia iaku kia kite i te au ravenga tukeke no te taangaanga i taku i apii. Kare katoa au i akamā i te aere ki taku uipaanga mua no te mea kua aravei takere au i te au taeake e te au tuaine.”

13. Eaa tatou ka tauturu ei i te tangata apii kia aere ki te au uipaanga?

¹³ Tauturu i taau tangata apii kia aere ki te au uipaanga. No teea ra? No te mea kua akaue a Iehova i tona au tavini kia akaputuputu ki te ngai okotai; no te akamori iaia. (Ebe. 10:24, 25) Pera katoa, e ngutuare tangata pae vaerua te au taeake e te au tuaine no tatou. Me noo kapiti tatou i ko i te uipaanga, mei te mea rai e te kaikai kapiti ra tatou i te kainga. Me tauturu koe i taau tangata apii kia aere ki te au uipaanga, te tauturu ra koe iaia kia akapapa no te papetito. Inara, penei ka ngatā iaia i te rave i te reira. Akapeea te puka Oraanga Mataora e Tuatau Ua Atu! me tauturu iaia kia autu i tetai ua atu manamanata?

14. Akapeea tatou me akamaroiroi i ta tatou tangata apii kia aere ki te au uipaanga?

¹⁴ E taangaanga i te apii 10 o te puka Oraanga Mataora e Tuatau Ua Atu! no te akamaroiroi i taau tangata apii. Karanga te au taeake tukatau tei patiia kia tamata i teia apii e, kua tauturu tikai teia i ta ratou tangata apii kia aere ki te au uipaanga. Te tika, auraka e tiaki kia tae roa ki te apii 10 i mua ake ka pati ei iaia kia aere ki te au uipaanga. E pati vave e te putuputu. Tukeke te manamanata o te aronga apii Pipiria. No reira, e akara meitaki i tona turanga ma te oronga i te tauturu ka anoanoia. Auraka e taitaia me kare aia e aere vave mai ki te uipaanga. Kia maata ra te akakoromaki e auraka e tuku i te ‘au.

15. Eaa te tu mataku te ka tupu ki te tangata apii?

¹⁵ Maara ra ainei ia koe te riro mai anga koe ei Kite no Iehova? Penei kua manako koe e kare e rauka ia koe i te tutu aere ki te tangata. Me kore, penei kua mataku koe e ka patoi toou kopu tangata e toou au oa ia koe. Me koia ïa, ka mārama i reira koe me mataku taau tangata apii. Akakite a Iesu e ka tupu te reira. No reira, kua akamaroiroi aia i tana au pipi auraka e akamutu i te tavini ia Iehova. (Mata. 10:16, 17, 27, 28) Akapeea a Iesu te tauturu anga ia ratou kia kore e mataku? Akapeea koe me aru i tona akaraanga?

16. Akapeea tatou me tereni i ta tatou tangata apii kia akakite i tona akarongo?

¹⁶ Tereni i taau tangata apii kia akakite i tona akarongo. Penei kua mataku ana te au pipi a Iesu te tono anga aia ia ratou kia tutu aere. Inara kua tauturu aia ia ratou na te akakiteanga e ka tutu aere kiea, e eaa te ka tuatua. (Mata. 10:5-7) Akapeea koe me aru i to Iesu akaraanga? Akakite ki taau tangata apii i te ngai ka  rauka iaia i te tutu aere. Ei akaraanga, e ui me kua kite aia i tetai tangata te ka puapingaia mei te tuatua mou. E oti, tauturu iaia kia kite i tana ka tuatua. Me ka rauka, e apiipii i roto i te tuanga “Karanga te Tangata” e te “Penei ka Ui Tetai Tangata,” i roto i te puka Oraanga Mataora e Tuatau Ua Atu! Me rave koe i te reira, e tereni i taau tangata apii kia taangaanga i te Pipiria kia oronga i te pauanga meitaki e te māmā ua.

17. Akapeea tatou me taangaanga ia Mataio 10:19, 20, 29-31 no te tauturu i te tangata apii kia irinaki ia Iehova?

¹⁷ Tauturu i taau tangata apii kia irinaki ia Iehova. Akapapu a Iesu ki tana au pipi e ka tauturu a Iehova ia ratou no tona inangaro maata ia ratou. (E tatau ia Mataio 10:19, 20, 29-31.) E akakite ki taau tangata apii e ka tauturu katoa a Iehova iaia. Tauturu iaia kia irinaki ia Iehova na te pure kapiti anga no runga i tana au akakoroanga. Karanga a Franciszek tei noo i Poland, “Ka taiku ua rai toku puapii i taku au akakoroanga i roto i tana pure. Te kite anga au akapeea a Iehova te pauanga i te reira, kua akamata au i te pure. Kite mai au i ta Iehova tauturu te akatikaanga taku ngai angaanga kia aere au ki te au uipaanga e te uruoaanga.”

18. Eaa to Iehova manako no te angaanga ta te au puapii Kerititiano e rave ra?

¹⁸ Te manako maata maira a Iehova i ta tatou aronga apii Pipiria. E te mareka ra aia i te kite i te maroiroi o te au puapii Kerititiano i te tauturu i te tangata kia akavaitata kiaia. (Isa. 52:7) Me kare koe e rave ana i tetai apii Pipiria, ka rauka rai ia koe i te tauturu i te aronga apii kia papetitoia na te aru anga i te au taeake ki ta ratou apii.