1. Со вакерѓе е Исусескере ученикија буте манушенге те керен?

ЈЕКХ баро мноштво таро мурша хем џувља таро бут пхувја хем таро различна чхибја кхединѓе пе ко Ерусалим. Адава диве случинѓа пе нешто посебно. Таро јекх пути несаве Евреија почминѓе те керен лафи ко чхибја таро народија со але ко Ерусалим! Адава бут изненадинѓа адале манушен, ама панда повише изненадинѓа лен адава со вакерѓе ленге о Евреија хем о апостол Петар. Акала мануша сиклиле кај ола шај те овен спасиме ако сикавена вера ко Исус Христос. Акаја порака погодинѓа ленгере виле. Адава добором влијајнѓа упри ленде со пучле: „Со ваљани те кера?“ О Петар вакерѓа ленге: „Секова јекх тумендар нека крстинел пе“ (Дела 2:37, 38).

2. Со ка дикха ки акаја статија? (Дикх и слика тари насловно страна.)

² Пало адава случинѓа пе нешто бут шукар. Адава диве крстинѓе пе околу 3.000 мануша, хем уле е Исусескере ученикија. Адава сине о почеток тари бари задача со заповединѓа ла о Исус пле следбениконге — те керен ученикија. Лескере следбеникија панда керена адаја задача. Авдиве нашти кераја лафи некасаја некобор саатија хем те овел спремно те крстинел пе. Шај ка ваљани масекија или чак берш или повише те шај јекх интересенти те крстинел пе. Ваљани баро трудо те шај те поможинел пе некаске те овел е Христосескоро ученико. Акава сигурно џанеа ако ко моменти проучинеа некасаја и Библија. Ки акаја статија ка дикха сар шај те поможине е интересентеске те крстинел пе.

3. Спрема Матеј 28:19, 20, со мора о интересенти те керел те шај те крстинел пе?

³ Англедер те крстинел пе, јекх интересенти ваљани те применинел адава со сикљовела тари Библија. (Читин Матеј  28:19, 20.) Кеда о интересенти применинела адава со сикљовела, ов овела сар „о мудро мануш“ тари е Исусескири споредба кова со хор рандела те шај те градинел пло кхер ко зорало бар (Мат. 7:24, 25; Лука 6:47, 48). Сар шај те поможина е интересентеске те применинел адава со сикљовела? Те дикха трин буќа со шај те кера.

4. Сар шај те поможина е интересентеске понадари да те напредујнел те шај те крстинел пе? (Дикх исто аѓаар и рамка „ Поможин е интересентеске те чхивел песке целија хем те исполнинел лен“.)

⁴ Поможин е интересентеске те чхивел песке целија. Соске ваљани те кере адава? Размислин башо акава пример: Ако би планиринеа те џа ко јекх дур тхан, шај ка одлучине џикоте возинеа те ачхове ко шуже тхана. Ако кереа аѓаар, тегани о тхан коте со мангеа те ресе нане те изглединел туке бут дур. Слично аѓаар, кеда о интересенти чхивела песке целија кола со шај башо кратко време те исполнинел лен, ов ка дикхел кај шај те исполнинел и цел те крстинел пе. Користин и рамка „Цел“ таро лил Ов бахтало засекогаш те шај те поможине е интересентеске те напредујнел. Ко крајо тари секоја лекција, керен лафи сар шај и цел те поможинел леске те применинел адава со сиклило. Ако мангеа о интересенти те исполнинел несави јавер цел, шај те пишине адава ко тхан коте со пишинела „Јавер цел“. Редовно кер лафи е интересентеа башо целија со шај те исполнинел лен ко кратко време, хем башо адала коленге со ка ваљанел леске повише време.

5. Сар со пишинела ко Марко 10:17-22, со вакерѓа о Исус јекхе барвале манушеске те керел, хем соске?

⁵ Поможин е интересентеске те керел промене ко живото. (Читин Марко 10:17-22.) О Исус џанља кај ка овел пхаро јекхе барвале манушеске те бикинел са со иси ле (Мар. 10:23). Сепак, о Исус вакерѓа  акале манушеске те керел асавки бари промена ко пло живото. Соске? Адалеске со о Исус мангела ле сине. Понекогаш шај на охрабринаја е интересенте те применинел адава со сикљовела адалеске со мислинаја кај панда нане спремно те керел адаја промена. Несаве интересентенге ваљани време те керен промене ко пумаро живото хем те уравен и неви личност (Кол. 3:9, 10). Ама, со посигате ка кере отворено лафи леа баши бути со ваљани те менинел, добором посигате ов ка шај те почминел те керел адаја промена. Ако кереа леа лафи башо адава ту сикавеа кај грижинеа тут леске (Пс. 141:5; Изр. 27:17).

6. Соске тано важно те пуча е интересенте со мислинела баши несави тема?

⁶ Важно тано те пуча е интересенте со мислинела баши несави тема. Адава ка поможинел туке те дознајне со о интересенти хаљовела хем ко со верујнела. Ако кереа адава редовно, полокхо ка овел те кере леа лафи башо буќа со шај ка овен леске пхаре те прифатинел лен. О лил Ов бахтало засекогаш иси ле бут асавке пучиба. На пример, ки лекција 04 иси о пучибе: „Со мислинеа, сар осетинела пе о Јехова кеда користинеа лескоро анав?“ Ки лекција 09 иси о пучибе: „Башо кола буќа ту би мангеа сине те молине тут?“ Ко почеток шај ка овел пхаро е интересентеске те одговоринел ко асавке пучиба. Ама ту шај те поможине леске аѓаар со ка поттикнине ле те размислинел башо библиска стихија хем башо слике ко лил.

7. Сар шај шукар те користина о искуствија?

⁷ Кеда о интересенти ка хаљол со ваљани те керел, користин искуствија те шај те охрабрине ле те керел адава. На пример, ако о интересенти на авела редовно ко состанокија шај те сикаве леске о видеоклипи О Јехова грижинѓа пе манге со шај те аракхе ле ки рамка „Истражин“ ки лекција 14. Ко бут лекцие таро лил Ов бахтало засекогаш ка аракхе асавке искуствија или ки рамка „Дознајн повише“ или ки рамка „Истражин“. * Ма споредин е интересенте некасаја јавереа аѓаар со ка вакере: „Ако ов шај те керел, шај те кере ту да“. Мукх о интересенти коркори те авел ко адава заклучок. Наместо адава, кер лафи башо буќа со поможинѓе е манушеске таро видео клипи те применинел о библиска сикљојба. Шај те нагласине о главно стихо или нешто практично со керѓа адава мануш. Секогаш кеда шај нагласин сар о Јехова поможинѓа леске.

8. Сар шај те поможина е интересентеске те мангел е Јехова?

⁸ Поможин е интересентеске те мангел е Јехова. Сар шај те кере адава? Роде прилике те сикаве е интересенте башо е Јеховаскере особине. Поможин леске те дикхел кај о Јехова тано бахтало Девел хем кај поможинела околен со мангена ле (1. Тим. 1:11; Евр. 11:6). Сикав леске кај ка овел ле корист ако применинела адава со сикљовела, хем објаснин леске кај о Јехова аѓаар сикавела кај мангела ле (Иса. 48:17, 18). Со повише о интересенти мангела е Јехова добором повише ка мангел те керел о потребна промене (1. Јов. 5:3).

9. Спрема Марко 10:29, 30, со шај те поможинел е интересентеске те керел жртве те шај те крстинел пе?

⁹ Те шај те напредујнел хем те крстинел пе, о интересенти ваљани те керел жртве. Исто сар о барвало мануш коле со спомнинѓем поангле, несаве интересентија шај ваљани те керен жртве ко материјално поглед. Ако ленгири бути нане ко склад е библиска начелонцар,  шај ка ваљани те роден јавер бути. Бут интересентија шај ка ваљани те чхинавен те овен амала околенцар со на мангена е Јехова. Јавера шај тане отфрлиме тари пумари фамилија која со на мангела е Јеховаскере сведокон. О Исус сине свесно кај несаве манушенге ка овел пхаро те керен асавке жртве. Ама, ов ветинѓа кај окола со џана пали лесте нане те овен разочариме. О Јехова ка наградинел лен аѓаар со ка дел лен јекх духовно фамилија која со мангела лен. (Читин Марко 10:29, 30.) Сар шај те поможине е интересентеске те овел ле корист таро акава бут шужо поклон?

10. Со сикљовеа таро е Мануелескоро искуство?

¹⁰ Ов амал е интересентеа. Бут тано важно те сикаве е интересентеске кај ту грижинеа тут леске. Соске? Дикх со вакерела о Мануел, кова со живинела ко Мексико. Ов објаснинела сар о пхрал, кова со проучинѓа леа, поможинѓа леске кеда сине интересенти. Ов вакерела: „Англедер те почмина и студија, о пхрал секогаш пучела ман сине сар сиум. Ов поможинѓа манге те опуштинав ман хем отворено те керав леа лафи башо јавера да теме. Шај сине те дикхав кај ов чаче грижинела пе манге“.

11. Сави корист ка овел е интересенте кеда ка накхавел време аменцар?

¹¹ Накхав време е интересентеа, сар со о Исус накхавѓа време пле следбениконцар (Јован 3:22). Ако шај канин е интересенте, кова со шукар напредујнела, ки туте кхере ки кафа или те хан заедно маро или те дикхен заедно амари масекоскири емисија таро JW Broadcasting^®. О интересенти шај посебно ка ценинел асавки покана ко време кеда иси празникија кеда шај ка осетинел пе коркори. О Казибве, кова со живинела ки Уганда, вакерела: „Мислинава кај сиклиљум добором бут башо Јехова на само тари студија, него исто аѓаар таро адава со дружинѓум ман е пхралеа кова со проучинѓа манцар. Дикхљум кобор бут о Јехова грижинела пе пле  народоске, хем кобор тане бахтале. Ме да мангљум адава ко мло живото“.

12. Соске ваљани различна објавителен те канина ко библиско курси?

¹² Канин различна објавителен ко библиско курси. Понекогаш шај полокхо аменге те џа коркори ко библиско курси или те ла аменцар секогаш е исто објавителе. Иако шај аменге полокхо те кера аѓаар, ка овел амаре интересенте побари корист ако канинаја различна објавителен ко библиско курси. О Димитри, кова со живинела ки Молдавија, вакерела: „Секова објавители со ало ки мли студија сине ле пло начин сар те објаснинел о буќа. Адава поможинѓа манге те дикхав о материјали таро различна стране. Исто аѓаар, на лаџандиљум добором бут кеда гељум ко мло прво состанок соске више запознајнѓум буте пхрален хем пхењен“.

13. Соске ваљани те поможина е интересентеске те авел ко состанокија?

¹³ Поможин е интересентеске те авел ко состанокија. Соске ваљани те кере адава? Адалеске со о Јехова заповединѓа пле слугенге те кхеден пе, а адава тано дело таро амаро обожавање (Евр. 10:24, 25). Освен адава, о пхраља хем о пхења тане амари духовно фамилија. Кеда сием ленцар ко состанокија, адава тано сар те пхене бешаја заедно кхере хем уживинаја ко јекх бут шужо хајбе. Кеда поможинеа е интересентеске те овел присутно ко состанокија, ту поможинеа леске те керел јекх таро најважна чекорија те шај те крстинел пе. Адава шај те овел леске пхаро те керел. Сар шај о лил Ов бахтало засекогаш те поможинел е интересентеске те накхавел било саво предизвик со чхинавела ле те авел ко состанокија?

14. Сар шај те поттикнина е интересенте те авел ко состанокија?

¹⁴ И лекција 10 таро лил Ов бахтало засекогаш шај те поможинел туке те поттикнине е интересенте те авел ко состанокија. Англедер те овел завршимо акава лил, несаве искусна објавителија сине замолиме те користинен адаја лекција кеда проучинена сине е интересентенцар. Ола вакерѓе кај адаја лекција бут поможинѓа ленге хем сине успешно. Џанѓола пе, на ваљани те аџикере џи ки лекција 10 те шај те канине е интересенте те авел ко состанокија. Канин ле со шај посигате хем кер адава често. Са е интересентен нане лен о иста предизвикија. Адалеске трудин тут те приметине саве потребе иси е интересенте хем пало адава размислин сар шај те поможине леске ко практично начин. Ма обесхрабрин тут ако на почминела одма те авел ко состанокија. Ов стрпливо, ама продолжин понадари да те канине ле.

15. Таро со шај дарала о интересенти?

¹⁵ Дали сине тут хари дар англедер те ове е Јеховаскоро сведоко? Шај мислинѓан кај никогаш ка нашти те проповедине таро кхер ко кхер или шај дараја сине кај тли фамилија или тле амала ка противинен пе туке. Ако оја, тегани ту шај те хаљове сар осетинела пе о интересенти. О Исус вакерѓа кај шај те појавинел пе асавки дар. Ама, ов поттикнинѓа пле следбеникон те на мукхен и дар те чхинавел лен те служинен е Јеховаске (Мат. 10:16, 17, 27, 28). Сар поможинѓа о Исус пле следбениконге те на даран? Хем сар шај ту да те кере аѓаар?

16. Сар шај те сикава е интересенте те проповединел?

¹⁶ Постепено сикав е интересенте те проповединел. Е Исусескере ученикија шај дарана сине кеда ваљанѓе те џан те проповединен. Ама, о Исус поможинѓа ленге аѓаар со вакерѓа ленге коте те проповединен хем со те вакерен (Мат. 10:5-7). Сар шај те џа пало е Исусескоро пример? Поможин е интересентеске  те хаљол коте шај те проповединел. На пример, шај те пуче ле дали џанела некас каске со ка овел корисно те џанел несаво конкретно библиско чачипе. Тегани поможин леске те спреминел со те вакерел аѓаар со ка сикаве леске ко едноставно начин те проповединел баши адаја тема. Ако тано соодветно, шај те вежбине леа аѓаар со ка користине о делија „Несаве шај вакерена“ хем „Несаве шај пучена“ со аракхљовена ко лил Ов бахтало засекогаш. Кеда кереа адава, концентририн тут те сикаве е интересенте те користинел и Библија хем те дел едноставна хем тактична одговорија.

17. Сар шај те користина Матеј 10:19, 20, 29-31 те шај те поможина е интересентеске те овел ле доверба ко Јехова?

¹⁷ Поможин е интересентеске те овел ле доверба ко Јехова. О Исус уверинѓа пле ученикон кај о Јехова ка поможинел ленге адалеске со мангела лен сине. (Читин Матеј 10:19, 20, 29-31.) Вакер е интересентеске кај о Јехова ка поможинел леске да. Шај те поможине леске те овел ле доверба ко Јехова аѓаар со заедно леа ка молине тут башо лескере целија. О Франчишек, кова со живинела ки Полска, вакерела: „О пхрал со проучинела сине манцар често спомнинела сине мле целија ко пле молитве. Кеда дикхљум сар о Јехова одговоринела ко лескере молитве, одма почминѓум ме да те молинав ман. Осетинѓум кај о Јехова поможинѓа манге кеда ваљанѓум те родав слободна диве тари бути те шај те џав ко состанокија хем ко конгрес“.

18. Сар о Јехова дикхела ко објавителија со трудинена пе те керен ученикија?

¹⁸ Е Јеховаске тане бут важна о интересентија. Ов џанела кобор трудинена пе о објавителија те поможинен е манушенге те овен леа паше хем адалеске бут мангела лен (Иса. 52:7). Иако ко моменти шај на водинеа библиско курси, сепак шај те поможине е интересентенге те крстинен пе аѓаар со сиан присутно ко библиска курсија со водинена јавера објавителија.