1. So vakergje e Isuseskere učenikija bute manušenge te keren?

JEKH baro mnoštvo taro murša hem džuvlja taro but phuvja hem taro različna čhibja khedingje pe ko Erusalim. Adava dive slučingja pe nešto posebno. Taro jekh puti nesave Evreija počmingje te keren lafi ko čhibja taro narodija so ale ko Erusalim! Adava but iznenadingja adale manušen, ama panda poviše iznenadingja len adava so vakergje lenge o Evreija hem o apostol Petar. Akala manuša siklile kaj ola šaj te oven spasime ako sikavena vera ko Isus Hristos. Akaja poraka pogodingja lengere vile. Adava doborom vlijajngja upri lende so pučle: „So valjani te kera?“ O Petar vakergja lenge: „Sekova jekh tumendar neka krstinel pe“ (Dela 2:37, 38).

2. So ka dikha ki akaja statija? (Dikh i slika tari naslovno strana.)

² Palo adava slučingja pe nešto but šukar. Adava dive krstingje pe okolu 3.000 manuša, hem ule e Isuseskere učenikija. Adava sine o početok tari bari zadača so zapovedingja la o Isus ple sledbenikonge — te keren učenikija. Leskere sledbenikija panda kerena adaja zadača. Avdive našti keraja lafi nekasaja nekobor saatija hem te ovel spremno te krstinel pe. Šaj ka valjani masekija ili čak berš ili poviše te šaj jekh interesenti te krstinel pe. Valjani baro trudo te šaj te pomožinel pe nekaske te ovel e Hristoseskoro učeniko. Akava sigurno džanea ako ko momenti proučinea nekasaja i Biblija. Ki akaja statija ka dikha sar šaj te pomožine e interesenteske te krstinel pe.

3. Sprema Matej 28:19, 20, so mora o interesenti te kerel te šaj te krstinel pe?

³ Angleder te krstinel pe, jekh interesenti valjani te primeninel adava so sikljovela tari Biblija. (Čitin Matej  28:19, 20.) Keda o interesenti primeninela adava so sikljovela, ov ovela sar „o mudro manuš“ tari e Isuseskiri sporedba kova so hor randela te šaj te gradinel plo kher ko zoralo bar (Mat. 7:24, 25; Luka 6:47, 48). Sar šaj te pomožina e interesenteske te primeninel adava so sikljovela? Te dikha trin bukja so šaj te kera.

4. Sar šaj te pomožina e interesenteske ponadari da te napredujnel te šaj te krstinel pe? (Dikh isto agjaar i ramka „ Pomožin e interesenteske te čhivel peske celija hem te ispolninel len“.)

⁴ Pomožin e interesenteske te čhivel peske celija. Soske valjani te kere adava? Razmislin bašo akava primer: Ako bi planirinea te dža ko jekh dur than, šaj ka odlučine džikote vozinea te ačhove ko šuže thana. Ako kerea agjaar, tegani o than kote so mangea te rese nane te izgledinel tuke but dur. Slično agjaar, keda o interesenti čhivela peske celija kola so šaj bašo kratko vreme te ispolninel len, ov ka dikhel kaj šaj te ispolninel i cel te krstinel pe. Koristin i ramka „Cel“ taro lil Ov bahtalo zasekogaš te šaj te pomožine e interesenteske te napredujnel. Ko krajo tari sekoja lekcija, keren lafi sar šaj i cel te pomožinel leske te primeninel adava so siklilo. Ako mangea o interesenti te ispolninel nesavi javer cel, šaj te pišine adava ko than kote so pišinela „Javer cel“. Redovno ker lafi e interesentea bašo celija so šaj te ispolninel len ko kratko vreme, hem bašo adala kolenge so ka valjanel leske poviše vreme.

5. Sar so pišinela ko Marko 10:17-22, so vakergja o Isus jekhe barvale manušeske te kerel, hem soske?

⁵ Pomožin e interesenteske te kerel promene ko životo. (Čitin Marko 10:17-22.) O Isus džanlja kaj ka ovel pharo jekhe barvale manušeske te bikinel sa so isi le (Mar. 10:23). Sepak, o Isus vakergja  akale manušeske te kerel asavki bari promena ko plo životo. Soske? Adaleske so o Isus mangela le sine. Ponekogaš šaj na ohrabrinaja e interesente te primeninel adava so sikljovela adaleske so mislinaja kaj panda nane spremno te kerel adaja promena. Nesave interesentenge valjani vreme te keren promene ko pumaro životo hem te uraven i nevi ličnost (Kol. 3:9, 10). Ama, so posigate ka kere otvoreno lafi lea baši buti so valjani te meninel, doborom posigate ov ka šaj te počminel te kerel adaja promena. Ako kerea lea lafi bašo adava tu sikavea kaj grižinea tut leske (Ps. 141:5; Izr. 27:17).

6. Soske tano važno te puča e interesente so mislinela baši nesavi tema?

⁶ Važno tano te puča e interesente so mislinela baši nesavi tema. Adava ka pomožinel tuke te doznajne so o interesenti haljovela hem ko so verujnela. Ako kerea adava redovno, polokho ka ovel te kere lea lafi bašo bukja so šaj ka oven leske phare te prifatinel len. O lil Ov bahtalo zasekogaš isi le but asavke pučiba. Na primer, ki lekcija 04 isi o pučibe: „So mislinea, sar osetinela pe o Jehova keda koristinea leskoro anav?“ Ki lekcija 09 isi o pučibe: „Bašo kola bukja tu bi mangea sine te moline tut?“ Ko početok šaj ka ovel pharo e interesenteske te odgovorinel ko asavke pučiba. Ama tu šaj te pomožine leske agjaar so ka pottiknine le te razmislinel bašo bibliska stihija hem bašo slike ko lil.

7. Sar šaj šukar te koristina o iskustvija?

⁷ Keda o interesenti ka haljol so valjani te kerel, koristin iskustvija te šaj te ohrabrine le te kerel adava. Na primer, ako o interesenti na avela redovno ko sostanokija šaj te sikave leske o videoklipi O Jehova grižingja pe mange so šaj te arakhe le ki ramka „Istražin“ ki lekcija 14. Ko but lekcie taro lil Ov bahtalo zasekogaš ka arakhe asavke iskustvija ili ki ramka „Doznajn poviše“ ili ki ramka „Istražin“. * Ma sporedin e interesente nekasaja javerea agjaar so ka vakere: „Ako ov šaj te kerel, šaj te kere tu da“. Mukh o interesenti korkori te avel ko adava zaklučok. Namesto adava, ker lafi bašo bukja so pomožingje e manušeske taro video klipi te primeninel o bibliska sikljojba. Šaj te naglasine o glavno stiho ili nešto praktično so kergja adava manuš. Sekogaš keda šaj naglasin sar o Jehova pomožingja leske.

8. Sar šaj te pomožina e interesenteske te mangel e Jehova?

⁸ Pomožin e interesenteske te mangel e Jehova. Sar šaj te kere adava? Rode prilike te sikave e interesente bašo e Jehovaskere osobine. Pomožin leske te dikhel kaj o Jehova tano bahtalo Devel hem kaj pomožinela okolen so mangena le (1. Tim. 1:11; Evr. 11:6). Sikav leske kaj ka ovel le korist ako primeninela adava so sikljovela, hem objasnin leske kaj o Jehova agjaar sikavela kaj mangela le (Isa. 48:17, 18). So poviše o interesenti mangela e Jehova doborom poviše ka mangel te kerel o potrebna promene (1. Jov. 5:3).

9. Sprema Marko 10:29, 30, so šaj te pomožinel e interesenteske te kerel žrtve te šaj te krstinel pe?

⁹ Te šaj te napredujnel hem te krstinel pe, o interesenti valjani te kerel žrtve. Isto sar o barvalo manuš kole so spomningjem poangle, nesave interesentija šaj valjani te keren žrtve ko materijalno pogled. Ako lengiri buti nane ko sklad e bibliska načeloncar,  šaj ka valjani te roden javer buti. But interesentija šaj ka valjani te čhinaven te oven amala okolencar so na mangena e Jehova. Javera šaj tane otfrlime tari pumari familija koja so na mangela e Jehovaskere svedokon. O Isus sine svesno kaj nesave manušenge ka ovel pharo te keren asavke žrtve. Ama, ov vetingja kaj okola so džana pali leste nane te oven razočarime. O Jehova ka nagradinel len agjaar so ka del len jekh duhovno familija koja so mangela len. (Čitin Marko 10:29, 30.) Sar šaj te pomožine e interesenteske te ovel le korist taro akava but šužo poklon?

10. So sikljovea taro e Manueleskoro iskustvo?

¹⁰ Ov amal e interesentea. But tano važno te sikave e interesenteske kaj tu grižinea tut leske. Soske? Dikh so vakerela o Manuel, kova so živinela ko Meksiko. Ov objasninela sar o phral, kova so proučingja lea, pomožingja leske keda sine interesenti. Ov vakerela: „Angleder te počmina i studija, o phral sekogaš pučela man sine sar sium. Ov pomožingja mange te opuštinav man hem otvoreno te kerav lea lafi bašo javera da teme. Šaj sine te dikhav kaj ov čače grižinela pe mange“.

11. Savi korist ka ovel e interesente keda ka nakhavel vreme amencar?

¹¹ Nakhav vreme e interesentea, sar so o Isus nakhavgja vreme ple sledbenikoncar (Jovan 3:22). Ako šaj kanin e interesente, kova so šukar napredujnela, ki tute khere ki kafa ili te han zaedno maro ili te dikhen zaedno amari masekoskiri emisija taro JW Broadcasting^®. O interesenti šaj posebno ka ceninel asavki pokana ko vreme keda isi praznikija keda šaj ka osetinel pe korkori. O Kazibve, kova so živinela ki Uganda, vakerela: „Mislinava kaj sikliljum doborom but bašo Jehova na samo tari studija, nego isto agjaar taro adava so družingjum man e phralea kova so proučingja mancar. Dikhljum kobor but o Jehova grižinela pe ple  narodoske, hem kobor tane bahtale. Me da mangljum adava ko mlo životo“.

12. Soske valjani različna objavitelen te kanina ko biblisko kursi?

¹² Kanin različna objavitelen ko biblisko kursi. Ponekogaš šaj polokho amenge te dža korkori ko biblisko kursi ili te la amencar sekogaš e isto objavitele. Iako šaj amenge polokho te kera agjaar, ka ovel amare interesente pobari korist ako kaninaja različna objavitelen ko biblisko kursi. O Dimitri, kova so živinela ki Moldavija, vakerela: „Sekova objaviteli so alo ki mli studija sine le plo način sar te objasninel o bukja. Adava pomožingja mange te dikhav o materijali taro različna strane. Isto agjaar, na ladžandiljum doborom but keda geljum ko mlo prvo sostanok soske više zapoznajngjum bute phralen hem phenjen“.

13. Soske valjani te pomožina e interesenteske te avel ko sostanokija?

¹³ Pomožin e interesenteske te avel ko sostanokija. Soske valjani te kere adava? Adaleske so o Jehova zapovedingja ple slugenge te kheden pe, a adava tano delo taro amaro obožavanje (Evr. 10:24, 25). Osven adava, o phralja hem o phenja tane amari duhovno familija. Keda siem lencar ko sostanokija, adava tano sar te phene bešaja zaedno khere hem uživinaja ko jekh but šužo hajbe. Keda pomožinea e interesenteske te ovel prisutno ko sostanokija, tu pomožinea leske te kerel jekh taro najvažna čekorija te šaj te krstinel pe. Adava šaj te ovel leske pharo te kerel. Sar šaj o lil Ov bahtalo zasekogaš te pomožinel e interesenteske te nakhavel bilo savo predizvik so čhinavela le te avel ko sostanokija?

14. Sar šaj te pottiknina e interesente te avel ko sostanokija?

¹⁴ I lekcija 10 taro lil Ov bahtalo zasekogaš šaj te pomožinel tuke te pottiknine e interesente te avel ko sostanokija. Angleder te ovel završimo akava lil, nesave iskusna objavitelija sine zamolime te koristinen adaja lekcija keda proučinena sine e interesentencar. Ola vakergje kaj adaja lekcija but pomožingja lenge hem sine uspešno. Džangjola pe, na valjani te adžikere dži ki lekcija 10 te šaj te kanine e interesente te avel ko sostanokija. Kanin le so šaj posigate hem ker adava često. Sa e interesenten nane len o ista predizvikija. Adaleske trudin tut te primetine save potrebe isi e interesente hem palo adava razmislin sar šaj te pomožine leske ko praktično način. Ma obeshrabrin tut ako na počminela odma te avel ko sostanokija. Ov strplivo, ama prodolžin ponadari da te kanine le.

15. Taro so šaj darala o interesenti?

¹⁵ Dali sine tut hari dar angleder te ove e Jehovaskoro svedoko? Šaj mislingjan kaj nikogaš ka našti te propovedine taro kher ko kher ili šaj daraja sine kaj tli familija ili tle amala ka protivinen pe tuke. Ako oja, tegani tu šaj te haljove sar osetinela pe o interesenti. O Isus vakergja kaj šaj te pojavinel pe asavki dar. Ama, ov pottikningja ple sledbenikon te na mukhen i dar te čhinavel len te služinen e Jehovaske (Mat. 10:16, 17, 27, 28). Sar pomožingja o Isus ple sledbenikonge te na daran? Hem sar šaj tu da te kere agjaar?

16. Sar šaj te sikava e interesente te propovedinel?

¹⁶ Postepeno sikav e interesente te propovedinel. E Isuseskere učenikija šaj darana sine keda valjangje te džan te propovedinen. Ama, o Isus pomožingja lenge agjaar so vakergja lenge kote te propovedinen hem so te vakeren (Mat. 10:5-7). Sar šaj te dža palo e Isuseskoro primer? Pomožin e interesenteske  te haljol kote šaj te propovedinel. Na primer, šaj te puče le dali džanela nekas kaske so ka ovel korisno te džanel nesavo konkretno biblisko čačipe. Tegani pomožin leske te spreminel so te vakerel agjaar so ka sikave leske ko ednostavno način te propovedinel baši adaja tema. Ako tano soodvetno, šaj te vežbine lea agjaar so ka koristine o delija „Nesave šaj vakerena“ hem „Nesave šaj pučena“ so arakhljovena ko lil Ov bahtalo zasekogaš. Keda kerea adava, koncentririn tut te sikave e interesente te koristinel i Biblija hem te del ednostavna hem taktična odgovorija.

17. Sar šaj te koristina Matej 10:19, 20, 29-31 te šaj te pomožina e interesenteske te ovel le doverba ko Jehova?

¹⁷ Pomožin e interesenteske te ovel le doverba ko Jehova. O Isus uveringja ple učenikon kaj o Jehova ka pomožinel lenge adaleske so mangela len sine. (Čitin Matej 10:19, 20, 29-31.) Vaker e interesenteske kaj o Jehova ka pomožinel leske da. Šaj te pomožine leske te ovel le doverba ko Jehova agjaar so zaedno lea ka moline tut bašo leskere celija. O Frančišek, kova so živinela ki Polska, vakerela: „O phral so proučinela sine mancar često spomninela sine mle celija ko ple molitve. Keda dikhljum sar o Jehova odgovorinela ko leskere molitve, odma počmingjum me da te molinav man. Osetingjum kaj o Jehova pomožingja mange keda valjangjum te rodav slobodna dive tari buti te šaj te džav ko sostanokija hem ko kongres“.

18. Sar o Jehova dikhela ko objavitelija so trudinena pe te keren učenikija?

¹⁸ E Jehovaske tane but važna o interesentija. Ov džanela kobor trudinena pe o objavitelija te pomožinen e manušenge te oven lea paše hem adaleske but mangela len (Isa. 52:7). Iako ko momenti šaj na vodinea biblisko kursi, sepak šaj te pomožine e interesentenge te krstinen pe agjaar so sian prisutno ko bibliska kursija so vodinena javera objavitelija.