1. So e Isusese učenikija phenđe e manušenđe kola alje ko Jerusalim?

BUT murša hem đuvlja alje ko Jerusalim. On putujinđe ando različita phuvja hem vaćerđe različita ćhibja. Odova dive desinđa pe diso but zanimljivo. Ked reslje, disave Jevreja počminđe te vaćeren olencar ki olengi ćhib. Odova but iznenadinđa len. Ama, odova so phenđe lenđe odola Judejcija hem o apostol Petar hine pana pozanimljivo. On phenđe lenđe so šaj te spasinen pe ako mothovena vera ko Isus Hrist. Akava so phenđe lenđe but utičinđa upro lende, odolese on pućlje le: „So valjani te ćera?“ O Petar odgovorinđa lenđe: „Nek svako tumendar krstinini pe“ (Dela 2:37, 38).

2. So ka dikha ko akava članko? (Dikh i slika ki naslovno strana.)

² Palo odova desinđa pe diso but šukar. Ko odova dive, oko 3 000 manuša krstinđe pe hem ađahar ulje e Hristese učenikija. Ađahar počminđa te ćeren pe učenikija, sar so o Isus zapovedinđa. Olese učenikija hem avdije propovedinena hem ćerena učenikonen. Avdije našti nekasa te vaćere samo nekobor satija hem ađahar te pomožine lese te ovel spremno aso krštenje. Valjani možda nekobor masekija, jekh berš ja čak pobuter te šaj te pomožine te studentese te napredujini đi o krštenje. Ako isi tut kurs, tegani đaneja so nane lokho te pomožine jekhe manušese te avel đi o krštenje. Ko akava članko, ka dikha so šaj te ćere te šaj te pomožine te studentese te avel đi o krštenje.

3. Premalo Matej 28:19, 20, so amaro studenti mora te ćerel te šaj te napredujini đi o krštenje?

³ Angleder te krstini pe, jekh studenti mora te primenini odova so sikljola andi Biblija. (Čitin Matej 28:19, 20.) Ked amaro studenti primenini odova so sikljola, tegani ov tano sar o razborito manuš ando e Isuseso poređenje. Odova manuš hor hanđa te šaj te ćerel po ćher ki stena (Mat. 7:24, 25; Luka 6:47, 48). Sar šaj te pomožina amare studentese te primenini odova so sikljola? Akana ka dikha trin predlogija.

4. Sar šaj te pomožina amare studentese hari pohari te napredujini đi o krštenje? (Dikh o okvir „ Pomožin te studentese te ćhivel pese ciljija hem te ispunini len“.)

⁴ Pomožin te studentese te ćhivel pese ciljija. Sose valjani te ćere odova? Razmislin ando akava primer: Ako mangeja te đa ko jekh but baro drumo, šaj ka odlučine te terđove ko nekobor thana đi putujineja. Tegani odova drumo na ka dićhol tuće soj tano but baro. Isto ađahar, ked o studenti ćhivela pese disave tikne ciljija hem ispunini len, tegani ov ka haljol so šaj te ispunini po cilj te krstini pe. Te šaj te pomožine te studentese te napredujini koristin o deo „Ćhiv tuće cilj“, ki knjiga Ov bahtalo zauvek! Ko krajo andi svako lekcija, vaćer te studenteja sar šaj odova cilj te pomožini le te primenini odova so sikljola. Ako mangeja to studenti te ovel le hem avera ciljija, tegani pisin odova cilj ko deo „Pana diso“. Redovno koristin akava deo te ponovine o tikne ciljija kola ov postavinđa hem o ciljija aso kola valjani hari pobuter vreme.

5. Premalo Marko 10:17-22, so o Isus phenđa e barvale manušese hem sose?

⁵ Pomožin te studentese te menjini koro peste diso soj tano olese but pharo. (Čitin Marko 10:17-22.) O Isus đanđa so akale  barvale manušese ka ovel but pharo te biknel sa pe buća (Mar. 10:23). Ama, o Isus ipak phenđa lese so valjani te ćerel odola promene ko poklo đivdipe. Sose? Odolese so manglja le. Disavo puti, šaj te bezdina amen te podstaknina amare studente te primenini odova so sikljola, odolese so mislinaja so pana nane spremno te ćerel disave promene. E manušenđe valjani but vreme te aćhaven pekle lošna navike hem te uraven i nevi ličnost (Kol. 3:9, 10). Ama, so posig ka vaćera olencar andi akija tema, odobor posigate o studenti ka ćerel promene. Ked vaćereja oleja odolestar, tu mothoveja lese so brinineja tut olestar (Ps. 141:5; Posl. 27:17).

6. Sose valjani te puće te studente so mislini andi disavi tema?

⁶ But tano važno te puće te studente so mislini andi disavi tema. Ađahar ka dikhe ko so to studenti verujini hem sar diso haljola. Ako odova redovno ćereja, ka ovel tuće polokho te vaćere oleja ando buća kola tane lese phare te prihvatini. I knjiga Ov bahtalo zauvek! šaj te pomožini tuće ko odova. Na primer, ki štarto lekcija isi pućibe: „Sar o Jehova osetini pe ked koristinaja oleso anav?“ Ki enjato lekcija isi pućibe: „Aso kola buća bi mangeja te moline tut?“ Ki početka, te studentese šaj te ovel pharo te odgovorini ko asavke pućiba. Ama, tu šaj te pomožine lese te odgovorini ko odola pućiba ađahar so ka podstaknine le te razmislini ando slike hem ando stihija ki knjiga.

7. Sar šaj te koristina averenge iskustvija te pomožina amare studentese?

⁷ Ked to studenti haljola so valjani te ćerel, koristin averenge iskustvija te ohrabrine le te ćerel odova. Na primer, ako to studenti na avela redovno ko sastankija šaj te mothove lese o video O Jehova brininđa pe mandar ko deo „Rode pobuter“ ki 14. lekcija. Ki knjiga Ov bahtalo zauvek! ko but lekcije isi asavke iskustvija ko deo „Sikljov pobuter“ ja „Rode pobuter“. * Pazin te na uporedine te studente nekasa avereja ađahar so ka phene: „Ako ov šaj te ćerel odova, šaj hem tu.“ Mukh e studente kokri te haljol odova. Šaj te vaćere oleja ando disave posebna buća kola e manušese ando video pomožinđe te primenini odova so sikljola andi Biblija. Šaj te vaćere oleja ando disavo važno stih ja diso praktično so hine mothovdo ko video. Ked god šaj, mothov lese kobor o Jehova pomožinđa odole manušese.

8. Sar šaj te pomožina amare studentese te zamangel e Jehova?

⁸ Pomožin te studentese te zamangel e Jehova. Sar šaj te ćere odova? Ađahar so ka koristine svako prilika te sikave le diso pobuter ando e Jehovase osobine. Pomožin lese te haljol so o Jehova tano bahtalo Devel kova pomožini okolenđe kola mangena le (1. Tim. 1:11; Jevr. 11:6). Mothov lese soj tano olese šukaripase te primenini odova so sikljola hem objasnin lese so odova tano o način sar o Jehova mangela te mothovi lese so mangela le (Is. 48:17, 18). Sar barjola oleso mangipe premalo Jehova, sa pobuter ka mangel te ćerel promene ko poklo životi (1. Jov. 5:3).

9. Premalo Marko 10:29, 30, so šaj te pomožini e studentese te ćerel žrtve te šaj te napredujini đi o krštenje?

⁹ Te šaj te napredujini đi o krštenje, o student šaj ka valjani te ćerel disave žrtve. Sar o barvalo manuš kolestar angleder vaćerđam,  disave studentija šaj ka valjani te odrekninen pe ando disave materijalna buća. Ako i buti koja ćerena nane premalo e biblijake načelija, tegani šaj ka valjani te arakhen aver buti. But studentija šaj ka valjani te ćhinaven te družinen pe pekle amalencar kola na mangena e Jehova. A averen šaj odbacinđa olengi porodica sebepi so na mangena e Jehovase svedokonen. O Isus phenđa so disavenđe ka ovel pharo te ćeren asavke žrtve. Ama, ov obećinđa so na ka aćhavi okolen kola sledinena le. O Jehova ka nagradini len ađahar so o phralja hem o phenja andi skupština ka oven olengi porodica. (Čitin Marko 10:29, 30.) Sar šaj te pomožine te studentese te osetini pe soj tano deo andi odija duhovno porodica?

10. So sikljoveja ando odova so o Manuel phenđa?

¹⁰ Ov amal te studenteja. Mothov te studentese so brinineja tut olestar. Sose tano važno odova te ćere? Zapazin so phenela o Manuel, kova živini ko Meksiko. Ov vaćeri sar oleso učitelj pomožinđa lese đi proučinđa. Ov phenela: „Angleder so bi počminaja te proučina, ov bi pućela man sar hijum hem so ćerava. Sebepi odova hijum le opušteno hem šajinđum oleja te vaćerav andi bilo koja aver tema. Ađahar dikhljum so ćaće brinini pe mandar.“

11. Sose tano važno te odvojina vreme amare studentese?

¹¹ Odvojin vreme te studentese sar so o Isus odvojinđa vreme pe sledbenikonenđe (Jov. 3:22). Ako to studenti šukar napredujini, vićin le koro tute zajedno te pijen kafa, te han maro ja te dikhen disavi masekosi emisija. Toklo student šaj ka ovel tuće posebno zahvalno ako ka vićine le te avel koro tute ko period ked tane o praznikija, sose baš tegani šaj osetini pe usamljeno. O Kazibve, kova živini ki Uganda, phenela: „Mislinava so but buća ando Jehova sikljiljum ko moklo kurs, ama hem đi družinđum man me učiteljeja. Dikhljum kobor o  Jehova brinini pe ando poklo narodo hem kobor tane on bahtale. Hem me mangljum asavko đivdipe.“

12. Sose valjani te igara različita objaviteljen ko kurs?

¹² Vićin različita objaviteljen ko e biblijako kurs. Podijekh puti šaj te mislina soj tano polokho te đa kokri ko e biblijako kurs ili te igara svako puti isto objavitelje amencar. Odova šaj te ovel amenđe polokho, ama amare studentese više ka značini ako igaraja različita objaviteljen. O Dmitrij, kova živini ki Moldavija, phenela: „Svako objavitelj kova alo ko moklo kurs hine le poklo način sar objasnini disave buća. Odova pomožinđa maje te dikhav ko kola pana načinija šaj te primeninav odova so sikljiljum. Isto ađahar, odova pomožinđa maje te na lađav but ked prvo puti đeljum ko sastanko, sose već đanđum bute phralen hem phenjen.“

13. Sose valjani te pomožina amare studentese te avel ko sastankija?

¹³ Pomožin te studentese te avel ko amare sastankija. Sose tano odova važno? Odolese so o Jehova phenela amenđe te ćeda amen zajedno, hem odova tano deo andi amari služba (Jevr. 10:24, 25). Uzo odova, amare phralja hem phenja ki skupština tane amari porodica. Ked hijam ko sastankija olencar, odova tano samći haja jekh ukusno habe zajedno. Ked pomožineja te studentese te avel redovno ko sastankija tu pomožineja lese te ćerel diso but važno so ka igari le đi o krštenje. Ama, šaj isi diso so ćhinavi le te avel ko sastankija. Sar i knjiga Ov bahtalo zauvek! šaj te pomožini te studentese te rešini bilo savo problemi?

14. Sar šaj te podstaknina amare studente te avel ko sastankija?

¹⁴ Koristin i dešto lekcija andi knjiga Ov bahtalo zauvek! te podstaknine te studente te avel ko sastanko. Angleder so i knjiga hine gotovo, disave iskusna objaviteljija hine zamolime te koristinen akija lekcija đi proučinena pe studentencar. On phenđe so odija lekcija pomožinđa olenge studentenđe te aven ko sastankija. Naravno, ma ađićer i dešto lekcija te vićine te studente te avel ko sastanko. Vićin le so posigate hem nastavin redovno te ćere odova. Svako studenti tano averćhane hem isi le averćhane problemija. Odolese, le ko obzir so valjani te studentese hem ponudin lese tikli pomoć. Ma obeshrabrin tut ako valjani lese vreme te počmini te avel ko sastankija. Ov strpljivo, ma vazde te vasta olestar.

15. Sose šaj amaro studenti te daral?

¹⁵ Da li setineja tut sar osetinđan tut ked razmislinđan odolestar te ove e Jehovaso svedoko? Možda mislinđan so niked na ka propovedine kotar ćher ko ćher. Šaj darandiljan so ti porodica ja te amala ka protivinen pe tuće. Ako iked osetinđan tut ađahar, šaj te haljove sar osetini pe to studenti. O Isus phenđa so disave manuša šaj ka daran. Ama, ov podstakninđa pe učenikonen te na dozvolinen i dar te ćhinavi len te služinen e Jehovase (Mat. 10:16, 17, 27, 28). Sar o Isus pomožinđa pe učenikonenđe te na daran? Sar šaj hem tu te ćere odova?

16. Sar šaj te sikava amare studente te propovedini?

¹⁶ Hari pohari sikav te studente te propovedini. E Isusese učenikija šaj darandilje ked ov bićhalđa len te propovedinen. Ama, o Isus pomožinđa len ađahar so phenđa lenđe kaj te propovedinen hem sostar te vaćeren (Mat. 10:5-7). Sar šaj tu te oponašine e Isuse? Pomožin te studentese te dikhel ked šaj te propovedini. Na primer, puć le da li đanela nekas kase posebno ka značini disavo  konkretno ćaćipe andi Biblija. Palo odova, pomožin lese te spremini so ka vaćeri, ađahar so ka mothove lese sar ko jednostavno način te vaćeri ando ćaćipe. Sar nakhela o vreme, ki knjiga Ov bahtalo zauvek! šaj te koristine o deo „Ako neko phenela“ ili „Ako neko pućela“ te vežbine te studenteja. Ked ćereja odova, pokušin te sikave te studente te koristini i Biblija te bi dela jednostavna hem taktična odgovorija.

17. Sar šaj te koristina stihija ando Matej 10:19, 20, 29-31 te šaj te pomožina amare studentenđe te ovel len poverenje ko Jehova?

¹⁷ Pomožin te studentese te ovel le poverenje upro o Jehova. O Isus phenđa pe učenikonenđe so o Jehova ka pomožini len odolese so mangela len. (Čitin Matej 10:19, 20, 29-31.) Vaćer te studentese so o Jehova hem olese ka pomožini. Tu šaj te pomožine lese te ovel le poverenje upro Jehova ađahar so ki molitva ka pomine olese ciljija. O Franćišek, kova živini ki Poljska, phenela: „O phral kova proučinđa mancar često pominđa me ciljija đi molinđa pe. Ked dikhljum sar o Jehova odgovorinđa ko olese molitve sigate palo odova počminđum te molinav man. Osetinđum sar o Jehova pomožinđa maje ked valjanđum te lav slobodna dive ki mi nevi buti te šaj te đav ko sastankija hem ko kongresija.“

18. Sar o Jehova dikhela upro odova so ćerena o phralja hem o phenja đi ćerena učenikonen?

¹⁸ O Jehova but brinini pe ando amare studentija. Ov đanela kobor jekh učitelj trudini pe te pomožini e manušenđe te oven paše oleja. O Jehova but mangela len sebepi olengo trud (Is. 52:7). Ako akana nane tut nijekh kurs, tu šaj te pomožine e studentenđe te napredujinen đi o krštenje ađahar so ka đa avere objaviteljencar ko olenge kursija.