1. Σο βακερντέ ι Ιησούσκε μαθητές τι κερέν μπουτ μουρσά ντα τζουβλιά;

ΜΠΟΥΤ μουρσά ντα τζουβλιά γκιντισάλεας κι Ιερουσαλήμ. Αβιλέας μπουτέ τθεμένταρ ντα κερένας λάφι μπερεκέτι διαφορετικά τσσιμπά. Οντουβά ντιβές αβιλό-πες κάτι σο κερντάς λένγκε εντύπωση. Μερικοί Ιουδαίοι αρχισάλε τι κερέν λάφι κο τσσιμπά κι τζενένγκε σο αβιλέας γιαβερέ τθεμένταρ! Αλλά πιο μπαρί εντύπωση κερντέ λένγκε ο λάφια σο βακερένας λένγκε οντουλά Ιουδαίοι ντα ο λάφια σο βακερντάς λένγκε πιο σοράν ο απόστολος Πέτρος. Αντρέ οντουλέντε σο βακερντέ λένγκε ισινέ ότι μπορίνενας τι σώντιβεν άμα κα πακιάνας κο Ιησούς Χριστός. Οντουλά μουρσά ντα τζουβλιά μπεϊντιντέ μπουτ οντουλά σο ασουντέ. Μάλιστα ερεσλέ αζόμ μπουτ αντρέ λένγκε γκίστε σο πουτσλέ: «Σο πρέπει τι κεράς;» Ο Πέτρος βακερντάς λένγκε: «Ο κάθε εκ τουμένταρ τι μπολντιόλ».​—Πράξ. 2:​37, 38.

2. Σο κα ντικχάς ανταλέ μαθημάστε; (Ντικχέν ι φωτογραφία κι ανγκλαϊνί σελίδα)

² Σοράν, αβιλό-πες κάτι μπουτ σουκάρ. Περίπου 3.000 τζενέ μπολντιλέ οντουβά ντιβές ντα αβιλέ μαθητές ι Χριστόσκε. Αντικάς αρχισάλο ο έργος σο βακερντάς ο Ιησούς πι μαθητένγκε τι κερέν. Ανταβά έργος συνεχίντιβελα αμαρέ ντιβεσέντε-ντα. Αντιβές, ναστί βοηθίνασα εκχέ τζενές τι μπολντιόλ άμα κερντάμ λέσαρ λάφι σάντε χάνικ σαάτια. Μπέκιμ τι χρειαζίντιβελα μασεκά ή ατζέ-ντα εκ μπρες ή πιο μπουτ για τι αβέλ-πες ανταβά. Σαρ αγαβένα τουμέν-ντα σο κερένα μελέτες, μανγκέλα μπουτ μπουτί για τι βοηθίνας εκχέ τζενές τι ερεσέλ κο μπολντιπέ. Ανταβά μάθημας, κα σικαβέλ τουμένγκε σο μπορίνενα τι κερέν για τι βοηθίνεν εκχέ τζενές τι μπολντιόλ.

3. Σο πρέπει τι κερέλ εκ τζενό σο κερέλα μελέτη για τι ερεσέλ κο μπολντιπέ σαρ σικαβένα ο εδάφια Ματθαίος 28:​19, 20;

³ Πριν τι μπολντιόλ, εκ τζενό σο κερέλα μελέτη πρέπει τι κερέλ οντουλά σο σικλιαρέλα η Αγία Γραφή. (Διαβάνεν Ματθαίος 28:​19, 20) Κάνα εκ τζενό κερέλα οντουλά σο σικλιόλα, αβέλα σαρ ο «γκοντιαβέρ τζενό» κι παραβολή κι Ιησούσκι σο χαντζουντάς για τι κερέλ πο κχερ εκχέ ζουρανέ μπαρέστε. (Ματθ. 7:​24, 25· Λουκ. 6:​47, 48) Σαρ μπορίνασα τι βοηθίνας εκχέ τζενές τι κερέλ οντουλά σο σικλιόλα; Κα ντικχάς τριν συμβουλές σο κα βοηθίνεν-αμέν.

4. Σαρ μπορίνασα τι βοηθίνας εκχέ τζενές σο κερέλα μελέτη τι ερεσέλ κο μπολντιπέ; (Ντικχέν ο πλαίσιος « Βοηθίνεν ι Τζενές σο Κερένα-λες Μελέτη τι Τσσουβέλ Στόχους ντα τι Κερέλ-λεν»)

⁴ Βοηθίνεν ι τζενές τι τσσουβέλ στόχους. Σόσκε πρέπει τι κερέν-λες ανταβά; Σκεφτίνεν ακαβά παράδειγμας: Άμα κα μανγκένας τι κερέν εκ μπαρό ταξίδι τουμαρέ αυτοκινητόσαρ, μπορεί τι αποφασίνενας τι ατσσόν μερικέ σουκάρ τθανέντε. Άμα κα κερένας-λες ανταβά, τουμαρό ταξίδι να κα ντικχίντιβελας αζόμ μπαρό. Αντικάς εκ τζενό-ντα, κάνα ντικχέλα καλά πράγματα μπορίνελα τι κερέλ ακανά ντα κερέλα-λεν, ανταβά κα βοηθίνελ-λες τι αγαβέλ ότι μπορίνελα τι ερεσέλ κο μπολντιπέ. Χρησιμοποιήνεν ο πλαίσιος σο βακερέλα «Σο Μανγκάβα τι Κεράβ» κατά βιβλιάριος Μπουτ Σουκάρ Ζωή για Πάντα! για τι βοηθίνεν-λες τι τσσουβέλ στόχους. Κάνα κα τελειώνελ εκ μάθημας, τι συζητίνεν λέσαρ σαρ κα βοηθίνελ-λες ο στόχος σο τσσουντάς τι κερέλ οντουλά σο σικλιλό. Άμα τθερένα τουμαρέ γκοντιάτε εκ γιαβέρ πράγμας σο μπορίνελα τι κερέλ ο τζενό, γραφίνεν-λες οτθέ σο βακερέλα «Γιαβέρ». Τι χρησιμοποιήνεν-λες ανταβά κι μελέτη για τι ντικχέν ι τζενέσαρ καλά πράγματα μπορίνελα τι κερέλ ακανά ντα καλά πράγματα κα μπορίνελας τι κερέλ πιο σοράν.

5. Σο βακερντάς ο Ιησούς εκχέ χουλανέ τζενέσκε τι κερέλ σαρ βακερένα ο εδάφια Μάρκος 10:​17-22, ντα σόσκε;

 ⁵ Βοηθίνεν ι τζενές τι κερέλ αλλαγές πι ζωγιάτε. (Διαβάνεν Μάρκος 10:​17-22) Ο Ιησούς τζανέλας ότι κα αβέλας δύσκολος εκχέ χουλανέ τζενέσκε τι μπικινέλ σαρέ οντουλά σο τθερέλας. (Μάρκ. 10:​23) Όμως, βακερντάς οντουλέ τζενέσκε τι κερέλ ανταγιά μπαρί αλλαγή πι ζωγιάτε. Σόσκε; Επειδή μανγκέλας-λες. Μπάζιμα μπορεί τι σακιντίνασα τι βακεράς ι τζενέσκε σο κεράσα-λες μελέτη τι κερέλ οντουλά σο σικλιόλα επειδή πακιάσα ότι νανέ έτοιμος τι κερέλ εκ σημαντική αλλαγή. Μπορεί τι χρειαζίντιβελα χρόνος εκ τζενό για τι κερέλ αλλαγές πι ζωγιάτε ντα τι ιρίλ ο νεβό χαρακτήρας. (Κολ. 3:9, 10) Αλλά καζόμ πιο σουγκό κερένα λάφι ανταλέ πραγμάσκε ι τζενέσαρ, αζόμ πιο σουγκό κα αρχίνελ τι αλλάνελ. Κάνα κερένα λάφι ι τζενέσαρ ανταλέσκε, σικαβένα ότι πφαμπόνα λέσκε.​—Ψαλμ. 141:5· Παρ. 27:17.

6. Σόσκε πρέπει τι πουτσάς ι τζενές σο κεράσα-λες μελέτη σο πακιάλα;

⁶ Ισί σημαντικός τι πουτσέν ι τζενές σο πακιάλα βοβ εκχέ θεμάσκε. Τι κερέν ασακέ ερωτήσεις για τι ντικχέν σο αγαβέλα ντα σο πακιάλα ο τζενό σο κερένα-λες μελέτη. Άμα κα κερέν-λες ανταβά, κα αβέλ τουμένγκε πιο εύκολος τι κερέν λάφι ι τζενέσαρ πραγματένγκε σο ισί δύσκολος τι πακιάλ. Ο βιβλίος Μπουτ Σουκάρ Ζωή για Πάντα! τθερέλα μπουτ ερωτήσεις σο βοηθίνενα ι τζενές τι βακερέλ οντουβά σο σκεφτίνελα εκχέ θεμάσκε. Για παράδειγμας, κο μάθημας 4 ισί η ερώτηση: «Σαρ πακιάσα ότι νιωθίνελα ο Ιεχωβά κάνα βακερέσα λέσκο ναβ;» Κο μάθημας 9 ισί η ερώτηση: «Τούι καλέ πραγματένγκε μανγκέσα τι προσευχίντιβες;» Κι αρχή, ο τζενό μπέκιμ τι μανγκέλα χάνικ σαάτι για τι σκεφτίνελ σαρ τι απαντίνελ ανταλέ ερωτησιέντε. Μπορίνενα τι βοηθίνεν-λες άμα κα σικλιαρέν-λες τι σκεφτίνελ λογικά ο εδάφια ντα ο φωτογραφίες σο ισί κο βιβλίος.

7. Σαρ μπορίνασα τι χρησιμοποιήνας λατσσές ιστορίες τζενένγκε;

⁷ Κάνα ο τζενό σο κερένα-λες μελέτη κα αγαβέλ σο πρέπει τι κερέλ, χρησιμοποιήνεν ιστορίες τζενένγκε για τι βοηθίνεν-λες τι κερέλ οντουβά σο αγαντάς. Για παράδειγμας, άμα να αβέλα σαρέ κο συναθροίσεις, κα μπορίνενας τι σικαβέν λέσκε ο βίντεος Ο Ιεχωβά Πφαμπιλό Μάνγκε οτθέ σο βακερέλα «Ρόντε» κο μάθημας 14. Μπουτέ μαθηματέντε κο βιβλίος Μπουτ Σουκάρ Ζωή για Πάντα!, κα αρακχέν ασακέ εμπειρίες είτε οτθέ σο βακερέλα «Χάντζουβ πιο Αχόρτ» είτε οτθέ σο βακερέλα «Ρόντε». * Προσοχίνεν μα τι συγκρίνεν ι τζενές σο κερένα μελέτη εκχέ γιαβερέσαρ ντα τι βακερέν: «Άμα μπορίνελα τι κερέλ-λες βοβ, μπορίνεσα τι κερές-λες τούι-ντα». Μουκχέν ι τζενές τι αγαβέλ-λες κορκορό ανταβά. Κα μπορίνενας τι συζητίνεν λέσαρ σο βοηθιντάς ι τζενές κο βίντεος τι κερέλ οντουλά σο σικλιλό κατά Γραφή. Μπορεί τι βακερέν εκ σημαντικός εδάφιος ή εκ πράγμας κατά βίντεος σο κα βοηθίνελ-λες. Κάνα αβέλα-πες, τι βακερέν σαρ ο Ιεχωβά βοηθιντάς ι τζενές σο ισί κο βίντεος.

8. Σαρ μπορίνασα τι βοηθίνας ι τζενές σο κεράσα-λες μελέτη τι μανγκέλ ι Ιεχωβάς;

⁸ Βοηθίνεν ι τζενές τι μανγκέλ ι Ιεχωβάς. Σαρ; Τι ρόντεν ευκαιρίες για τι βοηθίνεν ι τζενές σο κερένα-λες μελέτη τι σικλιόλ πιο μπουτ πράγματα για το ιδιότητες ι Ιεχωβάσκε. Τι βοηθίνεν-λες τι ντικχέλ ι Ιεχωβάς σαρ εκ ευτυχισμέ Ντεβέλ σο βοηθίνελα οντουλέν σο μανγκένα-λες. (1 Τιμ. 1:​11· Εβρ. 11:6) Τι ντεν-λες τι αγαβέλ σο λατσσιπέ κα τθερέλ άμα κα κερέλ οντουλά σο σικλιόλα ντα ότι ανταβά σικαβέλα καζόμ μπουτ μανγκέλα-λες ο Ιεχωβά. (Ησ. 48:​17, 18) Καζόμ πιο μπουτ μανγκέλα ι Ιεχωβάς ο τζενό σο κερέλα  μελέτη, αζόμ πιο μπουτ κα μανγκέλ τι κερέλ σο-ντα αλλαγή χρειαζίντιβελα.​—1 Ιωάν. 5:3.

9. Σο μπορίνελα τι βοηθίνελ εκχέ τζενές τι κερέλ θυσίες για τι ερεσέλ κο μπολντιπέ σαρ βακερένα ο εδάφια Μάρκος 10:​29, 30;

⁹ Για τι ερεσέλ κο μπολντιπέ, ο τζενό σο κερένα-λες μελέτη κα χρειαζίντιβελ τι κερέλ θυσίες. Σαρ ο χουλανό τζενό σο βακερντάμ πιο τζανγκλέ, αντικάς μερικά τζενέ-ντα σο κεράσα-λεν μελέτη μπορεί τι χρειαζίντιβελ τι θυσιάνεν υλικά πράγματα. Άμα λέσκι μπουτί να ταιριάνελα με το αρχές ι Γραφιάκε, μπορεί τι χρειαζίντιβελ ατζέ-ντα τι αλλάνελ-λα. Μπουτ τζενέ μπορεί τι χρειαζίντιβελ τι μουκχέν αμαλέν σο να μανγκένα ι Ιεχωβάς. Γιαβερέν πάλι λένγκι φαμιλί μπορεί τι κερέλ-λεν πέρα επειδή να μανγκένα ι Ιεχωβάσκε Μαρτυρέν. Ο Ιησούς αγαβέλας ότι μπέκιμ τι αβέλ δύσκολος μερικέ τζενένγκε τι κερέν ασακέ θυσίες. Αλλά ντινάς πο λάφι ότι οντουλά σο ακολουθίνενα-λες να κα ατσσόν αντικάς. Κα τθερέν εκ μπουτ λατσσί πνευματική φαμιλί σο μανγκέλα-λεν. (Διαβάνεν Μάρκος 10:​29, 30) Σο μπορίνενα τι κερέν για τι βοηθίντιβελ ο τζενό ανταλέ μπουτ σουκάρ δωρόσταρ σο ντινάς-αμέν ο Ιεχωβά;

10. Σο σικλιόνα κατά Μανουέλ;

¹⁰ Αβέν αμαλά ι τζενέσαρ. Ισί σημαντικός τι σικαβέν ι τζενέσκε σο κερένα-λες μελέτη ότι πφαμπόνα λέσκε. Σόσκε; Ντικχέν σο βακερντάς ο Μανουέλ, σο τζουβντιόλα κο Μεξικός. Κάνα ντέλα-πες γκοντί ο βακίτι σο κερέλας μελέτη, βακερέλα: «Κάθε φαρ πριν τι αρχίνας ι μελέτη, ο πφραλ πουτσέλας-μαν σαρ ισινόμας. Βοηθίνελας-μαν τι νιωθίναβ άνετα ντα τι κεράβ λάφι σαρέ ι πραγματένγκε. Νιωθίναβας ότι μπαγιά πφαμπόλας μάνγκε».

11. Σαρ μπορίνενα τι βοηθίντιβεν ο τζενέ σο κερέσα-λεν μελέτη άμα ντάσα αμαρέ σαατίσταρ λέντε;

¹¹ Τι ντεν τουμαρέ σαατίσταρ κο τζενέ σο κερένα-λεν μελέτη, σαρ κερέλας ο Ιησούς-ντα πι μαθητέντζαρ. (Ιωάν. 3:​22) Άμα ο τζενό σο κερένα-λες μελέτη κερέλα αλλαγές πι ζωγιάτε, κα μπορίνενας τι καλίνεν-λες τουμαρέ κχερέστε για τι πιν εκ καφές, τι χαν κάτι ή τι ντικχέν ο JW Broadcasting^® σο νικιόλα κάθε μάσεκ. Ο τζενό μάλλον κα εκτιμίνελ μπουτ  άμα κα κερέν-λες ανταβά κο γιορτές, σο αζομάν μπορεί τι νιωθίνελ κορκορό. «Σικλιλόμ μπουτ πράγματα ι Ιεχωβάσκε κι μελέτη, αλλά πακιάβα ότι σικλιλόμ ατζέ πιο μπουτ πράγματα κατά παρέα σο κεράβας ι πφραλέσαρ σο κερέλας-μαν μελέτη», βακερέλα ο Καζίμπουε, σο τζουβντιόλα κι Ουγκάντα. «Ντικχλόμ καζόμ μπουτ πφαμπόλα ο Ιεχωβά πι υπηρετόνγκε ντα καζόμ χαρούμενοι ισί βον. Ανταβά μανγκάβας με-ντα μι ζωγιάτε».

12. Σόσκε πρέπει τι λας αμέντζαρ γιαβερέ πφραλέν κι μελέτη;

¹² Τι λεν τουμέντζαρ γιαβερέ πφραλέν κι μελέτη. Μπάζιμα, μπορεί τι νιωθίνασα ότι ισί πιο εύκολος τι τζας εκχέ μελετιάτε κορκορέ ή πάντα ι ίδιε πφραλέσαρ. Παρόλο σο μπορεί τι αβέλ αντικάς, ο τζενό σο κεράσα-λες μελέτη μάλλον κα βοηθίντιβελ πιο μπουτ άμα κα λας αμέντζαρ γιαβερέ-ντα πφραλέν. «Κάθε πφραλ σο αβέλα κι μελέτη ντέλα-μαν τι αγαβάβ ο πράγματα γιαβερέ τροπόσαρ», βακερέλα ο Ντμίτρι, σο τζουβντιόλα κι Μολδαβία. «Ανταβά βοηθίνελας-μαν τι ντικχάβ γιαβερά-ντα τρόπους για τι κεράβ οντουλά σο σικλιάβας. Επίσης, να λατζάβας αζόμ μπουτ κάνα γκιλόμ πρώτη φαρ κι συνάθροιση σόσκε γνωριντόμας μπουτέ πφραλέν ντα πφενίν».

13. Σόσκε πρέπει τι βοηθίνας ι τζενές σο κεράσα-λες μελέτη τι αβέλ σαρέ κο συναθροίσεις;

¹³ Βοηθίνεν ι τζενές τι αβέλ σαρέ κο συναθροίσεις. Σόσκε; Επειδή ο Ιεχωβά βακερέλα οντουλένγκε σο υπηρετίνενα-λες τι τζαν κο συναθροίσεις. Ανταβά ισί εκ τρόπος σο ντάσα-λες λατρεία. (Εβρ. 10:​24, 25) Επίσης, ο πφραλά ντα ο πφενιά κι κχανγκιρί ισί σαρ φαμιλί αμένγκε. Κάνα ισινάμ κο συναθροίσεις λέντζαρ, ισί σαρ τι χάσα λέντζαρ εκ σουκάρ χαμπέ κο κχερ. Κάνα βοηθίνενα ι τζενές σο κερένα-λες μελέτη τι αβέλ κο συναθροίσεις, βοηθίνενα-λες τι κερέλ ο πιο σημαντικός πράγμας για τι ερεσέλ κο μπολντιπέ. Αλλά μπέκιμ τι αβέλ δύσκολος ανταβά λέσκε. Σαρ μπορίνελα ο βιβλίος Μπουτ Σουκάρ Ζωή για Πάντα! τι βοηθίνελ ι τζενές τι νακχαβέλ σο-ντα δυσκολία τθερέλα ακανά για τι ερεσέλ κο μπολντιπέ;

14. Σαρ μπορίνασα τι βοηθίνας ι τζενές σο κεράσα-λες μελέτη τι αβέλ κο συναθροίσεις;

¹⁴ Χρησιμοποιήνεν ο μάθημας 10 ι βιβλιόσκο Μπουτ Σουκάρ Ζωή για Πάντα! για τι βοηθίνεν ι τζενές σο κερένα-λες μελέτη τι αβέλ κο συναθροίσεις. Πριν τι νικιόλ ανταβά βιβλίος, βακερντέ πφραλένγκε ντα πφενίνγκε σο κερένα μπουτ μπρεσά έργος τι κερέν ανταβά μάθημας ι τζενέντζαρ σο κερένα-λεν μελέτη. Ντικχλέ ότι τθερέλας μπουτ λατσσέ αποτελέσματα επειδή ο τζενέ αρχισάλε τι τζαν κο συναθροίσεις. Όμως, δεν πρέπει τι μπεκλεντίνεν μέχρι κο μάθημας 10 για τι καλίνεν ι τζενές κο συναθροίσεις. Βακερέν λέσκε πιο σουγκό άμα αβέλα-πες ντα συνεχίνεν τι κερέν-λες ανταβά. Ο κάθε τζενό τθερέλα πιρέ προβλήματα. Οντουλέσκε, προσπαθίνεν τι αγαβέν ο ανάγκες ι τζενέσκε ντα ντικχέν άμα μπορίνενα τι κερέν κάτι για τι βοηθίνεν-λες. Μα χασαρέν τουμαρί ζορ άμα νακχλό χάνικ βακίτι ντα να αβιλό ατζέκ εκχέ συναθροισιάτε. Τι σικαβέν υπομονή ντα μα τσσιναβέν τι καλίνεν-λες.

15. Καλά πράγματα μπορεί τι νταραβένα ι τζενές σο κερένα-λες μελέτη;

¹⁵ Μήπως τουμέν-ντα κι αρχή νταρένας τι αβέν Μάρτυρες ι Ιεχωβάσκε; Μπορεί τι πακιάνας ότι ποτές να κα μπορίνενας τι κερέν έργος κχερ κχερέστε. Ή μπορεί τι νταρένας ότι τουμαρί φαμιλί ή τουμαρέ αμαλά κα τζαν τουμέντζαρ κόντρα. Οτθάρ, μπορίνενα τι αγαβέν σαρ νιωθίνελα ο τζενό σο κερένα-λες μελέτη. Ο Ιησούς βακερντάς ότι ασακέ πράγματα μπορεί τι κερένας ι τζενέν τι νταρέν. Όμως, βακερντάς πι μαθητένγκε μα τι μουκχέν ο πράγματα σο νταραβένας-λεν τι κερέλ-λεν τι τσσιναβέν τι υπηρετίνεν ι Ιεχωβάς. (Ματθ. 10:​16, 17, 27, 28) Σαρ βοηθιντάς ο Ιησούς πι μαθητέν τι νακχαβέν ο πράγματα  σο νταραβένας-λεν; Ντα σαρ μπορίνενα τουμέν τι μοιάζεν λέστε;

16. Σαρ μπορίνενα τι σικλιαρέν ι τζενές σο κερένα-λες μελέτη τι κερέλ λάφι οντουλένγκε σο πακιάλα;

¹⁶ Σικλιαρέν ι τζενές τι κερέλ λάφι οντουλένγκε σο πακιάλα. Ο μαθητές ι Ιησούσκε μπέκιμ τι τθερένας άγχος κάνα μπουτσσαντάς-λεν τι κερέν έργος. Αλλά ο Ιησούς βοηθιντάς-λεν κάνα βακερντάς λένγκε κατέ τι τζαν ντα σο τι βακερέν. (Ματθ. 10:​5-7) Σαρ μπορίνενα τι μοιάζεν κο Ιησούς; Βοηθίνεν ι τζενές σο κερένα-λες μελέτη τι σκεφτίνελ κατέ τι κερέλ έργος. Για παράδειγμας, πουτσέν-λες άμα τζανέλα εκχέ τζενές σο κα βοηθίντιβελας άμα κα σικλιόλας εκ συγκεκριμέ αλήθεια κατά Γραφή. Σοράν, βοηθίνεν-λες τι σκεφτίνελ πιο τζανγκλέ σο κα βακερέλ ντα σαρ κα εξηγίνελ με απλός τρόπος ανταγιά αλήθεια. Κάνα κα αβέλ ο σαάτι, τζαν οτθέ σο βακερέλα «Μερικά Τζενέ Βακερένα» ντα «Εκ Τζενό Μπορεί τι Πουτσέλ-τουτ» κο βιβλίος Μπουτ Σουκάρ Ζωή για Πάντα! για τι κερέν πρόβες. Καζόμ κερένα-λες ανταβά, προσπαθίνεν τι σικλιαρέν ι τζενές τι χρησιμοποιήνελ ι Γραφή για τι απαντίνελ με απλός τρόπος ντα χωρίς τι ανέλ σε δύσκολη θέση ι γιαβερέν.

17. Σαρ μπορίνασα τι χρησιμοποιήνας ο εδάφια Ματθαίος 10:​19, 20, 29-31 καζόμ σικλιαράσα ι τζενές τι ντελ μπέσα κο Ιεχωβά;

¹⁷ Σικλιαρέν ι τζενές τι ντελ μπέσα κο Ιεχωβά. Ο Ιησούς βακερντάς πι μαθητένγκε τι αβέν σίγουροι ότι ο Ιεχωβά κα βοηθίνελας-λεν επειδή μανγκέλας-λεν. (Διαβάνεν Ματθαίος 10:​19, 20, 29-31) Βακερέν ι τζενέσκε ότι ο Ιεχωβά κα βοηθίνελ λες-ντα. Μπορίνενα τι βοηθίνεν-λες τι ντελ μπέσα κο Ιεχωβά κάνα προσευχίντιβενα λέσαρ τι κερέλ ο στόχος σο τσσουντάς. «Ο πφραλ σο κερέλας-μαν μελέτη, μπουτ φαρ βακερέλας πι προσευχιέντε ο στόχος σο τθεράβας», βακερέλα ο Φραντσίσεκ, σο τζουβντιόλα κι Πολωνία. «Κάνα ντικχλόμ σαρ απαντίνελας ο Ιεχωβά κο προσευχές κι πφραλέσκε σο κερέλας-μαν μελέτη, αρχισάλομ τι κεράβ με-ντα προσευχές. Νιωσάλομ ι βοήθεια ι Ιεχωβάσκι κάνα έπρεπε τι βακεράβ μι αφεντικόσκε μα τι κεράβ μπουτί αζομάν σο αβένας-πες ο συναθροίσεις ντα η συνέλευση».

18. Σαρ νιωθίνελα ο Ιεχωβά για το προσπάθειες σο κερένα ο πφραλά σο κερένα μελέτες;

¹⁸ Ο Ιεχωβά πφαμπόλα μπουτ ι τζενένγκε σο κεράσα-λεν μελέτη. Τζανέλα ότι ο πφραλά κερένα σο νακχέλα λένγκε βαστένταρ για τι βοηθίνεν ι γιαβερέν τι αβέν λατσσέ αμαλά λέσαρ, ντα μανγκέλα-λεν ανταλέσκε σο κερένα. (Ησ. 52:7) Ατζέ-ντα άμα ακανά να τθερένα τι κερέν εκ μελέτη, μπορίνενα τι βοηθίνεν εκχέ τζενές τι ερεσέλ κο μπολντιπέ κάνα τζάνα εκχέ μελετιάτε σο κερέλα εκ γιαβέρ.