1. Bici ecigusho cinene c’abantu babwizirwe oku bajire omu myaka igana mirhanzi?

ECIGUSHO cinene c’abantu, balume n’abakazi, b’omu bihugo binji bakag’iderha ndimi nyinji ziri lubero, bàli oku ntimanano. Hali akantu k’okusomeza kajirikine olo lusiku. Cigusho ciguma c’Abayahudi bakagibonekana bantu ba ntya-ntya kone babà n’obuhashe bw’okuderha olulimi lw’akaburhano lw’abantu bali balambagirire! Ebi abo Bayahudi babwiraga abo bantu n’ebi Petro abwiraga abantu boshi byo byali bya kusomeza bwenene. Ebyo babwiragwa byalim’omwanzi guyerekine oku lyo bacunguka kuli kwa bulagirire babe n’obuyemere muli Yezu Kristu. Ogo mwanzi gwahika bwenene oku murhima gw’abo bantu. Abo bantu bahûmwa oku murhima bwenene, bahikira aha badosa ntya: “Kurhi rhukwanine rhujire?” Omu kushuza Petro, aderha ntya: “Ngasi muguma winyu abatizibwe.”​—Ebj. 2:37, 38, Mashi Bible.

2. Bici rhwaganirira mw’eci cigabi? (Olole enfoto eri oku cijalada c’eyi gazeti.)

² Ebyabire enyuma z’aho byasomezanya bwenene. Olo lusiku bantu hofi 3 000 babatizibwa, babà banafunzi ba Kristu. Ogo gwali murhondero gw’omukolo munji gw’okujira abanafunzi Yezu ahâga abanafunzi bage oku bajire. Ogo mukolo gugendekire kuhika ene. Muli gano mango girhu, rhurhakabwira omuntu oku abatizibwe ho n’aho enyuma z’okuganira naye kasanzi kasungunu. Byanahûna hagere myezi minji erhi mwaka muguma kandi erhi myaka minji ly’omwanafunzi ahikira ogo muhigo. Okujira muntu mulebe abe mwanafunzi kuba kuhûnyire mukolo munji; onamanyire ntyo akaba hali ifunzo ly’Ebibliya oli walongoza muli gano mango. Mw’eci cigabi, rhwaganirira ebi oshinganine ojire ly’orhabala omwanafunzi wawe w’Ebibliya ahikire aha abatizibwa.

3. Nk’oku biyerekinwe omu lwandiko lwa Mateyo 28:19, 20, bici omwanafunzi wirhu w’Ebibliya ashinganine ajire ly’ahikira aha abatizibwa?

³ Embere omwanafunzi w’Ebibliya abatizibwe, ashinganine akakolesa omu kalamo kage ebi Ebibliya eyigiriza. (Osome Mateyo 28:19, 20.)  Erhi omwanafunzi wirhu akarhondera okukolesa ebi ali aciyigiriza, anaba nka “muntu muguma mwenge” Yezu aganiriraga wayubakiraga enyumpa yage oku lwala (ibuye). (Mt. 7:24, 25, Mashi Bible; Lk. 6:47, 48) Gurhi rhwakajira lyo rhurhabala omwanafunzi wirhu w’Ebibliya akakolesa ebi ali ayiga omu kalamo kage? Rhuganirire bintu bisharhu rhwakajira.

4. Gurhi rhwakarhabala omwanafunzi wirhu w’Ebibliya ly’ahikir’aha abatizibwa? (Olole ecisanduku cidesire “ Orhabale Omwanafunzi Wawe Akarhôla Emihigo n’Okucihangana Okuyihikiriza.”)

⁴ Orhabale omwanafunzi wawe acihirireho emihigo. Bulya gurhi oshinganine ojire ntyo? Rhuganirire olu lwiganyo: Erhi akaba wajira omubalamo gwa kuli, wanashagalukira okuyimanga hantu haguma-haguma ly’oja walola oku bintu binja biri mw’eyo njira. Okujira ntyo kwanakurhabala orhacibonaga nk’emunda waja eri kuli. Ko n’oko, erhi omwanafunzi akarhôla emihigo y’okuhikiriza enyuma za kasanzi kasungunu n’okucihangana okuyihikiriza, anahikira aha ahugûkwa oku byanahashikana ahikirize n’omuhigo gwage gw’okubatizibwa. Okolese ehigabi hidesire “Omuhigo Gwani” hiri omu citabu Oshagalukire Akalamo Ensiku n’Amango! ly’orhabala omwanafunzi wawe ajire amajambere. Oku buzinda bwa ngasi isomo, oganirire gurhi ogo muhigo guyerekire ebi omwanafunzi anayigaga. Erhi akaba hali ogundi muhigo oli warhanyako guyerekire omwanafunzi wawe, wanaguyandika aha badesire “Ogundi Muhigo.” Ngasi mango okakolesa ehyo higabi h’ifunzo ly’obona haguma n’omwanafunzi wawe mihigo ehi akahikiriza enyuma za kasanzi kasungunu n’eyi akayishihikiriza omu mango gayisha.

5. Nk’oku biyerekinwe omu lwandiko lwa Marko 10:17-22, bici Yezu abwiraga mugale muguma oku ajire, na bulya gurhi amubwiraga ntyo?

⁵ Orhabale omwanafunzi wawe ajire empindûlo omu kalamo kage. (Osome Marko 10:17-22.) Yezu alimanyire oku kwakabire kuzibu olya mulume mugale aguze ebirugu byage byoshi. (Mk. 10:23) Cikone, Yezu abwira oyo  mulume oku ajire eyo mpindûlo erhali nyi omu kalamo kage. Bulya gurhi amubwiraga ntyo? Bulya Yezu alimuzigire. Hali amango rhubula kuha omwanafunzi omurhima gw’okukolesa ebi ali ayiga bulya rhunarhanye mpu arhacihikira amango akajira empindûlo zishinganine. Byanahûna akasanzi ly’abantu bahogola omuntu wabo wa mîra n’okucihundikira omuntu muhyahya. (Kl. 3:9, 10) Cikoki, erhi wakaganira duba-duba n’obwalagale okubiyerekire empindûlo omwanafunzi akwanine ajire, ko n’omwanafunzi akarhondera ajira ezo mpindûlo duba-duba. Erhi wakakajira enganîro za ntyo haguma naye, oko kwanamuyereka oku oba omushibirire.​—Enna. 141:5; Mig. 27:17.

6. Bulya gurhi kuli kwa bulagirire okukadosa omwanafunzi amadoso gakarhurhabala okumanya entanya zage?

⁶ Kuli kwa bulagirire rhukadosa omwanafunzi amadoso gakarhurhabala rhumanye entanya zage okubiyerekire omwanzi rhuli rhwaganirira. Okakolesa idoso lya ntyo ly’omanya ebi omwanafunzi ahugûsirwe n’ebi ayemire. Erhi wakakajira ntyo ngasi mango, wanabona oku agandi mango kwaba kulembu okuganirira haguma naye eyindi myanzi. Ecitabu Oshagalukire Akalamo Ensiku n’Amango! cirimo madoso manji g’okurhabala omwanafunzi ayerekane entanya zage. Kwa lwiganyo, isomo lya 4 lidosize ntya: “Gurhi orhanyize Yehova aciyumva erhi okolesa izino lyage?” Isomo lya 9 lidosize ntya: “Bintu bihi biguma na biguma wakashenga Nnamahanga?” Oku murhondero, nkaba byanahûna akasanzi ly’omwanafunzi arhanya gurhi ashuza oku madoso ga ntyo. Wanamurhabala omu kumukomereza akarhanya oku mashuzo ahâna kugerera amandiko n’enfoto ziri mw’eco citabu.

7. Gurhi rhwakakakolesa bwinja ebyabwinwe omu kalamo ka muntu mulebe?

⁷ Erhi omwanafunzi wawe akahugûkwa ebi ashinganine ajire, wanakolesa enyiganyo z’ebyabwinwe zakamuha omurhima ajire ntyo. Kwa lwiganyo, akaba omwanafunzi wawe ajira amazibu g’okuja oku ntimanano, wanamuyeresa evideo edesire, Yehova Aba Anshibirire wanayibona omw’isomo lya 14, omu higabi hidesire “Ociyigirize kwa Bulîri.” Omu masomo manji g’ecitabu Oshagalukire Akalamo Ensiku n’Amango! wabona enyiganyo za ntyo omu cigabi cidesire “Humbirira ly’Ohugûkwa” erhi omu cigabi cidesire “Ociyigirize kwa Bulîri.” * Obe masu orhakagilinganisa omwanafunzi wawe n’owundi muntu omu kuderha erhi: “Akaba lebe ajijire ntyo, kw’okuderha oku nawe wanahashikujira.” Okaleka omwanafunzi yene ahikire aha ahugûkwa ntyo. Lubero n’oko, osegeze ebintu by’obulagirire byarhabire omuntu oganirirwe omu video arhondere okukolesa enyigirizo z’Ebibliya. Nkaba wanasegeza olwandiko lw’obulagirire erhi akandi kantu oyo muntu ajijire. Ngasi mango nka bihashikine, wanasegeza gurhi Yehova arhabiremwo oyo muntu.

8. Gurhi rhwakarhabala omwanafunzi wirhu ahikire aha azigira Yehova?

⁸ Orhabale omwanafunzi wawe w’Ebibliya ahikire aha azigira Yehova. Gurhi wakajiramwo ntyo? Okalola bulyo buhi wakakolesa ly’orhabala omwanafunzi ayige binji kuyerekera amorhere ga Yehova. Orhabale omwanafunzi wawe akabona Yehova oku aba Nnamahanga w’obushagaluke orhabala balya bamuzigira. (1 Tm. 1:11; Hb. 11:6) Oyereke omwanafunzi wawe oku anayunguka erhi akakolesa amahano amuhire, onamuhugûlire oku ago mahano gayerekine obuzigire Yehova amujirako. (Iz. 48:17, 18) Erhi omwanafunzi wawe akazigira Yehova bwenene oko kwanamushumya ajire empindûlo z’obulagirire.​—1 Yn. 5:3.

9. Nk’oku biyerekinwe omu Marko 10:29, 30, bici byakarhabala muntu mulebe aleke bintu biguma biguma ly’aba mwanafunzi mubatize?

⁹ Ly’omwanafunzi ahikira obubatizo, biba bihûnyire aleke bintu biguma biguma. Ak’olya mugale rhwaganiriraga embere, biba bihûnyire banafunzi baguma na baguma baleke bintu biguma na biguma by’omubiri. Erhi akaba emikolo yabo erhaba epatine n’amakanuni g’Ebibliya, byanahûna bayileke na ntyo balonze eyindi eshinganine. Banji mulibo, byanahûna baleke abîra babo barhaba bazigire Yehova. Hali n’abandi bakayakwa n’abantu b’omu mulala gwabo barhaba bazigire Abahamirizi ba Yehova. Yezu ayerekine oku kwanaba kuzibu kuli bantu baguma na baguma okuleka ebyo byoshi. Cikone alaganya oku nta mango balya boshi bamukulikire bànacidose mpu lero ndi wababwiraga oku babe banafunzi bage we. Bayishihâbwa oluhembo lw’okuba n’omulala gw’ekiroho gubazigire. (Osome Marko 10:29, 30.) Gurhi wakarhabala omwanafunzi wawe ayunguke n’olo luhembo lwinja bwenene?

10. Bici ociyigirizize kugerera ebi Manuel adesire?

¹⁰ Ojire obwîra bwa hofi-hofi haguma n’omwanafunzi wawe. Kuli kwa bulagirire bwenene okuyereka omwanafunzi wawe oku kobinali oba omushibirire. Bulya gurhi kuli kwa bulagirire okujira ntyo? Orhanye kw’ebi Manuel olama e Mexique adesire. Omu kukengera amango akagiyiga Ebibliya, adesire ntya: “Ngasi mango embere rhurhondere okuyiga, mwalimu wani akagindosa gurhi nyosire. Akagirhuma naciyumva bwinja n’oko kwakarhuma naba mubidu okumubwira ngasi kantu kandi oku murhima. Nakaciyumva oku kobinali aba anshibirire.”

11. Gurhi abanafunzi birhu bakayunguka omu kugeza akasanzi haguma na nirhu?

¹¹ Okageza akasanzi haguma n’abanafunzi bawe nka kulya Yezu akagigeza akasanzi haguma n’abanafunzi bage. (Yn. 3:22) Nka bihashikine wanalalika omwanafunzi wawe w’Ebibliya oli wajira amajambere ayishe mushangire haguma naye ecijumbu erhi mulole haguma naye  eprograme ya ngasi mwezi ya JW Télédiffusion. Anashagaluka erhi wakamulalika amango abîra bage bali bajira amadinye g’ecipagani erhi ga cihugo na ntyo arhakaciciyumva nk’ali kahumba. Kazibwe olama e Ouganda adesire ntya: “Ntanyize oku naciyigirizize binji kuli Yehova omukugeza kasanzi kanji haguma na mwalimu wani ci arhali amango rhwakagiyiga gone. Nabwine kunganaci Yehova aba ashibirire abantu bage, na kandi nabwine oku kobinali bajira omwishingo. Ebyo byo nalicifinjire okuba nabyo omu kalamo kani.”

12. Bulya gurhi rhushinganine okukaheka bahubiri mberuluka okw’ifunzo lirhu ly’Ebibliya?

¹² Okalalika abandi bahubiri bakuluse okw’ifunzo ly’Ebibliya. Hali amango rhubona nka kuli kulembu okugendilongoza ifunzo ly’Ebibliya rhwene erhi kukagenda n’olya muhubiri ye n’olya. Ciru akaba rhwanabona nk’okujira ntyo kuli kulembu, cikone omwanafunzi wirhu anayunguka bwenene erhi rhwakakaheka bahubiri mberuluka nka rhwajimuyigiriza Ebibliya. Dmitrii olama e Moldavie adesire ntya: “Ngasi muhubiri wakagiyisha okw’ifunzo lyani ly’Ebibliya, akagimpugulira ebintu omu njira yago-yago. N’oko kwantabire mbone omu zindi njira zihi nakakolesa ebi nakagiyiga. N’erhi nja oku ntimanano oburhanzi ntayumvagya nshonyi bulya hali bene wirhu na bali birhu nalikola mmanyire.”

13. Bulya gurhi rhushinganine okurhabala omwanafunzi wirhu w’Ebibliya aje oku ntimanano?

¹³ Orhabale omwanafunzi wawe akaja oku ntimanano z’ecigamba. Bulya gurhi kuli kwa bulagirire okujira ntyo? Bulya Yehova aba arhegesire abakozi bage oku bakarhimanana, okujira ntyo ciba cigabi c’enterekêro yirhu. (Hb. 10:24, 25) Na kandi, bene wirhu na bali birhu bo babà mulala gwirhu gw’ekiroho. Amango rhuli oku ntimanano haguma nabo, rhunabe nka rhuli aha ka rhunali rhwalya ebiryo binunu bwenene. Erhi orhabala omwanafunzi wawe w’Ebibliya aje oku ntimanano, onabe erhi omurhabire ajire akantu kaguma kw’obulagirire kakamuhashisa ahikire obubatizo. Cikone nkaba kwanaba kuzibu kuli ye okurhôla ogo muhigo. Gurhi ecitabu Oshagalukire Akalamo Ensiku n’Amango! cakarhabala omwanafunzi wawe alwise amazibu goshi gali gamuhanza okuja oku ntimanano?

14. Gurhi rhwakashumya omwanafunzi wirhu w’Ebibliya aje oku ntimanano?

¹⁴ Okolese isomo lya 10 ly’ecitabu Oshagalukire Akalamo Ensiku n’Amango! lyo likurhabala oshumye omwanafunzi wawe. Bahubiri baguma na baguma bagwerhe obulenga babwiragwa oku bakolese er’isomo embere eci citabu cihânwe, bayerekîne oku er’isomo lyarhabire abanafunzi babo baje oku ntimanano. Cikone kurhali kuderha oku oshinganine olinde kuhika muhike omw’isomo lya 10 ly’olalika omwanafunzi oku ntimanano. Omulalike duba-duba nka bihashikine, na kandi okagendekera wamulalika ngasi mango. Ngasi mwanafunzi ajira amazibu gali lubero n’ag’owabo. Co cirhumire oshinganine obe masu ly’omanya amalagirire gw’omwanafunzi wawe na burhabale buhi ashinganine. Orhavunikaga omurhima erhi hakagera kasanzi kanji n’omwanafunzi wawe arhacija oku ntimanano. Obe wakulembera onakamulalika ngasi mango.

15. Boba bwa gurhi omwanafunzi wirhu akaba nabo?

¹⁵ Kw’ocikengire oku wakagiyoboha okuba Muhamirizi wa Yehova? Hali amango erhi wakagiciyumva oku orhakahasha ciru n’ehitya okuhubiri ahantu h’abantu banji. Erhi nkaba kandi wakagiyoboha oku abantu b’omu mulala gwawe erhi abîra bawe bakuhagalika. Erhi akaba ntyo ko wakagiciyumva, wanahugûkwa bwinja gurhi omwanafunzi wawe ali aciyumva. Yezu ayerekine oku byanahashikana okuyumva oboba bwa ntyo. Cikone, ayinginga abanafunzi bage oku barhalekaga obo boba bwarhuma barhakolera Yehova. (Mt. 10:16, 17, 27, 28) Gurhi Yezu arhabire abanafunzi bage lyo barhagikayoboha? Na gurhi wakayigamwo olwiganyo lwage?

16. Gurhi rhwakakomereza omwanafunzi wirhu ly’akaganirira abandi ebi ayemire?

 ¹⁶ Okakomereza omwanafunzi wawe bunyi-bunyi akaganirira abandi ebi aba ayemire. Nkaba abanafunzi ba Yezu bayobohire erhi abarhuma omu mukolo gw’amahubiri. Cikone Yezu abarhabala omu kubabwira emunda bajihubiri n’omwanzi bagendikahubiri. (Mt. 10:5-7) Gurhi wakayigamwo olwiganyo lwa Yezu? Orhabale omwanafunzi wawe amanye ngahi akakahubiri. Kwa lwiganyo, wanamudosa erhi hali omuntu amanyire wakashagalukira okuyiga enyigirizo ndebe z’Ebibliya. Na buzinda wanamurhabala okurheganya ebi ayishiderha omu kumuyeresa enjira nembu y’okuganirira abandi ezo nyigirizo. Nka bihashikine, wanakolesa ehigabi hidesire, “Bantu Banji Banakaderha Ntya” n’ehindi higabi hidesire, “Omuntu Anadosa Ntya,” ebyo bigabi byombi biri omu citabu Oshagalukire Akalamo Ensiku n’Amango!. Amango oli wajira ntyo, lonza gurhi wakayeresa omwanafunzi wawe gurhi akakolesa Ebibliya ly’ahâna amashuzo malembu omu njira y’obwirhohye.

17. Gurhi rhwakakolesa olwandiko lwa Mateyo 10:19, 20, 29-31 amango rhuli rhwarhabala omwanafunzi wirhu akalangalira Yehova?

¹⁷ Orhabale omwanafunzi wawe akalangalira Yehova. Yezu abwira abanafunzi bage n’obwalagale oku Yehova ayishibarhabala bulya Abazigire. (Osome Mateyo 10:19, 20, 29-31.) Okengeze omwanafunzi wawe n’obwalagale oku naye Yehova amurhabala. Wanamurhabala akalangalira Yehova omu kukashenga haguma naye okubiyerekire emihigo yage. Franciszek olama e Pologne, adesire ntya: “Kanji-kanji mwalimu wani akagihira emihigo yani omu masala gage. Erhi nkabona kunganaci Yehova ali ashuza oku masala ga mwalimu wani, nani narhondera okukasalira. Na kabona kunganaci Yehova akagintabala amango nakagibwira bose wani oku ampe oluhusa l’okuja oku ntimanano z’ecigamba n’oku ntimanano nkulu.”

18. Gurhi Yehova aciyumva okubiyerekire omukolo abalimu Bakristu bajira?

¹⁸ Yehova aba ashibirire bwenene abanafunzi birhu b’Ebibliya. Anashagaluke erhi abona omukolo abalimu Bakristu bali bajira lyo barhabala abantu bamuyegere, ananabazigire enyanya z’oko. (Iz. 52:7) Ciru akaba nt’ifunzo ly’Ebibliya oli walongoza muli gano mango, wanarhabala abanafunzi b’Ebibliya bajire amajambere kuhika babatizibwe omu kukalusa abandi bahubiri amango bajilongoza amafunzo g’Ebibliya.