1. Kɛkɔnge k’iyashimela oloyi ɔmɔtshi w’anto wel’ɛtɛndɔ kɛ ntondo djɛ nangha?

OLOYI w’ekekete w’anto w’ampame l’amato w’imá ewila efula edjinge w’etepelaki etepela wetshikitanyi wasanghanaka. Nkambo mɔtshi djɛ nkamɔ djenanghemaka lofu lɔsɔ. Oloyi ɔmɔtshi w’ase Juda watateyɛka ntepela l’etepela w’angangɛnda! Nkambo djɛsɔ djekamoyɛka oloyi w’anto wɔsɔ efula, koko kɛnɛ kashimelisa ase Juda wasɔ edjinge kɛnɛ kɛ ɔpɔstɔlɔ Pɛtɛlɔ ndashimela anto ankfumɔ kelekaka ndaakamoyɛ. Losango lɔmɔtshi l’iyashimela nde, iwɔ nkoka ndjala l’ewiko má ndjala la djawo te Yeso Kristo. Nkambo djɛsɔ djekotaka eloko w’anto wasɔ, ko wopolaka ambɔ: ‘Kɛkɔnge k’oyɛso ladjɛ nangha?’ Ko Pɛtɛlɔ akadjimolaka ante: Onto l’onto alongole batisimo.’​—Ele. 2:37, 38.

2. Kɛkɔnge k’ɔkɔpaso nyɛna lá djamba djɛnɛ? (Lenda ntshango djela loposo.)

² Nkambo nkina djɛ nkamɔ djeposaka m’ɔkɔngɔ? Anto etengo 3 000 walongolaka batisimo lofu lɔkɔ, edjinge wakomaka ambeki wa Kristo. Ɔsɔ ayalaka ewangelo k’olemo w’ekekete wɔ nkfumba anto ambeki wɔ Yeso ndashimela ambeki wande djɛ nangha. Olemo wɔsɔ wombofula lombombe l’ɛtɛndɔ kɛ 21 kɛnɛ. L’etsho wɛso wɛnɛ, topakoke nkotshɛ onto djɛ ndongola batisimo ngo lá winá emangha toko. Akoka ndɔsa angɔndɔ, ɔnɔnyi ɔmɔ, kana ndekana dj’ombeki ndokotshɛ okoma wɔsɔ. Etengo ewɛ ntsha w’eka l’onto ɔmɔtshi Bible etsho wɛnɛ, nkfumba anto ambeki alekɔ itondo y’olemo. Lá djamba djɛnɛ tɛɛna lɔ kɛnɛ k’okokɛ nangha djɛ nkotshɛ ombeki wɔko wɔ Bible djɛnde ndongola batisimo.

3. Etengo Mateo 28:19, 20 ɛnyɛnde, kɛkɔnge k’ombeki oyɛnde ladjɛ nangha djɛ nde nfula tii tá batisimo?

³ Lá ntondo kɛnde ndongola batisimo, ombeki wɔ Bible ladjɛ  nkamba la kɛnɛ k’ekande. (Wala Mateo 28:19, 20.) Winá wɔ ombeki okambande la kɛnɛ k’ekande, nde ndjalaka etengo ‘kanga nkɛsɔ’ lotepelawɔ lá ndjɔmbɔmba kɛ Yeso lotshimisa otalee djɛ mpika mvulu kɛnde ladjiko dj’abanga. (Mat. 7:24, 25; Luka 6:47, 48) Wopo wɔkɔnge okokaso nkotshɛ ombeki djɛnde nkamba la kɛnɛ k’ekande? Nyotshɔ tokolenda akambo asato.

4. Wopo wɔkɔnge okokaso nkotshɛ ombeki djɛnde ndjila welo djɛ ndogola batisimo? (Lenda ipapango “ Kotshɛ ombeki wɔko wɔ Bible djɛ nde ndawilela ekoma edjinge ndaakotshɛ.”)

⁴ Kotshɛ ombeki wɔko djɛ ndawilela ekoma. Lamo oyɛ ladjɛ nangha nkambo djɛsɔ? Kɔsa ndjɔmbɔmba kɛnɛ: Ntsha otatshu lɔkɛndɔ lɔmɔtshi l’otale, wɛ nkoka ndɔsa nkano djɛ ntemalaka lá todjena tɔmɔtshi tɔ wɔlɔ telá mboka. Má nangha nghɔsɔ, opangoleka nyɛna ente edjena kɛ ngotatshu kelekɔ otale. Wopo wɔk’ɔmɔ ndeke, ntsha ombeki wɔ Bible ndawilela ekoma w’okokande nkotshɛ m’ɔkɔngɔ wɔ nfu imagha, nde nkoka nyɛna ante angokoka nkotshɛ okoma wɔ ndongola batisimo. Kamba l’ipapango: “Okoma” yelekɔ l’onkandaYala la lowiko l’osasa lotshinda lotshinda! djɛ nkotshɛ ombeki djɛnde nfula. L’ekomo kɛ djamba nkfumɔ, nyosawole wopo wɔ ndawilela ekoma wolekɔ l’eteyi okokawɔ ndookotshɛ djɛ nkamba la kɛnɛ kɛ ndombeka. Ntsha olekɔ l’okoma onkina w’otshikitanyi wokoka nkotshɛ ombeki wɔko, funa l’edjena k’iyombofuna ambɔ ‘Okoma onkina.’ Mbala la mbala kambaka l’etenyi kɛ wekelo kɛsɔ djɛ vungola esanga l’ombeki wɔko ekoma wokokande nkotshɛ winá wɔsɔ la wokokande ndokotshɛ l’esho weyaye.

5. Lá nkilika Marko 10:17-22, kɛkɔnge kɛ Yeso ndashimela mpame kɛ kanga okfudji, edjinge lamo?

⁵ Kotshɛ ombeki wɔko djɛ nde nangha etshikitano wɛ wolo lá lowiko lɔnde. (Wala Marko 10:17-22.) Yeso ewaki ante angoyala wolo le kanga okfudji djɛ nde nsadjɛ nkete djɛnde nkfumɔ. (Mar. 10:23) Koko Yeso ashimelaka  mpame kɛsɔ djɛ nde nangha otshikitano wekekete wɔsɔ lá lowiko lɔnde. Lamo? Mande Yeso ɔkɔpaki. Lá winá ɛmɔtshi, tokoka nkakanda djɛ nkembɛ ombeki djɛ nde nkamba la kɛnɛ k’ekande mande tɛna ente nde apalekɔ entshupa djɛ nangha otshikitano ɔmɔtshi wɔ lɔmbama. Koka ndɔsa winá efula le onto djɛ ndjola lonto lɔ ntondo ko ndɔta lonto lɔ bango. (Kɔl. 3:9, 10) Koko ntsha wɛ nsawola l’ombeki wɔko nkambo djɛsɔ ipa la ntshatshimba edjinge l’etepela wokɛma papoo, nde nkoka mbanga la nangha etshikitano wɛkɔ la nkeke. Má nsawola lande, ongɛnyɛ ente wɛ ndakiyanyɛka lá nkambo djɛnde.​—Yee. 141:5; Woo. 27:17.

6. Lamo oyɛso ladjɛ nkambaka la weepó walɔmba onto djɛ mpɛyɛ ikanyi yɛnde?

⁶ Woopó wɔlɔmba onto djɛ mpɛyɛ ikanyi ndeke oyɛso ladjɛ ndjopola ombeki djɛ ndjewa ikanyi yɛnde lá nkambo mɔtshi. Kamba la woopó wɔ nghɔsɔ djɛ nshikikɛ kɛnɛ kɛ ombeki wɔko osipisoyɛnde la w’awolande. Ntsha wɛ nanghaka nghɔsɔ, angoyala wɔdju lewɛ djɛ nsawola lande kaanga akambo wakoka ndjala wolo lende djɛ ndjawola. Onkanda Yala la lowiko l’osasa lotshinda lotshinda! alekɔ la weepó efula walɔmba onto djɛ mpɛyɛ ikanyi yɛnde. Ndjɔmbɔmba, djamba 04 alekɔ la woopó wotepela ante: “Okanelɛ mo, wopo wɔkɔnge Yehova oyawokande winá wokambɛ la djiina djɛnde?” Olakanyelo 09 ndjopolaka ante: “Akambo wakɔnge wokombolɛ ndjilaka lá ndɔmbɔ yɛko?” Má bango, ombeki nkoka ndjala la djonyi djɛ ndambo kɛ winá djɛ nde ntɔnɔla djɛ mpɛyɛ nsakiso lá weepó walɔmba djɛ nde mpɛyɛ ikanyi yɛnde. Wɛ nkoka ndookotshɛ má ndookfumba djɛ nde ntɔnɔlaka lá avɛrse edjinge lá asango welekɔ l’eteyi.

7. Wopo wɔkɔnge w’okokaso nkamba wɔlɔ la ndjɔmbɔmba y’akambo wakomelisa anto?

⁷ Winá wosipisoyɛ ombeki kɛnɛ koyɛnde ladjɛ nangha, kamba la ndjɔmbamba y’akambo wakomelisa anto djɛ ndokembɛ djɛ nangha nkambo djɛsɔ. Ndjɔmbɔmba, ntsha ombeki wɔko apaleke ndjingela lá nsanghanyɛ, wɛ nkoka ndɔwɛnyɛ ividɛo: Jehowa akakokɛ, yelekɔ l’etenyi kelekɔ l’ɔtɛ wɔ djoyi ante “Nangha ehonelo” lá djamba djɛ 14. Lá wamba efula wal’onkanda Yala la lowiko l’osasa lotshinda lotshinda!, wɛ ongotana ndjɔmbɔmba yɛ nghɔsɔ l’etenyi kelekɔ l’ɔtɛ wɔ djoyi ante “Ntshimola lonkina” kana l’etenyi kelekɔ l’ɔtɛ wɔ djoyi ante “Nangha ehonelo.” * Yala la ntɔnɔ dj’ipa ndjɛdjɛ ombeki wɔko l’onto onkina má ntepela ente: “Ntsha nde anghaka, mbɔ koko edjinge wɛ nkoka nangha.” Tshika ombeki nyɔmɛlɛ ɔshi nkano djɛsɔ. Koko, nsɔna akambo amɔtshi wa djonyi wakotshisa onto wotepelawɔ lá video djɛ nkamba l’elakanyelo w’imá Bible. Sɔna vɛrse mɔtshi kana nkambo mɔtshi djɛ djonyi djenanghemisa. Winá onkfumɔ wɛnɛ ente wolekɔ wɔlɔ, kɔkɔmɛ wopo wɔ Yehova ndakotshɛ onto wɔsɔ.

8. Wopo wɔkɔnge w’okokaso nkotshɛ ombeki djɛ nde nkɔpa Yehova?

⁸ Kotshɛ ombeki wɔko djɛ nde nkɔpa Yehova. Wopo wɔkɔnge? Honaka mbamba yɛ nsepa ikanyi yɛnde tá wekeka wa Yehova. Kotshɛ ombeki wɔko djɛ nde nsipisoyɛ ante Yehova alekɔ Ndjambe k’osasa kesukaka wanɛ w’ɔkɔpa. (1 Ti. 1:11; Heb. 11:6) Ɛnyɛ ombeki wɔko ente nde angowa wapɔ ntsha nde nkamba l’akambo w’ekande edjinge sipisoyɛnde ente, wapɔ wɛsɔ nyɛnyɛka djɛ Yehova ndɔɔkɔkɔpaka. (Iza. 48:17, 18) Ombeki wɔko angoleka ndjala la mposɛ kɛ nangha etshikitano enkfumɔ wɛ djonyi ntsha ngandji kɛnde te Yehova mfula.​—1 Dj. 5:3.

9. Lá nkilika Marko 10:29, 30, kɛkɔnge kekoka nkotshɛ onto djɛ ndapekala akambo amɔtshi djɛ ndongola batisimo?

⁹ Djɛ mfula tii tá batisimo, ombeki wɔ Bible ladjɛ nangha akambo amɔtshi. Lá ndjɔmbɔmba kɛ mpame k’okfudji k’isotepelaki má djiko, ambeki amɔtshi wa Bible nkoka ndjala la djonyi djɛ ndapekala loketekete lɔ lá demba. Ntsha elemo wɛwɔ wepokana la tɔkfɔ tɔ Bible, mbɔ iwɔ ladjɛ nangha etshikitano. Amɔtshi ndɔmbamaka djɛ ndjopa djokanelo djɛwɔ la tolongo topakɔpɛ Yehova. Ankina ankfumbo yɛwɔ yepakɔpɛ Ewakɛ wɛ Yehova wakoka ndaakadjɛ. Yeso atepelaka ante akoka ndjala wolo le anto amɔtshi djɛ ndapekala akambo wa nghɔsɔ. Koko nde alakaka ante wanɛ wangokilika wapanghɔsa nsɔnyi. Iwɔ wangowa ɛtshɔkɔ efula lá nkfumbo kelá nyuma k’okana ngandji. (Wala Marko 10:29, 30.) Wopo wɔkɔnge w’okokɛ nkotshɛ ombeki wɔko wɔ Bible djɛ nde mba wapɔ m’opapɛyɛ wɔ wɔlɔ wɔsɔ?

10. Olakanyelo wɔkɔnge ngombowa má kɛnɛ ketepelisa Manuel?

¹⁰ Yala ilongo y’ombeki wɔko. Alekɔ djonyi efula wɛ nyɛnyɛ ombeki wɔko ente ongowilake yimba. Lamo? Kolenda kɛnɛ ketepelisa wɔnanyɔ Emanuel kanga l’intansɛ lá Mexique. Winá wovungɔnde etsho w’indekaka Bible, nde ntepelaka ante: “Lá ntondo kɛ wekelo onkfumɔ, wetsha wɔmi andjopolaki demba. Nde ankotshɛki djɛ lemi ndawoka wɔlɔ edjinge ampɛyɛki mbamba kɛ dooshimela nkambo nkfumɔ djeyalaki la lemi. L’okaki ente nsɔsɔlɔ nde ndjakiyanyɛka lá nkambo djɛmi.”

11. Wopo wɔkɔnge ambeki waso wa Bible okokawɔ mba wapɔ má winá wohetshɛsɔ isawɔ l’asɛkɛlɔ?

¹¹ Hetshɛka winá nya ambeki wako etengo Yeso ndanangaka nya ambeki wande. (Dj. 3:22) Ntsha nkokaka, eta ombeki wɔko wɔ Bible lakawɛ djɛ ntɔlɛ esanga lande kana djɛ ntolenda esanga lande emisiɔ wɛ JW Televiziɔ wonanghema ngɔndɔ la ngɔndɔ. Ombeki wɔko angoyala la djedjɛ efula pekapeka ntsha ongowetake winá wɔ tolongo tɔnde kana ase nkfumbo kɛnde onanghawɔ  fɛtɛ yel’andja wanɛ kana etena k’okokande ndawoka olengedji. Kazibwe kanga l’intansɛ lá Ounganda ntepelaka ante: “Lemi nkanelaka ente ndjekaka akambo efula lá nkambo djelendana la Yehova má mpetshaka winá esanga lá wetsha wɔmi winá w’isekaka Bible. Nyɛnaka ente Yehova ndakiyanyɛka efula lá nkambo dj’enkambi wɛnde. Kɛsɔ ndeke makombolaka efula lá lowiko lɔmi.”

12. Lamo oyɛso ladjɛ ntshɔka l’ansakodji yetshikitanyi te ombeki wɔ Bible?

¹² Etaka Ansakodji yetshikitanyi djɛ nyo nteka l’ombeki wɔko. Lá winá ɛmɔtshi, tokoka nkanela ente angoleka wɔlɔ iso ntshɔka isɔmɛlɛ kana ngo la nsakodji kɛkɔ kɛmɔ te ombeki wɔso. Kaanga okokawɔ ndjala wɔdju nangha nghɔsɔ, tongoleka nkotshɛ ombeki wɔso wɔ Bible ntsha totshɔ l’ansakodji yetshikitanyi tende. Dmitrii, kanga l’intansɛ lá Moldavie ntepelaka ante: “L’etsho w’imekaka Bible, nsakodji k’enkfumɔ keyɛki la wetsha wɔmi ansipisoyɛki akambo lá yopo yɛmotokaka ntondo. Kɛsɔ kankotshɛki djɛ nyɛna topo tonkina timakokaka nkamba la kɛnɛ k’imekaka. Lonkina, ntayala la nsɔnyi efula winá w’imantshu tá lonsanghanyɛ mbala kɛ ntondo, mande lamboshiyɛka nyɛna wananyɔ l’ankaana efula.”

13. Lamo oyɛso ladjɛ nkotshɛ ambeki waso djɛ ndjingelaka nsanghanyɛ?

¹³ Kotshɛ ombeki wɔko djɛ ndjingelaka nsanghanyɛ y’otshumano. Lamo? Mande Yehova ndeke lɔlɔmba enkambi wɛnde dj’iwɔ nsanghanaka, ɔsɔ alekɔ etenyi kɛmɔtshi k’ɔtɛmwɛlɔ wɔso. (Heb. 10:24, 25) Lonkina, wananyɔ l’ankaana yɛso walekɔ nkfumbo kɛso kelá nyuma. Winá w’osanghanaso lá nsanghanyɛ alekɔ etengo tombotshumana lá mvulu kɛmɔtshi djɛ ndɛ esanga lawɔ dambo mɔtshi djɛ wɔlɔ. Winá w’okotshɛ ombeki wɔko djɛ nde ndjingelaka nsanghanyɛ, okotshɛnde djɛ nde ntapola djina mɔtshi dj’engɔtɔla tá batisimo. Koko ɔsɔ nkoka ndjala djina djɛ wolo lende djɛ ntapola. Wopo wɔkɔnge onkanda Yala la lowiko l’osasa lotshinda lotshinda! okokande nkotshɛ ombeki wɔko djɛ ndongela ekakasano enkfumɔ wekoka mpomana lande?

14. Wopo wɔkɔnge w’okokaso nkotshɛ ombeki wɔsɔ djɛ nde ndjingelaka nsanghanyɛ?

¹⁴ Kamba la djamba djɛ 10 dj’onkanda Yala la lowiko l’osasa lotshinda lotshinda! djɛ nkotshɛ ombeki wɔko. Lá ntondo k’okanda wɔnɛ mposa, walɔmbaka ansakodji djɛ nkamba lá djamba djɛ 10 djɛnɛ le ambeki wawɔ. Iwɔ watepelaka ambɔ walongaka edjinge wokotshɛka ambeki wawɔ djɛ ndjingela nsanghanyɛ. Lá nsɔsɔlɔ, tokongake ngo nyombokoma lá djamba djɛ 10 ko wɛ ndowanga djeta ombeki lá nsanghanyɛ yɛso. Totshatshimbake djɛ ndooweta lá nsanghanyɛ edjinge nkindjɛ ndoowetaka mbala la mbala. Ambeki wa Bible wotshikitanyi mpomanaka l’ekakasano wotshikitanyi. Djɛkondeke, ila yimba l’ehomba w’ombeki wɔko edjinge lenda kana wɛ nkoka ndɔpɛyɛ okotshɔ wɛnama. Tɔlɛmbake ntsha amboheta ndambo k’etsho lá ntondo kɛ nde mbanga ndjɛ lá nsanghanyɛ. Yala la balentshitshi, koko kindjɛ ndooshimela djɛ nde ndjingelaka lá nsanghanyɛ.

15. Wɔma wɔkɔnge wokaka ndjala l’ambeki wako?

¹⁵ Wɛ ovungɔ djɛ wɛ ayalaki la ndambo kɛ wɔma djɛ nkoma Owakɛ wɔ Yehova? Mbala imɔtshi akanelaki ente opakoki mpoposanyɛ lá ntshandjawala. Kana okaki wɔma ente ase nkfumbo kɛko kana tolongo tɔko nkoka konanyɛ. Ntsha nghɔsɔ, mbɔ oka ambeki wako wa Bible djandji. Yeso atepelaka ante anto amɔtshi nkoka ndjala la wɔma wɔ nghɔsɔ. Koko nde akembɛka ambeki wande dj’ipa iwɔ ndjawola djɛ wɔma ndaapekala djɛ nkambela Yehova. (Mat. 10:16, 17, 27, 28) Wopo wɔkɔnge Yeso ndakotshɛ ambeki wande djɛ nyimɛ wɔma woyalaki lawɔ? Edjinge wopo wɔkɔnge w’okokɛ ndjokola ndjɔmbɔmba kɛnde?

16. Wopo wɔkɔnge w’okokaso nkfumba ombeki wɔso djɛ nde nshimela anto ankina akambo w’ekande?

 ¹⁶ Tokafkumbaká ombeki wɔko ndambo ndambo djɛ nshimelaka anto ankina akambo w’ekande. Mbala imɔtshi ambeki wa Yeso wokaka wɔma winá w’indatome djɛ ntopoposanyɛ. Koko Yeso akotshɛka má ndaashimela edjena k’iyakoke ntshɔ topoposanyɛ edjinge kɛnɛ k’iyakoke mpoposanyɛ. (Mat. 10:5-7) Wopo wɔkɔnge w’okokɛ ndjokola Yeso? Kotshɛ ombeki wɔko djɛnde ndjewa edjena k’okokande mpoposanyɛ. Ndjɔmbɔmba, opolande ntsha nde ndjewaka onto ɔmɔtshi wokoka mba wapɔ ntsha nde ndjeka nkambo mɔtshi djɛ kɔɔ dj’imá Bible. M’asɔ, kotshɛnde djɛ ndɔngɔsɔla kɛnɛ k’okokande ntotepela má ndɔwɛnyɛ yopo yɛ wɔdju y’okokande ntotepela. Ntsha angokoka, vungola esanga lande wayi walekɔ lá totenyi tolekɔ l’ɛtɛ wɛ wayi ante “Anto amɔtshi ntepelaka ambɔ” edjinge “Onto ɔmɔtshi nkoka nkopola ante,” tolekɔ l’onkanda Yala la lowiko l’osasa lotshinda lotshinda! Winá wonanghɛ nkambo djɛsɔ, ila yimba efula djɛ nkfumba ombeki wɔko djɛ nde nkamba la Bible djɛ mpɛyɛ nsakiso kɛ wɔdju edjinge kɛ wɔlɔ.

17. Wopo wɔkɔnge w’okokaso nkamba la Mateo 10:19, 20, 29-31 winá w’okotshɛso ombeki wɔso djɛ ndaawɛkɛ te Yehova?

¹⁷ Kotshɛ ombeki wɔko djɛ ndawɛkɛ te Yehova. Yeso ashikikɛka ambeki wande ante Yehova angakotshɛ ladjikɛnde Nde ndakɔpaka. (Wala Mateo 10:19, 20, 29-31.) Vungola ombeki wɔko ente Yehova angokotshɛ. Okoka ndookotshɛ djɛ ndawɛkɛ te Yehova má ndɔmbaka esanga nyande lá nkambo dj’ekoma w’oyawilelande. Franciszek, kanga l’intansɛ lá Pologne ntepelaka ante: “Mbala efula, wetsha wɔmi wɔ Bible awalaki ekoma wɛmi lá ndɔmbɔ yɛnde. Winá wɔ mɛnaka wopo wɔ Yehova ndakandjimolaka lá ndɔmbɔ yɛ wetsha wɔmi, mbangaka la ndɔmba ipa la ntshatshimba. Nyɛnaka djɛ Yehova ankotshɛka winá w’imayale la djonyi djɛ ndɔsa vakashi l’olemo wɔmi wɔ bango djɛ ndjingela lá nsanghanyɛ yel’otshumano edjinge lá nsanghanyɛ yɛ nkekete.”

18. Wopo wɔkɔnge Yehova oyawokande lá nkambo djelendana l’olemo wɔ ndakanyɛ wokamba Akristo?

¹⁸ Yehova ndakiyanyɛka efula lá nkambo dj’ambeki waso wa Bible. Nde nsasangaka olemo wɔ wolo wokamba wetsha w’Akristo djɛ nkotshɛ anto dj’iwɔ ndasukanyɛ lande edjinge nde ndaakɔpaka má nkambo djɛsɔ. (Iza. 52:7) Ntsha winá wɔsɔ opalekɔ l’ombeki wɔ Bible weka la wɛ, mbɔ wɛ nkokaka nkotshɛ ambeki wa Bible dj’iwɔ mfula tii tá batisimo má ntshindjeyɛka ansakodji ankina djɛ nteka l’ambeki wawɔ.