1. Nkinyi kibabadi balungule kibumbu bwa kukita?

KIBUMBU kya bantu be bungi; balume na bakashi ba mu maumbo e bungi na abakula ndjimi ilekene kibadi kibungye. Dyadya efuku kubakitshikile mwanda wa kukanya. Bangi bena Yuda abadi na ngobesha ya kwisamba mu ndjimi ya baba bantu benyi! Bino bibadi bikanyishe kino kibumbu ngofu, mwanda myanda ibabadi abebalongyesha na bibadi mutumibwa Mpyele mwakule bibadi buwa ngofu. Kino kibumbu kibadi kilongye dingi’shi, nkilombene kupashibwa su kyalesha lukumino mwi Yesu Kidishitu. Uno mukandu ubadi ukume kino kibumbu ngofu. Bantu abadi bakumwe ku mashimba ngofu mu mushindo ubabadi bayipushe’shi: “Twi kukita kinyi?” Mpyele bebalulwile’shi: “Muntu oso a kwanudi abatshishiibwe.”​—Bik. 2:37, 38, Esambi dipya 2015.

2. Nkinyi ky’atutalula mu uno mwisambo? (Tala kifwatulo kya ku kipusu.)

² Kintu kibadi kikitshikye kunyima, kibadi kya kukanya. Bantu pepi 3 000 abadi babatshishibwe dyadya efuku, abo nkufika balongi ba Kidishitu. Uno, nyi mbangilo a mudimo ukata wa kwikasha bantu bu balongi, ubadi Yesu mulungule balongi baye bwabadya kukita. Balongi ba Yesu baky’abatungunuka na kukita uno mudimo mpa na lelo uno. Mu ano mafuku etu, ta twibalombene kwisamba na muntu munda mwa nsaa ipela na aye nkubatshishibwa nya. Mbilombene kwata myeshi, kipwa sunga kukila paapa bwa’shi mulongi a Bible alombashe kano kepatshila. Nka bu byouku, kukwasha muntu bwadya kubatshishibwa ta nkubofule. Mu uno mwisambo, atutalula kyodya kukita bwa  kukwasha mulongi a Bible bwa’shi abatshishibwe.

3. Muyile Mateo 28:19, 20, nkinyi akitungu’shi mulongi a Bible akite bwa kwela matambula mpa na ku lubatshisho?

³ Nkumpala kwa’shi mulongi a Bible abatshishibwe, abitungu atumikile malongyesha e mu Bible. (Badika Mateo 28:19, 20.) Nsaa ayitumikila mulongi a Bible byabya by’alongo, afiki bu “muntu mudimukye” a mu kileshesho kya Yesu badi mubundule bwina bula bwa kwibakila nshibo yaye pa mabwe. (Mat. 7:24, 25; Luk. 6:47, 48) Twi kukwasha mulongi a Bible naminyi bwadya kutumikila by’alongo? Tutaluleyi mayele asatu.

4. Twi kutungunuka na kukita kinyi bwa’shi mulongi a Bible alombashe myanda itekibwa bwa kubatshishibwa? (Tala dingi kashibo akamba’shi: “ Kwasha mulongi obe a Bible bwa kwifundjila bipatshila na kwibilombasha.”)

⁴ Kwasha mulongi obe bwadya kwikala na bipatshila. We kwibikita naminyi? Twate kino kileshesho: Su okwete kwenda lwendo lula, we mulombene kwimana mbalo i buwa mwishinda. Paapa, eshinda t’adikamba kumweka bula nya. Mu mushindo umune, su mulongi a Bible efundjila bipatshila byadya kulombasha mu mafuku apela, mulombene kumona’shi, mbibofule kukumbasha kipatshila kya kubatshishibwa. Fubisha kashibo akamba’shi, “Kepatshila” ke mu mukanda wa We kuikala na muloo bua loso! bwa kukwasha mulongi a Bible bwadya kwifundjila bipatshila. Ku nfudilo kwa dilongyesha dyoso, lesha bilombene kepatshila kukwasha mulongi obe bwa kutumikila by’akyakatuka mu kulonga. Su we na kangi kepatshila kokyebe’shi mulongi obe alombashe, ekafunde mbalo yabadi baleshe’shi “Kangi kepatshila.” Misusa na misusa, talula na mulongi obe a Bible bipatshila byadya kukumbasha munda mwa mafuku apela, na abimwata mafuku e bungi bwa kwibilombasha.

5. Muyile Maako 10:17-22, nkinyi kibadi Yesu mulungule muntu mpeta, na bwakinyi?

 ⁵ Kwasha mulongi obe a Bible bwadya kushintula nshalelo aye. (Badika Maako 10:17-22.) Yesu badi auku’shi, bi bukopo bwa’shi muntu mpeta audishe bintu byoso by’adi nabyo. (Mak. 10:23) Anka, Yesu badi mulungule uno muntu bwadya kukita uno mwanda wi bukopo mu nshalelo aye. Bwakinyi? Mwanda Yesu badi mumufule. Ingi nsaa, twi kwikoka bwa kunyingisha mulongi a Bible bwadya kutumikila myanda y’alongo, mwanda atupwandjikisha’shi talombene bya kushintula myanda itekibwe. Mbilombene kwata mafuku e bungi bwa’shi muntu a shintule nshalelo aye na kufwala muntu mupya. (Kol. 3:9, 10) Anka, su ku mbangilo w’esamba na mulongi a Bible myanda ayitungu’shi ashitule pakuki nsaa, mmulombene kubanga kushintuluka. Pa kwisamba naye bino, olesha’shi omupasukila.​—Mis. 141:5; Nki. 27:17.

6. Bwakinyi abitungu kwela mulongi a Bible nkonko ayimutakula bwa kwakula by’epusha?

⁶ Bina muulo kwela mulongi etu a Bible nkonko ayimutakula bwa kwakula by’epusha. Kukita bino, akukukwasha bwa kumona su mulongi obe kwete apusha na kukumina myanda y’alongo. Su okita bino, abikakubofwila bwa kwisamba naye myanda i kumwelela bukopoo bwa kukumina. Mukanda wa We kuikala na muloo bua loso! wina nkonko i bungi ayitakula mulongi bwadya kwakula by’epusha. Bu kileshesho, mu dilongyesha dya 4 mwi lukonko alwamba’shi: “Omono’shi Yehowa apushaa naminyi nsaa y’ofubisha eshina diaye? Mu dilongyesha dya 9 mwi lukonko a lwamba’shi: “Okumina kuteka pabitale kinyi?” Ku mbangilo, mbilombene kwelela mulongi obe a Bible bukopo bwa kwalula ku nkonko i bino. Anka, we kumukwasha bwadya kunangushena pa Bifundwe na bifwatulo bi mu mukanda.

7. Mushindo kinyi watudya kufubisha myanda ya mu nshalelo a bantu kalolo?

⁷ Nsaa ayiuku mulongi obe akitungu’shi akite, fubisha myanda ya mu nshalelo ayimungisha bwadya kwibikita. Bu kileshesho, su abyelela mulongi obe a Bible bukopo bwa kwenda mu bisangilo, we kumulesha video amba’shi Yehowa mumpasukile, mu kipindji akyamba’shi “Taluula dingi” mu dilongyesha dya 14. Mu malongyesha e bungi a mukanda wa, We kuikala na muloo bua loso! opete myanda i bino, byabikala mu kipindji kya “Tukimbuule boso” sunga mu kya “Taluula dingi.” * Dimukila kupwandjikisha mulongi obe a Bible na ungi muntu pa kumulungula’shi: “Su aye bebikitshi, nobe namu we kwibikita.” Tadila mulongi a Bible aye nabene ebyakule. Anka, akwila myanda kampanda ibakwasha yawa muntu e mu video bwa kutumikila malongyesha a mu Bible. Pangi we kwisambila kifundwe sunga mwanda kampanda ukite yawa muntu. Su kwi mushindo, shimika kasele pa mushindo wi Yehowa mukwashe yawa muntu.

8. Mushindo kinyi watudya kukwasha balongi betu ba Bible bwadya kufula Yehowa?

⁸ Kwasha mulongi obe a Bible bwadya kufula Yehowa. Mushindo kinyi? Kimba nsaa ya kukaka binangu byaye ku ngikashi ya Yehowa. Kwasha mulongi obe bwadya kumona’shi Yehowa nyi Efile a muloo a kwashaa boso bamufule. (1 Tim. 1:11; Eb. 11:6) Lesha mulongi obe a Bible’shi, apete myabi su batumikila by’alongo na’shi, byabya abilesha’shi Yehowa mumufule. (Yesh. 48:17, 18) Bino abinyisha kutakula mulongi obe a Bible bwa kushintuluka apende na kutama kifulo kyaye bwa Yehowa.​—1 Yo. 5:3.

9. Muyile Maako 10:29, 30, nkinyi kilombene kukwasha muntu bwa kwisumina ingi miloo bwa kubatshishibwa?

⁹ Bwa’shi mulongi a Bible ele matabula mpa na ku lubatshisho, abitungu esumine ingi miloo. Nka bu muntu mpeta atatupwile kutemuna, abitungu bangi balongi ba Bible besumine bingi bintu bya ku mbidi. Su mudimo wabo ngwikutwene na mayi a kulonda e mu Bible, abitungu beulekye. Abitungu bangi batshibe kipwano na ba kuuku bashi bafule Yehowa. Bangi be kwibasumbushene kwi bena bifuko byabo bashi bafule ba Temwe ba Yehowa. Yesu bakwile’shi, mbilombene kwikela bangi bukopo bwa kukumina ino nkalakashi. Kadi bakwile’shi, boso abamulondo, t’abakakwatshishwa bufu. Anka, Yehowa ebafutu pa kwibapa kifuko kya mu kikudi kibafule. (Badika Maako 10:29, 30.) Mushindo kinyi odya kukwasha mulongi obe a Bible bwadya kusangela kino kya buntu?

10. Nkinyi kibolongyela ku mwanda wa Manuel?

¹⁰ Nyingisha kipwano na mulongi obe a Bible. Bi buwa oleshe mulongi obe a Bible’shi okwete kumupasukila. Bwakinyi? Pusha abyakula Manuel, mushale mu Mexique. P’atentekyesha mafuku abadi alongo Bible, amba’shi: “Kumpala kwa kulonga koso, mulongyeshi ande badi angipusha byandi. Badi ankwasha bwa kwipusha kalolo na bwandya kumulungula myanda yoso. Nadi nepusha’shi, kwete ampasukila.”

11. Kukisha nsa pamune na balongi betu na Bible kwi kwibakwasha naminyi?

¹¹ Kisha nsaa na balongi bobe ba Bible, nka bu bibadi Yesu akitshi. (Yo. 3:22) Su kwi mushindo, itamina mulongi obe a Bible kwete kwela matabula ku nshibo yobe bwa kudya kantu, sunga bwa kutala Televizion a JW. Mulongi obe mulombene kwikala na lutumbu, bikishekishe su omwitamina mafuku abakitshi misangelo ya bipwilo bya madimi, mafuku adi mulombene kwipusha bupenka. Kazibwe mushale mu Uganda amba’shi: “Namono’shi nemulongye bi bungi pabitale Yehowa, p’ami kukisha nsaa i bungi na mulongyeshi ande nka bu  pa nsaa ya kulonga. Nadi namono mushindo wi Yehowa apasukila bafubi baye na muloo wabadi nao. Bino nyi binadi nakumina kwikala mu nshalelo ande.”

12. Bwakinyi abitungu twende na balungudi belekene p’atukalongo Bible na muntu?

¹² Enda na bangi balungudi p’anukalongo. Ingi nsaa, twi kumona’shi mbibofule kwenda bupenka sunga kwendanga nka na penda mulungudi umune. Eyendo’shi, bino mbibofule kukita, anka su twenda na balungudi belekene, bino bi kukwasha mulongi etu a Bible. Dmitrii mushale mu Moldavie amba’shi: “Mulungudi oso ababadi abafiki naye, badi apatula myanda mu waye mushindo. Bino bibadi binkwashe bwa kumona ingi mishindo ya kutumikila byandongo. Bibadi dingi bimpwe buufu panatwelele bisangilo byande bya kumpala, mwanda tanadi mupwe kwimonena na bakwetu balume na bakashi be bungi.”

13. Bwakinyi abitungu tukwashe mulongi etu a Bible bwadya kutwela mu bisangilo?

¹³ Kwasha mulongi obe a Bible bwadya kutwela mu bisangilo. Bwakinyi? Mwanda Yehowa atekye balangwidi baye bwadya kwibunga pamune; nyi kipindji kya lulangwilo lwetu. (Eb. 10:24, 25) Na dingi, bakwetu balume na bakashi nyi kifuko kyetu kya mu kikudi. Patudi nabo ku bisangilo, bi’nka butwe abadi kya kudya ki buwa pamune ku nshibo. P’okwasha mulongi obe a Bible bwadya kutwela mu bisangilo, omukwasha bwa kwela etabula di na muulo, adimukwasha bwa kubatshishibwa. Anka, dikwikala etabula di bukopo dyadya kukita. Mukanda wa, We kuikala na muloo bua loso! wi kukwasha mulongi a Bible naminyi bwadya kukambila ino yoso nkalakashi?

14. Twi kunyingisha balongi betu ba Bible bwabadya kwikala na kisukusuku kya kutwela mu bisangilo naminyi?

¹⁴ Fubisha dilongyesha dya 10 dya mukanda wa We kuikala na muloo bua loso! bwa kunyingisha mulongi obe a Bible bwa’shi ekale na kisukusuku kya kutwela mu bisangilo. Balungudi abekalanga batompe uno mukanda kumpala kwa’shi utukye, abamba’shi dino dilongyesha ndikwashe balongi ba Bible bwadya kutwela mu bisangilo. Anka, totengyela na ku dilongyesha dya 10 bodya kwitamina mulongi obe a Bible ku bisangilo. Mwitamine nkanwe baky’ababanga na otungunukye na kwibikita. Balongi ba Bible bena nkalakashi ilekene. Kimba bya kuuka nkalo ya mulongi obe a Bible na omone su we mulombene kumukwasha. Tobofulanga sunga byata nsaa bwa’shi abangye kutwela mu bisangilo. Ikala na lwishinko na otungunukye nka na kumwitamina ku bisangilo.

15. Moo kinyi wi kwikala nao balongi betu ba Bible?

¹⁵ Otentekyesha moo wa kwikala Temwe a Yehowa ubodi opusha? Pangi bodi wepusha’shi, twemulombene kukita mudimo wa bulungudi. Pangi bodi otshinyi’shi bena kifuko nobe sunga ba kuuku bobe be nkulwiisha. Su bi bino, we kwitula pa mbalo ya mulongi obe a Bible. Yesu badi auku’shi, bangi bantu mbalombene kupusha uno moo. Anka, badi munyingishe balongi’shi tabatadilanga uno moo bwaudya kwibakutshisha kufubila Yehowa. (Mat. 10:16, 17, 27, 28) Mushindo kinyi ubadi Yesu mukwashe balongi baye bwabadya kukambila moo? Na mushindo kinyi odya kumwambula?

16. Mushindo kinyi watudya kulongyesha mulongi etu a Bible byadya kulungula bangi pabitale lukumino lwaye?

¹⁶ Kapelakapela, nyingisha mulongi obe a Bible bwadya kwakula pabitale lukumino lwaye. Balongi ba Yesu abadi pangi bapushe katshima munda pabadi mwibatume mu kulungula mukandu wi buwa. Anka, Yesu badi mwibakwashe pa kwibalungula mbalo na kyabadya nkakula mu bulungudi. (Mat. 10:5-7) We kwambula  Yesu naminyi? Kwasha mulongi obe a Bible bwadya kuuka mbalo yadya kulungula mukandu wi buwa. Bu kileshesho, mwipushe su auku muntu e kukumina kulonga bya binyibinyi bi mu Bible. Akupu, omukwashe bwa kulumbula kyadya kwakula pa kumulesha mushindo upelepele wadya kulungula byabya bya binyibinyi? Pa nsaa ilombane, we kufubisha kipindji akyamba’shi, “Su muntu akwipusha’shi” na “Bangi abepusha’shi,” mu mukanda wa We kuikala na muloo bua loso! bwa kumulesha bya kwibikita. Nsaa ywebikitshi, lesha mulongi obe bwadya kufubisha Bible bwa kutusha ngalulo ipelepele.

17. Mushindo kinyi watudya kufubisha Mateo 10:19, 20, 29-31, bwa kukwasha mulongi etu a Bible bwadya kukulupila mwi Yehowa?

¹⁷ Kwasha mulongi obe a Bible bwadya kukulupila mwi Yehowa. Yesu badi mushinkamishe balongi baye’shi Yehowa ebakwasha, mwanda mwibafule. (Badika Mateo 10:19, 20, 29-31.) Tentekyesha mulongi obe a Bible’shi, Yehowa amukwasha naye namu. We kumukwasha bwa’shi akulupile mwi Yehowa pa kuteka naye pamune bwa bipatshila byaye. Franciszek mushale mu Pologne amba’shi: “Mulongyeshi ande badi akula bwa bipatshila byande mu nteko yaye. Pa nadi mumone mushindo ubadi Yehowa mwalule ku nteko ya mulongyeshi ande, nabangile nami namu kuteka kushi kunyengakana. Nadi namono bukwashi bwa Yehowa, nsaa inadi natekye bwa’shi su abampa matalwa ku mudimo bwa kwenda ku bisangilo na ku kikongeno kya mafuku asatu.”

18. Yehowa apushaa naminyi pabitale mudimo aukitshi balongyeshi bena Kidishitu?

¹⁸ Yewoha apasukilaa balongi betu ba Bible ngofu. Auku mudimo wi bukopo aukitshi balongyeshi bena Kidishitu bwa kukwasha bantu bwa’shi befubwile pepi naye, na mwibafule bwa bino. (Yesh. 52:7) Su t’okwete kulonga Bible na muntu binobino, we kutungunuka na kukwasha balongi ba Bible bwabadya kwela matabula mpa na ku lubatshisho, pa kushindjikila bangi balungudi kwi balongi babo ba Bible.