1. Andi dee fesiten Keesitu sëmbë bi piki wanlö gaan hia sëmbë u de du?

 WANLÖ gaan hia sëmbë di bi kumutu a peipei köndë bi go miti a Jelusalen. Dee sëmbë aki bi dë womi ku mujëë di bi ta fan peipei töngö. Wan apaiti soni bi pasa di daka dë. Wan pasi vou sö, so Dju bi ko ta fan a dee töngö u dee sëmbë dee bi ko dë. Di soni aki bi bigi da dee sëmbë seei. Ma di soni di dee Dju bi taki, ku di soni di apösutu Petuisi bi taki, bi möön bigi da de seei. De bi lei de taa de sa feni libi ee de buta biibi a Jesosi Keesitu. Di soni aki bi dou dee sëmbë hati seei. A bi dou de hati sö tee taa de bi hakisi taa: „Unfa woo du möön?” Hën Petuisi piki de taa: ’Be hiniwan fuunu dopu.’​—Tjab. 2:37, 38.

2. Andi woo luku a di woto aki? (Luku di peentje u di kafiti.)

² Wan gaan soni bi pasa baka di dë. Di daka dë, söwan 3000 sëmbë bi dopu ko dë bakama u Keesitu. A sö wan fasi sëmbë bi bigi du di gaan wooko di Jesosi bi piki dee bakama fëën u de du. A bi piki de u de heepi sëmbë u de ko dë bakama fëën. Dee bakama fëën ta du di wooko dë tide jeti. A di ten aki wa sa heepi wan sëmbë u dë kabakaba u dopu, a wantu juu dendu nöö. A sa tei sömëni liba, nasö wan jaa, nasö möön longi seei u wan sëmbë sa dou di maaka dë. Wë kumafa i sabi, nöö u musu wooko taanga seei fuu sa heepi wan sëmbë faa sa ko dë bakama u Keesitu. A di woto aki, woo luku andi i sa du u heepi wan sëmbë di i ta lei soni u Bëibel, faa sa dopu ko dë wan bakama u Keesitu.

3. Andi wan sëmbë di ta lei soni u Bëibel musu du faa sa dopu, kumafa Mateosi 28:19, 20 ta taki?

³ Ufö wan sëmbë di ta lei soni u Bëibel dopu, nöö a musu ta du dee soni di di Bëibel ta taki. (Lesi Mateosi 28:19, 20.) Te wan sëmbë di ta lei soni u Bëibel ta du dee soni dee a ta lei, nöö a ta ko dë kuma di ’köni womi’ u di woto u Jesosi, di bi seti di  goonsei u di wosu fëën a wan taanga goon (Mat. 7:24, 25; Luk 6:47, 48). Unfa u sa heepi wan sëmbë di ta lei soni u Bëibel faa du dee soni dee a ta lei? Boo buta pakisei a dii soni di u sa du.

4. Unfa u sa heepi wan sëmbë di ta lei soni u Bëibel, faa sa dou di maaka sö taa a sa dopu? (Söseei luku di pisi „ Heepi di sëmbë faa buta maaka da hënseei, söseei faa sa dou de”.)

⁴ Heepi di sëmbë di i ta lei soni u Bëibel faa buta maaka da hënseei. Faandi mbei i musu du di soni dë? Buta pakisei a di woto aki: Ee joo lëi ku wagi go a wan longi kamian, nöö kandë joo kë tapa a pasi a wantu waiti kamian. Di soni dë o heepi i fu ja fii taa di kamian longi poi. Wë sö nöö a dë tu taa te wan sëmbë di ta lei soni u Bëibel, ta buta maaka da hënseei di a sa dou a wan kölö pisiten, nöö di soni dë o heepi ën faa si taa a sa dou di maaka faa sa dopu. Wooko ku di pisi „Pooba di soni aki” di dë a di buku I sa dë waiwai u teego! u heepi di sëmbë faa go a fesi. Te i ku di sëmbë kaba luku wan woto, nöö un taki unfa di maaka dë o heepi ën faa du dee soni dee a lei. Ee wan woto maaka dë di i bi o kë taa di sëmbë musu dou, nöö sikifi ën a di pisi „Woto soni di i sa du”. I musu abi di guwenti u wooko ku di pisi aki, u heepi di sëmbë faa ko sabi un maaka a sa dou a wan kölö pisiten, nasö un maaka o tei möön ten faa dou.

5. Andi Jesosi bi piki wan guduma faa du, te u luku Maikusi 10:17-22, nöö faandi mbei a bi piki ën di soni dë?

⁵ Heepi di sëmbë di i ta lei soni u Bëibel, faa sa tooka soni nëën libi. (Lesi Maikusi 10:17-22.) Jesosi bi sabi taa a bi o taanga da wan guduma u sei dee gudu fëën (Maik. 10:23). Hii fa Jesosi bi sabi taa di soni dë bi o taanga da di womi faa du, tökuseei a bi piki ën faa du ën. Faandi mbei? Wë u di Jesosi bi lobi ën, mbei a bi piki ën di soni dë. So juu a sa pasa taa wa da di sëmbë di u ta lei soni u Bëibel taanga, faa du wan soni u Bëibel di a ta lei, u di u ta si kuma an kaba jeti faa du ën. A sa tei ten u wan sëmbë  tooka so soni nëën libi (Kol. 3:9, 10). Ma ee ja biabia u heepi ën faa ko sabi andi a musu tooka, nöö di soni dë o heepi ën faa sa tooka di soni möön hesi. Te i ku ën ta taki u dee lö soni aki, nöö a sö wan fasi i ta lei taa i ta booko i hedi ku ën.​—Ps. 141:5; Nöng. 27:17.

6. Faandi mbei u musu ta hakisi di sëmbë di u ta lei soni u Bëibel unfa a ta pakisei?

⁶ A dë fanöudu fuu hakisi di sëmbë di u ta lei soni u Bëibel, unfa a ta pakisei u wan soni. Di soni dë o heepi u fuu ko sabi unfa a fusutan di soni tjika, söseei andi a ta biibi. Ee u guwenti u du di soni aki, nöö an o ta taanga da u sö fuu ku ën taki u dee soni dee ta taanga dëën faa du. Di buku I sa dë waiwai u teego!, abi sömëni hakisi di sa heepi u fuu ko sabi unfa di sëmbë ta pakisei. Woto 04 abi di hakisi aki: „Unfa i si kuma Jehovah ta fii te i ta kai di në fëën?” Woto 09 abi di hakisi aki: „Andi da wantu soni di i bi o kë taki u de te i ta begi?” A kan taa bigibigi a o ta taanga da di sëmbë di u ta lei soni u Bëibel, faa sa ta piki dee lö hakisi aki. Ma u sa heepi ën te u ta dëën taanga faa ta buta pakisei a dee Bëibel tëkisi, ku dee peentje dee dë a di buku.

7. Unfa u sa wooko ku woto u sëmbë u di ten aki, a wan bunu fasi?

⁷ Te di sëmbë di i ta lei soni u Bëibel ko fusutan kaa andi a musu du, nöö wooko ku woto u sëmbë u di ten aki, u dëën taanga faa du di soni di a lei. Ee a ta taanga da di sëmbë faa ko a dee komakandi, nöö i sa lei ën di fëlön Jehovah bi ta booko hën hedi ku mi, di dë a di pisi „Woto soni di i sa luku” u Woto 14. A sömëni u dee woto dee dë a di buku I sa dë waiwai u teego!, joo feni woto u sëmbë a di pisi „Diki go möön fundu”, nasö a di pisi „Woto soni di i sa luku”. b Köni be ja tei di sëmbë di i ta lei soni u Bëibel maaka ku wan woto sëmbë. Ja musu taki taa: „Ee a sa du ën, nöö iseei sa du ën tu.” Da di sëmbë pasi fu hënseei ko fusutan di soni dë. I sa taki u wantu fanöudu soni di bi heepi di sëmbë di di fëlön ta taki fëën, faa du andi di Bëibel ta taki. Kandë i sa taki u wan fanöudu tëkisi, nasö u wan fanöudu soni di di sëmbë bi du. Tei hii okasi di i abi, u lei ën unfa Jehovah bi heepi di sëmbë.

8. Unfa u sa heepi di sëmbë di u ta lei soni u Bëibel faa ko lobi Jehovah?

⁸ Heepi di sëmbë di i ta lei soni u Bëibel faa ko lobi Jehovah. Unfa i sa du di soni dë? Suku okasi fii sa lei di sëmbë soni u dee bunu fasi di Jehovah abi. Heepi ën faa ko fusutan taa Jehovah da wan Gadu di ta dë waiwai, söseei taa a ta heepi dee sëmbë dee lobi ën (1 Tim. 1:11; Heb. 11:6). Heepi di sëmbë faa ko fusutan taa a o feni wini ee a du dee soni dee a lei. Heepi ën faa ko fusutan tu taa dee wini dee a o feni, da soni di ta lei taa Jehovah lobi ën (Jes. 48:17, 18). Möön di sëmbë di i ta lei soni u Bëibel o ta ko lobi Jehovah, möön a o ta kë tooka soni nëën libi te a dë fanöudu (1 Joh. 5:3).

9. Andi sa heepi wan sëmbë faa disa so soni faa sa dopu ko dë wan bakama u Jesosi, te u luku Maikusi 10:29, 30?

⁹ Ee di sëmbë di ta lei soni u Bëibel kë go a fesi faa sa dopu, nöö a musu tooka soni nëën libi. Wë leti kumafa di gudu womi di u bi taki soni fëën bi musu disa so soni, sö nöö so u dee sëmbë dee ta lei soni u Bëibel musu disa so soni tu. Ee a dë sö taa di wooko di de ta du an ta kai ku dee lei u Bëibel, nöö a o sa dë fanöudu u de suku wan woto wooko. Kandë a o dë fanöudu u de an ta nama möön ku dee mati u de dee an lobi Jehovah. Kandë so famii u de an o  kë nama ku de möön u di de an lobi dee Jehovah Kotoigi. Jesosi bi taki taa a sa taanga da so sëmbë u du dee soni aki. Ma a bi paamusi de taa ee de waka nëën baka, nöö de an o bai sabisö. Jehovah o mbei de feni famii a di biibi di lobi de. (Lesi Maikusi 10:29, 30.) Unfa i sa heepi di sëmbë di i ta lei soni u Bëibel faa feni di gaan bunu aki?

10. Andi i ta lei a di soni di Baaa Manuel bi taki?

¹⁰ Ko dë mati ku di sëmbë di i ta lei soni u Bëibel. A dë fanöudu fii lei di sëmbë di i ta lei soni u Bëibel taa i ta booko i hedi ku ën. Faandi mbei a dë fanöudu? Luku di woto u wan baaa de kai Manuel, di ta libi a di köndë Mëkisikou. Di baaa aki bi taki unfa di sëmbë di bi ta lei ën soni u Bëibel bi heepi ën. A bi taki taa: „Ufö di sëmbë di bi ta lei mi soni u Bëibel bigi lei mi soni, nöö a bi ta hakisi mi ee unfa a nango ku mi. A bi ta heepi mi u mi bi sa fii bunu, nöö a bi ta da mi pasi u mi bi sa taki u hiniwan soni ku ën. Mi bi ta fii taa a bi ta booko hën hedi ku mi tuutuu.”

11. Unfa dee sëmbë dee u ta lei soni u Bëibel sa feni wini te u ku de ta dë makandi?

¹¹ I musu ta tei ten fii dë makandi ku dee sëmbë dee i ta lei soni u Bëibel, leti kumafa Jesosi bi ta tei ten u dë makandi ku dee bakama fëën (Joh. 3:22). Ee di sëmbë di i ta lei soni u Bëibel nango a fesi a di biibi, söseei ee a fiti, nöö i sa kai ën ko a i pisi fuun bebe wan soni makandi, fuun njan wan soni makandi, nasö fuun luku wan u dee broadcasting fuu makandi. A sa tei ën u bigi seei ee i kai ën ko a i pisi, te dee mati fëën nasö dee famii fëën ta hoi wan gaan daka di nama ku poipoi biibi, u di a dee pisiten dë a sa ta fii taa a dë hën wanwan. Wan baaa de kai Kazibwe di ta libi a di köndë de kai Uganda bi taki taa: „Leti kumafa mi bi ta lei hia soni te di baaa bi ko lei mi soni u Bëibel, sö nöö mi bi ta lei hia soni te mi ku ën bi dë makandi. Mi bi si unfa Jehovah bi ta booko hën hedi ku dee sëmbë fëën, söseei mi bi si unfa de ta dë waiwai tjika. Nöö miseei bi kë di libi dë tu.”

12. Faandi mbei u musu ta kai woto peleikima u de ko ku u te woo go lei wan sëmbë soni u Bëibel?

 ¹² Kai woto peleikima u de ko ku i te joo go lei di sëmbë soni u Bëibel. So juu u sa ta si kuma a möön bunu ee u nango u wanwan, nasö ee u ta kai di seei peleikima faa ta ko ku u. Hii fa a sa möön bunu da u te u du soni a di lö fasi aki, di sëmbë o möön feni wini fëën ee u ta kai woto peleikima u de ko ku u. Wan baaa de kai Dmitrii di ta libi a di köndë Moldafia bi taki taa: „Hiniwan peleikima di bi ta ko ku di baaa di bi ta lei mi soni bi abi hën fasi fa a bi ta lei sëmbë soni. Di soni dë bi heepi mi u mi ko fusutan na un woto fasi mi bi sa du dee soni dee mi bi ta lei. Boiti di dë, a bi heepi mi u ma dë fëëëfëëë di mi bi go a komakandi di fosu pasi, u di mi ku sömëni u dee baaa ku dee sisa bi miti kaa.”

13. Faandi mbei u musu heepi di sëmbë di u ta lei soni u Bëibel faa ta ko a dee komakandi?

¹³ Heepi di sëmbë di i ta lei soni u Bëibel faa ta ko a dee komakandi. Faandi mbei i musu du di soni aki? U di Jehovah piki dee sëmbë dee ta dini ën taa de musu ta ko makandi. A dë wan u dee soni di de musu ta du u dini ën (Heb. 10:24, 25). Ma na di dë nöö. Dee baaa ku dee sisa a di kemeente da famii fuu a di biibi. Te u ku de dë a komakandi, nöö a dë kuma u dë a wosu ta njan wan suti njanjan makandi. Te i ta heepi di sëmbë di i ta lei soni u Bëibel faa ta ko a dee komakandi, nöö hën da i ta heepi ën faa du wan u dee möön fanöudu soni di o mbei taa a sa dopu. Ma a sa taanga dëën faa bigi ko a komakandi. Unfa di buku I sa dë waiwai u teego! sa heepi di sëmbë u soni an tapëën faa ko a dee komakandi?

14. Unfa u sa da di sëmbë di u ta lei soni u Bëibel taanga faa ta ko a dee komakandi?

¹⁴ Wooko ku Woto 10 u di buku I sa dë waiwai u teego! u da di sëmbë taanga. Ufö de tja di buku aki ko a döö, de bi hakisi wantu peleikima u de wooko ku di woto aki. Dee peleikima bi taki taa a bi heepi dee sëmbë gaanfa seei u de ta ko a dee komakandi. Ma an dë fii wakiti te i ku di sëmbë dou a Woto 10 ufö i kai ën faa ko a dee komakandi. Na biabia u kai ën, nöö ta kai ën hii juu. Na hii dee sëmbë dee i ta lei soni u Bëibel ta abi di wan bookohedi. Fëën mbei luku andi di sëmbë abi fanöudu, nöö luku andi i sa du u heepi ën. Na lasi hati ee an bigi ko a dee komakandi wantewante. I musu hoi pasensi ku ën, ma i musu ta kai ën nömö.

15. Andi sa mbei di sëmbë di u ta lei soni u Bëibel fëëë?

¹⁵ Wë kandë bigibigi i bi ta fëëë fii toon wan Jehovah Kotoigi, nöö i ta mëni di soni dë jeti. Kandë i bi ta si kuma nöiti i bi o sa go peleiki da sëmbë a de pisi. Nasö kandë i bi ta fëëë taa dee famii fii nasö dee mati fii bi o du ku i. Wë ee sö soni bi dë da i, nöö i sa fusutan unfa di sëmbë di i ta lei soni u Bëibel ta fii. Jesosi bi taa dee lö soni dë bi o sa mbei so sëmbë fëëë. Ma tökuseei a bi da dee bakama fëën taanga u de an mbei di fëëë di de ta fëëë tapa de u de dini Jehovah (Mat. 10:16, 17, 27, 28). Unfa Jesosi bi heepi dee bakama fëën u de an fëëë? Nöö unfa iseei sa heepi dee sëmbë dee i ta lei soni u Bëibel?

16. Unfa u sa heepi di sëmbë di u ta lei soni u Bëibel, faa ta konda dee soni dee a ta biibi da wotowan?

¹⁶ Heepi di sëmbë pikipiki faa ta konda dee soni dee a ta biibi da wotowan. A kan taa dee bakama u Jesosi bi ta fëëë di a bi manda de go peleiki. Ma Jesosi bi heepi de. A bi piki de naasë de bi musu go peleiki, söseei a bi piki de andi de bi musu taki (Mat. 10:5-7). Unfa i sa djeesi Jesosi? Heepi di sëmbë di i ta lei soni u Bëibel faa sa sabi na un ten a sa peleiki. I sa hakisi ën ee a sabi wan sëmbë di bi o sa feni wini u wan soni di di Bëibel ta taki. Baka di dë, nöö i sa heepi ën faa ko sabi unfa a sa konda di soni  dë da wotowan. Te a fiti, nöö i sa heepi ën faa sa seeka hënseei ku di pisi „So sëmbë ta taki taa”, söseei ku di pisi „Wan sëmbë sa hakisi taa” di dë a di buku I sa dë waiwai u teego! Te joo du di soni dë, nöö heepi di sëmbë faa sa lei wooko ku di Bëibel u piki sëmbë soni a wan fasi di an taanga u fusutan, söseei a wan lesipeki fasi.

17. Unfa u sa wooko ku Mateosi 10:19, 20, 29-31, u heepi di sëmbë di u ta lei soni u Bëibel faa ta futoou Jehovah?

¹⁷ Heepi di sëmbë faa futoou Jehovah. Jesosi bi piki dee bakama fëën taa Jehovah bi o heepi de u di a lobi de. (Lesi Mateosi 10: 19, 20, 29-31.) Piki di sëmbë di i ta lei soni u Bëibel taa Jehovah o heepi ën tu. I sa heepi ën faa futoou Jehovah te i ku ën ta begi Jehovah makandi, sö taa a sa heepi ën faa dou dee maaka dee a kë dou. Wan baaa de kai Franciszek di ta libi a di köndë Poland, bi taki taa: „Di sëmbë di bi ta lei mi soni u Bëibel bi lo’ u taki soni u dee maaka dee mi bi kë dou te a bi ta begi. Di mi si taa Jehovah bi piki dee begi fëën, hën wantewante miseei bigi begi tu. Mi bi ta si taa Jehovah bi ta heepi mi te mi bi ta hakisi di basi u mi faa da mi pasi u mi sa fika a wosu, sö taa mi bi sa go a könklësi nasö a dee komakandi, hii fa ma bi dë longi a di wooko aki jeti.”

18. Unfa Jehovah ta feni di wooko di dee dinima fëën ta du?

¹⁸ Jehovah ta booko hën hedi gaanfa seei ku dee sëmbë dee u ta lei soni u Bëibel. A sabi unfa dee dinima fëën ta wooko taanga tjika u heepi sëmbë u de ku ën sa ko dë mati. Nöö di soni dë ta mbei a ta lobi de (Jes. 52:7). Ee ja abi wan sëmbë ta lei soni u Bëibel nöunöu dë, tökuseei i sa heepi sëmbë di ta lei soni u Bëibel u de go a fesi u de sa dopu. I sa du di soni dë te i nango ku woto peleikima te de o go lei sëmbë soni u Bëibel.