1. Komol᷊ang taumata su abad humotong nioro pěkoạ apa?

PIẠ komol᷊ang taumata, esẹ dingangu wawine bọu haghing negeri dingangu haghing bawera nẹ̌komol᷊ẹ̌. Sěmbaụ hal᷊ẹ̌ nakahěkosẹ̌ nariadi su ěllo ene. Pirang katau tau Yahudi sěngkělěndịu botonge makawisara bawera bọu komol᷊ang taumata ene. Ene sěbạe nakahěrang, katewe apa niul᷊ị u tau Yahudi si sire dingangu apa niul᷊ị i Rasul Petrus si sire kěbị ene limembong nakaherang. Komol᷊ang taumata ene něngěndung tadeạu masal᷊amatẹ̌, i sire harusẹ̌ měnodẹ pangangimang si Yesus Kristus. Apa nikaringihang sěbạe nakakanoạ naung i sire. Sarang i sire nẹ̌kiwal᷊o, ”Apa harusẹ̌ koateng i kami?” I Petrus simimbahẹ̌ si sire, ”I kamene pẹ̌sěngkatau harusẹ̌ ibaptisẹ̌.”​—Kis. 2:37, 38.

2. Apa sarung ěndungang i kitẹ su pěngangěndungang ini? (Pěmanda gambarẹ̌ sampul.)

² Apa nariadi tuhụe ene lai sěbạe nakạlaherang. Su ěllo ene, ěndịu piạ 3.000 su kataune taumata nibaptisẹ̌, nakoạ muriti Kristus. Hal᷊ẹ̌ měnginjilẹ̌ niorong i Yesus gunang koatengu manga tumatol᷊ene něnětạ nikoạ su tempo ene. Kụ hal᷊ẹ̌ ene turusẹ̌ kẹ̌koateng sarang orasẹ̌ ini. I kitẹ tawe makatul᷊ung taumata apidu ibaptisẹ̌ kětạeng su ral᷊ungu pirang kaorasẹ̌. Ěndịu perlu pira wul᷊ang, pira taung, arau limembong marěngụ tadeạu sěngkatau měngangěndung ibaptisẹ̌. Mạeng i kau měnẹ̌něntiro Alkitapẹ̌ su sěngkatau, i kau tantu seng masingkạ gunang mẹ̌tul᷊ung sěngkatau makoạ muriti Kristus, i kau harusẹ̌ sěbạe mẹ̌tawakal᷊i. Su pěngangěndungang ini, i kitẹ sarung měngěndung apa wotonge koateng i kitẹ gunang mẹ̌tul᷊ung měngangěndung Alkitapẹ̌ tadeạu ibaptisẹ̌.

3. Tumuhụ Matius 28:19, 20, apa harusẹ̌ koatengu měngangěndung Alkitapẹ̌ tadeạu botonge ibaptisẹ̌?

³ Těntal᷊ang bědang tawe nibaptisẹ̌, sěngkatau měngangěndung Alkitapẹ̌ harusẹ̌ měkoạ apa seng niěndungange. (Basa Matius 28:19, 20.) Su tempong měngangěndung Alkitapẹ̌ někoạ apa seng niěndungange, i sie nakoạ kere ”taumata pelesa” su sasihing i Yesus němangung bal᷊ene su wowong batu. (Mat. 7:24, 25; Luk. 6:47, 48) Kerea i kitẹ mẹ̌tul᷊ung měngangěndung tadeạu měkoạ apa seng niěndungange? Mahịe i kitẹ měngěndung tatělu těgu gunang měkoạ ene.

4. Kerea i kitẹ botonge mẹ̌tul᷊ung měngangěndung Alkitapẹ̌ tadeạu turusẹ̌ mẹ̌tawakal᷊i gunang ibaptisẹ̌? (Pěmanda lai kotak ” Tul᷊ung Měngangěndung tadeạu Piạ Cita-Cita dingangu Měkoạ Ene.”)

⁴ Tul᷊ung měngangěndung Alkitapẹ̌ tadeạu i sie piạ cita-cita. Kawe nụe i kau harusẹ̌ měkoạ ene? Pẹ̌tiněna sasihing ini: Su tempong i kau makoạ sarang tampạ marau, su kanandụu ral᷊eng i kau tantu sarung měmutusẹ̌ gunang měngirul᷊e su tampạ masadadạ. Mạeng měkoạ ene, i kau tawe mẹ̌pěndang tampạ tẹ̌timonangu ene bědang marau. Kerene lai, su tempong měngangěndung Alkitapẹ̌ seng piạ cita-cita jangka pendek kụ nakakoạ ene, i sie sarung masadarẹ̌ cita-cita gunang ibaptisẹ̌ lai botonge ikakoạe. Pakẹ kotak ”Kěnang pěkoạ ini” su bukẹ̌ Pěbiahe Mal᷊uasẹ̌ Sarang Karěngụe! gunang mẹ̌tul᷊ung měngangěndung měkoạ kemajuan. Sabang pěngěngsuengu pěngangěndungang, lahẹko kerea cita-citane makatul᷊ung si sie měkoạ apa seng niěndungange. Mạeng i kau piạ cita-cita wal᷊inẹ gunang měngangěndung, bohẹ ene su bageang ”Hal᷊ẹ̌ bal᷊inẹ”. Pakarading měpakẹ bageang ini gunang mělahẹ soal u cita-cita jangka pendek dingangu cita-cita jangka panjang měngangěndung Alkitapẹ̌.

5. Kere nilahẹ su Markus 10:17-22, Yesus něngoro sěngkatau esẹ makalạ gunang měkoạ apa, kụ kawe nụe?

⁵ Tul᷊ung měngangěndung měkoạ pẹ̌bawal᷊ui su pěbawiahe. (Basa Markus 10:17-22.) Yesus masingkạ tawe gampang su sěngkatau esẹ  makalạ gunang mẹ̌bal᷊ụ kěbị arětạe. (Mrk. 10:23) Katewe, i Yesus naul᷊ị su esẹ ene gunang měkoạ pẹ̌bawal᷊ui gěguwạ su pěbawiahe. Kawe nụe? Ual᷊ingu i Yesus makěndagẹ̌ si sie. Pẹ̌sěngsul᷊ẹ, i kitẹ ěndịu tawe němahangsang měngangěndung měkoạ apa seng niěndungange ual᷊ingu i kitẹ nẹ̌pěndang i sie tawe sadia gunang měkoạ pẹ̌bawal᷊ui. Ěndịu harusẹ̌ piạ tempo su sěngkatau gunang měkoạ pẹ̌bawal᷊ui su pěbawiahe kụ měpakẹ pěbawiahẹ̌ buhu. (Kol. 3:9, 10) Katewe limembong mal᷊ighạ i kau mẹ̌bisara soal u pẹ̌bawal᷊ui harusẹ̌ koatenge, limembong mal᷊ighạ lai měngangěndung botonge měkoạ pẹ̌bawal᷊ui. Mạeng mẹ̌bisara soal u ene, i kau něnodẹ i kau mapadul᷊i si sie.​—Mz. 141:5; Amsal 27:17.

6. Kawe nụe i kitẹ harusẹ̌ měpakẹ kakiwal᷊o sudut pandang?

⁶ Penting si kitẹ mẹ̌kiwal᷊o apa tẹ̌tiněnangu měngangěndung soal u sěmbaụ topik. Ini sarung měnodẹ apa nikaěnang dingangu pẹ̌pangimangengu měngangěndung. Mạeng marading měkoạ ene, i kau sarung limembong gampang mělahẹ manga hal᷊ẹ̌ ěndịu masigěsạ tarimạkenge. Su bukẹ̌ Pěbiahe Mal᷊uasẹ̌ Sarang Karěngụe! piạ lawọ kakiwal᷊o sudut pandang. Contone, su pěngangěndungang 04 piạ kakiwal᷊o, ”Tumuhụ si kau, kerea pěndang i Yehuwa su tempong i kau něpakẹ areng’E?” Su pěngangěndungang 09 piạ kakiwal᷊o, ”I kau mapulu mẹ̌doa soal u apa?” Humotong ěndịu masulitẹ̌ su měngangěndung sumimbahẹ̌ manga kakiwal᷊o ene. I kau botonge melatih měngangěndung gunang mẹ̌tiněna soal u manga ayatẹ̌ dingangu manga gambarẹ̌ su bukẹ̌.

7. Kerea i kitẹ botonge limembong mapaelẹ̌ měpakẹ pengalaman taumata wal᷊inẹ?

⁷ Su tempong měngangěndung nakaěna apa harusẹ̌ koatenge, pakẹ pengalaman taumata wal᷊inẹ gunang měmahangsang si sie měkoạ ene. Contone, mạeng měngangěndung masulitẹ̌ duměnta su pěngangibadang, i kau botonge měnodẹ video Yehuwa Mapadul᷊i si Siạ piạ su bageang ”Pěmanda Lai” bọu pěngangěndungang 14. Su lawọ pěngangěndungang bọu bukẹ̌ Pěbiahe Mal᷊uasẹ̌ Sarang Karěngụe! i kau sarung makaěbạ pengalaman kerene su bageang ”Bangka Pakaral᷊ung” arau ”Pěmanda Lai”. * Pakaingatẹ̌ abe mapẹ̌sul᷊ung měngangěndung dingangu taumata wal᷊inẹ kụ mẹ̌bera, ”Mạeng i sie botonge, i kau lai botonge.” Balạe i sie hala měkoạ kesimpulan kerene. Katewe, pẹ̌bisara soal u hal᷊ẹ̌ spesifik nakatul᷊ung taumata su video někoạ apa nitěntirongu Alkitapẹ̌. I kau ěndịu botonge maul᷊ị ayat kunci arau carane měkoạ sěmbaụ hal᷊ẹ̌. Mạeng botonge, lahẹko kerea i Yehuwa nẹ̌tul᷊ung taumata su video ene.

8. Kerea i kitẹ mẹ̌tul᷊ung měngangěndung kuměndagẹ̌ si Yehuwa?

⁸ Tul᷊ung měngangěndung gunang kuměndagẹ̌ si Yehuwa. Kerea carane? Deạ kesempatan gunang mẹ̌tul᷊ung měngangěndung Alkitapẹ̌ měngěndung limembong mal᷊awọ soal u manga sipati Yehuwa. Tul᷊ung měngangěndung makaěna i Yehuwa kai Mawu mal᷊uasẹ̌ kụ i Sie mapulu mẹ̌tul᷊ung taumata apang makěndagẹ̌ si Sie. (1 Tim. 1:11; Ibr. 11:6) Todẹ su měngangěndung i sie sarung makaěbạ gunane mạeng měkoạ apa seng niěndungange, kụ lahẹ ene kai bukti i Yehuwa makěndagẹ̌ si sie. (Yes. 48:17, 18) Mạeng kakěndagu měngangěndung si Yehuwa kakạtoghase, i sie sarung limembong mapulu měkoạ pẹ̌bawal᷊ui.​—1 Yoh. 5:3.

9. Kere nilahẹ su Markus 10:29, 30, apa wotonge makatul᷊ung sěngkatau měkoạ pengorbanan gunang ibaptisẹ̌?

⁹ Gunang měkoạ kemajuan sarang ibaptisẹ̌, sěngkatau měngangěndung Alkitapẹ̌ harusẹ̌ měkoạ pengorbanan. Kere esẹ makalạ seng nisěbạ kanini, pirang katau měngangěndung  ěndịu perlu měkoạ pengorbanan su hal᷊ẹ̌ materi. Mạeng hal᷊ẹ̌ i sire ene tawe nẹ̌tatahino dingangu prinsip su Alkitapẹ̌, i sire ěndịu harusẹ̌ mědeạ hal᷊ẹ̌ bal᷊inẹ. Lawọ ěndịu harusẹ̌ měngědo mědal᷊ahapị dingangi sire apang tawe makěndagẹ̌ si Yehuwa. Pirang katau lai ěndịu nitěntangu keluarga apang mawěngsing su Sahiding Yehuwa. Yesus naul᷊ị ěndịu masigěsạ su pirang katau gunang měkoạ pengorbanan kerene. Katewe, i sie nẹ̌diandi i sai tumol᷊e si sie sarung tawe mẹ̌sasěsilẹ̌. Yehuwa sarung měngal᷊amatẹ̌ si sire carane měgělị keluarga rohani makěndagẹ̌. (Basa Markus 10:29, 30.) Kerea i kau mẹ̌tul᷊ung měngangěndung Alkitapẹ̌ makaěbạ gunane bọu hadiah mapaelẹ̌ ini?

10. Apa nikaěndungangu bọu pengalaman i Manuel?

¹⁰ Pẹ̌dal᷊ahapịe dingangu měngangěndung. Penting měnodẹ i kau mapadul᷊i su měngangěndung. Kawe nụe? Pěmanda apa niul᷊ị i Manuel, sěngkatau mětẹ̌tanạ su Meksiko. I sie nẹ̌běke kerea měnaněntirone nẹ̌tul᷊ung si sie su tempong i sie bědang měngẹ̌ngěndung Alkitapẹ̌. I sie nẹ̌bera, ”Su tempong pěngangěndungang bědang tawe nitětạ, i sie sarung mẹ̌kiwal᷊o soal u habarẹ̌ku. I sie nẹ̌tul᷊ung si siạ nakoạ matěnang, kụ nakakoạ iạ mẹ̌bisara dingange soal u manga hal᷊ẹ̌ bal᷊inẹ. Iạ nẹ̌pěndang i sie sěbạe mapadul᷊i si siạ.”

11. Apa gunane su měngangěndung mạeng i kitẹ měnadia tempo dingangi sire?

¹¹ Sadia tempo dingangu měngangěndung, kere i Yesus něnadia tempo dingangu manga tumatol᷊ene. (Yoh. 3:22) Mạeng nẹ̌tatahino, gause měngangěndung apang seng někoạ pẹ̌bawal᷊ui sarang wal᷊enu gunang měnginung kopi, kumaěng, arau mẹ̌biala acara sabang wul᷊ang JW Broadcasting^®. Měngangěndung sarung mal᷊uasẹ̌ su undangan kerene něngělembo lai su tempo biasane taumata měliburẹ̌, su tempong i sie ěndịu nẹ̌pěndang sẹ̌sane. Kazibwe, sěngkatau mětẹ̌tanạ su Uganda nẹ̌bera, ”Su tempong měnaněntiroku nědal᷊ahapị dingangku, iạ nẹ̌pěndang iạ něngěndung mal᷊awọ soal i Yehuwa, mẹ̌sul᷊ung kere su tempong iạ něngěndung Alkitapẹ̌. Iạ nakasilo kerea i Yehuwa sěbạe mapadul᷊i su manga ělang’E dingangu kerea kal᷊uase i sire. Iạ mapulu piạ pěbawiahẹ̌ kerene.”

12. Kawe nụe i kitẹ perlu měmaringang anạu sěmbaụ nẹ̌tatěntang su tempong měněntiro Alkitapẹ̌?

 ¹² Paringang anạu sěmbaụ nẹ̌tatěntang su tempong měněntiro Alkitapẹ̌. Pẹ̌sěngsul᷊ẹ, i kite ěndịu nẹ̌pěndang limembong gampang i kitẹ hala měněntiro arau měmaringang anạu sěmbaụ mẹ̌sul᷊ung. Maning si kitẹ ěndịu limembong gampang měkoạ ene, i kitẹ sarung limembong makatul᷊ung měngangěndung, mạeng měmaringang anạu sěmbaụ nẹ̌tatěntang. Dmitrii, sěngkatau mětẹ̌tanạ su Moldova nẹ̌bera, ”Apang penyiar diměnta su tempong iạ něngěndung sarung mělahẹ manga hal᷊ẹ̌ dingangu cara nẹ̌tatěntang. Ene nakatul᷊ung si siạ nakasingkạ cara wal᷊inẹ iạ botonge měkoạ apa seng niěndungangku. Iạ lai tawe tumanịu mamea su tempong humotong diměnta su pěngangibadang ual᷊ingu iạ seng masingkạ lawọ anạu sěmbaụ.”

13. Kawe nụe i kitẹ harusẹ̌ mẹ̌tul᷊ung měngangěndung duměnta su pěngangibadang?

¹³ Tul᷊ung měngangěndung gunang duměnta su pěngangibadang. Kawe nụe? Ual᷊ingu Yehuwa nẹ̌parenta manga ělang’E gunang mẹ̌komol᷊ẹ̌ sěngkasio, kụ ene bageang bọu ibadang i kitẹ. (Ibr. 10:24, 25) Bọu ene lai, anạu sěmbaụ ene kai keluarga rohaning i kitẹ. Su tempong i kitẹ něngibadah dingangi sire, ene kere i kitẹ sěngkasio kimaěng kaěng matemang. Su tempong i kau nẹ̌tul᷊ung měngangěndung diměnta su pěngangibadang, i kau nẹ̌tul᷊ung si sie někoạ sěmbaụ hal᷊ẹ̌ penting tadeạu botonge ibaptisẹ̌. Katewe ěndịu masulitẹ̌ si sie gunang měnětạ duměnta su pěngangibadang. Kerea bukẹ̌ Pěbiahe Mal᷊uasẹ̌ Sarang Karěngụe! makatul᷊ung měngangěndung tumatěngo haghing sasal᷊ukạ ěndịu nikahombangenge?

14. Kerea i kitẹ měmahangsang měngangěndung gunang duměnta su pěngangibadang?

¹⁴ Pakẹ pěngangěndungang 10 bọu bukẹ̌ Pěbiahe Mal᷊uasẹ̌ Sarang Karěngụe! gunang měmahangsang měngangěndung. Těntal᷊ang bukẹ̌ ini bědang tawe nasueng koạe, pirang katau penyiar nirorongang gunang měpakẹ pěngangěndungang ini sěngkasio dingangu měngangěndung. I sire naul᷊ị ini sěbạe mapaelẹ̌ gunang paketang kụ nakatul᷊ung měngangěndung Alkitapẹ̌ diměnta su pěngangibadang. Tantu, i kau tawe měhědo sarang pěngangěndungang 10 gunang měgausẹ̌ měngangěndung Alkitapẹ̌ duměnta su pěngangibadang. Pakal᷊ighạ měgausẹ̌ si sie gunang duměnta kụ pakasau měkoạ ene. I sire apang něngěndung Alkitapẹ̌ piạ masalah nẹ̌tatěntang. Hakị u ene, pěmanda apa kebutuhan měngangěndung kụ apa i kitẹ botonge mẹ̌tul᷊ung si sie. Abe měngědo mạeng i sie tawe apidu diměnta. Pakasabarẹ̌, katewe turusẹ̌ gause i sire.

15. Měngangěndung Alkitapẹ̌ ěndịu matakụ soal u apa?

¹⁵ Apa i kau nakatahěndung su tempong i kau sahene matakụ makoạ Sahiding Yehuwa? I kau ěndịu nẹ̌pěndang tawe makakoạ měnginjilẹ̌ bọu wal᷊e sarang bal᷊e. I kau lai ěndịu matakụ kěluarganu arau hapịu sarung mawěngsing si kau. Mạeng kerene, i kau tantu nakaěna kerea pěndangu měngangěndung Alkitapẹ̌. Yesus naul᷊ị pirang katau sarung piạ katatakụ kerene. Katewe, i Yesus něngoro manga tumatol᷊ene gunang tawe měmala katatakụ makakoạ i sire měngědo mẹ̌tahamawu si Yehuwa. (Mat. 10:16, 17, 27, 28) Kerea i Yesus nẹ̌tul᷊ung manga tumatol᷊ene tadeạu tawe měngědo? Kụ kerea i kau lai botonge měkoạ hal᷊ẹ̌ mẹ̌sul᷊ung?

16. Kerea i kitẹ melatih měngangěndung gunang měmahiạ apa pẹ̌pangimangenge?

¹⁶ Latih měngangěndung měmahiạ apa pẹ̌pangimangenge. Manga muriti Yesus ěndịu gugupẹ̌ su tempong i sie něngoro si sire gunang měnginjilẹ̌. Katewe, i Yesus nẹ̌tul᷊ung si sire carane naul᷊ị su apa i sire harusẹ̌ měnginjilẹ̌ dingangu apa harusẹ̌ habareng i sire. (Mat. 10:5-7) Kerea i kau botonge mẹ̌těno si Yesus? Tul᷊ung měngangěndung makasingkạ si sai i sie botonge měnginjilẹ̌. Contone, pẹ̌kiwal᷊o apa i sie  masingkạ sěngkatau kụ botonge makaěbạ gunane bọu sěmbaụ katěngadẹ̌ su Alkitapẹ̌. Tul᷊ung i sie měnadia apa harusẹ̌ ul᷊ịkange. I kau botonge měnodẹ sěmbaụ cara sederhana gunang měmahiạ katěngadẹ̌. Mạeng nẹ̌tatahino, i kau botonge měpakẹ bageang ”Piạ u Naul᷊ị” dingangu ”Aramanung Piạ u Nẹ̌kiwal᷊o” su bukẹ̌ Pěbiahe Mal᷊uasẹ̌ Sarang Karěngụe! gunang měkoạ latihan. Su tempong měkoạ ene, pẹ̌tawakal᷊i melatih měngangěndung měgělị sasimbahẹ̌ sederhana lai matahuěna kụ měpakẹ Alkitapẹ̌.

17. Kerea i kitẹ měpakẹ Matius 10:19, 20, 29-31 gunang mẹ̌tul᷊ung měngangěndung mangimang si Yehuwa?

¹⁷ Tul᷊ung měngangěndung gunang mangimang si Yehuwa. Yesus naul᷊ị su manga murite, i Yehuwa sarung mẹ̌tul᷊ung ual᷊ingu i Sie makěndagẹ̌ si sire. (Basa Matius 10:19, 20, 29-31.) Paul᷊ị su měngangěndung Yehuwa lai sarung mẹ̌tul᷊ung si sie. I kau botonge mẹ̌tul᷊ung si sie měngumbala si Yehuwa carane mẹ̌doa dingange soal u cita-citane. Franciszek, sěngkatau mětẹ̌tanạ su Polandia nẹ̌bera, ”Měnaněntiroku masau mẹ̌sěbạ cita-citaku su manga daroane. Su tempong iạ nakasilo kerea i Yehuwa simimbahẹ̌ daroa měnaněntiroku, iạ lai apidu něnětạ nẹ̌doa. Iạ nẹ̌pěndang Yehuwa nẹ̌tul᷊ung si siạ su tempong iạ harusẹ̌ mẹ̌dorong izin su tampạ pělahal᷊ẹ̌kang buhu gunang duměnta su pěngangibadang dingangu pertemuan.”

18. Kerea pěndang i Yehuwa soal u hal᷊ẹ̌ měněntiro kẹ̌koatengu manga ělang’E?

¹⁸ Yehuwa sěbạe mapadul᷊i su měngangěndung Alkitapẹ̌. Yehuwa masingkạ kerea kasigěsạe hal᷊ẹ̌u měnaněntiro gunang mẹ̌tul᷊ung taumata limembong mẹ̌těngkarani si Sie, kụ ual᷊ingu ene i Sie makěndagẹ̌ si sire. (Yes. 52:7) Mạeng orasẹ̌ ini tawẹ apa měngẹ̌ngěndung Alkitapẹ̌ dingangu, i kau bědang botonge mẹ̌tul᷊ung měngangěndung měkoạ kemajuan sarang ibaptisẹ̌ carane tumol᷊e dingangu penyiar wal᷊inẹ su tempong i sire měngahạ pěngangěndungang Alkitapẹ̌.