1. Ino ty raha nirehafegne tamy i vahoake maro tamy ty taonjato voaloha’e rey?

MARO ty lahilahy naho ty ampela boake amy ty firenena sambe hafa naho firehake sambe hafa nandeha ta Jerosalema agne tie indraike. Nisy raha niambake niseho tamy izay. Nisy Jiosy ila’e, le avy le nahay tampoke ty fireha o ndaty ambahiny rehoe! Tena nahalatsa o vahoake maro rehoe ze raha zay, faie ty raha nirehafe o Jiosy rehoe naho ty raha nirehafe i apostoly Petera ro tena nahagaga iareo. Agnisa izay i raha nirehafegne tamy iareo manao tihoey ho voavonje iareo naho maneho finoagne i Jesosy Kristy. Tena nanohigne ty fo o vahoake maro rehoe ze hafatse zay, le nagnontane iareo tie: “Ino ty toko’e hatao’ay?” Le hoe ty navale i Petera iareo: “Ao nareo tsikiraidraike sambe hatao badisa.”​—Asa. 2:37, 38.

2. Ino ty hodinehentikagne amy ty lahatsoratse toy? (Henteo ty sare amy ty fogno ty gazete toy.)

² Niambake ty raha niseho tafara izay. Ty anto’e, nisy ndaty 3 000 ty natao badisa, le nanjare mpiana i Kristy tamy i andro ignehoe avao. Io ty nanomboha i asa fampianaragne tena lahibey nandilia i Jesosy o mpanonjohy ty lia’eoy. Mbe mitohy hatrake amy izao o asa iohoe. Faie tsy le avy le vognogne hatao badisa ty ndaty raike ampianarentika Baiboly amy izao naho agnate ty lera tsiampeampe avao ty irehafantikagne ama’e. Va’e ho am-bola’e maromaro ndra tao’e raike ndra mahery izay ty mpianatse Baiboly raike vaho hahatratse o tanjogne iohoe. Mitake kezake mafe ty fagnampeagne aze mba hanjare mpiana i Kristy. Hai’o soa zay naho mitarike fampianaragne Baiboly rehe. Hodinehentikagne amy ty lahatsoratse toy tie ino ty azo’o atao mba hagnampeagne ty mpiana’o Baiboly ho vita badisa.

3. Ino ty raha tsy maintsy atao ty mpianatse Baiboly raike vaho izay azo atao badisa reke, arake ty Matio 28:19, 20?

³ Tsy maintsy mampihatse ty raha ianara’e amy Baiboly ao ty mpianatse Baiboly raike vaho izay azo atao badisa. (Vakio ty Matio  28:19, 20.) Naho manao izay reke, le hanahake i “lahilahy mahimbagne” nagnoregne tragno, tamy i fagnohara i Jesosỳ. Nihalie’e laleke heike i taney vaho izay reke nagnoregne i tragno’ey tambone lamilamy ey. (Mat. 7:24, 25; Lioka 6:47, 48) Ino areke ty azontika atao mba hagnampeagne o mpianantikagneo hampihatse ty raha ianara’e? Misy raha telo azontika atao. Andao tika handineke izay.

4. Akore ty azontikagne agnampeagne ty mpianatse Baiboly raike mba hahatratse i tanjogne tihoe hatao badisay? (Henteo ty efajoro tihoe “ Ampeo ty Mpiana’o Baiboly mba Hanagne Tanjogne Sady Hagnatratse Izay.”)

⁴ Ampeo ty mpiana’o mba hanagne tanjogne. Nagnino rehe ro toko’e hanao izay? Dineho ty ohatse raike toy: Naho ihe zao handeha an-tane lavitse, le ino ty hatao’o naho fa mahatrea toeragne soasoa an-dalagne ey? Va’e hitofa heike rehe. Tsy hahatsapa rehe amy izay tie lavitse i tane handehana’oy. Naho ty mpianatse Baiboly raike ka mikezake hanagne tanjogne mora tratraregne sady manao raha hatratraragne aze, le ho tsapa’e tie ho vita’e ty magnatratse i tanjogne hatao badisay. Ampiasao i tihoey “Anò toy” amy ty boke Ankamamio Nainai’e o Fiaignagneo! mba hagnampea’o i mpiana’oy hanagne tanjogne. Isake tie mahavita lesogne raike nareo, le dineho’areo tie nagnino i tanjogne rey ro magnampe aze hampihatse ty raha ianara’e. Naho misy tanjogne hafa ka tea’o hotratrare i mpiana’oy, le azo’o atao ty manoratse izay amy tihoey “Anò ka retoa.” Ampiasao io naho fa mianatse nareo, le iharò’areo midineke ze tanjogne azo i mpiana’oy tratraregne agnate ty fotoagne fohe, naho ze va’e ho elaela vaho vita’e ty magnatratse aze.

5. Arake ty Marka 10:17-22, ino ty raha nirehafe i Jesosy tamy i lahilahy raike mpagnarivoy fa toko’e hatao’e, le ino ty anto’e?

⁵ Ampeo ty mpiana’o mba hanao fagnovàgne amy ty fiaigna’e. (Vakio ty Marka 10:17-22.) Fa nihay i Jesosy tie tsy ho mora amy i lahilahy mpagnarivoy ty hivarotse i fanagna’ey iaby. (Mar 10:23) Faie mbe nirehake aze avao ty Jesosy mba hanao ze fiovagne lahibey zay. Fa nagnino?  Satria niteà i Jesosy reke. Va’e hisy fotoagne tika tsy te handrisike ty mpianatse Baiboly raike hampihatse ty raha ianara’e, satria mieretseretse tika tie mbe tsy vognogne hiova reke. Va’e ho elaela ty ndaty raike vaho hahavita hiala amy ty fahazaran-drati’e naho hiakanjo toetse vaovao. (Kol. 3:9, 10) Faie naho mirehake amy i mpianatsey malaky arake ze azo atao tika miomba i raha toko’e hisintaha’ey, le tsy ho ela reke le hanomboke hiova. Ty fanoa’o izay ka, le mampiseho tie tea aze rehe.​—Sal. 141:5; Ohab. 27:17.

6. Nagnino tika ro toko’e hagnontane ty heve i mpianatsey?

⁶ Tena ilaegne ty magnontane ty heve o mpianatse Baibolio miomba ty raha ianara’e. Hagnampe azo hahatrea ty fahatakara’e i raha ianaragney naho hahay ty raha inoa’e zay. Naho manao izay mateteke rehe, le ho mora ama’o ty hagnazava ama’e ty raha va’e ho sarotse ama’e ty hagneke aze. Misy fagnonteneagne maro mandrisike i mpianatsey hirehake ty heve’e ty amy ty boke Ankamamio Nainai’e o Fiaignagneo! ao. Amy i lesogne faha-4 ao, ohatse, misy fagnonteneagne hoe izao: “Ino ka ty ho tsapa i Jehovah naho tsiarontikagne i tahina’ey sady igne ty itokavantikagne aze?”, le amy i lesogne faha-9 ao: “Ino iaby ty raha tea’o hangatahegne amy ty vavake?” Va’e ho sarotse amy i mpiana’oy ty hamale o fagnonteneagne rehoe amy ty voaloha’e. Azo’o atao areke ty magnampe aze hamale i fagnonteneagne rey mioregne amy i andinin-teny mifandrambe ama’ey naho amy ty sare amy i bokey ao.

7. Akore ty azontika ampiasagne i fitantaragne rey mba tena hisy voka’e amy i mpianatsey?

⁷ Naho fa hay i mpiana’oy ty raha mila atao’e, le ampiasao i fitantaragne rey mba handrisihagne aze hanao izay. Naho sarotse amy i mpiana’oy ohatse ty hivory tsy tapake, le azo’o atoro aze i video tihoey Nikarakara Ahy ty Jehovah. Amy i lesogne faha-14 ao amy tihoey “Fagnazavagne Fagnampe’e” ty misy aze. Misy fitantaragne hoe io ty amy ty ankamaroa ty lesogne amy i boke Ankamamio Nainai’e o Fiaignagneoy!, amy ty fizaràgne tihoe “Andao Handineke ty Pitsopitso’e” ndra amy tihoe “Fagnazavagne Fagnampe’e.” * Mitaoa mba tsy hampira i mpiana’oy amy ty ndaty hafa, sady ko mirehake ama’e tie: “Naho vita i ano ty nanao igne, le midika zay fa ho vita’o ka ty manao aze.” Ndra aleo i mpiana’oy avao ro mbe hahatsapa izay. Ty toko’e hatao’o aza, le ty mirehake hevetse lahibey nagnampe i ndaty tamy i videoy hahavita hampihatse ty raha nianara’e. Va’e ho azo’o atao aza ty mirehake ama’e andinin-teny raike ndra raha azo ampiharegne boake amy i videoy ao. Hamafeso ka tie akore ty nagnampea i Jehovah i ndatỳ, isake tie mete ty anoagne izay.

8. Akore ty azontika agnampeagne o mpianantika Baibolio mba ho tea i Jehovah?

⁸ Ampeo ty mpiana’o mba ho tea i Jehovah. Akore ty hanoa’o izay? Mipaliava hirike hahafaha’o magnampe i mpiana’oy hahafantatse ty toetse i Jehovah. Ampeo reke mba hahatsapa tie Andrianagnahare falefale ty Jehovah, le mahafale aze ty manohagne ze ndaty tea aze. (1 Tim. 1:11; Heb. 11:6) Anò trea i mpiana’oy fa handrambe soa reke naho mampihatse ty raha ianara’e, le hazavao ama’e fa porofo ty hatea i Jehovah aze i soa rambese’e rey. (Isaia 48:17, 18) Naho fa mitombo ty hatea i mpiana’oy i Jehovah, le hitombo ka ty fagniria’e hanao fagnovàgne.​—1 Jaona 5:3.

9. Ino ty hagnampe ty ndaty raike hahavita hamoe ty raha ila’e mba hahavy aze ho vita badisa, naho henteagne ty Marka 10:29, 30?

⁹ Naho te handroso naho hatao badisa ty mpianatse Baiboly raike, le misy raha mila afoe’e. Misy  mpianatse Baiboly ila’e va’e mila mamoe ty fanagna’e manahake i lahilahy mpagnarivo nirehafegne taloha teoy. Naho mifanohetse amy ty toro lala ty Baiboly ohatse ty asa iareo, le mila mipay asa hafa iareo. Tsy maintsy mamoe ty nama iareo ka ty ankamaroa iareo, satria tsy tea i Jehovah i nama iareo rey. Ty ila’e va’e haria ty longo’e satria heje iareo hanjare ho Vavolombelo i Jehovah. Nirehafe i Jesosy tie va’e ho sarotse amy ty ndaty ila’e ty hamoe ty raha hoe ireo. Faie nampitamà reke tie tsy ho montso antoke ze ndaty manonjohy ty lia’e fa hahazo valesoa maro, agnisa izay ty keleiagne ara-pagnahy bey hatea. (Vakio ty Marka 10:29, 30.) Akore ty azo’o agnampeagne ty mpiana’o Baiboly mba handrambe soa amo o fagnomezagne fanjaka iohoe?

10. Ino ty ianara’o amy ty raha nirehafe i Manuel?

¹⁰ Mikezaha hiragnetse amy i mpiana’oy. Tena mila atoro’o i mpiana’oy tie tea’o reke. Fa nagnino? Mareho ty raha nirehafe i Manuel, mitoboke a Meksika agne toy. Izao ty raha tsiaro’e nanoe i mpampianatse azey tamy i reke mbe nimpianatse Baiboly: “Naho fa hianatse Baiboly zahay, le mateteke i mpitory nampianatse ahỳ ro nagnontane ty fahasalamako. Nampea’e ka raho mba tsy hatahotahotse ndra hisalasala ty hirehake ama’e, ndra inogne zay ndra inogne. Nitsapako tamy irey fa tena tea ahy reke.”

11. Ino ty soa va’e ho azo o mpianantikagneo naho manokagne fotoagne hiarahagne amy iareo tika?

¹¹ Manokàgna fotoagne hiarahagne amy i mpiana’oy manahake ty natao i Jesosy tamo o mpiana’eo. (Jaona 3:22) Naho mete, le taono ho an-tragno’o agne ty mpiana’o Baiboly fa mandroso mba hiarake hinogne kafé ndra hihinagne ndra hagnente i Tele JW miboake isam-bolagney. Va’e ho tena tea i mpiana’oy zao naho taone’o ho ama’o agne reke amy i andro fete rey, satria va’e hahatsiaro ho mangike reke amy i fotoagne rey. Hoe ty Kazibwe, mitoboke a Ogandà agne: “Naho dineheko, le tamy i fotoagne natoka i mpampianatse ahỳ mba hiarahagne tamako rey ro tena nahafantarako raha maro miomba i Jehovah naho oharegne amy i fotoagne nianara’ay Baiboly rey. Nitreako tie mikarakara ty vahoa’e ty Jehovah sady lava falefale avao iareo. Niteàko ty hanagne fiaignagne manahake iareo.”

12. Nagnino ro toko’e hovaovantika ty mpitory miarake amantika naho fa mampianatse Baiboly?

 ¹² Ovaovao ty mpitory miarake ama’o. Va’e hieretseretse tika kindraike tie tsy magnahy ndra itika raike avao ty mampianatse ty mpianantika ndra tsy ovaovantika ty mpitory miarake amantika. Maregne fa va’e tsy le manahiragne ty manao izay. Faie tena hagnampe i mpianantika Baibolỳ handrambe soa tika naho mba ovaovantika ty mpitory miarake amantika. Hoe ty Dmitrii, mitoboke a Moldavia agne: “Sambe managne ty mampiambake aze ty mpitory tsikiraidraike naho fa magnazava raha raike. Nagnampe ahy hahatrea fomba hafa hampiharagne ty raha nianarako zay. Nanjare tsy le nisaro-kegnatse sasa ka raho naho fa nagnatreke fivoriagne voaloha’e, satria fa nitreako iaby ty ankamaroa o rahalahio naho o rahavaveo.”

13. Nagnino tika ro tsy maintsy magnampe o mpianantikagneo mba hagnatreke fivoriagne?

¹³ Ampeo ty mpiana’o mba hagnatreke fivoriagne. Ino ty anto’e? Satria mandily o mpanompo’eo mba hiarake hivory ty Jehovah. Agnisa ty fanompoantikagne aze ty fivoriagne. (Heb. 10:24, 25) Hanjare keleiantika ara-pagnahy ka o mpiara-manompò naho manao izay tika. Naho fa am-pivoriagne agne tika, le mitovy amy ty keleiagne raike miarake mihinagne hanegne mafiry. Naho ihe areke magnampe ty mpiana’o Baiboly hagnatreke fivoriagne, le izay ty hagnampe aze hanao ty raike amy i dingagne lahibey mba hahavy aze handroso naho hatao badisay. Faie va’e ho sarotse ama’e ty hanao o dingagne iohoe. Ndra tie eo zay, le afake magnampe i mpiana’oy handrese ze olagne va’e hikalagne aze tsy hivory ty boke tihoe Ankamamio Nainai’e o Fiaignagneo! Amy ty fomba akore?

14. Akore ty fomba hagnampeantika o mpianantikagneo mba hagnatreke fivoriagne?

¹⁴ Ampiasao ty lesogne faha-10 amy ty boke Ankamamio Nainai’e o Fiaignagneo! mba handrisihagne i mpiana’oy hivory. Nisy mpitory fa za-draha nirehafegne mba hagnandragne hampiasa o lesogne iohoe, taloha ty nampiboahagne o boke iohoe. Nirehake iareo tie tena nagnampe ty mpiana iareo hagnatreke fivoriagne o lesogne iohoe. Faie tsy toko’e handigne ty hiavia’areo amo o lesogne faha-10 iohoe agne rehe vaho izay hitaogne ty mpiana’o hivory. Vaho manomboke mianatse kedekede nareo, le fa taono hivory reke sady anò mateteke zay. Tsy mitovy ty olagne mikalagne o mpianatse Baibolio tsy hivory. Dineho soa areke ty raha paliae i mpiana’oy, le eretsereto tie kera misy raha azo’o atao mba hagnampeagne aze. Ko kivy naho elaela i mpiana’oy vaho magnatreke fivoriagne. Managna faharetagne, le tohizo avao ty fitaona’o aze hivory.

15. Ino ty raha va’e hampatahotse o mpianantika Baibolio?

¹⁵ Ino ty nitsapa’o tie taloha naho fa nieretseretse ty hanjare Vavolombelo i Jehovah? Natahotse kedekede vao? Va’e nahatsapa rehe tie tsy ho vita’o ze o hitory isan-tragno zao. Ndra va’e natahotse rehe tie kera hanohetse azo ty keleia’o ndra ty nama’o. Naho izay, le ho taka’o ty raha tsapa i mpiana’oy. Fa nirehafe i Jesosy tie hisy ndaty hanagne ze tahotse zay. Faie nirisihe’e o mpanonjohy ty lia’eo mba tsy hagnenga ze tahotse zay hikalagne iareo tsy hanompo i Jehovah. (Mat. 10:16, 17, 27, 28) Akore ty nagnampea’e iareo handrese ze tahotse zay? Le akore ty azo’o anahafagne aze?

16. Akore ty azontika ampiofagnagne o mpianantikagneo mba hirehake ty raha ianara’e?

¹⁶ Ampiofagno tsikede ty mpiana’o mba hirehake ty raha ianara’e. Va’e natahotse i mpiana i Jesosy rey naho fa nirahe’e handeha hitory. Faie nagnampe iareo ty Jesosy, le nambara’e iareo tie aia ty toko’e hitoria iareo naho tihoe ino ty hafatse hotoriegne. (Mat. 10:5-7) Akore ty azo’o anahafagne i Jesosy? Ampeo i mpiana’oy  mba hamantatse tie ombia reke ro afake mitory. Agnonteneo aze ohatse tie ia ty ndaty va’e afake mandrambe soa amy ty raha amy Baiboly ao. Atorò aze naho fa avy eo tie akore ty fomba azo’e irehafagne i hamarenagney amy i ndatỳ. Naho mete aza, le azo’o ampiasaegne i tihoey “Misy ty Mirehake fa” naho tihoe “Misy ty Magnontane tie”, amy ty boke Ankamamio Nainai’e o Fiaignagneo! mba hanoa’areo fampiharagne aze. Naho fa manao aze nareo, le mifantoha amy ty fomba azo’o agnampeagne aze hahay hampiasa Baiboly naho fa mamale ty fagnontenea o ndatio sady hahay hanohigne ty fo iareo.

17. Akore ty azontika ampiasagne ty Matio 10:19, 20, 29-31 mba hagnampeagne o mpianantikagneo hatoky i Jehovah?

¹⁷ Ampeo ty mpiana’o mba hatoky i Jehovah. Nagnomey toky i mpiana’e rey ty Jesosy fa hagnampe iareo ty Jehovah, satria teà’e iareo. (Vakio ty Matio 10:19, 20, 29-31.) Omeo toky ka ty mpiana’o fa vognogne hagnampe aze ty Jehovah. Hagnampe aze hiantehetse amy i Jehovah ohatse rehe naho miarake mivavake ama’e miomba i tanjo’e rey. Hoe ty Franciszek a Polonina agne: “Mateteke ro nirehafe i mpampianatse ahỳ agnate i vavake nanoe’ey ao ty tanjoko. Naho fa nitreako tie namale i vavake rey ty Jehovah, le hoe raho: ‘Hivavake ka raho!’ Le nivavake tamy i Jehovah raho mba hahazo andro tsy hiasagne hahafahako magnatreke fivoriagne naho havoriambey, satria vaho niova asa vaho tsy ela raho. Nitsapako tie nagnampe ahy reke naho fa nangatake izay raho.”

18. Ino ty tsapa i Jehovah miomba ty asa mafe ataontika amy ty asa fampianaragne?

¹⁸ Tena teà i Jehovah o mpianantika Baibolio. Oni’e ty asa mafe ataontika mba hagnampeagne o ndatio hagnarine aze, le tena tea’e tika. (Isaia 52:7) Naho mbe tsy mitarike fampianaragne Baiboly rehe amy izao, le azo’o atao ty miarake mampianatse amy ty mpitory hafa. Afake magnampe i mpianatse rey mba handroso naho hatao badisa rehe naho fa manao izay.