NKHANI YAKUSAMBIRA YA NAMBALA 22
Wovyani Ŵanthu wo Musambira Nawu Bayibolu Kuti Abatiziki
“Weyosi waku yimwi wabatiziki.”—MACHI. 2:38.
SUMU 72 Tipharazgi Uneneska wa Ufumu
VO TISAMBIRENGI MU NKHANI IYI *
1. Kumbi akutumika angukambiya gulu la ŵanthu kuti lichitenji?
CHIGULU chikulu cha anthulumi ndi anthukazi, chinguwungana mu Yerusalemu. Yiwu angutuliya muvyaru vakupambanapambana kweniso aŵereŵetanga vineneru vakupambanapambana. Pa zuŵa lenili, panguchitika chinthu chinyaki chakuziziswa. Kagulu kanyaki ka Ayuda kangwamba kuŵereŵeta vineneru vakupambanapambana va ŵanthu wo anguza kwenuku! Chinanga kuti venivi venga vakuziziswa, kweni vo Ayuda ŵenaŵa aŵakambiyanga ndipuso vo wakutumika Peturo wanguŵakambiya venga vakukondwesa ukongwa. Unyaki mwa uthenga wo wanguŵakambiya wenga wakuti angataskika asani avwana mwaku Yesu Khristu. Gulu la ŵanthu lenili lingukwaskika ukongwa ndi uthenga wenuwu. Yiwu anguchiskika mwakuti angufumba kuti: “Tichitenji?” Peturo wanguŵakambiya kuti: “Weyosi waku yimwi wabatiziki.”—Machi. 2:37, 38.
Mubali ndi muwolu waki asambira Bayibolu ndi mnyamata yo we ndi buku lakuti Kondwani ndi Umoyu Kwamuyaya! (Wonani ndimi 2)
2. Kumbi tikambiskanengenji mu nkhani iyi? (Wonani chithuzi cho che pachikonkhombi.)
2 Pavuli paki, panguchitika chinthu chakuziziswa ukongwa. Ŵanthu pafufupi 3,000 angubatizika pa zuŵa lenili ndipu anguja akusambira aku Khristu. Kwenuku kwenga kwamba kwa ntchitu yikulu yakuwovya ŵanthu kuti aje akusambira, yo Yesu wangulamula akusambira ŵaki kuti achitengi. Ntchitu yeniyi yechekuchitika mpaka sonu. Kweni mazuŵa nganu, vingachitika cha kusambiza munthu kwa maola ŵaka ngamanavi mpaka kubatizika. Pangajumpha myezi, chaka pamwenga vyaka kuti munthu yo wasambira Bayibolu wabatiziki. Pakhumbika phamphu kuti tiwovyi munthu kuti waje wakusambira waku Khristu. Ndipu asani pasonu panu muchitiska sambiru la Bayibolu, mutenere kuti mutiyivwisa umampha fundu yeniyi. Mu nkhani iyi, tisambirengi vo mungachita kuti muwovyi munthu yo musambira nayu Bayibolu kuti wabatiziki.
MUWOVYENGI YO MUSAMBIRA NAYU BAYIBOLU KUTI WAGWIRISKIYENGI NTCHITU VO WASAMBIRA
3. Nge mo palongore pa Mateyu 28:19, 20, kumbi munthu yo wasambira Bayibolu, wakhumbika kuchitanji kuti waluti panthazi mpaka kubatizika?
3 Munthu yo wasambira Bayibolu wechendabatiziki, wakhumbika dankha kugwiriskiya ntchitu vo Bayibolu lisambiza. (Ŵerengani Mateyu 28:19, 20.) Asani munthu yo wasambira Bayibolu wagwiriskiya ntchitu vo wasambira, waja nge “munthu wazeru” wa muntharika yaku Yesu yo wangukumba pasi kuti wazengi nyumba yaki pajarawi. (Mate. 7:24, 25; Luka 6:47, 48) Kumbi tingamuwovya wuli yo wasambira Bayibolu kuti wagwiriskiyengi ntchitu vo wasambira? Tiyeni tiwoni vinthu vitatu vo tingachita.
4. Kumbi tingamuwovya wuli munthu yo wasambira Bayibolu kuti waluti panthazi mwaliŵi mpaka kubatizika? (Wonani so bokosi lakuti “ Muwovyengi Munthu yo Musambira Nayu Kuti Wajengi ndi Vilatu Kweniso Wavifiskengi.”)
4 Muwovyengi yo musambira nayu kuti wajengi ndi vilatu. Ntchifukwa wuli mukhumbika kuchita venivi? Ŵanaŵaniyani chakuyeruzgiyapu ichi: Tiyeruzgiyi kuti mwe pa ulendu utali. Panyaki mungaŵanaŵaniya kuti mumengi mumalu nganyaki ngakukondwesa ndipu venivi vingawovya kuti ulendu uleki kuŵa wakuvukisa. Mwakuyanana ŵaka, asani munthu yo wasambira Bayibolu waja ndi vilatu vimanavimana kweniso wativifiska, vingamuwovya kuziŵa kuti wangafiska chilatu chaki chakukhumba kubatizika. Mugwiriskiyengi ntchitu kachigaŵa kakuti “Vo Mungachita” ko ke mubuku lakuti Kondwani ndi Umoyu Kwamuyaya! kuti muwovyi yo musambira nayu kuti waluti panthazi. Pakumaliya pa sambiru lelosi, mukambiskanengi nayu mo wangagwiriskiya ntchitu vo wasambira kuti wafiski chilatu chaki. Asani mukhumba kuti wakusambira winu wafiski chilatu chinyaki, mungalemba pa kachigaŵa kakuti “Vinyaki.” Nyengu zosi, yimwi ndi munthu yo musambira nayu, mugwiriskiyengi ntchitu chigaŵa chenichi kuti muwoni mo wangafiskiya vilatu vimanavimana kweniso vikuluvikulu vo vingamutole nyengu yitali.
5. Nge mo pakambiya pa Mariko 10:17-22, kumbi Yesu wangukambiya munthu wachuma kuti wachitenji, nanga ntchifukwa wuli?
5 Muwovyengi munthu yo musambira nayu kuti wasinthengi vinthu vikuluvikulu paumoyu waki. (Ŵerengani Mariko 10:17-22.) Yesu wanguziŵa kuti venga vakusuzga kuti munthu wachuma wakagulisi vinthu vaki vosi vo wenga navu. (Mariko 10:23) Kweni Yesu wangukambiya munthu mwenuyu kuti wasinthi vinthu venivi paumoyu waki. Chifukwa wuli? Chifukwa Yesu wangumuyanja. Nyengu zinyaki tingatondeka kumuchiska munthu yo tisambira nayu kuti wagwiriskiyengi ntchitu vo wasambira chifukwa tiwona kuti wechendafiki pakuti wangasintha. Pangato nyengu kuti ŵanthu azuwi nkharu zawu zakali ndi kuvwala umunthu wufya. (Ako. 3:9, 10) Kweni asani titiŵakambiya liŵi, angaswera cha kwamba kusintha. Asani mukambiskana nawu venivi, mulongo kuti mutiŵaŵanaŵaniya.—Salimo 141:5; Nthanthi 27:17.
6. Ntchifukwa wuli tikhumbika kugwiriskiya ntchitu mafumbu ngo ngangamuwovya munthu yo wasambira Bayibolu kuti wakambengi maŵanaŵanu ngaki?
6 Munthu yo tisambira nayu, timufumbengi mafumbu ngo ngangamuwovya kuti wakambi maŵanaŵanu ngaki pamwenga mo wawone nkhani yo tisambira. Mafumbu ngenanga ngangakuwovyani kuziŵa asani wakusambira winu wavwisa vo wasambira kweniso kuziŵa vo wagomezga. Asani muchitengi venivi kaŵikaŵi, vazamukuŵa vambula kusuzga kunthazi kuti muzikambiskani nkhani zo zingamusuzga kugomezga. Buku lakuti Kondwani ndi Umoyu Kwamuyaya! le ndi mafumbu nganandi nga mtundu wenuwu. Mwakuyeruzgiyapu, mu Sambiru 4 mwe fumbu lakuti: “Nanga muwona kuti Yehova watuvwa wuli asani mugwiriskiya ntchitu zina laki?” Ndipu mu Sambiru 9 mwe fumbu lakuti: “Kumbi ndi vinthu wuli vo mungayanja kukamba mu pempheru linu?” Pakwamba munthu yo musambira nayu, vingamusuzga kuti wamukengi mafumbu nga mtundu wenuwu. Mwaviyo, mungamuwovya kuti waŵanaŵaniyengepu malemba kweniso vithuzi.
7. Kumbi tingavigwiriskiya wuli ntchitu mwalusu vinthu vo vinguchitikiyapu ŵanthu anyaki?
7 Asani munthu yo musambira nayu waziŵa vo wakhumbika kusintha, mugwiriskiyengi ntchitu vo vikuchitikiyapu ŵanthu anyaki kuti mumuchiski kuchita viyo. Mwakuyeruzgiyapu, asani munthu yo musambira nayu vitimusuzga kuwungana, mungamulongo vidiyo yakuti Yehova Wangundiwovya yo ye mu Sambiru 14 pa chigaŵa chakuti “Fufuzani.” Mu masambiru nganandi nga mu buku lakuti Kondwani ndi Umoyu Kwamuyaya! mungasaniyamu vo vinguchitikiya ŵanthu anyaki pa chigaŵa chakuti “Sambirani Vinandi” pamwenga chakuti “Fufuzani.” * Kweni mutenere kuphwere kuti muleki kuyeruzgiya munthu yo musambira nayu ndi munthu munyaki mwakukamba kuti: “Asani iyu wangufiska, mbwenu nawi ungafiska.” Mumalu mwaki, wakusambira watenere kusankha yija venivi. Kweni musaniyengi fundu zikuluzikulu zo zingumuwovya munthu yo wakonkhoskeka mu vidiyo yo kuti wagwiriskiyengi ntchitu vo wasambiranga mu Bayibolu. Panyaki mungakamba lemba lakovya pamwenga chinthu chinyaki cho chingumuwovya. Ndipu asani vingachitika, mukonkhoskengi ukongwa mo Yehova wangumuwovye munthu mwenuyu.
8. Kumbi tingamuwovya wuli munthu yo tisambira nayu kuti wayanjengi Yehova?
8 Muwovyengi munthu yo musambira nayu kuti wayanjengi Yehova. Kumbi mungachita wuli venivi? Musaniyengi mipata yo mungamuwovye kuti wasambiri vinandi vakukwaskana ndi mijalidu yaku Yehova. Muwovyengi munthu yo musambira nayu kuti wawonengi Yehova kuti ndi Chiuta walikondwa yo watovya ŵanthu wo atimuyanja. (1 Timo. 1:11; Ahe. 11:6) Mumulongongi kuti wayanduwengi asani wagwiriskiyengi ntchitu vo wasambira ndipu mumukonkhoskiyengi kuti venivi vilongo kuti Yehova watimuyanja. (Yesa. 48:17, 18) Asani munthu yo musambira nayu wangayamba kumuyanja ukongwa Yehova, vingamuwovya kuti wasinthi.—1 Yoha. 5:3.
MUWOVYENGI YO MUSAMBIRA NAYU KUTI WAZIŴANI NDI ABALI NDIPUSO AZICHI
9. Mwakukoliyana ndi Mariko 10:29, 30, kumbi ntchinthu wuli cho chingawovya munthu kuti waleki vinthu vinyaki ndi chilatu chakuti wabatiziki?
9 Kuti munthu yo wasambira Bayibolu waluti panthazi mpaka kubatizika, wakhumbika kuleka kuchita vinthu vinyaki. Mwakuyanana ndi munthu wachuma yo tamukambapu kali, ŵanthu anyaki wo asambira Bayibolu angakhumbika kuleka vinthu vinyaki vakuliŵavu. Asani ntchitu yo agwira yikoliyana cha ndi fundu za mu Bayibolu, angakhumbika kusaniya ntchitu yinyaki. Anandi angakhumbika kuleka anyawu wo atanja Yehova cha. Ndipu anyaki, ŵanthu a mubanja lawu wo aleka kwanja Akaboni aku Yehova, angaŵakana. Yesu wangukamba kuti vingaŵa vakusuzga kuti ŵanthu anyaki aleki vinthu venivi. Kweni iyu wangulayizga kuti ŵanthu wo atimulondo, azamuguŵapu cha. Yehova wazakuŵatumbika chifukwa wazakuŵaŵika mubanja la ŵanthu ŵaki wo atanjana. (Ŵerengani Mariko 10:29, 30.) Kumbi mungamuwovya wuli munthu yo musambira nayu Bayibolu kuti wayanduwengi ndi mphasu yamampha yeniyi?
10. Kumbi musambiranji pa vo Manuel wangukamba?
10 Mujengi bwezi la munthu yo musambira nayu. Vingaŵa vakovya kuti mulongongi munthu yo musambira nayu kuti mutimuŵanaŵaniya. Chifukwa wuli? Wonani vo Manuel yo waja ku Mexico wangukamba. Pakukonkhoska vo vachitikanga wachisambira Bayibolu, iyu wangukamba kuti: “Techendayambi kusambira, munthu yo wandisambizanga wandifumbanga mo vinthu venge pa umoyu wangu. Iyu wandiwovyanga kuti ndifwatukengi kweniso wandizomerezanga kuti ndimukambiyengeku nkhani zinyaki. Kukamba uneneska, ndajiwonanga kuti wandiŵanaŵaniyanga nadi.”
11. Kumbi ŵanthu wo tisambira nawu Bayibolu angayanduwa wuli asani ticheza nawu?
11 Musaniyengi nyengu yakucheze ndi ŵanthu wo musambira nawu Bayibolu nge mo Yesu wacheziyanga ndi akusambira ŵaki. (Yoha. 3:22) Asani munthu yo musambira nayu Bayibolu wasintha umoyu waki, mungamudaniya kunyumba kwinu kuti mukaryi nayu limoza chakurya pamwenga mukawonere nayu limoza pulogilamu ya JW Broadcasting. Munthu yo musambira nayu wangawonga ukongwa asani mungamudaniya kunyumba kwinu pa nyengu yo mabwezi ngaki ndi ŵanthu a mubanja laki akondwere maholidi nganyaki. Kazibwe yo waja ku Uganda wangukamba kuti: “Ndiwona kuti ndingusambira vinandi vakukwaskana ndi Yehova pa nyengu yo ndachezanga ndi msambizi wangu nge vo ndasambiranga pa nyengu ya sambiru. Ndinguwona mo Yehova waphwere ŵanthu ŵaki kweniso mo yiwu akondwe. Venivi ndivu ndakhumbanga pa umoyu wangu.”
Asani muluta ndi apharazgi akupambanapambana ku sambiru linu, munthu yo musambira nayu wasuzgika cha kwamba kuwungana (Wonani ndimi 12) *
12. Ntchifukwa wuli tikhumbika kuluta ndi apharazgi akupambanapambana ku sambiru?
12 Mulutengi ndi apharazgi akupambanapambana ku sambiru linu la Bayibolu. Nyengu zinyaki tingawona kuti vingaŵa umampha kulutangaku tija ku sambiru pamwenga kulutanga ndi mupharazgi yumoza pe nyengu zosi. Chinanga kuti tingawona kuti palivi suzgu kuchita viyo, kweni munthu yo tisambira nayu Bayibolu wangayanduwa asani kanandi tilutaku ndi apharazgi akupambanapambana. Dmitrii yo waja ku Moldova wangukamba kuti: “Mupharazgi weyosi yo wazanga ndi msambizi wangu kuzindisambiza, wakonkhoskanga vinthu mwakupambana ndi munyaki. Venivi vingundiwovya kuwona nthowa zinyaki zo ndingagwiriskiya ntchitu vo ndasambiranga. Vingundiwovya so kuti ndileki kuchita ukongwa soni ndati ndaluta ku maunganu kakwamba chifukwa ndipu ndakumanapu kali ndi abali ndipuso azichi anandi.”
13. Ntchifukwa wuli tikhumbika kovya yo tisambira nayu kuti wawunganengi?
13 Muwovyengi yo musambira nayu kuti wawunganengi. Chifukwa wuli? Chifukwa chakuti Yehova wakulamula ŵanthu wo atimusopa kuti awunganengi pamoza ndipu kuwungana ntchigaŵa cha kusopa kwidu. (Ahe. 10:24, 25) Kusazgiyapu yapa, abali ndi azichi ŵidu ŵe mu banja lidu lauzimu. Asani tosi te ku maunganu, vituŵa nge te pamoza munyumba ndipu tiryiya nawu limoza chakurya chakunowa. Asani mutovya yo musambira nayu kuti wawunganengi, mutimuwovya kuchita chimoza mwa vinthu vakukhumbika ukongwa vo vingamuwovya kuti wabatiziki. Kweni ntchipusu cha kuti wayambi kuwungana. Kumbi buku lakuti Kondwani ndi Umoyu Kwamuyaya! lingamuwovya wuli munthu yo musambira nayu kuti wamalani ndi masuzgu ngo ngatimutondekesa kuwungana?
14. Kumbi tingamuchiska wuli yo tisambira nayu kuti wawunganengi?
14 Mugwiriskiyengi ntchitu Sambiru 10 lo le mu buku lakuti Kondwani ndi Umoyu Kwamuyaya! kuti mumuchiski yo musambira nayu. Buku ili lechendatuwi, apharazgi anyaki alusu angupempheka kuti ayesere Sambiru 10. Yiwu angukamba kuti vinthu vingwenda umampha ukongwa ndipu anguwovya ŵanthu wo asambiranga nawu kuti ayambi kuwungana. Chinanga kuti ve viyo, mungalindizganga kuti mufiki Sambiru 10 cha mwechendayambi kumudaniya ku maunganu. Mumudanengi mwaliŵi ndipu muchitengi venivi kaŵikaŵi. Ŵanthu akupambanapambana wo asambira Bayibolu akumana ndi masuzgu ngakupambanapambana. Mwaviyo, muziŵengi vinthu vo munthu yo musambira nayu wakhumbikiya ndipu muwonengi asani mungafiska kumuwovya. Mungaguŵanga cha asani pajumpha nyengu wechendayambi kuwungana. Muzikirengi kweni mulutirizgengi kumudaniya ku maunganu.
MUWOVYENGI YO MUSAMBIRA NAYU BAYIBOLU KUTI WALEKI KUCHITA MANTHA
15. Kumbi munthu yo tisambira nayu Bayibolu wangachita mantha ndi vinthu wuli?
15 Kumbi mukumbuka kuti nyengu yinyaki mwachitanga mantha kuja yumoza wa Akaboni aku Yehova? Panyaki mwawonanga kuti mungafiska cha kupharazga nyumba ndi nyumba. Panyaki so mwachitanga mantha kuti ŵanthu a mubanja linu pamwenga mabwezi nginu akususkeningi. Asani ndi viyo, mutenere kuti muvwisa mo munthu yo musambira nayu Bayibolu wavwiya. Yesu wangukamba kuti ŵanthu anyaki angachita nadi mantha ndi vinthu venivi. Chinanga kuti venga viyo, iyu wanguchiska akusambira ŵaki kuti angazomerezanga cha kuti mantha ngaŵatondekesi kuteŵete Yehova. (Mate. 10:16, 17, 27, 28) Kumbi Yesu wanguŵawovya wuli akusambira ŵaki kuti aleki kuchita mantha? Nanga yimwi mungalondo wuli chakuwoniyapu chaki?
16. Kumbi tingamusambiza wuli munthu yo tisambira nayu kuti wakambiyengeku anyaki vo wagomezga?
16 Nyengu zosi musambizengi yo musambira nayu kuti wakambiyengeku anyaki vo wagomezga. Akusambira aku Yesu atenere kuti anguchita mantha wati waŵatuma kuti akapharazgi. Kweni Yesu wanguŵawovya mwakuŵakambiya kumalu ko akhumbikanga kuchipharazga kweniso uthenga wakuti akapharazgi. (Mate. 10:5-7) Kumbi yimwi mungamuyezga wuli Yesu? Muwovyengi munthu yo musambira nayu kuziŵa ko wangachipharazga. Mwakuyeruzgiyapu, mungamufumba asani waziŵa munthu munyaki yo wangayanduwa asani wangasambira fundu yinyaki yauneneska ya mu Bayibolu. Pavuli paki, muwovyeni kunozgeke vo wangachikamba mwakumulongo nthowa yipusu yo wangachipharazgiya. Asani mphakwenere, mungayesere nayu mwakugwiriskiya ntchitu vo vikambika pa kamutu kakuti “Ŵanthu Anyaki Akamba Kuti” kweniso kakuti “Munthu Munyaki Wangafumba Kuti,” mu buku lakuti Kondwani ndi Umoyu Kwamuyaya! Kweni pa nyengu yo muyesere, muŵikengi ukongwa mtima pakusambiza munthu yo musambira nayu kuti wagwiriskiyengi ntchitu Bayibolu pakumuka mafumbu, munthowa yipusu kweniso mwalusu.
17. Kumbi tingaligwiriskiya wuli ntchitu lemba la Mateyu 10:19, 20, 29-31, kuti tiwovyi yo tisambira nayu kuti wathembengi Yehova?
17 Muwovyengi yo musambira nayu kuti wathembengi Yehova. Yesu wangusimikiziya akusambira ŵaki kuti Yehova waŵawovyengi chifukwa chakuti Iyu waŵayanjanga. (Ŵerengani Mateyu 10:19, 20, 29-31.) Namwi mukumbusengi munthu yo musambira nayu kuti Yehova wamuwovyengi. Mungawovya munthu yo musambira nayu kuti wathembengi Yehova mwakupemphera nayu limoza vakukwaskana ndi vilatu vaki. Franciszek yo waja ku Poland wangukamba kuti: “Kanandi msambizi wangu wachipemphera, wazumbuwangamu vilatu vangu mu mapempheru ngaki. Asani ndawona mo Yehova wamukiyanga mapempheru nga msambizi wangu, nani ndasweranga cha kwamba kupemphera. Kukamba uneneska, ndawonanga kuti Yehova watindiwovya asani ndikhumba kupempha abwana ŵangu ku ntchitu yangu yasonu, kuti andizomerezi kuto holidi mazuŵa nganyaki kuti ndiluti ku maunganu ngampingu kweniso ku unganu wachigaŵa.”
18. Kumbi Yehova watuvwa wuli ndi ntchitu yakusambiza yo abali ndi azichi agwira?
18 Yehova watiŵaŵanaŵaniya ukongwa ŵanthu wo tisambira nawu Bayibolu. Iyu waziŵa kuti abali ndi azichi afwiyapu kuti awovyi ŵanthu kuti andere kufupi ndi iyu ndipu watiŵayanja chifukwa cha ntchitu yo agwira. (Yesa. 52:7) Asani pasonu panu muchitiska sambiru la Bayibolu cha, mungawovya mbwenu ŵanthu wo asambira Bayibolu kuti aluti panthazi mwauzimu mpaka kubatizika. Ndipu mungachita venivi mwakulutiya limoza ndi apharazgi anyaki ku masambiru ngawu.
SUMU 60 Mbumoyu Wawu
^ Nkhani iyi yikonkhoskengi mo Yesu wanguwovye ŵanthu kuti aje akusambira ŵaki kweniso mo isi tingamuyezge. Tikambiskanengi so vinthu vinyaki vo ve mubuku lasonu la mutu wakuti Kondwani ndi Umoyu Kwamuyaya! Buku ili likulembeka kuti liwovyi ŵanthu wo tisambira nawu Bayibolu kuti aluti panthazi mpaka kubatizika.
^ Mungasaniya so vo vinguchitikiyapu ŵanthu anyaki mu (1) Kabuku Kakufufuziya Nkhani ka Akaboni aku Yehova pa mutu wakuti “Bayibolu,” ndipu pavuli paki lutani po palembeka kuti “Fundu Zakovya,” pa kamutu kakuti “‘Bayibolu Lisintha Ŵanthu’ (Nkhani za mu Chigongwi cha Alinda zo ze ndi fundu yakuyanana)”” pamwenga mu (2) JW Library® pa kamutu kakuti media, pa chigaŵa chakuti “Kufumba Kweniso Vakuchitika.”
^ CHITHUZI: Mubali pamoza ndi muwolu waki asambira Bayibolu ndi mnyamata. Nyengu zinyaki, abali akupambanapambana alutiya nayu limoza ku sambiru.
