1. Ginani egi vapizane va Jesu va embedego gitshungu nya gikhongolo?

GITSHUNGU nya gikhongolo nya vama ni vanyamayi gi tago khu mayigo nyo hambanehambane gi di hongode Jerusalema. Vathu vava va di gu ganeya malimi nyo hambanehambane. Ga litshigu lile gu giregide gilo nyo samadzise ngudzu. Tsawa nya vapizane va Jesu nya Vajudha wu di pheya gu ganeya malimi ya vathu vale va nga ya wuseya Jerusalema. Khu lisine, gitshungu gi samade ngudzu khu isoso. Ganiolu, egi gi kuhidego ngudzu myonyo nya vathu, mahungu va mapwidego ga vapostoli va Jesu ni ga mupostoli Pedro. Avo va hevbude gu khavo, gasi gu vbulugisa womi wawe a di yede gu khodwa ga Jesu Kristo. Avo va di tsaka ngudzu nyo bwe va wudzisa gu khavo: “Ginani hi fanelago gu gira? Pedro a di va hakha, khuye: Dzi layeni, moyo ni moyo a bhapatiswa.” — Mith. 2:37, 38.

2. Ginani hi na gi wonago avba nya ndrima yeyi (wona foto avba nya kapa)

² Khu gu landreya gu di girega gilo nyo samadzise. Litshigu lile tanga nya 3 mil vathu va di bhabhatiswa va khala vapizane va Kristo. Aya gu diri maphelo nya thumo nya wukhongolo owu Jesu a rumidego vapizane vaye gu gira, a gu thumo nyo gire vapizane. Valandreyi va Jesu va ngo simama gu gira thumo wowu muhuno. Muhuno kha si kodzegi gu bhula ni muthu khu ora mweyo a bwe a ninganedwa khu gu bhabhatiswa. Isoso si nga dzega migima mwendro mwaga ni gu vbindra gasi gu gihevbuli gi vboheya misuwo yoyo. Abari gu u ngu gimbidziseya gihevbulo muthu nyo khaguri u ngu dziti gu khuwe isoso kha si vbevbugi. Avba nya ndrima yeyi hi na wona egi u nga girago gasi gu phasa gihevbuli gyago nya Bhibhiliya gu ninganedwa khu gu bhabhatiswa.

3. Guya khu Matewu 28:19, 20, ginani egi gihevbuli nya Bhibhiliya gi yedego gu gira gasi gi ninganedwa khu gu Bhabhatiswa?

³ Gihevbuli na gi si bhabhatiswi gi yede gu thumisa esi gi si hevbulago. (Leri Matewu 28:19, 20.) Gihevbuli gya gu gira isoso gi na fana ni “mwama nya mapimo” wa avba nya gipimaniso gya Jesu a tsitsidego nyumba yaye vbagiwindrini. (Mat. 7:24, 25; Luka 6:47, 48) Hi nga phasa kharini gihevbuli gu thumisa esi gi si hevbulago? Hongoleni hi wona silo siraru hi nga girago.

4. Hi nga phasa kharini gihevbuli nya Bhibhiliya gu simama gi dzigaradza gasi gi ninganedwa khu gu bhabhatiswa? (Wona kwadru yi gu khiyo: “ Phasa gihevbuli gyago nya Bhibhiliya gu dzi vegeya misuwo nya liphuvbo gi bwe gi yi vboheya.”)

⁴ Phasa gihevbuli gyago gu dzi vegeya misuwo ya liphuvboni. Khu ginani u yedego gu gira isoso? Nga wona gipimaniso gegi. Nga dundrugeya na wu vbweta gu gira liendro nyo laphe khu movha. Adzina u nga hatha gu ema ga malanga nyo khaguri nyo mbure, khu kharato, ambari olu liendro li gu likhongolo kha li na nga gu pwisa gu vbisa. Khu ndziya nyo fane, gihevbuli nya Bhibhiliya gwadi gu gi dzi vegeya misuwo nya liphuvbo nya gu kha si dzegi tepo nya yingi gasi gu yi vboheya. Khu kharato, gi na si wona gu khigyo gu vboheya misuwo nya gu bhabhatiswe si ngu kodzega. Gasi gu phasa gihevbuli gyago gu dandra khu liphuvboni, thumisa gipandre gi gu khigyo “Zama gu gira esi” umo nya libhuku Vbanya kala gupindruga! Hwane nya gihevbulo ni gihevbulo bhula ni gihevbuli gyago khu edzi malito ma gu romogo avba nya gipandre gi gu khigyo “zama gu gira esi”, ma nga gi phasago khidzo gu thumisa esi gi si hevbudego. Wa gu vbweta gu khuwe gihevbuli gyago gi vboheya yimbe misuwo, yi love avbo nya gipandre gi gu khigyo “Simbe u nga girago.” Tepo yatshavbo bhula ni gihevbuli gyago khu misuwo yagyo yi si vbwetigo tepo nyo laphe gasi gu yi vboheya ni eyi yi vbwetago tepo nyo laphe gasi gu yi vboheya.

5. Guya khu Marko 10:17-22, ginani egi Jesu a embedego mwama wule nya gighanyi, nigu khu ginani?

⁵ Phasa gihevbuli gyago nya Bhibhiliya gu vbindrugedza silo nyo khaguri womini gwagyo. (Leri Marko 10:17-22.) Jesu a di gu dziti gu khuye si di hadzi gu garadzeya mwama wule nya gighanyi gu rengisa silo saye. (Marko 10:23) Ambari ulolo, Jesu embede mwama wule gu a vbindrugedza silo nya si khongolo womini gwaye. Khu ginani? Kholu a di gu mu haladza. Dzimbe dzitepo kha hi kutsi gihevbuli gyathu nya Bhibhiliya gu thumisa esi gi si hevbulago khu gu khethu gi si gu dongi gu vbindrugedza esi si vbwetegago. Lisine gu si ngu dzega tepo gasi gu muthu a vbindrugedza mavbanyelo yaye ya gale a ambala muthu muphya. (Kol. 3:9, 10) Ganiolu, ha gu vbiredzeya gu bhula ni gihevbuli gyathu khu mahungu yoyo, anigyo kha gi na nga hweya gu vbindrugedza. Wa gu manega ni mabhulo nya nga yoyo ni gihevbuli gyago wa gu yeyedza gu khuwe u ngu gi haladza. — Ndzi. 141:5; Mav. 27:17.

6. Khu ginani hi yedego gu wudzisa gihevbuli gyathu mawonelo yagyo khu mahungu nyo khaguri?

⁶ Si na ni lisima gu wudzisa gihevbuli gyathu mawonelo yagyo khu mahungu nyo khaguri. Siwudziso soso si na gu phasa gu tugula esi gihevbuli gyago gi si pwisisago ni gu si khodwa. Wa gu gira isoso tepo yatshavbo, si na gu vbevbugeya gu bhula ni gihevbuli gyago khu mahungu adzina si gi garadzago gu ma khodwa. Libhuku Vbanya kala gupindruga! li na ni siwudziso nya singi si kutsago gihevbuli gu ningeya mawonelo yagyo. Khu giyeyedzo, avbo nya gihevbulo 04 gu na ni giwudziso gi gu khigyo: “Khu mawonelo yago, Jehovha a gu dzipwa kharini tepo hi thumisago lina laye?” Avbo nya gihevbulo 09 gu na ni giwudziso gi gu khigyo: “Silo muni u dogoreyago gu si pata avbo nya nombelo wago?” Gupheyani adzina gihevbuli gyago gi nga si wona na si gu garadza gu hlamula siwudziso sesi. Ganiolu, u nga phasa gihevbuli gyago khu gu gi hevbudza gu vbweta hlamulo na gi gu dundrugeya khu milowo ni dzifoto dzi gomogo avbo nya libhuku.

7. Hi nga thumisa kharini matshango ya vambe vathu gasi gu phasa sihevbuli sathu?

⁷ Tepo gihevbuli gyago gi pwisisago esi gi yedego gu vbindrugedza, thumisa matshango ya vambe vathu gasi gu gi kutsa gu vbindrugedza nigyo. Khu giyeyedzo, abari gu gihevbuli gyago si ngu gi garadzeya gu hongola mitshanganoni, gi yeyedze vhidhiyu yi gu khiyo Jehovha tepo yatshavbo a ngu nyi khataleya, yi gomogo omu nya gipandre “Wona simbe” avba nya gihevbulo 14. Omu nya sipimo nya singi nya libhuku Vbanya kala gupindruga! u na mana matshango yoyo omu nya gipandre “Gira wugevisisi nyo ete ni omu nya gipandre Hevbula simbe.” * Dzi woneye gasi u si fananisi gihevbuli gyago ni mumbe muthu khu gu ganeya gu khuwe “abari gu uye a si kodzide anuwe u na si kodza.” Diga gihevbuli gi vboheya mahegiso yoyo gyabune. Wulangani nya isoso, ganeya khu silo si phasidego muthu wule avbo nya vhidhiyu gu vbanya khu sihevbudzo nya Bhibhiliya. Adzina u nga khumbuga lowo mwendro gimbe gilo egi muthu wule a giridego. Tepo yatshavbo si kodzegago tshingisa edzi Jehovha a phasidego khidzo muthu yoyo.

8. Hi nga phasa kharini gihevbuli gyathu gu haladza Jehovha?

⁸ Phasa gihevbuli gyago gu haladza Jehovha. U nga gira kharini isoso? Tepo yatshavbo vbwetedzeya dzindziya nya gu tshingise makhalelo ya Jehovha ga gihevbuli gyago. Phasa gihevbuli gyago gu wona gu khigyo Jehovha, Nungungulu nya gu tsake nigu a ngu phasa vale va mu haladzago. (1 Thim. 1:11; Hebh. 11:6) Phasa gihevbuli  gyago gu wona gu khigyo gi na phasega gya gu thumisa esi Bhibhiliya yi hevbudzago, u bwe u tshamuseya gihevbuli gyago gu khuwe tshatshazelo gi na wu manago khu thumisa esi Bhibhiliya yi si hevbudzago, so yeyedza gu khiso Jehovha a ngu gi haladza. (Isa. 48:17, 18) Tepo gihevbuli gyago gi yago gi engedzeya lihaladzo lagyo khu Jehovha, isoso si na gi kutsa gu vbindrugedza esi si vbwetegago. — 1 Joh. 5:3.

9. Guya khu Marko 10:29, 30, ginani gi nga phasago muthu gu diga silo nyo khaguri gasi a ninganedwa khu gu bhabhatiswa?

⁹ Gasi gu gihevbuli nya Bhibhiliya gi ninganedwa khu gu bhabhatiswa gu vbwetega gi dzi garadza. Gu fana ni mwama wule nya gighanyi hi ganedego khuye gupheyani, simbe sihevbuli adzina si na lomba gu si diga gu landriseya dzithomba. Abari gu thumo waso kha wu gimbileyani ni matshina nya milayo nya Bhibhiliya adzina si nga lombega gu si wu diga. Vambe adzina si nga lomba gu va hambana ni dzipari dzi gu mba thumeya Jehovha. Vambe gambe adzina va nga tsukudwa khu valongo va gu mba gola Dzifakazi dza Jehovha. Jesu ganede gu khuye vambe adzina si na va garadzeya gu emisana ni silo soso. Ganiolu, Jesu tumbiside gu khuye vale va hungago gu mu landreya kha va na nga dzilaya. Uye a na va tshatshazeya khu gu va ninga valongo va va haladzago hengeledzanoni gwaye. (Leri Marko 10:29, 30.) Ginani u nga girago gasi gu phasa gihevbuli gyago nya Bhibhiliya gu hakha giningwa gegi?

10. Ginani u gi hevbulago ga esi Manuel a ganedego?

¹⁰ Khala pari ya gihevbuli gyago. Si na ni lisima gu yeyedza gihevbuli gyago gu khuwe u ngu khatala khigyo. Khu ginani? Nga wona esi si ganedwego khu Manuel a khalago México. Uye a ngu tshamuseya edzi muhevbudzi waye a mu phasidego khidzo tepo a nga ba ari gihevbuli nya Bhibhiliya, uye wari khuye: “Na gi si gu pheyi gihevbulo, muhevbudzi wangu a di gu pheya khu gu vbweta guti mawugelo yangu. Uye a di gu nyi phasa gu dzipwa na nyi tshulegide a bwe a nyi dzumeleya gu ganeya ni gevbini gilo.” Nyi di gu si wona gu kheni uye a ngu khatala kheni khu lisine.

11. Sihevbuli sathu si nga phasega kharini ha gu dzi ninga tepo nyo khale naso?

¹¹ Jesu a di gu dzi ninga tepo nya khale ni vapizane vaye. Anuwe dzi ninge tepo nyo khale ni sihevbuli sago. (Joh. 3:22) Abari gu gihevbuli gyago nya Bhibhiliya gi phede gu vbindrugedza silo nyo khaguri womini gwagyo, u nga gi rana gaya gwago gasi guta hodza nagyo mwendro gu ta sistiri nagyo broadcasting. Gihevbuli gyago gi nga tsaka ngudzu khu konvhite yoyo ngudzungudzu abari dziferiyadhu, matshigu aya valongo vagyo ni dzipari va girago dzifesta. Kholu si nga gira gi dzipwa nari gyonga ga matshigu yoyo. Kazibwe a khalago Uganda wari khuye: “Khandri gihevbulo basi gi nyi hevbudzidego maningano khu Jehovha, kholu nyi hevbude nya singi ngudzu tepo muhevbudzi wangu a nga ba a dzi ninga tepo nyo khale ni eni. Nyi wonide edzi Jehovha a khatalago khidzo khu vathu vaye ni edzi va tsakago khidzo. Isoso khiso nyi nga ba nyi si vbweta womini wangu.”

12. Khu ginani hi yedego gu hongola ni vahuweleyi nyo hambane gasi guya gimbidzisa sihevbulo nya Bhibhiliya?

¹² Rana vambe vahuweleyi gasi uya gimbidzisa navo gihevbulo nya Bhibhiliya. Dzimbe dzitepo si nga gira gu khatshi sa gu vbevbuga gu hongola honga hi ya gimbidzisa gihevbulo mwendro gu hongola ni muhuweleyi wa moyo tepo yatshavbo. Ambari si wonegago na si gu vbevbuga gu gira isoso, gihevbuli gi nga phasega ngudzu ha gu oloveya gu hongola ni vahuweleyi nyo hambanehambane. Dmitrii a vbanyago Moldávia wari khuye: “Muhuweleyi ni muhuweleyi a nga ba a patega avbo nya gihevbulo gyangu, a di gu tshamuseya silo khu ndziya nyo hambane. Isoso si nyi phaside gu wona dzimbe dzindziya nya edzi nyi nga thumisago khidzo esi nyi hevbulago. Khu kharato, tepo nyi nga hongola mitshanganoni khu litshigu nyo pheye, kha nya khala dzitshoni kholu vandriyathu nya vangi nyi di gu vati.”

13. Khu ginani hi yedego gu phasa gihevbuli gyathu gu hongola mitshanganoni?

¹³ Phasa gihevbuli gyago gu hongola mitshanganoni. Khu ginani? Kholu Jehovha rumide vakhozeyi vaye gu va tshangana; isoso sa gu gira gipandre nya wukhozeyi wathu. (Hebh. 10:24, 25) Gu diga isoso, vandriyathu libandlani va gu gira gipandre nya ndranga yathu ya liphuvboni. Ha gu ba hiri mitshanganoni ni vandriyathu so fana ni gu ba hi hodza gumogo guhodza nyo tshambe. Wa gu kutsa gihevbuli gyago gu hongola mitshanganoni u na gi phasa gu dzega lizambo nya lisima ngudzu gasi gi ninganedwa khu gu bhabhatiswa. Ganiolu, adzina si nga garadzeya gihevbuli gyago gu hongola mitshanganoni. Abari kharato, libhuku li gu khilo Vbanya kala gupindruga! li nga gi phasa kharini?

14. Hi nga kutsa kharini gihevbuli gyathu gu hongola mitshanganoni?

¹⁴ Thumisa gihevbulo 10 nya libhuku Vbanya kala gupindruga! gasi gu kutsa gihevbuli gyago. Na li si duswi libhuku leli gu lombidwe vahuweleyi nyo khaguri gasi gu thumisa gihevbulo gegi ni sihevbuli sawe. Avo va di khavo gihevbulo gegi khyadi ngudzu nigu gi phaside sihevbuli sawe gu pheya gu hongola mitshanganoni. Ganiolu, u nga vireyi kala u vboha avbo nya gihevbulo 10 gasi gu konvhidhari gihevbuli gyago gu hongola mitshanganoni. U nga hweyi gu gi konvhidhari nigu gira isoso tepo yatshavbo. Gihevbuli ni gihevbuli nya Bhibhiliya gi ngu emisana ni sigaradzo nyo hambane, khu kharato vega gupima avbo nya esi gihevbuli gyago gi si vbwetago u bwe u vbwetedzeya dzindziya nyo gi phase. Ambari gyo hweya gu hongola mitshanganoni u nga vbeyi tshivba, ganiolu simama gu gi konvhidhari.

15. Sihevbuli sathu nya Bhibhiliya si ngapwa hwanga nya ginani?

¹⁵ Ina u pwide hwanga tepo u nga vbweta gu khala Fakazi ya Jehovha? Adzina u pimiside gu khuwe kha wu na nga si kodza gu tshumayela khu ndranga ni ndranga. Mwendro saye u thavide gu khuwe dzipari dzago ni valongo va na gu wugeya.  Abari kharato, u ngu pwisisa edzi gihevbulo gyago gi dzipwago khidzo. Jesu ganede gu khuye vathu nyo khaguri va di hadzi gupwa hwanga. Ganiolu, uye kutside valandreyi vaye gu khuye kha va yeli gu dzumeleya hwanga wu va digisa gu thumeya Jehovha. (Mat. 10:16, 17, 27, 28) Jesu phaside kharini valandreyi vaye gu pala hwanga? Nigu u nga pimedzeya kharini giyeyedzo gyaye?

16. Hi nga phasa kharini gihevbuli gyathu gu tshumayela?

¹⁶ Phasa gihevbuli gyago gu tshumayela. Tepo Jesu a nga rumeya vapizane vaye gasi guya tshumayela avo va thavide. Ganiolu, Jesu a va phaside kharini? Jesu a embede vapizane vaye umo va nga ba va yede gu tshumayela ni esi va nga ba va yede gu ganeya. (Mat. 10:5-7) U nga mu pimedzeya kharini Jesu? Phasa gihevbuli gyago guti omu gi nga tshumayelago. Khu giyeyedzo, gi wudzise khuwe: “U nguti muthu nyo khaguri a nga tsakago khu gu hevbula lisine nya Bhibhiliya?” Khu kharato, phasa gihevbuli gyago gu mana ndziya nyo vbevbuge nyo tshumayele khiyo muthu yoyo. Sa gu kodzega, u nga donga ni gihevbuli gyago sipandre si gu khiso: “A gu tshuka muthu a ganeya gu khuye” ni “A gu tshuka muthu a wudzisa khuye” si gomogo avbo nya libhuku Vbanya kala gupindruga! nigu wa gu ba u gira isoso vega gupima avbo nyo phase gihevbuli gyago gu thumisa Bhibhiliya gasi gi ningeya mihlamulo nyo vbevbuge khu ndziya nya yadi.

17. Hi nga thumisa kharini libhuku la Matewu 10:19, 20, 29-31, gasi gu phasa gihevbuli gyathu gu tumba Jehovha?

¹⁷ Phasa gihevbuli gyago gu tumba Jehovha. Jesu tumbiside vapizane vaye gu khuye Jehovha a ngu va haladza, khu kharato a di hadzi va phasa tepo yatshavbo. (Leri Matewu 10:19, 20, 29-31.) Embeya gihevbuli gyago gu khuwe Jehovha a na gi phasa nigyo. U nga phasa gihevbuli gyago gu tumba Jehovha khu gu gombeya nagyo maningano khu misuwo yagyo. Franciszek a vbanyago Polônia wari khuye: “Muhevbudzi wangu tepo yatshavbo a di gu pata misuwo yangu avbo nya milombelo yaye. Tepo nyi nga wona gu kheni Jehovha a di gu hlamula milombelo ya muhevbudzi wangu, aneni nyi di pheya gu gombeya. Nyi wonide giphaso gya Jehovha tepo nyi nga mana thumo nya wuphya si bwe si lomba gu dusa matshigwanyana gasi gu hongola kongresu ni mitshanganoni.”

18. Jehovha a gu wu wona kharini thumo wu girwago khu vahevbudzi nya Bhibhiliya?

¹⁸ Jehovha a ngu khatala ngudzu khu sihevbuli sathu nya Bhibhiliya. Uye a ngu gola ngudzu vahevbudzi nya Bhibhiliya kholu a ngu yiti mizamo va girago gasi gu phasa vambe guti lisine maningano ni Nungungulu. (Isa. 52:7) Abari gu olu u mwalo gihevbuli nya Bhibhiliya, u nga phasa sihevbuli nya Bhibhiliya gu ninganedwa khu gu bhabhatiswa khu gu hongola ni vambe vahuweleyi umo nya sihevbulo sawe.