1. Akxni lhuwa latamanin kgalhskininankgolh tuku xlitlawatkan xwanit, ¿tuku kalikgalhtika?

LHUWA lakchixkuwin chu lakpuskatin xʼankgonit kJerusalén, klakalhuwa países xminkgonitancha chu tanu tanu tachuwin xchuwinankgo. Uma kilhtamaku lalh tuku kaks malakawaninan, kaj xalan makgapitsi judíos, tsukukgolh chuwinankgo kxtachuwinkan latamanin. Pero tuku tlakg xlakaskinka kitaxtulh ni wa pi chuwinankgolh kʼumakgolh tachuwin, wata tuku wankgolh umakgolh judíos chu tuku kawanilh apóstol Pedro. Atanu tuku na kawanilh wa pi tlan xlakgtaxtukgolh komo xkanajlanikgolh Jesucristo, umakgolh tachuwin lu kalakgchalh kxnakujkan chu kgalhskininankgolh: «¿Tuku kilitlawatkan?». Pedro kawanilh: «Katamunutit minchatunukan» (Hech. 2:37, 38).

2. ¿Tuku nalichuwinanaw kʼuma artículo? (Kaʼakxilhti xmakni revista).

² Tuku lalh alistalh kaks malakawaninalh: ama kilhtamaku tamunukgolh max 3,000 latamanin chu chuna kstalaninanin Cristo litaxtukgolh. Uma litsukulh lanka taskujut nema Jesús kalakgayawalh kstalaninanin. Chu uma taskujut chinit asta kkinkilhtamakujkan. Kkinkilhtamakujkan ni kaj makgapitsi horas talakaskin xlakata wi tiku namakgtayakan xlakata tlan natamunu. Xlakata chatum tamakgalhtawakgen natamunu, max natalakaskin akglhuwa papaʼ, akgtum kata o liwaka. Xlakata wi tiku kstalanina Cristo nalitaxtu, talakaskin lu naliskujaw, chuna la katsikgo tiku makgalhtawakgenamakgo. Kʼuma artículo, nalichuwinanaw tuku tlan natlawayaw xlakata tiku kgalhtawakgamakgolh natamunukgo.

3. Chuna la wan Mateo 28:19, 20, ¿tuku xlitlawat tamakgalhtawakgen xlakata tlan natamunu?

³ Akxni nina tamunu, tamakgalhtawakgen xlakaskinka nalilatama tuku masiya Biblia (kalikgalhtawakga Mateo 28:19, 20). Akxni chuna tlawa, litaxtu la «skgalala chixku» tiku Jesús lichuwinalh pi tlawalh xchik kʼakgtum lanka chiwix (Mat. 7:24, 25; Luc. 6:47, 48). Kaʼakxilhwi pulaktutu tuku tlan natlawayaw xlakata tlan namakgtayayaw tamakgalhtawakgen nalilatama tuku katsinima.

4. ¿La tlan namakgtayayaw tamakgalhtawakgen xlakata natatliwakglha xtakanajla chu natamunu? (Na kaʼakxilhti recuadro « Kamakgtaya mintamakgalhtawakgen nalakgchan tuku lakgchamputun»).

⁴ Kamakgtayaw xlakata wi tuku nalakgchamputun. ¿Tuku xlakata uma lu xlakaskinka? Kalilakpuwaw uma liʼakxilhtit: komo amaw kʼakgtum putlaw xlakata amaw paxialhnanaw, max natachokgotayayaw tsinu niku lu nalakgatiyaw. Uma natlawa pi ni lu makgat katimakgkatsiw niku amaw. Uma xtachuna akxni tamakgalhtawakgen wi tuku kaj ni makgas tlan nalakgchan chu akxilha pi makgantaxti. Max naʼakxilha pi xlakata natamunu, tlan namakgantaxti. Tlan namaklakaskinaw recuadro «Katlawa uma» xla libro Kalipaxuwa latamat, xlakata namakgtayayaw tamakgalhtawakgen natatliwakglha xtakanajla. Akxni nasputa akgatunu lección, kawaniw la makgtanuma tuku lakgchamputun tuku aku katsinilh. Komo lakaskinaw pi wi atanu tuku katlawalh, tlan natsokgwiliyaw niku wan «Na tlan natlawaya uma», kamaklakaskiw uma kilhtamaku xlakata nalitachuwinanaw tamakgalhtawakgen tuku ni makgas lakgchamputun chu tuku nalin kilhtamaku nalakgchan.

5. Chuna la wan Marcos 10:17-22, ¿tuku wanilh Jesús chatum chixku tiku lhuwa tumin xkgalhi, chu tuku xlakata?

⁵ Kamakgtayaw xlakata natlawa talakgpalit kxlatamat (kalikgalhtawakga Marcos 10:17-22). Jesús wanilh chatum chixku tiku lhuwa  tumin xkgalhi pi kstalh putum tuku xkgalhi, maski xkatsi pi uma tuwa xkitaxtunilh (Mar. 10:23). ¿Tuku xlakata chuna wanilh? Xlakata xlakgalhaman. Lakgachunin max ni waniputunaw tamakgalhtawakgen pi xlilatamat tuku katsinima. Xlakata lakpuwanaw pi nina lakgchan chuna nawaniyaw. Xlikana pi lilhakganankan xasasti tayat chu tlawakan makgapitsi talakgpalit lin xkilhtamaku (Col. 3:9, 10). Komo ni namakgapalayaw chu tunkun nawaniyaw tuku xlitlawat, max tunkun natsuku liskuja. Uma tuku nalitakgalhchuwinanaw nalimasiyani pi paxkiyaw (Sal. 141:5; Prov. 27:17).

6. ¿Tuku xlakata xlakaskinka natlawayaw takgalhskinin nema nalimasiya tuku lakpuwan kintamakgalhtawakgenkan?

⁶ Lu xlakaskinka natlawaniyaw takgalhskinin tamakgalhtawakgen xlakata nakinkawaniyan tuku lakpuwan. Umakgolh takgalhskinin nakinkamakgtayayan nakatsiyaw tuku xla akgatekgsa chu tuku kanajla. Komo lismaniyaw tlawayaw uma, alistalh ni tuwa katimakgkatsiw nalitachuwinanaw tuku tlakg tuwa. Libro Kalipaxuwa latamat, limin lhuwa takgalhskinin nema makgtayanan tlan nawankan tuku lakpuwankan. Akgtum liʼakxilhtit, klección 4 limin takgalhskinin: «¿Tuku lakpuwana wix pi makgkatsi Jehová akxni lakapastaka xtukuwani chu mapakuwiya?». Chu klección 9 tekgsaw atanu takgalhskinin: «¿Tuku litachuwinamputuna Dios kmioración?». Xapulana, max natalakaskin namaxkiyaw kilhtamaku kintamakgalhtawakgenkan xlakata tlan nalakpuwan la nakgalhtinan umakgolh takgalhskinin. Tlan namakgtayayaw komo namasiyaniyaw nalilakpuwan textos xalak Biblia chu dibujos nema tasiyakgo klección.

7. ¿La tlan namaklakaskinaw tuku titaxtukgonit amakgapitsin xlakata tlan namakgtayayaw kintamakgalhtawakgenkan?

⁷ Akxni kintamakgalhtawakgenkan naʼakgatekgsa tuku xlitlawat, kamakgpuwantiniw namaklakaskin tuku titaxtukgonit amakgapitsin. Akgtum liʼakxilhtit: komo tuwa makgkatsi naʼan ktamakxtumit, tlan namasiyaniyaw video Jehová kililakgaputsa nema min ksección «Tlakg kakatsini», anta klección 14. Lhuwa lecciones xla libro Kalipaxuwa latamat, limin tuku titaxtukgonit amakgapitsin ksección «Tlakg kalakputsananiw» o «Tlakg kakatsini». * Nikxni wi tiku katamalakxtumiw kintamakgalhtawakgenkan chu ni kawaniw: «Komo xla matlani, wix nachuna». Kamaxkiw talakaskin pi wa xʼakstu tiku chuna nalakpuwan. Kalichuwinaw tuku makgtayalh tiku tasiyalh kvideo nalilatama tuku masiya Biblia. Chuna la akgtum xlakaskinka texto o pulaktum tuku tlawalh. Akxni tatlani, kalichuwinaw la Jehová makgtayalh uma lataman.

8. ¿La tlan namakgtayayaw kintamakgalhtawakgenkan xlakata napaxki Jehová?

⁸ Kamakgtayaw napaxki Jehová. Kaputsaw kilhtamaku xlakata tlan nalitachuwinanaw xalaktlan xtayat Jehová. Kamakgtayaw kintamakgalhtawakgenkan naʼakxilha pi Jehová chatum xapaxuwana Dios chu putum kilhtamaku kamakgtayaputun tiku paxkikgo (1 Tim. 1:11; Heb. 11:6). Kamasiyaniw la tlan nalitamakgtaya komo nalilatama tuku katsinima chu kalitachuwinaw pi uma pulaktum tuku limasiya pi Jehová paxki (Is. 48:17, 18). Akxni tlakg napaxki Jehová, tlakg natlawaputun talakgpalit nema natalakaskin (1 Juan 5:3).

9. Chuna la wan Marcos 10:29, 30, ¿tuku namakgtaya chatum lataman wi tuku nalimakgxtakga xlakata tlan natamunu?

⁹ Xlakata kintamakgalhtawakgenkan tlan natamunu, wi tuku xlimakgxtakgat. Chuna la  chixku tiku lhuwa tumin xkgalhi nema lichuwinaw kpárrafo 5, max makgapitsi tamakgalhtawakgen natalakaskin namakgxtakgkgo tuku lhuwa xtapalh xkgalhikgo. Max asta namakgxtakgkgo xtaskujutkan komo uma lakatsala xtastakyaw Biblia. Max natalakaskin nialh nakatalalinkgo tiku ni paxkikgo Jehová. Amakgapitsi tiku xalak xfamilia max nakalakgmakgankgo xlakata ni kaʼakxilhputunkgo xtatayananin Jehová. Jesús lichuwinalh pi makgapitsi latamanin tuwa xʼamakgo makgkatsikgo wi tuku namakgxtakgkgo, pero Jesús malaknulh pi Jehová xʼama kalisikulunatlawa kstalaninanin, akgtum familia xaʼespiritual (kalikgalhtawakga Marcos 10:29, 30). ¿La tlan namakgtayayaw tamakgalhtawakgen xlakata nalitamakgtaya uma xastlan tamaskiwin?

10. ¿Tuku kinkamasiyaniyan tuku wan Manuel?

¹⁰ Xʼamigos kalitaxtuw. Lu xlakaskinka nalimasiyaniyaw pi lilakgaputsayaw. ¿Tuku xlakata? Kaʼakxilhwi tuku wan Manuel, chatum tala xalak México. Kinkalitachuwinanan tuku titaxtulh akxni xmakgalhtawakgemaka: «Akxni nina xakmatsukiyaw akgatunu takgalhtawakga, tiku xkimakgalhtawakgema ankgalhin xkinkgalhskin la xakwi, uma tlan xkimamakgkatsini chu xakwani putum tuku xaktitaxtuma. Xakmakgkatsi pi xlikana xkililakgaputsa».

11. ¿Tuku xlakata tlan kitaxtu kalimaxtunikan kilhtamaku tiku kamakgalhtawakgekan?

¹¹ Chuna la Jesús kalimaxtunilh kilhtamaku xtamakgalhtawakgen xlakata akxtum xkatatawilalh, akinin na kakalimaxtuniw kilhtamaku kintamakgalhtawakgenkan (Juan 3:22). Komo akxilhaw pi lakgpalima xlatamat chu tlan akxilhaw, tlan nawaniyaw pi kaʼalh kkinchikkan xlakata natawayaw kape o natawayanaw. O tlan nataʼakxilhaw programa xla akgatunu papaʼ xla JW Broadcasting. Akxni xʼamigos chu xtalilakgapasni paskuajnankgo, max tlan namakgkatsi pi uma kilhtamaku nawaniyaw pi kaʼalh kkinchikkan xlakata ni namakgkatsi pi xʼakstu wi. Kazibwe, tiku lama kʼUganda, wan: «Xlakata tiku xkimakgalhtawakge kilimaxtunilh kilhtamaku, lhuwa tuku kkatsinilh xlakata Jehová. Nachuna, kakxilhli la Jehová kalilakgaputsa xlakskujnin, chu la paxuwakgo. Wa uma tuku xaklakaskin».

12. ¿Tuku xlakata tanu tanu natalan nakataʼanaw akxni naʼanaw makgalhtawakgenanaw?

 ¹² Tanu tanu tiku kakawaniw nakinkataʼankgoyan akxni makgalhtawakgenanaw. Max tlan makgkatsiyaw akxni kiʼakstukan anaw o watiya tala tiku taʼanaw. Maski akinin ni tuwa nakinkakitaxtuniyan, kintamakgalhtawakgenkan lu namakgtaya komo tanu tanu natalan nakataʼanaw. Dimitri, tiku lama kMoldavia, wan: «Chatunu chatunu natalan tiku xkatamin tiku xkimakgalhtawakge, lu tlan la xmasiyakgo. Uma kimakgtayalh nakakxilha la tlan tanu tanu naklilatama tuku xakkatsinima. Na lu kimakgtayalh ni lu xakmaxanalh akxni kkilalh kxapulana tamakxtumit, xlakata lhuwata natalan xakkalakgapasa».

13. ¿Tuku xlakata kilimakgtayatkan kintamakgalhtawakgenkan xlakata naʼan ktamakxtumit?

¹³ Kamakgtayaw xlakata tlan naʼan ktamakxtumit. ¿Tuku xlakata? Xlakata Jehová kinkalimapakgsiyan natamakxtumiyaw chu uma makgtanu ktakaknin nema maxkiyaw (Heb. 10:24, 25). Nachuna, natalan xalak congregación wa kifamiliakan xaʼespiritual. Akxni katawilaw ktamakxtumit, xtachuna la komo akxtum xkatalipaxuwaw akgtum taway. Akxni makgtayayaw kintamakgalhtawakgenkan naʼan ktamakxtumit, makgtayamaw xlakata natlawa tuku lu xlakaskinka xlakata natamunu. Pero max wi tuku namalaktlawi xlakata natlawa uma. ¿La tlan namaklakaskinaw libro Kalipaxuwa latamat xlakata namakgtayayaw?

14. ¿La tlan namakgpuwantiniyaw kintamakgalhtawakgenkan naʼan ktamakxtumit?

¹⁴ Tlan namaklakaskinaw lección 10 xla libro Kalipaxuwa latamat xlakata namakgpuwantiniyaw kintamakgalhtawakgenkan naʼan ktamakxtumit. Akxni nina xmaxtukan uma libro kawanika makgapitsi natalan tiku lhuwata tuku titaxtukgonit pi xmaklakaskinkgolh uma lección akxni makgalhtawakgenankgo, chu lu tlan la kakitaxtunilh. Uma ni wamputun pi nakgalhkgalhiyaw asta nachanaw klección 10 xlakata nakawaniyaw kintamakgalhtawakgenkan kaʼankgolh ktamakxtumit. Akxni tsukuyaw makgalhtawakgeyaw tunkun kawaniw pi kaʼalh ktamakxtumit chu ankgalhin chuna katlawaw. Chatunu chatunu tamakgalhtawakgen ni lakxtum chu tanu tanu taʼakglhuwit titaxtukgo. Wa xlakata kuenta katlawaw tuku maklakaskin chatunu chatunu chu kalilakpuwaw la tlan nakamakgtayayaw. Ni kataxlajwaniw komo ni tunkun natsuku an ktamakxtumit. Kalimasiyaw pi kgalhkgalhinanaw chu chuntiya kamakgpuwantiniw pi kaʼalh ktamakxtumit.

15. ¿Tuku max namakgapekuan kintamakgalhtawakgenkan?

¹⁵ Komo nalakapastakaw akxni xkinkalimakgalhtawakgemakan Biblia, ¿xpekuanaw akxni xlakpuwanaw pi xtatayananin Jehová xʼamaw litaxtuyaw? Max xlakpuwanaw pi nikxni la xʼamaw lichuwinanaw Dios kʼakgatunu chiki o max xpekuanaw akxni xlakpuwanaw pi kifamiliaskan o kiʼamigoskan xkinkalakatakikgon. Uma tlan nakinkamakgtayayan naʼakgatekgsaw tuku makgkatsikgo kintamakgalhtawakgenkan. Jesús lichuwinalh pi makgapitsi latamanin xʼamakgolh pekuankgo. Pero kamakgpuwantinilh kstalaninanin pi ni xmastakgolh talakaskin pi tapekua xtlawalh pi ni kskujnanikgolh Jehová (Mat. 10:16, 17, 27, 28). ¿La kamakgtayalh xlakata ni napekuankgo? ¿Chu la tlan nachuna natlawayaw?

16. ¿La tlan namasiyaniyaw kintamakgalhtawakgenkan xlakata nalichuwinan tuku katsinima?

¹⁶ Tsinu tsinu kamasiyaniw xlakata nalichuwinan tuku katsinima. Max xtamakgalhtawakgen Jesús pekuankgolh akxni xla kalimapakgsilh pi xlichuwinankgolh Dios, pero xla kamakgtayalh akxni kawanilh tiku tlan xkalitachuwinankgolh Dios chu tuku xwankgolh (Mat. 10:5-7). ¿La tlan nastalaniyaw xliʼakxilhtit? Kamakgtayaw  xlakata nakatsi tiku tlan nakalitachuwinan Dios. Akgtum liʼakxilhtit, tlan nakgalhskinaw komo lakgapasa chatum lataman tiku katsiputun akgtum tamasiy xalak Biblia, alistalh kamakgtayaw la nalakkaxwili tuku nawan, pero ni tuwa la kawaniw xlakata tlan namasiya. Akxni tlan chuna naʼakxilhaw, tlan natalakkaxwiliyaw tuku nawan chu namaklakaskinaw sección «Makgapitsi wankgo» chu «Makgapitsi kgalhskininankgo» nema min klibro Kalipaxuwa latamat. Akxni natamakgatawakgayaw, kamasiyaniw la tlan namaklakaskin Biblia xlakata ni tuwa chu tlan la nakgalhtinan.

17. ¿La tlan namaklakaskinaw Mateo 10:19, 20, 29-31 xlakata namakgtayayaw kintamakgalhtawakgenkan nalipawan Jehová?

¹⁷ Kamakgtayaw xlakata nalipawan Jehová. Jesús kawanilh kstalaninanin pi Jehová xʼama kamakgtaya xlakata xkapaxki (kalikgalhtawakga Mateo 10:19, 20, 29-31). Kamalakapastakniw kintamakgalhtawakgenkan pi Jehová na namakgtaya. Akxni akxtum natatlawayaw oración, nawanaw tuku lakgchamputun chu chuna namasiyaniyaw pi tlan nalipawan Jehová. Franciszek tiku lama kPolonia wan: «Tiku xkimakgalhtawakge, akxni xtlawa xʼoración makglhuwa xlichuwinan tuku xaklakgchamputun. Akxni kakxilhli la Jehová xkgalhti, na ktsukulh ktlawa kioración. Kmakgkatsilh pi Jehová kimakgtayalh akxni niku xakskuja xakskin kilhtamaku xlakata ni xakskujli, xlakata xakkalh ktamakxtumit chu kʼasamblea».

18. ¿La limakgkatsi Jehová putum tuku tlawakgo tiku makgalhtawakgenankgo?

¹⁸ Chu ¿komo la uku nitiku makgalhtawakgemaw? ¿Tlantiyaku nakamakgtayayaw tiku kamakgalhtawakgemaka xlakata natamunukgo? Chuna. ¿La tlan chuna natlawayaw? Nakataʼanaw amakgapitsin akxni naʼankgo makgalhtawakgenankgo. Liwana tasiya pi Jehová kalilakgaputsa kintamakgalhtawakgenkan. Na lu lanka xtapalh akxilha putum tuku tlawayaw xlakata kamakgtayayaw kintamakgalhtawakgenkan tlan natalakatsuwinikgo chu wa xlakata lu kinkapaxkiyan (Is. 52:7).