1. Ol disaipel bilong Jisas i tokim bikpela lain manmeri long mekim wanem?

BIKPELA lain manmeri em ol i bilong narapela narapela kantri na ol i mekim narapela narapela tokples, ol i kam bung long Jerusalem. Wanpela narapela kain samting i kamap long dispela de. Sampela Juda inap mekim tokples bilong ol dispela manmeri bilong ol narapela kantri. Ol manmeri i kirap nogut long lukim dispela, tasol tok ol dispela Juda i mekim long ol na tok aposel Pita i mekim long ol i narakain tru. Ol i tok sapos ol dispela manmeri i bilip long Jisas Krais, God bai kisim bek ol. Ol dispela manmeri i pilim tru dispela tok. Olsem na ol i givim dispela askim: “Bai mipela i mekim wanem?” Pita i tokim ol: “Yupela olgeta wan wan i mas kisim baptais.”—Apo. 2:37, 38.

2. Yumi bai stori long wanem samting long dispela atikol? (Lukim fran pes piksa.)

² Bihain narapela kain samting tru i kamap. Inap 3,000 manmeri i kisim baptais long dispela de, na ol i kamap ol disaipel bilong Krais. Dispela em kirap bilong bikpela wok bilong kamapim ol disaipel em Jisas i bin tokim ol disaipel bilong em long mekim. Ol disaipel bilong Jisas long nau i mekim yet dispela wok. Long nau, yumi no inap helpim wanpela long kisim baptais insait long sampela aua tasol, nogat. Sampela mun i mas lus o bihain long wanpela o tupela yia, sumatin i ken winim dispela mak. Sapos yu stadi wantaim wanpela long nau, yu bai luksave olsem yu mas wok hat tru long helpim em long kamap wanpela disaipel bilong Krais. Long dispela atikol, yumi bai stori long ol samting yu ken mekim bilong helpim Baibel sumatin bilong yu long winim mak na kisim baptais.

3. Olsem Matyu 28:19, 20 i kamapim, sumatin i mas winim wanem mak bilong kisim baptais?

³ Paslain long sumatin i kisim baptais, em i mas bihainim ol tok em i lainim long Baibel. (Ritim Matyu 28:19, 20.) Taim sumatin i bihainim ol tok em i lainim, em i olsem “man i gat savetingting” long tok piksa bilong Jisas husat i digim hul i go daun tru na em i sanapim haus bilong em antap long bikpela ston. (Mat. 7:24, 25; Luk 6:47, 48) Olsem wanem yumi ken helpim sumatin long bihainim ol tok em i lainim? Yumi ken stori long 3-pela samting yumi ken mekim.

4. Yumi ken mekim wanem bilong helpim sumatin long winim mak na kisim baptais? (Lukim tu blok “ Helpim Sumatin Long Putim Ol Mak na Winim.”)

⁴ Helpim sumatin long putim ol mak. Wai na yu mas mekim olsem? Yumi ken stori long wanpela tok piksa: Sapos yu bai raun i go long wanpela longwe ples, ating yu bai stop long sampela hap namel long rot na visitim tu ol naispela ples. Taim yu mekim olsem, bai yu no pilim olsem rot i longpela tumas. Olsem tasol, taim sumatin i putim ol liklik mak na em i winim ol dispela mak, em bai luksave olsem em inap winim mak bilong kisim baptais. Long buk Stap Amamas Oltaim!, yusim dispela hap “Mak Yu Laik Winim” bilong helpim sumatin long putim ol mak. Long pinis bilong olgeta wan wan lesen, stori wantaim sumatin long olsem wanem mak em i putim inap helpim em long bihainim ol tok em i lainim. Sapos yu laik bai sumatin i putim narapela mak, orait raitim long dispela hap “Narapela.” Oltaim yusim dispela hap bilong stadi long mekim riviu wantaim sumatin long ol liklik mak em i laik winim na ol bikpela mak em i laik winim.

5. Olsem Mak 10:17-22 i kamapim, Jisas i tokim wanpela maniman long mekim wanem, na bilong wanem?

⁵ Helpim sumatin long mekim ol senis long  laip bilong em. (Ritim Mak 10:17-22.) Jisas i save tru olsem em bai hatwok tru long maniman long salim olgeta kago bilong em. (Mak 10:23) Tasol Jisas i tokim wanpela maniman long mekim dispela bikpela senis long laip bilong em. Wai? Bikos Jisas i laikim em. Sampela taim yumi inap pasim sumatin long bihainim wanpela tok em i lainim bikos yumi pilim olsem em i no redi long mekim dispela senis. Ating sampela haptaim i mas lus long ol man i ken lusim ol olpela pasin bilong ol na kisim nupela pasin. (Kol. 3:9, 10) Tasol taim yu hariap long stori wantaim sumatin long ol senis em i mas mekim, em bai hariap long mekim ol dispela senis. Taim yu stori wantaim sumatin long dispela samting, yu soim em olsem yu tingim em.—Sng. 141:5; Prov. 27:17.

6. Wai na yumi mas askim sumatin long kamapim tingting bilong em?

⁶ Em i bikpela samting long askim sumatin long kamapim tingting bilong em long ol tok em i lainim. Dispela bai helpim yu long save long ol samting em sumatin i kliagut na i bilip long en. Sapos yu save mekim olsem oltaim, orait bihain em bai isi moa long yu stori wantaim em long ol samting em i pilim hatwok long bilip long en. Buk Stap Amamas Oltaim! i gat planti askim bilong kirapim sumatin long kamapim tingting bilong em. Olsem, lesen 4 i gat dispela askim: “Yu ting Jehova i pilim olsem wanem taim yu kolim nem bilong em?” Lesen 9 i gat dispela askim: “Wanem sampela samting yu laik beten long en?” Pastaim, ating sumatin i mas lain long hau em bai bekim ol dispela askim. Yu ken helpim em long rot bilong trenim em long wokim tingting long ol skripsa na ol piksa i stap long buk.

7. Olsem wanem yumi ken yusim ekspiriens bilong ol narapela long helpim sumatin?

⁷ Taim sumatin bilong yu i kliagut long samting em i mas mekim, orait yusim ol ekspiriens bilong ol narapela long strongim em long mekim olsem. Olsem, sapos sumatin bilong yu i save kam long ol miting wan wan taim tasol, yu ken soim em vidio Jehova i Lukautim Gut Mi i stap long seksen “Mekim Wok Painimaut” long lesen 14. Long planti lesen long buk Stap Amamas Oltaim!, yu bai painim ol kain ekspiriens olsem i stap long seksen “Kisim Sampela Save Moa” o “Mekim Wok Painimaut.” * Was gut na no ken skelim sumatin bilong yu wantaim narapela sumatin na tok, “Sapos em ken mekim, orait yu tu ken mekim.” Larim sumatin yet i skelim dispela samting. Yu ken kamapim ol bikpela poin we i bin helpim man o meri long vidio long bihainim ol tok bilong Baibel em i lainim. Ating yu ken kolim wanpela skripsa o stori long wanpela gutpela samting em i bin mekim. Na long taim i stret long mekim, tokim sumatin long hau Jehova i helpim dispela man o meri.

8. Olsem wanem yumi ken helpim sumatin long laikim Jehova?

⁸ Helpim sumatin long laikim Jehova. Hau yu ken mekim olsem? Long ol taim i stret long mekim, stori gut wantaim sumatin long ol pasin bilong Jehova. Helpim em long tingim Jehova olsem God bilong amamas na God bilong sambai long ol man i save laikim Em. (1 Tim. 1:11; Hib. 11:6) Soim sumatin olsem em bai kisim gutpela helpim taim em i bihainim ol tok em i lainim, na eksplenim long em olsem helpim em i kisim i soim pasin laikim bilong Jehova long em. (Ais. 48:17, 18) Taim sumatin i strongim  pasin bilong em long laikim Jehova, dispela bai kirapim em long mekim ol bikpela senis.—1 Jon 5:3.

9. Olsem Mak 10:29, 30 i stori long en, wanem samting i ken helpim wanpela long lusim sampela samting long kamap disaipel?

⁹ Baibel sumatin i mas lusim sampela samting na bai em i ken winim mak na kisim baptais. Olsem maniman em yumi stori pinis long em, sampela sumatin i mas lusim ol samting ol i laikim tumas. Sapos wok mani ol i mekim i no stret wantaim ol stiatok bilong Baibel, orait ol i mas mekim sampela senis. Planti i mas lusim ol poroman em ol i no laikim Jehova. Sampela narapela em ol wanfamili i lusim ol bikos ol i no laikim ol Witnes Bilong Jehova. Jisas i tok sampela man inap pilim hatwok long lusim ol dispela samting. Tasol em i tok promis olsem ol man i bihainim em, ol bai i no bel hevi. Ol bai kisim gutpela blesing long stap insait long bikpela lain famili bilong Jehova em ol i save laikim tru narapela narapela. (Ritim Mak 10:29, 30.) Olsem wanem yu ken helpim Baibel sumatin bilong yu long kisim helpim long dispela naispela presen?

10. Yu kisim wanem skul long ekspiriens bilong Manuel?

¹⁰ Kamap gutpela pren bilong sumatin. Em i bikpela samting long yu mas soim long sumatin olsem yu tingim em. Wai? Tingim tok bilong Manuel husat i stap long Meksiko. Em i tingim bek taim em i wanpela Baibel sumatin, na em i tok: “Paslain long mipela i save stadi, tisa bilong mi i save askim mi sapos mi stap orait. Em i helpim mi long rileks na mi inap stori long ol narapela samting tu. Mi pilim olsem em i tingim mi tru.”

11. Taim yumi lusim taim long stap wantaim ol sumatin, dispela inap mekim wanem long ol?

¹¹ Lusim taim long stap wantaim ol sumatin, wankain olsem Jisas i bin lusim taim long stap wantaim ol disaipel bilong em. (Jon 3:22) Sapos Baibel sumatin i mekim ol senis long laip bilong em, orait invaitim em i go long haus bilong yu long dring kofi o kaikai wantaim o watsim  brodkas program bilong wanpela mun. Ating sumatin bilong yu bai amamas tru taim yu mekim olsem, na moa yet long ol pablik holide taim em i stap wanpis. Kazibwe i stap long Yuganda, em i tok: “Mi lainim planti samting long Jehova long stadi bilong mi, na mi lainim planti samting moa taim mi lusim taim long stap wantaim tisa bilong mi. Mi lukim olsem Jehova i tingim tru lain bilong em na ol i stap amamas tru. Na mi tu mi laik stap amamas.”

12. Wai na yumi mas bringim ol narapela pablisa i go wantaim yumi long mekim Baibel stadi?

¹² Invaitim ol narapela pablisa long go wantaim yumi long mekim Baibel stadi. Sampela taim yumi inap pilim olsem em isi moa long go yumi yet o bringim seim pablisa i go wantaim yumi long mekim stadi. Tasol taim yumi bringim ol narapela narapela pablisa i go wantaim yumi, dispela bai helpim gut Baibel sumatin bilong yumi. Dmitrii i stap long Moldova na em i tok: “Olgeta wan wan pablisa husat i kam long stadi bilong mi, ol i save eksplenim ol samting long narapela narapela wei. Dispela i helpim mi long luksave long ol narapela rot mi inap bihainim ol tok mi lainim. Bikos mi bin bungim planti bratasista pinis, taim mi go long fes miting bilong mi, mi no pilim sem.”

13. Wai na yumi mas helpim sumatin long kam long ol miting?

¹³ Helpim sumatin long kam long ol miting. Wai? Bikos Jehova i tokim ol lain i lotuim em long bung wantaim; dispela em hap wok lotu bilong yumi. (Hib. 10:24, 25) Na tu, ol bratasista bilong yumi em ol famili bilong yumi long sait bilong bilip. Taim yumi stap long miting wantaim ol, i olsem yumi olgeta i stap long wanpela haus na yumi kisim ol gutpela kaikai wantaim. Taim yu helpim Baibel sumatin long kam long ol miting, yu helpim em long winim wanpela bikpela mak bilong kisim baptais. Tasol em inap pilim hatwok tru long kam long ol miting. Olsem wanem buk Stap Amamas Oltaim! inap helpim sumatin bilong yu long winim ol hevi we i pasim em long kam long ol miting?

14. Olsem wanem yumi inap kirapim sumatin long kam long ol miting?

¹⁴ Yusim lesen 10 bilong buk Stap Amamas Oltaim! long kirapim sumatin bilong yu long kam long ol miting. Sampela pablisa i gat ekspiriens i bin mekim traim long dispela lesen paslain long buk i rilis, na ol i tok dispela lesen i mekim gutpela wok long kirapim ol sumatin bilong ol long kam long miting. Tasol yu no ken wet inap long yupela i stadi long lesen 10 bilong invaitim Baibel sumatin i kam long miting, nogat. Hariap long invaitim em na mekim olsem oltaim. Ol Baibel sumatin i gat ol narapela narapela hevi. So luksave long ol samting sumatin bilong yu i nidim helpim long en, na mekim ol samting bilong helpim em. Ating sampela haptaim bai lus paslain long em i kam long miting, tasol no ken bel hevi long dispela. Wok strong yet na no ken les kwik.

15. Sumatin bilong yumi inap pret long wanem ol samting?

¹⁵ Yu inap tingim long bipo olsem yu bin pret long kamap wanpela Witnes Bilong Jehova? Ating yu bin pilim olsem yu no inap autim tok long haus bilong ol man o autim tok long rot. O ating yu bin pret olsem ol famili na ol pren inap birua long yu. Sapos olsem, orait yu ken pilim hevi bilong Baibel sumatin bilong yu. Jisas i tok yumi inap pret long ol kain samting olsem. Tasol em i strongim ol disaipel long no ken larim pasin bilong pret i stopim ol long mekim wok bilong Jehova. (Mat. 10:16, 17, 27, 28) Olsem wanem Jisas i helpim ol disaipel bilong em long daunim pasin bilong pret? Na olsem wanem yu inap bihainim eksampel bilong em?

16. Olsem wanem yumi inap trenim ol sumatin long autim bilip bilong ol?

¹⁶ Isi isi trenim sumatin long autim bilip bilong  em. Ating ol disaipel bilong Jisas i pret taim em i salim ol long i go autim tok. Tasol Jisas i helpim ol taim em i tokim ol long husat lain ol bai autim tok long ol na wanem tok ol bai autim. (Mat. 10:5-7) Olsem wanem yu ken bihainim pasin bilong Jisas? Helpim sumatin long luksave long husat lain em i ken autim tok long ol. Yu ken askim em sapos em i save long wanpela husat inap kisim helpim long wanpela tok i tru bilong Baibel. Bihain helpim em long redim tok em bai mekim na soim em long wanpela simpol wei long kirapim tok. Long taim stret, yu ken mekim prektis long dispela hap “Sampela Man i Tok” na “Sapos Wanpela i Askim,” i stap long buk Stap Amamas Oltaim! Taim yu mekim olsem, yu trenim sumatin long yusim Baibel long givim ol bekim we i isi na i kam stret long Baibel.

17. Olsem wanem yumi ken yusim Matyu 10:19, 20, 29-31 long helpim sumatin long trastim Jehova?

¹⁷ Helpim sumatin long trastim Jehova. Jisas i tokim ol disaipel olsem Jehova bai helpim ol bikos Em i laikim ol. (Ritim Matyu 10:19, 20, 29-31.) Kirapim sumatin long tingim olsem Jehova bai helpim em tu. Yu ken helpim em long trastim Jehova taim yu beten wantaim sumatin long ol mak em i laik winim. Franciszek i stap long Polan na em i tok: “Planti taim tisa bilong mi i save kolim long beten bilong em ol mak mi laik winim. Taim mi lukim olsem Jehova i bekim ol beten bilong em, mi tu i stat long beten. Mi pilim tru olsem Jehova i helpim mi taim mi askim bos long kisim ol de-of long nupela wok bilong mi bilong go long ol miting na kibung.”

18. Jehova i pilim olsem wanem long wok tisa em ol Kristen i mekim?

¹⁸ Jehova i save tingim tru ol Baibel sumatin bilong yumi. Em i pilim tru gutpela wok tisa em ol Kristen i mekim bilong helpim ol manmeri long i go klostu long em, na em i laikim ol long dispela pasin bilong ol. (Ais. 52:7) Maski sapos yu no gat wanpela Baibel stadi long nau, yu ken helpim ol Baibel sumatin long winim mak na kisim baptais taim yu go wantaim ol narapela pablisa long mekim ol Baibel stadi bilong ol.