1. I yini leswi xitshungu xi nga byeliwa swaku xi swi yentxa?

SIKU lin’wana a ku ni xitshungu xa xikulu, lani a ku ni vavasati ni vavanuna lava a va vulavula tirimi ta ku hambana na va ya Jerusalema. Kambe ku ni nchumu xa ku hlamalisa lexi nga yentxeka hi siku lelo. Vayuda van’wana va sungule ku vulavula tirimi ta ku hambana leti a ti twisisiwa hi vanhu lava a va li xikarhi ka xitshungu xolexo! Kambe lexi nga hlamalisa hintamu, hi leswi Vayuda volavo va nga swi vula ni leswi mupostolo Pedru a nga swi vula, loko a byela vanhu va xitshungu xolexo swaku a va ta ponisiwa ntsena loko va va ni lipfumelo ka Yesu Kreste. Leswi va nga swi twa swi va khumbe mbilu. Swi va yentxe va tivutisa leswi: “Hi fanele hi yentxa yini ke?” Mupostolo Pedru a game a va hlamula a ku: Mi fanele “mi tsakamisiwa.” — Mint. 2:37, 38.

2. I yini leswi hi nga ta djondza hi swona ka nhlokomhaka leyi? (Vona mufoto ka pajina la ku sungula.)

² Leswi swi nga gama swi humelela swi hlamalise hintamu. Hi siku leliyani ku tsakamisiwe kolomu ka 3.000 wa vanhu va va vadjondzisiwa va Kreste. Lawa a ko va masungulu ya ntirho lowu Yesu a nga wu nyika vadjondzisiwa va yena swaku va wu yentxa. Ni namuntlha ntirho lowu wa ha yentxiwa. Swoswi a swi koteki ku pfuna munhu hi mawora ya matsongo lakakuva a lunghekela ku tsakamisiwa kola na kola. Kambe swi teka tiwheti, malembe kumbe ku tlula leswaku lweyi hi djondzaka na yena Bibele a tsakamisiwa. Loko ku ni munhu lweyi u djondzaka na yena Bibele, u swi tiva kahle swaku swi lava u tirha hintamu leswaku u mu pfuna swaku a va mudjondzisiwa wa Kreste. Ka nhlokomhaka leyi hi ta djondza swaku hi nga va pfunisa ku yini lava hi djondzaka na vona Bibele leswaku va tsakamisiwa.

3. Hi ku ya hi Matewu 28:19, 20, i yini leswi lweyi a djondzeliwaka Bibele a faneleke a swi yentxa swaku a tsakamisiwa?

³ Lweyi a djondzeliwaka Bibele, na a nga se tsakamisiwa a fanele a hanya hi leswi Bibele li swi djondzisaka. (Lerha Matewu 28:19, 20.) Loko lweyi a djondzeliwaka Bibele a hanya hi leswi a swi djondzaka, a ta fana ni “wanuna wa ku tlhariha” lweyi Yesu a nga vula swaku a yake yindlo henhla ka ribye. (Mat. 7:24, 25; Luk. 6:47, 48) A hi voneni tindlela tinharhu leti hi nga ti tirhisaka swaku hi pfuna lava djondzeliwaka Bibele akuva va tirhisa leswi va swi djondzaka.

4. Hi nga mu pfunisa ku yini lweyi hi djondzaka na yena Bibele swaku a lwela ku tsakamisiwa? (Vona kwadru leli nge: “ Pfuna Lweyi U Djondzaka Na Yena Swaku A Fikelela Leswi A Swi Lavaka.”)

⁴ Pfuna lweyi u djondzaka na yena Bibele swaku a fikelela leswi a swi lavaka. Hi mhaka muni u fanele u yentxa leswo? Pimisa hi xikombiso lexi: A hi nge u ta yendza u ya ka ndhawu leyi nga kule. Loko u li ku yendzeni swi nga yentxeka u navela ku nyima ndleleni u vona tindhawu ta ku saseka leti nga kona. Leswo swi ta ku pfuna ku kala u nga karhali naswona swi nga tikombi ingi u ta hlwela hintamu ku fika lomu u yaka kona. Hi ku fanana, i swinene swaku lweyi u djondzaka na yena Bibele a va ni swilo leswi a nga ta swi fikelela ka liyendzo la yena la ku ya ku tsakamisiweni. Leswo swi ta mu yentxa a swi vona swaku swi nga koteka ku va a tsakamisiwa. Leswaku u pfuna lweyi u djondzaka na yena Bibele swaku a kulisa wunghanu la yena hi Yehovha tirhisa a buku leli nge: Tikhorisi Hi Wutomi La Ku Kala Li Nga Heli ka ndhawu leyi nge: “Ni lava ku yentxa leswi”. Loko mi heta a djondzo yin’wana ni yin’wana, pfuna lweyi u djondzaka na yena swaku a vona swaku leswi a lavaka ku swi yentxa swi twananisa ku yini ni leswi ma ha ku swi djondzaka. Loko u pimisa hi minchumu yin’wana leyi a wu navela swaku lweyi u djondzaka na yena a yi fikelela mi nga ha bula xikan’we swaku a yi tsala ka ndhawu leyi nge: “Swin’wana.” Minkama hinkwayu tirhisa ndhawu leyi, leswaku u bulisana ni lweyi u djondzaka na yena Bibele hi leswi a lavaka ku swi fikelela ka nkama lowu taka.

5. Hi ku ya hi Marku 10:17-22, i mpsini leswi Yesu a nga byela wanuna wa ku ganya swaku a swi yentxa, naswona hi mhaka muni?

 ⁵ Pfuna lweyi u djondzaka na yena Bibele swaku a txintxa mahanyelo ya yena. (Lerha Marku 10:17-22.) Yesu a a swi tiva swaku a swi ta mu karhatela wanuna wa ku ganya swaku a xavisa swilo swa yena. (Marku 10:23) Hambileswo, Yesu a mu byele swaku a fanele a xavisa minchumu ya yena hinkwayu. Hi mhaka muni? Hi mhaka Yesu a a mu rhandza. Minkama yin’wana hi tshuka hi nga mu byeli lweyi hi djondzaka na yena Bibele swaku a txintxa mahanyelo ya yena, hi ku pimisa swaku a nga se swi lunghekela ku txintxa mahanyelo ya yena. I ntiyiso swaku swi nga ha teka nkama swaku munhu a txintxa mahanyelo ya yena. (Kol. 3:9, 10) Kambe loko hi hantla hi mu byela lweyi hi djondzaka na yena Bibele lisima la ku txintxa mahanyelo ya yena, a nga ta hlwela ku txintxa. Phela loko u bula ni lweyi u djondzaka na yena Bibile hi ku txintxa loku a faneleke a ku yentxa ka wutomi la yena, u ta va u mu komba swaku wa mu rhandza. — Pis. 141:5; Swi. 27:17.

6. Hi mhaka muni hi fanele hi va yentxa swivutiso lava hi djondzaka na vona?

⁶ Tirhisa swivutiso hi ndlela ya yinene swaku u kota ku tiva leswi lweyi u djondzaka na yena Bibele a swi twisisaka ni leswi a swi kholwaka. Loko u yentxa leswo u ta tiva leswi a swi pimisaka hi mhaka leyi mu djondzaka hi yona naswona swi ta ku pfuna ku bula na yena ka nkama lowu taka hi timhaka leti nga mu karhatelaka ku ti kholwa. Buku le li nge: Tikhorisi Hi Wutomi La Ku Kala Li Nga Heli li ni swivutiso swa swinyingi leswi nga ta ku pfuna ku tiva leswi a swi pimisaka. Hi xikombiso, ka djondzo 04 ya buku leyi ku ni xivutiso lexi nge: “U pimisa swaku Yehovha a titwisa ku yini loko u tirhisa vito la yena?” Naswona ka djondzo 09 ku ni xivutiso lexi nge: “U navela ku khongelela yini?” Ka masiku ya ku sungula swi nga yentxeka lweyi u djondzaka na yena swi mu karhatela ku hlamula swivutiso swa ku fana ni leswi. Kambe, u nga mu pfuna kuva a pimisa hi tindzimana ni mafoto lawa ma kombisiwaka ka djondzo leyi mi nga ka yona.

7. Hi nga swi tirhisisa ku yini swikombiso swa leswi nga humelela vanhu van’wana swaku hi pfuna lweyi hi djondzaka na yena?

⁷ Loko lweyi u djondzaka na yena Bibele se a swi twisisa leswi a faneleke a swi txintxa ka mahanyelo ya yena, tirhisa swikombiso swa leswi nga humelela vanhu van’wana leswaku swi mu pfuna ku txintxa mahanyelo ya yena. Hi xikombiso, loko lweyi u djondzaka na yena Bibele swi mu karhatela ku ya mintlhanganwini, u nga ha mu komba vhidiyo leli nge: Yehovha A Ni Hlayisile Minkama Hinkwayu, leli kumekaka lani ku nge: “Loko U Lava Ku Tiva Swin’wana” ka djondzo 14. Ka buku leli nge: Tikhorisi Hi Wutomi La Ku Kala Li Nga Heli ku ni swikombiso leswi kombisaka leswi nga humelela vanhu leswi kumekaka lani ku nge: “Djondza Swin’wana” kumbe lani ku nge: “Loko U Lava Ku tiva Swin’wana.” * Tivoneli swaku u nga fananisi lweyi u djondzaka na yena Bibele ni vanhu van’wana hi ku vula leswi: “Loko lweyi a swi kotile ku txintxa wutomi la yena, na wena u nga swi kota.” Handle ka ku yentxa leswo, tshika lweyi u djondzaka na yena Bibele a swi vona swaku na yena a nga swi kota ku txintxa. Xa lisima lexi u nga xi yentxeka i ku pfuna lweyi u djondzaka na yena Bibele kuva a tivonela hi yexe swaku i yini lexi nga pfuna lweyi a nga mu vona ka vhidiyo swaku a txintxa mahanyelo ya yena. Loko swi koteka, mu tlhamusele swaku i yini lexi nga pfuna lweyi a nga mu vona ka vhidiyo, ndzimana leyi nga mu pfuna, ni leswi Yehovha a nga mu pfunisa xiswona swaku a txintxa mahanyelo.

8. Hi nga mu pfunisa ku yini lweyi hi djondzaka na yena Bibele swaku a rhandza Yehovha?

⁸ Pfuna lweyi u djondzaka na yena Bibele swaku a rhandza Yehovha. U nga swi yentxisa ku yini leswo? Minkama hinkwayu loko mu djondza zama ku yentxa lweyi u djondzaka na yena a vona wumunhu  la Yehovha. Mu pfuni a vona swaku Yehovha i Xikwembu lexi tsakeke naswona minkama hinkwayu a tinyimisele ku pfuna lava mu rhandzaka. (1 Tim. 1:11; Heb. 11:6) Komba lweyi u djondzaka na yena Bibele swaku loko a tirhisa leswi a swi djondzaka ka Bibele a ta va ni wutomi la linene, naswona leswo swi ta mu komba swaku Yehovha wa mu rhandza. (Esa. 48:17, 18) Loko lweyi u djondzaka na yena Bibele a ya a rhandza Yehovha swi ta mu vevukela ku txintxa wutomi la yena. — 1 Yoh. 5:3.

9. Hi ku ya hi Marku 10:29, 30, i yini leswi nga pfunaka munhu swaku a tikarhatela ku txintxa mahanyelo ya yena a tlhela a tsakamisiwa?

⁹ Leswaku lweyi u djondzaka na yena Bibele a tsakamisiwa, a fanele a tikarhata hintamu. Ku fana ni wanuna wa ku ganya lweyi Yesu a nga vulavula hi yena, vanhu van’wana lava hi djondzaka na vona va fanele va tshika swilo leswi va swi rhandzaka. Hi xikombiso, swi nga ha lava va txintxa ntirho wa vona loko ku li swaku a wu fambisani ni leswi Bibele li swi vulaka. Van’wana swi nga ha lava va tshika vanghanu lava kalaka va nga mu tirheli Yehovha. Kasi van’wana va nga ha tsukuliwa hi maxaka ya vona hi leswi ma kalaka ma nga ti rhandzi Timboni ta Yehovha. Yesu a vule swaku ka van’wana a swi nga ta va vevukela ku yentxa swilo leswi hinkwaswu. Kambe a tshembise swaku lava a va tinyimisele ku mu landzela a a nga ta va danisa ni swaku Yehovha a ta va nyika ndjangu wa vamakwerhu lava nga ni lirhandzu va misava hinkwayu. (Lerha Marku 10:29, 30.) Se wena u nga mu pfunisa ku yini lweyi u djondzaka na yena Bibele swaku a kuma nkateko lowu?

10. U djondze yini ka xikombiso xa makwerhu Manuel?

¹⁰ Vana munghanu wa lweyi u djondzaka na yena Bibele. Hi mhaka muni swi li swa lisima ku komba lweyi u djondzaka na yena Bibele swaku u ni mhaka na yena? Vona leswi makwerhu Manuel lweyi a tshamaka aMéxico a nga swi vula. Loko a khumbuka leswi nga mu yentxekela nkama na a djondzeliwa Bibele, makwerhu Manuel a vula leswi: “Na hi nge se sungula ku djondza, lweyi a a ni djondzela Bibele a a ni vutisa swaku ni kahle. A a ni yentxa ni titwa na ni chunsekile ku vulavula na yena hi mhaka yin’wana ni yin’wana, a ni swi vona swaku hikakunene wa ni rhandza.”

11. Hi mhaka muni swi li swa lisima ku heta nkama na hi ni lweyi hi djondzaka na yena Bibele?

 ¹¹ Minkama hinkwayu Yesu a a tinyika nkama wa ku va ni vadjondzisiwa va yena, se na wena yentxa leswi fanaka ni lweyi u djondzaka na yena. (Yoh. 3:22) Loko swi tikomba swaku lweyi u djondzaka na yena Bibele a ni wunghanu la linene na Yehovha, swi ngo yini u mu rhamba mu ta dla xikan’we kumbe mu sixtira xikan’we a JW Broadcasting? Phela leswo swi nga mu pfuna hintamu lweyi u djondzaka na yena, ngopfungopfu loko u mu rhamba hi siku leli nga feriyadu hikusa swi nga yentxeka a titwa na a li yexe. Kazibwe lweyi a tshamaka Uganda a li: “Ku djondza Bibele swi ni pfunile ku rhandza Yehovha, kambe xin’wana lexi nga ni pfuna hintamu i ku heta nkama ni lweyi a a ni djondzela Bibele. Ni swi vonile swaku Yehovha a ni mhaka ni vanhu va yena naswona va tshama na va tsakile. Phela na mina a ni lava ku fana na vona.”

12. Hi mhaka muni hi fanele hi famba ni vamakwerhu va ku hambana ka lweyi hi djondzaka na yena Bibele?

¹² Rhamba vamakwerhu van’wana ka swidjondzo swa wena. Minkama yin’wana swi nga ha tikomba swi ku vevukela ku famba wexe u ya djondza ni munhu Bibele kumbe u tshamela ku famba ni makwerhu yelweyi wa mun’we ka xidjondzo xa wena. Hambileswi ku yentxa leswo swi nga ha ku vevukelaka, kambe ku famba ni vamakwerhu va ku hambana ka lweyi u djondzaka na yena swi nga mu pfuna. “Dmitrii lweyi a tshamaka Moldávia a li: “Vachumayeli lava a va ta ni lweyi a a ni djondzela Bibele a va tlhamusela mhaka hi ndlela ya ku hambana, ya ku a ni nge se tshama ni yi pimisa. Leswo a swi ni pfuna ku va ni ya ni swi twisisa ku yampsa leswi a va ni djondzisa swona, naswona nkama lowu ni nga sungula ku ya mintlhanganwini ni titwe na ni li kaya hikusa se a ni tiva vamakwerhu va vanyingi.”

13. Hi mhaka muni hi fanele hi pfuna lweyi hi djondzaka na yena Bibele swaku a ya mintlhanganwini?

¹³ Pfuna lweyi u djondzaka na yena swaku a ya mintlhanganwini. Leswo i swa lisima hikusa Yehovha a lava swaku vanhu va yena va tlhangana xikan’we swaku va mu gandzela. (Heb. 10:24, 25) Handle ka leswo hi nga vula swaku vamakwerhu va hina i ndjangu wa hina, se loko hi li na vona mintlhanganwini swi fana ni loko hi dla swakudla swa ku nandziha na vona. Ku pfuna lweyi u djondzaka na yena Bibele leswaku a ya mintlhanganwini i swa lisima hikusa i yin’we ya tindlela leti nga ta mu pfuna swaku a tsakamisiwa. Se loko ku li swaku swa mu karhatela lweyi u djondzaka na yena swaku a ya mintlhanganwini, buku leli nge Tikhorisi Hi Wutomi La Ku Kala Li Nga Heli li nga mu pfunisa ku yini?

14. Hi nga mu pfunisa ku yini lweyi hi djondzaka na yena swaku a tama a ya mintlhanganwini?

¹⁴ Tirhisa djondzo 10 ya buku leli nge Tikhorisi Hi Wutomi La Ku Kala Li Nga Heli leswaku u pfuna lweyi u djondzaka na yena Bibele. Na buku leli li nge se humesiwa, ku rhambiwe vamakwerhu leswaku va li kambela ka djondzo 10. Vamakwerhu lavo va vule swaku djondzo leyi, yi pfune lava djondzaka na vona Bibele swaku va sungula ku ya mintlhanganwini. Kambe leswo, a swi vuli swona swaku u fanele u nyimela ku fika ka djondzo 10 leswaku u rhamba lweyi u djondzaka na yena swaku a ya mintlhanganwini. Tekela ku mu rhamba swaku a ya mintlhanganwini naswona swi yentxi nkama ni nkama. Mun’wana ni mun’wana lweyi hi mu djondzelaka Bibele a ni swikarhatu swa yena. Hi mhaka leyo, i swa lisima ku pimisa hi leswi hi nga mu pfunisaka xiswona lweyi hi djondzaka na yena. Hambiloko a nga tekeli ku ya mintlhanganwini loko u mu rhamba, u nga godoli. Mu lehiseli mbilu u tama u mu rhamba.

15. I yini lexi nga ha yentxaka lweyi u djondzaka na yena Bibele a chava?

¹⁵ Ku sunguleni a wu chava ku va Mboni ya Yehovha? Swi nga yentxeka u pimise swaku a wu nge te swi kota ku chumayela vanhu van’wana. Kumbe swi nga yentxeka a wu chava swaku vanghanu va wena kumbe ndjangu wa wena a wu nga ta nyima na wena. Loko ku li leswaku leswo swi ku yentxekelile,  u ta swi twisisa kahle swikarhatu swa lweyi u djondzaka na yena. Hambi Yesu a vule swaku van’wana a va ta chava kuva valandzeli va yena. Kambe, a va pfunile hi ku va byela swaku a va nga fanelanga va pfumelela ku chava ku va yentxa va tshika ku gandzela Yehovha. (Mat. 10:16, 17, 27, 28) I yini leswi Yesu a nga swi yentxa swaku a pfuna valandzeli va yena swaku va nga chavi? Wena ke, u nga mu tekelelisa ku yini Yesu ka leswi a nga swi yentxa?

16. Hi nga mu pfunisa ku yini lweyi hi djondzaka na yena Bibele leswaku a chumayela vanhu van’wana?

¹⁶ Pfuna lweyi u djondzaka na yena Bibele swaku a byela van’wana hi leswi a swi djondzaka. Swi nga yentxeka vadjondzisiwa va Yesu va chave hintamu loko a va rhuma swaku va ya chumayela. Kambe Yesu a va pfunisi ku yini swaku va nga chavi? A byele vadjondzisiwa va yena lomu a va fanele va ya chumayela kona ni leswi a va ta swi vula. (Mat. 10:5-7) Se wena u nga mu tekelelisa ku yini Yesu? Pfuna lweyi u djondzaka na yena Bibele a tiva lomu a nga chumayelaka kona. Hi xikombiso, u nga ha mu vutisa swaku a nga va a tiva munhu lweyi a nga tsakelaka mahungu ya ku tsakisa. U gama u mu pfuna a tiva leswi a nga mu chumayelisaka xiswona munhu yelweyo. Leswaku u mu pfuna u nga ha tirhisa buku leli nge: Tikhorisi Hi Wutomi La Ku Kala Li Nga Heli ka ndhawu leyi nge: “Leswi vanhu van’wana va swi vulaka” ni lani ku nge: “Vanhu van’wana va nga ha ku vutisa swaku.” Tlhela u pfuna lweyi u djondzaka na yena swaku a tirhisa Bibele kuva a hlamula swivutiso hi ndlela ya lirhandzu ni leyi twisisekaka.

17. Hi nga li tirhisisa ku yini buku la Matewu 10:19, 20, 29-31 leswaku hi pfuna lweyi hi djondzaka na yena Bibele akuva a tshemba Yehovha?

¹⁷ Pfuna lweyi u djondzaka na yena Bibele swaku a tshemba Yehovha. Yesu a tiyisekise valandzeli va yena swaku Yehovha wa va rhandza, funtshi a tinyimisele ku va pfuna. (Lerha Matewu 10:19, 20, 29-31.) Khumbuxa lweyi u djondzaka na yena Bibele swaku Yehovha a ta mu pfuna. Ndlela yin’wana ya ku pfuna lweyi u djondzaka na yena swaku a tshemba Yehovha i ku khongela na yena hi leswi a lavaka ku swi fikelela. Francisco lweyi a tshamaka Polônia a li: “Minkama hinkwayu lweyi a a ni djondzela Bibele loko a khongela a a vulavula hi leswi ni lavaka ku swi fikelela. Loko ni vone swaku Yehovha wa swi hlamula swikhongelo swa lweyi ni djondzaka na yena Bibele, na mina ni sungule ku khongela. Ni swi vonile swaku Yehovha a ni pfunile nkama ni nga lava ntirho wa nyuwani ni leswi ni nga kombela masikunyana akuva ni lovha ntirhweni leswaku ni ya mintlhanganwini ni kongresu.”

18. Yehovha a wu vonisa ku yini ntirho lowu yentxiwaka hi lava djondzisaka van’wana Bibele?

¹⁸ Yehovha a va rhandza hintamu lava hi djondzaka na vona Bibele. A tlhela a rhandza ni lava djondzisaka van’wana Bibele, hikusa wa yi tiva minzamu leyi va yi yentxeka leswaku va djondzisa van’wana ntiyiso. (Esa. 52:7) Swi nga yentxeka swoswi u nga na xidjondzo xa Bibele. Loko ku li leswo, zama ku famba ni vamakwerhu van’wana ka swidjondzo swa vona swa Bibele. Loko u yentxa leswo u ta va u pfunisa swaku swidjondzo swa vona swi tsakamisiwa.