1. Kʼalal la sjakʼik kʼusi skʼan spasik li epal krixchanoetike, ¿kʼusi albatik?

KʼOT epal krixchanoetik li ta Jerusalene, jelajtik slumalik xchiʼuk skʼopik. Oy kʼusi toj labal sba kʼot ta pasel li vaʼ kʼakʼale: jlom judaetike lik kʼopojikuk ta skʼopik li krixchanoetik taje. Pe li kʼusi mas toj labal sbae jaʼ li kʼusi laj yalik li judaetike xchiʼuk li kʼusi albatik yuʼun li jtakbol Pedroe. Jtos li kʼusi laj yalbe smelolale jaʼ ti xuʼ xkolik mi chakʼ xchʼunel yoʼontonik ta stojolal li Jesukristoe. Kʼot ta yoʼontonik li kʼusi albatike, jaʼ yuʼun xi la sjakʼbeike: «¿Kʼusi skʼan jpaskutik?». Xi takʼbatik yuʼun li Pedroe: «Ichʼik voʼ ta jujuntal» (Ech. 2:37, 38).

2. ¿Kʼusi chkalbetik skʼoplal li ta xchanobil liʼe? (Kʼelo li lokʼol ta pajina 1).

² Toj yan sba yutsil li kʼusi kʼot ta pasele: te van oxmil krixchanoetik laj yichʼik voʼ, vaʼun kʼotik ta yajtsʼaklom Kristo. Li vaʼ orae, jaʼ te lik-o talel li abtelal laj yal komel Jesus ti xichʼ pasel ta yajtsʼaklom li krixchanoetike xchiʼuk jech-o yakal chichʼ pasel li avie. Pe mu aniluk xuʼ xkʼot ta yajtsʼaklom Kristo li krixchanoetike, yuʼun skʼan xichʼik koltael jayibuk u, jun jabil o mas. Li buchʼu chakʼik estudioe snaʼojik ti skʼan akʼel persa sventa xichʼ voʼ li estudianteetike. Li ta xchanobil liʼe, ta jkʼeltik kʼusitik xuʼ jpastik sventa jkoltatik li kaj-estudiotik yoʼ xichʼik voʼe.

3. Jech kʼuchaʼal chal Mateo 28:19 xchiʼuk 20, ¿kʼusi skʼan spas li kaj-estudiotik sventa xichʼ voʼe?

³ Kʼalal skʼan to xichʼ voʼ li kaj-estudiotike, skʼan xkuxlebin li kʼusi chal Vivliae (kʼelo Mateo 28:19, 20). Mi jech la spase, xkoʼolaj «kʼuchaʼal jun pʼijil vinik» ti laj yalbe skʼoplal Jesus ti la svaʼan sna ta sba tone xchiʼuk ti nat la sjom  yalel sventa spasbe lek snaklebe (Mat. 7:24, 25; Luk. 6:47, 48). Jkʼeltik batel oxtos kʼuxi xuʼ jkoltatik li kaj-estudiotik yoʼ xkuxlebin li kʼusi chchane.

4. ¿Kʼuxi xuʼ jkoltatik li kaj-estudiotik yoʼ xchʼi ta mantale? (Kʼelo xtok li rekuadro « Koltao yoʼ oyuk kʼusi xakʼ ta yoʼonton stael ta mantal»).

⁴ Jkoltatik yoʼ oyuk kʼusi sta ta mantal. ¿Kʼu yuʼun toj tsots skʼoplal? Kalbetik junuk skʼelobil. Sventa mu xijlubutik batel k’alal oy bu nom chijbat ta karroe, xuʼ van skʼan xijpajilan ti bu alakʼ sba chkiltike. Jaʼ jech skʼan spas li kaj-estudiotik eke, skʼan spas li kʼusitik spas yuʼun chaʼi sventa mu vokoluk chaʼi spasel li kʼusi chichʼ kʼanel sventa ichʼvoʼe. Sventa jkolta li kaj-estudiotik yoʼ xchʼiik ta mantale, xuʼ jtunestik li rekuadro «Paso liʼe» li ta livro Kʼupino akuxlejal. Mi tsuts jujun xchanobile, kalbetik smelolal kʼu yelan chkoltaat li kʼusi la xchan sventa sta li kʼusi oy ta yoʼonton ta mantale. Mi ta jkʼantik ti oyuk kʼusi yan tstae, xuʼ xichʼ tsʼibael ti bu chal: «Yan kʼusi xuʼ xapas». Mi lijkʼot xa ox tee, jchaʼkʼelbetik skʼoplal xchiʼuk kaj-estudiotik li kʼusi tskʼan noʼox tstae xchiʼuk li kʼusi tskʼan tsta ta mas jelavele.

5. Jech kʼuchaʼal chal Markos 10:17 kʼalal ta 22, ¿kʼusi laj yalbe jun jkʼulej vinik li Jesuse, xchiʼuk kʼu yuʼun?

⁵ Jkoltatik yoʼ sjel xkuxlejal (kʼelo Markos 10:17-22). Li Jesuse laj yalbe jun jkʼulej vinik ti akʼo xchon skotol li kʼusitik oy yuʼune, pe snaʼoj ti mu kʼunuk chaʼi spasel jeche (Mar. 10:23). ¿Kʼu yuʼun ti jech laj yalbee? Jaʼ ta skoj ti skʼanoje. Yikʼaluk van mu x-albej kuʼun li kaj-estudiotik ti skʼan xakʼ ta xkuxlejal li kʼusi chchan batele, jaʼ van ta skoj ti muʼyuk to chapal chkiltike. Jech onoʼox, vokol-o chkaʼitik ti oy kʼusitik ta jel ta  jkuxlejaltike (Kol. 3:9, 10). Pe mi chkalbetik noʼox li kʼusi skʼan sjel ta xkuxlejale, ta me spas noʼox batel. Kʼalal jech ta jpastike, jaʼ me jech chkakʼtik ta ilel ti oy ta koʼontontike (Sal. 141:5; Prov. 27:17).

6. ¿Kʼu yuʼun tsots skʼoplal ti jakʼbetik kʼusi tsnop li kaj-estudiotike?

⁶ Toj tsots skʼoplal ti jakʼbetik kʼusi tsnop kaj-estudiotik ta sventa li kʼusi yakal chchane, yuʼun jaʼ tskoltautik sventa jnaʼtik li kʼusi xaʼibe smelolale xchiʼuk li kʼusi xchʼunoje. Mi nopem xkaʼitik jech ta jakʼbetike, mas me kʼun chkaʼitik yalbel smelolal li kʼusi mu kʼunuk ta albel skʼoplale. Li livro Kʼupino akuxlejal yichʼoj talel ep sjakʼobiltak sventa jnaʼtik kʼusi tsnop li kaj-estudiotike. Jech kʼuchaʼal liʼe, li ta xchanobil 4 xi chal jun sjakʼobile: «¿Kʼu van yelan chaʼi sba xanaʼ Jeova kʼalal chakʼopon ta sbie?». Li ta xchanobil 9 xi chal yan sjakʼobile: «¿Kʼusi oy ta avoʼonton chaval li ta a-orasione?». Ta slikebale, xuʼ van skʼan jmalatik akʼo snopbe skʼoplal kaj-estudiotik li kʼusitik ta jakʼbetike. Jkoltatik yoʼ snopbe skʼoplal li tekstoetike xchiʼuk li lokʼoletik te talem li ta xchanobile.

7. ¿Kʼuxi chkoltaat-o kaj-estudiotik mi laj kalbetik sloʼil xkuxlejal ermanoetike?

⁷ Kʼalal mi laj xa ox yaʼibe smelolal kaj-estudiotik li kʼusi skʼan spase, jtijbetik yoʼonton yoʼ xakʼ ta xkuxlejal; xuʼ xkoltaat li sloʼil xkuxlejal ermanoetike. Jech kʼuchaʼal liʼe, mi vokol chaʼi chbat ta tsobajeletike, xuʼ xkakʼbetik yil li video Oyun ta yoʼonton li Jeovae ti te chvinaj li ta xchanobil 14 li ta rekuadro ti xi sbie: «Xuʼ to xakʼel liʼe». Jutuk mu skotoluk li xchanobiltak li ta livro Kʼupino akuxlejal chalbe skʼoplal xkuxlejal ermanoetik li ta jvokʼ mantal ti xi sbie: «Jchantik to batel mas» xchiʼuk li rekuadro «Xuʼ to xakʼel liʼe». * Mu xiuk xkalbetik li kaj-estudiotike: «Mi pas yuʼune, spas avuʼun ek». Akʼo snopbe skʼoplal stuk li kʼusi skʼan spase. Kalbetik skʼoplal kʼusi koltaat-o li buchʼu laj kiltik ta video sventa xakʼ ta xkuxlejal li kʼusi chal Vivliae, xuʼ van jaʼ koltaat jun teksto ta Vivlia o xuʼ van oy kʼusi yan la spas. Pe jaʼuk me mas kalbetik skʼoplal ti kʼu yelan koltaat yuʼun li Jeovae.

8. ¿Kʼuxi xuʼ jkoltatik li kaj-estudiotik sventa skʼan li Jeovae?

⁸ Jkoltatik yoʼ xlik skʼan li Jeovae. Jsabetik lek yorail sventa xkalbetik li slekil talelaltak Jeovae. Jkoltatik kaj-estudiotik yoʼ xakʼ venta ti xmuyubaj noʼox li Jeovae xchiʼuk ti muʼyuk chiktautik jtuktik mi jkʼanojtike (1 Tim. 1:11; Ebr. 11:6). Kakʼbetik yil kʼuxi tstabe sbalil mi laj yakʼ ta xkuxlejal li kʼusi chchane xchiʼuk jchapbetik smelolal ti jaʼ svinajeb ti kʼanbil yuʼun li Jeovae (Is. 48:17, 18). Mi skʼanoj tajek li Jeovae, mas ch-ayan ta yoʼonton tsjel xkuxlejal (1 Juan 5:3).

9. Jech kʼuchaʼal chal Markos 10:29 xchiʼuk 30, ¿kʼusi chkoltaat li jun krixchano sventa xichʼ voʼe?

⁹ Sventa xichʼ voʼ li kaj-estudiotike, skʼan oy kʼusitik spas. Junantike xuʼ van skʼan xiktaik li kʼusitik oy yuʼunike, jech kʼuchaʼal li jkʼulej vinik laj kalbetik skʼoplal ta parafo 5. Xuʼ van skʼan xikta yabtelik ta skoj ti chal Vivlia ti muʼyuk leke. Yikʼaluk van oy buchʼutik skʼan xikta yamigoik ti muʼyuk skʼanojik li Jeovae.  Yantik xtoke chichʼik van pʼajel yuʼun yutsʼ yalalik ta skoj ti skontrainojik li stestigotak Jeovae. Li Jesuse laj onoʼox yal ti oy junantik vokol chaʼiik spasel taje. Pe laj yal xtok ti Jeovae chakʼbe yutsʼ yalal ta mantal li yajchankʼoptake (kʼelo Markos 10:29, 30). ¿Kʼuxi xuʼ jkolta kaj-estudiotik sventa skʼupin li matanal taje?

10. ¿Kʼusi chakʼ jchantik li kʼusi laj yal Manuele?

¹⁰ Kamigointik. Skʼan xkakʼbetik yil kaj-estudiotik ti oy ta koʼontontike. ¿Kʼu yuʼun? Kʼalal chichʼ toʼox estudio li ermano Manuel ti te nakal ta Mexicoe, xi chale: «Kʼalal skʼan toʼox xlik j-estudioe, li ermanoe tsjakʼbun kʼu xi-elan. Taje jaʼ la skoltaun sventa junuk noʼox koʼonton xchiʼuk ti xkalbe skotol li kʼusitik ta jpase. Te laj kakʼ venta ti oyun ta yoʼonton ta melele».

11. ¿Kʼu yuʼun lek ti oyuk kʼusi jmoj jpastik xchiʼuk li kaj-estudiotike?

¹¹ Oyuk kʼusi jmoj jpastik xchiʼuk li kaj-estudiotike, jech kʼuchaʼal la spas Jesus xchiʼuk li yajchankʼoptake (Juan 3:22). Mi oy xa kʼusitik yakal tsjel ta xkuxlejal xchiʼuk mi xuʼ chkiltike, xuʼ jtaktik ta ikʼel ta jnatik sventa jmoj xkuchʼtik kafe, jmoj xijveʼ o xuʼ jmoj jkʼeltik li programa ta JW Broadcasting ti chlokʼ jujun ue. Mas to van tstoj ta vokol mi jaʼo ta jtaktik ta ikʼel kʼalal jaʼo tspas skʼinik li yan krixchanoetike, yuʼun xuʼ van jaʼo stuk chaʼi sba. Xi chal Kazibwe ti te nakal ta Ugandae: «Maʼuk noʼox la jchan ta stojolal Jeova kʼalal la jchan Vivliae, yuʼun oy kʼusitik la jchan xtok kʼalal oy kʼusi jmoj la jpaskutik xchiʼuk li buchʼu la xchanubtasune. Te laj kakʼ venta ti oy ta yoʼonton yajtuneltak li Jeovae xchiʼuk ti xmuyubajik noʼoxe. Taje jaʼ li kʼusi ta jkʼan ta jkuxlejale».

12. ¿Kʼu yuʼun lek ti jelajtik buchʼu xkikʼtik batel kʼalal chkakʼtik estudioe?

¹² Jelajtik buchʼu xkikʼtik batel kʼalal chkakʼtik estudioe. Bateltike, xuʼ van mas  kʼun chkaʼitik kʼalal jtuk chijbat ta akʼ estudioe o kʼalal jun noʼox jchiʼiltik-oe. Bakʼintike lek onoʼox taje, pe tstabe sbalil kaj-estudiotik mi jelajtik buchʼu chbat xchiʼinutike. Xi chal Dimitri ti te nakal ta Moldaviae: «Li buchʼutik chkʼot chchiʼinik li buchʼu laj yakʼbun estudioe jelajtik kʼu yelan chchapbeik smelolal li kʼusi chal Vivliae. Jaʼ jech laj kakʼ venta butik yan xuʼ xkakʼ ta jkuxlejal li kʼusi yakal ta jchane. Jech xtok, muʼyuk xa mas likʼexav kʼalal libat ta tsobajel ta sba veltae, yuʼun xkojtikin xa ox ep ermanoetik».

13. ¿Kʼu yuʼun skʼan jkolta kaj-estudiotik yoʼ xbat li ta tsobajeletike?

¹³ Jkoltatik yoʼ xbat ta tsobajeletik. ¿Kʼu yuʼun? Yuʼun jaʼ jun mantal yakʼoj Jeova xchiʼuk jaʼ sventa yichʼobil ta mukʼ (Ebr. 10:24, 25). Jech noxtok, jaʼ kutsʼ kalaltik ta mantal li ermanoetike. Kʼalal jmoj te oyutik li ta tsobajele, xkoʼolaj ti jmoj ta jkʼupintik slajesel jun muil veʼlile. Mi chkikʼtik batel ta tsobajeletik li kaj-estudiotike, yakal ta jkoltatik sventa xichʼ voʼ. Pe xuʼ van oy kʼusi chmakat ta be sventa mu spas taje. ¿Kʼuxi xuʼ jtunestik li livro Kʼupino akuxlejal sventa jkoltatik-oe?

14. ¿Kʼuxi xuʼ jtijbetik yoʼonton kaj-estudiotik yoʼ xbat ta tsobajeletik?

¹⁴ Sventa jtijbetik yoʼonton li kaj-estudiotik yoʼ xbat li ta tsobajeletike, xuʼ jtunestik li xchanobil 10 li ta livro Kʼupino akuxlejal. Kʼalal skʼan toʼox xichʼ akʼel ta ilel li livro liʼe, laj yichʼ kʼanbel junantik jcholmantaletik ti akʼo xchanik xchiʼuk yaj-estudioik li xchanobil 10, vaʼun toj lek kʼusi kʼot ta pasel yuʼunik. Mu jaʼuk to jtaktik ta ikʼel ta tsobajeletik li kaj-estudiotik mi lijkʼot xa ox li ta xchanobil 10. Jtaktik noʼox ta ikʼel xchiʼuk jechuk jpasilantik-o. Jelel stalelal li jujun kaj-estudiotike xchiʼuk li kʼusitik tsnuptanike, jaʼ yuʼun kakʼ ta koʼontontik li kʼusi chtun yuʼunik ta jujuntale xchiʼuk ti kʼuxi xuʼ jkoltatike. Mu xijchibaj mi muʼyuk chbat ta tsobajeletik ta anile. Oyuk smalael kuʼuntik, pe jechuk-o kalilanbetik.

15. ¿Kʼusitik van xuʼ xiʼo li kaj-estudiotike?

¹⁵ ¿Mi lijxiʼ chij-och ta stestigo Jeova kʼalal naka toʼox yakal chkichʼtik estudioe? Xuʼ van la jnoptik ti mu xuʼ kuʼuntik xcholel mantal ta naetike. O xuʼ van laj yakʼbutik xiʼel ti xuʼ skontrainutik li kutsʼ kalaltik o kamigotaktike. Mi jaʼ jech la jnuptantike, xkaʼibetik smelolal ti kʼu yelan chaʼi sbaik li kaj-estudiotike. Li Jesuse laj onoʼox yal ti oy buchʼutik jech ta xiʼike. Pe la stijbe yoʼonton li yajchankʼoptak sventa mu jaʼuk xmakatik yoʼ xtunik ta stojolal Jeovae (Mat. 10:16, 17, 27, 28). ¿Kʼuxi la skoltaan yoʼ stsalik li xiʼele? Xchiʼuk ¿kʼuxi xuʼ jkoltatik ek li kaj-estudiotike?

16. ¿Kʼuxi xuʼ jchanubtastik li kaj-estudiotik yoʼ xalbe batel yantik li kʼusi chchane?

¹⁶ Jchanubtastik kʼuxi xuʼ xalbe yantik li kʼusi yakal chchan batele. Xiʼik van tajek li yajchankʼoptak Jesus kʼalal albatik ti skʼan xcholik mantale. Pe koltaatik xtok, yuʼun albatik buchʼutik chbat xcholbeik mantal xchiʼuk kʼusi chbat yalik (Mat. 10:5-7). ¿Kʼuxi xuʼ jechuk jpastik ek? Kakʼbetik yil kaj-estudiotik buchʼutik xuʼ xcholbeik mantal. Jech kʼuchaʼal liʼe, jakʼbetik mi oy buchʼu xojtikin ti oy kʼusi tskʼan tsnaʼ ta sventa li Vivliae. Laj ne, kakʼbetik yil kʼuxi xuʼ kʼunuk noʼox chchapbe smelolal taje. Mi sta-o chkiltike, xuʼ jmoj jchantik xchiʼuk kaj-estudiotik li kʼusi xuʼ xale, xuʼ jaʼ jtunestik li jvokʼ ti bu chal:  «Junantike xi chalike» xchiʼuk «Junantike xi tsjakʼike» li ta livro Kʼupino akuxlejal. Kʼalal jech ta jpastike, kakʼbetik yil kʼuxi xuʼ stunes Vivlia kʼalal oy kʼusi ta xichʼ jakʼbele sventa ta smeloluk noʼox xal xchiʼuk ti kʼunuk ta aʼiele.

17. ¿Kʼuxi xuʼ xkoltaat kaj-estudiotik li kʼusi chal ta Mateo 10:19, 20, 29 kʼalal ta 31 sventa spat yoʼonton ta stojolal Jeovae?

¹⁷ Jkoltatik yoʼ spat yoʼonton ta stojolal Jeova. Li Jesuse laj yalbe yajchankʼoptak ti chkoltaatik yuʼun Jeova ta skoj ti kʼanbilike (kʼelo Mateo 10:19, 20, 29-31). Kalbetik kaj-estudiotik ti chkoltaat yuʼun li Jeova eke. Kʼalal jmoj ta jpastik orasione, kalbetik Jeova li kʼusi oy ta yoʼonton stael li kaj-estudiotike, vaʼun jaʼ jech tspat yoʼonton ta stojolal Jeova. Xi chal Franciszek ti te nakal ta Poloniae: «Li buchʼu laj yakʼbun estudioe ep ta velta laj yalbe Jeova li kʼusi oy ta koʼonton staele. Kʼalal laj kil kʼu yelan takʼbat yuʼun li Jeovae, lik noʼox jpas orasion ek. Laj kakʼ venta kʼu yelan la skoltaun Jeova kʼalal la jkʼan permiso jayibuk kʼakʼal li ta kabtele sventa xibat ta tsobajeletik xchiʼuk li ta asambleaetike».

18. ¿Kʼu yelan chaʼi sba kuʼuntik Jeova kʼalal chijchanubtasvan ta sventa li Vivliae?

¹⁸ Mi muʼyuk buchʼu chkakʼbetik estudio avie, ¿mi xuʼ van jkoltatik li buchʼutik chichʼik estudio yoʼ xichʼik voʼe? Xuʼ. ¿Kʼuxi xuʼ jpastik? Jaʼ mi ta jchiʼintik yantik ta yakʼel estudioe. Jamal xvinaj ti oy tajek ta yoʼonton Jeova li buchʼutik chichʼik estudioe. Jech xtok, skʼanojutik tajek ta skoj ti ta jkoltatik yoʼ xnopajik ta stojolale (Is. 52:7).