1. Биринчи әсирдә Әйсаниң шагиртлири Йерусалимға кәлгән түрлүк мәмликәт кишилиригә немә дегән?

 НУРҒУН дөләтләрдин кәлгән, һәрхил тилларда сөзләйдиған адәмләр Йерусалимда топланған еди. Шу күни һәйран қаларлиқ иш йүз бәргән. Бир топ аддий йәһудийлар Йерусалимға кәлгән түрлүк мәмликәт кишилириниң тиллирида сөзләшкә башлиған еди. Йәһудийларниң сөзлири шу адәмләрни һәйран қалдурған, амма Петрусниң сөзлири техиму һәйран қаларлиқ еди. Улар Әйса Мәсиһкә ишәнч бағлаш арқилиқ қутқузулушқа еришәләйдиғанлиғини аңлиған. Петрус ейтқан шу сөзләр уларға қаттиқ тәсир қилғач, улар һаяҗанлинип мундақ сориған: «Биз немә қилишимиз керәк?» Петрус уларға: «Һәрқайсиңлар... суға чөмдүрүлүңлар»,— дегән (Әлч. 2:37, 38).

2. Бу мақалидә немини көрүп чиқимиз? (Муқавидики рәсимгә қараң.)

² Техиму һәйран қаларлиқ бир иш йүз берип, тәхминән 3000чә киши шу күни чөмдүрүлүштин өтүп, Әйсаниң шагирти болған. Бу Әйсаниң өз шагиртлириға буйриған, шагирт тәйярлаш ишиниң әң чоң башлиниши болған. Шу иш 21-әсир, йәни бизниң күнлиримизгиму йетип кәлди. Биз кишигә бирқанчә саат сөзләпла, уни суға чөмдүрүлүшкә тәйяр қилалмаймиз. Кишигә чөмдүрүлүштин өтүши үчүн бирнәччә ай, һәтта бир жил яки көпирәк вақит кетиши мүмкин. Шагиртларни тәйярлаш иши көп тиришчанлиқни тәләп қилиду. Әгәр һазир сиз бирси билән Муқәддәс китапни үгиниватқан болсиңиз, буни яхши билисиз. Бу мақалидә биз сиз билән үгиниватқан кишиниң чөмдүрүлүштин өтүшигә қандақ ярдәм берәләйдиғанлиғиңизни көрүп чиқимиз.

3. Мәтта 28:19, 20-айәтләрдә көрситилгәндәк, үгәнгүчи чөмдүрүлүштин өтүши үчүн чоқум немә қилиши керәк?

³ Суға чөмдүрүштин авал, үгәнгүчи өзи үгәнгән һәқиқәтләрни һаятида әмәлий қоллиниши керәк (Мәтта 28:19, 20ни оқуң). Киши үгәнгәнлирини әмәлий қолланса, Әйсаниң тәмсилидики һулини чоңқур қезип, таш үстигә өй салған әқиллиқ кишигә охшайду (Мәт. 7:24, 25; Луқа 6:47, 48). Биз үгиниватқан кишиниң үгәнгәнлирини һаятида әмәлий қоллинишиға қандақ ярдәм берәләймиз? Төвәндики үч мәслиһәтни көрүп чиқайли.

4. Үгәнгүчиниң чөмдүрүлүштин өтүш мәхситигә йетиш үчүн давамлиқ тиришчанлиқ көрситишигә қандақ ярдәм берәләймиз? (« Үгәнгүчиниң мәхсәтләрни қоюшиға вә уларға йетишигә ярдәм бериң», дегән рамкиға қараң.)

⁴ Үгәнгүчиниң мәхсәтләрни қоюшиға ярдәм бериң. Немә үчүн шундақ қилишиңиз керәк? Бир мисални кәлтүрәйли. Әгәр сиз узун сәпәргә атлансиңиз, һерип қалмаслиқ үчүн бирқанчә йәрдә тохтап, чирайлиқ җайларға нәзәр селишиңиз мүмкин. Худди шуниңға охшаш, үгәнгүчи қисқа вақитта йетәләйдиған мәхсәтләрни қойса, чөмдүрүлүш мәхситигә йетәләйдиғанлиғини һис қилалайду. Үгәнгүчигә ярдәм бериш үчүн, «Мәңгү шат-хорам яшаң!» дегән китапниң «Йәтмәкчи болған мәхсәт» дегән рамкисини ишлитиң. Һәрбир дәрисниң ахирида үгиниватқан киши билән үгәнгәнлириниң йәтмәкчи болған мәхсәтлири билән қандақ бағлиниши бар екәнлиги һәққидә параңлишиң. Әгәр сиз үгәнгүчи үчүн башқа бир мәхсәтни көңлиңизгә пүккән болсиңиз, «Йәнә башқилар» дегән бош орунға йезип қоюң. Үгәнгүчи билән униң қисқа яки узунирақ вақитта йәтмәкчи болған мәхсәтлири һәққидә параңлишиш үчүн дайим шу рамкини қоллиниң.

5. Марк 10:17—22-айәтләрдә йезилғандәк, Әйса бай бир кишигә немә қилишни ейтқан вә немә үчүн?

 ⁵ Үгәнгүчиниң һаятида өзгиришләрни қилишиға ярдәм бериң (Марк 10:17—22ни оқуң). Әйса бай кишиниң өзигә тәәллуқ һәммә байлиқлири сетиветишиниң қийин болидиғанлиғини билгән (Марк 10:23). Амма Әйса әшу кишигә һаятида чоң бир өзгириш қилиши керәклигини ейтқан. Немә үчүн? Сәвәви Әйса уни яхши көргән. Бәзидә биз үгәнгүчиләрни алған билимлирини әмәлий қоллинишқа дәвәт қилишқа алдирмаймиз. Сәвәви уларниң өзгиришләрни қилишқа техи тәйяр әмәслигини көрүмиз. Кишиләрниң көнгән адәтлирини ташлап, йеңи миҗәз-хулуқни йетилдүрүшигә вақит кетиду (Кол. 3:9, 10). Бирақ униң билән өзгәртишләр һәққидә қанчә балдур очуқ параңлашсиңиз, үгәнгүчи өзгиришләрни шунчә балдур башлиши мүмкин. Шундақ сөһбәтлишиш арқилиқ униңға көңүл бөлүватқанлиғиңизни көрситәләйсиз (Зәб. 141:5; Пәнд н. 27:17).

6. Немә үчүн үгәнгүчиниң ой-пикирлирини билиш үчүн соалларни соришимиз керәк?

⁶ Үгиниватқан мавзу һәққидә үгәнгүчиниң ой-пикирини билиш үчүн, соалларни сораш бәк муһим. Шундақ соаллар арқилиқ үгәнгүчиниң немини чүшәнгәнлигини вә немигә ишинидиғанлиғини көрәләйсиз. Әгәр дайим шундақ қилсиңиз, кәлгүсидә униң билән қобул қилиш қийин болған мавзулар һәққидә параңлишиш оңайирақ болиду. «Мәңгү шат-хорам яшаң!» дегән китапта шундақ көзқарашларни билишкә ярдәм беридиған нурғун соаллар бар. Мәсилән, 04-дәристә «Сиз Йәһваниң шәхсий исмини ишләтсиңиз, У Өзини қандақ һис қилиду?», 09-дәристә болса, «Сиз немиләр һәққидә дуа қилишни халайсиз?» дегән соаллар бар. Дәсләптә үгәнгүчиниң шу соалларға қандақ җавап бериш һәққидә ойлинишиға вақит кетиду. Шуңа китапта кәлтүрүлгән айәтләр вә рәсимләрни қоллинип, униңға чоңқур ойлинишиға ярдәм бериң.

7. Башқиларниң һаят тәҗрибилирини қандақ үнүмлүк ишлитәләймиз?

⁷ Үгиниватқан киши өзиниң немә қилиши керәклигини чүшәнгәндә, башқиларниң баштин өткүзгән тәҗрибилиридин пайдилинип, уни өзгиришләрни қилишқа дәвәт қилиң. Мәсилән, униң учришишларға қатнишиши қийин болса, 14-дәристики «Издинип көрүң» дегән сәһипидики «Йәһва маңа көңүл бөлди» дегән видеони униңға көрситәләйсиз. «Мәңгү шат-хорам яшаң!» дегән китаптики нурғун дәрисләрдә «Чоңқурирақ қезиң» яки «Издинип көрүң» b дегән сәһипиләрдин шундақ тәҗрибә савақларни тапалайсиз. Үгәнгүчигә: «У қилалиған болса, сизму қилалайсиз»,— дәп уни башқилар билән селиштуруштин пәхәс болуң. У өзи шундақ хуласигә кәлсун. Шуңа сиз видеодики кишиниң Муқәддәс китаптики тәлимләрни һаятида қоллинишиға немә ярдәм бәргәнлиги һәққидә үгәнгүчи билән параңлишиң. Видеодики пайдилиқ нәсиһәтләргә яки муһим айәтләргә диққәт қилсиңиз болиду. Пурсәтла тепилса, Йәһваниң видеодики кишигә қандақ ярдәм бәргәнлигини тәкитләп туруң.

8. Үгәнгүчиниң Йәһвани сөйүшигә қандақ ярдәм берәләймиз?

⁸ Үгәнгүчиниң Йәһвани сөйүшигә ярдәм бериң. Пурсәтләрни издәп, үгәнгүчигә Йәһваниң пәзиләтлири тоғрилиқ ейтип туруң. Йәһва Өзини сөйгәнләрни қоллап-қувәтләйдиған хошал Худа екәнлигини кишиниң тонуп йетишигә ярдәм бериң (Тим. 1-х. 1:11; Ибр. 11:6). Униңға үгәнгәнлирини әмәлий ишлитишниң пайдисини көрситиң вә бу Йәһваниң униңға көрсәткән меһир-муһәббитиниң ипадиси екәнлигини чүшәндүрүң (Йәшая 48:17, 18). Униң Йәһваға болған меһир-муһәббити чоңқурлашқансери, у керәклик өзгиришләрни қилишни халайду (Йоһ. 1-х. 5:3).

9. Кишиниң чөмдүрүлүштин өткән етиқатчи болуши үчүн қурбанлиқларни беришигә Марк 10:29, 30-айәтләр қандақ ярдәм берәләйду?

⁹ Үгиниватқан киши чөмдүрүштин өтүш үчүн бәзи қурбанлиқларни беришкә тоғра келиду. Әйсаниң тәмсилидики бай кишигә охшаш, бәзи үгәнгүчиләр, бәлким маддий нәрсиләрни қурбан қилиши керәк. Әгәр қиливатқан иши Муқәддәс китап принциплириға мас кәлмисә, башқа иш тепишқа тоғра келиду. Нурғунлири бәлким, Йәһвани сөймәйдиған достлиридин айрилиду. Йәһва гувачилирини яхши көрмәйдиған аилә әзалири бәзилиридин ваз кечиши мүмкин. Әйса бәзи адәмләргә шундақ қурбанлиқларни бериш қийин келидиғанлиғини ейтқан. Бирақ у өзигә әгәшкәнләрниң наүмүт қалмайдиғанлиғини вәдә қилған. Улар мукапатлинип, меһир-муһәббәткә толған роһий аилигә еришәләйду (Марк 10:29, 30ни оқуң). Үгәнгүчигә мошу әҗайип роһий аилигә еришәлишигә қандақ ярдәм берәләйсиз?

10. Мануэльниң ейтқан сөзлиридин немини үгәндиңиз?

¹⁰ Үгәнгүчи билән достлуқни күчәйтиң. Униңға көңүл бөлидиғанлиғиңизни көрситиш бәк муһим. Немә үчүн? Мексикилиқ бурадәр Мануэль өзиниң Муқәддәс китапни үгәнгән чағлирини әсләп, мундақ дәйду: «Һәр қетим үгиништин авал, мән билән үгинидиған қериндаш мениң һал-әһвалимни соратти. Бу өзүмни әркин-азадә һис қилишимға ярдәм берәтти. Шуңа униң билән һәрқандақ мавзуда очуқ параңлишаттим. Униң маңа һәқиқәтән көңүл бөлүватқанлиғини һис қилаттим».

11. Үгәнгүчиләр билән вақит өткүзсәк, уларға қандақ пайдиси тегиши мүмкин?

¹¹ Әйса өз шагиртлири билән вақит өткүзгәндәк, сизму үгиниватқан киши билән вақит өткүзүң (Йоһ. 3:22). Әгәр мувапиқ көрсиңиз, у роһий өскән болса, уни өйүңизгә чайға яки тамаққа, йә болмиса JW интернет телевизиясидики айлиқ программини көрүшкә тәклип қилиң. Бәлким у һейт-байрам мәзгилләрдә ялғуз қалғанда, шундақ тәкливиңиз үчүн бәк миннәтдар болуши мүмкин.  Угандадики қериндишимиз Казебве мундақ дәйду: «Муқәддәс китапни тәтқиқ қилған вақиттила әмәс, мән билән үгиниш қилған қериндаш билән вақит өткүзгән чағлардиму Йәһва тоғрилиқ көп нәрсиләрни биливалдим. Шундақла Худаниң Өз хәлқигә қанчилик көңүл бөлидиғанлиғини вә уларниң қанчилик хошал екәнлигини көрдүм. Мәнму шундақ шат-хорам яшашни халидим».

12. Немә үчүн Муқәддәс китап үгинишигә һәртүрлүк қериндашларни тәклип қилишимиз керәк?

¹² Үгинишкә һәр түрлүк қериндашларни тәклип қилиң. Бәзидә үгинишкә: «Ялғуз барсам яки өткән қетим барған қериндаш билән барсам, асанирақ болиду»,— дәп ойлишимиз мүмкин. Гәрчә бу асанирақ болсиму, амма әгәр охшимайдиған қериндашлар билән барсақ, үгәнгүчигә көпирәк пайдиси тегиду. Молдавиядә яшайдиған қериндишимиз Дмитрий мундақ дәйду: «Тәтқиқ үгинишимгә кәлгән һәрбир қериндаш өзгичә усулда бир чүшәнчини йорутуп берәтти. Бу маңа үгәнгәнлирим үстидә охшимайдиған йоллар билән мулаһизә қилишимға ярдәм бәрди. Мән аллиқачан көплигән қериндашларни көргәч, тунҗа қетим жиғилишқа қатнашқанда өзүмни әркин һис қилип, хиҗил болмидим».

13. Немә үчүн үгәнгүчиләрниң җамаәт учришишлириға қатнишишиға ярдәм беришимиз керәк?

¹³ Үгәнгүчиниң җамаәт учришишлириға қатнишишиға ярдәм бериң. Немә үчүн? Сәвәви Йәһва Өз хизмәтчилиригә җәм болушни буйриған. Бу ибадитимизниң бир қисми (Ибр. 10:24, 25). Униңдин башқа, қериндашлиримиз роһий аилимизниң әзалири. Улар билән җам болғинимизда, худди тәмлик тамақлардин бир аилидәк бәһримән болғанға охшаш болимиз. Үгәнгүчиниң учришишларға қатнишишиға ярдәм бәргиниңиздә, униң чөмдүрүлүштин өтүши үчүн әң муһим қәдәмләрни бесишиға ярдәм берисиз. Бирақ жиғилишқа қатнишиш униңға қийин болуши мүмкин. У дуч кәлгән һәрқандақ қийинчилиқларға бәрдашлиқ беришигә «Мәңгү шат-хорам яшаң!» дегән китап қандақ ярдәм берәләйду?

14. Үгәнгүчиләрниң җамаәт үчришишлириға қатнишишиға қандақ дәвәт қилалайсиз?

¹⁴ «Мәңгү шат-хорам яшаң!» дегән китапниң 10-дәрисини ишлитиш, үгәнгүчигә илһам беришиңизға ярдәм бериду. Мошу китап нәшир қилиништин авал, бәзи тәҗрибилик вәз ейтқучилар бу дәрисниң ярдими билән өз үгәнгүчилириниң җамаәт үчришишлириға қатнишишиға үнүмлүк ярдәм берәлигән. Әлвәттә 10-дәрискичә күтүшниң һаҗити йоқ. Мүмкин болса, балдурирақ жиғилишларға тәклип қилиң. Охшимиған кишиләр, охшимиған қийинчилиқларға дуч келиши мүмкин. Шуңа уларниң еһтияҗиға диққәт қилип, уларға қандақ ярдәм берәләйдиғанлиғиңизға көз йәткүзүң. У дәрһалла кәлмәслиги мүмкин. Шуңа үмүтсизләнмәй, сәвирчанлиқ билән уни давамлиқ тәклип қилиң.

15. Үгәнгүчиләр немидин қорқуши мүмкин?

¹⁵ Сиз өз вақтида Йәһва гувачиси болуштин қорққанму? Бәлким сиз: «Мән һәргизму вәз ейталмаймән!»,— дәп ойлиғансиз. Йә болмиса, аиләмдикиләр яки достлирим маңа қарши чиқиду, дәп қорққансиз. Әгәр шундақ болса, сиз үгиниватқан кишиниң һис-туйғулирини чүшинәләйсиз. Әйса бәзи адәмләрниң шундақ қорқунучта болидиғанлиғини билгән. Бирақ у өз әгәшкүчилириниң қорқунучқа чүшүп, Йәһваға хизмәт қилишни тохтатмаслиққа дәвәт қилған (Мәт. 10:16, 17, 27, 28). Әйса өз әгәшкүчилириниң қорқунучлирини йеңишигә қандақ ярдәм бәргән вә биз униңдин қандақ үлгә алалаймиз?

16. Үгәнгүчиләрниң өз етиқадини башқилар билән бөлүшүшигә қандақ ярдәм берәләйсиз?

¹⁶ Үгәнгүчиләргә өз етиқади тоғрилиқ башқиларға чүшәндүрүшни үгитиң. Әйса шагиртлирини  вәз қилишқа әвәткәндә, бәлким улар җиддийләшкән. Әйса қәйәрдә вәз қилишни вә қандақ хәвәрни йәткүзүшни уларға үгәткән (Мәт. 10:5—7). Әйсани қандақ үлгә қилалайсиз? Уларниң қәйәрдә вәз қилалайдиғанлиғини көрситип бериң. Мәсилән, униңдин мундақ дәп сорисиңиз болиду: «Муқәддәс китаптики бу һәқиқәт сиз тонуйдиған бирсигә ярдәм берәләмду?» Униң башқиларға аддий бир усулда вәз қилишни үгинишигә ярдәм бериң. Мүмкин болса, «Мәңгү шат-хорам яшаң!» дегән китаптики «Бәзиләр мундақ дәйду» вә «Бәзиләр шундақ сорайду», дегән рамкиларни ишләтсиңиз болиду. Шундақ қилғанда, диққитиңизни униң Муқәддәс китапни ишлитип, башқиларға аддий вә чүшинишлик җавапларни беришни үгинишигә қаритиң.

17. Үгәнгүчиниң Йәһваға ишәнч бағлишиға ярдәм бәргәндә, Мәтта 10:19, 20, 29—31дин қандақ пайдилиналаймиз?

¹⁷ Үгәнгүчиниң Йәһваға ишәнч бағлишиға ярдәм бериң. Әйса өз шагиртлирини Йәһваниң яхши көридиғанлиғини билгәч, Униң уларға ярдәм беридиғанлиғини ейтқан (Мәтта 10:19, 20, 29—31ни оқуң). Үгәнгүчиңизгә Йәһваниң униңғиму ярдәм беридиғанлиғини есигә селиң. Йәтмәкчи болған мәхсәтлири һәққидә униң билән биллә дуа қилип, Йәһваға тайинишиға ярдәм бериң. Польшадики қериндишимиз Францизек шундақ дәйду: «Мән билән үгәнгән қериндаш, мениң мәхсәтлиримни тилға елип, дуа қилатти. Йәһваниң униң дуалириға җавап бәргинини көргәндә, мәнму дәрһал дуа қилишқа башлидим. Мән йеңи хизмитимдин рухсәт сорап, жиғилишларға вә конгрессларға қатнишишқа тоғра кәлгәндә, Йәһваниң ярдәм бәргәнлигини һис қилдим».

18. Йәһва Худа башқиларға Муқәддәс китапни үгитиватқан Өз хизмәтчилиригә қандақ қарайду?

¹⁸ Йәһва Муқәддәс китапни үгиниватқан кишиләрни яхши көриду вә уларға көңүл бөлиду. У шуниң билән биргә, башқиларға Өзигә йеқинлишиш үчүн тиришип ярдәм бериватқан хизмәтчилириниму билиду вә яхши көриду (Йәшая 52:7). Әгәр һазирчә сиз билән Муқәддәс китапни үгинидиған бири болмисиму, башқа қериндашларниң үгинишигә қатнишиш арқилиқ үгәнгүчиләрниң чөмдүрүштин өтүшигә ярдәм берәләйсиз. Әгәр һазирчә сиздә Муқәддәс китап үгиниши болмиса, башқа қериндашларниң үгинишигә қатнишиң. Шу чағда үгәнгүчиләрниң чөмдүрүштин өтүшигә ярдәм берәләйсиз.