1. Die yen idibo ri Jesu vuẹ otu buebun nẹ ayen ru?

EYA gbe eshare buebun ri nẹ ẹkuotọ buebun rhe, ri jẹ ephẹrẹ sansan siomakoko vwẹ ẹdẹ ọvo. Emu igbevwunu ọvo da phia. Ẹko rẹ ihwo ri Ju evo re dia ihwo ghwevweghe ke jẹ ephẹrẹ rẹ erhorha na ri nẹ ẹkuotọ sansan rhe! Ọnana gbe ihwo unu mamọ, jẹ obo ri me gbe ayen unu kẹ oborẹ ihwo ri Ju na tare, kugbe oborẹ ọyinkọn Pita ta kẹ ihwo eje. Ayen vuẹ otu na nẹ ayen se vwo usivwin siẹrẹ ayen de dje esegbuyota phia kpahen Jesu Kristi. Ovuẹ yena te otu na ẹwẹn mamọ. Ayen da nọ: “Kidie avwanre che ru?” Pita da kpahen kẹ ayen: “We bromaphiyame.”—Iruo 2:37, 38, NW.

2. Die yen a cha fuẹrẹn vwẹ uyono nana? (Ni uhoho rọhẹ opharo ọbe na.)

² Obo re rhoma rhe phia gbe ohwo unu mamọ. Omarẹ ihwo 3,000 de bromaphiyame vwẹ ẹdẹ yena, ayen da rhe dia idibo ri Jesu. Ọnana yen ọtonphiyọ rẹ iruo aghwoghwo rẹ Jesu vuẹ idibo rọyen nẹ e che ru vwẹ akpọneje. E ji ruiruo yena rhi te nonẹna. Avwanre che se nene ohwo ta ota vwẹ inọke evo, ohwo na mi muwan vwọ kẹ omaebrophiyame-e. Ọ sa reyọ emeranvwe evo, yẹrẹ tobọ reyọ ẹgbukpe ọvo fiẹ ivẹ tavwen ohwo re yono ki se bromaphiyame. Wo de vwo ohwo wọ vwẹ Baibol vwo yono, wọ cha rhọnvwe nẹ iruo rẹ odibo egbe na lọhọre-e. Vwẹ uyono nana, a cha ta ota kpahen oborẹ wọ sa vwọ chọn ohwo wo yono uko vwo muwan vwọ kẹ omaebrophiyame.

3. Vwo nene obo rehẹ Matiu 28:19, 20, die yen ohwo re yono che ru rere o se vwo muwan vwọ kẹ omaebrophiyame?

³ Ohwo re yono cha reyọ obo ro yono vwo ruiruo tavwen o ki se bromaphiyame. (Se Matiu 28:19, 20.) Ohwo na da vwẹ obo ro yono vwo ruiruo, kọ cha họhọ “ọvwẹghwanre” rọ tọn uwevwin rọyen vwẹ enu rẹ oragha vwẹ itẹ rẹ Jesu kperi. (Mat. 7:24, 25; Luk 6:47, 48) Mavọ yen a sa vwọ chọn ohwo re yono uko vwọ reyọ obo ro yono vwo ruiruo? Jẹ a fuẹrẹn iroroẹjẹ erha.

4. Mavọ yen a sa vwọ chọn ohwo re yono uko vwo muwan ememerha vwọ kẹ omaebrophiyame? (Ni ekpeti na “ Chọn Ohwo Wo Yono Uko Vwo Vwo Obo rọ Tẹnrovi ji Yanmu Ayen.”)

⁴ Chọn ohwo wo yono uko vwo vwo oboratẹnrovi. Diesorọ o vwo fo nẹ wo ru ọtiọyen? Roro kpahen udje nana: Wọ da guọnọ kpo asan ro sheri mamọ, wo se brorhiẹn nẹ wọ cha domaji vwẹ asan evo re pha yoyovwin. Ọtiọyena, oyan na rha cha fobọ bẹn wẹ-ẹ. Ọtiọyena, ohwo re yono de vwo obo rọ tẹnrovi, ọ da je yanmu ayen, o rhe che ni ẹgbaẹdavwọn ro vwo bromaphiyame gegerege-e. Vwẹ ẹbẹre rẹ “Obo Wo Se Ru” rọhẹ ọbẹ na Vwo Omavwerhovwẹn Bẹdẹ! vwọ chọn uko vwọ yan obaro. Vwẹ okuphiyọ rẹ uyono ọvuọvo, ovwan me ta ota kpahen oborẹ ẹkpo rehẹ ẹbẹre yena sa vwọ chọn uko vwo ru nene obo ro yonori. Wọ da guọnọ nẹ o vwo oboratẹnrovi rọ fẹnẹ ọ ra vwọphia vwẹ ẹbẹre yena, wo se sio phiyọ asan re seri nẹ “Erọnvwọn efa wo se ru.” Ovwan me reyọ ẹbẹre nana vwọ fuẹrẹn obo rọ sa yanmu vwẹ ọmọke krẹn, vẹ e re cha reyọ ọke.

5. Vwo nene obo rehẹ Mak 10:17-22, die yen Jesu vuẹ ọdafe ọvo, kẹ diesorọ ọ vwọ vuẹ?

⁵ Chọn ohwo wo yono uko vwo ru ewene.  (Se Mak 10:17-22.) Jesu riẹnre nẹ ọ cha bẹn kẹ ọdafe rọ vwọ shẹ obo ro vwori eje. (Mak 10:23) Dedena, Jesu vuẹ ọshare na nẹ o ru ewene rode yena. Diesorọ? Kidie Jesu vwo ẹguọnọ rọyen mamọ. Ọke evo, e se no nẹ o ji te ọke re vwo jiro kẹ ohwo re yono nẹ o ru ewene ọvo kiriguo ro fori nẹ o ru-u. Ọ sa reyọ ọke tavwen ohwo ki se ku ohwo awanre na nẹ oma, ji ku ohwo ọkpokpọ na phiyọ. (Kọl. 3:9, 10) Jẹ ọ cha sa fobọ ru ewene na-a, jokpanẹ wọ fobọ nene ta ota kpahọn. Ọtaẹtakuẹgbe tiọyena che djephia nẹ wo vwo ọdavwẹ rọyen.—Une 141:5; Isẹ 27:17.

6. Diesorọ a vwọ nọ ohwo re yono kpahen obo ro rorori?

⁶ Ofori nẹ wọ nọ ohwo wo yono obo ro roro kpahen ẹkpo evo. Vwẹ onọ tiọyena vwọ guọnọ otọ rẹ oborẹ ohwo na vwo ẹruọ rọyen vẹ obo ro segbuyota. Wo de ruẹ ọtiọyen kọke kọke, kọ cha lọhọ wo vwo nene ta ota kpahen erọnvwọn re cha bẹn ẹreyọ. Ọbe na Vwo Omavwerhovwẹn Bẹdẹ! vọnre vẹ enọ tiọyen ri se mu ohwo vwo roro. Kerẹ udje, uyono 4 nọre nẹ, “Mavọ wo rorori nẹ oma ru Jihova siẹrẹ wọ da vwẹ odẹ rọyen vwo ruiruo?” Uyono 9 da rha nọ nẹ, “Erhọ yen erọnvwọn evo wọ guọnọ nẹrhovwo kpahen?” Ẹsosuọ, ọ sa bẹn kẹ ohwo wo yono na rọ sa vwọ kpahenphiyọ enọ ri shekpahen obo ro rorori. Wọ sa chọn uko vwo roro kpahen ẹkpo ri Baibol evo vẹ ihoho rehẹ asan we yono na.

7. Mavọ yen a sa vwọ nabọ reyọ oborerhiẹromrẹ vwo ruiruo?

⁷ Ohwo wo yono na de vwo ẹruọ rẹ obo ro fori nẹ o ru nure, wọ me vwẹ oborẹ ihwo sansan rhiẹromrẹ vwọ chọn uko vwo ruo. Kerẹ udje, ohwo na da mrẹ bẹnbẹn ro vwo kpo uyono, wo mi dje ividio rẹ Jihova Vwẹrote Vwe vwọ kẹ, vwẹ ẹbẹre re se “Hiẹ Guọnọ” vwẹ uyono 14. Vwẹ buebun rẹ uyono rẹ ọbe ri Vwo Omavwerhovwẹn Bẹdẹ! na, wọ cha mrẹ oborerhiẹromrẹ vwẹ ẹbẹre ri “Hiẹ Kodo” yẹrẹ ọ rẹ “Hiẹ Guọnọ.” * Wọ reyọ ohwo wo yono vwọ vwanvwe ohwo ọfa-a. Kẹnoma kẹ eta kerẹ, “O de se ruo, kọyen wo ji se ruo.” Jẹ ohwo wo yono na brorhiẹn na komobọ. Wọ sa kanrunumu erọnvwọn evo re chọn ohwo rọhẹ ividio na uko vwọ vwẹ uchebro ri Baibol vwo ruiruo. Wo se djunute ẹkpo ri Baibol yẹrẹ emu ọvo kiriguo rẹ ohwo na ruru. Reyọ kuphẹn kuphẹn ro rhiephiyọ vwọ kanrunumu oborẹ Jihova wan chọn ohwo na uko.

8. Mavọ yen a sa vwọ chọn ohwo re yono uko vwo vwo ẹguọnọ ri Jihova?

⁸ Chọn ohwo wo yono uko vwo vwo ẹguọnọ ri Jihova. Vwẹ idjerhe vọ? Reyọ kuphẹn kuphẹn ro rhiephiyọ vwo yono kpahen iruemu ri Jihova. Chọn uko vwọ mrẹ Jihova kerẹ Ọghẹnẹ rẹ oma vwerhan, ro biẹcha otu ri vwo ẹguọnọ rọyen. (1 Tim. 1:11; Hib. 11:6) Vuẹ nẹ erere che te obọ siẹrẹ ọ da vwẹ obo ro yonori vwo ruiruo, je vuẹ nẹ erere tiọyena ọyen odjephia rẹ ẹguọnọ rẹ Jihova vwo kpahọn. (Aiz. 48:17, 18) Ẹguọnọ ro vwo kpahen Jihova vwọ ganphiyọ ye, o mi rhi vwo owenvwe ro vwo ru ewene sansan.—1 Jọn 5:3.

9. Vwo nene obo rehẹ Mak 10:29, 30, die yen sa chọn ohwo uko vwọ vwẹ erọnvwọn evo vwo ze rere o se vwo bromaphiyame?

⁹ Ohwo wo yono na cha vwẹ ekuakua sansan vwo ze tavwen o ki se muwan vwọ  kẹ omaebrophiyame. Kerẹ ọdafe re djunute siẹvure, ihwo evo re yono cha vwẹ ekuakua rẹ akpeyeren vwo ze. Ayen cha guọnọ iruo ọfa, ọ da dianẹ ọ rẹ ayen ruẹ vwọso irhi ri Baibol na. Ihwo buebun che sioma nẹ igbeyan ri jẹ ẹguọnọ rẹ Ọghẹnẹ evwo. Ihwo rẹ orua ri vwo utuoma kpahen Iseri ri Jihova me rha sen efa. Jesu tare nẹ ọ cha bẹn kẹ ihwo evo rẹ ayen vwọ vwẹ ẹkuakua tiọna vwo ze. Ẹkẹvuọvo, o veri nẹ ọyen che ku idibo rọyen phiyotọ-ọ. Ayen che vwo orua rẹ idibo rẹ Ọghẹnẹ ri che dje ẹguọnọ kẹ ayen. (Se Mak 10:29, 30.) Mavọ yen wọ sa vwọ chọn ohwo wo yono uko vwo vwo okẹ oyoyovwin nana?

10. Die yen wo yono vwo nẹ oborẹ Manuel tare?

¹⁰ Vwẹ ugbeyan mu ohwo wo yono. Ọyen obo re ghanre mamọ wo vwo djephia nẹ wo vwo ọdavwẹ rẹ ohwo wo yono. Diesorọ? Ni oborẹ Manuel rọ dia Mexico ta kpahen ọke re vwo yono: “Kọke kọke, tavwen e ki yono, ọ ro yono uvwe me nọ vwẹ kpahen oborẹ ekuakua hepha. Ọ nẹrhẹ ẹwẹn mẹ totọ, ki mi se rhievun ta ota kpahen erọnvwọn efa. Mi niroso nẹ o ghini vwo ọdavwẹ mẹ.”

11. Erere vọ yen ihwo wo yono cha mrẹ siẹrẹ wo de nene ayen ghwọrọ ọke kugbe?

¹¹ Nene ohwo wo yono ghwọrọ ọke kugbe kirobo rẹ Jesu nene idibo rọyen ru. (Jọn 3:22) O de shephiyọ, wo se durhie ohwo wo yono rọ nabọ yan obaro ghwraghwraghwra vwo kpo uwevwin wẹn rere ovwan da iti, riemu, yẹrẹ ni brọdkastin rẹ emeranvwe ọvo. Oma cha nabọ vwerhọn, siẹrẹ wọ da kẹ edurhie tiọyena vwẹ ọke rẹ ihwo rẹ akpọ na vwọ re erẹ re vwọso Baibol na. Kazibwe rọ dia Uganda da ta: “Mi niro nẹ oborẹ mi yonori kpahen Jihova vwẹ ọmọke mẹ vẹ ohwo ro yono uvwe ghwọrọ kugbe, bun te obo ro yono uvwe re. Me mrẹ oborẹ Jihova vwo ẹguọnọ rẹ ihwo rọyen te, kugbe oborẹ oma vwerhen ayen. Me je guọnọ yeren akpọ tiọyen.”

12. Diesorọ e vwo mu ighwoghwota sansan nene oma kpo asan rẹ ohwo re yono?

 ¹² Jẹ ighwoghwota sansan nene uwe re yono ohwo na. Wo se no nẹ oma che fun we siẹrẹ wẹwẹ ọvo de kpo asan rẹ ohwo na kọke kọke, yẹrẹ siẹrẹ wo de ghwe vwo oghwoghwota ọvo wẹ vẹ ọyen yan usun ọkieje. Ọyena se ghini fun we oma, ẹkẹvuọvo ohwo wo yono na cha mrẹ erere siẹrẹ wẹ vẹ ighwoghwota sansan de kpo asan rọyen. Dmitrii rọ dia Moldova da ta: “Ona rẹ oghwoghwota ọvuọvo rọ rhe asan mẹ vwo dje orọnvwọn fẹnẹre. Ọyena chọn vwẹ uko vwọ riẹn idjerhe sansan me sa vwọ reyọ oborẹ mi yonori vwo ruiruo. Oma rha je vo vwẹ vwẹ ẹdẹ rẹsosuo mi kpo uyono-o, kidie iniọvo buebun re me mrẹre ẹdẹ yena dia erhorha kẹ vwẹ-ẹ.”

13. Diesorọ a vwọ chọn ohwo re yono uko vwo kpo uyono?

¹³ Chọn ohwo wo yono uko vwo kpo uyono. Diesorọ? Kidie Jihova jurhi kẹ idibo rọyen nẹ ayen vwoma; ọyena ẹbẹre ọvo rẹ ẹga rayen. (Hib. 10:24, 25) Vwọba, iniọvo rehẹ ukoko rẹ avwanre ayen orua ọvuọvo. Avwanre dahẹ uyono, kọ ghwa họhọ nẹ avwanre nenẹ ayen re udemu ọvwevwerhen kuẹgbe vwẹ uwevwin. Wọ da chọn ohwo wo yono uko vwo kpo uyono, kọ sa jowọ ro che suọn kpo omaebrophiyame. Ẹkẹvuọvo, ọ da dia bẹnbẹn ro vwo kpo uyono. Mavọ yen ọbe ri Vwo Omavwerhovwẹn Bẹdẹ! na sa vwọ chọn uko vwo phi ẹdia yena kparobọ?

14. Mavọ yen e se vwo phi oruru rẹ uyono ẹra phiyọ oma rẹ ohwo re yono?

¹⁴ Vwẹ uyono 10 rẹ ọbe ri Vwo Omavwerhovwẹn Bẹdẹ! na, vwo phi oruru na phiyọ oma rọyen. Tavwen e ki siobọnu ọbe na, a vuẹ ighwoghwota evo re tẹn ona nẹ ayen reyọ vwọ chọn ihwo rẹ ayen yono uko vwo kpo uyono. Ayen da tanẹ ọ nabọ wian kẹ ayen. Wọ hẹrhẹ ọke ovwan vwo te uyono 10 tavwen wo ki durhie kpo uyono-o. Fobọ durhie kpo uyono, wo mi ji rhe ruẹ ọtiọyen kọke kọke. Egbabọse rẹ ohwo ọvuọvo wo yono sa fẹnẹ. Ọtiọyena, gba nabọ vwo oniso rẹ ọdavwẹ rẹ ohwo ọvuọvo, rere wo no sẹ wọ sa chọn ayen uko. Wo jẹ ofu dje we siẹrẹ ọ da reyọ ọke tavwen ayen ki rhiabọreyọ edurhie na-a. Vwo odirin, wo jẹ edurhie na bẹn wẹ-ẹ.

15. Oshọ vọ yen se mu ohwo re yono?

¹⁵ Wọ karophiyọ omoshọ ro mu we ọke wọ vwọ guọnọ dia Oseri ri Jihova? Ọkiọvo wo rorori nẹ wo che se ghwoghwo ota vwẹ azagba-a. Yẹrẹ oshọ se mu we nẹ ihwo rẹ orua yẹrẹ igbeyan wẹn cha vwọso wẹ. Ọ da dia ọtiọyen, ku wo se vwo ẹruọ rẹ ẹdia rẹ ohwo wo yono na hepha. Jesu tare nẹ oshọ tiọyena se ghini mu ohwo. Ẹkẹvuọvo, o bru idibo rọyen uche nẹ ayen vwẹ fikirẹ oshọ vwo siomanu ẹga ri Jihova-a. (Mat. 10:16, 17, 27, 28) Mavọ yen Jesu vwọ chọn idibo rọyen uko vwo phi oshọ kparobọ? Mavọ yen wo se vwo nene udje rọyen?

16. Mavọ yen e se vwo yono ohwo na obo re ghwoghwo ota?

¹⁶ Vwẹ ememerha vwo yono ohwo na obo rọ sa vwọ chochọn rẹ esegbuyota rọyen. Ọ sa dianẹ oshọ mu idibo ri Jesu ọke ro vwo ji ayen kpo ota eghwoghwo. Ẹkẹvuọvo, Jesu chọn ayen uko, rọ vwọ vuẹ ayen asan rẹ ayen de che ghwoghwo kugbe oborẹ ayen cha ta. (Mat. 10:5-7) Mavọ yen wọ sa vwọ vwẹrokere Jesu? Chọn ohwo wo yono uko vwọ riẹn asan ro de se ghwoghwo ota. Kerẹ udje, wọ sa nọ sẹ ọ riẹn ohwo ọvo rọ cha mrẹ erere vwo nẹ uyono ri Baibol ọvo kiriguo ro yonori. Wo de ru  ọtiọyen nu, wọ me chọn uko vwo muegbe rẹ obo rọ sa vwọ reyọ uyota yena phia kẹ ohwo na. O de shephiyọ, wọ sa vwẹ ẹbẹre rẹ, “Ihwo Evo Ta” kugbe “Ohwo Sa Nọ,” rọhẹ ọbe ri Vwo Omavwerhovwẹn Bẹdẹ! na vwo yono. Tẹnrovi oborẹ wo se vwo yono ohwo na obo rọ sa vwọ vwẹ Baibol na vwọ kpahenphiyọ enọ vwẹ idjerhe ọlọlọhọ, ro ji che brọghọ phiyọ ihwo oma.

17. Mavọ yen a sa vwọ reyọ Matiu 10:19, 20, 29-31 vwọ chọn ohwo re yono uko vwọ vwẹroso Jihova?

¹⁷ Chọn uko vwọ vwẹroso Jihova. Jesu vuẹ idibo rọyen nẹ Jihova cha chọn ayen uko kidie o vwo ẹguọnọ rayen. (Se Matiu 10:19, 20, 29-31.) Karophiyọ ohwo wo yono na nẹ Jihova je cha chọn uko. Wọ sa chọn uko vwọ vwẹroso Jihova siẹrẹ wo de nene nẹrhovwo kpahen obo rọ tẹnrovi. Franciszek rọ dia Poland da ta: “Kọke kọke yen ohwo ro yono uvwe vwo djunute obo me tẹnrovi vwẹ ẹrhovwo. Me ghwa vwọ mrẹ oborẹ Jihova nabọ kpahenphiyọ ẹrhovwo rọyen, me da je ton ẹrhovwo ẹnẹ phiyọ. Jihova chọn vwẹ uko vwẹ iruo kpokpọ mẹ, ọke me vwọ nokpẹn rẹ uphẹn mi vwo kpo uyono vẹ ọghwẹkoko.”

18. Ẹro vọ yen Jihova vwo nẹ owian rẹ ighwoghwota ri yono ihwo?

¹⁸ Jihova nabọ vwo ẹguọnọ rẹ ihwo re yono. O ji vwo ẹguọnọ rẹ ighwoghwota na; ọ riẹn oborẹ avwanre davwẹngba te rere a sa vwọ chọn ihwo uko vwo sikẹrẹ. (Aiz. 52:7) Ọ da dianẹ wo ji vwo ohwo wọ vwẹ Baibol yono-o, wọ je sa chọn ihwo re yono uko vwo muwan vwọ kẹ omaebrophiyame siẹrẹ wo de nene ighwoghwota efa re yono ayen.