1. Vhafunziwa vha Yesu vho vhudza gogo ḽa vhathu uri vha ite mini?

HO VHA ho ḓa gogo ḽihulu ḽa vhanna na vhafumakadzi Yerusalema. Vho vha vha tshi bva kha mashango manzhi o fhambanaho nahone vha tshi amba nyambo nnzhi dzo fhambanaho. Nga ḽeneḽo ḓuvha ho itea zwiṅwe zwithu zwi mangadzaho. Vhaṅwe Vhayuda vho mbo ḓi vha na vhukoni ha u amba nga nyambo dza vhenevho vhanna na vhafumakadzi vha bvaho kha maṅwe mashango. Zwenezwo zwo vha mangadza vhukuma, fhedzi zwe zwa vha takadza ndi zwe vhenevho Vhayuda vha vha vha tshi khou zwi amba na zwe muapostola Petro a zwi amba. Vhenevho vhanna na vhafumakadzi vho guda uri arali vha vha na lutendo kha Yesu Kristo vha nga tshidzwa. Zwenezwo zwa vha kwama mbilu. Zwo vha kwama mbilu lwe vha vhuya vha ri: “Ri ite mini?” Petro o vha fhindula a ri: ‘Lovhedzwani.’—Mish. 2:37, 38.

2. Ri ḓo amba nga ha mini kha ino thero? (Sedzani tshifanyiso tshi re kha gwati.)

² Nga murahu ha zwenezwo, ho itea zwithu zwi mangadzaho. Nga ḽeneḽo ḓuvha, ho lovhedzwa vhathu vha ṱoḓaho u vha 3 000 vha vha vhafunziwa vha Kristo. Nga yeneyi nḓila, vhatevheli vha Yesu vho vha vha tshi khou thoma u ita mushumo muhulwane wa u ita vhafunziwa we Yesu a vha o vha laya uri vha u ite. Wonoyo mushumo u kha ḓi itwa na ṋamusi. Ṋamusi, muthu a nga si lugele u lovhedzwa nga murahu ha musi ro amba nae lwa awara dzi si gathi fhedzi. Zwi nga mu dzhiela miṅwedzi, ṅwaha kana u fhira uri onoyo muthu a lovhedzwe. Arali ni khou gudisa muṅwe muthu Bivhili, ni a zwi ḓivha uri zwi a ṱoḓea uri ni finye dzi khwaṱhe uri onoyo muthu a vhe mufunziwa wa Kristo. Kha ino thero, ri ḓo amba nga zwine na nga zwi ita uri ni thuse mugudiswa waṋu uri a lovhedzwe.

3. Samusi zwo sumbedzwa kha Mateo 28:19, 20, ndi mini zwine mugudiswa a tea u ita uri a ite mvelaphanḓa u swika a tshi lovhedzwa?

³ Musi mugudiswa wa Bivhili a sa athu u lovhedzwa u tea u shumisa zwine a khou zwi guda Bivhilini. (Vhalani Mateo 28:19, 20.) Musi mugudiswa a tshi shumisa zwine a khou zwi guda, u mbo ḓi fana na “muthu o ṱalifhaho” kha tshifanyiso tsha Yesu we a bwa a fhaṱa nnḓu yawe kha tombo. (Mat. 7:24, 25; Luka 6:47, 48) Ri nga thusa hani mugudiswa uri a shumise zwine a khou zwi guda? Kha ri ambe nga ha zwithu zwiraru zwine ra nga zwi ita.

4. Ri nga thusa hani mugudiswa u finya dza khwaṱha uri a lugele u lovhedzwa? (Sedzani na bogisi “ Thusani Mugudiswa Waṋu Uri A Ḓivhetshele Zwipikwa Na Uri A Zwi Swikelele.”)

⁴ Thusani mugudiswa waṋu uri a ḓivhetshele zwipikwa. Ndi ngani ni tshi tea u zwi ita? Ṱhogomelani tsumbo i tevhelaho: Arali ni tshi ḓo fara lwendo lulapfu, ni nga khetha fhethu hune na ḓo ima hone ni sa athu u swika fhethu hune na khou ya hone. Arali na ita zwenezwo, ni nga si vhone u nga fhethu hune na khou ya hone ndi kulesa. Nga nḓila i fanaho, musi mugudiswa waṋu a tshi ḓivhetshela zwipikwa zwine a nga kona u zwi swikelela nga tshifhinga tshipfufhi, zwi ḓo mu thusa u vhona uri na tshipikwa tsha u lovhedzwa a nga kona u tshi swikelela. Shumisani tshiteṅwa “Lingedzani Hezwi” kha bugu Ḓiphiṋeni Nga Vhutshilo Lwa Tshoṱhe! uri ni thuse mugudiswa waṋu u ḓivhetshela zwipikwa. Magumoni a ngudo iṅwe na iṅwe, ambani na mugudiswa waṋu nga ha uri tshipikwa tshawe tshi nga mu thusa hani u shumisa zwe a zwi guda. Arali ni tshi takalela mugudiswa waṋu a tshi vha na tshiṅwe tshipikwa, ni nga tshi ṅwala fhasi ha tshiteṅwa “Zwiṅwe.” Ni dzule ni tshi shumisa tshenetshi tshiteṅwa uri ni ambe na mugudiswa waṋu nga ha zwipikwa zwine a nga kona u zwi swikelela nga tshifhinga tshipfufhi na zwine zwa ḓo dzhia tshifhinga tshilapfu.

5. Samusi zwo sumbedzwa kha Marko 10:17-22, ndi mini zwe Yesu a vhudza munna wa mupfumi uri a zwi ite nahone ndi ngani?

 ⁵ Thusani mugudiswa waṋu u ita tshanduko vhutshiloni hawe. (Vhalani Marko 10:17-22.) Yesu o vha a tshi zwi ḓivha uri zwi nga si lelutshele munna o pfumaho uri a rengise thundu dzawe dzoṱhe. (Marko 10:23) Naho zwo ralo, Yesu o vhudza onoyo munna uri a ite yeneyo tshanduko khulwane vhutshiloni hawe. Ndi ngani? Ndi ngauri Yesu o vha a tshi mu funa. Nga zwiṅwe zwifhinga, ri nga vhona u nga mugudiswa ha athu u lugela u ita tshanduko, zwenezwo zwa ita uri ri litshe u mu ṱuṱuwedza u shumisa zwine a khou zwi guda vhutshiloni hawe. Vhaṅwe zwi nga vha dzhiela tshifhinga u bvula vhumuthu ha kale vha ambara vhumuthu vhuswa. (Vhakol. 3:9, 10) Fhedzi arali na ṱavhanya u amba na mugudiswa waṋu nga ho livhaho nga ha uri a ite dzenedzo tshanduko, ndi hone a tshi ḓo ṱavhanya a dzi ita. Ni ḓo vha ni tshi khou sumbedza uri ni na ndavha nae arali na amba nae nga ha eneo mafhungo.—Ps. 141:5; Mir. 27:17.

6. Ndi ngani ri tshi fanela u vhudzisa mugudiswa washu uri mavhonele awe ndi afhio kha mafhungo ane ra khou amba nga hao?

⁶ Ndi zwa ndeme u vhudzisa mugudiswa washu uri mavhonele awe ndi afhio nga zwine na khou amba nga hazwo. Zwi ḓo ita uri ni ḓivhe uri mugudiswa waṋu u pfesesa mini nga ha eneo mafhungo na zwine a tenda zwone. Arali na dzulela u zwi ita zwi ḓo ni lelutshela u amba nae nga ha mafhungo ane zwa nga konḓa uri a a ṱanganedze. Bugu Ḓiphiṋeni Nga Vhutshilo Lwa Tshoṱhe! i na mbudziso dzi ṱoḓaho mavhonele a mugudiswa. Sa tsumbo, ngudo 04 i na mbudziso ine ya ri: “Ni vhona u nga Mudzimu u ḓipfa hani musi ni tshi shumisa dzina ḽawe?” Ngudo 09 i na mbudziso ine ya ri: “Ndi zwifhio zwiṅwe zwithu zwine na ṱoḓa u rabela nga hazwo?” Zwi nga thoma zwi tshi konḓa uri mugudiswa waṋu a fhindule dzenedzi mbudziso. Ni nga mu thusa nga u mu gudisa uri a humbule nga ha maṅwalo na zwinepe zwi re kha yeneyi bugu.

7. Ri nga shumisa hani zwe vhaṅwe vha ṱangana nazwo vhutshiloni nga nḓila yo teaho?

⁷ Musi mugudiswa waṋu a tshi thoma u pfesesa uri ndi zwifhio zwine a tea u ita, mu ṱuṱuwedzeni uri a nga zwi itisa hani nga u shumisa zwe vhaṅwe vha ṱangana nazwo vhutshiloni. Sa tsumbo, arali mugudiswa waṋu a sa ḓi miṱanganoni tshifhinga tshoṱhe, ni nga mu sumbedza vidio Yehova U Na Ndavha Na Nṋe kha tshiteṅwa “Wanani Zwo Engedzeaho” kha ngudo 14. Kha vhunzhi ha ngudo dzi re kha bugu Ḓiphiṋeni Nga Vhutshilo Lwa Tshoṱhe!, ni ḓo wana tshenzhelo dzo raloho kha tshiteṅwa “Gudani Zwo Engedzeaho” kana “Wanani Zwo Engedzeaho.” * Ni songo vhuya na vhambedza mugudiswa waṋu na muṅwe nga u mu vhudza uri: “Arali uyu o zwi kona, na inwi-vho ni nga zwi kona.” Zwi litsheleni kha mugudiswa ene muṋe. Nṱhani hazwo, ambani nga ha zwithu zwa ndeme zwe zwa thusa onoyo muthu a re kha vidio uri a shumise zwine zwa funzwa nga Bivhili. Khamusi ni nga bula luṅwalo lwa ndeme kana tshiṅwe tshithu tshe onoyo muthu a tshi ita. Musi zwi tshi konadzea, ombedzelani uri Yehova o thusa hani onoyo muthu.

8. Ri nga thusa hani mugudiswa washu uri a fune Yehova?

⁸ Thusani mugudiswa waṋu uri a fune Yehova. Nga nḓila ḓe? Wanani zwibuli zwa u ita uri mugudiswa waṋu a gude zwo engedzeaho nga ha zwine Yehova a vha zwone. Thusani mugudiswa waṋu uri a pfesese uri Yehova ndi Mudzimu o takalaho ane a tikedza vhane vha mu funa. (1 Tim. 1:11; Vhahev. 11:6) Sumbedzani mugudiswa waṋu uri u ḓo vhuyelwa arali a shumisa eneo mafhungo nahone ni mu ṱalutshedze uri zwenezwo zwivhuya zwi sumbedza uri Yehova u a mu funa. (Yes. 48:17, 18) Musi mugudiswa waṋu a tshi bvela phanḓa a tshi funa Yehova, ndi hone a tshi ḓo ita tshanduko dzi ṱoḓeaho.—1 Yoh. 5:3.

9. U tendelana na Marko 10:29, 30, muthu a nga thuswa nga mini uri a ḓiimisele u xelelwa nga zwiṅwe zwithu uri a vhe mufunziwa o lovhedzwaho?

⁹ Uri mugudiswa wa Bivhili a ite mvelaphanḓa u vhuya u swika a tshi lovhedzwa, u tea u ḓiimisela u xelelwa nga zwiṅwe zwithu. U fana na mupfumi we ra amba nga hae, vhaṅwe vhagudiswa vha xelelwa nga thundu ine vha vha nayo. Arali mushumo une vha vha nawo u sa tshimbidzani na milayo ya Bivhili, vha nga tea u wana muṅwe mushumo. Vhanzhi vha nga tea u ṱutshela khonani dzine dzi si fune Yehova. Vhaṅwe vha nga ṱutshelwa nga mashaka ane a si fune Ṱhanzi dza Yehova. Yesu o zwi amba uri vhaṅwe zwi ḓo vha konḓela u xelelwa nga yeneyo nḓila. Fhedzi o fhulufhedzisa uri vhane vha mu tevhela a vha nga hanganei. Yehova u ḓo vha ṋea malamba nga u vha ṋea muṱa wa vhathu vha mu gwadamelaho vha re na lufuno. (Vhalani Marko 10:29, 30.) Ni nga thusa hani mugudiswa waṋu wa Bivhili uri a vhuyelwe nga tshenetshi tshifhiwa tshavhuḓi?

10. Ni guda mini kha zwe Manuel a zwi amba?

¹⁰ Ivhani khonani ya mugudiswa waṋu. Ndi zwa ndeme uri ni sumbedze mugudiswa waṋu uri ni na ndavha nae. Ndi ngani? Ṱhogomelani zwe Manuel ane a dzula Mexico a zwi amba. U ṱalutshedza nḓila ye mugudisi wawe a mu thusa ngayo musi a tshi kha ḓi vha mugudiswa wa Bivhili. U ri: “Tshifhinga tshoṱhe musi ri sa athu u thoma u guda, mugudisi wanga o vha a tshi thoma a mmbudzisa uri zwi khou ntshimbilela hani. O vha a tshi nthusa uri ndi vhofholowe nahone a tshi ita uri ndi ambe nga tshiṅwe na tshiṅwe tshi re khanani yanga. Ndo vha ndi tshi zwi vhona uri u na ndavha na nṋe.”

11. Vhagudiswa vhashu vha nga vhuyelwa hani nga u ṱwa na riṋe?

¹¹ Ni ḓifhe tshifhinga tsha u ṱwa na vhagudiswa vhaṋu, u fana na zwe Yesu a zwi ita kha vhatevheli vhawe. (Yoh. 3:22) Arali mugudiswa waṋu a tshi khou ita tshanduko vhutshiloni hawe, ni nga kha ḓi mu rambela muḓini waṋu uri ni nwe nae tie, kofi kana u ḽa nae kana na ṱalela noṱhe iṅwe ya broadcast dza ṅwedzi na ṅwedzi. Mugudiswa waṋu anga zwi takalela vhukuma u rambiwa nga zwifhinga zwa musi khonani dzawe kana mashaka awe vha tshi khou pembelela holodei dzi sa tendelani na Bivhili ngauri nga tshenetsho  tshifhinga a nga ḓipfa e na vhuludu. Kazibwe ane a dzula Uganda u ri: “Ndi vhona u nga ndo guda zwinzhi nga ha Yehova musi ndi tshi ṱwa na mugudisi wanga, u fana na musi ndi kha ngudo yanga ya Bivhili. Ndo kona u vhona nḓila ine Yehova a ṱhogomela ngayo vhathu vhawe na nḓila ye vhathu vhawe vha takala ngayo. Ndi zwe nda vha ndi tshi zwi ṱoḓa vhutshiloni hanga.”

12. Ndi ngani ri tshi fanela u ḓa na vhahuweleli vho fhambanaho musi ri tshi fara pfunzo ya Bivhili?

¹² Iyani na vhahuweleli vho fhambanaho musi ni tshi ya u fara pfunzo ya Bivhili. Ri nga vhona zwi tshi leluwa nga zwiṅwe zwifhinga u ṱuwa ri roṱhe kana u tshimbila na muthu muthihi musi ri tshi ya u fara pfunzo ya Bivhili. Naho zwi tshi nga leluwa u ita nga u ralo, zwi nga thusa mugudiswa washu wa Bivhili arali nga zwiṅwe zwifhinga ri tshi ḓa khae na vhahuweleli vho fhambanaho. Dmitrii ane a dzula Moldova u ri: “Muhuweleli muṅwe na muṅwe we a vha a tshi ḓa kha ngudo yanga o vha a tshi ṱalutshedza zwithu nga nḓila i songo ḓoweleaho. Zwo nthusa uri ndi vhone nḓila dzi sa fani dze nda vha ndi tshi nga shumisa ngadzo zwe nda vha ndi tshi khou zwi guda. Zwo ita uri ndi si vhe na ṱhoni musi ndi tshi ya muṱanganoni lwa u thoma ngauri vhunzhi ha vhahashu ndo vha ndo no vha vhona.”

13. Ndi ngani ri tshi tea u thusa mugudiswa washu uri a ḓe miṱanganoni?

¹³ Thusani mugudiswa waṋu uri a vhe hone miṱanganoni ya tshivhidzo. Ndi ngani? Ndi ngauri Yehova u vhudza vhagwadameli vhawe uri vha kuvhangane, ndi iṅwe nḓila ine ra mu gwadamela ngayo. (Vhahev. 10:24, 25) Zwiṅwe hafhu, vhahashu vha re tshivhidzoni ndi muṱa washu. Musi ri navho miṱanganoni ri tou nga ri khou ḽa zwiḽiwa zwi ḓifhaho ri fhethu huthihi. Musi ni tshi thusa mugudiswa wa Bivhili uri a ḓe muṱanganoni, ni vha ni tshi khou mu thusa uri a dzhie vhukando ha ndeme vhune ha ḓo ita uri a lovhedzwe. Fhedzi zwi nga mu konḓela vhukuma uri a thome u ḓa miṱanganoni. Bugu Ḓiphiṋeni Nga Vhutshilo Lwa Tshoṱhe! i nga thusa hani mugudiswa waṋu uri a piringulule thaidzo ine ya mu thivhela u ḓa miṱanganoni?

14. Ri nga ṱuṱuwedza hani mugudiswa washu uri a ḓe miṱanganoni?

¹⁴ Shumisani ngudo 10 ya bugu Ḓiphiṋeni Nga Vhutshilo Lwa Tshoṱhe! u ṱuṱuwedza mugudiswa waṋu. Musi yeneyi bugu i sa athu bva, ho humbelwa vhahuweleli vha re na tshenzhelo uri vha lingedze ngudo 10 kha vhagudiswa vhavho. Vho amba uri yo thusa vhagudiswa vhavho u ḓa muṱanganoni. Ndi ngoho uri a no ngo tea u lindela u swika ni tshi swika kha ngudo 10 uri ni rambe mugudiswa waṋu wa Bivhili uri a ḓe miṱanganoni. Ni ṱavhanye ni mu rambe nahone ni dzule ni tshi mu ramba. Vhagudiswa vho fhambana, na thaidzo dzine vha sedzana nadzo a dzi fani. Ni ṱhogomele zwine mugudiswa waṋu a zwi ṱoḓa na u vhona arali hu na nḓila ine na nga mu thusa ngayo. Ni songo kulea nungo arali zwi tshi mu dzhiela tshifhinga uri a ḓe miṱanganoni. Ni songo fhela mbilu, fhedzi ni dzule ni tshi mu ramba uri a ḓe miṱanganoni.

15. Mugudiswa washu a nga ofha mini?

¹⁵ Naa ni kha ḓi zwi humbula musi ni tshi ofha u vha muṅwe wa Ṱhanzi dza Yehova? Khamusi no vha ni tshi humbula u nga ni nga si kone u huwelela nnḓu nga nnḓu. Kana khamusi no vha ni tshi ofha uri muṱa waṋu kana khonani dzaṋu vha ḓo ni pikisa. Arali zwo ralo, ni nga pfesesa nḓila ine mugudiswa waṋu wa Bivhili a khou ḓipfa ngayo. Yesu o amba uri vhaṅwe vhathu vho vha vha tshi ḓo ofha nga yeneyi nḓila. Fhedzi o ṱuṱuwedza vhatevheli vhawe uri vha si tendele nyofho dzi tshi vha litshisa u shumela Yehova. (Mat. 10:16, 17, 27, 28) Yesu o thusa hani vhatevheli vhawe uri vha si tsha ofha? Ni nga mu edzisa hani?

16. Ri nga gudisa hani mugudiswa washu u vhudza vhaṅwe zwine a zwi tenda?

¹⁶ Gudisani mugudiswa waṋu u vhudza vhaṅwe zwine a zwi tenda. Vhafunziwa vha Yesu  vha nga vha vho tshuwa musi a tshi vha ruma uri vha ye u huwelela. Fhedzi Yesu o vha thusa nga u vha vhudza uri vha huwelele gai na uri vha huwelele nga ha mini. (Mat. 10:5-7) Ni nga edzisa hani Yesu? Thusani mugudiswa waṋu uri a ḓivhe uri a nga huwelela kha vhonnyi. Sa tsumbo, ni nga mu vhudzisa arali a tshi ḓivha muṅwe muthu ane a nga vhuyelwa nga zwine a khou zwi guda Bivhilini nga tshenetsho tshifhinga. Nga murahu, ni nga mu thusa u lugiselela zwine a ḓo zwi amba nga u mu sumbedza nḓila yo leluwaho ya u vhudza vhaṅwe yeneyo ngoho. Arali zwo tea, ni nga ita nḓowe-nḓowe nae ni tshi shumisa tshiteṅwa “Vhaṅwe Vhathu Vha Amba Uri” na “Muṅwe Muthu A Nga Vhudzisa Uri” kha bugu Ḓiphiṋeni Nga Vhutshilo Lwa Tshoṱhe! Musi ni tshi ita nga u ralo, ni gudise mugudiswa waṋu u shumisa Bivhili u fhindula nga nḓila yo leluwaho na nga vhuṱali.

17. Ri nga shumisa hani Mateo 10:19, 20, 29-31, u thusa mugudiswa washu uri a fhulufhele Yehova?

¹⁷ Thusani mugudiswa waṋu uri a fhulufhele Yehova. Yesu o vhudza vhafunziwa vhawe uri Yehova u ḓo vha thusa ngauri u a vha funa. (Vhalani Mateo 10:19, 20, 29-31.) Ni humbudze mugudiswa waṋu uri na ene Yehova u ḓo mu thusa. Musi ni tshi rabela nga ha zwipikwa zwawe ni nae, ni vha ni tshi khou mu thusa uri a ḓitike nga Yehova. Franciszek ane a dzula Poland u ri: “Musi mugudisi wanga a tshi khou rabela, kanzhi o vha a tshi amba nga ha zwipikwa zwanga. Musi ndi tshi vhona Yehova a tshi fhindula thabelo dza mugudisi wanga, na nṋe ndo mbo ḓi thoma u rabela. Musi ndi tshi kha ḓi tou bva u tholiwa, ndo vhona Yehova a tshi nthusa musi ndi tshi humbela uri ndi si ḓe mushumoni uri ndi kone u ya miṱanganoni na buthanoni.”

18. Yehova u ḓipfa hani nga mushumo wa u gudisa une Vhakriste vha u ita?

¹⁸ Yehova u na ndavha na vhagudiswa vhashu vha Bivhili. U a zwi ḓivha uri Vhakriste vha a shuma nga maanḓa u thusa vhathu uri vha vhe na vhushaka havhuḓi nae nahone u a vha funa ngauri vha ita zwenezwo. (Yes. 52:7) Arali ni si na pfunzo ya Bivhili zwa zwino, ni nga thusa vhagudiswa uri vha ite mvelaphanḓa u vhuya u swika vha tshi lovhedzwa nga u ṱuwa na vhaṅwe vhahuweleli musi vha tshi ya u guda navho.