1. Awiixutti a Yesu yaaleelale exeeni atthu ale yaathukumanne?

MUTTITTHI muulupale wa atthu, athiyana ni alopwana yaahirowa oYerusalemu. Awo yaakhuma ilapo soovirikana ni yaalavula mattaava oovirikana. Nihiku nne, yaahikhumelela etthu yootikiniha. Mootutuxerya, aYuda akina yaawo yaari atthareli a Yesu yaahipacerya olavula mattaava aya atthu ale yaakhumme ilapo soovirikana! Nto eyo yaahaatikiniha atthu otheene. Masi etthu yaatempe waavara murima atthu ale, waari muhupi yiiwale aya olavuliwaka ni atthareli a Yesu ni murummwa Pedru. Maana awo yaahiixutta wira yaaphavelaka woopowa, yaahaana omwaamini Yesu Kristu. Awo yaahihakalala vanceene mpakha okoha wira: “Anna, nipake exeeni?” Nto Pedru aahiwaakhula wira: “Khula mmosa a nyuwo opatisiwe”.—Mit. 2:37, 38.

2. Mwaha ola, ninrowa oweha exeeni? (Nwehe efootu ya ekaapa.)

² Moottharelana, yaahiiraneya etthu yoohakalaliha vanceene. Atthu 3.000 yaahipatisiwa nihiku nne khukhala atthareli a Yesu Kristu. Moohaanyiherya, waahipacerya muteko muulupale Yesu aarumme awe atthareli awe eekeekhai ovara, eyo piiyo, waapaka atthareli a Yesu. Nto muteko owo onnivariwa ni atthareli eekeekhai a Yesu mpakha olelo-va. Ekeekhai wira olelo-va, khivaniweryaneya omusomiha mutthu mpakha opatisiwa iwoora vakhaani paahi. Maana pooti ovira, myeeri, mwaakha wala ovikana wira nimukhaliherye mutthu okela vahoolo mpakha opatisiwa. Akhala wira munnimusomiha mutthu Biibiliya, nyuwo munnisuwela oratteene wira nihaana wiimananiha wira nimukhaliherye mutthu owo okhala mutthareli a Kristu. Mwaha ola, ninrowa othokorerya etthu mukhanle anyu oopaka wira mmukhaliherye naxikola anyu a Biibiliya okela vahoolo mpakha opatisiwa.

3. Moovarihana ni Matheyo 28:19, 20, naxikola a Biibiliya ohaana opaka exeeni wira okele vahoolo mpakha opatisiwa?

³ Ohinatthi opatisiwa, ole munimusomiha anyu Biibiliya ohaana weettela itthu Biibiliya oniixuttiha awe. (Mmusome Matheyo 28:19,  20.) Vaavo naxikola onvarihela awe muteko ele oniixutta awe, owo onlikana ni “mulopwana aarina ankhili” Yesu aamulavunle awe nlikanyiho nawe, yoowo aathimpe moowiixerya ni aatenke empa awe vamwala. (Math. 7:24, 25; Luka 6:47, 48) Ninrowa omukhaliherya sai naxikola weettela ele oniixutta awe? Nrowe niwehe malakiheryo mararu anrowa onikhaliherya.

4. Munrowa omukhaliherya sai naxikola anyu ohihiya okela vahoolo mpakha opatisiwa? (Nwehe ekaaxa eni: “ Mmukhaliherye Naxikola Anyu Okhalana ni Ophwanya Soolukama Sawe”.)

⁴ Mmukhaliheryeke naxikola anyu okhalana soolukama. Xeeni vari aya vooloka opaka eyo? Nkahaya nwehe nlikanyiho nna: Muupuwele wira nyuwo muniphavela weetta mukwaha woorekama ni ekaaro. Woonasa wene, okathi munimpaka anyu palano, nyuwo munnihela muhina mapuro ooreera muniphavela anyu weemela. Opaka eyo enimookhaliheryani ohikhulumuwa mwaha wa orekama opuro munrowa anyu. Mwa enamuna emosaru, naxikola anyu a Biibiliya ohaana okhalana ni ophwanya soolukama sa okathi vakhaani. Nto eyo enoomukhaliherya ophwanya yoolakela awe ya opatisiwa. Wira mmukhaliherye naxikola anyu okela vahoolo, murumeeleke mpantta oni: “Yoolakela aka” ori eliivuru Okumi Yoohimala! Wanikisa wa khula yoosoma, nvaaneleke ni naxikola anyu wira mmooniherye moota okhalana soolukama sinrowa aya omukhaliherya naxikola anyu weettela ele oniixutta awe. Akhala wira mookhalana yoolukama ekina muniphavela anyu wira naxikola anyu ophwanye, nyuwo muhaana olepa mpantta oni: “Ekina”. Okathi wootheene murumeeleke mipantta iyo wira nvaanele ni naxikola anyu voohimya sa soolukama sawe sikhale sa okathi vakhaani wala sa okathi munceene.

5. Moovarihana ni Marko 10:17-22, Yesu anvekenle exeeni mulopwana thaaciri ni nthowa xeeni?

⁵ Mmukhaliheryeke naxikola anyu opaka marukunuxo mookumini mwawe. (Mmusome Marko 10:17-22.) Yesu aanisuwela oratteene wira vaamunvila vanceene mulopwana ole thaaciri otumiha mireerelo sawe sotheene. (Mar. 10:23) Hata vaari siiso, Yesu aahinvekela mulopwana ole opaka marukunuxo ale maalupale mookumini mwawe. Mwaha wa xeeni? Mwaha woowi, Yesu aanimphenta vanceene. Okathi mukina, hiyo ninnoovelela  omutumererya naxikola ahu weettela ele oniixutta awe, mwaha woowi nnoona wira khonrowa owerya opaka marukunuxo awo. Ekeekhai wira onnivira okathi wira mutthu orule omutthu wa khalai ni owara omutthu wa niinaano. (aKol. 3:9, 10) Musuweleke wira akhala wira munimwaakuvela omukhaliherya naxikola anyu opaka marukunuxo, nave-tho moohipisa owo onoopaka marukunuxo awo. Nave-tho, musuweleke wira vaavo munilavula anyu mootaphuwa voohimya sa opaka marukunuxo, nyuwo munnooniherya wira munnimphenta vanceene naxikola anyu.—Esal. 141:5; Mir. 27:17.

6. Xeeni vari aya vooloka orumeela makoho animukhaliherya mutthu ohimya moonelo awe?

⁶ Makoho animwiiriha mutthu ohimya moonelo awe, anoomukhaliherya naxikola anyu ohimya moonelo awe voohimya sa mwaha munithokorerya anyu. Nto murumeeleke makoho animwiiriha mutthu ohimya moonelo awe wira musuwele akhala wira naxikola anyu onniiwexexa ni onnikupali ele oniixutta awe. Eliivuru Okumi Woohimala!, yookhalana makoho manceene ammukhaliherya mutthu ohimya moonelo awe. Mwa ntakiheryo, yoosoma 4 nookhala nikoho ninhimya wira: “Yehova onoonela sai vaavo nyuwo munirumeela anyu nsina nawe?” Yoosoma 9, nookhala nikoho ninhimya wira: “Itthu xeeni muniphavela anyu ovekela?” Okathi mukina, naxikola anyu onoophavelaka okathi wira uupuwele saana moota woowaakhula makoho awo animukhaliherya mutthu ohimya moonelo awe. Nto, nyuwo pooti omwiixuttiha osuwela wuupuwela saana. Mwa ntakiheryo, mmukhaliheryeke naxikola anyu wuupuwela soolepa sa mBiibiliyani wala ifootu siri yoosoma eyo.

7. Ninrowa orumeela sai sowiiraneya sa atthu eekeekhai wira nimukhaliherye naxikola ahu?

⁷ Nuumala, naxikola anyu oweha marukunuxo onireerela awe opaka, murumeeleke sowiiraneya sekeekhai sa atthu akina wira mmukhaliherye opaka marukunuxo. Mwa ntakiheryo, akhala wira naxikola anyu vanninvila orowela mithukumano, mmooniherye eviidiyu eri yoosoma 14 eni: Yehova Onnikikhapelela yeeyo eri mpantta oni: “Nwehe Itthu Sikina”. Soosoma sinceene sa eliivuru Okumi Woohimala! sookhala sowiiraneya sa atthu eekeekhai mpantta oni: “Mwiixutte Itthu Sikina” ni mpantta oni “Nwehe Itthu Sikina”. * Masi mukhalaneke ephoole wira muhimulikanyiheke naxikola anyu ni atthu akina muhimyaka moolumo ntoko: “Akhala wira ola oowerya oopaka ela, ni nyuwo-tho munoowerya opaka”. Mmuhiyeke mootaphuwa oweha etthu okhanle awe oopaka. Etthu mukhanle anyu oopaka, ori ottittimiherya iponto suulupale sa iviidiyu sinrowa omukhaliherya ovarihela muteko wala weettela ele oniixutta awe mBiibiliyani. Woonasa wene, nyuwo pooti ottittimiherya yoolepa wala etthu yooloka mutthu owo aapanke awe. Vaaweryaneyaka, okathi wotheene muttittimiheryeke moota Yehova aamukhalihenrye awe mutthu owo.

8. Munrowa omukhaliherya sai naxikola anyu omphenta Yehova?

⁸ Mmukhaliheryeke naxikola anyu omphenta Yehova. Munrowa opaka sai eyo? Vaareerelaka, okathi wotheene muttittimiheryeke mikhalelo sa Yehova. Mmukhaliheryeke naxikola anyu osuwela wira Yehova Muluku oohakalala ni okathi wotheene onnaakhaliherya ale animphenta. (1 Tim. 1:11; aHeeb. 11:6) Mmooniheryeke naxikola anyu wira weettela ele Biibiliya oniixuttiha awe onniniphwanyiha mireerelo, nto mareeliho awo annooniherya wira Yehova onniniphenta. (Yes. 48:17, 18) Vaavo naxikola anyu onrowa awe otepaka omphenta Yehova, eyo enoomukhaliherya opaka marukunuxo mookumini mwawe.—1 Yoh. 5:3.

9. Moovarihana ni Marko 10:29, 30, exeeni enrowa omukhaliherya mutthu oleva itthu sikina wira okhale mutthareli oopatisiwa a Yesu?

⁹ Wira naxikola anyu a Biibiliya okele vahoolo mpakha opatisiwa ohaana oleva itthu sikina. Ntoko  mulopwana thaaciri nimulavunle ahu wanipacerya, anaxikola akina a Biibiliya ahaana oleva mireerelo saya sikina. Mwa ntakiheryo, akhala wira muteko awe khonivarihana ni malakiheryo a mBiibiliyani, owo ohaana ohiya ni waavya muteko mukina. Nave, anaxikola anceene a Biibiliya, ahaana ohiya weetta ni apatthani aya a mulaponi, yaawo ahinimphenta Yehova. Akina pooti onyanyaliwa ni amusi aya yaawo ahinaaphavela Anamoona a Yehova. Yesu aanisuwela oratteene wira atthu akina waamwaavila opaka marukunuxo awo. Masi owo aahileiherya wira ale yaarowa othanla omutthara, khiyaarowa onyoonyiheya nnakhala othanana. Awo yaamureelihiwa avahiwaka emusi yoophenta ya atthu a Muluku. (Mmusome Marko 10:29, 30.) Muhaana opaka exeeni wira naxikola anyu a Biibiliya aakhele yoovaha eyo ya faita yinceene?

10. Yowiiraneya ya Manuel, ewiixuttinheni exeeni?

¹⁰ Mukhaleke mpatthani a naxikola anyu. Ti vooloka omooniherya naxikola anyu a Biibiliya wira munnimuthokorerya saana. Mwaha wa xeeni? Nkahaya nwehe ele yaamwiiranenle Manuel, yoowo onikhala oMéxico. Uupuwelaka okathi aasomihiwa awe Biibiliya, Manuel onihimya so: “Ehinatthi khula yoosoma ya Biibiliya, munna aakisomiha Biibiliya aanikikoha ihaali ni moota itthu saakeettela aya. Owo aanikihiya ootaphuwa ni aanikeemererya ohimya khula etthu kaaphavela aka. Kaanoona oratteene wira aanikithokorerya saana”.

11. Xeeni vari aya vooloka ole onisomihiwa Biibiliya oviriha okathi ori ene ni munna onimusomiha Biibiliya?

¹¹ Yesu aaniviriha okathi ori ene ni awiixutti awe. Nto nyuwo muhaana opaka etthu emosaru. (Yoh. 3:22) Akhala wira naxikola anyu onnikela vahoolo, nyuwo pooti omulattula owannyu wira nwurye exa wala ekafe, olya vamosa wala oweha vamosa eprokrama ya mweeri ya JW Broadcasting. Eyo enoomukhaliherya vanceene naxikola anyu a Biibiliya, otepexa wene akhala wira munipaka eyo mahiku a iferiado mwaha woowi eyo enoomukhaliherya ovukula omeekha. Munna oniihaniwa Kazibwe yoowo onikhala wUganda, onihimya so: “Kinoona wira etthu ekikhalihenrye omusuwela Yehova khahiyo paahi okathi naasoma ahu, masi-tho okathi kaavirihaka kiri ene ni munna aakisomiha Biibiliya. Kaahoona wira Yehova onnaathokorerya arumeyi awe ni annihakalala vanceene. Eyo ti etthu kaaphavela aka”.

12. Xeeni vari aya vooloka waakuxa anamalaleerya oovirikana naarowa aka wiiriha yoosoma ahu ya Biibiliya?

 ¹² Mwaalattuleke anamalaleerya akina wira mwiirihe yoosoma eyo ya Biibiliya. Okathi mukina, vannikhweya orowa wiiriha soosoma sa Biibiliya hiyo nri ene mekhihu wala omukuxa namalaleerya mmosaru naarowaka wiiriha yoosoma ya Biibiliya. Nnaamwi okathi mukina vari ene vooloka opaka eyo, nnoomukhaliherya vanceene naxikola ahu akhala wira ninnaakuxa anamalaleerya akina. Dmitrii yoowo onikhala oMoldávia ohimmye so: “Khula namalaleerya aamuhoola munna aakisomiha Biibiliya, aanitthokiherya oratteene eponto. Eyo yaanikikhaliherya ovarihela muteko mwa enamuna ekina eponto nathokorerya ahu. Nto vaavo kaarowenle aka muthukumano woopacerya, nkaatempe woova wala wuuliwa muru mwaha woowi kaanaasuwela anna ni arokora anceene”.

13. Xeeni vari aya vooloka omukhaliherya naxikola anyu orowela mithukumano?

¹³ Mmukhaliheryeke naxikola anyu orowela mithukumano. Mwaha wa xeeni? Mwaha woowi Yehova oniphavela wira ale animukokhorela athukumaneke. Nto othukumana oniirela mpantta okokhorela wahu. (aHeeb. 10:24, 25) Nave, anna ni arokora mmulokoni ari ntoko amusi ahu. Tthiri vaavo ninkhala ahu vamosa mmuthukumanoni, vanikhala ntoko wira ninlya yoolya yoosiva hoothe. Ti vooloka nyuwo omukhaliherya naxikola anyu a Biibiliya orowela mithukumano mwaha woowi nno nivalo nuulupale ninrowa omukhaliherya okela vahoolo mpakha opatisiwa. Masi pooti onvila naxikola anyu a Biibiliya opacerya orowela mithukumano. Eliivuru Okumi Woohimala!, enrowa omukhaliherya sai?

14. Munrowa omukhaliherya sai naxikola anyu orowela mithukumano?

¹⁴ Murumeeleke yoosoma 10 ya eliivuru Okumi Woohimala! wira mmukhaliherye naxikola anyu. Ehinatthi okumiheriwa eliivuru ela, yaahivekeliwa anamalaleerya arina sookumanana sinceene wira yeererye wala arumeele yoosoma ela. Awo ahimmye wira yoosoma ela ennikhaliherya vanceene, maana ehaakhaliherya anaxikola aya a Biibiliya opacerya orowela mithukumano. Ekeekhai wira khivanitthuneya olipelela mpakha ophiya yoosoma 10 wira mmulattule ole munimusomiha anyu Biibiliya orowela mithukumano. Nto mwaakuveleke omulattula orowela mithukumano ole munimusomiha anyu Biibiliya ni mpakeke eyo ikwaha sinceene. Musuweleke wira khula naxikola a Biibiliya, ookhalana mixankiho sawe. Nto nwehe etthu enimuxankiha naxikola anyu ni etthu mukhanle anyu oopaka wira mmukhaliherye. Hata opisaka orowela mithukumano, muhikhulumuwe, mumpixeryeke murima ni muhihiye omulattula.

15. Itthu xeeni anaxikola ahu a Biibiliya akhanle aya oowoova?

¹⁵ Niireke nyuwo mwaanoovelela okhala Namoona a Yehova? Woonasa wene, nyuwo muupuwela wira khimwaarowa owerya olaleerya empa ni empa. Aahiiso, nyuwo mwaanoova olupatthiwa ni amusi ni apatthani anyu. Akhala wira mwaahikhalana mixankiho iyo, eyo enimookhaliheryani osuwela ele enimuxankiha ole munimusomiha anyu Biibiliya. Yesu aanisuwela wira atthu akina yaamoovaka itthu iyo. Masi aahaatumererya oheemererya woova owiirihaka ohiya omurumeela Yehova. (Math. 10:16, 17, 27, 28) Yesu aapanke exeeni wira aakhaliherye atthareli awe oxintta woova? Nyuwo munrowa otthara sai ntakiheryo sa Yesu?

16. Munrowa omwiixuttiha sai naxikola anyu a Biibiliya olaleerya?

¹⁶ Mmwiixuttiheke naxikola anyu a Biibiliya olaleerya. Okathi Yesu aarumme awe awiixutti awe orowa olaleerya, awo yaahixanka vakhaani. Masi Yesu aahaakhaliherya. Moota xeeni? Owo aahaaleela awiixutti awe, opuro woolaleerya ni muhupi yaarowa aya olaleya. (Math. 10:5-7) Munrowa otthara sai ntakiheryo na Yesu? Mmukhaliheryeke naxikola anyu a Biibiliya oweha opuro okhanle awe oolaleerya. Mwa ntakiheryo, mmukoheke so: ‘Niireke munnimusuwela mutthu aarowa osiveliwa vanceene osuwela ekeekhai ela ya mBiibiliyani?’ Nuumala-vo,  mmukhaliheryeke naxikola anyu oweha enamuna yookhweya okhanle awe oomuleela ekeekhai eyo mutthu owo. Vaareerelaka, nyuwo pooti wunsayari ni naxikola anyu a Biibiliya murumeelaka mpantta oni: “Atthu Akina Anihimya Wira” wala “Atthu Akina Pooti Wookohani Wira” ori eliivuru Okumi Woohimala! Okathi munipaka anyu eyo, mmukhaliheryeke naxikola anyu omurumeela Biibiliya wira aakhule mwa enamuna yookhweya ni mooreerela murima.

17. Ninrowa omurumeela sai Matheyo 10:19, 20, 29-31, wira nimukhaliherye naxikola ahu omuroromela Yehova?

¹⁷ Mmukhaliheryeke naxikola anyu omuroromela Yehova. Yesu, aahaaleela awiixutti awe wira Yehova onnaaphenta ni aarowa waakhaliheryaka. (Mmusome Matheyo 10:19, 20, 29-31.) Nto mmuupuxeryeke naxikola anyu wira Yehova onrowa omukhaliheryaka. Enamuna emosa mukhanle anyu oomukhaliherya naxikola anyu omuroromela Yehova, ori ovekela ni yena voohimya sa soolukama sawe. Munna Franciszek yoowo onikhala oPolônia onihimya so: “Okathi wotheene aavekela awe, munna aakisomiha Biibiliya aanihela muhina soolukama saka. Vaavo kaawehaka wira Yehova aanaakhula mavekelo a munna ole aakisomiha Biibiliya, kaahipacerya ovekela. Miyo kaahoona wira Yehova aanaakhula mavekelo aka vaavo kaaphwannye aka muteko musya ni kaavahiwe aka efolka wira kanwehe konkresu ni mithukumano sikina”.

18. Yehova onoonela sai muteko anivara aya maKristau a ekeekhai?

¹⁸ Yehova onnaavaha efaita yinceene anaxikola ahu a Biibiliya. Nave Yehova onnaaphenta ni onnixukhurela wiimananiha wa maKristau otheene yaawo anaakhaliherya atthu akina omusuwela oratteene. (Yes. 52:7) Woonasa wene, nyuwo khamunimusomiha mutthu Biibiliya, hata vari siiso muhaana waahoola anamalaleerya akina wiiriha soosoma saya sa Biibiliya. Mwiira siiso, nyuwo munimwaakhaliherya ale anisomihiwa Biibiliya okela vahoolo mpakha opatisiwa.