1. Han siyahan nga siglo, ano an iginpabuhat ha usa nga daku nga grupo?

USA nga daku nga grupo hin kalalakin-an ngan kababayin-an an nagtirirok ha Jerusalem. Tikang hira ha damu nga nasud ngan iba-iba an ira linggwahe. May urusahon nga nahitabo hito nga adlaw. May usa nga grupo han ordinaryo nga mga Judio nga tigda nga nakayakan han mga linggwahe han mga bisita! Nahipausa gud hito an mga tawo. Pero mas urusahon pa gud kon ano an ginsiring ha ira hito nga mga Judio ngan an ginsiring ni apostol Pedro ha ngatanan. Nahibaroan nira nga mahimo hira matalwas pinaagi ha pagpakita hin pagtoo kan Jesu-Kristo. Nabantad gud hira hito nga mensahe. Napagios gud hira salit nagpakiana hira: “Ano an sadang namon buhaton?” Binaton hi Pedro: “Magpabawtismo an tagsa ha iyo.”​—Buh. 2:37, 38.

2. Ano an aton uusisahon hini nga artikulo? (Kitaa an retrato ha kobre.)

² Makatirigamnan gud an sunod nga nahitabo. Hito nga adlaw, mga 3,000 an nabawtismohan sugad nga mga disipulo han Kristo. Amo ini an tinikangan han daku nga buruhaton nga panhimo hin disipulo nga iginsugo ni Jesus ha iya mga sumurunod. Ini nga buruhaton nagpapadayon pa gihapon tubtob yana. Ha aton panahon, diri naton mabubuligan an usa nga tawo nga magin kwalipikado ha bawtismo ha sulod la hin pipira ka oras. Bangin lumabay anay an mga bulan o usa ka tuig pa ngani o sobra pa antes mabawtismohan an usa nga estudyante. Nagkikinahanglan hin pangalimbasog an paghimo hin disipulo, sugad han imo naieksperyensyahan  kon may Bible study ka yana. Hini nga artikulo, aton uusisahon kon ano an mahimo mo buhaton basi mabuligan an imo estudyante ha Biblia nga magin bawtismado nga disipulo.

3. Sumala ha Mateo 28:19, 20, ano an kinahanglan buhaton han usa nga estudyante basi mag-uswag hiya ngadto ha pagpabawtismo?

³ Antes mabawtismohan an usa nga estudyante ha Biblia, kinahanglan niya iaplikar an mga igintututdo han Biblia. (Basaha an Mateo 28:19, 20.) Kon gin-aaplikar han usa nga estudyante an iya nahibabaroan, nagigin pariho hiya ha “maaramon nga tawo” ha ilustrasyon ni Jesus nga nag-ukad hin hilarom basi tukuron an iya balay ha bawbaw han marig-on nga bato. (Mat. 7:24, 25; Luc. 6:47, 48) Paonan-o naton mabubuligan an usa nga estudyante nga iaplikar an iya nahibabaroan? Hisgotan naton an tulo nga suhestyon.

4. Paonan-o naton mabubuligan an usa nga estudyante nga padayon nga mangalimbasog basi magin kwalipikado ha bawtismo? (Kitaa liwat an kahon nga “ Buligi an Imo Estudyante nga Magkab-ot hin mga Tumong.”)

⁴ Buligi an imo estudyante nga maghimo hin mga tumong. Kay ano nga kinahanglan mo ito buhaton? Tagda ini nga ilustrasyon: Kon nagbibiyahe ka hin hirayo, bangin umundang ka ha mag-opay nga lugar nga imo gin-aagian. Pinaagi hito, diri mo mahuhunahuna nga hirayo an imo kakadtoan salit diri ka mahuhulop. Sugad man, kon an estudyante ha Biblia naghihimo hin mga tumong nga madali makab-ot, posible nga makita niya nga makakab-ot niya an tumong nga pagpabawtismo. Gamita an kahon nga “An Puydi Mo Buhaton” ha Mabuhi hin Malipayon ha Waray Kataposan! nga libro basi mabuligan an imo estudyante nga mag-uswag. Ha kataposan han tagsa nga leksyon, hisguti kon paonan-o an tumong mabulig ha imo estudyante nga iaplikar an iya pa la nahibaroan. Kon may nahuhunahuna ka nga iba nga tumong para ha imo estudyante, isurat ito ha  espasyo nga may nakasurat nga “Iba Pa.” Pirme gamita ini nga bahin han pag-aram basi repasuhon ha imo estudyante an iya mga tumong nga madali makab-ot pati adton iya mga tumong nga maiha makab-ot.

5. Sumala ha Marcos 10:17-22, ano an iginpabuhat ni Jesus ha riko nga lalaki, ngan kay ano?

⁵ Buligi an imo estudyante nga maghimo hin mga pagbag-o ha iya kinabuhi. (Basaha an Marcos 10:17-22.) Maaram hi Jesus nga magigin makuri para ha riko nga lalaki nga ibaligya an ngatanan niya nga panag-iya. (Mar. 10:23) Pero ginsidngan ni Jesus an lalaki nga himoon ini nga daku nga pagbag-o ha iya kinabuhi. Kay ano? Kay hinigugma hiya ni Jesus. Usahay, bangin mag-alang kita pagdasig ha usa nga estudyante nga iaplikar an iya nahibabaroan kay naghuhunahuna kita nga diri pa hiya andam maghimo hin pagbag-o. Bangin magkinahanglan hin panahon an mga tawo basi bayaan an daan nga mga binuhatan ngan isul-ot an bag-o nga personalidad. (Col. 3:9, 10) Pero kon mas temprano mo nga ipapakiistorya ha estudyante an kinahanglan niya bag-uhon, mas temprano nga matitikangan niya an pagbag-o. Kon ginbubuhat mo ito, iginpapakita mo nga hinigugma mo hiya.​—Sal. 141:5; Prob. 27:17.

6. Kay ano nga kinahanglan gumamit kita hin punto de bista nga mga pakiana?

⁶ Nagbabangon kita hin punto de bista nga pakiana basi hibaroan an opinyon o panhunahuna han estudyante ha usa nga topiko. Gamit hin sugad nga pakiana basi hibaroan mo kon ano an nasasabtan ngan gintotoohan han imo estudyante. Kon hihimoon mo ito hin regular, magigin mas masayon ha imo nga ipakiistorya ha iya an sensitibo nga mga topiko. Ha Mabuhi hin Malipayon ha Waray Kataposan! nga libro, damu an punto de bista nga mga pakiana. Pananglitan, ha leksyon 04 may pakiana: “Ha imo hunahuna, ano an inaabat ni Jehova kon ginagamit mo an iya ngaran?” Ha leksyon 09 naman may pakiana: “Ano an pipira nga butang nga karuyag mo ig-ampo?” Ha siyahan, bangin makurian an imo estudyante ha pagbaton hito nga mga pakiana. Mabubuligan mo hiya pinaagi ha pagbansay ha iya nga mangatadongan uyon ha mga teksto ngan ha mga retrato ha libro.

7. Paonan-o naton magagamit hin epektibo an mga eksperyensya?

⁷ Kon masabtan na han imo estudyante kon ano an kinahanglan niya buhaton, gamit hin mga eksperyensya basi dasigon hiya nga buhaton ito. Pananglitan, kon an imo estudyante diri regular nga naatender ha mga katirok, mahimo mo ipakita ha iya an video nga Hinigugma Ako ni Jehova nga makikita ha “Dugang nga Impormasyon” nga seksyon han leksyon 14. Ha damu nga leksyon han Mabuhi hin Malipayon ha Waray Kataposan! nga libro, may makikita ka nga sugad hito nga mga eksperyensya ha “Dugang nga Usisaha” o “Dugang nga Impormasyon” nga seksyon. * Paghirot nga diri ikompara an imo estudyante ha iba pinaagi ha pagsiring, “Kon kaya niya ito, kaya mo liwat ito.” Maopay gud kon an estudyante mismo an makahunahuna hito. Lugod, pabug-ati an importante nga mga punto nga nakabulig ha indibiduwal nga aadto ha video nga iaplikar an mga katutdoan han Biblia. Puydi mo unabihon an usa nga importante nga teksto o an usa nga praktikal nga butang nga ginhimo hito nga indibiduwal. Kon posible, pabug-ati kon paonan-o hiya ginbuligan ni Jehova.

8. Paonan-o naton mabubuligan an aton estudyante nga higugmaon hi Jehova?

⁸ Buligi an imo estudyante nga higugmaon hi Jehova. Paonan-o? Pamiling hin mga higayon nga mabubuligan mo an imo estudyante nga mas mahibaro mahitungod ha mga kalidad ni Jehova. Buligi hiya nga hunahunaon hi Jehova sugad nga malipayon nga Dios nga nabulig hadton mga nahigugma ha iya. (1 Tim. 1:11; Heb. 11:6) Ipakita  ha estudyante nga magpapahimulos hiya kon iaaplikar niya an impormasyon, ngan isaysay ha iya nga kapahayagan ito han gugma ni Jehova ha iya. (Isa. 48:17, 18) Samtang naghihilarom an gugma han imo estudyante kan Jehova, mas mapapagios hiya nga maghimo han ginkikinahanglan nga mga pagbag-o.​—1 Juan 5:3.

9. Uyon ha Marcos 10:29, 30, ano an makakabulig ha usa nga makahimo hin mga sakripisyo basi magin bawtismado hiya nga disipulo?

⁹ Kinahanglan maghimo hin mga sakripisyo an usa nga estudyante ha Biblia basi mag-uswag ngadto ha pagpabawtismo. Pariho han riko nga lalaki nga gin-unabi kanina, bangin kinahanglan isakripisyo han pipira nga estudyante an ira materyal nga mga butang. Kon an ira trabaho diri uyon ha mga prinsipyo ha Biblia, bangin kinahanglan nira mamiling hin iba nga trabaho. Damu an kinahanglan bumaya ha ira kasangkayan nga diri nahigugma kan Jehova. An iba bangin isalikway han ira mga kapamilya nga nadiri ha mga Saksi ni Jehova. Hi Jesus nagsiring nga bangin makurian an pipira nga himoon an sugad nga mga sakripisyo. Pero nagsaad hiya nga diri gud makakarag an mga sakripisyo hadton mga nasunod ha iya. Hura nga bibendisyonan hira hin mahigugmaon nga espirituwal nga pamilya. (Basaha an Marcos 10:29, 30.) Paonan-o mo mabubuligan an imo estudyante nga magpahimulos hinin maopay nga regalo?

10. Ano an imo nahibaroan ha eksperyensya ni Manuel?

¹⁰ Pakigsangkay ha imo estudyante. Importante nga ipakita mo ha imo estudyante nga interesado ka ha iya. Kay ano? Tagda an siring ni Manuel nga taga-Mexico. May kalabotan han Bible study pa hiya, hiya nagsiring: “Antes han tagsa nga pag-aram, ginkukumusta ako han akon magturutdo. Ginbubuligan niya ako nga magin relaks ngan ginpapabay-an niya ako nga mag-istorya mahitungod ha iba nga butang. Inabat ko nga interesado gud hiya ha akon.”

11. Paonan-o mahimo magpahimulos an aton mga estudyante kon makikig-upod hira ha aton?

¹¹ Paggahin hin panahon kaupod han imo mga estudyante, pariho kan Jesus nga naggahin hin  panahon kaupod han iya mga sumurunod. (Juan 3:22) Kon angayan, imbitara ha iyo balay an imo nag-uuswag na nga estudyante basi magkape o mangaon o magkita han aton binulan nga programa ha JW Broadcasting^®. Bangin labi nga apresyaron han imo estudyante kon iimbitaron mo hiya ha panahon nga an iya kasangkayan ngan mga kapamilya nagsiselebrar hin diri Kasuratanhon nga selebrasyon nga tungod hito bangin abaton niya nga nag-uusahan la hiya. Hi Kazibwe nga taga-Uganda, nagsiring: “Pagkita ko, an akon nahibaroan mahitungod kan Jehova tungod ha akon pakig-upod ha akon magturutdo pariho kadamu ha akon nahibaroan ha amon pag-aram. Nakita ko nga gin-aataman gud ni Jehova an iya katawohan ngan malipayon gud hira. Ito an akon karuyag ha akon kinabuhi.”

12. Kay ano nga dapat kita mag-upod hin iba-iba nga magwarali ha aton pag-Bible study?

¹² Pag-upod hin iba-iba nga magwarali ha pag-Bible study. Usahay, bangin abaton naton nga mas masayon para ha aton nga mag-usahan la ha pag-Bible study o mag-upod hin amo la pirme nga magwarali. Bisan kon bangin mas kombinyente ito ha aton, mas magpapahimulos an aton estudyante kon ha panapanahon mag-uupod kita hin iba-iba nga magwarali. “An tagsa nga magwarali nga naupod ha amon pag-Bible study may iba nga paagi ha pagsaysay,” siring ni Dmitrii nga taga-Moldova. “Nakabulig ito ha akon nga makita an iba pa nga mga punto ha amon gin-aadman. Waray liwat ako masyado maawod han siyahan ako nga inatender ha katirok kay damu na nga kabugtoan an akon kilala.”

13. Kay ano nga kinahanglan naton buligan an aton estudyante nga umatender ha mga katirok?

¹³ Buligi an imo estudyante nga umatender ha mga katirok. Kay ano? Kay ginsusugo ni Jehova an iya mga magsiringba nga magkatirok; bahin ito han aton pagsingba. (Heb. 10:24, 25) Dugang pa, an aton kabugtoan amo an aton espirituwal nga pamilya. Kon nagkakatirok kita upod nira, sugad hin urosa kita nga nangangaon hin marasa nga pagkaon. Kon ginbubuligan mo an imo estudyante ha Biblia nga umatender ha mga katirok, ginbubuligan mo hiya nga buhaton an usa han pinakaimportante nga pitad ngadto ha pagpabawtismo. Pero bangin makurian hiya ha pagbuhat hito. Paonan-o makakabulig ha imo estudyante an publikasyon nga Mabuhi hin Malipayon ha Waray Kataposan! basi malamposan niya an bisan ano nga nakakaulang ha iya ha pag-atender?

14. Paonan-o naton mapapagios an aton estudyante nga umatender ha mga katirok?

¹⁴ Gamita an leksyon 10 han Mabuhi hin Malipayon ha Waray Kataposan! nga libro basi mapagios an imo estudyante nga umatender. Antes irelis ini nga libro, may ginhangyo nga eksperyensyado nga mga magwarali nga testingan ini nga leksyon ha ira mga estudyante, ngan nagsiring hira nga epektibo gud ini ha pagbulig ha ira mga estudyante nga umatender ha mga katirok. Syempre, ayaw hulata nga pag-adman anay niyo an leksyon 10 antes mo imbitaron an imo Bible study nga tumambong ha mga katirok. Imbitara dayon hiya tubtob nga posible ngan pirme ito buhata. Iba-iba nga problema an gin-aatubang han mga estudyante ha Biblia. Salit tagi hin atensyon an panginahanglan han imo estudyante, ngan kitaa kon paonan-o mo hiya mabubuligan. Ayaw panluya kon diri dayon hiya umatender. Magin mapailubon ngan padayon hiya nga imbitara.

15. Ano an bangin nahahadlokan han aton estudyante?

¹⁵ Nahinunumdom ka ba nga hadto medyo nahahadlok ka nga magin Saksi ni Jehova? Bangin inabat mo nga diri mo gud makakaya nga magsangyaw ha balay-balay. O bangin nahadlok ka nga kontrahon ka han imo pamilya ngan kasangkayan. Kon amo, maiintindihan mo an inaabat han imo estudyante ha Biblia. Hi Jesus nagsiring nga an iba mahimo umabat hin sugad nga kahadlok. Pero gin-aghat niya an iya mga sumurunod nga diri tugotan an kahadlok nga magpaundang  ha ira ha pag-alagad kan Jehova. (Mat. 10:16, 17, 27, 28) Paonan-o ginbuligan ni Jesus an iya mga sumurunod nga maatohan an ira kahadlok? Ngan paonan-o mo hiya masusubad?

16. Paonan-o naton mababansay an aton estudyante nga isumat ha iba an iya nahibabaroan?

¹⁶ Padayon nga bansaya an imo estudyante nga isumat ha iba an iya nahibabaroan. Posible nga ginkulba an mga disipulo ni Jesus han ginsugo niya hira nga magsangyaw. Pero ginbuligan hira ni Jesus pinaagi ha pagsumat ha ira kon hin-o an sasangyawan ngan kon ano an ira igsasangyaw. (Mat. 10:5-7) Paonan-o mo masusubad hi Jesus? Buligi an imo estudyante nga mahibaroan kon hin-o an mahimo niya sangyawan. Pananglitan, pakianhi hiya kon may kilala hiya nga mahimo magpahimulos ha paghibaro han usa nga kamatuoran ha Biblia. Katapos, buligi hiya ha pag-andam kon ano an iya isisiring pinaagi ha pagpakita ha iya hin simple nga paagi ha pagsumat hito nga kamatuoran. Kon angayan, mahimo kamo magpraktis gamit an mga impormasyon ha ulohan nga “An Iba Nasiring” ngan “Bangin May Magpakiana,” nga makikita ha Mabuhi hin Malipayon ha Waray Kataposan! nga libro. Samtang ginbubuhat mo ito, pagpokus ha pagbansay ha imo estudyante nga gamiton an Biblia ha paghatag hin simple ngan mataktika nga mga baton.

17. Paonan-o naton magagamit an Mateo 10:19, 20, 29-31 basi buligan an aton estudyante nga sumarig kan Jehova?

¹⁷ Buligi an imo estudyante nga sumarig kan Jehova. Ginpasarig ni Jesus an iya mga disipulo nga bubuligan hira ni Jehova kay hinigugma Niya hira. (Basaha an Mateo 10:19, 20, 29-31.) Pahinumdoma an imo estudyante nga bubuligan liwat hiya ni Jehova. Mahimo mo hiya mabuligan nga sumarig kan Jehova pinaagi ha pag-unabi han iya mga tumong kon nag-aampo ka kaupod niya. “Agsob unabihon han akon magturutdo ha iya mga pag-ampo an akon mga tumong,” siring ni Franciszek nga taga-Poland. “Han nakita ko nga ginbaton ni Jehova an mga pag-ampo han akon magturutdo, nagtikang dayon ako pag-ampo. Inabat ko an bulig ni Jehova han kinahanglan ko mag-off ha akon bag-o nga trabaho basi tumambong ha mga katirok ngan ha kombensyon.”

18. Ano an inaabat ni Jehova ha mga ginbubuhat han Kristiano nga mga magturutdo?

¹⁸ Hinigugma gud ni Jehova an aton mga estudyante ha Biblia. Gin-aapresyar gud niya an mga pangalimbasog han Kristiano nga mga magturutdo ha pagbulig ha mga tawo nga magin duok ha iya, salit hinigugma niya hira. (Isa. 52:7) Kon waray ka yana Bible study, makakabulig ka la gihapon ha mga estudyante ha Biblia nga mag-uswag ngadto ha pagpabawtismo pinaagi ha pag-upod ha iba nga magwarali ha ira pag-Bible study.