1. Wetin Jesus disciples tell the plenty people wey travel come Jerusalem make they do?

PLENTY men and women travel go Jerusalem. They come from many different country and them de speak many different language. Before you know, some Jew people begin speak the different-different language of the people wey travel come Jerusalem. This one really surprise the people. But the thing wey surprise them pass na wetin this Jew people tell them and wetin apostle Peter tell everybody. The people learn say they fit get life if they show say they get faith for Jesus Christ. This message really touch this people wey travel come Jerusalem. E touch the people sotey they talk say: “Wetin we go do?” So Peter tell them say: “Make each of wuna baptize.”​—Acts 2:​37, 38.

2. Wetin we go talk about for this article? (Check picture for front cover.)

² The thing wey happen next really dey wonderful. About 3,000 people baptize that day, and they become disciples of Jesus Christ. Na this one start the big work wey Jesus command e followers to do and that work na to make disciples. Jesus disciples still de do the work till today. Today, we no go fit talk to person just for some hours and then e go dey ready to baptize. Some months or even one year or more years fit pass before Bible student go reach to baptize. No be small work to help person become disciple of Christ. If you get person wey you de study Bible with, you go agree say this one na true. For this article, we go talk about wetin you fit do to help your Bible student baptize.

3. As e dey for Matthew 28:​19, 20, wetin Bible student must do so that e go grow reach to baptize?

³ Before Bible student go grow reach to baptize, e must obey the things wey Bible de teach. (Read Matthew 28: 19, 20.) When Bible student de do wetin e learn, e go be like the “man wey get sense” wey Jesus talk about for one story. The man dig deep to build e house ontop strong rock. (Matt. 7:​24, 25; Luke 6:​47, 48) How we fit help Bible student to do the things wey e de learn? Make we talk about three things wey we fit do.

4. How we fit help Bible student continue to do well so that e fit grow reach to baptize? (Still check the box “ Help Your Student to Get Plans and Do Them.”)

⁴ Help your student to get plan. Why you suppose do that one? Think about this example: If you de travel go far-far place, you fit decide to branch some fine place them for road. This one go make the journey no too far for you and tire you. Na so e still be when Bible student get plan to do some things for short time. This one fit help the student see say e go fit grow reach to baptize as e don plan-am. If you want help your student get plans of things wey e go do, you fit use the box wey be “Wetin You Fit Plan to Do” for the book Enjoy Life Now and Forever! For the end of each lesson, make you discuss how the things wey the student plan connect with wetin e just learn. If another plan dey your mind for your student, make you write-am for the space wey be “Other things wey I plan to do.” De always use this part for the study to check the things wey your student don plan to do for short time and for long time.

5. As e dey for Mark 10:​17-22, wetin Jesus tell one rich man make e do, and why?

⁵ Help your student to change things for e life. (Read Mark 10:​17-22.) Jesus know say no be easy thing for rich man to sell all e property. (Mark 10:23) Even with that one, Jesus tell the man to make this big change for e life. Why? Because Jesus love the man. Sometimes, we fit no want encourage Bible student to do wetin e de learn, because we feel say e never ready to  change something wey e need to change for e life. E fit take some time for people to stop the things wey them de do before and wear the new character. (Col. 3:​9, 10) But if you quick start to tell the student the thing wey e need to change, the student fit quick start to change. You de show say you care about the student when wuna discuss the matter together.​—Ps. 141:5; Prov. 27:⁠17.

6. Why e good make we ask our student question wey go help us know wetin dey e mind?

⁶ E dey important make we ask our student question wey go help the student fit talk wetin dey e mind about the thing wey we de discuss. This one go help you know wetin your student understand and wetin e believe. If you de always do this one, e go make-am dey easy for you to discuss some things wey fit dey hard for your student to accept. For the book wey be Enjoy Life Now and Forever! we get many question wey fit help the student talk wetin dey e mind. For example, one question for lesson 04 na: “How you think say Jehovah go feel when you use e name?” Another one for lesson 09 na: “Wetin be some things wey you go like to pray about?” For the first time, your student fit need time to think about how to answer this kind question. You fit help your student when you train your student to think about the Bible verse them and the pictures for the book.

7. How we fit use the story of people well?

⁷ When your student don understand wetin e need to do, use the story of people to encourage the student to do the thing. For example, if e de hard your student to go meeting, you fit show the student the video Jehovah Care for Me for the part “Learn Other Things” wey dey lesson 14. For plenty lessons for the book Enjoy Life Now and Forever! you go see this kind examples or story them under “Learn More Things” or “Learn Other Things.” * Make you dey careful so that you no go compare your student with another person and talk say, “If this person go fit do-am, you go fit do-am too.” Allow the student agree by e self say e go fit do the thing. Instead, talk about the main things for the video wey help the person obey the things wey Bible de teach. Maybe you fit mention one important Bible verse or something wey the person do. When e dey possible, talk more about how Jehovah help the person.

8. How we fit help our student to love Jehovah?

⁸ Help your student to get love for Jehovah. How we fit do this one? Look for ways wey you fit use help your student learn more about the fine-fine character wey Jehovah get. Help your student to see say Jehovah na happy God and say when person love Jehovah, Jehovah de support the person. (1 Tim. 1:11; Heb. 11:⁠6) Show the student say e go gain when e use the things wey e de learn, and explain say this things wey e de gain de show say Jehovah love-am. (Isa. 48:​17, 18) The more your student de love Jehovah, the more e go want change the things wey e need to change for e life.​—1 John 5:⁠3.

9. As e dey for Mark 10:​29, 30, wetin fit help person to leave some things and become disciple of Christ?

⁹ If Bible student want grow reach to baptize, e go need to leave somethings.  Like the rich man wey we talk about before, some students fit need to leave property. If Bible no support the work wey the student de do to care for e self, the student fit even need to change the work. Plenty of them fit need to leave friends wey no love Jehovah. Family members fit abandon some of them because this family members no like Jehovah Witness people. Jesus talk say to leave this kind things fit hard for some people. But if they follow Jesus, Jesus promise say they no go regret-am. Jehovah go bless them with brothers and sisters for congregation wey love them and they go be like family for the Bible students. (Read Mark 10:​29, 30.) How you fit help your Bible student to gain from this fine gift?

10. Wetin you learn from the thing wey Manuel talk?

¹⁰ Make friend with your student. E dey important for you to show say you care about your student. Why? Hear wetin Brother Manuel for Mexico talk. This brother talk about the time wey e be Bible student, say: “Everytime before we study, my teacher go ask me how I dey. My teacher de make my mind come down and e de make me dey free to discuss anything. I see say e really care about me.”

11. How our students fit gain when them de spend time with us?

¹¹ Spend time with your students, as Jesus spend time with e disciples. (John 3:22) If e dey okay, make you invite your Bible student wey don de change some things for e life to come your house make wuna enjoy some things together. For example, wuna fit drink or chop together or watch the JW Broadcasting^® wey we de do every month. If you invite your student when other people de do other celebrations, your student fit really like-am because e fit dey lonely that time. One brother for Uganda wey e name na Kazibwe talk say, “I feel say I learn plenty things about Jehovah from my teacher when we de spend time together and when e de study with me. I see how Jehovah de really care for e people  and the joy wey they get. Na the thing wey I want for my life be that.”

12. Why e good make we de go study with our student with different publishers?

¹² Make different publishers de join you for the study. Sometimes, we fit feel say e dey more easy to go by ourself or to go with the same publisher everytime. Even though say e fit dey more easy for us to do this one, our Bible student go gain more if we de go with different publishers sometimes. One brother for Moldova wey e name na Dmitrii talk say, “Any publisher wey follow my teacher come study with me, de explain things for different way. That one help me to see different ways wey I fit use wetin I de learn. And I no too shame when I go my first meeting because I don already know plenty brothers and sisters for there.”

13. Why we need to help our student make e de go meeting?

¹³ Help your student make e de go congregation meeting. Why? Na because Jehovah command e servants make them de gather together. This one na part of our worship. (Heb. 10:​24, 25) Apart from that one, our brothers and sisters for congregation be like our family. When we dey for meeting with them, this one just be like say we dey for house together de chop one better food. When you de help your Bible student to go meeting, you de help the student to do one of the important things wey e need to do to qualify for baptism. But this one fit hard for the student to do. If some things de make your student no fit de go meeting, how the book Enjoy Life Now and Forever! fit help your student to handle the problem?

14. How we fit encourage our student make e de go meeting?

¹⁴ Use lesson 10 of the book Enjoy Life Now and Forever! to help you fit touch your student heart. Before this book come out, we tell some publishers to try this lesson with their students. They talk say e really work, and e help their students to begin go meeting. You no need to wait till lesson 10 before you invite your Bible student go meeting. No waste time to invite the student, and continue to always do like that. Different Bible students get their different problems. So try to know the things wey your student need, and see whether you fit do something to help. Make you no tire to help the student if e no quick start to go meeting. Dey patient, but no stop to invite the student.

15. Wetin fit make our student de fear?

¹⁵ You fear small that time when you think-am say you go be Jehovah Witness? Maybe you feel say you no go ever fit preach from house to house. Or maybe you fear that time say your family or friends fit dey against you. If na so, then you fit understand how your Bible student de feel. Jesus talk say some people fit get that kind fear. But, e encourage e disciples make they no allow fear make them stop to serve Jehovah. (Matt. 10:​16, 17, 27, 28) How Jesus help e disciples to stop their fear? And how you fit do like Jesus?

16. How we fit train our student to tell other people about wetin e de learn?

¹⁶ De train your student small-small to tell people about the things wey e de learn. Jesus disciples fit don fear small when e send them go preach. But Jesus help them when e tell them the place wey they go go preach and wetin they go preach. (Matt. 10:​5-7) How you fit do like Jesus? Help your student  know the kind people wey e fit preach to. For example, ask the student whether e know person wey fit gain from any Bible truth wey wuna don talk about. Then help the student to prepare wetin e go talk. You fit use simple way to show the student how e go tell other people about that truth. When the condition dey okay, you fit use the part for the Enjoy Life Now and Forever! book wey be “Some People De Talk Say” and “Person Fit Ask You Say” to practice with the student. As you do like that, train your student more about how to use Bible to give simple answer with sense.

17. How we fit use Matthew 10:​19, 20, 29-31 to help our student get trust for Jehovah?

¹⁷ Help your student to trust Jehovah. Jesus tell e disciples say Jehovah go help them because E love them. (Read Matthew 10:​19, 20, 29-31.) Remind your student say e go get help from Jehovah too. You fit help the student to trust Jehovah when you de pray with the student about the things wey e plan to do. One brother for Poland wey e name na Franciszek, talk say: “When my teacher de pray, e de always talk about the things wey I don plan to do. So when I see how Jehovah answer the prayer, quick-quick, I start to pray. I see the way Jehovah help me when I need to take some time from my new work to go our meetings and convention.”

18. How Jehovah de feel about the work wey we de do to teach people Bible?

¹⁸ Jehovah really care about our Bible students. E know how publishers de work hard to help people be e tight friend, and e love them for this thing wey them de do. (Isa. 52:⁠7) Even though say you no de study with any person now, you fit still help Bible students to grow reach to baptize when you de join other publishers to study with their students.