EMHUOGHAẠPH ITUUGHẠ PHỌ 23
AZihova Odi Ni R’anạ, Nạ Bịn O/lho
“AZihova atuman ni oomo abuphẹ romạgh bọ nyodị.”—PS. 145:18.
AḌUỌR PHỌ 28 Gaining Jehovah’s Friendship
OGHAẠPH OOKARAGH *
1. Uḍighi ika kụ arebenhẹ aZihova rologhoma ghan bọ igini eeni amem?
IBADỊ ayira rologhoma ghan ni igini eeni amem. Abuniin rologhoma ghan igini ekulha amem bịn. Kuolọ abunhọn, eeni kebia ni. Yira kotue ni ologhoma igini ghalhamọ r’amem dị yira odi ni igbo abunhọn awe. Rekparanhaạn ghan ni buniin awe ooḅughonhaan omhoom ookpomhoghan. Abuniin uḅuạ rughunotu dị asiya phọ egbiphạn iboom kụ oru, kụ iḍighi kụ reḍighi ghan ni ipaanhaạn mem dị bidị u/lo mun r’asiya abidị. Abunhọn romoghi inyaam abuọ ephomhoghiạn abidị dị aḍuugh mesighẹ. Abuniin, ekạr ekpaariọm bumhoom aKristẹn, rologhoma ghan igini mem dị abugbaany arighirị r’abuọ eghunotu abidị dị u/lo aani siẹn igey phọ oghel bidị obobọ rokpuuroghọm bidị.
2. Ighẹn asipuru kụ edị yira kopanyanhaạn?
2 AZihova alegheri ni aḅilhẹ anaghanhạn oomo ilọ ayira. Odị ralegheri ghan ni mem dị yira olhoghoma igini, kụ rawạ ghan ni olhoghonhaạn ayira ḍighaạgh. Ika kụ idị aZihova rulhoghonhaạn ghan iyira ḍighaạgh? Ika kụ idị yira kotue ologhonhaạn ḍighaạgh siloor ayira? Ḅilhẹ ika kụ idị yira kotue ologhonhaạn ḍighaạgh bunhọn dị olhoghoma igini siphẹ ookpomhoghan phọ? Ooḅeghiọn ophanyanhaạn asipuru phọ iphẹn phọ.
AZIHOVA RUPHOGH NI IYIRA
AZihova arom ookpaạny oghị oḅenhị Ilaija mọ odị bịn o/lho (Miịn ekpịgh phọ 3)
3. Ika kụ idị aZihova aḍeenhaan ogbolhomaam Ilaija?
3 AZihova akạr rawạ dị oomo arebenhẹ phọ odị komoọgh oḅaạl olhoghi. Odị atuman ni torobọ onyọ ayira, kụ ralegheri ghan ni mem dị yira oḅonyonhu ozuan. (Ps. 145:18, 19) Tuutughiạn ipẹ aZihova alher bọ rurụ azuumaam angọ oyil phọ Ilaija. Amem mọ oyil phọ Ilaija arọl bọ ikpạr ri. Abuseenyeom aZihova usoman ni igbagarạ igbiphoghọm, kụ abumulọgh ḍien phọ Enhaạn ukạr ghan bịn owạ oghiigh Ilaija. (1 Ki. 19:1, 2) Eniin iyaạr dị eeni eḅilhẹ eeḅaghamhị Ilaija pọ olhoghoma mọ ogina onọ bịn kụ oyil aZihova dị asugha. (1 Ki. 19:10) Enhaạn akem ni alhoghonhaạn ḍighaạgh Ilaija. AZihova arom ookpaạny oghị okparamhị oyil phọ Odị mọ ogina odị bịn o/lho—mọ abunhọn abuọ Izrạl dị rokiilhaan aani Enhaạn osugha ni!—1 Ki. 19:5, 18.
4. Ika kụ idị aMạk 10:29, 30 eeghironhaan ogbolhomaam mọ aZihova ilọ arebenhẹ phọ odị abupẹ moḅitonhaạn bọ?
4 AZihova alegheri ni mọ abuniin ayira opinyọn ni igbogh arikiạ kụ rokumu bọ nyodị. Iniin araraạr dị yira owilhẹ orue okumu aZihova pọ olhoghonhaạn aḍighaạgh phọ yira omhoọgh ghan bọ esi asiya r’arighirị dị u/lo aani siẹn igey phọ. Eeni aloor ilọ iphẹn phọ kụ edị otelhedom mọ aPita apuru bọ Zizọs mọ: “Yoor phọ abuẹn mowiIẹ bọ oomo araraạr phọ kụ rodạph bọ nyinạ komoọgh eeghe?” (Mat. 19:27) R’eenyuụm, aZizọs angọ ni okuphom owol butelhedom mọ odị mọ bidị komoọgh eboom eghunotu abumor r’abumarani. (Bạl Mạk 10:29, 30.) AZihova Uw-emhụ eghunotu phọ aguanhaan obakị oomo abuphẹ rokumu bọ nyodị. (Ps. 9:10) Ooḅeghiọn iniin araraạr dị nạ kaḍighi kụ amoọgh olhoghonhaạn aḍighaạgh phọ aZihova okpạr opu igini.
IDỊ NẠ KAḌIGHI MEM DỊ NẠ ALHOGHOMA IGINI
5. Eeghe asuọ kụ odi esi ogbon ipẹ aZihova raphogh bọ nyinhạ?
5 Gbon ipẹ aZihova raphogh bọ nyinhạ. (Ps. 55:22) Iphẹn phọ kelhoghonhaạn nyinhạ ḍighaạgh omhoọgh ephoghom dị eeleeny ilọ adọl phọ anạ. Umarani dị oghol mọ Carol * dị k/aạl ilhom, dị ogina odị bịn kụ aḍighi onyọ Ogbaanhaạn k’abidị, aḅẹm mọ: “Mem dị mị aatughiạn ilọ ipẹ aZihova ubakị ghan bọ imhị simem odẹgh ophogh, mị raloghoma ghan ni mọ ogina amhị bịn o/lho. Ḅilhẹ rekpoomhị ghan oḅio amhị mọ aZihova kuphogh ni imhị epẹ ghisigh.”
6. Ika kụ idị 1 Pita 5:9, 10 ketue ekparamhị buẹn rologhoma ghan bọ igini?
6 Tuutughiạn ipẹ aZihova raloghonhaạn bọ ḍighaạgh bunhọn aKristẹn dị olhoghoma aani igini. (Bạl 1 Pita 5:9, 10.) AHiroshi, onyọ umor dị ogina odị bịn kụ aḍighi onyọ Ogbaanhaạn k’abidị esi ibadị asiạ, aḅẹm mọ: “Nạ aphogh siphẹ ookpomhoghan phọ torobọ oye amoọgh ni iiḅaghamhị. Olhegheri mọ torobọ oye phọ rakparaghạ ni okumu aZihova, ketue ni ekparamhị buẹn ogina abidị bịn kụ odi bọ siẹn igey phọ.”
7. Ika kụ idị iiḅereghị reloghonhaạn nyinhạ ḍighaạgh?
7 Gbor ghan aaḅereghị, aạl Baibul, aḅilhẹ aghị ituughạ. Kaạph ghan aḅenhị aZihova okạr ipẹ nạ alhoghoma bọ. (1 Pit. 5:7) AMassiel aḅẹm mọ: “Eniin ephigh iyaạr dị rilhoghonhaạn ghan imhị ḍighaạgh okpạr opu igini phọ amhị, pọ oḅaanhaạn aZihova esi iiḅereghị. Odị akạr kụ aḍighi Odẹ amhị, mị uuḅereghị ghan nyodị ibadị amem torobọ aḍio oḅenhị odị ipẹ mị alhoghoma bọ.” Ophọn phọ oḍoọgh umarani dị ogina odị bịn kụ aḍighi onyọ Ogbaanhaạn k’abidị, kụ alhoghoma igini mem mọ odị asopha bọ orọl agạ igey phọ.
Onhaghạn ghan ibạl aBaibul r’arinyạ dị regbạ Baibul phọ dị ronaghanhạm ghan rurụ, ketue ni eḍighi idị oye ka/kạr aloghoma igini (Miịn ekpịgh phọ 8) *
8. Ika kụ idị aạl ghan ogbirima Ekpo Onhụ phọ Enhaạn melhoghonhaạn nyinhạ ḍighaạgh?
8 Gbor ghan aạl Ekpo Onhụ phọ Enhaạn, agbirima ghan riisi dị eḍeenhaan mọ aZihova aphomhoghiạn ni nyinhạ. ABianca, umarani dị akparaghạm ikpo onhụ oḅonyonhu ozuan ḍighaạgh abuọ eghunotu abidị, aḅẹm mọ: “Aạl ghan oḅilhẹ ogbirima igẹ aBaibul phọ r’iphirigba arebenhẹ aZihova dị mosoman aani ghan iniin phọ asidọl phọ kụ rilhoghonhaạn ghan imhị ḍighaạgh.” Abuniin aKristẹn rootughiạn ghan ni riisi aBaibul dị keedereghị bidị, idiphọ aPsalm 27:10 r’Isaiah 41:10. Abunhọn omiịn mọ ophegh ghan ipẹ ronaghanhạm ghan bọ rurụ mem dị bidị rookolhobian ituughạ obobọ robạl Baibul, reḍighi ghan ni idị bidị ko/loghoma igini iboom.
9. Ika kụ idị nạ mamhooghọm suọ oghị ghan ituughạ?
9 Kparaghạ ghan ogbor oghị ituughạ. Edeọm ituughạ phọ kekparamhị ni nyinhạ, nạ aḅilhẹ alegheri bunhọn abumor r’abumarani. (Hib. 10:24, 25) AMassiel, oghaạph bọ oghol epẹ omhạn, aḅẹm mọ: “Ghalhamọ r’iduọn mị aḍighi bọ ni oye umugholoor, mị usopha mọ mị ka/pel r’iniin ituughạ, ḅilhẹ r’ophagharanhaạn aani aḍipuru. Iphẹn phọ iḍighi idị mị alhoghoma mọ mị aḍighi aani ni olọ ookpomhoghan phọ.”
10. Uḍighi ika kụ emhạn bọ maạr oḍigh arighirị bumor r’abumarani phọ?
10 Ḍigh righirị bumor r’abumarani phọ. Ḍigh righirị r’awe siphẹ ookpomhoghan phọ dị nạ katue ni atuughaạny eḍeenhaan phọ abidị, ghalhamọ r’abudị asiạ phọ r’emitenhom mọ abidị egbatanhaạn r’epẹ anạ. ABaibul aḅẹm mọ “ikumor awe omoọgh ni olhegheri iyaạr.” (Job 12:12) Abudị asiạ meghị anyụ kotue ni otuughạ ibadị araraạr esi iḍoọgh aKristẹn dị okpẹ oḍuom olhoghi. AJonathan aghupheriom ni Devid ibadị asiạ, kuolọ ipẹ phọ i/sophoghom bidị oḍighi arighirị. (1 Sam. 18:1) Iyạl phọ abidị, oniin alhoghonhaạn ghan ni nyoniin ḍighaạgh okumu aZihova etigheri igbagarạ ipaanhaạn. (1 Sam. 23:16-18) Irina, umarani dị odị bịn kụ aḍighi onyọ Ogbaanhaạn k’abidị aḅẹm mọ: “Abumor r’abumarani phọ ayira kotue ni oḍighi burudẹ r’aburunhiin ayira, obobọ nmụny onhiin ayira. AZihova katue ni asighẹ bidị aḍighinhom iiḅaghamhị ayira.”
11. Yira koḍighi ika kụ opighi igey arighirị?
11 Re/dugh ghan oḍigh imhoom arighirị, ekạr ekpaariọm mem dị oye phọ aḍighi oye umugholoor. ARatna, umarani dị rakiil ghan umugholoor dị anhaghạn igey phọ etigheri isophoghom aḅẹm mọ, “mị umhiịn ni mọ mị amoghi ni olhoghonhaạn aḍighaạgh abumor r’abumarani phọ.” Reḍighi ghan ni ipaanhaạn oghaạph ilọ olhoghi oye phọ oḅenhị oye, kuarị pọ kụ iphighiom igey arighirị. Arighirị phọ anạ rowạ ni okparamhị r’obakị anạ, kuolọ ewạ dị nạ kaḍighi idị bidị kolegheri ipẹ reeḅaghamhị bọ nyinhạ.
12. Ika kụ idị omite ghan epẹ erugh phọ ketue ilhoghonhaạn iyira ḍighaạgh omhoọgh igey arighirị?
12 Eten dị ekạr enhighẹ oḍigh arighirị pọ orelhean ghan r’abunhọn epẹ erugh phọ. ACarol, oghaạph bọ oghol epẹ omhạn aḅẹm mọ: “Omite ghan epẹ erugh phọ r’inhọn iiḍighi ookpomhoghan phọ meḍighi idị mị mamhoọgh ibadị abugey arighirị. K’asiạ phọ, aZihova rulhoghonhaạn ghan imhị ḍighaạgh dị eego esi arighirị phọ abuẹn phọ.” Asuọ odi ni oḍigh arighirị r’aKristẹn dị okpẹ oḍuomolhoghi. AZihova rasighẹ ghan righirị phọ iphẹn kụ aḍighinhom idị nạ katue akaran sidọl ooḅaghamhiạn aloor idiphọ adọl igini.—Prov. 17:17.
ḌIGHI IDỊ ABUNHỌN KOLOGHOMA MUDỊ YIRA ANMỤNY ONHIIN
13. Oghẹn kụ oḍighi dị oomo abuọ ookpomhoghan phọ omhoọgh?
13 Oomo ayira omoọgh oḍighi ophamhanhạm ephomhoghiạn r’eephọ siẹn ookpomhoghan phọ, pidị oye ka/loghoma mọ onọ bịn odi. (Jọn 13:35) Iyaạr dị yira oḍighi obobọ oghaạph ketue ni ekparamhị bunhọn! Lọgh elhegh idị oniin onyọ umarani aḅẹm: “Mem mọ mị anhaghạn bọ igey phọ, ookpomhoghan phọ uḍighi eghunotu amhị. Abumor phọ imhị mu/lhoghonhaạn bọ ḍighaạgh mị mu/tue uḍighi onyọ Ogbaanhaạn AZihova.” Nạ kaḍighi ika kụ abuphẹ ogina abidị bịn kụ odi bọ siẹn igey phọ ologhoma aani mọ bunọ abuọ ookpomhoghan phọ ni?
14. Nạ kaḍighi eeghe orue oḍigh arighirị r’abumhoom awe?
14 Nạ kụ kem agbatạn edạ osighẹ abidị righirị. Yira kotue ni omiighom esi omhạgh ghan abumhoom mọ r’eenyuụm mọ nyinha mesi. (Rom. 15:7) Toroboiperolbọ, ewạ mọ oḍighi idị epelhom omhạgh abidị r’eenyuụm bịn. Ewạ mọ yira okem ghan olhẹm omiteom righirị dị ekpạr. Esi iduọn phọ, moọgh ḍigey aḍiḅeraạn aghị esi abumhoom mọ. Lọgh ni eegu raraạr ibooghiạn abidị, kuolọ wạ ni alhegheri iiḅaghamhị dị bidị osoman. Kekparanhaạn ni buniin oghaạph ipẹ bidị olhoghoma bọ, esi iduọn phọ gona loor ka/kpaariọm bidị oghaạph iyaạr. Kparipẹ ghụn miigha loor aḍighinhom sipuru osụ-olhoghi, kụ akparạm akori ophagharanhaạn phọ. Esi omaạm, nạ atue ni apuru ipẹ bidị onhaghạn bọ igey phọ.
15. Ika kụ idị aKristẹn dị mokpokolho kotue ologhonhaạn ḍighaạgh bunhọn?
15 Omheeraam oomo abuọ ookpomhoghan phọ kakpạr ri eḍighi maạr dị aKristẹn dị osianhaan, ekạr ekpaariọm ikumor awe phọ, omhoọgh ḍiḅeraạn abidị. AMelissa, dị ookonhom ni siẹn igey phọ aḅẹm mọ: “Mị akạr kụ rasereghiạn bumor phọ oḍeenhaan bọ ogbolhomaam oḅilhẹ uphạm imhị idiphọ aburudẹ k’asiạ phọ. Torobọ amem lọ mị amhoọgh iyaạr oghaạph, mị ramiịn ghan ni oye oghaaphạn.” AMauricio, oḍoọgh onyọ umor dị alhoghoma igini mem dị opọ atughemhị bọ nyodị Baibul phọ awilhẹ igey phọ, aḅẹm mọ: “Ogbolhomaam mọ ikumor awe phọ omhoọgh bọ oru esi amhị ukparamhị ni imhị. Bidị ugbor ghan ni ughaaphạn imhị. Oḅilhẹ urelhean ghan imhị epẹ erugh phọ, uḍeenhaan aani ghan imhị raraạr ituughạ aBaibul ogina abidị, oḅilhẹ upheghom ghan imhị.” AMelissa r’aMauricio odi rukumuan oomo amem mọ nyiidiphọ.
Abuọ anhiạn kụ kokạr osereghiạn mem dị yira olhọgh mem orolạn r’abidị? (Miịn siikpịgh phọ 16-19) *
16-17. Ighẹn kụ araraạr dị yira kotue oḍighi olhoghonhaạn aḍighaạgh bunhọn?
16 Ḍighinhaan ghan raraạr bunhọn. (Gal. 6:10) ALeo, dị awilhẹ eghunotu abidị akumuan ghan idiphọ amisonarị ekpisi dị ekẹl aḅẹm mọ, “ibadị amem oomo idị oye phọ akạr rawạ pọ iịny iiḅi dị oḍighinhaan oye phọ mem dị ekasiạn. Mị aatughiạn eniin aḍio dị amoto amhị ungọ imhị iiḅaghamhị, mị asi bọ olhoghotu aloor amhị idugh bịn. Kụ oniin olom r’anhịr umhạgh imhị oghị aani k’abidị olhe eḍien. Mị uu/tughiạn mun iyaạr phọ yoor olhe bọ, kuolọ iyaạr dị mị aḅilhẹ aatughiạn pọ ipẹ bidị olher bọ rurụ ungọ imhị. Eekunha phọ, olhoghi amhị aphooph ni!”
17 Eniin ephigh phọ yira rokelhọm ghan bọ rookpomhoghan eephugh r’asisemblị phọ pọ iduọn yira roḅophoghạn ghan bọ koghaạph raghaạph ḅilhẹ koghaạph ilọ edeọm mọ. Toroboiperolbọ, aCarol, oghaạph bọ oghol epẹ omhạn aḅẹm mọ, “Mị ukạr ghan alhoghoma igini mem dị oghị ookpomhoghan eephugh r’asemblị.” Eeghe kụ iḍighi? Odị aḅẹm mọ, “ghalhamọ r’iduọn arukuron obobọ asimuonịr abumor r’abumarani kụ ukoom bọ ni imhị, ibadị amem reḍighi ghan idị torobọ oye phọ odi r’otọ abidị. Mị romhiịn iduọn phọ, kụ elegheri bịn eloghorị.” Rekparanhaạn ghan ni buniin oḅilhẹ oghị ookpomhoghan eephugh obobọ olọ eghir mem dị opọ r’abidị aalhạn bọ amhugh. Nạ alegheri ni oye dị asoman aani ipaanhaạn phọ iphẹn phọ ḍughụm? Pọ mạgh aani nyodị oḍighan r’eghunotu anạ oghelhọm aani arookpomhoghan phọ iphẹn phọ.
18. Ika kụ idị yira kotue osighẹ oḍighinhom 2 Korịnt 6:11-13 mem dị yira rokọ igoni?
18 Wạ ghan mem arolạn r’abunhọn. Kparaghạ ghan omhạgh aani abumor r’abumarani kirokirọ mem dị nạ rakị oghelhọm aloor, ekạr ekpaariọm budị rologhoma ghan igini. Ewạ mọ ‘okpenyon ilhoghi phọ ayira owilhenhaạn’ odọ awe phọ abuẹn phọ. (Bạl 2 Korịnt 6:11-13.) AMelissa oghaạph bọ oghol epẹ omhạn aḅẹm mọ, “redụgh ghan agey mem dị abumor r’abumarani omhạgh oye phọ oghị aani k’abidị obobọ odạph abidị oghị erelhe.” Oye odi ni siphẹ ookpomhoghan phọ anyinha dị nạ katue akọ igoni ḍughụm?
19. Oghẹn amem kụ edị ekạr enhighẹ oghị orolạn r’abumor r’abumarani phọ ayira?
19 Asimem edi ni dị kekạr enighẹ oghị orolạn r’abuniin abumor r’abumarani ayira. Esi omaạm, mem dị asiya abidị dị u/ḍighi aani Bugbaanhaạn role eyaạl abidị. Abuniin mem dị eeghiraan eteẹny ḍio dị oye ephomhoghiạn abidị amhugh, repin ghan ni. Mem dị yira omiteom mem oghị orolạn bumor r’abumarani dị osoman idọ ipaanhaạn phọ iphẹn phọ, pọ reḍeenhaan ghan mọ yira oseere ni bidị olhoghi.—Fil. 2:20.
20. Ika kụ idị ipẹ edi bọ Matiu 12:48-50 kilhoghonhaạn iyira ḍighaạgh mem dị yira olhoghoma igini?
20 Ibadị ariphigh ni kụ reḍighi ghan bọ idị onyọ aKristẹn kaloghoma igini. Ghalhamọ r’iduọn phọ ni, ku/bulha mọ aZihova alegheri ni ipẹ yira olhoghoma bọ. Ibadị amem aZihova ramiteom ghan kụ ungọ iyira dị eego esi abumor r’abumarani phọ ayira. (Bạl Matiu 12:48-50.) Yira koḍeenhaan mọ yira osereghiạn ni iikolhobian ephomhoghiạn phọ aZihova mem dị yira obakị aani bumor r’abumarani phọ ayira ipẹ yira kotue bọ. Etigheri ipẹ yira olhoghoma bọ, yira bịn u/lo, loor esi dị aZihova odi ni r’ayira oomo amem!
AḌUỌR PHỌ 46 We Thank You, Jehovah
^ par. 5 Nạ raloghoma ghan ni igini eeni amem ḍughụm? Eḍighi idiphọ, pọ kuphom ni owol mọ aZihova alegheri ni ipẹ nạ alhoghoma bọ, kụ rawạ ni olhoghonhaạn anạ ḍighaạgh. Emhuoghaạph phọ ephẹn phọ keeḅeghiọn raraạr dị nạ kaḍighi mem dị nạ alhoghoma igini. Kụ eḅilhẹ eeḅeghiọn idị nạ katue akparamhị aani bumor r’abumarani dị olhoghoma aani igini.
^ par. 5 M’onme iniin asiḍien.
