1. Mɛni he je nɛ be komɛ ɔ, Yehowa sɔmɔli ma nyɛ maa nu he kaa e piɛ mɛ pɛ ɔ?

BE KOMƐ Ɔ, wa kpɛti nihi fuu nuɔ he kaa e piɛ wɔ pɛ. Ngɛ ni komɛ a blɔ fa mi ɔ, he numi nɛ ɔ se kɛ we. Se ngɛ ni komɛ hu a blɔ fa mi ɔ, he numi nɛ ɔ se kɛɔ. E suu be nɛ ke nihi ngɛ wa kasa nya po ɔ, loloolo ɔ, wa nuɔ he kaa e piɛ wɔ pɛ. Nyɛmimɛ komɛ ngɛ nɛ ke a ya je asafo ehe mi ɔ, e se kɛɔ loko a hɛ mwɔɔ si. Ni komɛ je wekuhi nɛ a peeɔ níhi kɛ bla a mi, enɛ ɔ he ɔ, ke a je a weku li ɔmɛ a he ɔ, a hɛ jaa wawɛɛ. Ni komɛ hu ngɛ nɛ a hɛ jaa ngɛ a suɔli nɛ a gbo ɔ a he wawɛɛ. Wa nyɛmimɛ komɛ ngɛ nɛ a weku li be asafo ɔ mi, loo a huɛmɛ kuaa mɛ nɛ a waa mɛ yi mi, titli nihi nɛ a ba na anɔkuale ɔ kɛ we ɔ, nɛ enɛ ɔ haa nɛ a nuɔ he kaa e piɛ mɛ pɛ.

2. Mɛni sane bimihi a he nɛ wa ma susu?

² Yehowa le wɔ saminya nɛ e nu wɔ sisi wawɛɛ. Ke wa ngɛ he nue kaa e piɛ wɔ pɛ ɔ, e le, nɛ e suɔ nɛ e ye bua wɔ kɛ da he numi nɛ ɔ nya. Mɛni blɔ nɔ Yehowa guɔ kɛ yeɔ bua wɔ? Mɛni nɛ wɔ nitsɛmɛ wa ma nyɛ maa pee kɛ ye bua wa he? Nɛ mɛni wa ma nyɛ maa pee kɛ ye bua wa nyɛmimɛ nɛ a ngɛ asafo ɔ mi nɛ a nuɔ he kaa e piɛ mɛ pɛ ɔ? Nyɛ ha nɛ wa susu sane bimi nɛ ɔmɛ a he nɛ waa hyɛ.

3. Mɛni Yehowa pee kɛ tsɔɔ kaa e susuɔ Eliya he?

³ Yehowa suɔ nɛ e sɔmɔli tsuo a bua nɛ jɔ. E ngɛ wa ti nɔ fɛɛ nɔ kasa nya, nɛ ke si fɔfɔɛ komɛ ha nɛ wa kɔni mi jɔ̃ ɔ, e toɔ  he hɛ. (La 145:18, 19) Mo susu bɔ nɛ Yehowa nu gbalɔ Eliya sisi nɛ e ye bua lɛ ha a he nɛ o hyɛ. Nyumu anɔkualetsɛ nɛ ɔ hi si ngɛ be ko nɛ e mi wa wawɛɛ ngɛ Israel bi a yi nɔ sane mi. Mawu he nyɛli wa Yehowa sɔmɔli yi mi, nɛ a ngɛ hlae nɛ a gbe Eliya po. (1 Ma. 19:1, 2) Eko ɔ, nɔ́ kpa nɛ ha nɛ Eliya hao wawɛɛ ji kaa e susu kaa lɛ pɛ ji gbalɔ nɛ piɛ nɛ e ngɛ Yehowa sɔmɔe. (1 Ma. 19:10) Mawu tsu sane ɔ he ní amlɔ nɔuu. Yehowa tsɔ e bɔfo ko nɛ e ya ma nɔ mi kɛ ha e gbalɔ ɔ kaa Israel bi fuu ngɛ nɛ a yeɔ Mawu anɔkuale loloolo!—1 Ma. 19:5, 18.

4. Kɛ Maako 10:29, 30 ɔ tsɔɔ bɔ nɛ Yehowa susuɔ e sɔmɔli nɛ a weku li kɛ a huɛmɛ kua mɛ ɔ a he ha kɛɛ?

⁴ Yehowa le kaa akɛnɛ wa hla kaa wa ma sɔmɔ lɛ he je ɔ, wa kpɛti ni komɛ ngɛ nɛ níhi fuu ngmɛɛ wɔ. Kaa nɔ hyɛmi nɔ́ ɔ, eko ɔ, wa weku li nɛ a sɔmɔ we Yehowa kɛ wa huɛmɛ be wɔ ye buae hu. Ligbi ko ɔ, bɔfo Petro bi Yesu sane ko akɛnɛ eko ɔ, e hao ɔ he je. E bi lɛ ke: “Wa si níhi tsuo nɛ wa ba nyɛɛ o se; lɛɛ mɛni wa ma ná mɔ?” (Mat. 19:27) Yesu je suɔmi mi nɛ e ha nɛ e kaseli ɔmɛ le kaa a ma ná mumi mi weku ngua ko. (Kane Maako 10:29, 30.) Nɛ Yehowa, wa hiɔwe Tsɛ ɔ hu wo si kaa e maa ye bua e sɔmɔli nɛ a suɔ nɛ a sɔmɔ lɛ ɔ. (La 9:10) Nyɛ ha nɛ wa susu ní komɛ nɛ wa ma nyɛ maa pee konɛ Yehowa nɛ ye bua wɔ ke wa ngɛ he nue kaa e piɛ wɔ pɛ ɔ he.

5. Mɛni he je nɛ e hi kaa o maa ngɔ o juɛmi kɛ ma bɔ nɛ Yehowa ngɛ mo ye buae ha a nɔ ɔ?

⁵ Moo ngɔ o juɛmi kɛ ma bɔ nɛ Yehowa ngɛ mo ye buae ha a nɔ. (La 55:22) Jã nɛ o maa pee ɔ maa ye bua mo nɛ o be he nue kaa e piɛ mo pɛ. Nyɛmiyo ko nɛ e sɛ we gba si himi mi nɛ a tsɛɛ lɛ ke Carol * nɛ e weku no ko be asafo ɔ mi ɔ de ke: “Ke i susu bɔ nɛ Yehowa ye bua mi kɛ da si fɔfɔɛ komɛ nɛ a nya wa a nya a he ɔ, e yeɔ bua mi nɛ i nuɔ he kaa e píɛ mi pɛ. Nɛ e haa nɛ i náa nɔ mi mami kaa Yehowa maa ya nɔ maa ye bua mi be fɛɛ be.”

6. Ngɛ mɛni blɔ nɔ nɛ 1 Petro 5:9, 10 ma nyɛ maa wo nihi nɛ a nuɔ he kaa e piɛ mɛ pɛ ɔ he wami?

⁶ Mo susu bɔ nɛ Yehowa ngɛ o nyɛmimɛ Kristofohi nɛ a nuɔ he kaa e piɛ mɛ pɛ ɔ ye buae ha a  he. (Kane 1 Petro 5:9, 10.) Nyɛminyumu ko nɛ a tsɛɛ lɛ ke Hiroshi nɛ lɛ pɛ ji Odasefo no ngɛ e weku ɔ mi ɔ de ke: “Ke o hyɛ Yehowa asafo ɔ mi ɔ, o naa kaa nɔ fɛɛ nɔ ngɛ nyagba. Wɔ tsuo wa le kaa waa kɛ wa nyɛmi tsuo ngɛ Yehowa sɔmɔe, nɛ enɛ ɔ woɔ wɔ nihi nɛ wa weku li be asafo ɔ mi ɔ he wami.”

7. Kɛ sɔlemi yeɔ bua mo ha kɛɛ?

⁷ Moo sɔle, moo kane Baiblo ɔ, nɛ o ya asafo mi kpehi be fɛɛ be. E sa nɛ o de Yehowa bɔ nɛ o ngɛ he nue ha tutuutu. (1 Pet. 5:7) Benɛ nyɛmiyo ko nɛ a tsɛɛ lɛ ke Massiel ba pɛtɛ anɔkuale ɔ he ɔ, e nu he kaa e piɛ lɛ pɛ akɛnɛ e weku li ɔmɛ sɔmɔ we Yehowa a he je. E de ke: “Nɔ́ kake nɛ ye bua mi wawɛɛ kɛ da si fɔfɔɛ nɛ ɔ nya ji kaa i je ye tsui mi tsuo kɛ sɔle ha Yehowa. E ngɛ kaa Tsɛ kɛ ha mi, i sɔleɔ kɛ haa lɛ daa ligbi, i sɔleɔ si abɔ ngɛ ligbi ɔ mi nɛ i deɔ lɛ bɔ nɛ i ngɛ he nue ha.”

8. Kɛ Mawu Munyu ɔ nɛ o kaneɔ nɛ o pueɔ o yi mi tɛ ngɛ he ɔ yeɔ bua mo ha kɛɛ?

⁸ Moo kane Mawu Munyu ɔ be fɛɛ be, nɛ o pue o yi mi tɛ ngɛ Baiblo mi sane pɔtɛɛ komɛ nɛ tsɔɔ kaa Yehowa suɔ mo ɔ a he. Nyɛmiyo ko nɛ a tsɛɛ lɛ ke Bianca nɛ e weku li tuɔ munyu kɛ siɔ lɛ ɔ de ke: “Yehowa sɔmɔli nɛ a kɛ si fɔfɔɛhi nɛ i kɛ ngɛ kpee ɔ eko kpe hyɛ, nɛ i kane a he sanehi ngɛ Baiblo ɔ mi nɛ i pue ye yi mi tɛ ngɛ he ɔ ye bua mi wawɛɛ.” Nyɛmimɛ komɛ kaseɔ ngmamihi nɛ a woɔ nɔ bua wawɛɛ ɔ kɛ woɔ a yi mi. Ngmami nɛ ɔmɛ ekomɛ ji La 27:10 kɛ Yesaya 41:10. Nyɛmimɛ komɛ hu ngɛ nɛ a kɛ níhi nɛ a fiaa nɛ a buɔ tue ɔ tsuɔ ní ke a ngɛ a he dlae kɛ ha asafo mi kpe, loo a ngɛ Baiblo ɔ kanee ngɛ a dɛ he. A tsɔɔ kaa jã nɛ a peeɔ ɔ yeɔ bua mɛ nɛ a nui he kaa e piɛ mɛ pɛ.

9. Kɛ o náa asafo mi kpehi nɛ o yaa a he se ha kɛɛ?

⁹ Bɔɔ mɔde nɛ o ya asafo mi kpehi be fɛɛ be. Ke o ya asafo mi kpe ɔ, ní peemi nɛ yaa nɔ ngɛ lejɛ ɔ maa wo mo he wami, nɛ o maa le o nyɛmimɛ Kristofohi hulɔ. (Heb. 10:24, 25) Massiel nɛ wa tu e he munyu kɛ sɛ hlami ɔ de ke: “E ngɛ mi kaa i gboɔ zo mohu lɛɛ, se i mwɔ ye yi mi kpɔ kaa ma ya asafo mi kpe ɔmɛ tsuo, nɛ ke i ya hu ɔ, ma ha sane heto. Enɛ ɔ nɛ i peeɔ ɔ haa nɛ i nuɔ he kaa i piɛɛ asafo ɔ he.”

10. Mɛni he je nɛ e sa nɛ waa kɛ Kristofohi anɔkualetsɛmɛ nɛ bɔ huɛ ɔ?

¹⁰ O kɛ Kristofohi anɔkualetsɛmɛ nɛ bɔ huɛ. O kɛ nihi nɛ a ngɛ asafo ɔ mi nɛ o ma nyɛ maa kase ní kɛ je a ngɔ ɔ nɛ bɔ, a wa jio, a wɛ jio, loo a je ma kpa nɔ jio. Baiblo ɔ kaiɔ wɔ kaa “nimeli ngɛ nile.” (Hiob 12:12) Nihi nɛ a wa ngɛ jeha mi hu ma nyɛ maa kase ní kɛ je nihewi kɛ yihewi anɔkualetsɛmɛ a ngɔ. Yonatan wa kulaa pe David, se lɔ ɔ tsi we huɛ bɔmi nɛ ya nɔ ngɛ a kpɛti ɔ nya. (1 Sam. 18:1) David kɛ Yonatan ye bua a sibi nɛ a nyɛ nɛ a sɔmɔ Yehowa ngɛ si fɔfɔɛhi nɛ a mi wa po mi.  (1 Sam. 23:16-18) Nyɛmiyo ko nɛ a tsɛɛ lɛ ke Irina nɛ lɛ pɛ ji Odasefo no ngɛ e weku ɔ mi ɔ de ke: “Nihi nɛ a ngɛ asafo ɔ mi ɔ ma nyɛ ma ba pee wa fɔli loo wa nyɛmimɛ. Yehowa ma nyɛ maa gu a nɔ kɛ tsu wa hiami níhi a he ní.”

11. Mɛni o ma nyɛ maa pee konɛ huɛ bɔmi gbagbanii nɛ hi o kɛ ni kpahi nyɛ kpɛti?

¹¹ E be gbɔjɔɔ kaa o kɛ nihi maa bɔ huɛ, titli ke o gboɔ zo. Nyɛmiyo ko nɛ a tsɛɛ lɛ ke Ratna nɛ e gboɔ zo ɔ ba kase anɔkuale ɔ, e ngɛ mi kaa e weku li te si kɛ wo lɛ mohu lɛɛ. E de ke: “Ngɛ anɔkuale mi ɔ, e he ba hia nɛ ma kplɛɛ nɔ kaa i hia nyɛmimɛ nɛ a ngɛ asafo ɔ mi ɔ a yemi kɛ buami.” E he ma nyɛ maa wa kaa o ma de nɔ ko bɔ nɛ o ngɛ he nue ha, se ke o pee jã a, nɔ ɔ ma nyɛ ma ba pee o huɛ nɛ nyu bi ngɛ o kɛ lɛ nyɛ kpɛti. O huɛmɛ suɔ nɛ a wo mo he wami nɛ a ye bua mo, se kɛ̃ ɔ, e he maa hia nɛ o de mɛ nɔ́ nɛ a ma nyɛ maa pee kɛ ye bua.

12. Ngɛ mɛni blɔ nɔ nɛ fiɛɛmi ní tsumi ɔ ma nyɛ maa ye bua mo nɛ o ná huɛmɛ kpakpahi?

¹² Blɔ kake nɛ hi pe kulaa nɛ wa ma nyɛ maa gu nɔ nɛ waa kɛ wa nyɛmimɛ Kristofohi nɛ bɔ huɛ ji kaa waa kɛ mɛ ma bla kɛ tsu ní ngɛ fiɛɛmi mi. Carol nɛ wa tu e he munyu kɛ sɛ hlami ɔ de ke: “I ná huɛmɛ kpakpahi fuu ngɛ asafo ɔ mi kɛ gu fiɛɛmi nɛ i kɛ nyɛmimɛ yihi ya kɛ Mawu jami mi ní kpahi nɛ i kɛ mɛ pee kake kɛ tsu ɔ nɔ. Yehowa gu huɛmɛ nɛ ɔmɛ a nɔ kɛ ye bua mi jehahi fuu.” E hi kaa waa kɛ wa nyɛmimɛ Kristofohi anɔkualetsɛmɛ maa bɔ huɛ. Yehowa guɔ huɛmɛ nɛ ɔmɛ a nɔ kɛ yeɔ bua mo konɛ o ko nu he kaa e piɛ mo pɛ.—Abɛ 17:17.

13. Mɛni blɔ nya ní tsumi nɛ wɔ tsuo wa ngɛ ngɛ asafo ɔ mi?

¹³ E sa nɛ wa ti nɔ fɛɛ nɔ nɛ ngɛ asafo ɔ mi ɔ nɛ bɔ mɔde konɛ e ha nɛ tue mi jɔmi nɛ hi asafo ɔ mi, nɛ e je suɔmi kpo kɛ tsɔɔ nɔ fɛɛ nɔ konɛ nɔ ko ko nu he kaa e piɛ lɛ pɛ. (Yoh. 13:35) Níhi nɛ wa peeɔ kɛ níhi nɛ wa deɔ ɔ ma nyɛ maa wo nihi he wami wawɛɛ! Nyɛmiyo ko de ke: “Benɛ i ba kase anɔkuale ɔ, asafo ɔ ba pee ye weku. Kaa tsa pi asafo ɔ yemi kɛ buami he ɔ, jinɛ i ko nyɛ we Yehowa Odasefo no peemi.” Mɛni o ma nyɛ maa pee kɛ ye bua nyɛmimɛ nɛ a weku li be asafo ɔ mi ɔ konɛ a nu he kaa a piɛɛ asafo ɔ he?

14. Mɛni o ma nyɛ maa pee konɛ o kɛ ni hehi nɛ bɔ huɛ?

¹⁴ Bɔɔ mɔde nɛ o kɛ ni hehi nɛ bɔ huɛ. Wa ma nyɛ maa je enɛ ɔ peemi sisi kɛ gu wa tsui mi nɛ wa maa je kɛ nya ni hehi nɛ a ba asafo ɔ mi ɔ a he ɔ nɔ. (Rom. 15:7) Se kɛ̃ ɔ, tsa pi ngami pɛ nɛ o ma nga mɛ ɔ nɛ he hia. Wa suɔ nɛ waa kɛ mɛ nɛ bɔ huɛ gbagbanii. Lɔ ɔ he ɔ, mo je mi mi jɔmi kpo kɛ tsɔɔ ni he ɔmɛ nɛ o kɛ o ní peepee nɛ tsɔɔ kaa o susuɔ a he. Moo bɔ mɔde nɛ o nu nyagbahi nɛ a ngɛ mi gblee ɔ sisi, se ko bi mɛ sanehi nɛ ma ha nɛ zo nɛ gbe mɛ. Eko ɔ, e he maa wa ha a kpɛti ni komɛ kaa a ma de mo bɔ nɛ a ngɛ he nue ha, lɔ ɔ he ɔ, moo hyɛ nɛ hi nɛ o ko nyɛ a nɔ kaa doo ɔ a tu munyu. Moo gu ga blɔ nɔ kɛ bi mɛ sane nɛ ma ha nɛ a de mo bɔ nɛ a ngɛ he nue ha, nɛ ke a ngɛ mo dee ɔ, moo to o tsui si nɛ o bu mɛ tue. Kaa nɔ hyɛmi nɔ́ ɔ, o ma nyɛ ma bi mɛ blɔ nɔ nɛ a gu kɛ ba na anɔkuale ɔ.

15. Ngɛ mɛni blɔ nɔ nɛ Kristofohi nɛ a nane pi si ma nyɛ maa ye bua ni kpahi ngɛ asafo ɔ mi?

¹⁵ Ke nihi nɛ a nane pi si ngɛ asafo ɔ mi, titli asafo mi nikɔtɔmahi kɛ a ní peepee tsɔɔ kaa a susuɔ nyɛmimɛ ɔmɛ a he ɔ, e ma ha nɛ nihi tsuo nɛ a ngɛ asafo ɔ mi ɔ maa ya a hɛ mi ngɛ mumi mi. Nyɛmiyo ko nɛ a tsɛɛ lɛ ke Melissa nɛ e yayo lɛ tsɔɔ lɛ anɔkuale ɔ de ke: “Ye hɛ sa nyɛmimɛ nyumuhi nɛ a ngɛ kaa tsɛ kɛ ha mi, nɛ a náa be kɛ haa mi, nɛ a kɛ a ní peepee tsɔɔ kaa a susuɔ ye he ɔ wawɛɛ. Be fɛɛ be nɛ e he maa hia kaa i kɛ nɔ ko nɛ sɛɛ ní ɔ, i náa nɔ ko  nɛ i kɛ lɛ sɛɛɔ ní.” Nyɛminyumu wayoo ko nɛ a tsɛɛ lɛ ke Mauricio ɔ ye aywilɛho nɛ e nu he kaa e piɛ lɛ pɛ benɛ e Baiblo tsɔɔlɔ ɔ je asafo ɔ mi ɔ. Mauricio de ke: “Asafo mi nikɔtɔma amɛ kɛ a ní peepee tsɔɔ kaa a susuɔ ye he, nɛ lɔ ɔ ye bua mi wawɛɛ. A kɛ mi sɛɛɔ ní be fɛɛ be, a kɛ mi tsuɔ ní ngɛ fiɛɛmi mi, a kɛ mi sɛɛɔ níhi nɛ a kase ngɛ a dɛ he ní kasemi mi ɔ he ní, nɛ a haa nɛ i piɛɛɔ a he kɛ jeɔ a hɛ ja po.” Amlɔ nɛ ɔ, Melissa kɛ Mauricio kɛ a be tsuo ngɛ Yehowa sɔmɔe.

16-17. Mɛni ní pɔtɛɛ komɛ wa ma nyɛ maa pee kɛ ye bua ni kpahi?

¹⁶ Moo pee ní pɔtɛɛ komɛ kɛ ye bua. (Gal. 6:10) Nyɛminyumu ko nɛ a tsɛɛ lɛ ke Leo nɛ e ji ma se sane kpakpa fiɛɛlɔ nɛ e ngɛ sɔmɔe ngɛ he ko nɛ kɛ e weku li a kpɛti kɛ ɔ de ke: “Behi fuu ɔ, nɔ́ nɛ o hia pɛ ji nɛ nɔ ko maa pee nɔ́ nyafii ko kɛ ye bua mo ngɛ be nya. I kai kaa ligbi ko ɔ, i ya ná lɔle oslaa, benɛ i su we mi ɔ, pɔ tɔ ye he wawɛɛ. Se nyɛminyumu ko kɛ e yo to niye ní bɔɔ ko he blɔ nya, nɛ a fɔ mi nine. I kai we nɔ́ nɛ wa ye ɔ, se i kaiɔ bɔ nɛ a to a tsui si kɛ bu mi tue ha a. Benɛ i ke jee lejɛ ɔ, i nu he kaa i ngɛ saminya!”

¹⁷ Wɔ tsuo wa bua jɔɔ kaa waa kɛ wa nyɛmimɛ maa sɛɛ munyuhi nɛ a tuɔ ngɛ kpɔ mi kpehi, kpokpa nɔ kpehi kɛ kpe kpahi a sisi ɔ he ní. Se Carol nɛ wa tu e he munyu kɛ sɛ hlami ɔ de ke: “Ke i ya kpɔ mi kpehi kɛ kpokpa nɔ kpehi po ɔ, ye hɛ jaa wawɛɛ.” Mɛni he je? E de ke: “E ngɛ mi kaa i ngɛ nyɛmimɛ lafahi abɔ loo akpehi abɔ a kpɛti mohu lɛɛ, se behi fuu ɔ, mɛ tsuo a kɛ a weku li lɛ hiɔ si ngɛ kpe ɔmɛ a sisi. Se imi lɛɛ ye hɛ jaa wawɛɛ.” Jehanɛ hu ɔ, ke nyɛminyumu ko loo nyɛmiyo ko he piɛɛlɔ gbo ɔ, e he waa ha lɛ kaa e maa ya kpɔ mi kpe loo kpokpa nɔ kpe nɛ nyɛɛ se ɔ. Anɛ o le nɔ ko nɛ e kɛ si fɔfɔɛhi kaa enɛ ɔmɛ eko ngɛ kpee lo? Ke o le nɔ ko kaa jã a, lɛɛ o ma nyɛ maa fɔ lɛ nine nɛ e piɛɛ o kɛ o weku ɔ he ke nyɛ ya kpe nɛ maa nyɛɛ se ɔ sisi.

18. Ke wa ngɛ hlae nɛ waa pee nihi nibwɔ ɔ, kɛ waa kɛ 2 Korinto Bi 6:11-13 ɔ ma tsu ní ha kɛɛ?

¹⁸ Mo ná be kɛ ha ni kpahi. Ke o ngɛ hɛja jemi ko he blɔ nya toe ɔ, moo bɔ mɔde nɛ o fɔ nyɛmimɛ slɔɔtoslɔɔtohi nine, titli ɔ, ni nɛmɛ nɛ a nuɔ he kaa e piɛ mɛ pɛ ɔ. Wa suɔ nɛ wa “bli [wa] tsui mi gbajaa” kɛ ha nyɛmimɛ  nɛ ɔmɛ. (Kane 2 Korinto Bi 6:11-13.) Melissa nɛ wa sɛ hlami tu e he munyu ɔ de ke: “Be fɛɛ be nɛ nyɛmimɛ maa fɔ wɔ nine kɛ ya a wehi a mi loo nɛ wa ya je wa hɛ ja ngɛ he ko ɔ, ye bua jɔɔ wawɛɛ.” Anɛ nɔ ko ngɛ o we asafo ɔ mi nɛ o ma nyɛ maa pee lɛ nibwɔ lo?

19. Mɛni be nɛ eko ɔ, e he maa hia kaa wa ná be wawɛɛ kɛ ha wa nyɛmimɛ Kristofohi?

¹⁹ E maa su be nɛ wa nyɛmimɛ Kristofohi a bua maa jɔ wawɛɛ ke wa ná be kɛ ha mɛ. Kaa nɔ hyɛmi nɔ́ ɔ, e he maa wa ha wa nyɛmimɛ nɛ a weku li be asafo ɔ mi ɔ kaa a kɛ a weku li maa bɔ ke a ngɛ a gbijlɔ ɔmɛ yee. Wa nyɛmimɛ komɛ hu yeɔ aywilɛho wawɛɛ ngɛ be komɛ a mi. Kaa nɔ hyɛmi nɔ́ ɔ, ke nɔ ko suɔlɔ ko gbo ɔ, daa jeha a, ke e su ligbi nɛ e suɔlɔ ɔ gbo ɔ nɔ ɔ, e yeɔ aywilɛho wawɛɛ. Ke wa ná be kɛ ha wa nyɛmimɛ nɛ a kɛ nyagba nɛ ɔmɛ eko ngɛ kpee ɔ, lɔ ɔ tsɔɔ kaa wa je wa “tsui mi” kɛ ngɛ a he susue.—Filip. 2:20.

20. Ke wa ngɛ he nue kaa e piɛ wɔ pɛ ɔ, kɛ munyu nɛ Yesu tu nɛ ngɛ Mateo 12:48-50 ɔ maa ye bua wɔ ha kɛɛ?

²⁰ Níhi fuu ngɛ nɛ ma nyɛ ma ha nɛ be komɛ ɔ, Kristofo no ko nɛ nu he kaa e piɛ lɛ pɛ. Se kɛ̃ ɔ, e sɛ nɛ wa hɛ nɛ je nɔ kɔkɔɔkɔ kaa Yehowa le bɔ nɛ wa ngɛ he nue ha a. Behi fuu ɔ, e guɔ wa nyɛmimɛ Kristofo ɔmɛ a nɔ kɛ haa wɔ níhi nɛ wa hia. (Kane Mateo 12:48-50.) Ke wɔ hu wa ye bua wa nyɛmimɛ nɛ a hia yemi kɛ buami ngɛ asafo ɔ mi ɔ, lɔ ɔ tsɔɔ kaa wa hɛ sa asafo ɔ nɛ Yehowa to he blɔ nya kɛ ha wɔ ɔ. Bɔ fɛɛ bɔ nɛ wa maa nu he ha a, e sa nɛ wa kai kaa Yehowa ngɛ wa kasa nya be fɛɛ be!