1. Иегованыҥ ишчилери кезикте нениҥ учун кунугат?

БИСТИҤ кӧп сабагыс башка-башка шылтактардаҥ улам јаҥысканзырап јат. Та кем де кыска ӧйгӧ, а та кем де узак ӧйгӧ јаҥысканзырайт. Кезикте кижи кӧп улустыҥ да ортозында јӱрзе, бойын јаҥыскан деп сезет, а кемге де јаҥы јуунга кӧчӱп келеле, најылар табарга кӱч болот. Эмезе нак биледе чыдаган кижи ӧскӧ јерге кӧчӱп, бойыныҥ јуук улузын јоктоп, кунугып јат. Эмезе јуук улузын јылыйтып, санааркап јӱрген улус бар. Анайда ок чындыкты алынганы удабаган улус бар. Олорго тӧрӧӧндӧри эмезе алдындагы најылары чындыкты јаратпай, удурлажып та јат. Мынаҥ улам олор бойлорын кемге де керек јок деп сезип јадылар.

2. Бис кандый сурактар шӱӱжерис?

² Иегова бисти јакшы билер ле бистиҥ сезимдеристи эҥ ле јакшы оҥдоп јат. Ол бистиҥ јаҥысканзырап турганысты јӱк ле кӧрӱп турган эмес, је болужарга тыҥ кӱӱнзейт. Кудай биске канайып болужат? Јаҥысканзырабаска, бис бойыс нени эдер аргалу? Јаҥысканзырап турган улуска канайып болужарыс? Бу сурактарды шӱӱжип ийектер.

3. Иегова Ильяга канайып болушкан?

³ Иегова бисти ырысту јӱрзин деп кӱӱнзейт. Ол бистиҥ кажыбыска ла јуук. Биске кӱч ле боло берзе,ол кӧрӱп ийет (Сар. 145:18, 19). Кудай судурчы Ильяга канайып болушканын кӧрӱп ийектер. Илья Израиль албатыныҥ кӱч ӧйинде јаткан. Албатыла башкарган улус Кудайдаҥ јана болуп, оныҥ ишчилерин истежип баштаган. Олор Ильяны  ӧлтӱрерге сананган (1 Каан. 19:1, 2). Илья дезе бойын Кудайдыҥ сок јаҥыс арткан судурчызы деп бодоп, ал-санаага тӱшкен (1 Каан. 19:10). Иегова бойыныҥ судурчызыныҥ санааркаганын кӧрӱп ле ийеле, ого ангелин аткарып јат. Ангел оны, јаҥыскан эмес, је Израильде Кудайдыҥ ишчилери база да кӧп бар деп бӱдӱмјилеген (1 Каан. 19:5, 18).

4. Марк 10:29, 30-тагы сӧстӧр тӧрӧӧндӧриниҥ эмезе најыларыныҥ болужы јок арткан улусты неде бӱдӱмјилейт?

⁴ Бистиҥ кезигиске чындыкка болуп, та нени де артыргызарга келишкен деп, Иегова јакшы билер. Темдектезе, кем де најыларыныҥ, тӧрӧӧндӧриниҥ болужы јок артып калат. Бир катап апостол Петр Иисустаҥ мынайып сураган: «Бат, бастыра јӧӧжӧбисти таштап, Сениле кожо бардыбыс. Бу учун биске не болор?» (Матф. 19:27). Петр санааркаган болор, оныҥ учун мынайып сураган. Је Иисус ӱренчиктерин јаан кӧгӱс билелӱ болор деп бӱдӱмјилеген. (Марк 10:29, 30 кычырыгар.) Анайып ла теҥеридеги Иегова Адабыс ого иштеерге кӱӱнзеп турган улуска болужар деп, сӧзин берет (Сар. 9:10). Эмди, јаҥысканзырабаска нени эдерге јараарын шӱӱжип ийектер.

5. Иегованыҥ болужын шӱӱп сананып турзаас, кандый туза болот?

⁵ Иегованыҥ болужын шӱӱп сананыгар (Сар. 55:22). Шӱӱп сананганы дезе айалганы элбеде кӧрӧргӧ болужат. Темдектезе, кижиге барбаган ла тӧрӧӧндӧри Керечилер эмес Кэрол * деп эје мынайып куучындаган: «Иегова меге кӱч ӧйдӧ канайып болушканын сананып турзам, јаҥысканзырабай барадым. Анайда ок Иегова мени келер де ӧйдӧ артыргыспас деп, бӱдӱмјимди тыҥыдат».

6. 1 Петр 5:9, 10-догы сӧстӧр јаҥысканзырабаска канайып болужат?

⁶ Иегова ака-эјелерге канайып болужып турганын шӱӱп сананыгар. (1 Петр 5:9, 10 кычырыгар.) Иегованыҥ Керечилери эмес тӧрӧӧндӧрлӱ Хироси деп ака канча јылдардыҥ туркунына Иеговага  чындык иштейт. Ол айдат: «Јуундагы ака-эјелердиҥ кемизиниҥ де айалгазын јакшы деп айтпазыҥ. Је андый да болзо, олордыҥ кажызы ла Иеговага акту јӱрегинеҥ иштеп јат». Бу шӱӱлте билезиниҥ улузы Иегованыҥ Керечилери эмес улуска ийде-кӱч берер аргалу.

7. Мӱргӱӱл слерге канайып болужат?

⁷ Јаантайын мӱргӱгер, Агару Бичикти кычырыгар ла јуунныҥ туштажуларына јӱрӱгер. Иеговага мӱргӱп, ончо сезимдеригерди айдып туругар (1 Петр 5:7). Масиель деп јиит кыс Иегованыҥ Керечизи болуп каларда, оныҥ билези оны кӧрбӧй барган. Ол мынайып куучындаган: «Меге јаҥысканзырабаска, Иеговага акту јӱрегимнеҥ мӱргӱгеним болушкан. Мен ого кажы ла кӱн кӧп катап мӱргӱп, бастыра сезимдеримди куучындап туратам. Мынайып, Иегова меге чыннаҥ ла Ада болуп калган».

8. Слерге Агару Бичикти кычырганы ла шӱуп сананганы канайып болужат?

⁸ Агару Бичикти кажы ла кӱн кычырып, јаан ајаруны Иегованыҥ сӱӱжин кӧргӱзип турган ӱзӱктерге эдигер. Билезиниҥ ачу сӧстӧрин угуп турган Бьянка эје мынайып куучындайт: «Меге мендий ок кӱчтерлӱ болгон, алдындагы ла эмдиги ӧйдиҥ Кудайдыҥ ишчилериниҥ јӱрӱмин шӱӱп сананарга јарап јат. Ол меге јаан болуш болот». Кезик ака-эјелер токунал берип турган ӱлгерлерди, темдектезе, Сарын 27:10-ды ла Исаия 41:10-ды ӱренип алгылайт. А кезик ака-эјелер јуунныҥ туштажузына белетенген ӧйдӧ эмезе Агару Бичикти таҥынаҥ кычырган ӧйдӧ ӱренип турган материалдардыҥ аудиозаписьтерин угат. Бу олорго јаҥысканзырабаска болужат.

9. Јууныҥ туштажуларынаҥ слер кандый туза аладыгар?

⁹ Јуунныҥ бир де туштажузын божотпоско албаданыгар. Нениҥ учун дезе туштажуда слер оморкоду алып, ака-эјелерди јакшы билип аларыгар (Евр. 10:24, 25). Ӧрӧги айдылган Масиель деп сыйын айдат: «Мен уйалчаҥ да болгон болзом, бир де јуунныҥ туштажузын божотпой, јартамалдар берерге албаданып туратам. Анайып, ака-эјелер меге билемдий болуп калган».

10. Нениҥ учун јуундагы ака-эјелерле најылажар керек?

¹⁰ Ака-эјелерле најылажыгар. Олордыҥ јажы јаан да, кичинек те болор аргалу, культуразы да башка болордоҥ айабас. Је андый да болзо, слер бой-бойоордоҥ кӧп немеге ӱренер аргалу. Агару Бичикте јажы јаанап калган улустыҥ ченемели јаан деп айдылат (Иов 12:12). Бу ла ок ӧйдӧ олор јиит улустаҥ кӧп  немеге ӱренер аргалу. Темдектезе, Давид Ионафаннаҥ канча киреге јаш та болгон болзо, олор јуук најылар болгон (1 Сам. 18:1). Анайып, кӱч ӧйдӧ олор бой-бойына болужып, Иеговага чындык арткандар (1 Сам. 23:16—18). Билезинде эм тура Иеговага јаҥыскан иштеп турган Ирина эје айдат: «Јуундагы најылар меге кожо чыккан ака-эјелеримдий эмезе ада-энемдий болуп калган. Анайып, Иегова биске јетпей турган немени јеткилинче берип јат».

11. Јуук најыларлу болорго нени эдер керек?

¹¹ Уйалчаҥ улуска најылар табарга јеҥил эмес болот. Мыны, удурлажулар да болгон болзо, је Иегованыҥ Керечизи болуп калган Ратна деп атту уйалчаҥ эје јакшы оҥдоп јат. Ол айдат: «Меге јуундагы ака-эјелердиҥ болужы сӱреен керектӱ деп оҥдоп алгам». Бойыстыҥ сезимдеристи ӧскӧ кижиге куучындаарга јеҥил эмес, је куучындап турзаас, ол кижи биске јуук најы болуп калар аргалу. Најылараар слерге болужарга јат, је слер олорго бойоор керегинде нени де айтпай турзагар, олор слерге канайып болужатан?

12. Јарлаар иш јакшы најылар табарга канайып болужат?

¹² Најылар таап алатан эҥ јакшы аргалардыҥ бирӱзи — кемле-кемле кожо јарлаар ишке барары. Ӧрӧги айдылган Кэрол деп эје мынайып куучындайт: «Алдында кожо јарлаган эмезе теократиялык кандый бир иштерде кожо турушкан эје-сыйындар мениҥ јуук најыларым болуп калган. Иегова меге канча јылдардыҥ туркунына олор ажыра болужып јат». Айдарда, биске јуунда најылар табарга албаданар керек. Нениҥ учун дезе олор ажыра Иегова биске јаҥысканзырабаска болужат (Укаа 17:17).

13. Јуунныҥ кажы ла кижизине нени эдерге албаданар керек?

¹³ Јуунда сӱӱш ле амыр-энчӱ болзын, анайда ок кем де јаҥысканзырабазын деп, јуунныҥ кажы ла кижизине албаданар керек (Иоанн 13:35). Бистиҥ јылу сӧстӧрис ле јакшы керектерис ака-эјелердиҥ кӱӱнин кӧдӱрер аргалу! Бир эје мындый сӧстӧр айткан: «Агару Бичик ӱренип турарымда, ака-эјелер мениҥ билем болуп калган. Олордыҥ болужы јогынаҥ Иеговага иштеп баштабас эдим». Билези Иеговага иштебей тургандарга бис канайып болужарыс?

14. Јуундагы јаҥы улуска најы болорго биске нени эдер керек?

¹⁴ Најылажарга баштапкы алтамды бойоор эдигер. Јуундагы јаҥы улусты, темдектезе, Агару Бичик ӱренип, јуунныҥ туштажуларына јӱрӱп баштагандарды, јаан удабай сууга чӧҥӱрилгендерди ле ӧскӧ јууннаҥ кӧчӱп келген јарчыларды јылу уткыгар (Рим. 15:7). Је бис андый улусты јӱк ле јылу уткыырга эмес, је бир канча ӧйдӧҥ олорго јуук најылар болуп каларга кӱӱнзейдис. Оныҥ учун олорго акту јӱрегердеҥ ајару эдип туругар. Темдектезе, олор чындыкты канайып билип алганын, олордо кандый кӱчтер болуп турганын сурап угыгар. Је ундыбагар, кезик улуска бойы керегинде куучындаарга јеҥил эмес. Оныҥ учун эби јок айалгага тургускадый сурактар бербеске албаданыгар. Анайда ок олорго јалакай болугар ла олорды лаптап угыгар.

15. Јуундагы улуска кӧгӱзи тереҥ ака-эјелер канайып болужар аргалу?

¹⁵ Јуундагы ака-эјелер бой-бойына акту јӱректеҥ ајару эдип турза, олордыҥ  кажызыныҥ ла бӱдӱмјизи тыҥыйт. Јуундагы улусты, озо ло баштап, кӧгӱзи тереҥ христиандар, анчада ла аксагалдар, кӧрӧр учурлу. Чындыкта энези таскаткан Мелисса эје куучындайт: «Мени канча јылдардыҥ туркунына јуундагы акалар адам чылап кичееп, кӧрӱп јӱрген. Кӱч ӧйдӧ олор јаантайын мениҥ јанымда болотон. Мен олорго јаан быйаным айдадым». Маурисио деп јиит ака куучындаган: «Менле кожо Агару Бичикти ӱренген ака јууннаҥ ырап каларда, мен јаҥысканзырап баштагам. Бу ӧйдӧ јаан болужын меге аксагалдар јетирген. Олор менле јаантайын куучындажып, јарлаар ишке алып туратан, анайда ок таап алган јилбилӱ шӱӱлтелериле ӱлежетен. Мен олорло кожо спортло до тазыктырынып туратам». Эмди Мелисса ла Маурисио Иеговага ӧйин толо берип иштегилейт.

16, 17. Бисте ака-эјелерге болужатан база кандый аргалар бар?

¹⁶ Керектеригерле болужыгар (Гал. 6:10). Билезинеҥ ыраак јерде миссионер болуп турган Лео ака мынайып куучындаган: «Кӱч айалгада биске ака-эјелердиҥ болужы сӱреен керектӱ болот. Бир катап мен аварияга киргем. Айылыма арып, чучурап калган келгем. Бу ла тушта мени айылына бир биле кычырган. Анда нени јигеним сагыжыма кирбейт, је санаама олордыҥ јалакайы ла мени лаптап укканы артып калган. Мыныҥ кийнинде меге јакшы боло берген».

¹⁷ Биске ончобыска курултайларда болорго јарап јат. Анда бис кӧп ака-эјелерле кӧрӱжип, программаны кожо шӱӱжедис. Је курултайлар Кэрол эјеге јаан ченелте болот. Ол мынайып айдат: «Курултайларда сӱреен кӧп улус болуп јат. Је олордыҥ кӧп сабазы эш-нӧкӧрлӧр ле билелер. Олорды кӧрӱп, бойымды јаҥыскан деп сезедим». Анайда ок эш-нӧкӧри јок арткан кийнинде баштапкы ла катап курултайга келген ака-эјелерге кӱч болот. Мындый кӱчтерлӱ ака-эјелерди билер болзогор, олорды келер курултайга кожо барып келерге не кычырып албас?

18. 2 Коринфтегилерге 6:11—13-теги сӧстӧрди айылыска ака-эјелерди кычырарга турзаас, канайып тузаланарыс?

 ¹⁸ Кожо ӧй ӧткӱрип туругар. Башка-башка ака-эјелерди, анчада ла јаҥысканзырап тургандарды, айылыгарга кычырып туругар. Ӧскӧртӧ айтса, олорго «јӱректеригерди кеҥиде [јаанада] ачы[гар]». (2 Коринфтегилерге 6:11—13 кычырыгар.) Мелисса эје эске алынат: «Энемди ле мени ака-эјелер айылына кычырып турза эмезе кожо амырап барып келерге кычырза, биске сӱреен јарап туратан». Слердиҥ јууныгарда јаҥысканзырап турган ака-эјелер бар ба?

19. Ака-эјелерге, анчада ла кандый ӧйдӧ бистиҥ болужыс керек болот?

¹⁹ Кезикте ака-эјелер бисти олорло кожо болзын деп тыҥ кӱӱнзеп јат. Темдектезе, олорго байрамдардыҥ ӧйинде Иеговага бӱтпей турган тӧрӧӧндӧриниҥ ортозында болорго јеҥил эмес болуп јат. Эмезе олор кандый бир кӱнде, темдектезе, сӱӱген кижизиниҥ божогоныныҥ јылдыгында, тыҥ јаҥысканзырап јадылар. Андый ака-эјелердиҥ јеҥил эмес ӧйинде, олорло кожо ӧй ӧткӱрзеес, олорды акту јӱрегистеҥ сӱӱп турганысты кӧргӱзедис (Флп. 2:20).

20. Матфей 12:48—50-деги Иисустыҥ сӧстӧри јаҥысканзырап тургандарды неде бӱдӱмјилейт?

²⁰ Је ундыбактар: Иегова бистиҥ сезимдеристи јакшы оҥдоп јат. Ол бистерди ака-эјелер ажыра токунадат. (Матфей 12:48—50 кычырыгар.) Бис ого быйанысты ака-эјелерге болужып турганысла кӧргӱзедис. Бисте кандый да сезимдер болуп турза, бис качан да јаҥыскан артпазыс. Нениҥ учун дезе, Иегова јаантайын бисле кожо!