1. Kii i nla boñ le ngim mangéda, ngwélél Yéhôva a nôgda le a yé nyetama?

NGANDAK bôt ikété yés i ma nôgda le i yé yotama. Inyu ngim bôt, hala a yé a nom bé. Ndi inyu bape, hala a nom. U nla nôgda le u yé wetama to ibale bôt ba yé we ipañ. Kiki hihéga, ngim bôt i gwé ndutu i bot mawanda i ngéda i nke i likoda li mondo. Bape ba néñél ikété mahaa i het bôt bobasôna ba ngwéhna; jon i ngéda ba nke haa ni bôt bap, ba yé ba nôgda wengoñle ba gwé bé mut. Bape ba nôgda le ba yé botama inyule mut wap ba gwéhék a nwo. I nla pam le mut nu a ntip yila kristen a nôgda le a yé nyetama inyule bôt bé ba lihaa ni minlômbi nwé mi mawanda mi nkôm nye mbus, tole ba ntééñga nye.

2. Mambe mambagda di ga timbhe?

² Hiki jam li mpémél bés, Yéhôva a nyi jo, a nok ki yom di nôgda. To imbe ngéda di nôgda le di yé bésbotama, a nyi hala, a yé ki bebee i hôla bés. Mambe mahôla Yéhôva a nlona bés? Mambe mam bésbomede di nla boñ? Kii di nla boñ inyu hôla lôk kéé i i nôgda le i yé yotama? Di timbhe mambadga mana.

3. Lelaa Yéhôva a bi unda le a ntôñ Éliya?

³ Bagwélél ba Yéhôva bobasôna ba yé nseñ i mis mé. A yé bebee ni hiki wada wés, inyu hala nyen i ngéda ngim jam i ntééñga bés, a nyi hala. (Tjémbi 145:18, 19) Di  béñge jam li bi pémél mpôdôl Éliya, di tehe lelaa Yéhôva a bi yoñ ngéda ni nye. I mut hémle nunu a bi niñ i ngéda bon ba Israel ba bi kôm Yéhôva mbus. Ha ngéda i, ba bé tééñga bagwélél ba Yéhôva, ndi téntén Éliya nyen baane ba loñ ba bé sômbôl nol. (1 Bikiñe 19:1, 2) Ndi jam lipe li bé tééñga Éliya, a bé hoñol le, nyetama nyen a bé a yii kiki mpôdôl Yéhôva. (1 Bikiñe 19:10) Yéhôva a bi pala yimbe le jam li bé tééñga Éliya. Jon a bi om añgel i ti mpôdôl wé mankénd inyu boñ le a nôgda bañ le a yé nyetama; ni inyu kal nye le bon ba Israel bape ba bé ba ngi yii bagwélél ba Djob!​—1 Bikiñe 19:5, 18.

4. Lelaa kaat Markô 10:29, 30, i ñunda le Yéhôva a ntôñ bagwélél bé ba ba gwé bé mut?

⁴ Yéhôva nyemede a nyi le, i ngéda di nyoñ makidik i gwélél nye, bahogi ikété yés ba ga kôhna ngandak mandutu. Kiki hihéga, bôt bap ba lihaa ni minlômbi nwap mi mawanda ba nla kôm bo mbus. Bebek le ñôma Pétrô a bééna nduña ñem i ngéda a bi bat Yésu le: “Di bi yék mam momasôna, di noñ we; bés d’a bana ni kii?” (Matéô 19:27) Yésu a bi ti banigil bé loñge ndimbhe i i bi mômôs bo i ngéda a bi kal bo le ba ga kôhna lihaa likeñi i pes mbuu. (Añ Markô 10:29, 30.) Yéhôva nyemede nu a yé Isañ lihaa jés li mbuu a bi bôn le a ga hôla nu ni nu a gwé ngôñ i gwélél nye. (Tjémbi 9:11) Di wan ndék mam u nla boñ inyu kôhna mahôla ma Yéhôva i ngéda u nôgda le u yé wetama.

5. Ibale u nhoñol i mahôla Yéhôva a ma ti we, kii u ga nok?

⁵ Hoñol mahôla Yéhôva a ma ti we. (Tjémbi 55:23) Hala a ga hôla we i nok le u ta bé wetama. Carol * nu a yé ngi biiba, a bak nyetama maliga mu lihaa jé, a nkal le: “I ngéda me nhoñol mahôla Yéhôva a ma ti me, me ôt ki mahoñol mu maboñok mé, hala a nhôla me i nok le me ta bé metama. Hala a ñunda ki me le  to kii i mpémél me, Yéhôva a ga ba ni me.”

6. Lelaa kaat 1 Pétrô 5:9, 10, i nla hôla bôt ba nôgda le ba yé botama?

⁶ Hoñol mahôla Yéhôva a nti lôk kéé i i nôgda le i yé yotama. (Añ 1 Pétrô 5:9, 10.) Mankéé wada le Hirôshi nu a bé Mbôgi Yéhôva nyetama i lihaa jé a nkal le: “Me bi yimbe le i likoda, hiki mut a gwé mé mandutu. I ngéda mut a yé mpom Mbôgi Yéhôva ikété lihaa jé, hala a nla lédés nye i tehe le ini lôk kéé ipe i njo sañ inyu gwélél Yéhôva.”

7. Lelaa masoohe ma nla hôla we?

⁷ Bana lem i soohe, i añ Bibel ni i ke makoda. U nlama kal Yéhôva i yom u nôgda. (1 Pétrô 5:7) Massiel a yé njohok sita. I ngéda a bi yoñ makidik le a ngwélél Yéhôva, lihaa jé li bi tjôô nye. A nkal le: “I soohe Yéhôva ni ñem wem wonsôna li bi hôla me le me nôgda ha bañ le me yé metama. Yéhôva a yé me bañga Isañ, me nsoohe ngandak ngélé hiki kel, me nyible ki nye ñem wem.”

8. Lelaa i soñgol ni soñda Bañga i Djob i nla hôla we?

⁸ Añ Bibel hiki kel, yoñ ngéda i tehe lelaa i mam u ñañ ma ñunda le Yéhôva a ngwés we. Sita yada le Bianca, nu a bi nihbe bibuk bibe bôt bé ba lihaa ba bé leñ nye, a nkal le: “Hala a bi lédés me i añ ni i hek pék mu miñañ mi Bibel ni mi bagwélél ba Yéhôva ba ba bi boma minlélém mi mandutu kiki me.” Ngim bikristen i ntééda minlôñ mi Bibel miñem nwap inyule mi nhôgbaha bo, kiki bo Tjémbi 27:10 ni Yésaya 41:10. Bape ba nkal le i ngéda ba ñemble lisoñgol li Kaat likoda li ñem sonde tole li Nkum Ntat inyu kôôba makoda, tole lisoñgol li Bibel, hala a mboñ le ba nôgda ha bañ le ba yé botama.

9. Lelaa i ke makoda i nla hôla we?

⁹ Boñ biliya i ke makoda momasôna. I ngéda u nke makoda, u nkôhna biniigana bi bi nlédés we, makoda ma nhôla ki we i bot mawanda malam. (Lôk Héber 10:24, 25) Massiel nu di mbôk di mpôdôl a nkal le: “Me nkon woñi i pot i ti bôt, ndi me bi kit le m’a ke makoda momasôna, me boñ ki biliya i timbhe. I makidik ma, ma bi hôla me i tehe lôk kéé i likoda kiki lihaa jem.”

10. Inyuki di nlama bot mawanda ni minhôôlak mi bikristen?

¹⁰ Bot mawanda ni minhôôlak mi bikristen. Ikété likoda, bot mawanda ni bôt ba ba nla lédés hémle yoñ, ibabé  i béñge nwii nwap to i het ba nlôl. Bibel yomede i nkal le: ‘Mimañ mi bôt nwon mi gwé bañga pék.’ (Hiôb 12:12) Ndi yak mimañ mi bôt mi nla nigil mam malam ipañ boñge ba wanda ba ba nkon Djob woñi. Yônatan a bé David mañ huum, ndi hala a bi kéñ bé bo i ba bañga mawanda. (1 Samuel 18:1) David bo Yônatan ba bé hôlna, ba tin-ga makénd i gwélél Yéhôva, yak ikété mandutu makeñi. (1 Samuel 23:16-18) Sita yada ba nsébél le Irina, nu a yé nyetama maliga, a nkal le: “Bagwélél ba Yéhôva ba nla yila bagwal bés ni lôk kéé yés i bôlôm ni i bôda i pes mbuu. Yéhôva a nla gwélél bo inyu boñ le di nôgda ha bañ le di yé bésbotama.”

11. Kii di nlama boñ inyu bana bañga mawanda?

¹¹ Ibale u yé nsut, hala a nla lédél we i bot mawanda ma mondo. Sita yada le Ratna nu a yé nsut, a bi nigil maliga to hala kiki bôt ba bé kolba nye, a nkal le: “Me bi sôk me nok le i bé béda me le me neebe mahôla ma bilôk bikéé bi likoda.” I nla ba nledek jam i yible mut ñem, ndi ibale u mboñ hala, hala a nla ba bibôdle bi bañga mawanda. Mawanda moñ ma gwé ngôñ i hôla we, ndi i mbéda le u néhne bo njel le ba hôla we.

12. Lelaa likalô li nla hôla bés i bot bañga mawanda?

¹² Loñge njel inyu bot mawanda i yé le u pam i likalô ni bikristen bipe. Carol nu di mbôk di sima, a nkal le: “Me bi bana ngandak biloñge bi mawanda i ngéda me bi bôdôl ke likalô ni bisita, me boñok ki minson mi likoda mimpe lôñni bo. Yéhôva a bi gwélél mawanda ma inyu nit me mu nwii mi nwominsôna.” I bana mawanda ma ma yé minhôôlak mi bikristen, i yé loñge jam ngandak. Yéhôva a ngwélél mawanda ma inyu hôla bés i hôyôs ndutu yés, kiki bo i ngéda di nôgda le di gwé bé mut.​—Bingéngén 17:17.

13. Kii i mbéda le bésbobasôna di boñ ikété likoda?

¹³ Bôt bobasôna bon ba nlama boñ le gwéha ni nsañ bi ba ikété likoda, kayéle mut to wada a nôgda bañ le a yé nyetama. (Yôhanes 13:35) Maboñok més ni bipôdôl gwés bi nla ti bôt bape makénd ngandak! Sita yada i bi kal le: “I ngéda me bé nigil Bibel, likoda li bi yila lihaa jem. Ibale li hôla bé me, ki me bi yila bé Mbôgi Yéhôva.” Kii di nla boñ inyu hôla bilôk bikéé bi bi gwé bé bôt bap ba lihaa ikété ntôñ u Djob, i nôgda le ba yé nseñ ikété likoda?

14. Lelaa u nla bot mawanda ni bôt ba ntip bôdôl lo makoda ?

¹⁴ Ba mut bisu i bot mawanda ni bôt bape. Jam li bisu di nla boñ li yé le, di tibil leege masu ma mondo. (Rôma 15:7) I yéga bo i yé loñge jam, ndi di nlama bé telbene ha. I mbus ngéda, di nlama yéñ yila mawanda map. Inyu boñ hala, di nlama ba minyaô, di unda ki bo le di ntôñ bo. Yéñ njel i yi mandutu map, ndi u ha bañ nyo woñ i mam map. Ngim bôt i gwé ndutu i pahal i yom ba nôgda, jon u nyégsa bañ bo i pot. Ndi gwélél mambadga malam ma ma mboñ le bomede ba yibla; i ngéda ba mbôdôl pot, emble bo loñge loñge. Kiki hihéga, u nla bat bo lelaa ba bi yi maliga.

15. Lelaa minhôôlak mi bikristen mi nla hôla bôt bape ikété likoda?

¹⁵ Likoda jolisôna li ga kônde bana  maada malam ni Djob ibale minhôôlak mi bikristen, téntén mimañ mi nyoñ ngéda ni hiki mut. Mélisa nu a bi gwéé, a ada nyañ i maliga, a néñél mu, a nkal le: “I bilôk bikéé bi bôlôm bi bi yoñ me kiki ngond yap i pes mbuu, me ta bé le me timbhe bo i loñge ba bi bôñôl me. To imbe ngéda me bé sômbôl kwélés bo, ba bé bebee i emble me.” Njohok mankéé nu munlôm wada le Môris a nkal le, i ngéda i nwet a bé niiga nye Bibel a bi pam i ntôñ, a bi nôgda le a yé nyetama; ndi mimañ mi bi yoñ ngéda ni nye. A nkônde le: “Ba bé pôdôs me hiki ngéda. Ba bé ke i likalô ni me, ba tinak me biniigana bilam ba bé léba mu yigil yap i Bibel, ba kenek i boñ sport ni me.” I len ini, Mélisa ni Môris ba yé bagwelnson ba ngéda yosôna.

16-17. Mambe mam ma tôbôtôbô u yé le u boñ inyu hôla bôt bape?

¹⁶ Bôñôl bape loñge. (Galatia 6:10) Léo nu a yé missionaire i loñ i i yé haa ni lihaa jé, a nkal le: “Libim li ngéda, yom yosôna u gwé ngôñ i yé ndik le bôt bape ba unda we loñgeñem. Kel yada, me bi boñ accident. I ngéda me bi sôk me bol i ndap, me bé bé nwee. I mbus mam mana, mankéé wada bo nwaa ba sébél me i je i mbai yap. Me nhoñol ha bé i bijek ba bi lamb, ndi me ngi hoñlak lelaa ba bi sédne me ôô, ba emble me. I ngéda me bé nyodi nyoo, me bé maséé ngandak!”

¹⁷ Bésbobasôna di ngwés di nke i makoda ma makiiña ni ma ndôn, inyule di mboma lôk kéé ipe nyoo, di pôdlak biniigana di ñôt mu minkwel. Ndi Carol nu di mbôk di pôdôl a nkal le: “Makoda ma makiiña ni ma ndôn ma bi yilna me ngok baagene.” Inyuki? A nkal le: “Bilôk bikéé bi bôlôm ni bi bôda bi yé homa nyensôna i ndap likoda likeñi, ndi libim li ngéda, bo ba yé ni mahaa map, ba ta bé botama. Hala a nhôñlaha me le me gwé bé me mut.” Bape ba yé le, i ngéda nlô wap tole nwaa wap a nwo, ba gwé ndutu i ke i makoda ma makiiña ni ma ndôn. Baa u nyi ngim mut i gwé ndutu i? Baa u yé le u sébél nye le a ba ni lihaa joñ i likoda likeñi li li noñ ha?

18. Lelaa di nla noñ maéba ma yé i 2 Korintô 6:11-13?

 ¹⁸ Tégbaha ngéda ni bôt. Boñ biliya i tégbaha ngéda ni bilôk bikéé bipe, téntén bi bi nôgda le bi gwé bé mut. Di nlama ‘yible bo ñem wés.’ (Añ 2 Korintô 6:11-13.) Mélisa nu di mbôk di sima a nkal le: “Hiki ngéda mawanda mem ma bé sébél me i tégbaha ngéda ni mahaa map, tole i ke liké, me bé huu maséé.” Baa ngim mut i yé mu likoda joñ le u nla leege i mbai yoñ?

19. Mambe mangéda ma tôbôtôbô ma nla ba loñge i tégbaha ngéda ni ngim bikristen?

¹⁹ Ngim mangéda i tôbôtôbô i yé le bilôk bikéé gwés bi nla ba maséé le di naña bo. Kiki hihéga, ngim lôk kéé i ngwés bé ba ni bôt bap ba lihaa ba ba ta bé maliga i ngéda mangand ma yé. Ngim dilo i nla bane bikristen bipe ndutu, bebek inyule i kel i i nhôñlaha bo hilo hi nyemb hi mut wap. I ngéda di ntégbaha ngéda ni lôk kéé i i gwé nya ndutu i, wee di “ntôñ yaga” bo.​—Filipi 2:20.

20. Lelaa bibañga bi Yésu bi bi mpémél i Matéô 12:48-50 bi nla hôla bés i ngéda di nôgda le di yé bésbotama?

²⁰ Ngandak mam i nla boñ le mut a nôgda le a yé nyetama. Ndi di nlama bé hôya le Yéhôva a nyi i mam di nôgda mu miñem nwés. Jon a yé a ti bés mam ma mbéda bés. Ndi ngim mangéda, a nla gwélél lôk kéé yés. (Añ Matéô 12:48-50.) Likoda li yé lihaa likeñi Yéhôva nyemede a bi téé, i ngéda di ñunda lôk kéé ipe gwéha, wee di nti Djob mayéga inyu likébla li. To ibale ngim mangéda di nla nôgda le di yé bésbotama, di hôya bañ le Yéhôva a yé bés ipañ hiki ngéda; jon di ta bé bésbotama!