1. Ka san uagu anihein lubéi dan sandiguatiña hádangiñe lubúeingu Heowá houngua hábugua?

HIIBE-AGEI wádangiñe sandiguañahaadiwa woungua wábugua somu dan. Houn híbiri aban katei gásügürati. Gama lumoun, lidan hakesin amu, másiñati siñá hamani saminaü le agidara hawariua. Añahein sandiguatiña houngua hábuguarügü íbini geyegu haña lan saragu gürigia hau. Añahein hádangiñe hénrenguti houn héchudun luagu iseri damuriguaü le ñein habéi. Híbiri hádangiñetiña iduheñu ha lídanbaña burí aban ani dan le hawaraüdagun dise hawéi haduheñu aba hasandiragun houngua hábuguarügüñanu lan. Añahein féridi hamaña haduheñu lidan óunweni ani álugatiña hawagu saragu. Añahein kristiánugu, hátima iserigiñabaña lidan inarüni, sandiguatiña houngua hábuguarügü ladüga mabusenrunwaña lan o híchuguña lan haduheñu hama binadu hamadagu ha mámabaña Gefentiña lidere dan houn.

2. Kaba álügüdahani wóunaba lidan aturiahani le?

² Subuditiwa lun Heowá buidu buidu ani gunfuranda lumutiwa. Ligíati subudi lumuti dan le wasandiragun woungua wábuguarügüñadiwa lan ani busenti líderaguniwa. Lidan aturiahani le, wóunabubei álügüdahani burí le: ida liña líderaguniwa Heowá agagibudagua luma lasandiragun gürigia lungua kamá le lábuguarügüñein?, ka gayaraabei wadügüni anhein sandigua wabéi woungua wábugua? ani ka gayaraabei wadügüni lun wíderaguniña wíbirigu ha lídanbaña damuriguaü ha asandiragubaña houngua hábuguarügüñanu lan?

3. Ida liña larufuduni Heowá aranseñu liña lan lun líderaguni Elíasi?

³ Bereseti Heowá saragu luagu le hasandirubei sun lubúeingu. Kei le yarafa lubéi lun kada aban wádangiñe subudi lumuti dan  le lebelurun maguraasuni woun (Sal. 145:18, 19). Ariha waméi ida liña lan aranseñu liña lan Heowá lun líderaguni profeta Elíasi. Wínwanti meha profeta le lidan aban dan hénrenguti Ísüraeli. Éibaaha hamutiña meha láganiñu Bungiu ha gabafubaña lubúeingu lau furundei ani busentiña meha háfaruni Elíasi hilagubei (1 Uru. 19:1, 2). Saminati meha Elíasi ligíarügaali lan lani Heowá profeta eredera ani adügati meha katei le lun ladiheridun (1 Uru. 19:10). Lau lóufudagun aban ladügün Heowá aransehani lun líderaguni Elíasi: aba lóunahan aban ánheli lun lachoururagüdüni lun Elíasi mama lan lábuguarügüñein luagu añahagua lan saragu ísüraelina úaraguatiña (1 Uru. 19:5, 18).

4. Ida liña larufuduni Márükosu 10:29, 30 berese lan Heowá hau ha féridi hamaalibei hídehan hamadagu hama haduheñu?

⁴ Subudi lumuti Heowá adügaadiwa lan saragu sákürifisiu lun weseriwidun lun. Másiñati féridi wamaali lan hídeha iduheñu hama umadagu ha meseriwidunbaña lun Heowá. Aban weyu aba lariñagun apostolu Féduru lun Hesusu, háfuga lau saragu idiheri: “Nabureme, wagía, ígira wamaali sun le meha wámabei lun wafalarunibu. Kaba san wibiha?” (Mat. 19:27). Lau ínsiñehabuni aba lariñagun Hesusu houn lani disipulugu gíbebaña lan hábirigu lidan afiñeni ha lúnbaña ítara hamá houn kei iduheñu (aliiha huméi Márükosu 10:29, 30). Füramaseti Heowá Wáguchi Bungiu le siélubei líderagubaña lan ha eseriwidubaña lun (Sal. 9:10). Ariha wamá ida luba lan wasagarun buiti lídangiñe ídemuei le, dan le wageindaguña lan luma saminaü wábuguarügüñadiwa lan.

5. Ka uagu buidu lubéi lun wasaminarun ida liña lan líderaguniwa Heowá?

⁵ Wasaminaruni ida liña lan líderaguniwa Heowá (Sal. 55:22). Líderagubadiwa le lun warihini katei lau lubudubu. Ariñagatu aban íbiri gíritu Carol, * mamarieidungiru ani tuguyarügüñoun gefentu luagu Heowá hadan tiduheñu: “Le íderagubalina lun masandiragun nan nungua nábuguarügüñadina lan, nasaminarun luagu ida liña lan líderagunina Heowá dan le násügürün lídangiñe lénrengunga. Chóurugüda lumutina katei le mígirun lubadina lan Heowá nábugua ámuñegü”.

6. Ida luba líchugun 1 Féduru 5:9, 10 gurasu houn ha asandiragubaña houngua hábuguarügüñanu lan?

 ⁶ Wasaminarun ida liña lan líderaguniña Heowá ha asandiragubaña houngua hábuguarügüñanu lan (aliiha huméi 1 Féduru 5:9, 10). Ariñagati Hiroshi aban íbiri le Gefenti ani ligíarügüñein meha hadan liduheñu lidan inarüni luagu saragu irumu: “Ménrengun lan larihin lidan damuriguaü ámuñegueinarügü lan le gádanbaliña íbirigu. Íderagua lumutiwa wagía le maduheñubei lidan inarüni dan le wasubudiruni wíchuguñein lan sun lubuidun wámati lun Heowá”.

7. Ida liña líderagunün furíei?

⁷ Kipu waméi lubuidun wamadagu luma Heowá. Súdiniti lun wadararunu wanigi lun Heowá ani ariñaga wameime lun ka lan wasandirubei (1 Fe. 5:7). Ariha waméi le tabahüdagunbei Massiel, aban nibureintu to uáguboun híchigei tiduheñu hanagan dan le tagumeserunbei eseriwida lun Heowá: Aban katei le íderagubalina lidan nageindagun luma saminaü le adügübei lun nasandiragun nungua nábuguarügüñadina lan, nafurieidun lau sun nere lun Heowá. Ábanñein úguchili inarüniti nun. Ayanuhatina luma sagü weyu, anihein dan adüga numuti sun oura, ariñaga numuti le nasandirubei lun”.

8. Ida liña líderagunün haliihanu Lererun Bungiu ani samina huguya luagu le halíabei?

⁸ Súdiniti taliihóun Lererun Bungiu súnwandan ani ráramagua wagíame asaminara luagu abahüdaguni le tídanbei le aritaguagüdübaliwa lueirin wínsiñe lun Heowá. Ariñagatu Bianca, aban íbiri to awandubalin luriban hayanuhan tiduheñu tuagu: “Íderagua lumutina naliiha sügǘ tídangiñe Bíbülia luma naliihan luáguti habagari lubúeingu Heowá ha sügühañabaña lídangiñe turobuli libe le násügürübei luma lun nasaminarun hulili luagu le naliihabei”. Añahein íbirigu furendeitiña ámuñegueinarügü bérusu le íchugubei dǘgüdaguaü houn, kei burí Sálumu 27:10 luma Isaíasi 41:10. Añahein aransehatiña luba damuriguaü o haganbahanu Bíbülia dan le añahán lan aliihoun. Ídehati le lun masandiragun hamá hábuguarügüñanu lan.

9. Ka buiti hibihibei lau habasiihan lidoun adamuridaguni?

⁹ Lunti wáfaagun lun wachülürün lidoun adamuridaguni, lugundun íderagua lumutiwa lun wárügüdün gurasu ani ruti giñe chansi woun lun wasubudiruniña wábirigu buidu (Ebü. 10:24, 25). Ariñagatu Massiel to buga uáguboun wabahüdahan lidan párafu 7: “Lau sun haburi nan meha, aba náfaagun lun nabasiha lidoun sun adamuridaguni luma lun níchugun aban óunabagülei. Adügati lira lun nasandiragun nungua keisi lílana damuriguaü”.

10. Ka uagu súdini lubéi lun gamadagua wamá hama íbirigu ha úaraguabaña?

¹⁰ Wadügün umadaguaü hama íbirigu úaraguatiña. Adüga wamá umadaguaü hama íbirigu  ha íchugubaña aban hénpulu buiti woun, íbini mama lan aban warumudiri hama o lídangiñetiña lan amu rasa. Ariñagatu Bíbülia “hámañein wéiyaaña mutu lichú aau” (Hob. 12:12). Gama lumoun gayaraati giñe hafurendeirun wéiyaaña mutu saragu hámagiñe nibureintiña ha úaraguatiña. Díseeli meha laweiridun Yónatan luéi Dawidi íbini ítara adügatiña meha aban lubuidun umadaguaü (1 Sam. 18:1). Biángubei hagía íderaguatiña hámagua lidan heseriwidun lun Heowá laganagua lanarime lénrengunga (1 Sam. 23:16-18). Ariñagatu Irina, aban íbiri tuguyarügüñoun gefentu luagu Heowá hadan tiduheñu: “Gayaraati ítara hamá wapanaagu kristiánugu woun kei agübürigu o kei waduheñu. Gayaraati layusuruniña Heowá lun aban hamá iduheñu woun ha wemegeirubaña”.

11. Ka lunbei wadügüni lun gamadagua wamá umadagu buítiña?

¹¹ Gayaraati hénrengu lan houn fiu hadügün iseri umadagu dántima le haburi hamá. Ariha waméi le tariñagubei Ratna, aban íbiri haburitu to ágagibudagunboun luma óuchawaguni dan meha tafurendeirubalin inarüni. Ariñagatu: “Mosu meha nánharun lun ídemuei le nemegeirubei luma ídemuei le híchugubei íbirigu ha ítarabaña nun kei iduheñu”. Másiñati hénrengu lan woun wariñaguni houn amu ida liña lan wasandiragun woungua lau sun lira ligía lébunabei aban buiti umadaguaü. Busentiña wamadagu híchugun gurasu woun luma lun híderaguniwa, lau sun lira lunti wíderaguniña asubudirei ida luba lan hadügüni.

12. Ida liña líderaguniwa apurichihani lun wadügün umadagu buítiña?

¹² Wáfuridun apurichiha úara hama amu íbirigu ligía aban igaburi buídutimati lun hadügün umadagu. Ariñagatu Carol, to buga uáguboun wayanuhan lidan párafu 5: “Adügaadina saragu umadagu le buíduburiti lau náfuridun apurichiha hama íbirigu hiñaruñu luma lidan wadügün amu burí dasi lidan weseriwidun lun Heowá”. Lau lásügürün dan yusu lumutiña Heowá umadagu ha lun híchugun gurasu nun”. Chóuruti buidu lan lun wáfaagun gamadagua wamá hama íbirigu ha úaraguatiña. Yusu lumutiña Heowá lun híderaguniwa dan le wásügürün lídangiñe dan hénrenguti kei burí dan le wasandirun wábuguarügüñadiwa lan (Ari. 17:17).

13. Ka lunbei wadügüni súngubei wagía?

¹³ Sun wagía mosu wídehan lun ñein lan darangilaü luma ínsiñeni lidan damuriguaü. Ítara úabei ni aban asandiraguti lungua lábuguarügüñein lan (Huan 13:35). Gayaraati lídehan le wariñagubei luma le wadügübei lun hibihin amu gurasu. Ariñagatu aban íbiri: “Dan le nafurendeirubalin inarüni aba ítara hamá lílana damuriguaü nun kei iduheñu. Sin hídehan siñabei yebe aban nan hádangiñe gefentiña luagu Heowá”. Ka gayaraabei nadügün lun hasandiragun ha sandiguabaña houngua hábuguarügüñanu lan lun lílana hamá damuriguaü?

14. Ida luba gamadagua wamá hamá ha iserigiñabaña lidan damuriguaü?

¹⁴ Áfaagua wamá lun gamadoun wamá. Gayaraati wagumeserun eresibiraña ha íserigiñabaña lidan damuriguaü lau ínsiñehabuni (Rom. 15:7). Gama lumoun, úati buídurügü lan wabusurun houn. Busentiwa umadagu wamá ha buítiña lau lásügürün dan. Lun lira mosu gamadoun wamá ani arufuda wagíame ínsiñehabuni le inarüniti houn ha iserigiñabaña. Áfaagua wamá lun gunfuranda wamani haturobulin sin wádaragun woungua lidoun habagari. Añahein hagía másiñati hénrengu lan houn hariñaguni le hasandirubei, duari wamá lun madügün wamá lun hasandiragun houngua hafosuruña lan. Adüga wamá álügüdahani lau ínsiñehabuni ani aganba wamaña lau gurasu. Kei hénpulu gayaraati wálügüdüniña ida liña lan hasubudiruni Heowá.

15. Ida luba híderaguniña kristiánugu derebugu tafiñen amu íbirigu ha lídanbaña damuriguaü?

 ¹⁵ Dan le berese hamá kristiánugu ha derebuguti hafiñen, hau amu, wéiyaañatima lidan afiñeni, aba lederebugudun hamadagua lílana damuriguaü luma Bungiu. Ariñagatu Melissa, to tagüriaruboun túguchu lidan inarüni: “Lóuguati dimurei lun níchugun seremei luagu sun irumu le sügühalibei luagu añahein lan íbirigu aransetiña lun ítara hamá kei úguchili. Sagü busén nan nayanuhan añahein somu íbirigu lun haganbunina”. Ariha waméi le lariñagubei Mauricio, aban íbiri nibureinti le asandiragubei lungua lábugua, dan le lígirunbalin íbiri le arufudahabalin inarüni lun: “Aban katei le íderagubalina hebereserun wéiyaaña lidan afiñeni nau. Sagatiña meha dan lun hayanuhan numa, apurichiha hagía numa. Abahüdaguatiña nun luagu somu lubuidun ariñahani le hadarirubei lidan haturiahanu Bíbülia hábuguarügü ani áhureratiña burí somu huraraü numa”. Dandu Melissa kei Mauricio heseriwiduña lun Heowá lidan dan dayarüti.

16, 17. Ka amu katei gayaraabei wadügüni lun wíderaguniña amu?

¹⁶ Ru wamá ídemuei le ménrengunti (Gal. 6:10). Ariñagati aban misionéru gíriti Leo, le eseriwidubei dise hawéi liduheñu: “Aban katei le ménrengunti, lemegeirubei aban gürigia, lun larufudún lubuidun igaburi lun dan le lemegeiruni. Haritagua nágili le asuseredubei dan le nasufurirubei aban danaguaü tidan nikarün. Dan le nachülürünbei múnadoun nadadagaruña meha saragu. Ábati hagunbirahanina aban feru maríeitiña lun neigin murusunraü hama. Maritagun numuti éigini le híchugubei nun, gama lumoun rédeiti nichügüwagun ínsiñeni le harufudubei nun lau haganbunina. Lárigiñe aba buídutimahali lan nasandiragun nungua”.

¹⁷ Sun wagía gúndaatiwa dan le lidan wamá wadamuridagun, kei burí lidan adamurini, ladüga hámañadiwa lan wábirigu ani ayanuhatiwa luagu burí programa. Ariha waméi le tariñagubei Carol, to buga uáguboun wayanuha: “Sandiguatina nungua nábuguarügü lidan adamurini íbini geyegu niña lan hau saragu san o saragu milu íbirigu, saragu hádangiñe hámañanu burí haduheñu. Hanarimeti lubafu lasandiragun gürigia lungua lábuguarügü. Añahein íbirigu maríeitiña hénrenguti houn houdin lidan adamurini luagu furumiñe wéiyaasu lárigiñe  lounwen aban hádangiñe. Subuditiña san somu íbirigu woun ha ásügürübaña lídangiñe libe sügǘ le? Gayaraabei wagunbirahaniña lun úara hama wama, hamá waduheñu lidan leweñegua adamurini.

18. Ida luba warufudun gíchigadi wamá según 2 Korintuna 6:11-13?

¹⁸ Sügǘ wamá dan úara. Áfaagua wamá lun wagunbirahaniña ámuñegueinarügü íbirigu lidan isebáhari le wadügübei hátima gayaraabei hasandiragun houngua hábugua. Busentiwa wadararunu wanigi hóuntima íbirigu ha (aliiha huméi 2 Korintuna 6:11-13). Ariñagatu giñe Melissa, to uáguboun wayanuhan lidan párafu 15: “Hínsiñeti woun hagunbirahaniwa fiu iduheñu lun woudin hábiñe o lun woudin aweiyasuha hama”. Añahein san somu íbirigu lidan damuriguaü ha gayaraabei warufudun gíchigadi houn?

19. Ka dan buídubei lun yarafatima wamá houn hádangiñe wíbirigu?

¹⁹ Anihein burí ítaga dan lidan irumu, seremei habadiwa íbirigu ha lau yarafa wamá houn. Kéiburi, ha maduheñubaña lidan inarüni másiñati hasandiragun houngua hábuguarügü dan burí lidaani fedu le tani relihión mama inarünitu luma lufedun ageiraü. Houn amu anihein somu weyu le gáriti hasandirunu hanigi kei burí lagunfulirun somu haduhe irumu lúmagiñe lounwen. Dan le wadireirun dan houn íbirigu ha, warufuduñein nidiheri wamá saragu hawagu (Fili. 2:20).

20. Ida liña líderaguniwa lererun Hesusu le lídanbei Matéu 12:48-50 dan le wasandiragun woungua wábugua?

²⁰ Anihein saragu resun le adügüti lun lasandiragun aban kristiánu lungua lábuguarügüñein lan. Gama lumoun, mabulieida waméi subudi lan lun Heowá buidu buidu ida liña lan wasandiragun woungua. Súnwandan layusuruniña wábirigu lun líchuguni le wemegeirubei woun (aliiha huméi Matéu 12:48-50). Luagu wóubadina, gayaraati warufuduni lun Heowá seremei wamani lau wáfaagun lun wíderaguniña wábirigu ha lílana damuriguaü. Meberesenga ida liña lan wasandiragun woungua somu dan, mama wábuguarügüñadiwa lugundun anihein Heowá wámagiñe.