1. Porque posible ta sinti solo tiene vez el maga siervo de Jehova?

MAYORIA kanaton ta sinti solo tiene vez. Para na cuanto, ta pasa lang este sentido. El otro ta sinti solo por largo tiempo. Posible, sinti kita solo maskin junto ya kita na manada gente. El cuanto tan dificil tene maga amigo na nuevo congregacion. El otro parte del un familia que bien cerca na uno y otro. Poreso, ta sinti sila solo si tan lejos sila na diila familia. El otro tan miss man junto con el diila maga pariente y amigo quien ya muri. Y el cuanto Cristiano, especialmente aquellos nuevo lang ya aprende el verdad, ta sinti solo cuando ya enfrenta sila oposicion na diila familia y maga amigo quien gendeh ta sirvi con Jehova.

2. Cosa maga pregunta kita hay contesta?

² Si Jehova sabe y ta entende con el todo cosas acerca kanaton. Sabe le si ta sinti kita solo y quierre le ayuda kanaton quita con ese sentido. Paquemodo si Jehova ta ayuda kanaton? Cosa kita puede hace para ayuda con el diaton mismo cuerpo? Y paquemodo kita puede ayuda con otro na diaton congregacion quien ta sinti solo? Considera kita con el maga contestacion na ese maga pregunta.

3. Paquemodo si Jehova ya dale mira que ya pone le atencion con Elias?

³ Si Jehova quierre que todo del de suyu maga siervo queda alegre. Cerca le con el cada uno kanaton y ta nota le si ta sinti kita triste o tan luya. (Sal. 145:18, 19) Considera si paquemodo si Jehova ya pone atencion con el de suyu profeta,  si Elias. Ese fiel hombre ya vivi durante na dificil tiempo na historia del Israel. El maga poderoso enemigo quien tan contra con Dios ya persigui con el maga siervo de Jehova y quierre sila mata con Elias. (1 Rey 19:1, 2) Ya pensa tambien si Elias que ele ya lang el solo profeta quien ta sirvi con Jehova. Y amo se posible el mas ya hace con ele luya. (1 Rey 19:10) Tiene dayun cosa ya hace el Dios para ayuda con Elias. Ya imbia si Jehova un angel para asigura con el De Suyu profeta que gendeh le solo—que tiene pa manada Israelita quien fiel ta sirvi con Jehova!—1 Rey 19:5, 18.

4. Paquemodo el Marcos 10:29, 30 ta dale mira que ta cuida si Jehova con aquellos quien ya perde el suporta del familia y maga amigo?

⁴ Si Jehova sabe que si iscuji kita sirvi con ele, el cuanto kanaton necesita hace manada sacrificio. Posible, incluido alli el ayuda del maga pariente y amigo quien gendeh ta sirvi con Jehova. Posible por causa na lingasa de apostol Pedro, ya pregunta le con Jesus: “Ya deja [kame] todo maga cosa-cosa y ya sigui con Uste. Cosa man came ay recivi?” (Mat. 19:27) Si Jesus ya asigura con el de suyu maga dicipulo que hay tene sila grande espiritual familia. (Le con el Marcos 10:29, 30.) Y si Jehova, el Cabeza del diaton espiritual familia, ta promete que hay suporta le con aquellos quien quierre sirvi con ele. (Sal. 9:10) Considera con el cuanto practical cosas que puede tu hace para ricibi con el ayuda de Jehova para ganá con el tristeza.

5. Cosa el beneficio si tan focus tu si paquemodo si Jehova ta ayuda contigo?

⁵ Man focus si paquemodo si Jehova ta ayuda contigo. (Sal. 55:22) Hay ayuda este contigo mentena el balance mirada na de tuyu situacion. El un single hermana que el nombre Carol, * quien nuay familia na verdad, ya habla: “Si ta pensa yo acerca si paquemodo si Jehova ya ayuda conmigo aguanta na tiempo de dificultad, ta ayuda este conmigo para gendeh sinti que solo yo. Y ta dale este  conmigo asiguranza que pirmi conmigo ayuda si Jehova.”

6. Paquemodo el 1 Pedro 5:9, 10 ta anima con aquellos quien ta sinti solo?

⁶ Pensa si paquemodo si Jehova ta ayuda con el maga hermano y hermana quien ta sinti solo. (Le con el 1 Pedro 5:9, 10.) Si Hiroshi, un hermano quien solo lang Testigo na de suyu familia por manada año, ya habla: “Na congregacion, facil lang mira que todo tiene problema. Cay todo kita ta pricura hace el diaton de con todo bueno para sirvi con Jehova, puede se anima kanamon quien solo lang na verdad.”

7. Paquemodo el rezo puede ayuda contigo?

⁷ Mentena un buen espiritual rutina. Incluido aqui amo que habla con Jehova el cosa gayot tu ta sinti. (1 Ped. 5:7) “Uno na maga importante cosas que ta ayuda conmigo ganá con el de mio tristeza amo el rezo con Jehova con todo corazon,” ya habla si Massiel. Un joven hermana le quien ya sinti lejos na de suyu familia cuando ya decidi le sirvi con Jehova. “Un deverasan Tata le para conmigo y ta reza yo con ele manada beses todo’l dia, y ta manda con ele sabe si cosa yo ta sinti.”

8. Paquemodo el lehida del Palabra del Dios y meditacion puede ayuda contigo?

⁸ Regular le con el Palabra del Dios. Medita con el maga istoria que ta dale mira el amor de Jehova para contigo. Si Bianca, un hermana quien necesita aguanta na maga negativo comento del de suyu familia, ya habla: “Ya puede gayot conmigo ayuda el de mio lehida y meditacion na maga istoria na Biblia y na maga istoria de vida del maga siervo de Jehova quien ya enfrenta igual situacion de mio.” El cuanto maga Cristiano tan memorize maga texto que ta puede kanila dale comforta, igual con el Salmo 27:10 y Isaias 41:10. El otro ta habla que ta puede kanila ayuda gendeh sinti solo si ta oi sila maga audio recording si ta prepara para na maga miting o ta le con el Biblia.

9. Paquemodo tu puede beneficia na atendida na maga miting?

⁹ Pricura atende regular na maga miting. Puede tu beneficia na maga programa y puede tambien tu conoce con el de tuyu maga hermano y hermana. (Heb. 10:24, 25) Si Massiel que ya menciona enante ya habla: “Maskin pa bien huyain yo, ta pricura yo atende na maga miting y dale un comento. Ta ayuda este conmigo para sinti que parte yo del congregacion.”

10. Porque importante que man amigo con el maga fiel Cristiano?

¹⁰ Man amigo na maga fiel Cristiano. Busca maga amigo y amiga na congregacion con  quien tu puede aprende, maskin otro el diila edad y background contigo. El Biblia ta hace acorda kanaton que el sabeduria “talli na maga de edad.” (Job 12:12) El maga de edad puede tambien aprende na maga mas joven kanila. Mas menor si David contra con Jonatan pero nuay se sangga kanila para tene buen amistad. (1 Sam. 18:1) Yan ayudajan sila para sirvi con Jehova maskin pa na manada dificil situacion. (1 Sam. 23:16-18) “El diaton maga hermano y hermana puede gayot queda diaton espiritual familia,” ya habla si Irina, un hermana quien solo Testigo na de suyu familia. “Puede usa si Jehova kanila para dale con el diaton necesidad.”

11. Cosa tu debe hace para tene cerca amigo?

¹¹ Posible gendeh facil tene maga nuevo amigo, especialmente si huyain tu. Si Ratna, un huyain hermana quien ya aprende con el verdad maskin pa na oposicion, ya admiti, “Debe yo realiza que ta necesita yo con el ayuda y suporta del de mio espiritual familia.” Dificil para habla con otro el cosa tu ta sinti. Pero si hace tu se, ese persona puede queda de tuyu cerca amigo. El de tuyu maga amigo quierre anima y suporta contigo. Pero, quierre sila que manda tu sabe kanila si paquemodo se sila puede hace.

12. Paquemodo el ministerio puede ayuda contigo tene maga buen amigo?

¹² El uno na maga buen manera para tene amigo amo si participa kita na ministerio junto con otro. Si Carol que ya menciona enante ya habla: “Ya tene yo manada maga buen amiga cuando yan junto yo na maga hermana na ministerio y na otro teocratico actividad. Adentro de manada año, ya suporta conmigo si Jehova por medio na este maga amiga.” Tiene gayot buen efecto para kanaton si man amigo kita na maga fiel Cristiano. Ta usa si Jehova con ese maga amigo para anima contigo si ta sinti tu luya y solo.—Prov. 17:17.

13. Cosa responsibilidad tiene el todo na congregacion?

¹³ El todo na congregacion tiene responsibilidad para contribui na paz y dale mira amor con todo para nuay quien sinti que solo sila. (Juan 13:35) El cosa kita ta hace y ta habla puede gayot anima con otro! Nota si cosa ya habla el un hermana: “Cuando ya aprende yo con el verdad, el congregacion ya queda de mio familia. Gendeh era yo puede queda un Testigo de Jehova si nuay el diila suporta.” Cosa tu puede hace para ayuda con aquellos quien solo na verdad para sinti que parte sila del congregacion?

14. Cosa tu puede hace para man amigo con el maga nuevo na congregacion?

¹⁴ Pricura man amigo con el maga nuevo na congregacion. Puede kita principia con ese hace si man welcome kita con el maga nuevo na congregacion. (Roma 15:7) Pero, mas pa con ese el cosa kita quierre hace. Quierre kita queda cerca amigo diila. Poreso, dale mira que deverasan tu interesao kanila. Mientras ta evita tu pregunta maga personal cosas, pricura entende si cosa problema sila ta enfrenta. El cuanto posible tan dificil habla si cosa sila ta sinti poreso no forza kanila. Sino, usa maga pregunta para puede tu sabe si cosa sila ta sinti y con paciencia oi con el diila contestacion. Por ejemplo, puede tu pregunta si paquemodo sila ya puede aprende con el verdad.

15. Paquemodo el maga mature Cristiano puede ayuda con otro na congregacion?

¹⁵ El todo na congregacion hay queda fuerte na espiritual si el maga mature Cristiano,  especialmente el maga anciano, ta dale mira interes kanila. Si Melissa, con quien ya hace engranda el nana na verdad, ya habla: “Ta rindi gayot yo gracias con el maga hermano quien ya dale tiempo y ya dale mira interes conmigo como maga espiritual tata na maga año que ya pasa. Si ta necesita yo con quien man cuento, tiene yo con quien puede atraca.” Si Mauricio, un joven hermano quien ya sinti que ya abandona con ele cuando el quien yan Bible study con ele ya queda gendeh activo, ya habla: “El personal interes del maga anciano ya puede gayot ayuda conmigo. Regular sila tan cuento conmigo. Tan junto sila conmigo na ministerio, tan share con el cosa sila ya aprende na diila personal estudiada y ta juga pa gane junto conmigo.” Si Melissa y Mauricio ta sirvi ya full-time ahora.

16-17. Na cosa maga practical manera puede kita ayuda con otro?

¹⁶ Ayuda na maga practical manera. (Gal. 6:10) “Tiene vez, el cosa lang kita necesita amo el simple ayuda na justo tiempo,” ya habla si Leo, quien ta sirvi como un misionario na un lugar que lejos na de suyu familia. “Ta acorda yo el dia cuando yan accidente yo. Cuando ya llega yo na casa, bien stress gayot yo. Pero, el un maridable ya invita conmigo que come na diila casa. Gendeh yo ta acorda si cosa kame ya come pero ta acorda yo si paquemodo sila de enbuenamente ya oi conmigo. Despues de ese, ya sinti yo alivio!”

¹⁷ Todo kita alegre si tiene maga teocratico ocasion, igual como maga asemblea y convencion, cay ta puede kita man junto y man cuento na maga hermano y hermana acerca na programa. Pero si Carol que ya menciona enante ya habla, “Ta sinti yo solo si na asemblea y convencion.” Porque? “Maskin alrededor de mio el manada maga hermano y hermana,” ya habla le, “manada kanila junto con el diila familia. Si ta mira yo kanila, ta sinti gayot yo solo.” El otro tan dificil atende na primer convencion o asemblea despues muri el diila marido o mujer. Tiene ba tu conoce quien ta enfrenta ansina maga dificultad? Puede tu invita con ele que man junto na de ustedes familia na siguiente ocasion.

18. Paquemodo kita puede aplica con el 2 Corinto 6:11-13 si ta dale kita mira pagka-hospitable?

 ¹⁸ Dale tiempo para man junto con otro. Pricura man junto na diferente maga hermano y hermana, especialmente con aquellos quien posible ta sinti solo. Quierre kita “abri el [diaton] corazon,” especialmente con aquellos ta sinti ansina. (Le con el 2 Corinto 6:11-13.) “Alegre gayot kame pirmi si el maga hermano y hermana ta invita kanamon na diila casa para man junto kanila y diila maga familia o anda pasea junto kanila,” ya acorda si Melissa que ya menciona enante. Tiene ba na de ustedes congregacion con quien tu puede dale mira pagka-hospitable?

19. Cuando posible el tiempo que mas aprecia el diaton maga hermano y hermana si man junto kita kanila?

¹⁹ Posible, tiene maga tiempo que aprecia gayot el diaton maga hermano y hermana si man junto kita kanila. El cuanto posible tan dificil man junto na diila familia si ta celebra sila maga celebracion que contra na Biblia. El otro posible sinti bien triste na un especifico dia, igual como el dia del aniversario del muerte del diila familia o amigo. Si tan junto kita na maga hermano y hermana quien ta experiencia ansina dificultad, ta dale kita mira que deverasan kita “interesao” kanila.—Fil. 2:20.

20. Paquemodo el palabra de Jesus na Mateo 12:48-50 puede ayuda kanaton si ta sinti kita solo?

²⁰ Manada razon si porque el maga Cristiano tiene tiempo ta sinti solo. Pero, gendeh kita debe ulvida que si Jehova sabe ese clase de sentido. Pirmi le ta usa con el maga hermano y hermana para dale con el diaton maga necesidad. (Le con el Mateo 12:48-50.) Poreso, ta dale kita mira con Jehova que ta aprecia kita con el congregacion si ta hace kita el diaton de con todo bueno para ayuda con el diaton maga hermano y hermana. Maskin cosa pa kita posible sinti, gendeh kita solo cay si Jehova junto kanaton pirmi!