1. Ngu kutxani sithumi sa Jehovha mbimo yimwani si nga pfako txiwunda?

HOTSHETHU a thuka hi pfa txiwunda, vamwani txi nga kuluveta txi pinda, kambe vamwani ti nga teka mbimo va txi ngadi ve pfa txiwunda. Hi nga pfa txiwunda hambi hi di randetwe ngu maxaka. Vamwani ta va karatela kutolovela vanathu va dibanza da diphya. Vamwani va kulete ka mwaya awu wu ku ni kupfana se va nga pfa txiwunda ngako va txi rura ve ya zumba kule ni maxaka awe. Ni ku vamwani va pfa txiwunda nguko va di fetwe ngu maxaka awe. Makristu aya ma ku ngadi kugonda ditshuri ma nga pfa txiwunda ngako ma txi nyenywa ngu maxaka awe aya i singako Tifakazi mwendo kale ka vangana vawe.

2. Ngu sihi siwotiso asi hi no bhula ngu sona?

² Jehovha wa si wona ni ku wa si pfisisa sikarato sathu. Mbimo yi hi pfako txiwunda ene wa ti wona ni ku wa tilava ku hi vhuna hi xula matipfelo oneyo. Jehovha a hi vhunisa kutxani? Hi nga maha txani ti to hi ti vhuna hipune ni kuvhuna vamwani dibanzani ava ni vona va pfako txiwunda? He bhule ngu tixamulo ta siwotiso soneso.

3. Jehovha a kombisile kutxani ti to wa khatala ngu Elija?

³ Jehovha a lava ti to sithumi sakwe si zumba si di tsakile. Ene a hafuhi ka mmwani ni mmwani wathu, ene wa ti wona mbimo yi hi txikwako ngu sikarato. (Mas. 145:18, 19) Wona nzila ayi a nga khatalela ngu yona mprofeti Elija. Ene a hanyile ka timbimo to karata ngutu ka matimu a ditiko da Israyeli. Vakhozeli va Jehovha va txi xaniswa ngutu, ni ku Elija i ti mmweyo wa ava va nga txi xotwa ngu valala va Txizimu. (1 Vafu. 19:1, 2) Ati ti nga vako ti di karatile ngutu Elija ngu ti  to ene a txi pimisa ti to i ti ene ekha a nga ti sate kota mprofeti awu a nga ti thumela Jehovha. (1 Vafu. 19:10) Jehovha a tekile dizambo do khatalela Elija. Ene a rumete ngelozi ti to yi ya mu tsanisa ni ku mu gela ti to i si ngene ekha ku ti ni vamwani ava ni vona va nga txi thava Txizimu.—1 Vaf. 19:5, 18.

4. Dibhuku da Marku 10:29, 30 di kombisisa kutxani ti to Jehovha wa khatala ngu sithumi sakwe asi si pwatako txivhuno txa vamwani?

⁴ Jehovha wa ti ziva ti to ngako hi txi sawula ku mu thumela, ti nga lava hi luzekelwa ngu so kari. Eto ti nga pata ku maxaka athu mwendo vangana vathu ve leka ku hi vhuna. Ngu mapswi o kombisa kukarateka, Pedro a wotisile tiya ka Jesu: “Athu hi lekile sotshe, hi txi ku londisa, se hi na dihelwa ngu txani kani?” (Mat. 19:27) Jesu a tsanisile valondeteli vakwe ti to va ndi na wuyelwa ngu kumana mwaya wa moya. (Lera Marku 10:29, 30.) Jehovha awu i ku msungo wa mwaya wuwa wa moya a thembisile ti to a ndi na vhuna votshe ava va lavako ku mu thumela. (Mas. 9:10) He wone ati u nga ti mahako ti to u amukela txivhuno txa Jehovha ti to u xula txiwunda.

5. Ngu yihi wuyelo hi no yi mana ngako hi txi veka mapimo ka nzila ayi Jehovha a hi vhunako ngu yona?

⁵ Veka mapimo ka nzila ayi Jehovha a ku vhunako ngu yona. (Mas. 55:22) Atiya ti na kuvhuna ti to u si karateki. Ndiyathu yimwani yi dhanwako ku i Carol * awu a si se ya wukati awu maxaka akwe i singako Tifakazi a womba tiya: “Ni txi khumbula ati ti nga pinda ni kuwona nzila ayi Jehovha a ni vhunako ngu yona, ti ni maha ni wona ti to ngu ditshuri Jehovha wa ni vhuna. Ni ku ta ni tsanisekisa ti to Jehovha a na va ni nani mbimo ayi yi tako.”

6. Dibhuku da 1 Pedro 5:9, 10 di nga vhunisa kutxani ava va wonisako ni txiwunda?

⁶ Alakanya ngu nzila ayi Jehovha a vhunako ngu yona ava va pfako txiwunda. (Lera 1 Pedro 5:9, 10.) Hiroshi awu i ku ene ekha i ku Fakazi mtini kwakwe a womba tiya: “Ta hehuka ku ti wona ti to hotshethu dibanzani ha manana ni sikarato. Kuziva ti to hotshethu hi maha ati hi nga ti kotako ti to hi thumela Jehovha, ti nga tsanisa wo fana ni nani ni ku  nokha ni khozelako Jehovha ka mwaya wangu.”

7. Mkombelo wu nga hi vhunisa kutxani?

⁷ Vana ni txiemiso txa txinene txa timhaka ta moya. Atiya ti pata kugela Jehovha ati u ti pfisako tona. (1 Pedro 5:7) Massiel a womba tiya: “Yimweyo ya tinzila ayi yi nga ni vhuna ti to ni wonisana ni txiwunda ngu khongela ngu kuhiseka ka Jehovha.” Mwanathu wuwa mbimo yi a nga khata kuthumela Jehovha a pfite txiwunda nguko i ti ene ekha a nga txi thumela Jehovha ka mwaya wakwe. Ene a tshumela e womba tiya: “Ni tsanisekile ti to Jehovha ngu ditshuri Tate wangu, ni ti khongela kwakwe yotshe mbimo ni txi mu gela ati ni nga txi tipfisa tona.”

8. Kulera dipswi da Txizimu ni kualakanyisisa di nga kuvhunisa kutxani?

⁸ Lera dipswi da Txizimu mbimo yotshe, u alakanyisisa ngu timhaka ati ti kombisako ti to Jehovha wa kuranda. Mwanathu mmwani awu a dhanwako ku i Bianca awu a wonisanako ni kukanetwa ngu maxaka akwe a womba tiya: “Kulera Bhiblia ni kualakanyisisa ngu matimu a mu ka Bhiblia aya ma womba-wombako ngu sithumi sa Jehovha asi si nga manana ni sikarato so fana ni sangu ta ni vhuna ngutu.” Makristu mamwani ma vekisa tindimana to kari ati ti thavelelako to fa ni Masalmo 27:10 ni Isaya 41:10. Vamwani va ti wona i di tshuku ku mbimo yi va lulamiselako mitshangano mwendo kulera Bhiblia ve maha ngu kuengisela ngu audhio ti to va si tipfi i di vokha.

9. Ngu kutxani i di ta lisima kuxalela mitshangano?

⁹ Maha totshe ati u nga tikotako ti to u xalela mitshangano u si lovhi. U na tsaniswa ni ku nawe u na tsanisa vamwani. (Vaheb. 10:24, 25) Massiel awu hi nga womba-womba ngu ngene a womba tiya: “Ni ti mahete txisungo txo xalela yotshe mitshangano ni kutshumela ni xamula ka yona. Atiya ti ni vhuna ku tiwona ni di wa lisima dibanzani.”

10. Ngu kutxani i di ta lisima kuva ni vangana dibanzani?

¹⁰ Vana ni wungana ni vanathu va dibanzani. Ti lavele vangana dibanzani ava u nga gondako ka vona hambi i ti to tanga yawe mwendo mdhawuko wawe wa hambana ni wako. Bhiblia yi hi khumbutisa ti to “wutxhari wu maneka amu ka vahombe.” (Jobe 12:12) Vanathu ava va nga kula ngu tanga ni vona va nga gonda ka vanathu ava i ku ngani vadotho. Dhavhidha i ti m’dotho ka Jonathani, hambiketo kha ta va tsivela ti to va si vi ni wungana. (1 Sam. 18:1) Dhavhidha ni Jonathani va txi vhunana ti to ve thumela Jehovha hambiku va nga ti manana ni sikarato. (1 Sam. 23:16-18) Ndiyathu wu a dhanwako ku Irina awu i ku ene ekha a thumelako Jehovha a womba tiya:  “Vanathu va nga va vaveleki vathu, vakoma, vanathu ni tindiyathu ta moya. Jehovha a nga va thumisa ti to ve hetisisa silaveko sathu.”

11. Ngu tihi hi nga ti mahako ti to hi aka wuxaka wo tsana?

¹¹ Kumaha vangana vavaphya kha ti hehuki ngutu-ngutu u di m’thu wa tingana. Ndiyathu Ratna i mwanathu wa tingana, awu a nga gonda ditshuri hambiku a nga txi kanetwa, ene a womba tiya: “Ani ni txi lava ngutu txivhuno ni txi seketelo txa mwaya wangu wa moya.” Ti nga karata kuwomba matipfelo ako ka vamwani. Kambe eto ta laveka nguko ngu tona ti akako wungana, vangana vako va nga kutsanisa ni kukuvhuna. Kambe ti to ve maha toneto, ti lava u va maha ve pfisisa ti to vona va nga kuvhunisa kutxani.

12. Mthumo wo txhumayela wu nga kuvhunisa kutxani ti to u maha wungana wa wunene?

¹² Yimweyo ya tinzila ta lisima ati hi nga mahako ngu tona wungana ngu huma ni Makristu kulothi ka mthumo wa thembwe. Carol a womba tiya: “Kuheta mbimo ni vanathu ni di ka mthumo wo txhumayela kumweko ni ka mithumo yimwani ya moya ti ni vhunile ti to ni maha vangana vo tala va vanene. Jehovha wa ni vhuna ngutu ngu kuthumisa vangana vava.” Kuaka wungana ni vanathu vo thembeka ngu ditshuri ti ni wuyelo ya yinene. Jehovha a thumisa vangana vonevo ti to e kuvhuna ku u xula sikarato so fana ni txiwunda.—Mav. 17:17.

13. Ngu wuhi wutixamuleli awu hotshethu hi ku nawo dibanzani?

¹³ Hotshethu hi ni wutixamuleli wo maha ti to dibanzani wuva wukhalo amu ku ku ni lirando ni kudikha ti to ni wammweyo a si tipfi a di ekha. (Joh. 13:35) Ati hi ti wombako ni ti hi mahako ti nga vhuna ngutu! Wona ati mwanathu wo kari a nga womba: “Mbimo yi ni nga gonda ditshuri dibanza di vile mwaya wangu, i si nga ngu kuvhunwa ngu vona ni sa tikota ku va Fakazi ya Jehovha.” U nga maha txani kasi kuvhuna ava hi ku vona basi ka mwaya wawe i ku Tifakazi ti to ve tipfa i di va lisima dibanzani?

14. U nga maha txani ti to u maha wungana ni ava i ku ngadi vaphya?

¹⁴ Teka dizambo do maha wungana ni va i ku ngadi vaphya dibanzani. Mbimo yi ava i ku ngadi vaphya va hokako mitshanganoni hi nga va hoyozela ngu manza mambidi. (Var. 15:7) Kambe kha hi lavi kugwitela ko va losa ngu manza mambidi dwe. Hi fanete kuaka wuxaka wo tsana awu wo no zumba ngu mbimo yotshe. Se kombisa ti to wa khatala ngu va i ku ngadi vaphya. Zama kupfisisa ati va mananako nato, kambe u si lavi kuziva ta txihunja. Vamwani ti nga va karatela kuwomba matipfelo awe, se ti wonele ku u si va sinzisi kumaha toneto. Hahanze keto, thumisa siwotiso ngu wutxhari, ni ku mbimo ayi va womba-wombako va engisile kha kwati. Ngu txikombiso u nga wotisa ti to va di zivisile kutxani ditshuri.

15. Vanathu ava va nga vitwa va nga vhunisa kutxani vamwani dibanzani?

¹⁵ Mbimo ayi vanathu ava va nga kula ngu didhawa da moya, ngutu-ngutu madhota va kombisako kukhatala ngu vamwani, vanathu va nga kula ngu didhawa da moya. Mwanathu mmwani a dhanwako ku i Melissa awu a nga kuliswa ditshurini ngu mame wakwe a womba tiya: “Ni tsaka ngutu ha ko za ni si tizivi ti to ni nga womba txani ngu vanathu ava va khatalako ngu ngani, aha ko za ni va wona nga vatate vangu va moya. Vona va txi khatala ngu ngani, ni ku mbimo yotshe ayi ni nga txi lava  kubhula ni txi ti ziva ti to vaho vo bhula navo.” Mwanathu mmwani a dhanwako ku i Mauricio a pfite txiwunda mbimo ayi mgondisi wakwe wa Bhiblia nga leka ditshuri. Ene a womba tiya: “Madhota ma kombisile kukhatala ngu ngani, eto ti ni vhunile ti to ni maha kutxitxa ko kari. Mbimo yotshe va txi bhula ni nani, ve huma thembwe ni nani hambi kusakana ni nani. Va txi tshumela ve ni bhulela tindimana ta Bhiblia a ti va nga txi ti mana ka gondo yawe.” Mwanathu Mauricio ni Melissa, nyamsi vona va thumela Jehovha ka mthumo wa mbimo yotshe.

16-17. Ngu tihi ati u nga ti mahako ti to u vhuna vamwani?

¹⁶ Ningela txivhuno. (Vag. 6:10) Leo awu i ku murumiwa awu a thumako kule ni mwaya wakwe a womba tiya: “Ngu tolovelo ati hi ti lavako txivhuno atxi txi hokako ngu mbimo ya kona. Ni khumbula ditshiku dimwani ni nga va ni ngozi ya mmovha. Mbimo ayi ni nga hoka mtini ni di karatekile ngutu, kambe mwaya wumwani wu ni rambile ku ni ya susula navo. Kha ni khumbuli mxowo wa sakudya si ni nga dya, kambe kha ni divali nzila ayi va nga ni ñola ngu yona ngu ku ni engisela ngu wunene. Msana keto ni tipfite ni tshuku!”

¹⁷ Hotshethu ha mi dhunda mitshangano yathu ya hombe yo fana ni Masembleya ni Makongresu. Ka mbimo yoneyo ha sikota kuva ni vanathu hi tshumela hi bhula ngu miwomba-wombo ayi hi nga yi engisela. Kambe wona ati Carol a nga ti womba: “Ka mina Masembleya ni Makongresu i ti mbimo yo karata ngutu.” Ngu kutxani? Ene a tshumela e womba tiya: “Hambiku ni nga randelwa ngu vanathu vo tala, vona va ni timwaya tawe. Se eto ti si ni hehukeli, eto ti txi ni maha ni tipfa ni di nokha.” Vamwani ta va karatela kuya ka mitshangano ya hombe, msana ko va di fetwe ngu mwamna mwendo msikati wawe. Ina wa ziva mwanathu wo kari aku ka txiemo txonetxo? Ti ngo txani u mu ramba ti to mi ya motshe ka Masembleya mwendo Makongresu kumweko ni mwaya wako?

18. Ti txi ta ko amukela vamwani hi nga di thumisisa kutxani dibhuku da 2 Vakorinto 6:11-13?

¹⁸ Heta mbimo ni vanathu. Duketa kuheta mbimo ni vanathu vo hamba-hambana, ngutu-ngutu avale va ku ni txiwunda. Athu  hi lava kutula “timbilu tathu” ka vanathu ngutu-ngutu ka ava va ku ni txiwunda. (Lera 2 Vakorinto 6:11-13.) Melissa a womba tiya: “Mbimo yotshe ha ti tsakela mbimo ayi vanathu va hi rambako mitini kwakwe, ni ku enda kumweko ni timwaya tawe.” Ina dibanzani kwako ku ni mwanathu awu u nga mu rambako?

19. Ngu sihi siemo asi ti nga lavako hi va hafuhi ni vanathu?

¹⁹ Ka siemo simwani vanathu ti nga lava hi va pangalata. Ngu txikombiso ka masiku a ma khisimusi, vanathu ti nga karata kuva hafuhi ni maxaka awe aya i singako Tifakazi. Vanathu vamwani va nga karateka mbimo yi di hokako ditshiku adi va nga felwa ngu maxaka awe. Ngako hi txi ti karatela kuva hafuhi navo ka timbimo toneto hi kombisa ti to ha ‘khatala’ ngu vona.—Vaf. 2:20.

20. Mapswi a Jesu aya ma ku ka Matewu 12:48-50 ma nga hi vhunisa kutxani ngako hi di ni txiwunda?

²⁰ Nga ha hi nga tiwona ngu kona ku ni sivangelo so tala si nga hi mahako hi tipfa hi di hokha. Kambe kha ha fanela kudivala ti to Jehovha wa txi pfisisa txiemo txonetxo. Kuengetela koneho, Jehovha wa hi ninga asi hi si lavako ngutu-ngutu ngu kuthumisa vanathu. (Lera Matewu 12:48-50.) Kasi kukombisa ti to ha bonga malulamiselo awa hi fanete kumaha totshe ati hi nga ti tikotako ti to hi vhuna vanathu. Ti si nga ni mhaka ni ti hi nga ti pfisako tona. Awe khu nga wekha Jehovha mbimo yotshe a ni nawe.