1. Sabwaya jani alabeli ena a Yehova masaka mena agaviwoona ekiwa?

ENJENE wa iyo masaka mena anoviwoona woka. Mwa ena mubuwelo obu mohigoneela onovira. Mbwenye mwa attu ena, mubuweloya onogonela. Masaka mena ninokala na attu masiki dhawene banigaviwoona nooka. Abali ena agamwalela mulogo muswa anorutxiwaga walemela abali a mmulogonimwa. Ena andha mmiralani dhowiwanana, mbwenye sabwa ya omwalela mpaddi mwina wa elabo anofiyedha oviwoona woka. Enaya anonukeliwa okala na anamudhi awa akwile. Oku ena, makamaka abale ali aswa mmulogoni, anoviwoona wokiwa sabwa y’ofwarafwariwa na anamudhi obe amarho ahili Akristu.

2. Mavuzo gani anasekeserihu mwari mwa nsunzo ntti?

² Yehova onoziwa vina onononelamo dhetene dhinnipadduwela. Iyene onoziwa nigaviwoonaga nokinhu nanda onotamela onikamihedha okwaranya mubuwelo obu. Yehova onnikamihedha dhavi? Nanda ninawodhe dhavi wakamihedha Abali ena a mmulogoni anivyona okiwa? Ninele wona dhowakula dha mavuzo aba.

3. Yehova wonihile dhavi wi wannimutanala Eliya?

³ Yehova onfuna wi alabeli aye otene agalale. Iyene onokala vakuvi va muttu-muttu wa iyo vina onononelamo wi ninowojeya na dhubuwelo dhehu. (Masal. 145:18, 19) Koona mukalelo woniha Yehova wi annimutanala namavuhulela Eliya. Mulobwana oddu wororomeleya okalilewo mudhidhi wa makattamiho nsaka na ana Izrayel. Mudhidhene obule alabeli  a Yehova anfwarafwariwa vaddiddi, mbwenye wafwarafwariwetxa wali Eliya. (1 Amwe. 19:1, 2) Elobo yina yamukubanyihetxa Eliya ja wubuwela wi mwa anamavuhulela otene a Yehova wahalilewo wali iyene yeka. (1 Amwe. 19:10) Mohigonela Yehova wahimukamihedha. Yehova wahimuruma anju Waye wi amonihe Eliya wi iyene kali yeka—vina ahikalawo attu enjene mu Izrayeli amulabela Mulugu nororomeleya!—1 Amwe. 19:5, 18.

4. Nlebo na Marko 10:29, 30 ninoniha dhavi wi Yehova onowatanala alabeli aye aniviwoona woka?

⁴ Yehova kandduwala, wila niwodhe omulabela, ena mwa iyo nihittiya dhilobo dhinji mundduni. Txino nihiyelela nikamidho na anamudhi vina amarho ahili Akristu. Enkala ninga sabwa y’ozuzuma n’ejuwene jamuttukuleli murumiwi Pedro onvuza Yezu dhahi: ‘Iyo nittiya dhetene, nihufwarani. Ninapure nni?’ (Mt. 19:27) Na mukalelo woriheya Yezu wahawakula anamafwara aye wi attu a mmulogoni agahakalela ninga anamudhi. (Kengesa Marko 10:29, 30.) Yehova Babi wehu wa wirimu, ohigana wakamihedha abale anfuna omulabela. (Masal. 9:10) Ninele wona dhilobo dhinfwanyeliwe okosa wi okaane nikamihedho na Yehova ogewanana ekalelo ya oviwoonaga weka.

5. Ekaleleni yamakamaka wubuwela mukalelo onukamihedha Yehova?

⁵ Kobuwela mukalelo onukamiha Yehova. (Masal. 55:22) Okosa eji enele wukamihedha okana monelo wofanyeelela wa makattamiho awo. Murogora wa muziye onkuweliwa Carol, * oli yeka mwibaribarini ohiloga: “Wang’ana mundduni vina otanalela mukalelo oddikamihedhile Yehova midhidhi dhorutxa ohiddoniha wi kaddili meka. Nanda eji enoddilibiha wona wi Yehova onelege okalavi na miyo.”

6. Nlebo na 1 Pedro 5:9, 10 ninapangarhaza dhavi abale aniviwoona okiwa?

⁶ Kobuwela mukalelo onakamihedha Yehova abali ena angumanana makattamiho a oviwoona okiwa. (Kengesa 1 Pedro 5:9, 10.) Hiroshi, mbali odhile vyaka dhinjene amulabelaga Yehova yeka vamuralani ohiloga:  “Miyo ddihoona wi abali otene a mmulogoni anogumanana makattamiho. Oziwa wi abali anovilibihedha wi amulabele Yehova ninga munwodhelani enowapangarhaza abale ali woka mwibaribarini, ninga miyo.”

7. Nlobelo ninawukamihedhe dhavi?

⁷ Kazuzumelaga dhilobo dhomuyani. Eji eniwanana na omwaddela Yehova dhili mmirimani mwawo. (1 Ped. 5:7) Koona elogile muzombwe dhahi oli Munamoona wa Yehova onkuweliwa Massiel. Iyene waviwoona yeka sabwani amudhaye otene kamulabela Yehova. Massiel ohiloga dhahi: “Elobo mmodha yaddikamihedha yali omulobelelaga Yehova na murima waga wotene, Yehova wali Babi mwigumi mwaga. Ddanlobela dila dhinjene valaboni, ddimwaddelaga mukalelo wewamo miyo.”

8. Wengesa Nzu na Mulugu vina otanaalela enaukamihedhe dhavi?

⁸ Omwengesege Bibilia malabo otene vina otanaalelege mapadduwo anoniha okwela wa Yehova. Bianca, murogora onvilela dhologa dhawobaniha dhinimulogela amudhaye, bela: “Enddikamihedha ku wengesa vina otanaalela mapadduwo a mBibiliani anloga sabwa ya emeleli a Yehova agumanilena makattamiho akakene angumanana miyo.” Akristu ena akana muyubuweloni malebo anapangarhaza ninga, Masalmo 27:10 vina Izaiya 41:10. Enaguwa ahiloga wi ovuruwana dhogravariwa dha mBibiliani na manivuru ansunziwana mmatugumanoni dhinowakamihedha.

9. Wonaga matugumano enaukamihedhe dhavi?

⁹ Kavilibihedhe wona matugumano mudhidhi wotene. Ogakosaga ejuwene onele olibiheya na matugumanoya vina onele waziwa deretu abali na arogora. (Aheb. 10:24, 25) Massiel, ologiwe omaromo bela dhahi: “Masiki valimi muttu wa manyazo ddahigana odhowagavi omatugumanoni s’ohijomba vina ovaha dhowakula dhaga. Eji eddikamihedha wona wi ddinokosa mpaddi wa mulogo.”

10. Ekaleleni yamakamaka omaga mandano na abali ehu?

¹⁰ Kakosa mandano na abali a mmulogoni. Katamela okosa mandano na abali a mmulogoni mwawo ali yotagiha yaderetu, kintanala akala azombwe obe bowunuwelavo vina akala ba elabo yina. Bibilia onloga wi “zelu eli mwa makolo.” (Job 12:12) Anddimuwa vina anowodha osunza vaddiddi na dhotagiha dha azombwe ororomeleya. David wali wa yimo yottiyana na Jónata, masiki dhawene awene alivi amarho ofiyedheya. (1 Sam. 18:1) David na Jónata ankamihedhana amulabelaga Yehova masiki vafwanyiwani makattamiho. (1 Sam. 23:16-18) Murogora oniliwa Irina,  ovano oli yeka mwibaribarini, ohiloga: “Abali na arogora ehu a mmulogoni anokalawene ninga ababihu vina arogorihu. Yehova onowodha walabihedha wi anikamihedhe na dhojombeliwa dhehu.”

11. Txini enfwanyeliwe okosa wi omage mandano oliba?

¹¹ Okosa mandano kahiyo elobo yovevuwa, makamaka ogakala muttu wa manyazo. Ratna, murogora osunzile ebaribari masiki na ofwarafwariwa, ohiloga: “Miyo ddahinonelamo wi ddanfunawene nikamihedho na abali omuyani.” Kahiyo yovevuwa ologa dhiniwamo weyo, mbwenye ologa na mukalelo wotapuwa tti niparha nowitana mandano oliba. Akwawo anofuna wukamihedha vina wulibiha, mbwenye enofuneya wawaddelamo mukalelo oniwamo weyo wi awene awodhe wukamihedha.

12. Olaleya enawukamihedhe dhavi okosa omarho waderetu?

¹² Mukalelo mmodha wawakosa amarho, kwa olaleya na Akristu ena ororomeleya a Yehova. Carol, oromoliwe omaromo ohiloga: “Olaba mmabasani a olaleya vina na mabasa mena omuyani na arogora a mmulogoni ehiddikamihedha venjene wakosa amarho aderetu. Movira wa vyaka dhinjene, Yehova onowalabihedha amarho aba wi addikamihedhe.” Txibarene guru enkosihu wi nikale amarho a alabeli ororomeleya a Yehova enopuriha. Yehova onowalabihedha amarho aba wi anikamihedhe owanana makattamiho ehu ninga a oviwoona nooka.—Gano 17:17.

13. Abali otene a mmulogoni anfwanyeela okosa nni?

¹³ Abali otene anofwanyela ovilibihedha wi mulogo okale mburo wa murenddele vina wa okwela wila muhikale muttu onaviwoonege yeka. (Jo. 13:35) Mazu na merelo ehu akana ewodhelo y’omukamihedha muttu! Koona elogile murogora dhahi: “Vasunzilimi ebaribari ddahiroma okosa mpaddi wa mulogo. Miyo txipo kaddigakalile Munamoona wa Yehova kohikala nikamihedho na abali.” Weyo onakose nni wi omukamihedhe mbali oli yeka mwibaribarini wona wi onokosa mpaddi wa mulogo?

14. Iyo ninawodhe dhavi omaga mandano na abale ali aswa?

¹⁴ Kakala woroma otamela okosa mandano na aswa. Voromavene ninofwanyela wawakela na emwerumweru aswa anda mmulogoni. (Rom. 15:7) Yofuna yehu kahiyo omulejelavi bahi. Mbwenye movira wa mudhidhi iyo ninfuna nikaane mandano oliba. Nona kakala muttu waderetu vina katonyihedha wi onowatanala aswa. Katamela oziwa makattamiho angumananina, mbwenye na mukalelo woriheya. Kudduwale wi ahikalawo attu anrutxiwa ologa esile dhiniwanimo, nona kuwadidele ologa. Wi oziwe eniwamo awene, kakosa mavuzo na oderetu vina ttotto, nanda ovuruwane nofwasa dhowakuladha. Motagiha onvuze, weyo oziwile dhavi ebaribari?

15. Abali oliba omuyani anawodhe dhavi wakamihedha abali ena mmulogoni?

¹⁵ Abali otene oliba omuyani, ttabwa-ttabwa anddimuwa a mmulogoni agazuzumela attu ena, mulogoya onoliba. Melissa, oleliwe mwibaribarini na maye, ohiloga dhahi: “Kaddina mazu owatamalelana abali addikamihedhile mwa vyaka esi dhotedhene, akalaga ninga ababi aga. Awene anddizuzumela vina antamela mudhidhi wokala na miyo.” Mbali wa muzombwe onkuweliwa Mauricio, aviwona yeka mudhidhi ottiyile namasunziha waye ebaribari, ologile dhahi: “Anddimuwa a mulogo ahilagiha wi andditanala nanda eji eddikamihedha venjene. Awene anloga na  miyo mudhidhi mwinjene. Andhowa na miyo mmabasani a olaleya, anddaddela dhilobo dhamakamaka dhafwanyani vansunzoni nawa navawoka vina nanvega vamodha.” Ddabuno Melissa na Mauricio ali mmabasani a mudhidhi wotene.

16-17. Onakamihedhe dhavi attu ena na merelo?

¹⁶ Kaakamihedhe na merelo. (Gal. 6:10) Leo onlaba ninga misionario elabo yina, ohiloga: “Enfunetxa weyo makamaka ku olagihiwa merelo a oderetu mudhidhi wofanyelela.” “Ddinowubuwela labo nakosilimi asidenti na karo. Vawodhilimi ofiya vatakulu, ddali osilidhiwene. Venevo atelani dhahi ahiddiwoba wi ddasiyari na awene. Miyo nne kaddinubuwela yajilehu, mbwenye mukalelo waddivuruwanilani na ofwasa kaddindduwala. Omamalelowa, ddahipamgarhazeya venjene!”

¹⁷ Iyo notene ninoziveliwa maporogarama a matugumano manddimuwa ninga, matugumano a ttattamwa vina a murudda, mmidhidhini esi ninowodha okala na abalihu vina ninolibihana nilogaga sabwa ya esile dhisunzilihu. Mbwenye koona elogile Carol, oromoliwe mundduni: “Mmatugumanoni a ttattamwa vina a murudda miyo ddaviwonetxa meka.” Sabwaya? Iyene ohenjedhedha alogaga: “Ebaribari wi ddanwereweriwa na muttitti wa abali, mbwenye vawoona miyo abali na amudhawa ddankubanya vaddiddi. Bu mudhidhene obo waviwoonimi meka.” Mwa attu ena anorutxiwa wona matugumano a ttattamwa obe a murudda motagiha, muttu okweliwe mwadhiye obe mamune. Weyo ohimuziwa muttu onfwanyiwa makattamiho ninga abene? Ononamo dhavi omuwoba wi one matugumano ninga aba vamodha na amudhawo?

18. Ninalabihedhe dhavi nlago nili va 2 Korinto 6:11-13 nigamuwoba mbali vatakulu vehu?

¹⁸ Katamela mudhidhi wokala vamodha. Katamelaga mudhidhi wi okalege na abali vina arogora ottiyana-ttiyana, ttabwa-ttabwa abale aniviwoona woka. Ninofwanyela ‘wafugulela murima wehu,’ makamaka abali abo. (Kengesa 2 Korinto 6:11-13.) Melissa, oromoliwe mundduni onowubuwela: “Nanziveliwa abali aganiwoba wi nidhowe naredhe owaniwaga obe nikose oleddo na amudhawa.” Onomubuwela mbali wa mmulogoni mwawo agafuniliwe omuwobela vanivawo?

19. Mudhidhi gani onfwanyelelihu okala na abali ehu ali Akristu?

 ¹⁹ Ohikalawo mudhidhi onafunetxa abalihu Okristu wi akala na iyo. Motagiha, masiku a feriado enokala yorutxa awene okala vamodha na amudhawa. Ena txino anokubanyaga venjene maka-maka nigaddamelaga labo ninubuwelani okwa wa mmudhawa wamukweletxani. Nigavilibihedhaga okala na abalihu midhidhi esi dhorutxa ninowoniha wi ‘ninowatanaala venjene.’—Fil. 2:20.

20. Mazu a Yezu ali va Mateu 12:48-50 anwodha dhavi onikamihedha akala niniviwoona nooka?

²⁰ Ninga monelihu dhihikalawo mwaha dhinjene dhinimuttukulela Mukristu oviwoonaga ninga oli yeka. Masiki dhawene, kanidduwale wi Yehova onoziwa pama makattamiho ehu. Iyene ononivaha nikamihedho nintamelihu, masaka mena onowalabihedha abali a mmulogoni. (Kengesa Mateu 12:48-50.) Wi nimutonyihedhe Yehova otamalela wehu sabwa ya nikamihedho ninnivaha mulogo, ninofwanyela okosa mpaka vanwodhelihu wi nakamihedhe abalihu. Kintanala mukalelo oniwamo weyo masaka mena, weyo txipo kuli weka Yehova onele okalavi na iyo!