1. Pine nemene matre itre xaa hlue i Iehova a mekun laka, angatre caas?

 IJIJE hi tro sa mekun laka, pëkö sinee së. Ame thei itre xan, tro hi a canga patre la mekun cili. Ngo tha celë kö ka traqa koi itre xan. Ngacama nyimutre la itre sinee së, ngo ijije hi tro sa mekun laka, easë caas nge pëkö ka hnimi së. Celë hi ka traqa kowe la itre trejin ka saze ekalesia. Jole koi angatr troa thele itre xaa sinee. Ame itre xan, hnei angatr hna tru ngöne la ketre fami ka ce mel me caas. Ngo nanyi hë angatr qaathene la fami, matre kösë angatre caasi pe hi. Ame pena itre xan, hna meci la ketre sinee i angatr. Nge itre xan a akötr ke, angatre petre hi a atre la nyipici nge kola nuetriji me qanangazo angatr hnene la itre sinee ka tha hmi kö.

2. Nemene la itre hnying hne së hna troa ce wang?

² Atrepengöi easë hnyawa hi hnei Iehova nge trotrohni së hi hnei Nyidrë. Öhne hi Nyidrëti la easë nango lapa caas, nge aja i Nyidrëti troa xatua së. Tune kaa? Nemene la nyine tro sa kuca matre troa xomihnine la jole cili? Nge nemene la aqane tro sa xatuane la itre trejin ka pëkö sinee? Tro la tane mekun celë a sa la itre hnying celë.

3. Tune kaa la aqane xatua Elia hnei Iehova?

³ Iehova a ajane tro la itre hlue i Nyidrëti a madrin. Tha nanyi kö Iehova qaathe së, nge öhne hnyawa hi Nyidrëti la easa kucakuca. (Sal. 145:18, 19) Hanawang la aqane thupë Elia perofeta hnei Iehova. Ame ngöne la ijine i  Elia, hna akötrëne la nöje Isaraela. Hnene la itre mus hna qanangazo angatr me thele troa humuthi Elia. (1 Ite jo. 19:1, 2) Ketre, hnei Elia hna mekun laka, angeic hmekuje hi la perofeta i Iehova ka mel. Matre hace me jole la mele i angeic. (1 Ite jo. 19:10) Ngo hnei Iehova hna canga xatua angeic. Hnei Nyidrëti hna upe la ketre angela troa qaja koi Elia ka hape, tha angeice caasi kö. Hetre itre xaa atre Isaraela ka catre mele nyipici!—1 Ite jo. 19:5, 18.

4. Ame ngöne Mareko 10:29, 30, nemene la ka amamane laka, Iehova a hnime la itre hlue i Nyidrëti hna nuetrij?

⁴ Atre hi Iehova laka, nyimutre la itre ewekë hne së hna nuetrij matre troa nyihlue i Nyidrë. Ame itre xan, hna nuetriji angatr hnene la itre sinee i angatr. Öni Peteru aposetolo koi Iesu: “Ase hë huni nu asë troa xötrethenge nyipë, matre tro ju hë huni a kepe nemen?” (Mat. 19:27) Ngo hnei Iesu hna ithuecatr koi angatr ka hape, tro angatr a sine la ketre fami ka tru, ene la lapa i Iehova. (E jë la Mareko 10:29, 30.) Iehova la he ne la fami cili. Tha tro kö Nyidrëti a nuetrije la itre hlue i Nyidrë. (Sal. 9:10) Ijije hi tro Iehova a xatua së ngöne la easë caas. Ngo hetre nyine tro sa kuca matre troa xatua së hnei Nyidrë. Nemen?

5. Pine nemene matre nyipiewekë tro sa lapa mekun la aqane xatua së hnei Iehova?

⁵ Troa lapa mekun la aqane xatua së hnei Iehova. (Sal. 55:22) E cili, tro hë sa atreine waiewekë hnyawa. Celë hi hna melën hnei Carol. * Tha ka faipoipo palakö angeic nge angeice caasi ngöne la nyipici. Öni angeic: “Hnene laka, hnenge hna lapa mekun la aqane xatua ni hnei Iehova, matre eni a öhne laka, tha eni caasi kö. Ce Nyidrëti palahi me eni.”

6. Nemene la aqane xatuane la itre trejin ka pë sinee hnene la hna qaja ngöne 1 Peteru 5:9, 10?

⁶ Troa lapa mekun la aqane xatuane Iehova la itre trejin ka pë sinee. (E jë la 1 Peteru 5:9, 10.) Celë hi hna kuca  hnei Hiroshi. Nyimutre la itre macatre ne angeic ngöne la nyipici, nge tha ka hmi kö la itre atrene la fami angeic, matre pëkö sinee i angeic. Öni angeic: “Easë asë hi a cile kowe la itre jol. Ngo easa isa kuca la hne së hna atrein matre troa catre nyihlue i Iehova. Celë hi ka ithuecatr kowe la itre ka mele caas ngöne la nyipici.”

7. Nemene la thangane la thith?

⁷ Troa acatrene la aqane imelekeu së me Iehova. Loi e tro sa thith me fe la hni së koi Nyidrë. (1 Pet. 5:7) Celë hi hna kuca hnei Massiel, ketre trejine föe. Ame la angeic a nyiqaane nyihlue i Iehova, hnei angeic hna iananyi memine la fami angeic. Öni angeic: “Eni a atreine cile kowe la jole celë ke, hnenge hna fe la hning koi Iehova. Nyidrëti hi la ketre Keme ka tru ihnimin. Eni a thithi koi Nyidrë e nöjei drai. Nge anyimua thithi ni ngöne la drai.”

8. Nemene la thangan e tro sa e me lapa mekun la Tusi Hmitrötr?

⁸ Loi e tro fe sa catre e me lapa mekun la aqane hnimi së hnei Iehova hnine la Tusi Hmitrötr. Hanawang la hna melën hnei Bianca, ketre trejine föe hna qaja angazon hnene la fami angeic. Öni angeic: “Ame la ka xatua ni ke, hnenge hna e me lapa mekun la itre hna melën hnene la itre hlue i Iehova ekö me enehila ka melëne fe la jole cili.” Hnene la itre xaa trejin hna inin me hnehen la itre xötr ka ithuecatr, tune la Salamo 27:10 me Isaia 41:10. Ame pena itre xan, angatr a dreng la kola e la Tusi Hmitrötr memine la itre itusi hna inin ngöne la itre icasikeu. Celë hi ka xatua angatr ngöne la angatr a e Tusi Hmitrötr caas, me hnëkëne la itre icasikeu.

9. Nemene la thangan e tro sa sine la itre icasikeu?

⁹ Loi e tro fe sa sine la itre icasikeu. Itre ini hna hamën a ithuecatr koi së, nge itre icasikeu a aijijë së troa easenyi catr kowe la itre trejin. (Heb. 10:24, 25) Öni Massiel: “Ketre atr ka lapa pe hi ni. Ngo ame koi ni, tha tro kö ni a triane la ketre icasikeu. Loi e tro fe ni a hamë mekun. Öhne hë ni laka, ka nyipiewekë ni e hnine la ekalesia.”

10. Pine nemene matre nyipiewekë troa nyisineene la itre trejin?

¹⁰ Troa nyisineene la itre trejin. Loi e troa nyisineene la itre trejin ka hamë ithuecatr. Tha kolo hmekuje kö la itre trejin ka ce xötr me easë, maine ka traqa pena qa ngöne la nöje së. Öni Tusi Hmitrötr,  “thene la ite qate la inamacan.” (Iobu 12:12) Ijije fe tro la itre ka co a xatuane la itre ka tru. Ngacama tru catre kö Ionathana hui Dravita, ngo lue nyipi sinee nyidro. (1 Sam. 18:1) Hnei nyidroti hna ithuecatrekeu me catre nyihlue i Iehova, ngacama hna traqa la itre jol ka tru. (1 Sam. 23:16-18) Öni Irina, ketre trejin ka mele caas ngöne la nyipici: “Ame la itre trejin, tre, kösë itre kem me thine së me itre sipu trejin me easë. Jëne angatr, ijije hi tro Iehova a xatua së.”

11. Nemene la nyine tro sa kuca matre troa hetre nyipi sinee?

¹¹ Maine ketre atr ka lapa pe hi së, tro ha jol koi së troa hetre nyipi sinee. Hanawang la hna melën hnei Ratna, ketre trejine föe. Hna icilekeu me angeic ngöne la angeic a nyiqaane atre la nyipici. Öni angeic: “Öhne hi ni laka, nyipiewekë tro ni a sipo ixatua kowe la itre trejin.” Nyipici laka, tha ka hmaloi kö troa fe la hni së kowe la ketre atr. Ngo maine easa ajane troa nyisinee i angeic, celë hi nyine tro sa kuca. Eje hi, itre sinee së a ajane troa xatua së me ithuecatr koi së. Ngo nyipiewekë tro sa fe la hni së koi angatr.

12. Nemene la aqane tro sa nyisineene la itre trejin?

¹² Maine easa ajane troa nyisineene la itre trejin, loi e tro sa ce cainöj me angatr. Öni Carol, lo trejin hna qaja e caha hun: “Hnenge palahi hna ce cainöj memine la itre xaa trejine föe, matre itre nyipi sinee hë huni enehila. Hnei Iehova hna aijijë angatr troa xatua ni.” Eje hi, hetre eloin e tro sa nyisineene la itre trejin. Iehova a aijijë angatr troa xatua së ngöne la itre ijine jol, tune la easë caas.—Ite edomë 17:17.

13. Nemene la hnëqa ne la nöjei Keresiano?

¹³ Ame la hnëqa ne la nöjei Keresiano, tre, troa thele tingeting me hnime la itre atrene la ekalesia, matre pëkö ka troa lapa caas me pë sinee. (Ioane 13:35) Jëne la itre hne së hna qaja me kuca, ijije hi tro sa ithuecatr kowe la itre trejin! Önine la ketre trejine föe: “Ame la eni a atre la nyipici, kösë sipu faming hë la ekalesia. Maine tha xatua ni ju hnei angatr, tha tro kö ni a nyihlue i Iehova.” Nemene la nyine tro sa kuca matre troa amamane la ihnimi së kowe la itre trejin ka mele caas ngöne la nyipici?

14. Nemene la nyine tro sa kuca matre troa nyisineene la itre ka xötrei traqa ngöne la ekalesia?

¹⁴ Troa nyisineene la itre ka xötrei traqa ngöne la ekalesia. Loi e tro sa kapa hnyawa la itre ka ini tus, me itre fami ka nyipi traqa, me itre trejin ka xötrei xomi bapataiso. (Rom. 15:7) Ame la hne së hna ajan, tre, troa nyisinee i angatr. Celë hi matre loi e tro sa wangatrunyi angatr. Tha tro kö sa thele troa pi atre la mele i angatr. Loi e tro sa metrötrë angatr, me thele troa trotrohnine la itre jol ka traqa koi angatr. Ame itre xan, jole troa fe la hni angatr. Celë hi matre, tha tro kö sa musinë angatr troa sa la itre hnyinge së. Loi e tro pe sa hnying me drei angatre hnyawa. Maine jë, tro sa hnyingë angatr la aqane atre angatre la nyipici.

15. Nemene la nyine troa kuca hnene la itre trejin ka macaj?

¹⁵ Itre trejin a kökötre hnyawa hnine la nyipici, ngöne la kola wangatrunyi angatr hnene la itre trejin ka macaj, tune la itre qatre thup. Hanawang la  hna melën hnei Melissa, ketre trejine föe hna hetrune ngöne la nyipici hnei thine i angeic. Öni angeic: “Eni a olene kowe la itre trejin trahmany ka wangatrunyi ni, kösë itre kemeng angatr. Maine eni a ajane troa porotrik, atre hi ni laka, tro angatr a drei ni.” Ame pena Mauricio, hna trotrije la nyipici hnene la trejin ka ini tusi me angeic. Öni angeic: “Hnene la itre qatre thup hna xatua ni. Hnei angatr hna ithanata koi ni me ce cainöj me eni. Angatre fe a ce thawa me eni la itre trengamo hnei angatr hna öhne ngöne la angatr a ini tusi caas. Ketre, hnei angatr hna hë ni troa kuci elo.” Ame hë enehila, Melissa me Mauricio a huliwa i Iehova ngöne la drai pexej.

16-17. Tune kaa la aqane tro sa xatuane la itre xan?

¹⁶ Troa xatuane la itre trejin. (Gal. 6:10) Ame Léo ke, ketre mesinare hna upi kowe la ketre nöj, matre nanyi hë angeic qaathene la fami angeic. Öni angeic: “Easa madrin la kola xatua së ngöne la nyipi ijin. Ame la ketre drai, hna jeng la lotong. Ame hë la eni a bëek koi hnalapa, eni a hnehengazo menu. Ngo hnene la lue trefën hna hë ni troa ce xeni me nyidro. Thëthëhmine hë ni la itre hne huni hna xen, ngo mekun palahi ni laka, hnei nyidroti hna drei ni hnyawa. Madrine catre ni e thupen!”

¹⁷ Nyipici laka, easa madrine troa sine la itre icasikeu, tune la itre asabele. Easa ce madrin memine la itre trejin, me porotrikëne la porogaram ne la asabele. Ngo öni Carol: “Ame ngöne la itre ijine asabele, kösë pëkö sineeng.” Pine nemen? Öni angeic: “Alanyimu catre la itre trejin, nge angatr a ce traqa memine la itre fami angatr. Ngo ame ni ke, eni caasi hi matre kösë pëkö sineeng.” Ame itre xan, hna mecitriji angatr hnene la itre föi angatr, matre jol koi angatr troa sine la ketre asabele. Hapeu, hetre trejine kö ka melën la jole cili? Maine eje hi, loi e troa hë angeic troa ce sine la asabele memine la fami së.

18. Nemene la aqane tro sa trongëne la hna qaja ngöne 2 Korinito 6:11-13?

¹⁸ Troa xomi ijine kowe la itre trejin. Ijije  hi tro sa hëne la itre xaa trejin troa ce tro me easë, tune la itre ka lapa caas. Easa ajane troa ‘fe hnyawane la itre hni së’ koi angatr. (E jë la 2 Korinito 6:11-13.) Öni Melissa: “Eahuni a madrin ngöne la itre trejin a könë hun kowe la hnalapa i angatr, maine hë huni pena troa ce tro me angatr ngöne la itre ijine mano.” Hapeu, hetre trejine kö e hnine la ekalesia ka aja ixatua?

19. Eu la itre ijine tro sa cememine la itre trejin?

¹⁹ Ame ngöne la macatre, hetre ijine laka, nyipiewekë tro sa cememine la itre trejin. Ame la itre xaa trejin, jol koi angatr la itre ijine feet e pune macatre ke, tha ka hmi kö la föi angatr. Ame pena itre xan, hace me jol koi angatr la drai ne meci ne la ketre sinee i angatr. Celë hi matre, ame la easa xomi ijine troa ceme angatr, easë hi lai a amamane laka, easa ‘hnehengazo angatr.’—Fil. 2:20.

20. Maine easa mekun laka, pëkö sinee së, nemene la aqane troa xatua së hnene la hna qaja hnei Iesu ngöne Mataio 12:48-50?

²⁰ Nyimutre la itre kepin matre easa mekun laka, easë caas nge pëkö sinee së. Ngo tha tro kö sa thëthëhmine laka, trotrohni së hi hnei Iehova. Tro kö Nyidrëti a upe la itre trejin troa ixatua. (E jë la Mataio 12:48-50.) Ketre, loi e tro sa catre xatuane la itre trejin. Celë hi aqane tro sa amamane la hni ne ole së kowe la fami hna hamën hnei Iehova. Ngacama easa cile kowe la nöjei pengöne jol, ngo tha easë caasi kö. Tro palahi Iehova a ceme easë!