23 TOGÓ BEL GE NÒ
Jìhóvà Dì Ní Ló Lee, Níì Áá Ọ̀ọ̀ Nì
“Jìhóvà di ku ló kọ̀láá nen ea kólíe.”—PS. 145:18.
SỌ́L EA GÃ́BUG DÚ 28 Ge Bã̀àà Kóò Jìhóvà
GE TENÍ BOO NÚ EÉ NÓ *
1. Éé ní ea náa vaá sìgà tṍó à ólò tõó ló gbò gyóòlo Jìhóvà kọ à dúè áá ọ̀và ẹ?
SÌGÀ tṍó, à ólò tõoí ló belí kọọ̀ à dú áá bẹ̀ì. Kilma ló sìgà gbò, dìtõ̀òí ólò vàlẹ̀ bá tà, sõò níí sìgà gbò ólò tú gã́bug tṍó. Àé láá tõoí ló belí kọọ̀ à dú áá bẹ̀ì, bã̀àna tṍó e di gbàà gbò nen. À ólò tàvala ló sìgà gbò ge bã̀àà kóò gbò nen tṍó e bà íná ãa bõ̀ònatõ̀ò. Dõòna gbò aa tọ e bà ólò leeá bá vaá gbá naaá nu, sõò à ólò tõó vá ló belí kọ à dúè áá ọ̀và tṍó e bà kil kpã́á aa ló pá ba nen. Nagé, à ólò palàge tãagẽ sìgà nen tṍó e nen ea beè vùlè ú. Vaá à ólò tõó ló sìgà gbò níí Kráìst kọ à dúè áá ọ̀và tṍó e pá ba tọ àbèè ba kóò e bà náa ólò sí nònù kin va àbèè ge biìgè va ló, èlmà tõ̀ò gbò e bà ã́àa bã mm̀ bõ̀ònatõ̀òí.
2. Mókà gbò bíb ní eé áálá ẹ́?
2 Jìhóvà nyímá vaá dã́tẽ́ ló kọ̀láá nú ea kilíí ló. À nyímá tṍó ea tõoí ló belí kọ à dú áá bẹ̀ì, vaá à gbĩ́ gè nvèè bá nèi kọ é bé èlbá gbò tọa lóá. Mósĩ́ deè ní e Jìhóvà ólò nvèè bá nèi ẽ́? Éé ní eé láá naa ge nvèèmà bá nèà bẹẹ bá ẹ́? Vaá mósĩ́ deè ní eé láá nvèèmà bá nè dõòna gbò e bà di mm̀ bõ̀ònatõ̀ò ea tõó vá ló kọ à dúè áá ọ̀và ẹ? Naanii mè é ló bel boo ààlaà gbò bíbvá.
JÌHÓVÀ ÓLÒ Ẹ̀B NÚ EA KILÍÍ LÓ
Jìhóvà beè lẹ̀ẹ̀là ene kà a nyómá tóm gè naa kọ Èláíjà á àgala boo kọọ̀ náa dú áá ẹ̀ẹ̀ (Ẹ̀b 3 kpò)
3. Mósĩ́ deè ní e Jìhóvà beè zogè kọ à ẹbvìè nú ea kil ló Èláíjà ẹ?
3 Jìhóvà gbĩ́ kọọ̀ nyíè dénè pá a gyóòlo á ẹẹ. À di kuló buù bẹ̀ì, vaá à ólò nyimá tṍó e nyíéi biilà àbèè tṍó e lóói ọọ. (Ps. 145:18, 19) Bugi togó boo bé e Jìhóvà beè zogè kọ à bulàẹ̀ nú ea kil ló bé e nu tọ́á ló neǹ kọ́ọ̀ bùlà Bàrì Èláíjà naa nè bé ea beè nvèè bá nèe naa. Gbálà ea beè bọ́ló dẹ̀lẹ̀ nyíé booí beè di dùm tṍó e nu beè palàge tavala ló pá Ízràẹ̀l. Gbò e kpóó di bá e bà dú Ízràẹ̀l e bà náa vulè Jìhóvà beè biigè ló pá a gyóòlo, vaá gbĩ́ gè fẹ́ Èláíjà. (1 Kíǹg 19:1, 2) Be à sẹlẹ, nú ea géè láá tãagẽ nagé Èláíjà dú kọ à géè bugi togó kọọ̀ áá ẹlẹ ní ea dúè neǹ kọ́ọ̀ bùlà Bàrì ea gé fãè Jìhóvà ea sígáẹ́. (1 Kíǹg 19:10) Jìhóvà beè vàlẹ̀ bá nvèè bá nè Èláíjà. A beè lẹ̀ẹ̀là ene kà a nyómá tóm kọ á gé naa kọọ̀ Èláíjà á nyimá kọ níì áá ẹ̀ẹ̀ nì—mè à íè nagé gã́bug pá Ízràẹ̀l e bà gé fã Jìhóvà mm̀ bọ́ọ̀ló dẹ̀lẹ̀ nyíé boo e bà dì!—1 Kíǹg 19:5, 18.
4. Mósĩ́ deè ní e kpá Máàk 10:29, 30 zógè bé e Jìhóvà ólò nvèè bá nè gbò e bà náa íe na nvèè bá ea aa bá pá tọ nè gbò kóò e?
4 Jìhóvà nyímá kọọ̀ à íe gã́bug nú e sìgà bẹ̀ì beè sọ̀bá tṍó e béèlàfùl ge fã̀e. Àé láá dú nvèè bá ea aa bá pá tọ àbèè gbò kóò e bà náa ólò fã̀ Jìhóvà. Be à sẹlẹ boo béè tã̀àgã̀ bùlà ní ea beè naa kọọ̀ neǹ tóm Pítà á bĩiná Jíízọ̀s kọọ̀: “Beele è sọ bá dénè nu vaá nyoonéni nvée. Mó kà kpẽ́ ní e è é íe é?” (Máát. 19:27) Jíízọ̀s beè gbọọlẹ̀ ló aalá nèva kọọ̀ pá vígà e bà di mm̀ bõ̀ònatõ̀ò é di belí pá tọ nèà va. (Bugi Máàk 10:29, 30.) Vaá Jìhóvà ea dú bẹẹ Tẹ̀ Ea Di Káála, zigà kọ àé nveenìè bá neè gbò e bà gbĩ́ gè fãèe. (Ps. 9:10) Bugi togó boo sìgà nú e olo é láá naa kọbé ò íe nvèè bá ea aa bá Jìhóvà tṍó eo íè bùlà kọ à dúè áá ọ̀ọ̀.
NÚ EO É LÁÁ NAA BE À TÕÓ NÍ LÓ KỌ À DÚÈ ÁÁ Ọ̀Ọ̀
5. Éé ní ea náa vaá à dú lé gè bugi togó boo bé e Jìhóvà gé nveè bá nèi naa ẽ́?
5 Bugi togó boo bé e Jìhóvà gé nveè bá nè ni naa. (Ps. 55:22) Níí é nveè bá naa kọ ó nyimá kọọ̀ níì áá ọ̀ọ̀ nì. Ene kà vígà ea bée kọlà Carol * ea gáà ia dóm, e pá ba tọ náa ólò sí nònù beè kọọ̀: “M beè nyimá kọ níì áá m̀m̀ nì, tṍó em bugì togó boo bé e Jìhóvà beè nvèè bá nèm naa kọ ḿ láá ĩ̀ìmà mm̀ gbò tṍó e dìtõ̀ò beè tàvàlà ḿ ló. Vaá níí beè naa kọ ḿ àgala boo kọọ̀ Jìhóvà é kilsĩ́ gè nvèè bá nèm.”
6. Mósĩ́ deè ní e nú ea di mm̀ 1 Pítà 5:9, 10 é láá siè kpóó ló gbò ea tõó vá ló kọ à dúè áá ọ̀và ẹ?
6 Bugi togó boo bé e Jìhóvà gé nveè bá nè pá vígà ea tõó vá ló kọ à dúè áá ọ̀và naa. (Bugi 1 Pítà 5:9, 10.) Ene kà vígà págbálà ea bée kọlà Hiroshi, e mm̀ gã́bug gbáá áá ẹ̀ẹ̀ ní ea ólò sí nònù ba tọẹ́, kọ́ọ̀: “À válí gè mòn kọọ̀ mm̀ bõ̀ònatõ̀ò, dénè nen íe ńlẹ́ẹ̀ tã̀àgã̀. Ge nyimá kọọ̀ dénè bẹ̀ì gé náa nú e bẹẹ kpóó sim tùlà mm̀ ge sí tóm nè Jìhóvà é síè kpóó ló dénè bẹ̀ì e pá bẹẹ tọ náa ólò sí nònù.”
7. Mósĩ́ deè ní e gè tã̀àgã ló Bàrì ólò nvèè bá nè olo é?
7 Olòó tã̀àgã ló Bàrì, bugi Kpá Káí, vaá sí nònù lee. Níí bãàa mm̀ ge kọ́ kọ̀láá bé e nu tọ́a ní ló naa nè Jìhóvà. (1 Pít. 5:7) Ene kà vígà pábia ea kọlà Massiel, ea beè tõóé ló kọ à dúè áá ẹ̀ẹ̀ tṍó ea daamà togó gè fã̀ Jìhóvà boo béè kọọ̀ pá ba tọ náa ólò sí nònù, beè kọọ̀: “Ene kà nú ea beè nvèè bá nèm kọ ḿ láá emá gè kọ à dú áá m̀m̀ beè dú gè kọ́ kà lèlà bé e nu tọ́a ḿ ló naa nè Jìhóvà. À dú nà Tẹ̀, vaá m beè olòó tú gã́bug tṍó tã̀àmàé ló kọ̀láá dee, ge naa kọ á nyimá bé e nu tọ́a ḿ ló naa.”
Ge olòó pãane tṍ ló Kpá Káí nè kpá ea dẹẹ̀a boo Kpá Káí e ba beè naa rẹ́kọọ̀d é nveè bá nè gbò ea tõó vá ló kọ à dúè áá ọ̀và (Ẹ̀b 8 kpò) *
8. Mósĩ́ deè ní e gè bugi Kpá Káí vaá bugi togó boo ni nveè bá nè olo é?
8 Bugi Kpá Káí kọ̀láá dee, vaá ò bugi togó boo gbò kiẽ́e ea zógè kọọ̀ Jìhóvà vulè ni. Ene kà vígà pábia ea bée kọlà Bianca, e pá ba tọ ólò ló gbò bel ea ọọvẹ́ẹ ló nèe beè kọọ̀: “Ge bugi vaá bugi togó boo gbò nòòtẽ́ ea di mm̀ Kpá Káí nè nòòtẽ́ ea kil ló nú e gbò gyóòlo Jìhóvà beè tení nágé bá ea bélí ńda beè nvèè bá nèm.” Sìgà pá vígà ólò tú gbò dọ̀ Kpá Káí ea é nveè bá nè va gbẹá togó, dì belí Psalm 27:10 nè Àìzáíà 41:10. Sìgà gbò a mon kọọ̀ ge pãane tṍ ló nú e ba beè naa rẹ́kọọ̀d tṍó e bà gé kpóógá dee ló nònù àbèè ge bugi Kpá Káí a nveenìè bá neè va.
9. Mósĩ́ deè ní e gè sí nònù ni nveè bá nè olo é?
9 Pììgà bé eo kpóó sim tùlà naa gè olòó sí nònù. Gbò nú e gé nó gbẹá nònù é síè ni kpóó ló, vaá òó nyímá nágé ló pá vígà. (Híb. 10:24, 25) Massiel, e beè zẹ́ẹ́ kọ́ nú ea kil lóá kọ́ọ̀: “Náa kal ló béè kọọ̀ kẹ́ẹ beè palàge siím, m beè pììga boo gè sí kọ̀láá deè nònù vaá aalá bíb. Níí beè nvèè bá nèm kọ ḿ láá tõo bã ló pá vígà.”
10. Éé ní ea náa vaá à dú lé gè bã̀àà kóò pá vígà e bà bọ́ló dẹ̀lẹ̀ nyíé boo e bà di mm̀ bõ̀ònatõ̀ò ẽ?
10 Bã̀àà kóò pá vígà e bà bọ́ló dẹ̀lẹ̀ nyíé boo. Bã̀àà kóò gbò eo é láá nó nu lọl bá e bà di mm̀ bõ̀ònatõ̀ò, kọbèè nóo dúàì sĩ́ gbò vaá nóo aalìì tẽ̀ènè ketõ̀ò. Kpá Káí kẽeí nyíe kọọ̀ “gbò e bà ni dú kànen mm̀ dee” ólò nyimá nu. (Jóòb 12:12) Gbò e bà ni dú kànen mm̀ dee é láá no nágé nu lọl bá gbò e nvín ãa e bà bọ́ló dẹ̀lẹ̀ nyíé boo. Jónatàn beè palàge nomá Dévìd, sõò níá náa beè kalẹ̀ kọ bàá gá dé kpéè ló ba díì díílá kóò. (1 Sám. 18:1) Dévìd nè Jónatàn beè nvèè bá nè ene kọbé bà láá fã̀ Jìhóvà kọ̀láá bé e dìtõ̀ò beè tàvàlà naa. (1 Sám. 23:16-18) Irina, ea dú ene kà vígà pábia e áá ẹ̀ẹ̀ ní ea ólò sí nònù ba tọẹ́ kọ́ọ̀, “gbò vígà págbálà nè pábia beè aa deè dì belí bẹẹ tẹ̀ nè bẹẹ kà àbèè pá vígà e dúà gbàà. Jìhóvà é láá tú va naamá nú e pá bẹẹ tọ gáẹ̀ beè naa nèi.”
11. Éé ní eé íè ge naa kọbé bẹẹ bã̀àà kóò aga ló é?
11 Náa ólò valí gè bã̀àà ãa kóò, bọọ èlmà tõ̀ò be kẹ́ẹ ólò bọọgẹ̀ sií ni. Ene kà vígà pábia ea bée kọlà Ratna, e kẹ́ẹ ólò bọ̀ọ̀gẹ̀ siíe, ea beè bã mm̀ kà kàí kọ́ọ̀: “M beè gbóó nyimá kọọ̀ à dú bíi kọ ḿ zààva ló nvèè bá ea aa bá pá vígà.” Àé láá tàvàlà ní ló gè kọ́ bé e nu tọ́a ní ló naa nè dõòna nèn, sõò àé láá naa kọ ó bãaai kóò tṍó eo náà vó. Pá o kóò gbĩ́ gè siè ni kpóó ló vaá nvèè bá nè ni, sõò à dú bíi kọ ó naa kọ bàá nyimá nú e bàé láá naa nè ni.
12. Mósĩ́ deè ní e gè kọ́ kpẹ̀a é láá nvèè bá nè ni kọ ó bã̀àà lé kóò e?
12 Ene kà lé sĩ́deè ge bã̀àà kóò dú gè zọ̀ pá vígà kọ́ kpẹ̀a. Carol, e beè zẹ́ẹ́ kọ́ nú ea kil lóá kọ́ọ̀: “Ndaa bãaà gã́bug lé kóò tení dú ló gè zọ̀va kọ́ kpẹ̀a nè ge zọ̀va naaá gã́bug nú mm̀ bõ̀ònatõ̀ò. Jìhóvà a tú gbò kóòí nvèèmà bá nèm mm̀ gã́bug gbáá.” À ólò palàge dú lé tṍó e bãaà kóò pá vígà e bà bọ́ló dẹ̀lẹ̀ nyíé boo. Jìhóvà ólò sièi kpóó ló tení dú ló gbò kóòí tṍó e lóói ọọ, dì belí tṍó ea tõoí ló kọ à dú áá bẹ̀ì.—Pró. 17:17.
NVÈÈ BÁ NÈ DÕÒNA GBÒ KỌ BÀÁ NYIMÁ KỌỌ̀ BÀ DṸÙNÀÈ PÁ BẸẸ TỌ
13. Éé ní ea kuu bá buù nen ea di mm̀ bõ̀ònatõ̀ò ge naa ẽ́?
13 À kuu bá buù nen ea di mm̀ bõ̀ònatõ̀ò ge naa kọọ̀ vulà nè fẹ́ẹ́-fẹẹ̀ ló á di mm̀ bõ̀ònatõ̀ò, naa ní e náa é tõó ló tọ́ọ̀ nen kọ à dúè áá ẹ̀ẹ̀. (Jọ́ọ̀n 13:35) Nú e kọ́ọ̀ vaá naa é láá nvèè bá nè dõòna gbò! Ene kà vígà pábia beè kọọ̀: “Tṍó e nda beè bã mm̀ kà kàí, pá vígà ní e ba beè dú pá ńdáà tọẹ́. Ba nvèè bá ní ea beè naa kọ á valíḿ ló gè dú enè Neǹ Ditõ̀ò Jìhóvà ẹ.” Éé ní eo é láá naa ge nvèèmà bá nè gbò e bà di mm̀ bõ̀ònatõ̀ò, e pá ba tọ náa ólò sí nònù, kọbé à zógè kọọ̀ pá vígà vulè va ẹ́?
14. Éé ní eo é láá naa ge bã̀àà ãa kóò e?
14 Pììgà ge bã̀àà kóò gbò e bà ã́àa sí nònù. Èé láá naa vó tení dú ló gè tú lé bá tuumá gbò e bà ã́àa bã mm̀ bõ̀ònatõ̀ò. (Róm̀ 15:7) Kọ̀láá bé ea dì naa, èé náa èlmà boo áá gè zààvà vá ló nè ge tú lé bá kã̀àmà va mon. È gbĩ́ì ge zọ̀ va duá kà lé kóò bé e tṍó gé téní naa. Vóà naa, tú lé bá tuumá gbò e bà ã́àa sí nònù, vaá ò zógè kọ ò bulàẹ̀ nú ea kil vá ló. Pììga boo gè dã́ ból ló gbò tã̀àgã̀ e bà gé téní bá, sõò ó gá bĩiná vá gbò bíb ea é síìmà va kẹ́ẹ. Àé láá tàvala ló sìgà gbò ge kọ́ bé e nu tọ́a vá ló naa, boo béè vó, ó gá tãgĩ́ va bá kọ bàá iè ge ló bel. Tãa vó, à bọ́ló kọ é tú kyèèlè bĩimá va bíb vaá palàge pãane tṍ ló gbò ààla e bà ne. Dì belí nu dòòmà bá, òó láá bĩiná va bé e ba beè bã mm̀ kà kàí naa.
15. Mósĩ́ deè ní e gbò níí Kráìst e bà íe agẹ zìgà é láá nvèè bá nè dõòna gbò e bà di mm̀ bõ̀ònatõ̀ò ẽ?
15 Zìgà kọ̀láá nen ea di mm̀ bõ̀ònatõ̀ò é aga ló tṍó e zógè kọ è bùlà nú ea kil ló ene. Níí ólò bọọgẹ̀ naaá tṍó e gbò kànen nè dõòna gbò e bà íe agẹ zìgà síè va kpóó ló. Melissa, ea kà beè bumáe mm̀ kà kàí kọ́ọ̀: “Nyíè nda palàge ẹẹ́ ló gbò vígà págbálà e ba beè dì belí nà tẹ̀, tú tṍó dììmà ḿ ló, vaá palàge iém lèèmá m. Kọ̀láá tṍó em íè bel ge lò, m̀ ólò ié nen ea é pãaném tṍ ló.” Nyíè ene kà nvín ãa vígà págbálà ea bée kọlà Mauricio beè bììlà vaá à tõoé ló belí kọ à dúè áá ẹ̀ẹ̀ tṍó e nen ea ólò noòmàe Kpá Káí dọ aa mm̀ bõ̀ònatõ̀ò. Mauricio kọ́ọ̀: “Bé e gbò kànen beè zogè kọ bà bulàẹ̀m vaá ẹ̀b nú ea kilím ló naa beè palàge nvèè bá nèm. Bà ólò zọ̀m loá bel lee. Bà ólò zọ̀m kọ́ kpẹ̀a, kọ́ gbò lé nu e bà íé lọl mm̀ ba bugì Kpá Káí nèm, vaá zọ̀m bìlà bil.” Melissa nè Mauricio dì e bà gé tú dénè ba tṍó siimá tóm nè Jìhóvà kátogóí.
É kọ à íe nen ea di mm̀ bọọ bõ̀ònatõ̀ò e nyíée é ẹ́ẹ be ò noo tṍó dììmàé ló? (Ẹ̀b 16-19 kpò) *
16-17. Dõòna kà éé ní eé láá naa mm̀ ge nvèèmà bá nè dõòna gbò e?
16 Nvèè bá nè gbò nen. (Gàl. 6:10) Leo ea ólò kọ́ kpẹ̀a aa dó dọ dó gbẹá kiẽ́e ea di kà kpã́á aa ló pá ba tọ kọ́ọ̀: “Gã́bug tṍó áá nú ea ólò dú bíi, dú gè naa nú ea é nveè bá nè nen tṍó ea bọ́ló. Nda kẽèa boo enè deé e bùló nu beè naaá ló faà em di m. Lóóm beè palàge ọọ tṍó em ínà be. Sõò enè kà dóm nè va beè kolím ló gyã́á. Ním kẽèa na boo nú em beè dè, sõò áá nú em kẽèa boo dú bé e ba beè dĩine ló pãaném tṍ ló naa. Mm̀ kà kà, níá beè palàge dĩiném ló!”
17 Dénè bẹ̀ì ólò dé kpéè ló tṍó e di ló pá vígà vaá zọ̀ va loá sọ́l boo gbò nú e beè láá dã́ gbẹá àsémblì nè pọ̀bkà bõ̀ònaló. Kọ̀láá bé ea dì naa, Carol, e beè zẹ́ẹ́ kọ́ nú ea kil lóá kọ́ọ̀: “À ólò tõo ḿ belí kọ à dú áá m̀m̀ gbẹá gbò àsémblì nè pọ̀bkà bõ̀ònaló.” Ló éé? À kọ́ọ̀: “Náa kal ló béè kọọ̀ gã́bug pá vígà di ḿ-má kĩá, bà ólò di ĩ́ìtẽ́ ló pá ba tọ. Tṍó em monì naa vó, à ólò gbóó tõó ḿ belí kọ à dú áá m̀m̀.” À ólò tàvala ló sìgà gbò ge sí túá kà pọ̀bkà bõ̀ònaló àbèè àsémblì ea sẹẹà túá tṍó e ba va àbèè ba dóm ã́àa ù. É kọ ò nyímà ló nen ea gé téní bá íb gbò dìtõ̀òí? Éé ní ea náa vaá nóo kólìe kọ á gbaaá dẽè pá bọọ tọ ló dõòna kà sẹ̀lẹ̀nù ea é sẹẹà mm̀ bõ̀ònatõ̀ò ẽ?
18. Mósĩ́ deè ní eé láá tú 2 Kọ́rìnt 6:11-13 siimá tóm tṍó e gé kólí kyáà ẹ?
18 Ié tṍó nè va. Pììga boo gè noo tṍó dììma ló gbò vígà págbálà nè pábia, èlmà tõ̀ò gbò ea tõó vá ló kọ à dúè áá ọ̀và. È gbĩ́ gè zogè va “kè tẽ́ bẹẹ nyíe.” (Bugi 2 Kọ́rìnt 6:11-13.) Melissa e beè zẹ́ẹ́ kọ́ nú ea kil lóá kọ́ọ̀: “Nyíéi ólò palàge ẹẹ tṍó e pá vígà kólíi kọ é duè ba tọ àbèè ge zọẹ̀ va sì gé bìlà kyẽè.” É kọ à íe nen ea di mm̀ bọọ bõ̀ònatõ̀ò e olo é láá kolí kyáà?
19. Mó tṍó ní e gè ié tṍó dììma ló pá vígà é láá palàge nvèè bá nè va ẹ́?
19 À íe sìgà tṍó e nyíè gbò e bà di mm̀ bõ̀ònatõ̀ò ólò palàge ẹẹ kọ è diè vá ló. Àé láá tàvala ló sìgà pá vígà ge di ló pá ba tọ e bà náa ólò sí nònù, tṍó e bà gé sẹlẹ gbò sẹ̀lẹ̀nù e Kpá Káí náa nveè sãa kúm. Nyíè sìgà gbò ólò palàge bììlà sìgà dee, dì belí deé ea kpṍònè deé e nen e ba beè vùlè beè ù. Tṍó e túù tṍó dììma ló pá vígà e bà gé téní bá íb gbò dìtõ̀òí, è zógè kọ è “palà ge bùlà” nú ea kil vá ló.—Fíl. 2:20.
20. Mósĩ́ deè ní e gbò bel e Jíízọ̀s ló mm̀ kpá Máátìù 12:48-50 é láá nvèè bá nèi tṍó ea tõoí ló kọ à dú áá bẹ̀ì e?
20 À íe gã́bug nú ea é láá naa kọ á tõó ló neǹ vígà belí kọọ̀ à dúè áá ẹ̀ẹ̀. Sõò á gá táí nyíe kọọ̀ Jìhóvà palàge nyimá bé e nu tọ́aí ló naa. Gã́bug tṍó, à ólò nèi nú ea dúi bíi ló tení dú ló pá vígà. (Bugi Máátìù 12:48-50.) È zógè kọ è zaavàẹ̀ ló gbò nú e Jìhóvà néi tṍó e piigà bé e bẹẹ kpóó sim tùlà naa ge nvèè bá nè pá vígà. Kọ̀láá bé e nu tọ́aí ló naá sígà tṍó, náa dú áá bẹ̀ì boo béè kọọ̀ Jìhóvà dìí ló lee!
SỌ́L EA GÃ́BUG DÚ 46 È Ṍà Ni Zaa, E Jìhóvà
^ par. 5 É kọ à ólò tõó ní ló sìgà tṍó belí kọọ̀ à dúè áá ọ̀ọ̀? Be à dì naa vó, àgala boo kọọ̀ Jìhóvà palàge nyimá gbò nú eo gé téní bá vaá à gbĩ́ gè nvèè bá nè ni. Mm̀ nakà togó belí, èé ló bel boo nú eé láá naa kọbé è láá bé èlbá íb dìtõ̀òí. Èé nó nágé nú eé láá naa mm̀ ge nvèèmà bá nè pá vígà ea tõó vá ló kọ à dúè áá ọ̀và.
^ par. 5 Bà nyááná sìgà bée.
