1. ¿Ñobätä nitre ruäre Jehová mikaka täte ie ja tä nemen ruin kaibe?

NI JÖKRÄ ie ja tärä nemen ruin kaibe. Nitre ruärebiti tä niken jötrö ta. Akwa nitre ruäre kräke ñan tä nemen nuäre, ñobätä ñan aune jata nemen ruin kaibe jankunu ietre yebätä. Ni ruäre tä nitre kwati ngätäite, akwa yebiti ta jata nemen ruin kaibe ie. Nitre ruäre ie ja ñaka tä nemen ruin kwin konkrekasion madate. Ni ruäre tä nüne keteitibe mräkätre kwe ben, aisete tä niken mobe mentokwäre ngwane, jata nemen ruin kaibe ie. Ni mada kän mräkä tare kwe tä krüte aune tä nemen uliere krubäte yebätä jata nemen ruin kaibe ie. Aune nitre kristiano ruäre metrere tä krire kukwebätä ye mräkätre kwe o ja ketamukotre käne kwe ñan tä kain ngäbiti o ja mike rüere yebätä jata nemen ruin kaibe ietre.

2. ¿Kukwe ngwantarita meden rabai gare nie kukwe ja tötikara nekänti?

² Ni ño ye gare kwin Jehovai aune ja ruin ño nie ye nüke gare ie. Aisete, ñongwane ja ruin kaibe nie ye gare ie aune niara tö ni dimikabätä. Kukwe ngwantarita ne nikwe mikai gare jai kukwe ja tötikara nekänti: ¿Jehovata ni dimike ño ja tuakäre ja ruin kaibe nie yebe? Ja ruin kaibe nie ngwane, ¿ni raba dre nuainne? ¿Aune ja mräkätre konkrekasionte ie ja ruin kaibe ye ni raba dimike ño?

3. ¿Jehová töi nämäne Eliabätä ye bämikani ño kwe?

³ Ni jökrä Jehová mikaka täte tädre kwin ie Jehová tö. Niara tä ni itire itire ken aune ñongwane nita nemen di nekä ye gare niarai  (Sal. 145:18, 19). Jehová töi nämäne ño Eliabätä yebätä ani blite. Kukwe tare namani bare juta Israelbätä ye näire Eliakwe nünanbare. Nitre Jehová mikaka täte ye rüere ja mika nämäne krubäte aune nitre ja mikaka Jehová rüere tö namani Elías murie ketabätä (1 Rey. 19:1, 2). Elías aibe namanina ni Ngöbö kukwei niekä erere namani ruin ie, yebätä ja namani ruin ulire ie (1 Rey. 19:10). Bengwairebe, Jehovakwe kukwe keteiti nuainbare Elías dimikakäre. Elías ñaka nämäne kaibe aune nitre israelita kwati krubäte nämäne Jehová mike täte jankunu ye Jehovakwe mikani gare ángel itibiti Elías ie (1 Rey. 19:5, 18).

4. Nitre mräkätre aune ja ketamuko kwetre ñaka niena dimike yebätä Jehová töita, ¿ye mikata gare ño Marcos 10:29, 30 yebätä?

⁴ Nikwe ja di ngwanina krubäte Jehová mikakäre täte ye gare ie. Ñodre, ni mräkätre aune ja ketamuko nikwe ñan testiko ñan niena ni dimike raba ruin nie. Bati, Pedro nämäne töbike yebätä niebare kwe Jesús ie: “¿Nunkwe jändrän jökrä mikaninte, bti nunta näin ma jiebti, se abko Ngöbökwe dre biandi ütiäre nunye?” (Mat. 19:27). Ja mräkätre ja üairebiti kwati rabai nitre ja tötikaka Jesukwe yekwe ye Jesukwe niebare ietre (ñäkädre Marcos 10:29, 30 yebätä). * Aune nire tä ni Rün kä kwinbiti, Jehová, mike täte ye dimikai kwe tä käbämike ie (Sal. 9:10). Ni raba dre nuainne ne kwe Jehovakwe ni dimikadre jata nemen ruin kaibe nie ye ngwane, ye ani mike gare jai.

5. ¿Jehovata ni dimike yebätä nikwe töbikadre ye raba ni dimike ño?

⁵ Jehovata ni dimike ño yebätä nikwe töbikadre (Sal. 55:22). Ye käkwe ni dimikai töbike kwin ja käne. Meri testiko kädekata Carol, * niara aibe tä kukwebätä mräkätre kwe ngätäite, tä niere: “Kukwe tare näire Jehovata ti dimike ño yebätä tita töbike ye tä ti dimike jata nemen ruin kaibe tie ngwane. Jehovakwe ñaka ti tuainmetre kaibe ja känenkäre ye tä nemen gare metre tie kukwe yebiti”.

6. ¿Kukwe nieta 1 Pedro 5:9, 10 ye raba nitre ie ja ruin kaibe dimike ño?

 ⁶ Ja mräkätre ie ja ruin kaibe ye Jehovata dimike ño yebätä nikwe töbikadre (ñäkädre 1 Pedro 5:9, 10 yebätä). Hiroshi, mräkätre ñaka kukwebätä, tä niere: “Konkrekasionte ja mräkätre jökrä kisete kukwe tärä raba tuin nie. Akwa ni jökrä tä ja di ngwen Jehová mikakäre täte ye tä nun mräkä ñaka kukwebätä ye dimike”.

7. ¿Orasion ye tä mä dimike ño?

⁷ Käre nikwe kukwe ja üaire nuaindre. Dreta ni brukwäte aune ja ruin ño nie ye nikwe niedre Jehovai ye ütiäte krubäte (1 Ped. 5:7). Meri testiko bati kädekata Massiel yebätä ani blite. Niarakwe ja töi mikani Jehová mike täte ngwane, mräkätre kwe käkwe ja mikani rüere. Niara tä niere: “Kukwe keteiti käkwe ti dimikaba ja tuakäre ja nämä nemen ruin kaibe tie yebe ye abokän, ti nämä orare krubäte Jehovai. Niara rababa ti Rün kwrere ti kräke. Aune ja nämä nemen ruin ño tie yebätä ti nämä blite köbö kwatire kwatire ben”.

8. ¿Mätä ñäke Bibliabätä aune töbiketaribätä ye tä mä dimike ño?

⁸ Ñäkädre kukwe Ngöbökwe yebätä aune kukwe meden nieta Bibliabätä tä ni dimike yebätä töbikadretari ye ütiäte krubäte. Bianca, mräkä kwe tä kukwe ñaka kwin nierebätä yebe ja tuata kwe, niara tä niere: “Kukwe ruäre ben tita ja tuin, ye erere ben nitre mekera käkwe ja tuani kädrieta Bibliabätä aune ja mräkätre ruäre tä ja tuin kukwe ye kwrere ben kä nengwane yebätä tita ñäke aune töbiketaribätä ye tä ti dimike krubäte”. Texto meden raba ni dimike ye ja mräkätre ruäre tä mike ja töite, ñodre Salmo 27:10 aune Isaías 41:10. Ja mräkätre mada tä ja ükete gätä kräke aune ja tötike Bibliabätä audio grabata yebiti. Ye köböire, ja ñaka tä nemen ruin kaibe ietre.

9. ¿Mätä kwen gätäbätä ye tä mä dimike ño?

⁹ Nikwe ja di ngwandre käre rikakäre gätäbätä ye tä ni dimike aune ye köböire ja mräkätre tä nemen gare bäri kwin nie (Heb. 10:24, 25). Massiel, kädininte párrafo 7 yekänti, tä niere: “Ti ñan blite krubäte, akwa tikwe ja töi mikaba rikakäre gätä jökräbätä aune blite gätäte. Ye köböire, ja rababa ruin kwin tie ja mräkätre konkrekasionte ye ngätäite”.

10. ¿Ja mräkätre tä Jehová mike täte metre yebe nikwe ja ketadre ye ñobätä ütiäte?

¹⁰ Ja mräkätre tä Jehová mike täte metre yebe nikwe ja ketadre. Ja mräkätre tä kukwe kwin bämike ni käne yebe nikwe ja ketadre, kä ñaka ja näre nibiti bentre aune nüne jene akwa nikwe ja ketadre bentre. “Nitre umbre ie kukwe gare” ye mikata gare Bibliabätä (Job 12:12). Ja mräkätre umbre raba ja kite ja mräkätre bati yebätä. David bäri bati Jonatán kräke, akwa niaratre ja ketabare kwin jabe (1 Sam. 18:1). Kukwe tare ye näire niaratre nibu käkwe ja dimikani kwärikwäri Jehová mikakäre täte (1 Sam. 23:16-18).  Irina, tä Jehová mike täte, akwa mräkätre ñan tä kukwebätä, tä niere: “Ja mräkätre kukwebätä nibe ye raba nemen ni rün aune ni mräkä jeñe nikwe ye kwrere. Ja mräkätre meden ribeta nikwe ye Jehová raba bien nie ja mräkätre kukwebätä yebiti”.

11. ¿Ja ketamuko kwin rabadre nikwe yekäre nikwe dre nuaindre?

¹¹ Nitre ruäre kräke ñan tä nemen nuäre ja ketamuko känänkäre, ñobätä ñan aune ñan blite krubäte yebätä. Meri testiko kädekata Ratna ñan blite krubäte yebätä ani blite. Kukwe metre namani gare ie ngwane, mräkätre kwe käkwe ja mikani rüere. Niara tä niere: “Ja mräkätre kukwe ja üairebiti käkwe ti dimikadre ye tikwe kadre ngäbiti rababa gare tie”. Ja ruin ño nie ye ñan rabai nuäre ni kräke mikakäre gare ni madai, akwa nikwe nuaindre ye köböire ni rabai ja kete kwin bentre. Ja ketamukotre tö ni mikai dite aune dimikabätä, akwa nikwe ja driedre ietre ne kwe ni dimikadre kwetre.

12. ¿Kukwe drie ye raba ni dimike ño ja ketakäre bäri kwin ja mräkätre ben?

¹² Kukwe keteiti köböire ja ketamuko kwin raba nemen nikwe ye abokän nikwe kukwe driedre ja mräkätre ben. Carol, kädininte párrafo 5 yekänti, tä niere: “Tita kukwe driere ja mräkätre ben aune sribi ja üaire mada nuainbätä, ye köböire ja ketamuko kwin namanina tikwe”. Nikwe ja ketadre ja mräkätre tä ja ngwen metre yebe ye ütiäte krubäte, ñobätä ñan aune kukwe tare näire Jehovata ni dimike niaratre yebiti, ñodre ja nemen ruin kaibe nie ye ngwane (Prov. 17:17).

13. ¿Ni jökrä konkrekasionte rabadre dre nuainne?

¹³ Ni jökrä rabadre ja di ngwen ne kwe kä rabadre jäme aune ja taredre konkrekasionte. Ye köböire ja ñaka rabai ruin kaibe nie (Juan 13:35). Nita dre nuainne aune dre niere yebiti ni raba ja mräkätre dimike krubäte. Meri testiko iti tä niere: “Kukwe metre jataba nemen gare tie ngwane, ja mräkätre konkrekasionte ye rababa ti mräkätre jeñe tikwe ye kwrere. Niaratre ñaka ti dimikadre akräke ti ñaka rabadre testiko Jehovakwe”. Ja mräkätre tä kaibe kukwebätä ye ie ja rabadre ruin kwin konkrekasionte yekäre, ¿ni rabadre dre nuainne?

14. ¿Nitre tä nüke mrä konkrekasionte yebe ni raba ja kete ño?

¹⁴ Ni rabadre ja töi mike kukwe nuainne käne aune ja kete ni madabe. Ñodre, ja mräkätre tä nüke mrä konkrekasionte ye nikwe kadre ngäbiti kä jutobiti (Rom. 15:7). Ni ñaka tö niaratre kai ngäbiti kwin aibe, ñakare aune kä rikadre ta ye bitikäre ni tö ja ketai kwin niaratre ben. Akwa yekäre nire tä nüke mrä konkrekasionte ye nikwe kadre ngäbiti kwin aune ja töi mikadre bökän bätätre. Niaratre tä ja tuin kukwe meden ben ye ni tö mikai nüke gare jai, akwa ni ñaka tö kukwe kia kia kwe ye ngwaintari ietre. Ja ruin ño ja mräkätre ie ye ñaka tä nemen nuäre niaratre ruäre kräke mikakäre gare. Aisete, ni ñaka tö kukwe kwe mikamana gare ja dibiti ietre, ñakare aune nikwe töbikadre käne kukwe ngwantarikäre ietre aune nikwe kukwe nuadre kwin. Ñodre, ñokänti Jehová namani gare ietre ye ni raba ngwentari ie.

15. ¿Ja mräkätre ünä kukwe ja üairebiti raba ja mräkätre mada konkrekasionte dimike ño?

¹⁵ Nitre ünä kukwe ja üairebiti, akwa metrere nitre umbre ji ngwanka konkrekasionte tätre ja töi mike ja mräkätrebätä, ye köböire ja mräkätre konkrekasionte tä nemen bäri dite kukwe ja üairebiti. Melissa, abokän ie meyekwe kukwe metre driebare, tä niere: “Nitre rüne erere ja mräkätre tärä ti dimikakäre yebätä tikwe debe biandre ño ietre ye ñaka tä nemen gare tie. Käre ti töta nemen blitai ngwane ni tärä iti ti kukwe nuakäre”. Ja mräkä bati kädekata Mauricio yebätä ani blite. Dirikä käne kwe namani tibo kukwe ja üairebiti ngwane, ja namani ruin kaibe ie.  Niara tä niere: “Kukwe keteiti käkwe ti dimikaba ye abokän, nitre umbre ji ngwanka nämä ja töi mike bökän tibätä. Nämänentre kä denkä jai blitakäre käre tibe. Nämänentre kukwe driere tibe, perla meden nämä kwen ietre nämä ja tötike ngwane, ye nämäntre niere tie aune nämäntre jadenkä tibe arato”. Melissa aune Mauricio tä sribire köbö täte Jehová kräke.

16, 17. ¿Kukwe meden braibebiti ni raba ja mräkätre ruäre dimike?

¹⁶ Nikwe ni mada dimikadre kukwe braibebiti (Gál. 6:10). Misionero kädekata Leo tä nüne mente mräkätre kwe yebätä, tä niere: “Nita ja di ribere jai ngwane, kukwe chibiti ni dimikadre ye ütiäte krubäte. Bati, ti nämä näin karote ngwane, kukwe tare rababa bare tibätä. Ti rükabata gwi ngwane, ti nämä grükekä krubäte ngrabare, akwa nitre gure käkwe ti nübaiba ja gwirete mröre jabe. Dre bianba kwetre kwetadre tie ye ñan törö tie, akwa ti kukwe nuaba kwetre töi kwinbiti ye täbe törö tie yebätä ja rababata ruinta kwin tie”.

¹⁷ Nita gätäbätä ngwane, ye käta nemen juto krubäte nibätä, metrere nita gätä kri yebätä ngwane, ñobätä ñan aune nita ja mräkätre ben aune kukwe kädrieta yebätä nita blite bentre yebätä. Akwa Carol kädininte käne ye tä dre niere gätä kri yebätä ye ani mike gare jai. Niara tä niere: “Gätä kri ñan tä nemen nuäre ti kräke, ñobätä ñan aune tita nemen ja mräkätre kwati ye ngätäite, akwa yebiti ta jata nemen ruin kaibe krubäte tie, ja mräkätre kwati tä näin mräkätre kwe yebe yebätä”. Nitre ruäre kän muko tä krüte ye bitikäre ñan tä nemen nuäre kräke rikakäre gätä kri yebätä. ¿Ja mräkä meden tä ja tuin kukwe ne kwrere ben ye gare nie? ¿Gätä kri mada yete ni raba nübaire ne kwe tädre gwairebe ni mräkätre yebe?

18. 2 Corintios 6:11-13 tä niere erere, ¿ ni raba ja töi mike ño mantiame ni mada kräke?

¹⁸ Nikwe kä diandrekä jai rabakäre keteitibe ja mräkätre ben. Nita drekwa nuainne yebätä nikwe ja mräkätre nübaidre. Metrere ja mräkätre meden ie ja ruin kaibe ye nübaidre nikwe. Ni tö ja brukwä ‘tökatebata kri’ metrere ja mräkätre ie ja ruin kaibe ye kräke (ñäkädre 2 Corintios 6:11-13 yebätä). * Melissa, kädininte párrafo 15  yekänti, tä kukwe ne ngwen törö jai: “Ja mräkätre nämä nun nübaire basare aune ja gwirete ye käi nämä nemen juto krubäte nunbätä”. ¿Ja mräkätre ruäre tärä konkrekasion nikwe te abokän kräke ni raba ja töi mike mantiame?

19. ¿Köbö medente ni tädre ja mräkätre ken dimikakäre tätre ribere jai?

¹⁹ Köbö ruäre te kä kwatire kwatire te ni tädre ja mräkätre ken dimikakäre ye tätre ribere jai. Ñodre, köbö ruäre käi ngwanta juto jabätä nitrekwe köbö ye näire, ñan tä nemen nuäre ja mräkätre ruäre kräke, mräkätre kwetre ñan kukwebätä yebätä. Köbö ruäre ñan tä nemen nuäre ja mräkätre mada kräke, ñobätä ñan aune köbö yete mräkä kwetre krütani kän yebätä. Nita kä denkä jai ja mräkätre ne kräke ngwane, ni töita bökän bätätre nita bämike (Filip. 2:20).

20. ¿Jata nemen ruin kaibe nie ngwane, kukwe niebare Jesukwe Mateo 12:48-50 ye raba ni dimike ño?

²⁰ Kukwe keta kabrebätä jata nemen ruin kaibe ja mräkätre ie. Akwa ja ruin ño nie ye gare kwin Jehovai, ye nikwe ñaka käi kwitadrekä jabiti. Bäsi käre, Jehovata ni dimike ja mräkätre yebiti nita dre ribere jai ye ngwane (ñäkädre Mateo 12:48-50 yebätä). Ne madakäre, Jehovata ni dimike ja mräkätre konkrekasionte yebiti, yebätä ni tö debe bianbätä Jehovai ye bämikakäre nikwe ja di ngwandre ja mräkätre konkrekasionte dimikakäre arato. Ja raba nemen ruin ño nie ruäre ngwane, akwa yebiti ta ni ñan tä kaibe ñobätä ñan aune Jehová tä käre ni ken ni dimikakäre.