1. Bichi binarhuma abakozi ba Yehova bachiyunva bahugirwe mango maguma?

BANENE mu rhwewe banachiyunva bahugirwe mango maguma. Baguma bakachiyunva ntyo mu kasanzi kageke. Abandi bakachiyunva nka bahugirwe mu kasanzi kanene. Rhwakachiyunva oku rhuli rhwenyine chiro n’amango rhuzungulukirwe n’abantu. Binakomerera baguma okukoomera omu chibaga chihyahya. Abandi bakuliraga omu mulala abantu bazigirene bwenene, aliko banachiyunva bahugirwe bwenene amango bamaja hale n’abantu b’omulala gwabo. N’abandi bali bakumbula changwa bali badula bwenene akasanzi baliri bageza haguma n’omuzigirwa wabo wafire. Na Bakristu baguma, ahanene balala bachili bahyahya omu kuli, banayunva bahugirwe amango bamajahikwa changwa eyi balibuzwa n’abantu b’omulala gwabo barhali Bahamirizi na bera babo bamira.

2. Bibazo bihe rhwashubizako?

² Yehova amenyere buli chintu oku birhulolere. Amango rhuyunvirhe rhuhugirwe, ab’amenyere analonzeze arhurhabale rhuhime eyola hali y’okuchiyunva ntyo. Nka gurhe Yehova anarhurhabala? Bichi nerhu rhwenyine rhwakajira omu kuchirhabala? Na nka gurhe rhwakarhabala abandi omu chibaga cherhu bali bachiyunva bahugirwe? Leka rhulole ebishubizo by’ebyola bibazo.

3. Nka gurhe Yehova aliyerekere Eliya oku amulagireko?

³ Yehova asimire abamuharamya boshi bagwarhe obusime. Ali hofi na buli muguma werhu, anamenya n’amango rhwamachiyunva rhuhwererwe eju y’amawazo m’okuvunika omurhima. (Zb. 145:18, 19) Waza okuntu Yehova alilagirire okuntu omulebi wage Eliya aliri achiyunva n’okuntu amurhabalaga. Oyola mulume mwimana alilamire omu chihe chikomeere ch’engani  ye Izraeli. Abakozi ba Yehova baliri balibuzwa bwenene, n’abanzi bagwerhe emisi banalipingire Mungu balihigirire kuyirha Eliya. (1 Fa. 19:1, 2) N’echindi chakaba eyi chalibabeze Eliya, kwaliri kuchiyunva nka yenyine mulebi oyorhere oli wakolera Yehova. (1 Fa. 19:10) Han’aho Mungu alwira ku Eliya. Yehova arhuma malaika wage ayereke omulebi wage oku arhali yenyine; n’okuhachili Baizraeli banene bayubahire Mungu banali bamukolera!​—1 Fa. 19:5, 18.

4. Nka gurhe olwandiko lwa Marko 10:29, 30 luyerekene okuntu Yehova alagire bwenene ku balala barhachirhabalwa n’abantu b’omulala gwabo changwa bera babo?

⁴ Yehova ayinji oku amango rhwamachishoga kumukolera, byakahema baguma mu rhwewe balekane na bintu binene. Mw’ebyola bintu, mwakaba oburhabale abantu b’omulala gwerhu barhali Bahamirizi baliri barhuhereza na bera berhu bamira. Nkabaga Petro aderhaga n’omulenge g’obonjo, amango abazaga Yesu ntya: “Rhwalekere ebintu byoshi rhwanakukulikire; lero si, bichi rhwajarhwapata?” (Mt. 19:27) Yesu abwira abanafunzi bage n’obushagaluke oku nji bagwarha omulala guzibu-zibu gw’ekiroho. (Osome Marko 10:29, 30.) Na Yehova yewe nka rhwe ly’ogola mulala gw’ekiroho, alaganyize oku arhabala balala boshi bashondere kumukolera. (Zb. 9:10) Hala mahano maguma wakakolesa y’ogwarha oburhabale burhengere emwa Yehova amango oli walwisa ehali y’okuyunva ohugirwe.

5. Nyungu zichi wakapata omu kuwaza okuntu Yehova ali akurhabala?

⁵ Oseze obwenge oku kuntu Yehova ali akurhabala. (Zb. 55:22) Okola kwakurhabala ogenderere kubona oku orhali wenyine. Mwali-werhu muguma oli mulamba oyirikirwe Carol, * oli omu mulala gw’abantu barhali Bahamirizi, aderhere ntya: “Eyi nayibuka n’okukengera bwenene okuntu Yehova antabere amango m’ebibazo, kunantabala kweri imbone oku ntali nyenyine. Kunantabere nchizere oku Yehova nj’arhandekerera omu mango mali embere.”

6. Nka gurhe olwandiko lwa 1 Petro 5:9, 10 luhebere omurhima balala bali bachiyunva bahugirwe?

⁶ Owaze okuntu Yehova ali arhabala bene-berhu na bali-berhu bali bachiyunva bahugirwe.  (Osome 1 Petro 5:9, 10.) Mwene-werhu muguma oyirikirwe Hiroshi, wamamala myaka minene ali yenyine Muhamirizi omu mulala gwabo, aderhere ntya: “Biyorohere okubona oku buli muntu omu chibaga agwerhe ebibazo. Okumenya oku rhweshi rhuli rhwajira okwerhu koshi rhugalire yi rhugenderera kukolera Yehova, kwakarhabala balala bali Bahamirizi omu mulala gwabo bonyine.”

7. Nka gurhe okusalira kwakakurhabala?

⁷ Ogenderere kugwarha eprograme nyinja y’ebintu by’ekiroho. Ebyola bihebere m’okubwira Yehova wazi okuntu oli wachiyunva. (1 Pe. 5:7) Massiel aderhere ntya: “Chiguma omu bintu by’akamaro bwenene chantabalaga ndwise ehali yani y’okuchiyunva mpugirwe, kwaliri kusalira bwenene Yehova.” Ali mwali-werhu muguma ochili musole wayunvaga nk’achikire oku bantu b’omulala gwage amango ahwanza kukolera Yehova. Ashubire derha ntya: “Nambona oku kweri Yehova ali Darha, nayinjaga namusalira buli lusiku, na kanene omu lusiku, omu kumubwira okuntu naliri nachiyunva.”

8. Nka gurhe okusoma Echinwa cha Mungu n’okuchikengerako kwakakurhabala?

⁸ Osome Echinwa cha Mungu oku kahunda, onakengere oku ngani ziyerekene okuntu Yehova akuyerekere obuzigire. Mwali-werhu muguma oyirikirwe Bianca, walembeere ebintu by’okuvuna omurhima abantu b’omulala gwage baliri bamubwira, aderhere ntya: “Okusoma n’okukengera oku ngani z’omu Biblia n’engani z’akalamo k’abakozi ba Yehova bahurene n’ebibazo bili nk’ebyani, kwantabere bwenene.” Bakristu baguma banafarha omu rhwe amandiko mahebere omurhima bwenene nka Zaburi 27:10 na Isaya 41:10. Abandi banabona nk’okuyunviriza e arejistrema y’omwazi gulebe kunabarhabala amango bali bachiyunva bahugirwe, amango bali barheganya embuganano changwa amango bali basoma e Biblia.

9. Nka gurhe okuja oku mbuganano kwakakulerhera enyungu?

⁹ Ochihangane ogende wayinja oku mbuganano oku kahunda. Eyola programe yakuheba omurhima, yanashuba kukurhabala ohikire kumenya bene-benyu na bali-benyu. (Ebr. 10:24, 25) Mwali-werhu Massiel, rhwashambalagako burhanzi, aderhere ntya: “Chiro akaba okunaliri nayunva eshonyi bwenene, nalihigirire okuja ku buli mbuganano y’echibaga n’okuhaana echishubizo. Okola kwantabala nchiyunve oku nani inandi w’omu chibaga.”

10. Bulagurhe kuli kw’akamaro rhujire obwira n’Abakristu bimana?

¹⁰ Ojire obwira haguma n’Abakristu bimana. Olonze abera omu chibaga wakayiganya, bakaba bakulu changwa badorho ku woyo changwa barhalembwaga kuguma nawe. Ebiblia erhuyibwise oku “obwengehe buba ahakagarhi k’abashaja.”  (Yob. 12:12) Abashaja nabo bakayiga binene oku bimana bachili basole nabo. Daudi aliri mudorho bwenene kulusha Yonatani, aliko echola chirhababuzaga barhaba bera b’oku murhima. (1 Sa. 18:1) Daudi na Yonatani baliri barhabalana buli muguma n’owindi chiro akaba balihurene n’ebibazo bikomere. (1 Sa. 23:16-18) Mwali-werhu muguma oyirikirwe Irina oli yenyine Muhamirizi omu mulala gwabo, aderhere ntya: “Bene-berhu na bali-berhu bakaba kweri bazere berhu b’ekiroho changwa basheja-berhu na bali-berhu b’ekiroho. Yehova akabakolesa babe mulala rhukenere.”

11. Bichi okwanene kujira y’ogwarha obwira bukomere haguma n’abandi?

¹¹ Hali oku byakakukomerera okugwarha abera bahyahya, ahanene akaba oba muntu w’eshonyi. Mwali-werhu muguma oyirikirwe Ratna, onayunva eshonyi wayigaga okuli chiro akaba baliri bamupinga, aderhere ntya: “Nalirhegerere oku nalikenere oburhabale bwa bene-berhu na bali-berhu b’omu chibaga.” Byakakukomerera okubwira owindi muntu okuntu oli wachiyunva, aliko enganiro eli nk’eyola yerhuma obwira bwakomera. Bera bawe balonzeze okukuheba omurhima n’okukurhabala, aliko bihemere obahereze enafasi bamenye okuntu bakajira ntyo.

12. Nka gurhe akasi k’okuhubiri kanarhurhabala rhugwarhe abera benja?

¹² Nguma omu njira zinja bwenene z’okugwarha abera, kuli kuja omu mahubiri haguma n’aberhu Bakristu. Mwali-werhu Carol rhwashambalagako burhanzi, aderhere ntya: “Nagwarhire bera banene benja omu kugeza bisanzi binene haguma na bali-berhu omu mahubiri n’omu mandi makasi m’echiteokrasi. Yehova antabere mu myaka minene kugerera abola bera.” Okujira obwira n’Abakristu bimana kunalerha migisho minene. Yehova anakolesa abera bali nk’abola omu kukurhabala ohime ehali y’okuvunika omurhima, omufano nk’amango ohugirwe.​—Mez. 17:17.

13. Kasi kachi rhweshi rhugwerhe omu chibaga?

¹³ Rhweshi rhugwerhe akasi k’okurhabala y’omu chibaga haba hantu hali obuzigire n’omurhula, aha nta muntu akava achiyunva ahugirwe loshi. (Yoh. 13:35) Ebirhunajira n’okuderha byakarhabala abandi bwenene! Yunva ebi mwali-werhu muguma aderhaga: “Amango nayigaga okuli, echibaga chaba mulala gwani. Ntakagalire kuba Muhamirizi wa Yehova buzira burhabale bwabo.” Bichi wakajira y’orhabala balala bali bonyine Bahamirizi omu mulala gwabo bachiyunve oku echibaga guli mulala gwabo?

14. Bichi rhwakajira yi rhugwarha obwira n’abahyahya?

¹⁴ Ochihangane okujira obwira n’abahyahya. Rhwakarhondera kujira ntyo omu kuyegereza abahyahya n’obushagaluke omu chibaga. (Ro. 15:7) Aliko, bihemere rhujire binene olekere okubalamusa n’obushagaluke konyine. Rhulonzeze okujira nabo obwira bukomere okw’esiku yizanagenda. Bobola obe mwinja onayerekane oku kweri olagire kw’abola bantu. Buzira kuchiheba omu birhakulolere, ochihangane omenye bibazo bihe bali bahurana nabyo. Byakakomerera baguma okuderha okuntu bali bachiyunva, bobola omenye wabahidika baderhe. Aliko oku bwirhonzi, obabaze ebibazo by’obwengehe onayunvirize ebishubizo byabo omu kubalembera. Omufano, wakababaza nka gurhe bamenyaga okuli.

15. Nka gurhe Abakristu bakulire ekiroho banarhabala abandi omu chibaga?

¹⁵ Boshi omu chibaga bakakomeza obwemere bwabo, amango Abakristu bakulire ekiroho, ahanene abashamuka, bamayerekana oku babalagireko. Mwali-werhu Melissa walembwaga na nyina omu kuli, aderhere ntya: “Ntakapata ebinwa by’okuderha okuntu nsimire bwenene bene-berhu baliri bachihaana, baliri babonekana nka badarha omu kugeza ebisanzi haguma nani n’okunyereka oku bandagireko  mu myaka minene. Amango moshi naliri nasima nshambale, haliri omuntu w’okunyunviriza.” Mauricio, mwene-werhu ochili musole wachiyunvaga nk’ajahikirwe amango mwalimu wage we Biblia alekaga okuli, aderhere ntya: “Okuntu abashamuka baliri bandagako, kwalintabere bwenene. Baliri bashambala nani buli mango. Rhwaliri rhwahubiri nabo, banambwira oku buhirhi babwene omu funzo lyabo-lyabo lye Biblia na chiro rhwaliri rhwasharha nabo.” Melissa na Mauricio baluha bahwanza akasi k’amango moshi.

16-17. Bichi bindi rhwakajira omu kurhabala abandi?

¹⁶ Obahe oburhabale bakenere. (Gal. 6:10) Mwene-werhu Leo oli wakola akasi k’obumisyonere omu chindi chihugo hale n’omulala gwage, aderhere ntya: “Rhweshi rhunazigana kuba rhukenere echijiro ch’obwinja omu kasanzi kakwanene. Namayibuka lusiku luguma napataga e aksida y’omutugari. Nayinja hik’eka. Naliyunvirhe buba bunene. Aliko mulume muguma na mukage bampamagala rhujisangira akalyo. Ntachiyibukire ebi rhwalyaga, aliko nyibukire okuntu banyunvirizaga bwinja. Oku buzinda bw’eyola nganiro, nayunva ntulerere loshi!”

¹⁷ Rhweshi rhunasiimira ebihe by’echiteokrasi, nk’embuganano zikulu, bulala rhunapata ebisanzi by’okugeza haguma n’abandi, eyirhuli rhwashambala oku programe haguma nabo. Aliko, Carol, ashubire kuderha ntya: “Nanchiyunva mpugirwe bwenene kw’ezola mbuganano zikulu.” Bulagurhe? Aderhere ntya: “Chiro akaba nzungulukirwe n’amagana chiro n’ebihumbi bya bene-berhu na bali-berhu, banazigana kuba eyi bali eburhambi bw’emilala yabo. Amango namababona, nanayunva mpugirwe bwenene.” Abandi banabona oku bibakomerere okuja oku mbuganano nkulu ntanzi enyuma y’okuheza eba changwa mukage. Ka hali omuntu omenyere oli wahurana n’ebibazo bili nk’ebyola? Kwakaba kwinja omuhamagale asiimire haguma nawe echihe chayinjire ch’echiteokrasi haguma n’omulala gwawe.

18. Nka gurhe rhwakakolesa 2 Wakorinto 6:11-13 amango rhwamabwira omuntu arhulambagirire?

¹⁸ Ogeze ebisanzi haguma n’abandi. Ochihangane kugeza ebisanzi haguma na bene-berhu na bali-berhu, ahanene balala bali bachiyunva bahugirwe. Rhulonzeze “rhufungule emirhima [yerhu] mwangale,” ahanene kw’abola bantu. (Osome 2 Wakorinto 6:11-13.) Mwali-werhu  Melissa rhwashambalagako burhanzi aderhere ntya: “Buli mango rhwaliri rhwasima bwenene amango bene-berhu na bali-berhu bakazaga kurhuhamagala rhugeze akasanzi haguma nabo ahamwababo changwa kuja chilambagiza haguma nabo. Ka hali omuntu omu chibaga chawe obwene wakahamagala akulambagirire?

19. Mango mahe okugeza ebisanzi n’aberhu Bakristu kwakabarhabala bwenene?

¹⁹ Hakagera akasanzi aberhu Bakristu bakasima bwenene rhugeze ebisanzi haguma nabo. Byakakomerera baguma okuba haguma n’abantu b’omu mulala gwabo barhali Bahamirizi ba Yehova amango bali bajira esiku zabo zikulu. Abandi bakachiyunva kubi bwenene mu siku ziguma, nk’olusiku omuzigirwa wabo afagamo. Amango rhwamabwira bene-berhu na bali-berhu bali bahurana ebibazo bili nk’ebyola bageze akasanzi haguma nerhu, rhwanabayereka oku “rhubalagireko loshi.”​—Flp. 2:20.

20. Gurhe ebinwa bili omu Matayo 12:48-50 byakarhurhabala amango rhuli rhwayunva rhuhugirwe?

²⁰ Hali mpavu zinene zakarhuma Omukristu achiyunva mango maguma ahugirwe. Aliko rhumenye rhwayibirira chiro n’akatyu oku Yehova amenyere bwinja okuntu rhuli rhwachiyunva. Anarhuhereza ebirhukenere, ahanene kugerera aberhu Bakristu. (Osome Matayo 12:48-50.) Nerhu, rhunayereka Yehova oku rhusimire n’omupango gwage g’obuzigire amango rhwamajira okwerhu koshi yi rhurhabala bene-berhu na bali-berhu. Rhube rhuli rhwachiyunva gurhe mango maguma, rhurhali rhwenyine chiro n’akatyu, bulala Yehova ali hofi nerhu buli mango!