1. Dahaka dainai Iehova ena hesiai taudia be nega haida sibona idia noho dainai idia lalohisihisi?

NEGA haida ita mamia ita be sibona ita noho dainai ita lalohisihisi. Haida be nega daudau lalonai unai bamona idia mamia, to haida be nega kwadogina lalonai unai idia mamia. Ena be taunimanima momo huanai ita noho, to sibona ita noho ena lalohisihisi ita mamia diba. Haida be idia mamia kongrigeisen matamata ai turadia idia davaria be auka. Haida be hanaihanai edia famili ida idia noho, to gabu daudau idia lao neganai, sibona idia noho dainai idia lalohisihisi. To ma haida be edia lalokau tauna ia mase dainai, ia idia reaia. Bona Keristani taudia haida be hereva momokani idia dibaia neganai, edia famili bona turadia ese idia dadaraia eiava dagedage henia dainai, sibona idia noho ena lalohisihisi idia mamia.

2. Dahaka henanadai do ita haerelaia?

² Iehova be ita ia diba namonamo bona iseda hemami ia lalopararalaia. Sibona ita noho dainai ita lalohisihisi neganai, Iehova be unai ia diba bona ia ura ita ia durua. Edena dala ai Iehova ese ita ia durua diba? Dahaka ita karaia unai lalohisihisi ita hanaia totona? Bona edena dala ai kongrigeisen ai unai bamona idia lalohisihisi taudia ita durua diba? Mani unai henanadai edia haere ita tahua.

3. Edena dala ai Iehova be Elia ia laloa bada?

³ Iehova ia ura ia idia tomadiho henia taudia ibounai idia moale. Ia be ita ta ta kahirakahira ia noho, bona ita lalohisihisi  eiava lalomanoka neganai, unai ia itaia. (Sal. 145:18, 19) Iehova ese peroveta tauna Elia ena hemami ia laloa bona ia durua dalana mani oi laloa. Israela ai unai abidadama tauna be nega aukana ta lalonai ia noho. Unai nega ai, siahu bada taudia ese Iehova ena hesiai taudia idia dagedage henia bona idia ura Elia idia hamasea. (1 Ki. 19:1, 2) Danu, Elia ia laloa ia sibona be Iehova ia hesiai henia peroveta tauna, unai dainai ia lalomanoka momokani. (1 Ki. 19:10) To, Dirava be karaharaga Elia ia durua. Iehova ese aneru ta ia siaia bona peroveta tauna ia hamaoroa ia be sibona ia noho lasi, to Dirava idia gari henia Israela taudia ma haida idia noho danu.​—1 Ki. 19:5, 18.

4. Mareko 10:29, 30 ese edena dala ai ia hahedinaraia Iehova be varavara o turadia edia heduru idia abia lasi taudia ia laloa bada?

⁴ Iehova ia diba abia hidi ita karaia ia do ita hesiai henia neganai, gau momo do ita rakatania. Hegeregere, iseda murimuri varavara bona tura gunadia edia heduru ita noia lasi. Reana aposetolo Petero be ia lalohekwarahi dainai Iesu ia nanadaia: “Ai be gau ibounai ai rakatania bona oi murinai ai raka, vadaeni dahaka do ai abia?” (Mat. 19:27) Iesu be ena hahediba taudia ia hamaoroa kongrigeisen taudia be edia famili bamona ai do idia lao. (Mareko 10:29, 30 duahia.) Bona iseda Guba Tamana, Iehova, ia gwauhamata Ia idia hesiai henia taudia do ia durua. (Sal. 9:10) Sibona ita noho dainai ita lalohisihisi neganai, dahaka ita karaia diba Iehova ena heduru ita abia totona?

5. Dahaka dainai Iehova ese oi ia durua dalana oi laloa be namo?

⁵ Iehova ese oi ia durua dalana oi laloa. (Sal. 55:22) Unai ese oi do ia durua lalohadai maorona oi abia totona. Iena famili be Witnes lasi, singul taihu ta ladana Carol, * ia gwau: “Iehova ese nega aukadia ai lau ia durua dalana lau laloa neganai, lau mamia Ia be lau ida ia noho. Bona lau diba momokani, Iehova be hanaihanai lau do ia durua.”

6. Edena dala ai 1 Petero 5:9, 10 ese edia famili be Witnes lasi taudia ia hagoadaia?

 ⁶ Iehova ese sibona idia noho dainai idia lalohisihisi taudia ia durua dalana oi laloa. (1 Petero 5:9, 10 duahia.) Lagani momo lalonai iena famili be Witnes lasi tadikaka ta ladana Hiroshi, ia gwau: “Kongrigeisen lalonai ibounai be mai edia hekwakwanai. Ai haida emai famili be orea lalonai lasi, to ai itaia ibounai be idia gaukara goada Iehova idia hesiai henia noho totona, unai ese ai ia hagoadaia bada.”

7. Edena dala ai guriguri karana ese oi ia durua?

⁷ Hanaihanai oi guriguri, Baibel oi duahia, bona hebou oi lao. Namona be Iehova dekenai emu hemami ibounai oi gwauraia hedinarai. (1 Pet. 5:7) Matamata taihu ta, Masela be Iehova ia hesiai henia neganai, ia lalohisihisi badina ena famili ibounai be Witnes lasi taudia. Ia gwau: “Iehova guriguri henia goadagoada karana ese lau ia durua, unai lalohisihisi lau hanaia totona. Ia be egu Tamana korikorina, dina ibounai lalonai nega momo ia lau guriguri henia, bona egu hemami lau gwauraia hedinarai.”

8. Edena dala ai Baibel duahia bona laloa dobu karana ese oi ia durua?

⁸ Baibel oi duahia hanaihanai bona oi duahia gaudia oi laloa dobu, unai amo oi abia dae momokani Iehova be oi ia lalokau henia. Taihu ta ladana Bianka be iena famili ese ena lalona idia hahisia herevadia idia gwauraia. Ia gwau: “Baibel lalonai idia noho sivarai bona hari idia noho tadikaka taihu edia mauri sivaraidia lau duahia bona laloa dobu karana ese lau ia durua bada.” Keristani taudia haida be hagoadaia siridia, hegeregere Salamo 27:10 bona Isaia 41:10 idia laloatao. Haida be edia hebou idia hegaegaelaia eiava Baibel duahiduahi karaia totona rekodia gaudia idia kamonai, bona idia gwau unai ese idia ia durua sibona idia noho ena lalohisihisi idia haheaukalaia totona.

9. Edena dala ai hebou lao henia karana ese oi ia durua?

⁹ Oi hekwarahi hanaihanai hebou ibounai oi lao totona. Hebou ai oi kamonai gaudia ese oi do ia hagoadaia, bona danu tadikaka taihu do oi diba namonamo. (Heb. 10:24, 25) Matamanai ita herevalaia taihu Masela, ia gwau: “Ena be lau be hemarai kekenina, to egu lalona lau hadaia hebou ibounai do lau lao bona lau haere totona. Unai ese lau ia durua tadikaka taihu lau manada totona.”

10. Dahaka dainai idia goada Keristani taudia oi tura henia be mai anina bada?

¹⁰ Idia goada Keristani taudia oi tura henia. Kongrigeisen lalonai buruka, matamata  o idau tano taudia oi tura henidia be namo, idia amo gau momo do oi dibaia. Baibel ia gwau, “burukadia dekenai aonega ia noho.” (Iobu 12:12) Buruka taudia danu be matamata taudia amo gau momo idia dibaia diba. Hegeregere, Davida be matamata bona Ionatana ena mauri lagani be bada, to unai ese idia ia koua lasi tura namodia ai idia lao totona. (1 Sam. 18:1) Bona ena be hekwakwanai idia davaria, to ta ta idia durua Iehova idia hesiai henia totona. (1 Sam. 23:16-18) Taihu ta ladana Irina ena famili be Witnes lasi taudia, ia gwau: “Iseda tadikaka taihu be iseda tamana, sinana, kakana, eiava tadina bamona. Iehova ese idia ia gaukaralaia diba ita idia durua totona.”

11. Dahaka ita karaia be namo ma haida tura henia karana ita hagoadaia totona?

¹¹ Bema oi be hemarai momo tauna, tura matamatadia oi davaria be auka. Taihu ta ladana Ratna be hemarai momo kekenina, bona ena be haida ese idia dagedage henia to hereva momokani ia abia dae, ia gwau: “Lau laloparara kongrigeisen lalonai tadikaka taihu edia heduru lau abia be namo.” Ma ta dekenai emu hemami oi gwauraia hedinarai be auka, to bema oi herevalaia, ia be emu turana namona ai ia lao diba. Emu turadia idia ura oi idia durua, to namona be idia dekenai emu lalohekwarahi oi gwauraia hedinarai.

12. Edena dala ai haroro gaukara ese oi ia durua tura namodia oi davaria totona?

¹² Tadikaka taihu ida ita haroro hebou neganai, tura namodia ai idia lao diba. Matamanai ita herevalaia taihu Carol, ia gwau: “Haroro bona tiokratik gaukara ma haida ai taihu lau bamodia neganai, tura namodia momo lau davaria. Lagani momo lalonai unai turadia amo Iehova ese lau ia durua.” Idia goada Keristani taudia ita tura henia neganai, namo do ita davaria. Iehova ese unai bamona turadia ia gaukaralaia, ita idia durua sibona ita noho ena lalohisihisi ita hanaia totona.​—Aon. 17:17.

13. Dahaka dainai kongrigeisen taudia idia gaukara hebou be namo?

¹³ Kongrigeisen lalonai ibounai ita gaukara hebou neganai, lalokau bona maino do ia noho bona ta be sibona ia noho ena lalohisihisi do ia mamia lasi. (Ioa. 13:35) Ita karaia bona herevalaia gaudia ese ma haida do ia hagoadaia bada! Taihu ta ia gwau: “Hereva momokani lau dibaia neganai, kongrigeisen taudia be egu famili ai idia lao. Tadikaka taihu edia heduru dainai, lau be Iehova ena Witnes ta ai lau lao.” Tadikaka taihu haida edia famili ibounai be Witnes lasi taudia, unai dainai dahaka oi karaia diba idia oi durua totona?

14. Dahaka oi karaia diba ma haida oi tura henia totona?

¹⁴ Ma haida oi tura henia. Bema haida be nega ginigunana hebou dekenai idia mai, namona be idia ita welkam henia. (Roma 15:7) Idia dekenai hanamoa hereva sibona ita gwauraia lasi, to ita ura idia ida eda hetura karana ita hagoadaia noho. Namo lasi idia hahemaraia henanadai ita henia, to namona be edia mauri ai ia vara gauna ita lalopararalaia. Haida be edia hemami idia gwauraia be auka, unai dainai namo lasi ita henanadai momo. To, edia lalohadai ita diba totona mai hemataurai ida ita henanadai bona edia haere ita kamonai namonamo. Hegeregere oi nanadaia, “Edena bamona hereva momokani oi abia?”

15. Edena dala ai lo Keristani taudia ese ma haida idia durua diba?

¹⁵ Lo Keristani taudia, hegeregere elda  taudia ese kongrigeisen taudia idia laloa bada neganai, unai ese edia abidadama do ia hagoadaia. Taihu ta ladana Melisa be ena sinana ese ia durua hereva momokani ia diba totona, ia gwau: “Lau moale bada badina tadikaka haida be egu tamana bamona, lau totona nega idia atoa bona egu hekwakwanai lau herevalaia neganai, idia kamonai namonamo.” Tadikaka matamata ladana Moris ena stadi naria tauna ia manoka neganai, ia mamia ia be sibona dainai ia lalohisihisi. Ia gwau: “Elda taudia ese lau idia laloa bada, bona unai ese lau ia durua. Nega ibounai lau idia hereva henia. Haroro gaukara ai lau idia bamoa, sibona edia stadi amo idia davaria gaudia be lau dekenai idia herevalaia, bona moale karadia ai karaia hebou.” Hari, Melisa bona Moris be ful-taim hesiai gaukara idia karaia noho.

16-17. Dahaka ita karaia diba ma haida ita durua totona?

¹⁶ Dala idauidau ai heduru ita henia. (Gal. 6:10) Tano ma ta ai misinari gaukara ia karaia tadikaka ta ladana Leo, ia gwau: “Nega maorona ai kara namona oi hahedinaraia be mai ena namo. Motuka aksiden lau davaria negana lau laloatao. Ruma dekenai lau ginidae neganai, lau lalohisihisi bada. To headava tau bona hahine ta ese lau idia boiria idia ida lau aniani totona. Ai ania gaudia lau laloatao lasi, to egu hereva idia kamonai namonamo karana lau laloatao. Unai ese lau ia hagoadaia bada!”

¹⁷ Hebou maragidia bona badadia ita moalelaia, badina unuseniai ita kamonai tok namodia be iseda tadikaka taihu ida ita herevalaia hebou. To, matamanai ita herevalaia taihu Carol, ia gwau: “Hebouhebou negadiai, lau mamia lau be sibona lau noho bamona.” Dahaka dainai? Ia gwau: “Ena be hebouhebou ai tadikaka taihu momo herea idia noho, to nega momo idia be edia famili ida idia helai. Idia lau itaia neganai, lau lalohisihisi.” Haida be edia adavana idia mase murinai, hebouhebou badadia dekenai idia sibona idia lao be auka. Unai bamona hekwakwanai ia davaria tadikaka o taihu ta oi diba, a? Reana hebouhebou ma ta dekenai ia oi boiria diba, oi bona emu famili ida ia helai totona.

18. Edena dala ai heabidae karana dekenai 2 Korinto 6:11-13 ita badinaia diba?

 ¹⁸ Ma haida oi boiria. Moale karadia oi karaia neganai, sibona idia noho dainai idia lalohisihisi tadikaka eiava taihu oi boiria diba. Ita ura unai bamona taudia dekenai iseda ‘lalokau ita habadaia.’ (2 Korinto 6:11-13 duahia.) Matamanai ita herevalaia taihu Melisa, ia gwau: “Tadikaka taihu ese ai idia boiria edia ruma ai lao eiava idia ida gabu ta ai loaloa karana ai moalelaia bada.” Emu kongrigeisen lalonai ta dekenai heabidae karana oi hahedinaraia diba, a?

19. Edena negadia ai tadikaka taihu ita bamoa karana ese idia do ia durua bada?

¹⁹ Nega haida iseda tadikaka taihu do idia ura ita idia bamoa. Badina unai negadiai edia Witnes lasi varavara be tanobada ena dina badadia idia moalelaia. Eiava haida be edia lalokau tauna ena mase dinana idia laloatao neganai, idia lalohisihisi bada. Unai bamona hekwakwanai idia davaria tadikaka taihu ita boiria neganai, ita hahedinaraia ita ura idia ita “durua momokani.”​—Fil. 2:20.

20. Sibona ita noho dainai ita lalohisihisi neganai, edena dala ai Mataio 12:48-50 ese ita ia durua diba?

²⁰ Keristani taudia haida be badina idauidau dainai sibona idia noho ena lalohisihisi idia mamia. To, namona be ita laloatao Iehova be unai lalohisihisi ia diba. Nega momo Dirava ese iseda tadikaka taihu ia gaukaralaia ita idia durua totona. (Mataio 12:48-50 duahia.) Ita danu, iseda tadikaka taihu ita durua neganai, Iehova dekenai ita hahedinaraia iseda kongrigeisen ita laloa bada. Herevana nega haida ita lalohisihisi, to ita be sibona ita noho lasi, badina Iehova be hanaihanai ita ida ia noho!