1. Apay a mabalin a naliday no dadduma dagiti adipen ni Jehova?

ADDA dagiti tiempo a naliday ti kaaduan kadatayo. Para iti dadduma, nalaka laeng a lumabas dayta. Adda met dagidiay agbayag ti kinalidayda. Mabalin a nalidaytayo uray no adu ti kakaduatayo. Marigatan met ti dadduma a makigayyem iti baro a kongregasionda. Adda met dagiti naggapu iti nasinged a pamilia, isu a nalidayda no mayadayoda kadagiti kabagianda. Adda dagiti mailiw unay iti natayen nga ipatpategda iti biag. Ken dadduma a Kristiano, nangruna dagidiay baro pay iti kinapudno, mariknada nga agmaymaysada no laksiden wenno busoren ida dagiti saan a Saksi a kapamiliada ken dati a gagayyemda.

2. Ania dagiti saludsod a sungbatantayo?

² Ammo ken maawatan ni Jehova ti amin maipapan kadatayo. Ammona no nalidaytayo, ken kayatnatayo a tulongan tapno maibturantayo dayta a rikna. Kasanonatayo a tulongan ni Jehova? Ania ti aramidentayo tapno matulongantayo ti bagitayo? Ken kasanotayo a matulongan ti dadduma iti kongregasion a malidlidayan? Usigentayo dagiti sungbat kadagitoy a saludsod.

3. Kasano nga impakita ni Jehova a maseknan ken Elias?

³ Interesado unay ni Jehova iti pagimbagan ti amin nga agdaydayaw kenkuana. Asideg iti tunggal maysa kadatayo, ken makitkitana no naliday wenno maup-upaytayo. (Sal. 145:18, 19) Usigentayo ti pannakaseknan ni Jehova ken propeta Elias. Dayta a matalek a lalaki ket nagbiag iti narigat a tiempo  iti pakasaritaan ti Israel. Nagkaro idi ti pannakaidadanes dagiti agdaydayaw ken Jehova, ket ni Elias ti kangrunaan a puntiria dagiti agtuturay a bumusbusor iti Dios. (1 Ar. 19:1, 2) Mabalin met a naupay ni Elias ta impagarupna nga isu laengen ti nabati a propeta nga agserserbi ken Jehova. (1 Ar. 19:10) Dagus a tinulongan ti Dios. Nangibaon ni Jehova iti anghel a mangipasigurado iti propetana a saan nga agmaymaysa—nga adu pay ti Israelita a managbuteng iti Dios!—1 Ar. 19:5, 18.

4. Kasano nga ipakita ti Marcos 10:29, 30 a maseknan ni Jehova kadagiti adipenna a saan a supsuportaran ti pamilia wenno gagayyemda?

⁴ Ammo ni Jehova nga adu ti insakripisio ti dadduma kadatayo idi nagdesisiontayo nga agserbi kenkuana. Adda dagiti saan a supsuportaran dagiti saan a Saksi a kapamiliada ken dati a gagayyemda. Mabalin a madandanagan ni apostol Pedro idi insaludsodna ken Jesus: “Pinanawanmi ti amin a banag ket sinurotdaka; anianto ngarud ti magunggonami?” (Mat. 19:27) Siaasi nga impasigurado ni Jesus kadagiti adalanna nga agbalinda a paset ti nagdakkel a naespirituan a pamilia. (Basaen ti Marcos 10:29, 30.) Inkari met ni Jehova, ti Ulo ti naespirituan a pamiliatayo, a tulonganna dagidiay mayat nga agserbi kenkuana. (Sal. 9:10) Usigentayo ti dadduma a mabalinmo nga aramiden tapno matulongannaka ni Jehova no lablabanam ti kinalidaymo.

5. Ania dagiti pagsayaatanna no panunotem no kasano a tultulongannaka ni Jehova?

⁵ Panunotem no kasano a tultulongannaka ni Jehova. (Sal. 55:22) Dayta ti makatulong tapno agtalinaed a balanse ti panangmatmatmo iti situasionmo. Kinuna ti balasang a ni Carol, * nga agmaymaysa a Saksi iti pamiliana: “No lagipek ken panunotek no kasano a tinulongannak ni Jehova kadagiti nakasuotak, talaga a mariknak a saanak nga agmaymaysa. Dayta met ti mangipasigurado kaniak a tulongannakto ni Jehova.”

6. Kasano a maparegta ti 1 Pedro 5:9, 10 dagidiay malidlidayan?

⁶ Panunotem no kasano a tultulongan ni Jehova dagiti malidliday a kapammatiam. (Basaen ti 1 Pedro 5:9, 10.) Imbaga ni Hiroshi,  nga adu a tawenen nga agmaymaysa a Saksi iti pamiliana: “Iti kongregasion, nalaka a makita nga awan kadatayo ti perpekto ti kasasaadna. Ngem ar-aramidenda ti amin a kabaelanda nga agserbi ken Jehova. Gapu iti dayta, maparparegta dagiti kas kadakami nga agmaymaysa a Saksi iti pamiliami.”

7. Kasano a makatulong kenka ti kararag?

⁷ Itultuloymo ti nasayaat a naespirituan a rutina. Karaman iti daytoy ti panangibagam ken Jehova iti amin a marikriknam. (1 Ped. 5:7) “Ti napasnek a panagkararagko ken Jehova ti maysa kadagiti kapatgan a banag a nakatulong kaniak a mangibtur iti kinalidayko,” imbaga ni Massiel. Idi inkeddeng daytoy nga agtutubo ti agserbi ken Jehova, nalidayan gapu ta saan a kayat ti pamiliana ti desisionna. “Isu ket pudpudno nga Ama kaniak. Inaldaw nga agkarkararagak, mamin-adu iti agmalem, ket ibagbagak kenkuana no ania ti marikriknak.”

8. Kasano a makatulong kenka ti panagbasa ken panangutob iti Sao ti Dios?

⁸ Regular a basaem ti Sao ti Dios ken utobem dagiti salaysay a mangpaneknek nga ay-ayatennaka ni Jehova. Kinuna ni Bianca, a nangibtur kadagiti makapaupay nga ibagbaga kenkuana ti pamiliana: “Talaga a nakatulong kaniak ti panagbasa ken panangutob kadagiti salaysay ti Biblia ken iti kapadasan dagiti adipen ni Jehova a naipasango kadagiti situasion nga umasping kadagiti nakaipasanguak.” Ikabesa ti dadduma a Kristiano dagiti teksto a talaga a makaliwliwa, kas iti Salmo 27:10 ken Isaias 41:10. Adda met dagidiay dumngeg iti audio recording dagiti maadal nga artikulo tapno maksayan ti lidayda nga agmaymaysada no agsagsaganada para iti gimong wenno no agbasbasada iti Biblia.

9. Kasano a makatulong kenka ti pannakigimong?

⁹ Ikagumaam ti regular a makigimong. Magunggonaanka kadagiti makaparegta a programa, ken ad-adda a maam-ammom dagiti kapammatiam. (Heb. 10:24, 25) Imbaga ni Massiel, a nadakamat itay: “Managbabainak unay ngem ikagkagumaak nga atenderan ti amin a gimong ken agkomento. Isu a mariknak a pasetak ti kongregasion.”

10. Apay a napateg ti pannakigayyem kadagiti matalek a Kristiano?

¹⁰ Makigayyem kadagiti matalek a Kristiano. Makigayyemka kadagiti kakabsat iti kongregasion nga adda ti masursurom kadakuada, uray dagidiay saanmo a kaedad wenno kapada ti kulturana. Ipalagip kadatayo ti Biblia nga “adda kinasirib kadagiti lallakayen.” (Job 12:12) Adu met ti masursuro dagiti natataengan kadagiti matalek nga agtutubo. Ub-ubing nga amang ni David ngem ni Jonatan  ngem saan a dayta ti nanglapped kadakuada nga agbalin a nasinged nga aggayyem. (1 Sam. 18:1) Nagtinnulong da David ken Jonatan nga agserbi ken Jehova iti laksid dagiti narigat a kasasaad. (1 Sam. 23:16-18) “Talaga a dagiti kapammatiantayo ti agbalin a naespirituan a nagannak wenno kakabsattayo,” imbaga ni Irina, nga agmaymaysa a Saksi iti pamiliana. “Mabalin nga usaren ida ni Jehova a mangpennek iti kasapulantayo.”

11. Ania ti masapul nga aramidem tapno maaddaanka iti nasinged a gagayyem?

¹¹ Narigat ti makigayyem nangruna no managbabainka. Inamin ti managbabain a ni Ratna, a naammuanna ti kinapudno iti laksid ti ibubusor: “Nabigbigko a kasapulak ti tulong ken suporta ti naespirituan a pamiliak.” Mabalin a marigatanka a mangibaga iti sabali ti marikriknam, ngem dayta ti pundasion ti nasinged a panaggayyem. Kayatdaka a paregtaen ken suportaran dagiti gagayyemmo, ngem masapul nga ibagam kadakuada no kasanodaka a matulongan.

12. Kasano a makatulong ti ministerio tapno maaddaanka iti nasayaat a gagayyem?

¹² Ti maysa kadagiti kasayaatan a pamay-an tapno maaddaanka iti gagayyem ket ti pannakiramanmo iti ministerio a kaduam dagiti padam a Kristiano. Imbaga ni Carol, a nadakamat itay: “Naaddaanak iti adu a nasayaat a gagayyem ta makikadkaduaak kadagiti kakabsat a babbai iti ministerio ken iti dadduma pay a nateokratikuan nga aktibidad. Tinulongannak ni Jehova iti naglabas a tawtawen babaen kadagitoy a gagayyemko.” Kanayon a pagsayaatantayo ti pannakigayyem kadagiti matalek a Kristiano. Us-usaren ni Jehova dagita a gagayyem tapno malabanam dagiti makapaupay a rikrikna, kas iti kinaliday.—Prov. 17:17.

13. Ania ti responsabilidad ti amin iti kongregasion?

¹³ Responsabilidad ti amin ti tumulong tapno agbalin a nadungngo ken natalna ti kongregasion ket awan ti makarikna nga agmaymaysa isuna. (Juan 13:35) Dakkel ti maitulong ti aramiden ken ibagatayo! Kitaenyo ti imbaga ti maysa a kabsat a babai: “Idi naammuak ti kinapudno, nagbalin a pamiliak ti kongregasion. Diak koma nagbalin a Saksi ni Jehova no saan a gapu iti tulongda.” Ania ti mabalinmo nga aramiden tapno maipariknam kadagidiay agmaymaysa a Saksi iti pamiliada a pasetda ti kongregasion?

14. Ania ti mabalinmo nga aramiden tapno magayyemmo dagiti kabbaro?

¹⁴ Gayyemem dagiti kabbaro. Mairugitayo dayta babaen ti naimpusuan a panangabrasa kadagiti kabbaro iti kongregasion. (Roma 15:7) Ngem ditay kayat a basta kablaawan laeng ida. Kayattayo ti agbalin a nasinged a gayyemda inton agangay. Isu a masapul nga addaantayo iti naimpusuan nga interes kadagiti kabbaro. Ikagumaam a tarusan ti kasasaadda ngem dika agusar kadagiti personal unay a saludsod. Mabalin a marigatan ti dadduma a mangyebkas iti marikriknada isu a dimo piliten ida nga agsao. Am-ammuem ngarud ida babaen kadagiti nataktika a saludsod ken siaanus a denggem ti sungbatda. Kas pagarigan, mabalinmo a damagen no kasanoda a naammuan ti kinapudno.

15. Kasano a matulongan dagiti nataengan iti naespirituan a Kristiano ti dadduma iti kongregasion?

¹⁵ Rumang-ay ti espiritualidad ti intero a kongregasion no ipakitatayo ti interes iti maysa ken maysa, nangruna no aramiden dayta dagiti panglakayen ken uray dagiti Kristiano a nataengan iti naespirituan. Imbaga ni Melissa, a pinadakkel ni nanangna  iti kinapudno: “Agyamanak unay kadagiti kakabsat a lallaki a nagbalin a naespirituan a pannakaamak iti adu a tawen. No kasapulak idi ti kasarita, kanayon nga addada.” Inyestoria ti agtutubo a ni Mauricio, a nariknana a nabaybay-an idi nagbalin a di aktibo ti nangyadal kenkuana iti Biblia: “Dakkel ti naitulong kaniak ti personal nga interes dagiti panglakayen. Kanayon idi a kasaritadak. Kaduaendak iti ministerio, iranudda dagiti nasursuroda iti personal a panagadalda iti Biblia, ken ikaduadak iti panagay-ayam iti isports.” Adda itan da Melissa ken Mauricio iti amin-tiempo a serbisio.

16-17. Ania ti dadduma pay a pamay-an a matulongantayo ti sabsabali?

¹⁶ Tumulong iti dadduma pay a pamay-an. (Gal. 6:10) “Masansan a ti laeng kasapulan ket ti naintiempuan a panangipakita iti kinaimbag,” imbaga ni Leo, a misionero iti maysa a pagilian nga adayo iti pamiliana. “Malagipko ti maysa nga aldaw a naaksidenteak. Idi nakaawidak met laengen, mais-stress-ak unay. Idi kuan, adda agassawa a nangawis kaniak iti simple a pannangan. Diak malagipen no ania ti kinnanmi, ngem malaglagipko pay laeng a dimngegda a naimbag kaniak. Isu nga idi agangay, simmayaaten ti riknak!”

¹⁷ Magusgustuantayo amin dagiti nateokratikuan nga okasion, kas iti asamblea ken kombension. Ti maysa a makagapu ket makalangentayo ti dadduma ken makasaritatayo ida maipapan iti programa. Ngem kinuna ni Carol, a nadakamat itay, “Nakalidlidayak no asamblea ken kombension.” Apay? Imbagana: “Uray no napalawlawanak iti ginasut wenno rinibu pay ketdi a kakabsat, masansan nga agkakaduada nga agkakapamilia idinto ta agmaymaysaak. Isu a no makitkitak ida, nakalidlidayak.” Adda met dagidiay marigatan a makikombension wenno makiasamblea iti damo a gundaway kalpasan ti ipapatay ti asawada. Adda kadi am-ammom a kasta ti situasionna? Mabalinmo kadi nga awisen a makikadua iti pamiliam iti sumaruno a nateokratikuan nga okasion?

18. Kasanotayo a mayaplikar ti 2 Corinto 6:11-13 no ipakitatayo ti kinamanagpadagus?

¹⁸ Makilangen kadagiti kakabsat. Padasem ti makilangen iti nagduduma a kakabsat,  nangruna kadagidiay makarikna nga agmaymaysada. Kayattayo a ‘luktan a naimbag ti pusotayo,’ nangruna kadagita nga indibidual. (Basaen ti 2 Corinto 6:11-13.) “Kanayon a maragragsakankami no awisendakami dagiti gagayyemmi a bumisita kadakuada ken iti pamiliada wenno no agkakaduakami nga agpasiar,” imbaga ni Melissa, a nadakamaten. Adda kadi kakongregasionyo a mabalin nga awisem kas panangipakitam iti kinamanagpadagus?

19. Kaano a nangnangruna a makatulong ti pannakilangen kadagiti pada a Kristiano?

¹⁹ Adda dagiti tiempo a nangnangruna nga apresiaren dagiti padatayo a Kristiano no makikaduatayo kadakuada. Mabalin a marigatan ti dadduma a makilangen kadagiti saan a Saksi a kapamiliada bayat dagiti holiday wenno nailubongan a selebrasion. Adda met dagiti tiempo a nakalidliday ti dadduma, kas no dumteng ti anibersario ti ipapatay ti maysa nga ipatpategda. No makikaduatayo kadagiti kakabsat a makapaspasar iti kasta a situasion, ipakpakitatayo a ‘napaypayso ti panangasikasotayo’ kadakuada.—Fil. 2:20.

20. Kasano a makatulong ti sasao ni Jesus iti Mateo 12:48-50 no nalidaytayo?

²⁰ Adu ti rason a marikna no dadduma ti maysa a Kristiano nga isu ket agmaymaysa. Ngem ditay pulos liplipatan a pagaammo unay ni Jehova ti kasta a marikriknatayo. Ipapaayna ti kasapulantayo, ket masansan nga us-usarenna dagiti padatayo a Kristiano. (Basaen ti Mateo 12:48-50.) Kas subad, ipakpakitatayo ken Jehova ti apresasiontayo iti nadungngo nga urnosna no ikagumaantayo a suportaran ti naespirituan a pamiliatayo. Aniaman ti marikriknatayo no dadduma, ditay pulos agmaymaysa ta kanayon nga adda ni Jehova iti sibaytayo!