1. Sambu na nki bantangu ya nkaka bansadi ya Yehowa ke kudiwaka bo mosi?

BANTANGU ya nkaka, bampangi mingi ke kudiwaka bo mosi. Bampangi ya nkaka ke kudiwaka bo mosi sambu na mwa ntangu kansi na nima, bo ke kudiwaka mbote. Kansi bankaka ke salaka ntangu ya nda, bo ke kudiwa kaka bo mosi. Beto lenda kudiwa beto mosi ata beto kele na kati ya bantu mingi. Yo ke vandaka mpasi sambu bampangi ya nkaka kuzwa banduku na dibundu ya mpa. Bampangi ya nkaka me yelaka na mabuta yina bo yonso vandaka kusala mambu yonso, yo yina bo ke kudiwaka bo mosi sambu bo ke vandaka ve ti bantu ya mabuta na bo. Bankaka diaka ke kudiwaka bo mosi sambu muntu yina bo vandaka kulutisa ntangu mingi ti yandi me fwaka. Bakristu ya nkaka mingi-mingi bayina kele ya mpa na kieleka ke kudiwaka bo mosi sambu bantu ya mabuta na bo mpi banduku na bo yina kele ve Bambangi ya Yehowa me yambulaka bo mpi ke niokulaka bo.

2. Beto ta pesa bamvutu na nki bangiufula?

² Yehowa ke zabaka mpi ke bakisaka mbote mambu na beto yonso. Ntangu beto ke kudiwaka beto mosi, Yehowa ke zabaka mpi yandi ke zolaka kusadisa beto sambu beto kudiwa diaka ve beto mosi. Inki mutindu Yehowa ke sadisaka beto? Inki beto mosi fwete sala? Mpi nki beto lenda sala sambu na kusadisa bampangi yina ke kudiwaka bo mosi? Beto tadila bamvutu na bangiufula yai.

3. Inki mutindu Yehowa tudilaka Eliya dikebi?

³ Yehowa ke zolaka nde bansadi na yandi yonso kuvanda na kiese. Yandi kele pene-pene ya konso muntu na kati na beto mpi yandi ke monaka beto ntangu beto ke kutanaka ti mambu yina ke lembisaka  beto nitu. (Nk. 145:18, 19) Beto tadila mutindu Yehowa tudilaka profete Eliya dikebi. Profete Eliya zingaka na nsungi mosi ya mpasi na Izraele. Bantu vandaka kuniokula ngolo bansadi ya Yehowa mpi bambeni ya Nzambi yina monanaka bonso nde bo vandaka ngolo mingi teleminaka Eliya. (1 Bant. 19:1, 2) Yo lenda vanda nde Eliya waka mpasi sambu yandi vandaka kuyindula nde yandi mosi mpamba muntu vandaka kusadila Yehowa. (1 Bant. 19:10) Nzambi sadisaka profete Eliya kukonda kusukinina. Yehowa tindaka wanzio sambu na kupesa Eliya kikesa mpi kusonga yandi nde yandi vandaka ve yandi mosi sambu bantu ya nkaka mpi na Izraele vandaka kusadila Yehowa.—1 Bant. 19:5, 18.

4. Inki mutindu Marko 10:29, 30 ke monisa nde Yehowa ke tudilaka bansadi na yandi yina ke kudiwaka bo mosi dikebi?

⁴ Yehowa ke zabaka mbote nde ntangu beto ke ponaka na kusadila yandi, yo ke lombaka nde bankaka na kati na beto kuyambula mambu ya nkaka. Yo lenda sala nde bantu ya dibuta na beto mpi banduku na beto yina ke sadilaka ve Yehowa kusadisa beto diaka ve. Mbala ya nkaka ntumwa Piere vandaka kudiyangisa, yo yina yandi yulaka Yezu nde: “Tala, beto me bikisa bima yonso mpi beto me landa nge; ebuna beto ta baka inki?” (Mat. 19:27) Yezu songaka balongoki na yandi nde bo ta zwa dibuta ya nene ya kimpeve. (Tanga Marko 10:29, 30.) Yehowa, Tata ya dibuta na beto ya kimpeve ke tuba nde yandi ta sadisa bantu yina ke sadilaka yandi. (Nk. 9:10) Beto tadila mambu yina beto lenda sala sambu Yehowa kusadisa beto ntangu beto ke kudiwa beto mosi.

5. Inki mambote nge ta baka kana nge ke yindula mutindu Yehowa ke sadisaka nge?

⁵ Yindula mutindu Yehowa ke sadisaka nge. (Nk. 55:22) Yo ta sadisa nge na kuyindula ve nde nge kele nge mosi. Mpangi-nkento Carol, * yina bantu ya dibuta na yandi kele ve Bambangi ya Yehowa ke tuba nde: “Ntangu mono ke yindulaka mutindu Yehowa me sadisaka mono na bampasi yina mono me kutanaka ti yo, yo ke sadisaka mono na kubakisa kibeni nde mono kele ve mono mosi. Yo ke ndimisaka mono nde Yehowa ta sadisa mono na bilumbu ke kwisa.”

6. Inki mutindu 1 Piere 5:9, 10 lenda sadisa bampangi yina ke kudiwaka bo mosi?

 ⁶ Yindula mutindu Yehowa ke sadisaka bampangi yina ke kudiwaka bo mosi. (Tanga 1 Piere 5:9, 10.) Na dibuta ya mpangi Hiroshi, yandi mosi mpamba muntu kele Mbangi ya Yehowa. Yandi ke tuba nde: “Yo ke vandaka pete na kubakisa nde konso muntu na dibundu ke kutanaka ti bampasi na yandi. Kana beto ke zaba mbote nde beto yonso ke salaka ngolo sambu na kusadila Yehowa, yo lenda pesa bampangi yina kele bo mosi na kieleka kikesa.”

7. Inki mutindu kisambu ke sadisaka nge?

⁷ Samba, tanga Biblia mpi kwenda mbala na mbala na balukutakanu. Songa Yehowa na pwelele yonso mambu yina ke yangisa nge. (1 Pie. 5:7) Mpangi Massiel ke tuba nde: “Kusamba Yehowa mbala na mbala sadisaka mono na kudiwa ve mono mosi.” Ntangu mpangi-nkento yai bakaka lukanu ya kusadila Yehowa, yandi kudiwaka yandi mosi sambu bantu ya dibuta na bo vandaka ve kusadila Yehowa. Yandi ke tuba diaka nde: “Yehowa kumaka Tata na mono, mono vandaka kusamba yandi konso kilumbu mbala na mbala mpi mono vandaka kusonga yandi mambu yina vandaka kuyangisa mono.”

8. Inki mutindu kutanga Ndinga ya Nzambi mpi kuyindula mingi mambu yina nge ke tanga ke sadisaka nge?

⁸ Tanga Ndinga ya Nzambi mbala na mbala mpi yindula mingi masolo yina ke monisa nde Yehowa ke zolaka nge. Bantu ya dibuta ya mpangi Bianca ke tubilaka yandi mambu yina ke lembisaka yandi nitu. Yandi ke tuba nde: “Kutanga mpi kuyindula mingi masolo ya Biblia mpi masolo ya bansadi ya Yehowa yina ke kutanaka ti mambu ya mutindu mosi ti mono ke sadisaka mono mingi kibeni.” Bampangi ya nkaka ke kangaka na ntu baverse yina ke pesaka bo kikesa, mu mbandu Nkunga 27:10 mpi Yezaya 41:10. Bampangi ya nkaka diaka ke landaka mikanda yina bo me kotisa ndinga ntangu bo ke yidikaka balukutakanu to ntangu bo ke tangaka Biblia. Bo ke tubaka nde kusala mutindu yai, ke sadisaka bo na kudiwa ve bo mosi.

9. Inki mutindu kukwenda na balukutakanu ke sadisaka nge?

⁹ Sala ngolo sambu na kukwenda na balukutakanu mbala na mbala. Balukutakanu ta sadisa nge na kubaka kikesa mpi yo ta sadisa nge na kuzaba bampangi mbote. (Baeb. 10:24, 25) Mpangi Massiel yina beto me tubila ke tuba nde: “Ata mono vandaka nsoni-nsoni, mono bakaka lukanu ya kukwenda na balukutakanu yonso mpi kupesa bamvutu ti bakomantere. Yo sadisaka mono na kudiwa ve mono mosi na dibundu.”

10. Sambu na nki yo kele mfunu na kuta kinduku ti Bakristu ya kwikama?

¹⁰ Sala kinduku ti Bakristu ya kwikama. Sala kinduku ti bampangi yina nge lenda longuka mambu mingi na mbandu na bo ata beno kele ve mvula mosi ti bo to beno me yelaka ve kisika mosi. Biblia ke monisa nde mayele ke ‘vandaka  na minunu.’ (Yobi 12:12) Bambuta mpi lenda longuka mambu mingi na baleke ya kwikama. Davidi vandaka leke ya Yonatani ya bamvula mingi kansi bo vandaka banduku ya ngolo. (1 Sam. 18:1) Davidi ti Yonatani vandaka kusadisana sambu na kusadila Yehowa ata ntangu bo vandaka kukutana ti bampasi. (1 Sam. 23:16-18) Na dibuta ya mpangi Irina, yandi mosi mpamba muntu kele Mbangi ya Yehowa. Yandi ke tuba nde: “Bampangi na beto ya kimpeve lenda kuma kibeni bibuti to bampangi na beto ya kinsuni. Yehowa lenda sadila bo sambu na kulungisa bampusa na beto.”

11. Inki nge fwete sala sambu na kusala kinduku ya ngolo ti bantu ya nkaka?

¹¹ Yo ke vandaka mpasi na kusala kinduku ti bantu mingi-mingi sambu na bantu yina ke vandaka nsoni-nsoni. Mpangi Ratna ke vandaka nsoni-nsoni mpi yandi longukaka Biblia ata bantu vandaka kutelemina yandi. Yandi ke tuba nde: “Mono ke ndima nde mono vandaka ti mfunu ya lusadisu ya bampangi ya kimpeve.” Yo lenda vanda mpasi na kusonga muntu ya nkaka mambu yina ke yangisa nge, kansi kana nge songa muntu mambu yina ke yangisa nge, yo ta sadisa nge na kusala kinduku ti yandi. Banduku na nge ke zolaka kupesa nge kikesa mpi kusadisa nge, kansi bo ta sala yo kaka kana nge songa bo mambu yina ke yangisa nge.

12. Inki mutindu kisalu ya kusamuna lenda sadisa nge?

¹² Kana nge ke samuna ti bampangi, yo ta sadisa nge mpi na kusala kinduku ti bo. Mpangi Carol yina beto me tubila ke tuba nde: “Mono me kumaka ti banduku mingi ya mbote sambu mono vandaka kusamuna ti bampangi-bankento mpi kusala ti bo mambu ya nkaka ya kimpeve. Yehowa ke sadisaka mono banda bamvula mingi na nzila ya banduku yai.” Yo ke vandaka mbote ntangu yonso kana beto ke sala kinduku ti Bakristu ya kwikama. Yehowa ke sadilaka banduku ya mutindu yai sambu na kusadisa nge na kudiwa ve nge mosi.—Bing. 17:17.

13. Inki kele mukumba na beto yonso na dibundu?

¹³ Beto yonso na dibundu kele ti mukumba ya kuzola bampangi mpi ya kusala nde dibundu kuvanda na ngemba sambu ata muntu mosi ve kudiwa yandi mosi. (Yoa. 13:35) Mambu yina beto ke sala mpi ke tuba lenda sadisa bampangi mingi. Mpangi-nkento mosi tubaka nde: “Ntangu mono zabaka kieleka, bampangi ya dibundu kumaka bonso bantu ya dibuta na mono. Kana bo ve, mono zolaka ve kukuma Mbangi ya Yehowa.” Inki nge lenda sala sambu na kusadisa bampangi yina bantu ya mabuta na bo kele ve Bambangi ya Yehowa na kudiwa ve bo mosi na dibundu?

14. Inki nge lenda sala sambu na kusala kinduku ti bampangi ya mpa?

¹⁴ Sala kinduku ti bampangi ya mpa. Beto ta sala yo kana beto ke yamba bampangi ya mpa na dibundu na kiese yonso. (Bar. 15:7) Beto fwete suka ve kaka na kupesa bo mbote. Beto fwete kumisa kinduku na beto ti bo ngolo konso ntangu. Yo yina, vanda mawete mpi monisa nde nge ke tudila bampangi ya mpa dikebi. Kuyula bo ve bangiufula yina lenda pesa bo nsoni, kansi sosa kubakisa mambu yina bo ke kutana ti yo. Yo lenda vanda mpasi sambu bampangi ya nkaka kutuba mambu yina ke yangisa bo, yo yina kupusa bo ve na kutuba na kingolo-ngolo. Na mawete yonso, yula bo bangiufula ya mayele mpi widikila bo ti ntima-nda yonso ntangu bo ke pesa bamvutu. Mu mbandu, nge lenda yula bo nki mutindu bo zabaka kieleka.

15. Inki mutindu Bakristu ya kuyela na kimpeve ke sadisaka bampangi?

¹⁵ Bampangi yonso ta yela na kimpeve kana Bakristu ya kuyela na kimpeve, mingi-mingi bankuluntu ke tudila bo dikebi. Mpangi-nkento Melissa yina mama na yandi sadisaka yandi na kuzaba kieleka ke tuba nde: “Mono ke monisaka ntonda mingi na bampangi yina vandaka  bonso batata na mono, bayina vandaka kulutisa ntangu ti mono mpi bayina vandaka kutudila mono dikebi. Mono vandaka ti muntu yina mono vandaka kusonga mambu yina vandaka kuyangisa mono konso ntangu.” Mpangi Mauricio waka mpasi mpi yandi kudiwaka yandi mosi ntangu longi na yandi ya Biblia yambulaka kieleka. Yandi ke tuba nde: “Bankuluntu monisaka nde bo ke tudilaka mono dikebi mpi yo sadisaka mono mingi. Bo vandaka kusolula ti mono mbala na mbala. Bo vandaka kusamuna ti mono, bo vandaka kusonga mono malongi yina bo bakaka na kulonguka na bo ya Biblia mpi bo vandaka kusala bansaka ya kulutisila ntangu ti mono.” Mpangi-nkento Melissa mpi mpangi Mauricio kumaka kusala kisalu ya ntangu yonso.

16-17. Inki mutindu diaka beto lenda sadisa bampangi?

¹⁶ Sadisa bampangi na mutindu ya nkaka. (Bag. 6:10) Mpangi Leo yina kele misionere na kisika yina kele ntama ti dibuta na bo ke tuba nde: “Mbala mingi diambu ya mfunu ya kusala kele kaka kusadila muntu mosi diambu ya mbote na ntangu ya mbote. Mono ke yibuka kilumbu yina mono salaka aksida na kamio. Ntangu mono vutukaka na nzo, mono kudiyangisaka mingi. Kansi na nima, mpangi mosi ti nkento na yandi bingisaka mono na nzo na bo sambu na kudia. Mono ke yibukaka ve bima yina beto diaka kansi mono ke yibukaka kaka mutindu bo vandaka kuwidikila mono ti dikebi yonso. Na nima na yo, mono kudiwaka mbote kibeni!”

¹⁷ Beto yonso ke zolaka kusala mambu ya kimpeve. Mu mbandu, beto ke kwendaka na balukutakanu ya nziunga to ya distrike sambu beto ke zolaka kulutisa ntangu ti bampangi, kusolula ti bo mambu ya lukutakanu. Mpangi Carol yina beto me tubila ke tuba nde: “Ntangu mono ke kwendaka na balukutakanu ya nziunga mpi ya distrike, mono ke kudiwaka mono mosi. Ata na lukutakanu yango bampangi ke vandaka mingi, mbala mingi bo ke vandaka kaka ti bantu ya mabuta na bo. Ntangu mono ke monaka bo, mono ke kudiwaka kibeni mono mosi.” Yo ke vandaka mpasi sambu bampangi ya nkaka kukwenda na lukutakanu ya nziunga to ya distrike na nima ya lufwa ya bankwelani na bo. Keti nge me zaba mpangi mosi yina ke kutana ti mambu ya mutindu yai? Kana mpidina, nge lenda bingisa mpangi yango na kuvanda ti dibuta na beno na lukutakanu yina ta salama na mbala ke kwisa.

18. Inki mutindu beto lenda sadila mambu yina 2 Bakorinto 6:11-13 ke tuba ntangu beto ke yamba bampangi na banzo na beto?

 ¹⁸ Lutisa ntangu ti bampangi. Bingisa bampangi na kulutisa ntangu ti nge, mingi-mingi bampangi yina ke kudiwaka bo mosi. Beto ke zola ‘kukangula kibeni bantima na beto’ sambu na kusadisa mingi-mingi bampangi yina ke kudiwaka bo mosi. (Tanga 2 Bakorinto 6:11-13.) Mpangi Melissa yina beto me tubila ke tuba nde: “Beto vandaka ntangu yonso na kiese ntangu bampangi vandaka kubingisa beto na banzo na bo sambu beto lutisa ntangu ti bo to kukwenda na bakonzie ti bo.” Keti na dibundu na beno kele ti mpangi yina beno lenda bingisa na nzo na beno?

19. Inki ntangu yo lenda vanda mfunu mingi na kulutisa ntangu ti bampangi?

¹⁹ Bantangu ya nkaka, bampangi na beto lenda sepela mingi kana beto ke lutisa ntangu ti bo. Yo lenda vanda mpasi sambu bampangi ya nkaka kuvanda ti bantu ya mabuta na bo yina kele ve Bambangi ya Yehowa ntangu bo ke sala bankinsi ya mabundu ya luvunu. Sambu na bampangi ya nkaka, yo lenda vanda diaka mpasi kibeni ntangu bantu ya mabuta na bo ke sala nkinsi ya kuyibuka lufwa ya muntu mosi yina bo vandaka kuzola mingi. Kana beto ke lutisa ntangu ti bampangi ya ke kutana ti mambu ya mutindu yai, beto ta monisa nde beto ke “kudibanzaka na masonga yonso” sambu na bo.—Bafil. 2:20.

20. Inki mutindu mambu yina Yezu tubaka na Matayo 12:48-50 lenda sadisa beto ntangu beto ke kudiwa beto mosi?

²⁰ Mambu mingi lenda sala nde Mukristu kudiwa yandi mosi bantangu ya nkaka. Kansi, beto fwete vila ve nde Yehowa ke zabaka mambu yina ke yangisaka beto. Mbala mingi, yandi ke lungisaka bampusa na beto na nzila ya bampangi. (Tanga Matayo 12:48-50.) Beto mpi ke pesaka Yehowa matondo sambu yandi me yidikaka mambu sambu beto sadisa bampangi na beto. Ata beto ke kutana ti mambu ya nki mutindu, beto kele ve beto mosi sambu Yehowa kele ntangu yonso ti beto.