1. Mambo ka bakalume ba Yehoba o bakonsha kumwenanga nobe banjitu bunke?

ATWEBA bavula bimye bimo tumona nobe tujitu bunke. Bamo bekalatu na ino milanguluko pa kimye kicheche. Pakuba bakwabo ino milanguluko itwajijila pa kimye kyabaya. Twakonsha kumona nobe tujitu bunke nangwatu inge tuji paji bantu bavula. Bamo kibakatazha kwikala na balunda mu kipwilo. Bakwabo bakomejile mu bisemi mo baubilanga bintu byavula pamo na bonse ba mu kisemi, bino umvwe baya ku mpunzha ikwabo bakonsha kumonanga nobe bajitu bunke bwabo. Kabiji bakwabo batonga batemwe babo bafwa. Kabiji bena Kilishitu bamo, kikatakata boba bafundatu bukine katataka, bakonsha kumona nobe bajitu bunke umvwe balongo babo ne balunda nabo bebakana nangwa ke bebamanyike.

2. Ñanyi mepuzho o tusakukumbula?

² Yehoba wayuka byonse pe atweba. Uyuka umvwe tubena kumvwa nobe tujitu bunke, kabiji ukebesha kwitukwasha kushinda ino milanguluko. Yehoba witukwasha byepi? Nga atweba bene twakonsha kuba byepi? Kabiji twakonsha kuba byepi pa kuba’mba tukwashe bakwetu mu kipwilo bamona nobe bajitu bunke bwabo? Twayai tukumbule ano mepuzho.

3. Yehoba wamwesheshe byepi kuba’mba watele muchima Elaija?

³ Yehoba ukeba’mba bapopweshi banji bonse bekalenga na lusekelo. Uji kwipi ne atweba bonse, kabiji uyuka umvwe tuji na bulanda nangwa twalefulwa. (Sala. 145:18, 19) Langulukai pe Yehoba byo atele muchima ngauzhi Elaija kimye kyo ajinga na binyenge ne byo amukwashishe. Uno muntu wa kishinka wajingako pa kimye bena Isalele kyo bapichilenga mu bintu  byakatezhe bingi. Bapopweshi ba Yehoba bebamanyikilenga kya mama nafwa, kabiji bakebelenga kwipaya Elaija. (1 Mfu. 19:1, 2) Kabiji kintu kyakatezhe bingi Elaija mu milanguluko ke kya kuba’mba wamwenenga nobe ye yenkatu ngauzhi washajile na kwingijila Yehoba. (1 Mfu. 19:10) Bukiji bukiji Lesa waubilepo kimo kuba’mba akwashe Elaija. Watumine malaika kuya na kubuula ngauzhi wanji amba kechi wajinga bunke ne, kwajinga bena Isalela bakwabo bavula baingijilenga Lesa mu bukishinka.—1 Mfu. 19:5, 18.

4. Kinembelo kya Mako 10:29, 30 kimwesha byepi kuba’mba Yehoba wata muchima bakalume banji bo babula kukwasha ku balongo babo nangwa balunda nabo?

⁴ Yehoba wayuka’mba umvwe twasalapo kumwingijila, tusankilapo bintu byavula bingi. Ba mu kisemi kyetu ne balunda netu babula kwingijila Yehoba bakonsha kuleka kwitukwasha. Kampe na mambo a kuba’mba waakaminwe, mutumwa Petelo pa kimye kimo waipwizhe Yesu amba: “Twasha bintu byonse ne kwimulondela; pano ñanyi bintu byo tukamwenamo?” (Mat. 19:27) Yesu walayile baana banji ba bwanga amba kipwilo kikekala nobe kisemi kyabo. (Tangai Mako 10:29, 30.) Kabiji mutwe wa kisemi kyetu kya ku mupashi aye Yehoba walaya kuba’mba ukakwasha boba bakeba kumwingijila. (Sala. 9:10) Langulukai pa bintu bimo byo mwakonsha kuba pa kuba’mba Yehoba emukwashe kushinda milanguluko ya kumona nobe mujitu bunke.

5. Ñanyi bintu byawama bifuma mu kulanguluka pe Yehoba byo abena kwimukwasha?

⁵ Langulukainga pe Yehoba byo abena kwimukwasha. (Sala. 55:22) Kuba bino kukemukwasha kuyuka kuba’mba kechi mujitu bunke ne. Nyenga wabula kusongolwa wa jizhina ja Carol, * ye yenkatu uji mu bukine mu kisemi kyanji. Waambile’mba: “Kuvuluka ne kulanguluka pe Yehoba byo ankwasha mu meseko, kunkwasha kuyuka’mba kechi njitu bunke ne. Kabiji kundengela kushiinwa kuba’mba Yehoba ukatwajijila kunkwasha.”

6. Kinembelo kya 1 Petelo 5:9, 10 kitundaika byepi boba bekala na milanguluko ya kuba’mba bajitu bunke?

⁶ Langulukainga pe Yehoba byo abena kukwasha bakwenu ba mu lwitabilo bamona nobe bajitu bunke. (Tangai 1 Petelo 5:9, 10.) Mulongo  Hiroshi ye yenkatu wajinga Kamonyi mu kisemi kyanji pa myaka yavula bingi. Waambile’mba: “Mu kipwilo, kyapeela bingi kumona kuba’mba bonsetu babena kupita mu makatazho. Kuyuka kuba’mba atweba bonse tubena kwibikako kwingijila Yehoba kwakonsha kutundaika boba bajitu bunke mu bukine mu bisemi byabo.”

7. Kulomba kwimukwasha byepi?

⁷ Lombainga, tangainga Baibolo ne kupwila kimye kyonse. Mwafwainwa kubuula Yehoba byo mubena kumvwa ku muchima. (1 Pe. 5:7) Nyenga umo mwanyike byo afuukwilepo kwingijila Yehoba, wamwene nobe wajingatu bunke mambo balongo banji kechi baingijilanga Yehoba ne. Uno nyenga wa jizhina ja Massiel waambile’mba: “Kintu kimo kyanema kyankwashishe kushinda milanguluko ya kumona nobe njitu bunke ke kulomba na mukoyo kwi Yehoba. Wajinga nsemi wami wa kine, kabiji nalombanga kwi aye bimye byavula pa juba pa juba, kabiji namubuulanga byo naumvwinenga ku muchima.”

8. Kutanga Mambo a Lesa ne kulangauluka-langulukapo kwimukwasha byepi?

⁸ Tangainga Mambo a Lesa pa juba pa juba, ne kulanguluka pa mashimikila amwesha’mba Yehoba wimutemwa. Nyenga Bianca wachinchikile myendeleko yavula bingi kufuma ku ba mu kisemi kyanji. Walumbulwile’mba: “Kutanga ne kulanguluka-languluka pa mashimikila a mu Baibolo ne a bakalume ba Yehoba ba mu ano moba bapita mu makatazho epasha na o mbena kupitamo kunkwasha bingi.” Bena Kilishitu bamo balabijila binembelo bibatekenesha, nabiji Salamo 27:10 ne Isaya 41:10. Bakwabo bateleka ku byambo byo batangila jimo pa kunengezha kupwila nangwa pa kutanga Baibolo.

9. Kupwila kwimukwasha byepi?

⁹ Ibikaingako kutanwa ku kupwila kimye kyonse. Kupwila kukemutundaika bingi, kabiji mukayuka bulongo balongo ne banyenga. (Hebe. 10:24, 25) Massiel ye twaambapo kala, waambile’mba: “Nangwa kya kuba najinga bingi na bumvu, nafuukwilepo kutwajijila kutanwa ku kupwila konse ne kukumbulapo. Kino kyankwashishe kukwantankana na balongo ne banyenga.”

10. Mambo ka o kyanemena kulenga bulunda na balongo ne banyenga mu kipwilo?

¹⁰ Lengai bulunda na bena Kilishitu ba kishinka. Ikalai balunda na bantu mu kipwilo bo mwakonsha kufunjilako. Bakonsha kwikala bakulumpe nangwa banyike pe anweba, nangwa bafuma mu bisho byapusana na byenu. Baibolo wituvululamo kuba’mba maana “aji na boba bakoma.” (Yoba 12:12) Aba bakoma nabo bakonsha kufunjilako byavula ku banyike ba kishinka. Davida wajinga mwanyike bingi kwi Yonafwanyi, bino kino kechi kibalengejile kukankalwa  kwikala balunda ne. (1 Sam. 18:1) Davida ne Yonafwanyi bekwashishenga kwingijila Yehoba nangwa kya kuba bapichilenga mu makatazho avula. (1 Sam. 23:16-18) Nyenga Irina ye yenkatu uji mu bukine mu kisemi kyanji. Waambile’mba: “Balongo ne banyenga mu kipwilo bakonsha kwikalatu nobe bansemi betu nangwa balojetu ne bankasetu. Yehoba wakonsha kwibengijisha kwikala kisemi kyo tukeba.”

11. Mwafwainwa kuba byepi pa kuba’mba mukoseshe bulunda na bakwenu?

¹¹ Kulenga balunda kwakonsha kukatazha bingi kikatakata inge muji na bumvu. Nyenga Ratna uji bingi na bumvu kabiji wafunjile bukine nangwa kya kuba kuji bamukainyenga. Waambile’mba: “Naswile kuba’mba nakebewenga bukwasho ne lutundaiko lwa balongo ne banyenga mu kipwilo.” Kyakonsha kukatazha kubuulako muntu mukwabo byo ubena kumvwa ku muchima, bino kuba bino yo yakonsha kwikala ntatwilo ya kulenga bulunda na yeo muntu. Balunda nenu bakeba kwimutundaika ne kwimukwasha, pano bino, bakonshatu kuba bino umvwe mwakasuluka ne kwibabuula byo mubena kupitamo.

12. Mwingilo wa kusapwila wakonsha kwimukwasha byepi kulenga balunda?

¹² Jishinda jimo jingila bulongo pa kulenga balunda ke kwingila mwingilo wa kusapwila na bakwenu bena Kilishitu. Ba Carol bo twaambapo kala, baambile’mba: “Nalenga balunda bavula bingi bawama na mambo a kwingijila pamo na banyenga mwingilo wa kusapwila ne mingilotu ikwabo ya mu jibumba ja Lesa. Yehoba wankwasha pa myaka yavula bingi kupichila mu bano balunda nami.” Kulenga bulunda na bena Kilishitu ba kishinka ke kintu kyawama bingi. Yehoba wingijisha bano balunda kwitutundaika umvwe twalefulwa, nangwa inge ke tumone nobe tujitu bunke.—Maana 17:17.

13. Ñanyi mutembo ye tuji nanji atweba bonse mu kipwilo?

¹³ Bonse mu kipwilo baji na mutembo wa kutundaika mutende ne kumwesha butemwe ku bonse pa kuba’mba babulenga kumona nobe bajitu bunke. (Yoa. 13:35) Bintu byo tuba ne byo twamba byakonsha kutundaika bingi bakwetu. Nyenga umo waambile’mba: “Byo nafunjile bukine, kipwilo kyo kyaikele ke kisemi kyami. Kwa kubula bukwasho bwa balongo ne banyenga, inge kechi naikele Kamonyi wa Yehoba ne.” Mwakonsha kuba byepi pa kuba’mba mukwashe boba bafuma mu bisemi byabula mu bukine kuyuka kuba’mba balongo ne banyenga mu kipwilo bebatemwa?

14. Mwakonsha kuba byepi pa kuba’mba mulenge balunda bakatataka?

¹⁴ Lengai bulunda na ba katataka mu kipwilo. Kyo twafwainwa kutendekelapo ke kutambwila ba katataka na lusekelo. (Loma 15:7) Pano bino, kechi twafwainwa kupelelatu pa kwibemuna na lusekelo ne. Twafwainwa kwikala balunda bawama. Onkao mambo, ikalai na kifyele ne kumwesha ba katataka’mba mwibata muchima. Esekai kuyuka makatazho o babena kupitamo, bino kechi mwafwainwa kwipuzha mepuzho alengela muntu kumvwa bumvu ne. Bamo kibakatazha kwamba byo babena kupitamo, onkao mambo, kechi mwafwainwa kwibakanjikizha kukumbula mepuzho o mwibepuzha ne. Bino mwafwainwa kwibakwasha kwamba biji ku muchima kupichila mu kwipuzha mepuzho awama ne kuteleka saka mwatekanya. Nabiji kwibepuzha byo bafunjile bukine.

15. Bena Kilishitu baji na lwitabilo lwakosa bakonsha kukwasha byepi bakwabo mu kipwilo?

¹⁵ Bonse mu kipwilo bakekala na lwitabilo lwakosa umvwe bena Kilishitu bakosa mu lwitabilo, kikatakata bakulumpe mu kipwilo ke bamweshe’mba bebata muchima. Melissa ye  bafunjishe bukine kwi bainanji, waambile’mba: “Nsanchila bingi balongo, mambo bajingatu nobe batata, bamonangapo kimye kya kwisamba ne amiwa ne kumwesha’mba banta muchima. Kimye kyonse nkasuluka kwibabuula byo mbena kupitamo.” Mulongo umo mwanyike wa jizhina ja Mauricio wajinga bingi na bulanda kabiji wamwenengatu nobe washala bunke kimye muntu wamufunjishanga Baibolo kyo afumine mu bukine. Washimikizhe’mba: “Bakulumpe mu kipwilo bammwesheshe kuba’mba banta bingi muchima kabiji kino kyankwashishe bingi. Besambanga ne amiwa kimye kyonse. Naingilanga nabo mu mwingilo, bambuulangako bishinka byo bataananga mu Baibolo pa lufunjisho lwa pa bunke, kabiji nakayanga ne nabo makayo.” Bonse babiji, Melissa ne Mauricio babena kwingila mwingilo wa kimye kyonse.

16-17. Ñanyi bintu bikwabo byo twakonsha kuba pa kuba’mba tukwashe bakwetu?

¹⁶ Bakwashaingako bintu bikebewa mu bwikalo. (Nga. 6:10) Ba Leo bengijila bumishonale ku kyalo kiji lwalepa na ku kyalo ko bafumine, baambile’mba: “Atweba bonse pa bimye bimo, tukeba bukwasho. Mbena kuvuluka juba jimo jo nataainwe mu mapuso na motoka. Nakafikilenga ku nzubo saka nakooka kya kine kine. Bino kisemi kimo kyanengezhezhe kajo ne kungita kuba’mba tujiile pamo. Kechi mbena kuvuluka kene kajo ko najiile ne, kyo mvulukakotu ke kya kuba’mba batelekele na kifyele byo nebalumbulwijilenga kyamwekele. Kino kyendengejile kukasuluka.”

¹⁷ Atweba bonse twiyowa bingi kupwila pamo, nabiji pa kubuñana ne pa kushonkena. Kimo kilengela kwiyowa ke kwikala pamo na bakwetu ne kwisamba pa majashi o twaji kutelekanga. Pano bino, ba Carol bo twaambapo kala baambile’mba: “Pa kubuñana ne pa kushonkena mmona nobe njitu bunke.” Mambo ka? Balumbulwile’mba: “Nangwa kya kuba kutanwa balongo ne banyenga bavula bingi, bino javula bekalatu na bisemi byabo na kwisamba. Umvwe namona bino, kindengela kumona’mba njitu bunke.” Abya mwayukapo muntu umo ubena kupita mu lukatazho lwa uno mutundu nyi? Kimye kikwabo kyo mukabuñananga nangwa kushonkena, mukamwiteko kwiya paji kisemi kyenu.

18. Twakonsha kwingijisha byepi byambo biji pa 2 Kolinda 6:11-13 inge twaitako bakwetu ku nzubo kwetu?

¹⁸ Monaingapo kimye kya kwikala pamo. Kimye  kyo mubena kubapo bintu bimo bya kwisangajika, itaingako balongo ne banyenga bapusana-pusana, kikatakata aba bamona nobe bajitu bunke. Twafwainwa kwibamweshanga butemwe bano bantu. (Tangai 2 Kolinda 6:11-13.) Melissa ye twaambapo kala wavulukile’mba: “Twasangalalanga bingi inge balongo ne banyenga betwitako ku mazubo abo nangwa kuyila nabo pamo na kufwakasha.” Nanchi mu kipwilo kyenu mujipo muntu umo ye mwakonsha kwitako ku nzubo kwenu nyi?

19. Ñanyi kimye kyakonsha kuwama bingi kupwanañana na bakwetu bena Kilishitu?

¹⁹ Bakwetu bena Kilishitu basangalala bingi inge saka tumonapo kimye kya kupwanañana nabo. Bamo kyakonsha kwibakatazha kwikala pamo na ba mu kisemi kyabo kimye kyo basekelela moba a kukookoloka. Bakwabo bekala bingi na bulanda pa moba amo a mu mwaka, nabiji juba jafwijilepo benakwabo. Umvwe twamonapo kimye kya kwikala pamo na balongo ne banyenga babena kupita mu makatazho a uno mutundu, tumwesha’mba ‘twateshako muchima ku bijikila byabo.’—Fili. 2:20.

20. Byambo bya kwa Yesu byanembwa pa Mateo 12:48-50 byakonsha kwitukwasha byepi umvwe ke tumone nobe tujitu bunke?

²⁰ Kuji bintu byavula bingi byakonsha kulengela mwina Kilishitu bimye bimo kumona nobe ujitu bunke. Bino kechi twafwainwa kulubako kuba’mba Yehoba wayuka byonse byo tupitamo ne. Javula wingijisha balongo ne banyenga yetu kwitupa byo tukeba. (Tangai Mateo 12:48-50.) Kabiji tumwesha’mba tubena kusanchila Yehoba pa kwitupa kipwilo inge ke twibikeko kukwasha balongo ne banyenga. Nangwa kya kuba bimye bimo twakonsha kumona nobe tujitu bunke, bino kishinka ke kya kuba’mba kechi tuji bunke ne, Yehoba ukatwajijila kwikala ne atweba.