1. Ntshinyi tshitu tshienza bua basadidi ba Yehowa badiumvue mu bunkaya imue misangu?

KUTU misangu itu ba bungi ba kutudi badiumvua nkaya. Bua bamue, bunkaya buabu kabutu bunenga to. Kadi bua bakuabu budi mua kunenga. Udi mua kudiumvua nkaya nansha wewe mu bantu. Bakuabu batu batata bua kuibidilangana ne bena mu tshisumbu tshipiatshipia. Bakuabu pabu bavua mu mêku muvuabu benza malu a bungi pamue, mpindieu badi bumvua bunkaya padibu bashiyangana ne bena mu mêku abu abu. Kudi bakuabu pabu badi bafuishe muntu uvuabu banange kabatshiyi kabidi ne mushindu wa kusomba nende. Kudi kabidi bena Kristo bakuabu, nangananga batshidi babuelelaku mu bulongolodi, badi badiumvua nkaya padi bena mu mêku anyi balunda babu ba kale badi kabayi Bantemu bababenga peshi babakengesha.

2. Nnkonko kayi ituandamuna?

² Yehowa mmumanye malu onso adi atutangila. Mmumanye patudi tumvua bunkaya, ne mmusue kutuambuluisha bua tumanye mua kupita nabu. Mmunyi mudiye utuambuluisha? Ntshinyi tshitudi petu mua kuenza patudi tumvua bunkaya? Ntshinyi tshitudi mua kuenza kabidi bua kuambuluisha bena mu tshisumbu badi bumvua pabu bunkaya? Tuandamunayi nkonko eyi.

3. Ntshinyi tshivua Yehowa muenze bua kuleja muvuaye utabalela Eliya?

³ Yehowa utu utabalela batendeledi bende bikole. Udi pabuipi ne yonso wa kutudi, udi umona patudi babungame peshi batekete mu maboko. (Mis. 145:18, 19) Elabi meji muvuaye mutabalele muprofete wende Eliya. Muena lulamatu au uvua ne muoyo tshikondo tshivua tshisamba tshia Isalele mu lutatu lukole.  Bavua bakengesha batendeledi ba Yehowa bibi menemene, ne Eliya ke uvua baluishi ba bukole bavua baluisha Nzambi batue mutu. (1 Bak. 19:1, 2) Bualu bukuabu buvua butonda Eliya mbua muvuaye wela meji ne: anu yeye nkayende ke uvua mushale wenzela Yehowa mudimu wa buprofete. (1 Bak. 19:10) Nzambi kakashala muvunge maboko to. Wakatuma muanjelu bua kujadikila muprofete wende ne: kavua nkayende to, kadi kutshivua bena Isalele bakuabu ba bungi bavua batshina Nzambi.​—1 Bak. 19:5, 18.

4. Mmunyi mudi Mâko 10:29, 30 uleja mudi Yehowa utabalela basadidi bende badi mua kuikala kabayi ne wa kubakuatshisha?

⁴ Yehowa mmumanye ne: patudi tusungula bua kumuenzela mudimu, bitu bilomba bamue ba kutudi bua kudipangisha malu a bungi. Bidi mua kuenza bua balela betu badi kabayi Bantemu ne balunda betu ba kale balekele kutuambuluisha. Pamuapa bivua bitonde mupostolo Petelo pavuaye muebeje Yezu ne: “Tuetu tudi bashiye bintu bionso, bakulonde; nanku, ntshinyi tshikalaku buetu tuetu?” (Mat. 19:27) Yezu wakajadikila bapostolo bende ne disanka dionso ne: bavua ne bua kupeta dîku dinene dia mu nyuma. (Bala Mâko 10:29, 30.) Yehowa udi Mfumu wa dîku dietu dia mu nyuma mmutulaye pende ne: neambuluishe bantu bonso badi basue kumuenzela mudimu. (Mis. 9:10) Mona malu a mushinga audi mua kuenza bua Yehowa akuambuluishe bua umanye mua kupita ne bunkaya.

5. Leja buimpe bua dituma meji ku mushindu udi Yehowa ukuambuluisha.

⁵ Ikala utuma meji ku mushindu udi Yehowa ukuambuluisha. (Mis. 55:22) Wewe wenza nanku neumone ne: kuena nkaya to. Muanetu kampanda utshidi mujike ne muikale nkayende Ntemu mu dîku diabu diende Carol * udi wamba ne: “Pandi ngelangana meji a mudi Yehowa mungambuluishe mu ntatu, bitu bingambuluisha bikole bua kumona ne: tshiena nkaya to. Bitu binjadikila ne: Yehowa neikale kabidi nanyi mu matuku atshilualua.”

6. Mmunyi mudi 1 Petelo 5:9, 10 mua kuambuluisha bantu badi badiumvua mu bunkaya?

⁶ Ela meji a mudi Yehowa wambuluisha bena  Kristo nebe batu pabu badiumvua mu bunkaya. (Bala 1 Petelo 5:9, 10.) Muanetu Hiroshi, udi muenze bidimu bia bungi muikale nkayende Ntemu mu dîku diabu udi wamba ne: “Mu tshisumbu tshietu, mbipepele bua kumona ne: muntu yonso nngulungu wa buende munda. Kumanya ne: tuetu bonso tudi tuenza ne muetu muonso bua kuenzela Yehowa mudimu kudi mua kukankamija bena Kristo netu badi mu bulelela kadi badiumvua mu bunkaya.”

7. Mmunyi mutu disambila dikuambuluisha?

⁷ Ikala ne tshibidilu tshia kuenza malu a mu nyuma. Mu malu au mudi kusambila Yehowa bua kumuambila muudi udiumvua. (1 Pet. 5:7) Muanetu Massiel nnsonga uvua udiumvua nkaya pavuaye mulue nkayende Ntemu mu dîku diabu. Udi wamba ne: “Bumue bua ku malu manene avua mangambuluishe bua kumanya mua kupita ne bunkaya buanyi nkusambila Yehowa ne muoyo mujima. Buanyi meme uvua Tatu mulelela, mvua mmusambila misangu ya bungi dituku dionso, mmuambila yanyi ya munda.”

8. Mmunyi mutu kubala Dîyi dia Nzambi ne kuelangana meji a malu adimu kukuambuluisha?

⁸ Ikala ubala Dîyi dia Nzambi pa tshibidilu, welangana meji a malu masunguluke adimu adi aleja mudi Yehowa mukunange. Muanetu mukuabu utu bena mu dîku diabu bamba mêyi a dimutekesha nawu mu mikolo diende Bianca udi wamba ne: “Kubala malu a mu Bible ne malu a mu nsombelu a batendeledi ba Yehowa badi mu lutatu lua buena luanyi ne kuelangana meji a malu au kutu kungambuluisha bikole.” Bena Kristo bakuabu batu bakuata imue mvese itu ibakankamija mu mutu, bu mudi Misambu 27:10 ne Yeshaya 41:10. Bakuabu bobu batu bateleja mêyi makuata a mikanda yetu ya kulonga padibu balongolola bisangilu anyi a dibala dia Bible padibu babala Bible. Bitu bibambuluisha bua kabatambi kudiumvua mu bunkaya.

9. Mmunyi mutu dibuela mu bisangilu dikuambuluisha?

⁹ Ditatshisha bua kubuela bisangilu pa tshibidilu. Malu adibu balongeshamu neakuambuluishe ne neufike ku dimanya bena Kristo nebe. (Eb. 10:24, 25) Massiel utukadi batele udi wamba ne: “Nansha mumvua ngumvua bundu bua kuandamuna, ngakadisuika bua kubuela mu bisangilu bionso ne kuandamunamu. Nunku bivua bingambuluisha bua kudimona panyi ne muaba mu tshisumbu.”

10. Bua tshinyi kudia bulunda ne bena Kristo ba lulamatu kudi ne mushinga?

¹⁰ Diaku bulunda ne bena Kristo ba lulamatu. Keba balunda mu tshisumbu badi tshilejilu tshiabu mua kukuambuluisha, nansha badi bashilangane nebe ku bidimu anyi bakolele miaba mikuabu. Bible udi utuvuluija ne: meji atu “munkatshi mua banunu” anyi bantu bakulumpe. (Yobo 12:12) Bantu bakulumpe badi pabu mua kulongela malu a bungi kudi bansonga  ba lulamatu. Davidi uvua muana bikole kudi Yonatana, kadi abi kabivua bibapangishe bua kudia bulunda bukole to. (1 Sam. 18:1) Bavua bambuluishangana bua kuenzela Yehowa mudimu nansha pavuabu mu ntatu mikole. (1 Sam. 23:16-18) Muanetu Irina udi nkayende Ntemu mu dîku diabu udi wamba ne: “Mu bulelela, bena Kristo netu badi mua kulua baledi betu anyi bana betu ba mu nyuma. Yehowa udi mua kubasaka bua kutukumbajila majinga etu.”

11. Ntshinyi tshiudi mua kuenza bua kudia bulunda bua pa muoyo ne bantu?

¹¹ Kudia bulunda ne bantu kudi mua kukukolela, nangananga wewe muikale muntu wa bundu. Muanetu Ratna utu ne lumamamama ne mulonge bulelela bikale bamuluisha udi wamba ne: “Bivua bikengela mmanye ne: mvua dijinga ne dikuatshisha dia kudi bena mu dîku dietu dia mu nyuma.” Bidi mua kukukolela bua kuambila muntu mukuabu muudi udiumvua, kadi wewe uleja bakuabu muudi udiumvua, udi mua kudia nabu bulunda bua pa muoyo. Balunda bebe mbasue kukukuatshisha ne kukukankamija, kadi bidi bikengela bua wewe udiunzulule kudibu bua bamanye mudibu mua kukuambuluisha.

12. Mmunyi mudi kuyisha mua kukupetesha balunda bimpe?

¹² Umue mushindu muimpe wa kudia bulunda ne bena Kristo nebe nkuyisha nabu. Muanetu Carol utukadi batele udi wamba ne: “Ndi mudie bulunda ne bana betu ba bakaji ba bungi pantu nyisha nabu ne patutu tuenza nabu midimu mikuabu ya mu bulongolodi buetu. Yehowa mmukuate mudimu ne balunda aba munkatshi mua bidimu bia bungi bua kungambuluisha.” Kudia bulunda ne bena Kristo ba lulamatu kutu kuambuluisha bikole. Yehowa udi ukuata mudimu ne balunda ba nunku bua kukuambuluisha paudi mutekete mu mikolo, bu mudi paudi umvua bunkaya.​—Nsu. 17:17.

13. Mmudimu kayi udi nawu bena mu tshisumbu bonso?

¹³ Bena mu tshisumbu bonso badi ne mudimu wa kukeba ditalala bua muntu yonso umvue ne: mbamunange bua kikadi udiumvua mu bunkaya to. (Yone 13:35) Bitudi tuenza ne bitudi tuamba bidi mua kukankamija bakuabu bikole! Mona tshivua muanetu mukuabu wa bakaji muambe: “Pamvua ndonga bulelela, bena mu tshisumbu bakalua bena mu dîku dietu. Tshivua mua kulua Ntemu bu bobu kabayi bangambuluisha to.” Ntshinyi tshiudi mua kuenza bua kuambuluisha bantu badi nkayabu mu bulelela bua kumvuabu ne: badi pabu ne muaba mu tshisumbu?

14. Ntshinyi tshiudi mua kuenza bua kudia bulunda bukole ne bakuabu?

¹⁴ Wewe tuadija kudia bulunda ne bapiabapia. Udi mua kuenza nanku wewe wakidila bantu bapiabapia badi balua mu tshisumbu ne disanka dionso. (Lomo 15:7) Kadi dijinga diebe kadikadi anu dia kubela muoyo wa bulunda tshianana to, dikala dia kudia nabu bulunda mu kupita kua matuku. Nanku ikala utabalela bapiabapia ne disanka ne muoyo mujima. Teta bua kumanya ntatu idibu mua kuikala nayi, tshibi kuyi ubuelakana mu malu abu adi kaayi makutangile to. Bidi mua kukolela bamue bua kudiunzulula, nanku ikala mudimuke bua kubasumishi bua bakule to. Kadi udi mua kubela tunkonko ne budimu ne ubateleje ne lutulu padibu bakuandamuna. Tshilejilu, udi mua kubebeja bua bakuambile mudibu bafike ku dimanya bulelela.

15. Ntshinyi tshidi bena Kristo bashindame mua kuenza bua kuambuluisha bakuabu mu tshisumbu?

¹⁵ Bena mu tshisumbu bonso badi mua kukola mu nyuma padi bena Kristo bashindame, nangananga bakulu, babatabalela. Muanetu Melissa udibu balongeshe bulelela kudi mamuende katshia ku buana udi wamba ne:  “Ndi mpanga mua kumvuija disanka dindi nadi bua muvua bana betu ba balume badivuije bu batatuanyi, basomba nanyi ne bantabalela bidimu ne bidimu. Dîba dionso dindi ne bualu ntu anu ne muntu wa kubukuatshila.” Muanetu Mauricio utshidi nsonga wakadiumvua bu mulekela pavua mulongeshi wende wa Bible mupatuke mu bulongolodi. Udi wamba ne: “Mushindu uvua bakulu bantabalela wakankankamija bikole. Bavua bayukila nanyi pa tshibidilu. Tuvua tupatuka nabu mu buambi, bangambila malu a mushinga avuabu bapeta mu dilonga diabu dia Bible.” Melissa ne Mauricio bonso babidi bakaditua mu mudimu wa ku dîba ne ku dîba.

16-17. Mmu mishindu kayi misunguluke itudi mua kuambuluisha bakuabu?

¹⁶ Bambuluisha mu mishindu misunguluke. (Gal. 6:10) Muanetu Leo udi wenza mudimu wa bumisionere kule ne dîku diabu udi wamba ne: “Misangu ya bungi tshionso tshitu muntu natshi dijinga tshitu anu kabualu kampanda ka kimpe kamuenzela pa dîba diaku. Ndi mvuluka dîba dimvua mupete njiwu ya mashinyi. Ngakalua anu kufika kumbelu, kadi bivua binsamishe mutu bikole. Pashishe muanetu kampanda ne mukajende bakambikila kuabu bua tuetu kuela nabu tshianza mukana. Tshiena mvuluka bituvua badie to, kadi ndi mvuluka muvuabu banteleja ne ntema. Ngakalua kudiumvua bimpe be!”

¹⁷ Tuetu bonso tutu basue bikondo bitutu tutuilangana ne Bantemu netu bua kuambilangana malu a mu miyuki itudi balonde mu mpuilu ne mu mpungilu. Kadi muanetu Carol utukadi batele udi wamba ne: “Ntu ntamba kudiumvua nkaya mu mpuilu ne mu mpungilu. Nansha meme munkatshi mua nkama ne nkama anyi binunu ne binunu bia bena Kristo nanyi, bobu bonso batu nangananga anu ku tshibelu kua bena mu mêku abu. Pantu mbamona nanku ntu ndiumvua kabidi mu bunkaya bukole.” Padi muntu mufuishe muena dibaka nende, bidi mua kumukolela bua kubuela mu mpungilu anyi mu mpuilu bua musangu wa kumpala nkayende. Udi mumanye muntu udi ne lutatu lua nunku anyi? Kuenaku mua kumubikila bua asombe pamue ne dîku diebe musangu walonda panuabuela bu mudi mu mpuilu anyi mu mpungilu anyi?

18. Mmunyi mutudi mua kutumikila 2 Kolinto 6:11-13 patudi tubikila bakuabu bua kusomba nabu?

¹⁸ Ikala usomba nabu. Ikala ubikila bena Kristo  nebe bashilashilangane bua kusomba nabu bikondo biutu upitshisha kapepe, nangananga badi mua kuikala badiumvua mu bunkaya. Tudi basue ‘kunzulula mioyo yetu bikole,’ nangananga bua bantu ba mushindu eu. (Bala 2 Kolinto 6:11-13.) Muanetu Melissa utukadi batele udi uvuluka wamba ne: “Bivua bituenza disanka dia bungi pavua bena Kristo netu batubikila kumabu bua kusomba nabu ne mêku abu anyi bua kuya kuendakana nabu.” Kudiku muntu mu tshisumbu tshienu uudi mua kubikila kuebe anyi?

19. Ndîba kayi didi kusomba ne bena Kristo netu mua kutamba kubambuluisha?

¹⁹ Kudi bikondo bidi bena Kristo netu mua kutamba kusanka bua tusombe nabu. Bidi mua kuikala lutatu kudi bamue bua kusomba ne balela babu badi kabayi bena kuitabuja padibu basekelela mafesto kampanda. Bakuabu badi mua kubungama bikole menemene dîba didi matuku kampanda akumbana bu mudi dituku divua kampanda wabu mufue. Patudi tubikila bena Kristo netu badi mu lutatu lua nunku bua kusomba nabu, tudi tubaleja mutudi ‘tuditatshisha ne muoyo mujima’ bua bualu buabu.​—Filip. 2:20.

20. Mmunyi mudi mêyi a Yezu adi mu Matayi 12:48-50 mua kutuambuluisha patudi tudiumvua mu bunkaya?

²⁰ Kudi malu a bungi adi mua kuenza bua muena Kristo adiumvue mu bunkaya imue misangu. Kadi katupu muoyo ne: Yehowa mmumanye bimpe mudiye udiumvua amu. Utu utupesha bitudi nabi dijinga, nangananga kupitshila kudi bena Kristo netu. (Bala Matayi 12:48-50.) Tuetu petu tudi tuleja Yehowa mutudi ne dianyisha bua malu adiye mutulongoluele ne dinanga dionso patudi tuenza ne muetu muonso bua kukuatshisha bena mu dîku dietu dia mu nyuma. Nansha tudiumvua mushindu kayi imue misangu, katuena nkayetu nansha bualu Yehowa udi anu netu!