1. Muloñadi ambuña aYehova amavulu chatiyilañawu wuudi mpinji yikwawu?

ETU amavulu twatiyaña wuudi mpinji yikwawu. Amavulu wuudi wamanaña swayi. Ilaña amakwawu hashimbulaña. Tunateli kutiya wuudi hela chakwila tudi hadi antu. Amakwawu chayikalilaña kwikala nawamabwambu muchipompelu chachiha. Amakwawu afumini muchisaka chakwila azatilileña hamu, ilaña neyi anayi kwacheñi atiyaña wuudi. Amakwawu anukaña chadikundileñawu nantaña yawu wafwa dehi. AkwaKristu amakwawu, sweje-e anadizi chalala katataka, aneñaña neyi ayikaana hela atachika kuyikabisha kudi antaña jawu abula kwikala aYinsahu hela adiña amabwambu jawu.

2. Malwihwinyi itukwakula?

² Yehova weluka kukala kutwamonaña nawa watwiluka chiwahi. Neyi tunakutiya wuudi, welukaña nawa wakeñaña kutukwasha kulonda tuumiki. Yehova watukwashaña ñahi? Chumanyi chitunateli kwila hakwila nawu tuumikeña? Nawa chumanyi chitwatela kwila hakwila nawu tukwasheña antu muchipompelu atiyaña wuudi? Twakulenu awa malwihu.

3. Yehova wamwakameneni ñahi Elija?

³ Yehova nakukeña nindi akwakudifukula indi ejima ekali namuzañalu. Wudi kwakwihi nanetu hamuntu-hamuntu, nawa wamonaña neyi tunakwakamena hela neyi tunaneñi. (Mas. 145:18, 19) Talenu Yehova chamwakameneniyi kaprofwetu kindi Elija. Iwu iyala washinshika wadiñaku mumpinji yakala yawaIsarela. Akwakudifukula aYehova ayikabishileña chikupu, sweje-e akeñeleña kumujaha Elija kudi antu abulileña  kudifukula kudi Yehova. (1 Anya. 19:1, 2) Chuma chamuneñesheleña cheñi Elija, watoñojokeleña nindi yena diyi wadiña hohu kaprofwetu washalilihu wamukalakeleleña Yehova. (1 Anya. 19:10) Nzambi wamukwashili Elija swayi-swayi. Yehova watemesheli kañelu kwinza nakumukolesha kaprofwetu kindi nindi hadiña nkawindiku nawa nakumuleja nindi muIsarela mwadiña cheñi antu amakwawu amutiyileña Nzambi woma.—1 Anya. 19:5, 18.

4. Maku 10:29, 30 yamwekeshaña ñahi Yehova chakamenañayi ambuñindi alekaña kwakamenawu?

⁴ Yehova weluka nindi neyi tutondahu kumukalakela, etu amakwawu kudi yuma yitwatela kuleka. Chuma chimu, antaña jetu niamabwambu abulaña kudifukula kudi Yehova akuleka kutukwasha. Hadaha muloña wakwila wadiña nakwakama, kapostolu Petulu wamwihili Yesu nindi: “Tunashiyi yuma yejima nakukulondela; dichi yumanyi yitukatambwila?” (Mat. 19:27) Yesu wayakwili nindi amanakwawu niahela diwu akekala chisaka chawu. (Tañenu Maku 10:29, 30.) Nawa Yehova, Tata yetu wamwiwulu, washiika nindi wukukwashaña antu ejima anakukeña kumukalakela. (Mas. 9:10) Talenu yuma yimwatela kwila hakwila nawu Yehova yayikwashi kuumika neyi munakutiya wuudi.

5. Muloñadi chichawahila kutoñojoka chatukwashañayi Yehova?

⁵ Toñojokenuña Yehova chinakuyikwashayi. (Mas. 55:22) Chumichi chikuyikwasha kwiluka nenu himudi kankawenuku. Muhela Carol, * wabula antaña jindi muchalala, wahosheli nindi: “Neyi nitoñojoka Yehova chankwashiliyi kuumika kukala, chankwashaña kwiluka nami hinidi kankawamiku. Nawa chankwashaña kwiluka nami Yehova wukunkwashaña mpinji yejima.”

6. Indi 1 Petulu 5:9, 10 yinateli kukolesha ñahi antu aneñaña?

⁶ Toñojokenuña Yehova chinakuyikwashayi akwenu akwakudifukula anakutiya wuudi. (Tañenu 1 Petulu 5:9, 10.) Manakwetu Hiroshi wekala hohu Chinsahu muchisaka chawu  wahosheli nindi: “Chekala chaswayi kwiluka nami muchipompelu chetu ejima akweti kukala. Kwiluka netu wejima wetu twazataña nañovu hakwila nawu tumukalakeleña Yehova kunateli kukolesha antu abula antaña muchipompelu.”

7. Kulomba kwayikwashaña ñahi?

⁷ Lombenuña mpinji yejima, kutaña Bayibolu nikupompa. Imu munabombeli kumulejamu Yehova chimunakutiya. (1 Pet. 5:7) Muhela Massiel himuhela wakansi watiyileña wuudi hampinji yatachikiliyi kumukalakela Yehova hamuloña wakwila anvwali jindi hiyamukalakelaña Yehovaku. Dichi wahosheli nindi: “Chuma chimu chankwashaña neyi inakutiya wuudi hikumulomba Yehova mpinji yejima. HiTata yami chikupu, namulombeleña kakavulu mafuku ejima nakumuleja kukala kwami kwejima nichinatiyileña.”

8. Kutaña Izu daNzambi nikutoñojokahu chikupu kwayikwashaña ñahi?

⁸ Tañenuña Izu daNzambi mpinji yejima nawa toñojokenuña chikupu hansañu yinakumwekesha nawu Yehova wayikeña. Muhela Bianca wadiña nakudimbululawu kudi antaña jindi walumbulwili nindi: “Kutaña nikutoñojoka chikupu hansañu yamuBayibolu ninsañu yachihandilu yawambuña aYehova amweni kukala kwokumu, yankwashili chikupu kuumika.” AkwaKristu amakwawu ahembela jinsona jayikundejaña kumutu, chidi neyi Masamu 27:10 niIsaya 41:10. Amakwawu atiyililaña kumazu akukwata dehi anyikanda yakudizamu neyi anakuloñesha kupompa hela neyi anakutaña Bayibolu. Dichi chumichi chayikwashaña kubula kutiya wuudi.

9. Indi kupompa kwayikwashaña ñahi?

⁹ Zatenuña nañovu kulonda mupompeña mpinji yejima. Nsañu yimukudiza hakupompa yikuyikolesha nawa mukuyiluka amanakwenu niahela. (Heb. 10:24, 25) Massiel itwashimunahu wahosheli nindi: “Hela chakwila natiyileña nsonyi, nayileña nakupompa mpinji yejima nawa nakwileñahu. Chumichi chankwashili kudikunda nawamanakwetu niahela.”

10. Chalemenadi kukwata wubwambu nawakwaKristu ashinshika?

¹⁰ Kwatenuña wubwambu nawakwaKristu ashinshika. Dikundenuña nawantu muchipompelu imunateli kudizilaku, hela chakwila akweti yaaka ninkulilu yambukaku nayenu. Bayibolu yatulejaña nawu “maana ekala kudi atushinakaji.” (Yoba 12:12) Akulumpi niwena anateli kudizila kudi atwansi ashinshika. Davidi amubadikili yaaka kudi Jonatani, ilaña chumichi hichayikañesheli kwikala amabwambuku. (1 Sam. 18:1) Davidi naJonatani adikwashileña wumu namukwawu kumukalakela Yehova hela chakwila amweneña  kukala kwakuvulu. (1 Sam. 23:16-18) Muhela Irina wekala Chinsahu muchisaka chawu nkawindi wahosheli nindi: “Amanakwetu niahela muchipompelu anateli kwikala anvwali jetu, anyiki jetu hela ayaya jetu. Yehova nateli kuyizatisha kulonda atukwashi.”

11. Chumanyi chimwatela kwila hakwila nawu mwikali nawamabwambu?

¹¹ Chapela wanyi kwikala nawamabwambu, sweje-e neyi mwekala nansonyi. Ratna muhela wadiña nansonyi wadizili chalala hela chakwila wamweneña ikañesha wahosheli nindi: “Nakeñeleña nami amanakwetu niahela muchipompelu ankwashi.” Chinateli kuyikalila kulejaku muntu mukwawu chimunakutiya, ilaña neyi mumuleja owu muntu nateli kwikala ibwambu denu. Amabwambu jenu anakukeña kuyikolesha nikuyikwasha, ilaña mwatela kuyilejamu kulonda wena amoni chakuyikwasha.

12. Mudimu wakushimwina wunateli kuyikwasha ñahi kwikala nawamabwambu amawahi?

¹² Njila yimu yayiwahi yimunateli kukwatilamu wubwambu hikushimwina hamu nawakwenu akwaKristu. Carol, itwashimunahu hakusambila wahosheli nindi: “Ichi nekali nawamabwambu amavulu amawahi kuhitila mukushimwina nawahela nikuzata hamu nawu munyidimu yaYehova. Hadi yaaka yayivulu, Yehova nankwashi kuhitila mudi awa amabwambu.” Chachiwahi kukwata wubwambu nawakwaKristu ashinshika. Yehova wazatishaña awa amabwambu kutukolesha neyi tunaneñi hela neyi tunakutiya wuudi.—Yish. 17:17.

13. Mudimwinyi wukwetiwu antu ejima muchipompelu?

¹³ Antu ejima amuchipompelu adi namudimu wakuleta kuwunda nikumwekesha kukeña kudi antu ejima kulonda abuleña kuneña. (Yow. 13:35) Yuma yitwelaña niyitwahoshaña yinateli kukolesha antu amakwawu hela nehi. Talenu chahosheliyi muhela wumu. Wahosheli nindi: “Chinadizili chalala, antu amuchipompelu diwu ekalili chisaka chami. Neyi abulili kunkwasha, hinadi kwikala Chinsahu chaYehovaku.” Munateli kukwasha ñahi antu akweti antaña jawu abula kwikala muchalala kulonda eluki nawu amanakwetu muchipompelu ayikeña?

14. Munateli kwila ñahi hakwila nawu antu amaha ekali amabwambu?

¹⁴ Kwatenuña wubwambu nawantu amaha. Tunateli kutachika nakuyitambwila amaha muchipompelu. (Rom. 15:7) Hela chochu, twatela kwilahu chuma kubadika kuyitambwila hohu. Hatela kuhita mpinji hakwila twikali nawubwambu wakola. Ikalenu naluwi nawa mwekeshenuña nenu mwayakamenaña antu amaha. Chatela muyihuleña malwihu anateli kuyitiyisha nsonyi, esekenu kwiluka kukala kunakumonawu. Amakwawu chinateli kuyikalila kuyileja chinakutiyawu, dichi bayi muyikanjikija kuhoshaku. Ilaña, yihulenu mukubabala nawa yitiyililenuña nakanañachima chinakwakulawu. Chakutalilahu, munateli kuyihula chadiziliwu chalala.

15. AkwaKristu apama anateli kukwasha ñahi antu muchipompelu?

¹⁵ Chikuhwelelu chawantu muchipompelu chinateli kukola neyi tumwekeshaña netu twadakamenaña wumu namukwawu, sweje-e akulumpi neyi atachikilañahu. Melissa, wakulishililiwu muchalala kudi amama yindi wahosheli nindi: “Nayisakililaña nankashi amanakwetu ankwashili kuspiritu, adiña tuhu neyi atata jami hadi yaaka yayivulu. Neyi nidi nakukala nelukili nami kudi muntu wukunkwasha.” Manakwetu wakansi Mauricio waneñeli  chelili muntu wamudizishileña Bayibolu yafumi muchalala wahosheli nindi: “Akulumpi añakameneni nawa chankwashili chikupu. Ahanjekeleña nanami mpinji yejima. Twazatilileña hamu mumudimu wakushimwina, anlejeleñaku yuma yadizileñawu muBayibolu hakudiza kwahalwawu nawa twahemeneneña hamu yisela.” Melissa niMauricio wejima wawu amuzatilaña Yehova mumudimu wampinji yejima.

16-17. Chumanyi chikwawu chitwatela kwila hakwila tukwashi akwetu?

¹⁶ Yikwashenuña muyuma yinakukeñeka. (Ñal. 6:10) Leo wakalakelaña kwakulehi nachisaka chindi mudimu wawumishonali wahosheli nindi: “Kakavulu muntu wakeñaña kumukwasha hohu muyuma yinakaankiliyi hampinji yatelela. Inakwanuka ifuku dimu dinadiña mumaposu namotoka. Chinashikili kwitala nadakameneni chikupu. Ilaña adisumbula amu antambikili kwitala dawu nakudiila nawu hamu yakuda. Nanukaña wanyi yakuda yitwadiili. Ilaña nanukaña chantiyilileñawu chinadiña nakulumbulula. Nkumininaku, nalekeli kwakama.”

¹⁷ Wejima wetu twadiluñishaña kupompa kwañinza nikupompa kwamaneni, muloña twekalaña nampinji yakuhanjeka nawamanakwetu niahela hansañu yitunadizeña. Hela chochu, Carol itwashimunahu hakusambila wahosheli nindi: “Natiyaña wuudi neyi nidi hakupompa kwanyanya hela kweneni.” Muloñadi? Wahosheli nindi, “Hela chakwila nekalaña nawamanakwetu niahela amavulu, kakavulu awa antu ashakamaña nayisaka yawu. Neyi anashakami hamu, natoñojokaña nami nidi nkawami.” Amakwawu chayikalilaña kuya kukupompa kwanyanya hela kwamaneni neyi dihanajimbeshiwu mwinikwawu. Munelukihu muntu wudi wejima wunakumona kukala kwamuchidiwu? Mutambikenu kulonda mukapompeli hamu nindi nachisaka chenu.

18. Tunateli kuzatisha ñahi 2 AKorinda 6:11-13 hakumwekesha chisambu?

¹⁸ Ikalenuña nampinji yakuhanjeka. Ikalenuña nampinji yakuhanjeka nawamanakwetu niahela ashiyashana, sweje-e, ana atiyaña wuudi. Tunakukeña ‘twenzununi chikupu muchima wetu,’ sweje-e kudi antu amuchidiwu.  (Tañenu 2 AKorinda 6:11-13.) Melissa, itwashimunahu hakusambila wahosheli nindi: “Twatiyileña kuwaha mpinji yejima neyi amanakwetu niahela atutambika kumatala awu nakuhanjika nayisaka yawu hela kuya nakwendela hamu.” Komana muchipompelu chenu mudihu muntu imunateli kumwekeshela chisambu?

19. Mpinjinyi yayiwahi yitwatela kwikala nampinji yakuhanjeka nawakwetu akwaKristu?

¹⁹ Mpinji yikwawu akwetu akwaKristu anateli kutiya kuwaha neyi twikalaña nampinji yakuhanjeka nawu. Amakwawu chinateli kuyikalila kwikala hamu nawantaña jawu abula kwitiya mumafuku akunooka. Amakwawu anateli kuneña hamafuku amu, sweje-e hefuku dafwili ntaña yawu. Neyi twikala nampinji yakuhanjeka nawamanakwetu niahela anakumona kukala kwamuchidiwu, tukumwekesha netu ‘twayakamenaña chikupu.’—Fwili. 2:20.

20. Mazu aYesu ekala haMatewu 12:48-50 anateli kutukwasha ñahi neyi tunakutiya wuudi?

²⁰ Kudi yuma yayivulu yinateli kumuletesha mukwaKristu kuneña. Hela chochu, twatela kwiluka netu Yehova weluka chatiyañawu. Watwinkaña yuma yitwakeñaña, kakavulu wazatishaña akwetu akwaKristu. (Tañenu Matewu 12:48-50.) Ninetu twamwekeshaña netu twalemesha ntanjikilu yaYehova neyi tunakuzata nañovu kukwasha amanakwetu niahela. Hichikweti muloña nanochu chitunakutiyaku. Tudi nkawetu wanyi muloña Yehova wudi nanetu mpinji yejima.