1. Ánni nga toje tjío ma sakʼoanile je ndsʼee.

ME NGATSʼIAA nga kʼoasatío sakʼoa tokoán nga toñá tiyoaa maná. Tjínkʼa xi tosakʼoa kʼoasatío kon, tonga kʼoati tjín xi kʼoasatío kon ngantsjai. Tjínkʼa xi kʼoasʼin síkjaʼaitsjen nga toje tjío ninga nkjínni ma xi ya tjíokao. Tjínkʼa xi ñʼai mangale kʼianga kjaʼaí jtín bichó. Tjín xi nʼio tjentʼale je familiale kʼoa ba satío kon kʼianga kjin fi. Tjínkʼa xi xínkjín kisicha kʼoa nʼio síkjáojin. Kʼoa tjínkʼa je ndsʼee xi tosʼa choatsele nga tjíokotʼaya xi sakʼoa kʼoasʼin síkjaʼaitsjen nga toje tjío nga batiochjoa je xínkjín kao xi miyole koanni tsakai.

2. Jmé xi chótʼayajiaan i̱ kjoaʼmiya jebi.

² Nʼio nda bexkonná je Jeobá kʼoa majinle josatío tokoán. Be kʼiáni nga toñá tiyoaa maná kʼoa mele koasenkaoná. I̱ kjoaʼmiya jebi kui chótʼayajiaan jósʼin basenkaoná je Jeobá nga tsín toñá tiyoaa katamaná, jméni xi koa̱n sʼiaan kʼianga toñá tiyoaa ma sakʼoaná, kʼoa jósʼin koa̱n kuinyakoaa je ndsʼee xi kʼoasatío kon.

3. Jósʼin tsakakó Jeobá nga tsínkʼia kitsjionkon je Elías.

³ Nʼio mandosinle je Jeobá josʼin tjíoni ngatsʼi je choʼndale. Chrian tíjnaná ngatsʼiaa kʼoa be kʼianga nroajen tokoán (Sal. 145:18, 19). Kataʼyala josʼin tsakasenkao je profeta Elías. Nʼio ñʼai koanchon ya naxinandá Israel nichxin nga tsakʼejna je Elías. Tse nganʼio kisʼele je kontrale Niná kʼoa kitjenngike je choʼndale, kʼoa ñaki kʼoatsakatío kon nga sikʼien je Elías (1 Rey. 19:1, 2). Kʼoasʼin kisikjaʼaitsjen je Elías nga toje tojngosa xi profetale Jeobá ma nga kʼia, kʼoa nʼio kisikjáojin (1 Rey. 19:10). Tonga tokjoan tsakasenkao je Jeobá. Jngoo ánkje kisikasén kʼianga kʼoakitsole je Elías nga tsín toje tíjna, kʼoa nga nkjínsa chjota israelita  tjío xi kixi tjíofitʼale Niná (1 Rey. 19:5, 18).

4. Tojo tso Marcos 10:29, 30, jósʼin ʼyañá nga mandosinle Jeobá je xi tsín tinda fikaoni xínkjín kʼoa tsa xi miyole koanni tsakai.

⁴ Be je Jeobá nga tsín choa ñʼai kjimaná nga tinixálee. Tsakui nichxin tsín tinda fikaoniná je xíngiaa kʼoa tsa jeje̱ xi miyoná koanni tsakai xi tsín je Jeobá síxále. Ñandia nga i̱ kitsole Pedro je Jesús, tsakui nichxin tísíkjáojin nga kʼoakitso, i kitso: “Jinjin jekinikatuíjin ngayije, kʼoa jejinroatʼalaijin. Jméni tsokʼoa xi sʼe̱najin” (Mat. 19:27). Je Jesús kʼoakitsole je chjotatjenngile nga nʼio nkjín koa̱nni je xi jo xínkjín sʼin skoe̱kon (tʼexkiai Marcos 10:29, 30). * Kʼoa je Jeobá kʼoatso nga koasenkao ngatsʼi xi je síxále (Sal. 9:10). Kataʼyala jósʼin basenkaoná je Jeobá kʼianga toñá tiyoaa maná.

5. Ánni ndatjínsíni nga kui si̱kjaʼaitsjenjiaan josʼin tíbasenkaoná je Jeobá.

⁵ Si̱kjaʼaitsjeen josʼin tíbasenkaoná Jeobá (Sal. 55:22). Kui xi koasenkaoná nga tsín toñá tiyoaa koa̱nná. Jngo tichjaa xi tíjnatoje, xi Carol ʼmi, * xi tsín testigole Jeobá ma xínkjín, itso: “Je xi basenkaona kʼianga toʼan tijna mana kuinga kui sikjaʼaitsjen jósʼin basenkaona je Jeobá kʼianga kjoa faʼatojian, kʼoa majinna nga tsínkʼia tsjiónkonna”.

6. Jósʼin tsjoánganʼiole jmeni xi tso 1 Pedro 5:9, 10 je ndsʼee xi toje tjío ma sakʼoale.

⁶ Si̱kjaʼaitsjeen jósʼin tíbasenkao Jeobá je ndsʼee xi toje tjío ma sakʼoale (tʼexkiai 1 Pedro 5:9, 10). * Jngo ndsʼee xi jenkjín nó tíkotʼaya Énle Niná, xi Hiroshi ʼmi, xi tsín testigole Jeobá ma xínkjín, itso:  “Bitjatojinñá kjoa ngatsʼiaa xi tiyoaa ya jinjtín. Tonga nga tibʼenelee yaoná ngatsʼiaa nga tinixálee je Jeobá jokji tjen kʼoakjimaná, basenkaoná nga tsín nikʼajenlee tokoán ningalani tsín kotʼaya je xíngiaa”.

7. Jósʼin basenkaoli kʼianga bʼetsʼoai.

⁷ Kjitʼa kʼoétsʼoaa, kʼoéxkiaa je Biblia kʼoa tsín si̱chaa je kjoajtínná. Nʼio tjínle kjoandosin nga kʼoakʼuínlee je Jeobá jotjín tokoán (1 Ped. 5:7). Kataʼyala jotso jngo tichjaa xi sʼa xti, xi Massiel ʼmi, xi koanjtike xínkjín kʼianga je Jeobá kisixále. Je tichjaa jebi itso: “Je xi nʼio tsakasenkaona kʼianga toʼan tijna koanna, kuinga tsakʼeyanajmíle je Jeobá jotjín tokoan. Ñaki jo Nʼaina sʼin tsaʼbekoan. Nʼio nkjín kʼa tsakʼetsʼoale nga nyaon nyaon kʼoa tsakʼeyanajmíle jotjín tokoan”.

8. Jósʼin basenkaoli nga bʼexkiai je Énle Niná, kʼoa nga nikjaʼaitsjenjin jmeni xi tso.

⁸ Kʼoati nʼio tjínle kjoandosin nga kjitʼa kʼoéxkiaa je Énle Niná kʼoa nga si̱kjaʼaitsjenjiaan jñani kʼoatso je Biblia nga nʼio tsjoakená je Jeobá. Jngo tichjaa xi Bianca ʼmi, xi totso tomanile xínkjín nga Énle Niná tíkotʼaya, itso: “Nʼio basenkaona nga kui bʼexkia jotso je Biblia. Kʼoati basenkaona nga kui bʼexkia tʼatsʼe choʼndale Niná xi kʼoati kui kjoa faʼatojin”. Tjínkʼa ndsʼee xi kui bʼéjinkon je texto xi tsjoánganʼiole, jolani Salmo 27:10 kao Isaías 41:10. Tjínkʼa xi grabación síchjén kʼianga bationdale je kjoajtín kʼoa tsa kʼia nga bʼéxkia je Biblia. Kʼoatso ndsʼee jebi nga kui xi binyakao kʼianga toje tjío ma sakʼoale.

9. Jósʼin basenkaoli nga ʼmi kjoajtín.

⁹ Machjén nga kjitʼa kjuian je kjoajtín xi satíoná. Nʼio binyakaoná nga mangián kjoajtín kʼoa ngisaa nda ʼyaxkoaan je ndsʼee (Heb. 10:24, 25). Je Massiel, xi sa jekabʼaxki̱ ya párrafo 7, itso: “Ninga soana, ñaki kʼoatsakʼe tokoan nga kjuía ngayeje kjoajtín kʼoa nga tsjoa je comentariona. Nga kʼoakisʼian ngisaa koanmiyoa je ndsʼee”.

10. Ánni nga nʼio chjínile nga je si̱miyoaa ndsʼee xi nda tjíosíxále Niná.

¹⁰ Si̱miyoaa je ndsʼee xi nda tjíosíxále Niná. Si̱miyoaa je ndsʼee xi nda choa̱ batíoná ninga xinxin tsʼe kʼoa ninga tsín tongóson tjín nóná. Je Biblia kʼoatso nga nʼio tse kjoachjine tjínle chjota xi jetjínle nó (Job 12:12). Tonga je xi sʼa xti kʼoati nʼio tse xi koa̱n kuitsoyale xi jejchínga. Tobʼelañá, je David nʼiosa xti tikʼoajinni je Jonatán, tonga nʼio nda miyo tsakjao (1 Sam. 18:1). Kitsjoanganʼiongañále xínkjín nga kisixále je Jeobá kʼianga kjoa  jaʼatojin (1 Sam. 23:16-18). Je tichjaa xi Irina ʼmi, xi nijngojin xínkjín kotʼaya je Énle Niná, itso: “Koaan nga jo ndsʼee kʼoa jo xijcháná sʼin jchatokoán je xi tongóson sʼin makjainná. Je Jeobá koaanle sichjén je ndsʼee kao tichjaa nga jo familianá sʼin jchatokoán”.

11. Jméni xi machjén nga sʼiaan kʼianga si̱miyoaa je ndsʼee.

¹¹ Tjínkʼa xi nʼio ñʼai male kʼianga símiyo tsa ʼyani, ngisaa tsa soale. Kataʼyala jotso je Ratna, jngo tichjaa xi soale kʼoa xi nʼio tsakatiochjoa je xínkjín kʼianga Énle Niná kiskotʼaya. Itso: “Koanjinna nga machjénna je nganʼiole ndsʼee kao tichjaa”. Tsakui nichxin soa maná nga bʼeyanajmílee tsa ʼyani jotjín tokoán, tonga kui xi basenkaoná kʼianga nimiyoaa je ndsʼee. Tjíondaa je miyoná nga kuinyakaoná kʼoa tsjoánganʼioná, tonga machjén nga kʼoéyanajmílee jotjín tokoán.

12. Jósʼin basenkaoná nga sokóná miyo kʼianga ʼmiyasoán.

¹² Nga ñatjen ʼmiyasoán kao je ndsʼee ngisaa mamiyosaa. Je Carol, xi sa jekabʼaxki̱ ya párrafo 5, itso: “Jenkjín miyo kisokona kʼianga ñatjen xinyasoan kao je tichjaa, kʼoa nga ñatjen nixá jmesani xá xi tjín jinnaxinandále Niná. Jé miyona tísíchjén Jeobá kʼianga tíbasenkaona jokji tífaʼato nó”. Nʼio kuinyakaoná tsa si̱miyoaa je ndsʼee xi nda tjíosíxále Niná. Jé ndsʼee jebi síchjén Jeobá nga basenkaoná kʼianga kjoa bitjatojiaan, jolani kʼianga toñá tiyoaa maná (Prov. 17:17).

13. Jmé xá xi kjinená ngatsʼiaa.

¹³ Koaan kʼoainganʼioá ngatsʼiaa nga tsjoacha koaan kʼoa nga nda kjuinkoaa je xíngiaa ya jinjtín. Tsa kʼoasʼiaan, aliʼya xi toje tjío koa̱nle (Juan 13:35). Nʼio kuinyakao je ndsʼee josʼiaan kʼoa jokuixoán. Jngo tichjaa xi i̱ kitso: “Kʼianga kiskotʼaya je Énle Niná, jo familiana sʼin tsaʼbekoan je ndsʼee kao tichjaa. Alikuijin testigole Jeobá koan tsa tsín tsakinyakaona”. Jósʼin kuisenkoaa je ndsʼee kao tichjaa xi tsín kotʼaya Énle Niná je xínkjín kʼianga tsjoa katasatío kon ya jinjtín.

14. Jmé xi koa̱n sʼiaan nga si̱miyoaa je xi sʼa tjíokotʼaya je Énle Niná.

¹⁴ Si̱miyoaa je xi sʼa tjíokotʼaya je Énle Niná. Nda chjoéyaa kʼianga kuicho kjoajtín (Rom. 15:7). Ali tsa tokuijin xi machjén nga nda si̱koaa nga si̱tiʼndaa, kui xi mená nga ñaki miyoná koa̱nni nga jekoai nichxin. Ndʼé si̱koaa je xi tosʼa tjíokotʼaya je Énle Niná kʼoa koakolee nga mandosin kjoaixiná. Si̱jinlee yaoná jotjío kon kʼoa chósonnilee jokʼuínlee. Makjoanni nga tjínkʼa xi tsín kʼoatsoná jotjío kon, alikui kjoanʼio kʼoénelee nga kʼoakuitsoná. Chósonnilee jmeni xi chjónangilee kʼoa nda kuinyañolee jme xi kuitsoná. Tobʼelañá, koaan kui chjónangilee jókoanni nga tsabexkon je Jeobá.

15. Jmé xi koa̱n sʼin je ndsʼee xi jetjínle kjoafaʼaitsjen nga kuinyakao je xi ngikʼa ya jinjtín.

¹⁵ Ngisaa nʼio satío kjoamakjainle je ndsʼee nga mandosinná xi tʼatsʼe, kʼoa ngisaa tjínnele kʼoasʼin je xi chjotajchínga sʼin tjío. Je tichjaa xi Melissa ʼmi, xi je male kitsoyale Énle Niná saʼnda nga sʼa ʼndí kji, itso: “Jokji tífaʼato nó, nʼio tsjoale kjoanda je ndsʼee xi jo tsotile sʼin bekonna. Kʼianga tjín xi mena kʼoeyanajmía, tjíondaa je ndsʼee kʼianga nrʼoéna”. Kataʼyala jokoan je Mauricio, jngo ndsʼee xi sʼa ti, xi ba kisʼe kon kʼianga kisikʼéjna Énle Niná je xi kitsoyale Biblia. Itso: “Je xi nʼio tsakasenkaona kuinga  koanndosin kjoaixile xi tʼatsʼan je xi chjotajchínga sʼin tjío. Tsakʼasjeʼaa nichxin nga tsakjákaonajmína. Ñatjen tsakʼinyasonníjin kʼoa kui tsakʼéyanajmína jmeni xi majinle kʼianga kotʼaya Biblia, kʼoa saʼnda ñatjen tsakʼetsaojinníjin”. Kʼoa je Melissa kao Mauricio ñaki to xále Niná tjíosʼín.

16, 17. Jósʼin koa̱n kuinyakao kʼaa je ndsʼee.

¹⁶ Nkjín koya josʼin koa̱n kuinyakoaa je ndsʼee (Gál. 6:10). Jngo ndsʼee xi misionero sʼin tísíxá, xi Leo ʼmi, xi kjintʼa tjío je xínkjín, itso: “Sakʼoaa kui basenkaoná nga ndʼé síkaoná je ndsʼee kʼianga nganʼio machjénná. Faʼaitsjenna josʼin tsakinyakaona je ndsʼee kʼianga tjín xi koanna nga carrona tjenkoa. Nʼio titsokjoan kʼianga jekichoña ya ndʼiana. Tonga kʼiakjoán kʼoakitsona jngo ndsʼee kao chjoónle nga kjuíkjenkoa ya ndʼiale. Ningalani tsín faʼaitsjenna jme xi tsakichinijin, je xi tsín cha̱jinna kuinga nʼio nda kinrʼoéna kʼianga tsakʼeyanajmíle jmeni xi koantʼen. Kʼoa ndani kisʼe tokoan nga jekoanni”.

¹⁷ Nda satío tokoán ngatsʼiaa kʼianga biyojtián, jolani kʼianga satíoná kjoajtíntse, nga̱ tsaojinñá je ndsʼee kʼoa kui chobayañá jmeni xi sakóyaná. Tonga kataʼyala jmeni xi tso je Carol, xi jenása kanikʼaxkiaa. Itso: “Ningalani nʼio nkjín mani je ndsʼee xi tsaojian nga satíoná kjoajtíntse, nroajen tokoan kʼianga ʼbe nga ñatjen tjío kao familiale je ndsʼee, kʼoa joxi toʼan tijna mana”. Tjínkʼa xi nʼio ñʼai male kʼianga fi kjoajtíntse kʼianga jekabiya je chjoónle kʼoa tsa xʼinle. A ʼyaxkon kʼaa je ndsʼee xi kui kjoa tjíofaʼatojin. A koaan kʼoakʼuínlee nga ya ñatjen kuiyoaa kao je kʼoa kao familianá kʼianga sʼe̱jna ngindianá je kjoajtíntse.

18. Jósʼin koa̱n kuinyakoaa je ndsʼee tojo tso 2 Corintios 6:11-13.

¹⁸ Ya ñatjen kuiyokoaa je ndsʼee. Koaan kjaʼaí kjaʼaí ndsʼee kʼoakʼuínlee kʼianga kʼoétsaojiaan, ngisaa je xi toje tjío ma sakʼoale. Ñaki ni̱ma̱ná katanroajinni nga kuinyakoaa je ndsʼee xi kʼoasatío kon (tʼexkiai 2 Corintios 6:11-13). * Je Melissa,  xi sa jekabʼaxki̱ ya párrafo 15, itso: “Nʼio tsjoa kisatio tokuinjin kʼianga kinchja̱najin je ndsʼee ya ndʼiale kʼoa tsa kʼiaje̱ nga tjín jña fi”. A tjío tsa ʼyani ya jinjtín xi koa̱n kʼoasʼin kuisenkoaa.

19. Kʼiáni nga ngisa machjénle nga kʼoainganʼiolee je ndsʼee.

¹⁹ Tsen tjín nichxin nga ngisa machjénle nganʼioná je ndsʼee. Tobʼelañá, kʼianga sʼuí batío je xínkjín xi tsín kotʼaya Énle Niná, nʼiojin ñʼai male je ndsʼee nga kui nichxin. Kʼoa tjínkʼa ndsʼee xi ba satío kon kʼianga bichó nichxin nga xki̱ nó xki̱ nó josʼin nga kʼien xínkjín. Kʼianga nikʼayalee nichxin ndsʼee jebi, kʼoasʼin bakonilee nga mandosin kjoaixiná (Filip. 2:20).

20. Jósʼin koasenkaoná jmeni xi kitso je Jesús tojosʼin faʼaitʼa Mateo 12:48-50 kʼianga toñá tiyoaa maná.

²⁰ Nkjín koya anni nga kʼoasatío sakʼoani tokoán nga toñá tiyoaa maná. Tonga alikui si̱chajiaan nga je Jeobá be josatío tokoán, kʼoa sakʼoaa je ndsʼee síchjén nga basenkaoná (tʼexkiai Mateo 12:48-50). * Kʼoasʼin koakonilee nga bʼailee kjoanda je Jeobá kʼianga kuinyakoaa je ndsʼee kao tichjaa ya jinjtín. Ningalani tsín nda satío sakʼoa tokoán, alikui toñá tiyoaa nga̱ yaa tjen tíjnakaoná ngantsjai je Jeobá.