1. Kifer bann serviter Zeova parfwa santi zot tousel?

PARFWA, nou tou nou santi nou tousel. Pou sertin parmi nou, sa santiman-la pa dir lontan. Me pou lezot, sa santiman-la kapav pran letan pou ale. Nou kapav santi nou tousel mem si ena boukou dimounn otour nou. Par exanp, sertin gagn difikilte pou fer kamarad kan zot sanz lasanble. Ena bann dimounn ki bien pros ar zot fami, ek zot santi zot tousel kan zot al lwin ar zot fami. Sertin santi zot tousel parski zot inn perdi enn kikenn ki zot kontan dan lamor, ek zot mank sa dimounn-la boukou. Ek sertin Kretien, sirtou bann ki fek vinn dan laverite, kitfwa zot santi zot tousel parski bann manb zot fami ouswa bann kamarad rezet zot ouswa persekit zot.

2. Ki bann kestion nou pou reponn dan sa lartik-la?

² Zeova konn tou kitsoz lor nou, ek Li konpran nou. Li kone kan nou santi nou tousel, ek Li anvi ed nou pou lit kont sa santiman-la. Kouma Zeova ed nou? Ki nou kapav fer pou ed noumem? Ek kouma nou kapav ed bann frer ek ser ki santi zot tousel? Anou reponn sa bann kestion-la.

3. Kouma Zeova ti montre ki Li ti gagn traka Eli?

³ Zeova anvi ki tou so bann serviter zwaye. Li pre ar sakenn parmi so bann serviter, ek Li remarke kan nou tris ouswa dekouraze. (Ps. 145:18, 19) Anou gete kouma  Zeova ti gagn traka profet Eli ek kouma Li ti ed li. Sa zom fidel la ti viv dan enn lepok bien difisil. Bann dimounn bien pwisan dan Izrael ti pe persekit bann serviter Zeova ek zot ti anvi touy Eli. (1 Ler. 19:1, 2) Anplis, Eli ti bien dekouraze parski li ti panse ki li ti sel profet Zeova ki ti ankor vivan. (1 Ler. 19:10) Zeova deswit ti ed so profet. Li ti avoy enn anz pou ankouraz Eli ek pou fer li kone ki li pa ti tousel. Anz-la ti dir Eli ki ti ena boukou lezot Izraelit ki ti ankor pe servi Zeova avek fidelite!​—1 Ler. 19:5, 18.

4. Kouma Mark 10:29, 30 montre ki Zeova gagn traka bann Kretien ki zot fami ek zot bann kamarad inn abandonn zot?

⁴ Sertin dimounn inn bizin fer bann gran sakrifis pou servi Zeova, ek Zeova kone ki sakrifis zot inn fer. Par exanp, kan sertin finn koumans servi Zeova, zot fami ek zot bann kamarad inn abandonn zot. Kitfwa Pier ti trakase kan li ti demann Zezi: “Nou finn kit tou ek nou finn swiv twa, alor ki pou ena pou nou?” (Mat. 19:27, NW) Zezi ti rasir so bann disip ki zot ti pou gagn enn gran fami spiritiel. (Lir Mark 10:29, 30.) Anplis, Zeova, Sef nou fami spiritiel, promet ki Li pou soutenir bann ki anvi servi Li. (Ps. 9:10) Eski to santi twa tousel? Zeova kapav ed twa pou lit kont sa santiman-la. Anou get sertin kitsoz pratik ki nou kapav fer pou ki Zeova ed nou pou lit kont sa santiman-la.

5. Ki bienfe nou gagne kan nou reflesi lor kouma Zeova pe ed nou?

⁵ Reflesi kouma Zeova pe ed twa. (Ps. 55:22) Lerla, sa pou ed twa pou trouve ki to pa tousel. Enn ser selibater ki apel Carol * ek ki tousel dan laverite, dir: “Kan mo reflesi lor kouma Zeova inn ed mwa pou andir mo bann difikilte, sa ed mwa pou mo pa santi mwa tousel. Ek sa rasir mwa ki Zeova pou touletan la pou mwa.”

6. Kouma 1 Pier 5:9, 10 kapav ankouraz bann ki santi zot tousel?

 ⁶ Reflesi kouma Zeova pe ed bann frer ek ser ki santi zot tousel. (Lir 1 Pier 5:9, 10.) Pandan plizir lane, Hiroshi ti sel Temwin dan so fami. Li dir: “Dan lasanble, tou dimounn ena so bann difikilte. Selman, nou kone ki sakenn pe fer so best pou servi Zeova, ek sa kapav ankouraz bann ki tousel dan laverite.”

7. Kouma lapriyer kapav ed twa?

⁷ Gard bann bon labitid spiritiel. To bizin dir Zeova exakteman seki to resanti. (1 Pier 5:7) Massiel ti santi li tousel kan li ti koumans servi Zeova, parski personn dan so fami pa ti pe servi Zeova. Li dir: “Enn kitsoz ki ti bien ed mwa pou mo pa santi mwa tousel se bann lapriyer bien profon. Zeova enn vre Papa pou mwa. Mo ti priye Li toulezour, plizir fwa par zour, pou dir Li seki mo ti resanti.”

8. Kan to lir ek medit lor Labib, kouma sa kapav ed twa?

⁸ Lir Labib regilierman, ek medit lor bann zistwar Biblik ki montre ki Zeova kontan twa. Bianca, ki ti gagn boukou koze kontrer ar so fami, dir: “Sa ti bien ed mwa kan mo ti lir ek medit lor bann zistwar Biblik ek biografi bann serviter Zeova ki’nn bizin fer fas ar mem sitiasion ki mwa.” Sertin Kretien aprann par-ker bann verse ankourazan, kouma Psom 27:10 ek Izai 41:10. Lezot ekout bann lanrezistreman odio pou prepar zot renion ouswa pou fer zot lektir Labib. Zot dir ki sa bann kitsoz-la bien ed zot pou zot pa santi zot tousel.

9. Ki bienfe to kapav gagne kan to asiste bann renion?

⁹ Fer zefor pou asiste bann renion regilierman. Seki to pou aprann dan renion pou ankouraz twa, ek to pou aprann konn to bann frer ek ser pli bien. (Ebre 10:24, 25) Massiel, ki nou’nn mansione avan, dir: “Mem si mo ti bien timid, mo ti fer zefor pou asiste sak renion ek pou rann enn repons. Gras-a sa, mo ti santi mwa pli pros ar bann frer ek ser.”

10. Kifer li inportan ki nou fer kamarad ar bann frer ek ser dan lasanble?

¹⁰ Fer kamarad ar bann frer ek ser. Fer kamarad ar bann frer ek ser dan lasanble ki pou ena enn bon linflians lor twa. Zot kapav swa pli vie ouswa pli zenn ki twa, ouswa zot kapav sorti dan enn lot lanvironnman ki twa. Labib rapel nou ki nou “trouv lasazes parmi bann ki aze.” (Zob 12:12) Me bann ki  aze osi kapav aprann boukou ar bann zenn ki fidel. David ti boukou pli zenn ki Zonatan, pourtan zot ti de bon kamarad. (1 Sam. 18:1) Malgre bann difikilte ki zot ti gagne, zot ti ed zot kamarad pou kontign servi Zeova. (1 Sam. 23:16-18) Irina, enn ser ki tousel dan laverite, dir: “Nou bann frer ek ser vremem kapav vinn nou fami spiritiel. Zeova kapav servi zot pou donn nou seki nou bizin.”

11. Ki nou bizin fer pou ki nou ena enn bon lamitie avek lezot?

¹¹ Parfwa, li kapav difisil pou fer kamarad ar lezot, sirtou si to timid. Ratna, enn ser ki timid, ti aksepte laverite malgre lopozision. Li dir: “Mo’nn konpran ki mo bizin led mo bann frer ek ser dan lasanble.” Kitfwa nou kapav trouv sa difisil pou dir enn kikenn seki nou resanti. Me si nou fer sa, sa dimounn-la kapav vinn nou bon kamarad. To bann kamarad anvi ankouraz twa ek soutenir twa. Me pou zot fer sa, to bizin fer zot kone kouma zot kapav ed twa.

12. Kouma predikasion kapav ed nou pou gagn bann bon kamarad?

¹² Enn parmi bann meyer fason ki nou kapav fer kamarad ar lezot, se kan nou pres ansam avek bann frer ek ser. Carol, ki nou’nn mansione avan, dir: “Mo’nn gagn boukou bon kamarad kan mo’nn pas letan avek bann ser dan predikasion ek dan lezot aktivite teokratik. Sa fer plizir lane asterla ki Zeova pe soutenir mwa gras-a sa bann kamarad-la.” Nou gagn boukou bienfe kan nou fer kamarad ar bann frer ek ser. Zeova kapav servi sa bann kamarad-la kan nou dekouraze ouswa kan nou santi nou tousel.​—Prov. 17:17.

13. Ki responsabilite nou tou nou ena dan lasanble?

¹³ Nou tou nou ena responsabilite pou fer lasanble vinn enn plas kot ena lamour ek lape, pou ki personn pa santi li tousel. (Zan 13:35) Nou bann parol ek nou bann aksion kapav ankouraz lezot boukou. Enn ser dir: “Kan mo ti vinn dan laverite, bann frer ek ser dan lasanble ti vinn mo fami. San zot soutien, mo pa ti pou vinn enn Temwin Zeova.” Ki to kapav fer pou ed bann ki tousel dan laverite, pou ki zot santi ki zot form parti dan lasanble?

14. Kouma to kapav fer kamarad ar bann nouvo?

¹⁴ Fer kamarad ar bann nouvo. Pou koumanse, nou kapav akeyir bann nouvo kan zot vinn lasal. (Rom. 15:7) Selman, nou bizin fer plis ki zis akeyir zot. Avek letan, nou anvi vinn zot bon kamarad. Alor, montre ki to interese ar zot ek ki to gagn zot traka. San ki to poz zot bann kestion ki kapav anbaras zot, esey konpran ki bann problem zot ena. Sertin kapav trouv sa difisil pou dir seki zot resanti, alor pa fors zot pou koze. Okontrer, avek zantiyes, poz zot bann kestion ki pa pou anbaras zot ek ekout bien zot bann repons. Par exanp, to kapav demann zot kouma zot inn konn laverite.

15. Kouma bann Kretien ki ena lexperyans kapav ed lezot dan lasanble?

¹⁵ Kan sakenn dan lasanble, sirtou bann ansien ek bann Kretien ki ena enn lafwa for, montre ki zot gagn traka zot bann frer ek ser, lafwa tou dimounn vinn pli for. Gras-a so mama, Melissa inn grandi dan laverite. Melissa dir: “Mo bien rekonesan anver bann frer  ki ti koumadir bann papa pou mwa. Zot ti pas letan avek mwa ek zot ti vremem interese ar mwa. Kan mo ti bizin koze, ti touletan ena enn kikenn pou ekout mwa.” Enn zenn frer, ki apel Mauricio, ti bien tris ek li ti santi li tousel kan so ansegnan Labib ti kit laverite. Mauricio dir: “Bann ansien ti montre mwa ki zot vremem interese ar mwa ek sa ti ed mwa boukou. Zot ti koz ar mwa souvan. Zot ti pres ansam avek mwa ek zot ti partaz avek mwa bann kitsoz interesan ki zot ti trouve dan zot letid personel. Nou ti mem fer spor ansam.” Azordi, Melissa ek Mauricio dan servis aplintan.

16-17. Kouma nou kapav ed lezot dan enn fason pratik?

¹⁶ Ed lezot dan enn fason pratik. (Gal. 6:10) Leo, enn misioner ki servi dan enn pei ki bien lwin ar so fami, dir: “Bien souvan, to zis bizin ki enn kikenn azir avek bonte anver twa dan bon moman. Mo rapel, enn zour, mo ti fer enn aksidan loto. Kan mo ti reisi rant lakaz, mo ti extra strese. Me enn koup ti invit mwa pou vinn manze kot zot. Mo pa rapel seki nou ti manze, me mo rapel kouma, avek boukou bonte, zot ti ekout mwa. Alafin, mo ti santi mwa refer net!”

¹⁷ Nou tou nou bien kontan bann levennman teokratik, kouma bann lasanble, parski sa donn nou lokazion pou pas letan avek lezot ek pou koz lor bann diskour ki nou’nn tande. Selman, get seki Carol, ki nou’nn mansione avan, dir: “Mo ti santi mwa bien tousel pandan bann lasanble.” Kifer li ti dir sa? Li explike: “Mem si ti ena plizir santenn frer ek ser otour mwa, souvan zot ti avek bann manb zot fami. Kan mo ti trouv zot, mo ti santi mwa bien tousel.” Sertin kapav trouv sa difisil osi pou asiste bann lasanble kan zot konzwin fek mor. Eski to konn enn kikenn ki pe fer fas ar sa kalite sitiasion-la? Kitfwa to kapav invit li pou asiste prosin lasanble ansam avek twa ek to fami.

18. Kan nou montre lospitalite, kouma nou kapav aplik konsey ki ena dan 2 Korintien 6:11-13?

¹⁸ Pas letan ansam. Kan to fer bann  ti program, esey invit diferan frer ek ser, sirtou bann ki santi zot tousel. Nou anvi “ouver nou leker angran ar zot.” (Lir 2 Korintien 6:11-13.) Melissa, ki nou’nn mansione avan, dir: “Nou ti bien kontan kan bann frer ek ser ti invit nou kot zot, ouswa kan zot ti invit nou pou sorti ansam avek zot.” Eski to pans enn kikenn dan to lasanble anver ki to kapav montre lospitalite?

19. Dan ki moman an partikilie to kapav invit lezot pou pas letan avek twa?

¹⁹ Ena bann moman kot lezot ti pou bien kontan ki nou invit zot. Par exanp, kan ena bann fet relizie, sertin kapav trouv sa difisil pou zot ansam avek zot fami ki pa Temwin. Ena lezot ki bien tris sertin zour dan lane, kouma par exanp zour kot enn kikenn ki zot kontan inn mor. Kan nou invit bann frer ek ser dan sa bann moman-la, nou montre ki nou gagn zot traka.​—Fil. 2:20.

20. Kouma Matie 12:48-50 kapav ed nou kan nou santi nou tousel?

²⁰ Parfwa, nou kapav santi nou tousel pou plizir rezon. Selman, fode pa nou bliye ki Zeova kone ki nou ena sa santiman-la. Ek souvan, Li servi nou bann frer ek ser pou donn nou seki nou bizin. (Lir Matie 12:48-50.) An retour, nou kapav montre nou rekonesans pou fami spiritiel ki Zeova donn nou kan nou fer nou maximum pou soutenir nou bann frer ek ser. Ninport ki santiman nou ena, fode zame nou bliye ki nou pa tousel, parski Zeova touletan avek nou!