MWAHA WOOSOMIYA 23
Khanri veekha, kontha Yehova ri ni nyuuva
“Yehova ri wakhiviru waale anonswalela.”—ISAA. 145:18.
NCIPO 28 Tipani nohala ukhala mpatthani a Yehova?
NINHALA WIITTHUCANI? *
1. Kontha isiyani aswali a Yehova anawiicoonaka ukhala veekha?
ATTHU enci ala mahukwaala khanlova wiicoona ukhala veekha. Hataa ikhalaka icuku inaakuva waavira atthu enci, atthu akhwaawe ikhanle itthu impica waavira. Ayo hataa yarukureriyaka naamucyaaya awula asipatthannyaaya, khanhiya wiicoona ukhala veekha. Ahaavo miyamunneehu unaarika wiilamaleliha nloko nithamenlyaaya phiyaaru. Akhwaawe, ankhuma itthoko yoovaranaciya cinene. Phimaana yakhalaka uttayi naamucyaaya, khunrika wiicoona ukhala veekha. Ahaavo ciicammo ale anaanukhela cinene ntthu khwile yanfentaaya venci. Ni akhwaawe-tho, venci-venci miyamunna yiitthucile ikhweeli mphiyaaruni aneecoona ukhala veekha nlattu wookhottiya awula ulupatthiya naasimucyaaya ni asipatthannyaaya okhalayi ahinonswalela Yehova toko ayova.
2. Makohoni anhala waakhuliya nhina ula mwahoola?
2 Yehova naacuwela citthu cotheene cinniira. Uyo naacuwela ukati uneecooneehu ukhala veekha ni naapheela unikavihera uvilela itthu inniriipiha nrima. Yehova nnikavihera cani? Ni ninhala waakavihera cani miyamunneehu aneecoona ukhala veekha? Nttwee noone cinaakhuliyaaya ayo makohwaayo.
YEHOVA NAWUUWACERANI
Yehova ahoveleeliha nlayikha wiira nankhuluvelihe Eliyasi wiira uyo khaari veekha (Nwehe iparaagarafu 3)
3. Yehova anthoonyihenre cani Eliyasi wiira aananwacera?
3 Yehova naapheela uwoona aswalyaawe otheene yatteeliyaka. Uyo khari uttayi ni hiiva ni naacuwela waniriipaka nrima nlattu woocukulaca. (Isaa. 145:18, 19) Moone mananna Yehova canwacenryaawe porofeeta Eliyasi. Uyo nlopwana ookhuluvelyooyo aakhala uwakati woorikarika cinene ilapo yo Isarayeli. Aswali a Yehova yaanaahuva cinene nlattu woolupatthiya, ni porofeeta Eliyasi phaatepale ulupatthiya naawanani okuru cinene a Yehova. (1 Mam. 19:1, 2) Uhiya commo, Eliyasi ooniha wiira uyova paahi phaahanle avaraka nteko weeporofeeta a Yehova. Iyo itthwiiyo yaanaatepa uncukuliha. (1 Mam. 19:10) Woohipica, Yehova ahonkavihera Eliyasi. Yehova ahoruma nlayikha wiira nankhuluvelihe wiira khaari veekha—khayaamala asarayeli nanlelo yanswalela uratteene Nluku!—1 Mam. 19:5, 18.
4. Markus 10:29, 30 inoonihera cani wiira Yehova nawaawacera atthu anonswalela aneecoona ukhala veekha?
4 Yehova naacuwela wiira hiiva nihohiya uttuli citthu cinci wiira nikhitiri unswalela. Pooti ukhalaka wiira nihohiya ukaviheriya naamuciihu ni asipatthaniihu okhalayi ahinonswalela Yehova. Apostolu Peturu atthunaka ankohale Yesu unanriipale nrima: “Nkawehani, Pwiiya, nihohiya citthu cotheene ni nihoottharani. Isiyani inhaleehu uphwanya?” (Mat. 19:27) Aalipihaka, Yesu ahaakhuluveliha atthryaawe wiira nloko notheene naaswali a Yehova naahala ukhala amucyaaya. (Nsome Markus 10:29, 30. *) Apaapeehu o wiirimu, Yehova, ahopanka inatiri wiira anaahala waakavihera ale ampheela waaswalela. (Isaa. 9:10) Vano, nttwee noone citthu cinlamuliyeenyu upanka wiira nihiicoone-tho ukhala veekha.
ISIYANI INLAMULIYEENYU UPANKA MWEECOONAKA UKHALA VEEKHA?
5. Kontha isiyani unaareera nyuuva wuupuwela mananna Yehova cinookaviheraaweni?
5 Muupuwele mananna Yehova cinookaviheraaweni. (Isaa. 55:22) Mwapanka commo, nnaahala ukhitiri woonela inanna ikhwaawe itthu inwiirani. Arokorihu athupa aneehaniya Carol, * Saahiti a Yehova veekhaaya iriyari yaamucyaaya, aneera co: “Wuupuwela mananna Yehova caakikavihenryaawe ukati waakiriipilyaaya nrima, unaakikupaliha wiira akiri veekha ni Yehova ri ni miiiva.”
6. 1 Peturu 5:9, 10 inaakavihera cani ale aneecoona ukhala veekha?
6 Muupuwele mananna Yehova cinaakaviheraawe miyamunneehu aneecoona ukhala veekha. (Nsome 1 Peturu 5:9, 10. *) Amunna Hiroshi, anonswalela Yehova veekha thanku khalayi iriyari yaamucyaaya, aneera: “Wanlokoni khunrika woona wiira khaavo hirina masukhuli. Ucuwela wiira miyamunneehu otheene ahaana yiikurumicaka wiira answalele Yehova, pooti waalipiha nrima ale akhanle Saahiti a Yehova veekhaaya iriyari yaamucyaaya, toko miiva.”
7. Ulompa unhala wuukaviherani cani?
7 Nhihiye ulompa, usoma Ibiiblya ni urwaa umikutthaanoni. Inanna imoca yoohihiyerera ulompa ukhanle unhimyeera Yehova itthu inwiirani. (1 Pet. 5:7) Moone itthu yuulumalyaawe nrokorihu mmirawo neehaniya Massiel. Ukhala wiira uyova paasi iriyari yaamucyaawe philakenle unswalela Yehova, uhaavo ukati weecoonakaawe ukhala veekha. Uyo neera: “Itthu yaakikavihenre ukhitiri uhiicoona ukhala veekha waari unlompa Yehova ninrimaaka wotheene. Yehova khanle Apaapaaka ookhuluvelya. Mi kaananlompa imaara cinci khula nihuku, kinhimyaceraka inanna ceecoonaaka.”
Uviriyana Ibiiblya ni ilivuru cookaravariya cinoopela mwaha Ibiiblya pooti waakavihera ale aneecoona ukhala veekha (Nwehe iparaagarafu 8) *
8. Usoma Ibiiblya ni wuupuwela cinene insomeenyu unookaviherani cani?
8 Nhihiye usoma Nuulumo na Nluku ni muupuwele ihantisi co mbiiblyani cinthoonyera mananna Yehova cinoofentaaweni. Arokorihu aneehaniya Bianca, anrumpulaciya venci naamucyaaya, aneera: “Usoma ni wuupuwela cinene ihantisi co mbiiblyani cinwuuluma atthu yaakhumelenle itthu inkiira, unaakikavihera venci.” Makristau akiina anaahelaka mmuru iveerusu coomaaliha, toko Isaalimu 27:10 ni Isaiya 41:10. Itthu inaakavihera makristau akhwaawe yeecoonaka ukhala veekha ukhanle uviriyana Ibiiblya ni ilivuru cihu cikiina cookaravariya cinsomeehu wanlokoni.
9. Urwaa umikutthaanoni unookaviherani cani?
9 Mwiikurumice cinene uhilova umikutthaanoni. Mwaahiloveke umikutthaanoni, nyuuva nnaahala ulipihiya cinene ni myaha cintaphuleliya ni nnaahala waacuwela ratta miyamunna. (Mabere. 10:24, 25) Nrokorihu Massiel, romoliye, neera: “Hataa kikhalaka ntthu oomaala cinene, mi kaholakela uhihaleela nanka nkutthaano mmoca ni wiikurumica ukomentari. Upanka commo, wahokikavihera waapatthanana miyamunna o wanlokoni.”
10. Kontha isiyani unaareera waapatthanana miyamunneehu?
10 Mwaapatthanane miyamunna o wanlokoni. Mwiikurumice waapatthana miyamunna o wanlokoni anreera utakihiya, pooti wankhalaaya oolupale wuupwahani nyuuva awula hataa ayeve ni akhalane ilema coovirikana niilema atthunaka nyuuva cirineenyu. Ibiiblya ineera wiira “atthu owuuluvala phinkhalana ucuwelaca.” (Jó 12:12) Masi atthu oolupale pooti ciicammo wiitthucihiya citthu cinci naamirawo o wanlokoni. Davidi aari mmirawo cinene nanlattanihaka ni Jonataa. Masi haata ukhalaka commo Davidi ahonthanla mpatthani omaana. (1 Sam. 18:1) Davidi ni Jonataa yaholipihana wiira ahihiyace unswalela Yehova hataa yakhalanaka masankiho moolupale. (1 Sam. 23:16-18) Arokorihu amoca akhanle Saahiti a Yehova veekha iriyari waamucyaaya, aneera: “Miyamunna ni miyanuunu o wanlokoni pooti ukhala khampa miyaathumwanihu ni miyaamaameehu. Yehova pooti uwiiriha ukhala amuci anaatotheehu waakhalana.”
11. Isiyani inlamuliyeenyu upanka wiira nkhalane upatthani woolipa naakhunaninyu?
11 Masi pooti unirika wancera waapatthanana miyamunna wakhalaka wiira hiiva naatthu oomaala cinene. Arokorihu amoca aneehaniya Ratna yiitthucile ikhweeli hataa yalupatthiyaka, aneera: “Mi kahaana kikupaliki wiira kanhala ukaviheriya naamucyaaka o mminepani.” Khweeliini pooti unirika unhimyera nkhunanihu itthu inniira, masi iyo phi itthu inkavihera wiira atthu eeli akhalane upatthani muulupale. Apatthaniinyu anaapheela venci wuukurumicani ni wuukaviherani, masi nyuuva nhaana mwaaahimyaceraka itthu inwiirani wiira ayo acuwele mananna owuukaviherani.
12. Ulalyeera unookaviherani cani ukhalana apatthani omaana?
12 Itthu imoca inhala wuukaviherani waaphwanya apatthani ukhanle waalalyeerana ihapari nkhayi makristau akhwaawe. Arokorihu Carol aromoliye wiipaceroni, aheera: “Urwaa wuulalyeerani ni uvara miteko co wanlokoni cikiina wamoca naasinuunwaaka o mminepani akhwaawe uhokikavihea ukhalana apatthani omaana. Myaakha cotheene civinre, Yehova haaruma ayo apatthannyaayo ukikavihera.” Khweeliini, wiikurumica wihu wotheene wiira naapatthanane atthu ookhuluvelya anonswalela Yehova unaaniphwanyiha ifayita cinci. Yehova naawiiriha ayo apatthannyaayo unikavihera ukhitiri waanana masukhuli ankhalaneehu, toko wiicoona ukhala veekha.—Miru. 17:17.
MWAAKAVIHERE AKHUNANINYU WIICOONA WIIRA AKHANLE AMUCIIHU
13. Isiyani atthu otheene wanlokoni inlamuliyaaya upanka?
13 Atthu otheene wanlokoni ahaana yiikurumicaka wiira nloko nikhanle nipuro noofentaniya ni nonnema nihinlamuliya uphwanyannya ntthu owiicoona ukhala veekha. (Joau 13:35) Moolumweehu ni citthu cimpankeehu pooti urukunusa venci makhalelo a ntthu! Moone itthu yuulumilyaya arokorihu amoca: “Ukati weetthucilyaaka ikhweeli, miyamunna ni miyanuunu o wanlokoni yahokhala amucyaaka. Unari wiira khayaakikavihenre, mi akaahala ukhitiri ukhala Saahiti a Yehova.” Isiyani nyuuva inlamuliyeenyu upanka wiira munkavihere ntthu rina amucyaawe otheene ahinonswalela Yehova, wiira eecoone ufentiya ni miyamunna otheene wanlokoni.
14. Isiyani inlamuliyeenyu upanka wiira nkhitiri waapatthanana ale awaale phiyaaru wanlokoni?
14 Mmananihe waapatthanana ale awile mphiyaaruni wanlokoni. Wiira mwancere upanka iyo, nwaakhelele saana ale awile mphiyaaruni wanlokoni. (Aroo. 15:7) Wiira nimwaakhele ntthu, khuntosa umwiirela: “Salaama!” Hiiva nihaana wiikurumica wiira wahoolo nikhalane upatthani woolipa nuuyo ntthuuyo. Phimaana, nthoonyere ukhala ntthu ooreera nrima ni moonihere wiira khweeliini nnawaawacera ale awaale phiyaaru wanlokoni. Mwiikurumice ucuwela masankiho arinaaya, masi nhiikelakelihe myaha caya cosiiri. Nhiliyale wiira ahaavo atthu unaarikarika uhimya itthu inwiira. Phimaana nhaakhanyererihe upanka iyo. Wiira ncuwele itthu inwiira, nyuuva pooti waakohakoha sana-saana ni niihisima, ni ukati ayo wo wuuluma mwaaviriyane ratta. Nyuuva atthunaka pooti waakoha co: “Mwiitthucile cani ikhweeli?”
15. Manannani miyamunna oocuwelaca cinlamuliyaaya waakavihera akhunanaya wanlokoni?
15 Miyamunna oocuwelaca, venci-venci mahumu yathoonyeraka wiira anawaawacera akhunanaya, nloko notheene ninaakhala noolipa. Nrokorihu Melissa eetthucihiye ikhweeli naanumwaane, neera: “Akinoona yoohimya wiira kaasukhuru miyamunna ni miyanuunu akhanle khampa miyapaapaaka ni miyamaamaaka myaakha cotheene civinre mpaka nna va. Ayo yaanaakiwacera saana ni yanviriha ukati ni mi. Khula ukati wampheelaaka ntthu oomoopana mwaha, mi kancuwela wiira ayo yanhala ukiviriyana niiraati.” Mmirawo mmoca neehaniya Mauricio aheecoona ukhala veekha ukati munna ansomiha Ibiiblya waahiilyaawe utthara ikhweeli co mbiiblyani. Mauricio neera: “Mahumu ahothoonyera wiira yankiwacera ni iyo phi itthu yaakikavihenre cinene. Khula ukati, ayo yaanaakuulumana. Ayo ciicammo yanlalyeeraka nkhayi ni miiva, yankihimyaceraka citthu comaana ciitthucalyaaya ukati woosoma Ibiiblya veekha ni mpaka ciicammo yaanaakithukanaka.” Melissa ni Mauricio ilelo Masaahiti a Yehova aneevaherera uvara miteko ca Nluku ukati wotheene.
Munnokhitiri umuupuwela munna o wanlokoni waahala untteela nrima nlattu wooviriha ukati ni nyuuva? (Nwehe iparaagarafu 16-19) *
16-17. Isiyani-tho inlamuliyeehu upanka wiira naakavihere akhunanihu?
16 Nhihiye waakavihera nimananna makhwaawe. (Akalas. 6:10) Munna mmoca neehaniya Leo novara nteko weemisiyonaariyu ni nokhala uttayi naamucyaawe, neera: “Ikwaha cinci, wapankeliyaka itthu yankaani paasi ukati umpheelaa cinene iyo itthwiiyo, weeva unaakhala oolipihiya. Mi kinawuupuwela nihuku naapankilyaaka asitente niikaaro. Waakhitinryaaka uphiya uwaani, mi kahokhala oonyoonyiya cinene. Uyo ukityuuyo, ahaavo anamathelana yaakilattunle urwaa waalyana. Mi kiholiyala itthu yaalilyaaka nno nihukunno, masi nanlelo kinawuupuwela inanna caakiiwelenlyaaya uratteene. Iyo yahokimaaliha!”
17 Otheene cinaanicivela mikutthaano cihu cuulupale, toko mithukumano cosirikwiitu ni ikonkereesu. Ukati wo nnyo mikutthaanonnyo, hiiva ninaakhala wamoca ni miyamunneehu ni woopela mwaha citthu ciitthucileehu. Masi moone itthu inhimyaaya arokorihu Carol, awoopenleehu mwaha. Ayo aneera: “Ukati wo mithukumano cosirikwiitu ni wokonkereesu ukati waatepaaya ukiriipa nrima.” Kontha isiyani? Arokorihu Carol anaahimya: “Hataa ukhalaka wiira kaakhala oorukureeriya ni miyamunna enci, mi kaakhala oocukulaca cinene nlattu wo woona wiira atthu otheene yaari naasimucyaaya. Uyo ukatyuuyo, mi kaaneecoona ukhala veekha.” Akhwaawe unawaarika urwaa umikutthaanoni toko nnyo wakhalaka wiira amwaaraya awula awannyaya akhwile mphiyaaruni. Nyuuva nnancuwela ntthu inkhumelenle iyo itthwiiyo? Nnoonela cani unlattula wiira arwee woona wamoca naamuciihu ikonkereesu awula nthukumano wosirikwiitu unhaleenyu ukhalana?
18. Ukati wo waalattula awula uwaakhelela akhunanihu, manannani ninlamuliyeehu weettela itthu inhimyaaya 2 Akorintu 6:11-13?
18 Nvirihe ukati nkhayi naayo. Mmananihe uviriha ukati wamoca ni miyamunna ni miyanuunu oovirikana, venci-venci ale aneecoona ukhala veekha. Ni ayo miyamunnaayo phaatthu ampheeleehu utepa ‘waatthukulela cinene mirima cihu.’ (Nsome 2 Akorintu 6:11-13. *) Nrokorihu Melisse moopenleehu mwaha, neera: “Hiiva waanaanicivela cinene miyamunna yanilattulaka wiira nirwee mmawannyaya awula wiira nirwee neettakace naamucyaaya.” Munnokhitiri umuupuwela munna o wanlokoni winyu nopheeleenyu unlattula uwannyu?
19. Ukatini untepa ureera hiiva wiikurumica wiira nikhale wamoca ni miyamunneehu?
19 Ukati nkiina, miyamunneehu anaahala upheela cinene wiira nikhale naayova. Wootakihera, mahuku ofesta co ntuninyani, miyamunneehu akiina pooti waarika ukhala wakhiviru naasimucyaaya. Miyamunna akiina pooti ukhala niicuku cinene naphiyaka nihuku naakhwiilyaawe ntthu anfentaaya cinene. Nakumihaka ukatiihu wiira nikhale wamoca ni ayo miyamunaaayo ukati unkhalaaya ooriipiya nrima, ninthoonyera wiira ninawaawacera.—Afili. 2:20.
20. Moolumo a Yesu ari nhina Matewus 12:48-50 annikavihera cani neecoonaka ukhala veekha?
20 Toko coopenleehu mwaha, cihaavo citthu cinci cinwiiriha makristau wiicoona ukhala veekha ukati nkiina. Masi nihiliyale wiira Yehova naacuwela sana-saana itthu inniira. Ciicammo, uyo naanikavihera ni ikwaha cinci uyo naakurumica miyamunneehu o wanlokoni wiira anikavihere. (Nsome Matewus 12:48-50. *) Ni hiiva neekurumicaka waawacera saana miyamunna ni miyanunnu o wanlokoni, ninhala unthoonyera Yehova wiira ninansukhuru nlattu woonivaha nloko. Hataa ukhalaka wiira ukati nkiina nyuuva nnawiicoona ukhala veekha, khweeliini khanri veekha. Khula ukati Yehova nokhala ni nyuuva!
NCIPO 46 Obrigado, Jeová!
^ par. 5 Nyuuva munneecoonaka ukhala veekha? Yakhala itthu inwiirani, pooti ukhuluvela wiira Yehova naacuwela itthu inwiirani wanrimani ni naapheela cinene wuukaviherani. Nhina ula mwahoola, ninaahala woona isiyani inlamuliyeenyu upanka wiira nhiicoone-tho veekha. Ciicammo, ninaahala wiitthuca mananna anlamuliyeehu waalipiha miyamunneehu aneecona ukhala veekha.
^ par. 4 Markus 10:29 Yesu aheerela co: “Kinoohimeryani ikhweeli: Khaavo nhala uhiya inupa, asunnawe, anumwaane, athumwaane, asaanaawe awula imatta cawe, nlattu wawaka ni nlattu wohapari comaana, 30 hinhala waakhela imaara iminya, inupa, asunnawe, anumwaane, athumwaane, asaanaawe ni imatta cawe phiyaaru va, anyokhiyaka, ni uhoolo, ukumi woohimala.”
^ par. 5 Macina makiina ahaakakhanihiya.
^ par. 6 1 Peturu 5:9 Masi, munkhottele uyova, nlipihereraka waamini winyu, ncuwelaka wiira misankiho cinoophwanyani, asunninyu ntuninyani motheene ciicammo cinawaaphwanya. 10 Masi, nnalawihale uhuva vakaani, mwaneene Nluku noonihera maana otheene hataa ahiphwanelaka, wiihanenleni uttitthima Wawe woohimala urinaawe nkhayi ni Kristu, naahala umalihera ufunttihiya winyu. Uyo naahala wuulipihani, uyo naahala wuuvahani ikuru, uyo naahala uweesani wanipuroni noolipa.
^ par. 18 2 Akorintu 6:11 Nihowuulumanani woohuuvithani itthu, akorintu, ni nihootthukulelani cinene mirima cihu. 12 Hi khanihelenle mpika wuufentani wihu, masi thi nyuuva nnohelela mpika nifento ninnithoonyereenyu. 13 Phimaana, kinwuulumanani khampa asaanaaka, ni kinwiirelani wiira toko hiiva cuufentaleehuni, nyuuva ciicammo nnitthukulele cinene mirima cinyu.
^ par. 20 Matewus 12:48 Uyo ahomwaakhula uyo ntthuuyo, eeraka: “Tipani khanle amaama ni asunnaka?” 49 Vano, ahaathoonya attharyaawe ni aheera: “Amaama ni asunnaka phaala va! 50 Kontha ule nopanka itthu impheelaaya Apaapa ari wiirimu, yooyo phiri mwanhimaaka, nrokoraka ni amaama.”
