1. Mwahaya bwaddi adhaari amodha egonaga ninga eli yekiwa?

OWINJHIVA wa iyo mudhidhi mmodha nnowiwona ninga nili yekihu. Wa athu amodha mubuwelo ola kunaliba ovira. Mbwenye amodha podi omala yaka dhowinjhivadhene. Iyo podi okala ni athu owinjhiva, naari dhigalive ndo iyo podi wiwoonaga ninga nili yekihu. Addibilihu amodha enowiwona ninga eli yekiwa yatamela mulogo muxa. Amodha ehilemela okala ni emudhiwa murudda mmodhave, mbwenye yatamela mburo wolapela aliwa wiwoonaga ninga ele yekiwa. Teto amodha enowiwona ninga eli yekiwa yamuyelela muthu enamudhiveliwa muukwani. Teto amodha, thabwathabwa ale eli axa mwibaribarini enowiwona ninga eli yekiwa yakoddiwaga obe yaharahariwaga ni amudhiwa ehili anamona a Yehova.

2. Makoho baani nnawakulihu yohudhera ela?

² Yehova ohunnona ni ohunona dhatedhene wodhela iyo. Oliye onowoona nubuwelaga wi nili yekihu, teto onofuna onikavihera ogonjhiha mubuwelo ola. Yehova ananikavihera ni makalelo baani? Ethu baani nnafunihu werana wi niikavihere iyo nannya? Ki Ethu baani nnahowelihu werana wihina nakavihere amodha mmulogoni mwehu eniwona wi eli yekiwa? Yohudhera ela nnere wawakula makoho yala.

3. Yehova antonyihedhe addi omuthuwathuwela Eliyaji?

³ Yehova onowafunana ohagalala adharaaye atene. Oliye ononona ni onoofuna onikavihera ogonjhiha mubuwelo ola.  (Sal. 145:18, 19) Kasugwa makalelo Yehova atonyihedhiye wihina omuthuwathuwela namavuhulela Eliyaji. Namavuhulela ola ororomeleya ohukalawo mudhidhi worusa wamwaana Ezarayeli. Adhaari a Yehova mudhidhi yole yera oharahariwa vamlubale, teto Eliyaji ali osogolowa wa mwiddani munlubale a Mulugu. (1 Reis 19:1, 2) Ohiya eyo Eliyaji obuwela wi oliye dihanle baahi amulabelaga Yehova ubuwela ela yomukwerebeyiha vamlubale. (1 Reis 19:10) Mulugu kalegele wihina amukavihere Eliyaji. Yehova omuruma mungero wihina amwaddele Eliyaji wi kaali yeka, yahikalawo amwaana Ezarayeli amodha ororomeleya yamulabela Mulugu. — 1 Reis 19:5, 18.

4. Marcos 10:29, 30 anoniha addi wihina Yehova onowathuwathuwela adharaaye eniwona ninga eli yekiwa?

⁴ Yehova ohunona wi athu owinjhiva wa iyo wihina nimulabele, nihirajhiha ohiya dhithu dhowinjhiva mundduli. Podi wera amudhihu kinanikavihera, teto akwihu ehili Anamona ehininyanyala. Podi wera siyela yamuthukulele peduru omukoha Yesu egi: ‘Iyo nihimala ohiya dhatedhene, wuharagani. Yowakela yehu enakale ddi?’ (Mat. 19:27) Ni makalelo apama Yesu waroromeliha anamaharaye wihina mmulogoni yere ofwanyamo emudhi yahoweliwa. (Omwileri Marcos 10:29, 30.) Teto Yehova babihu oodhulu onopaganya wihina anere wakavihera ale enafuna omulabela oliye. (Sal. 9:10) Nnafuna none dhithu dhimodha dhinukavihere owanana mubuwelo wowiwonaga ninga oli weka.

5. Ekalele ddi yapama woona makalelo Yehova anukaviheriye?

⁵ Woonege makalelo Yehova anukaviheriye. (Sal. 55:22) Werana yeyo onerege wawona makathamiho awo ni makalelo apama. Murogola ali muddiye anithaniwa Carol, * ali mwibaribarini yeka onosoriha egi: “Gubuwela makalelo Yehova agikaviheriye mundduli gifwanyiwaga makathamiho winogivaha ebaribari wihina kagili meeka. Teto kaginanganyedha wihina Yehova kadha aginyanyala.”

6. 1 Pedro 5:9, 10 anakavihera addi ale enawanana mubuwelo wowiwonaga ninga eli yekiwa?

⁶ Wubuwele makalelo Yehova anakaviheriye  addibila eniwona ninga eli yekiwa. (Omwileri 1 Pedro 5:9, 10.) Hiroshi, ddibila dhala ali mwibaribarini yakadhene yeka onowoga egi: “Mmulogoni kinasitheya onona wi atene ehikanna makathamiho. Wubuwela wi atene enowilibihedha wihina emulabele Yehova podi watodola ale eli mwibaribarini yekiwa ninga miyo.”

7. Nlobelo nnukavihere addi?

⁷ Wijhihege epaddi yomuzimuni. Eyo enovolowelavo omwaddela Yehova ele enukubanyiha. (1 Ped. 5:7) Kasugwa awogile muzombwe dhala Namona a Yehova anithaniwa Massiel, woona wi oliye aali yeka mwimudhini mwaaye athomile omulabela Yehova, Massiel wambela wiwona ninga ali yeka. Oliye onosoriha egi: “Ethu emodha egikavihere owanana mubuwelo ola waali olobela gimwaddelaga Yehova dhithu dhili mmurimani mwaga.” ‘Yehova aali babi gahimwanganyedhimi. Golobela kadda labo wooliye gimwaddelaga ethu yaali mmurimani mwaga.’

8. Omwileri Bibliya ni wubuwelela makalelo omparihedha mabasa winukavihera addi?

⁸ Kupwaze wawileri Madhu a Mulugu. Ni wubuwelege dhithu dhinawoga makalelo Yehova anudhiveliye. Bianca Murogola anaavilelana amudhaaye mwaha omuwoga obure onosoriha egi: “Wileri thalako dha mBibliyani ni dhithu dhapadduwele adhaari a Yehova efwanyiwe makathamiho ninga aaga ni wubuwela pama winogikavihera.” Makiristawu amodha enopweha mmuruni dholebela dha mBibliyani thabwathabwa dholebela dhinatodola ninga Salmos 27:10 ni Isaías 41:10. Amodha enubuwela wi onvuruwa awudiyu a Bibliya agaravariwe ni malivuru amodha enalabihedhiwa omutugumanoni onowakavihera ohubuwelaga ninga eli yekiwa.

9. Ekalele ddi yapama woona mutugumano dhatedhene?

⁹ Wilibihedhe wihina ohuyelele mutugumano newene mmodha. Onere olibihiwa ni dhohudhiha dhomutugumanoni, teto onere wanona pama addibila ni arogola. (Heb. 10:24, 25) Massiel, nimuwogilihu mundduli onosoriha egi: “Naari ngaali muthu amanyazo gahithoma ohuyelela mutugumano, teto gahithoma ovaha dhowakula dhaaga. Eyo yahigikavihera woona wi ginokosa epaddi ya mulogo.”

10. Ekalele ddi yapama wandana ni addibilihu?

¹⁰ Okanne wandana wapama ni addibila ammulogoni. Waaje makalelo owandana ni addibila ammulogoni enna mweddelo wapama. Aliwa kinahowela okala a yaka modhave ni podi okala elabo emodha. Bibliya ononubusedha wi: ‘Enna thotho baathu owuluvala.’ (Jó 12:12) Teto ale owunnuwelavo podi  ohudhera ethu ni azombwe ammulogoni. Davidi aali muzombwe ompitha Jonata, mbwenye eyo kayawerihe aliwa ohandana. (1 Sam. 18:1) Aliwa yokaviherana mmodha ni mukwaye omulabela Yehova naari efwanyiwaga makathamiho. (1 Sam. 23:16-18) Irina murogola anamulabela Yehova yeka onowoga egi: “Addibilihu ni arogolihu ammulogoni aliwa podi okala ababi obe addibila mwigumini mwehu.” “Yehova podi waweriha wi ekale emudhi nnahowelihu.”

11. Enahoweleya were ddi wihina wandane ni athu?

¹¹ Podi ohunikweyela wandana ni athu axa, thabwathabwa akala nili athu amanyazo. Ratna murogola amanyazo ahudhere ebaribari naari aharahariwaga onowoga egi: “Miyo goorumedha wi ginohowela nikavihero naamudhaga oomuzimuni.” Podi okala ethu yorusa owoga dhithu dhammurimani mwehu ni muthu, mbwenye ohumukuwa muthu dhili mmurimani mwehu podi onandaniha. Akwawo enofuna wukongomedha ni wukavihera, mbwenye yegi yande enohoweleya we wawaddele makalelo onubuweliwe.

12. Olaleya onanikavihera addi wandana ni addibila?

¹² Makalelo mamodha owandana fudhowa mmalaleyelo vamodha ni addibila ororomeleya wa Yehova. Carol, nimuwogilihu mundduli onosoriha egi: “Odhowa mmalaleyelo obe wapara mabasa bi mabasa oomuzimuni ni arogola wigikavihera wandana ni addibila owinjhiva. Yaka dhivirile baaddibila yala yalabihedhiwa ni Yehova wihina egikavihere.” Mwebaribarene wilibihedha nnerihuna wihina nandane naaddibila ororomeleya wa Yehova kahiyo weebewene. Yehova onowalabihedha akwihu yala wihina enikavihere nawanagana makathamiho, ninga nubuwelaga wi nili yekihu. — Pro. 17:17.

13. Mutholo baani enna addibila atene mmulogoni?

¹³ Mmulogoni addibila atene ehikanna mutholo wihina mwikale odhivela, murenddele ni kadda muthu ahiwonege ninga ali yeka. (João 13:35) Madhu ehu ni dhowera dhehu podi omukavihera muthu. Kasugwa ewogile murogola dhala: “Nuuhudhera ebaribari mulogo okala emudhaga, kagawedhe okala Namona a Yehova yahere yahigikavihera.” Onere ddi wihina omukavihere muthu anamulabela Yehova yeka, wiwona wi onokosa epaddi ya mulogo?

14. Wihina wandane naale eli axa mmulogoni mwehu, were ddi?

¹⁴ Okalege obajha wandana ni addibila axa. Athu axa yadha mmulogoni mwehu, nikanne elemelelo yowawakela ni malada menddi. (Rom. 15:7) Ebaribariya sowi, kannafuna walojhelave baahi Bom dia iyo ovira. Mbwenye naajege makalelo owandana ni aliwa. Bumwahaya okale apama ni wonihe wi onowapwatha ni onowathuwathuwela ale eli axa mmulogoni mwehu. Wanone makathamiho baani enafwanyiwiwa, mbwenye kuwawaddege wihina yuwaddele muselu ehinafuniwa wuwaddela. Onone wihina athu amodha onowarusa owoga dha mmurimani mwewa, bumwahaya okale pasope wihina ohawaddihedhe werana yeyo. Wihina onone makalelo enubuweliwa waweregena makoho nuupama, wawonihaga wi onowavaha thima, teto yawogaga wavuruwanege pamadhene dhowakula dhewa. Motajhiha nikoho napama nakale: Ohudhere ebaribari ni makalelo baani?

15. Addibila yakovelele mabasiwa enakavihere addi amodha mmulogoni?

¹⁵ Addibila yakovelele mabasiwa thabwathabwa anamaholela mulogo, yonihaga wi enowathuwathuwela athu amodha mulogo  watene onakala wolibeene. Melissa aleliwe mwibaribarini naamaye onosoriha egi: “Kaginawedha osorihawa wodhela addibila yaali ababi yaka dhowinjhivadhene mwigumini mwaga, aliwa yogithuwathuwela ni yojha mudhidhi ni miyo. Gafunaga othapanya gahinona wi enere ogivuruwana”. Mauricio muzombwe iwoona ninga ali yeka, namahudhihaye nuuhiya ebaribari onosoriha egi: “Anamaholela mulogo wooniha wi yogithuwathuwela eyo yogikavihera. Aliwa yoothapanya ni miyo. Teto yolaba ni miyo mmabasani oolaleya, ni yowoga dhithu dhathima yahudheriwa ni ohudhera wewa wavayekiwa, malabo mamodha nojogaresa vamodha.” Melissa ni Mauricio peeno enna omulabela Yehova mmabasani amudhidhi wamutene.

16-17. Ethu baani nnafunihu werana wi nakavihere amodha?

¹⁶ Wavahe nikavihero enahoweliwa. (Gál. 6:10) Leo analaba ninga misiyonariyu wolapela ni amudhaaye onowoga egi: “Malabo mamodha ethu enahoweleya fukaviheriwa mwamakalelo okweya.” “Miyo ginowubuwela nlabo gafuthukuwiligimi ni karo. Nufiya vaade gahinyanyuwaga vamlubale. Mudhidhi yole anamatelana dhala ogithanela vadeviwa wihina naajhe vamodha. Kaginubuwela ethu najhilegihu labo nenne, mbwenye kaginadduwala makalelo yagivuruwaniwa. Aliwa nugivuruwana miyo oliba maningo!”

¹⁷ Iyo atene nnodhiveliwa okala vamusonkanoni wa malabo mararu obe wa nlabo nimodha, mudhidhi dhenda iyo nnokala ni addibilihu nthapanyedhaga wodhela dhithu nihudherihu mmwahani dha vathaddo nivuruwanihu. Mbwenye kasugwa ethu awogile Carol, nimuwogilihu mundduli, “Musonkano wa malabo mararu ni wa nlabo nimodha kuwagidhivela.” Mwahaya bwaddi? “Ebaribari wi gokanna addibila owinjhiva.” “Mbwenye omoona kadda ddibila obe kadda murogola ni emudhaye kayali ethu yokweya. Bu mudhidhi yola gonesimi ninga gili meeka.” Amodha yorusiwa woona mutugumano dhenda nuumuyelela mwariwa obe mamuniwa muukwani. Ohumunona muthu anafwanyiwa makathamiho yala? Ononamo avi omwithana wihina mudhowe omusonkanoni wa malabo mararu obe wa nlabo nimodha vamodha?

18. Nnavirihemo addi yolebela ya 2 Coríntios 6:11-13 nawakelaga addibila mmavademwihu?

 ¹⁸ Ojhege mudhidhi naaliwa. Ojhege mudhidhi ni addibila vamodha ni arogola ohiyana iyana, thabwathabwa naale eniwona ninga eli yekiwa. Nnafuna “nifugule murima wehu” thabwathabwa ni addibila yala. (Omwileri 2 Coríntios 6:11-13.) Melissa nimuwogilihu mundduli onowubuwela: “Iyo nodhiveliwesa addibila yanithanela mmawaniwa obe yawoga wi ndoweni nedde olenddo vamodha ni emudhiwa.” Onowedha omubuwela ddibila ammulogoni mwawo onafuniwe omwerela ofuru yola?

19. Mudhidhi baani addibilihu enathabwiwa onihowela wi nikale ni aliwa?

¹⁹ Mudhidhi mmodha addibilihu enere ohowela okala ni iyo. Yakala malabo a festa aliwa podi ofunaga wihina ekale ni iyo ohiya ni amudhiwa ehili Anamona. Amodha enowukuuwa nafiya nlabo akwile mmudhiwa. Wivahedha wihina nikale ni aliwa malabo yala obe mudhidhi yola enowoniha wihina “nnowathuwathuwela.” — Fil. 2:20.

20. Madhu asorihile Yesu va Mateus 12:48-50 enaanikavihere addi naambela wubuwela ninga nili yekihu?

²⁰ Ninga nihudherihu dhihikalawo dhithu dhowinjhiva dhinamweriha mukiristawu wiwoonaga ninga ali yeka. Mbwenye kanidduwale wihina Yehova onowoona dhithu nnubuwelihu. Ohiya eyo oliye ononivaha nikavihero nnahowelihu mudhidhi wowinjhivene wodhela addibilihu amunroromeloni. (Omwileri Mateus 12:48-50.) Wihina nimutonyihedhe Yehova wi nnovaha thima nikavihero ananivahiye wodhela mulogo nerena ethu nnandihu wihina nikavihere emudhi yehu yomuzimuni. Wambela wubuwela ninga oli wekawo, onone wihina we kuli weka, mwaha wi Yehova ali epaddi yawo.