1. Bõe yĩng t’a Zeova Kaset soab tõe n wa getẽ t’a yaa a yembre?

TÕND fãa la bal sũy mi n sãamame d sẽn get tɩ d yaa d yembr yĩnga. Sãnda nengẽ, pa kaoosd ye. La kẽer nengẽ kaoosdame. D tõe n bee ne neb wʋsg n yaool n baas n getẽ tɩ d yaa d yembre. Kẽer toeema tiginga, tɩ yaa toog ne-b tɩ b paam zo-rãmb b tigin-paalgã pʋgẽ. Nina me tõe n bee ne a zak rãmb tɩ b zemsd taab hal sõma, la a sã n wa yik n tɩ vɩ zĩig a to, a getame t’a lebga a yembre, tɩ sãamd a sũuri. Sãnda yaa b nin-nongr n maan kaalem, tɩ b sẽn pa le tõe n paam n be ne-a wã sãamd b sũy wʋsgo. Kiris-neb kẽer getame tɩ b lebga b yembre, sẽn yɩɩd fãa, sẽn bãng-b sɩdã tɩ nan pa kaoosã, bala, b zakã neb sẽn pa a Zeova Kaset rãmbã la b pĩnd zo-rãmbã raag-b lame n base, wall b namsd-b b tũudmã yĩnga.

2. Sogs-bʋs la d na n leoke?

² A Zeova mii tõnd yɛlã fãa la a wʋmd b võore. D sũy sã n wa sãam d sẽn get tɩ d yaa d yembr yĩnga, a mii rẽ, la a ratame me n sõng-do. Wãn to la a Zeova sõngd tõndo? Bõe la d tõe n maan tɩ sõng-do? La wãn to la d tõe n sõng d tigingã neb nins sũy sẽn sãam b sẽn get tɩ b yaa b yembr yĩnga? Bɩ d bao n leok sogs-kãensã.

3. Bõe la a Zeova maan n wilg t’a Eli yell sɩd pak-a lame?

³ A Zeova ratame t’a nin-buiidã fãa sũy yɩ noogo. A pẽe tõnd ned kam fãa. D sũy sã n wa sãame, wall yaa d raood n komse, a neeme. (Yɩɩn. 145:18, 19) Bɩ d tẽeg a Zeova sẽn ges no-rɛɛs a Eli yell to-to wã. Ra-kãngã sẽn da maand sɩd  ne a Zeova wã vɩɩmda wakat sẽn yɩ toog wʋsg Israyɛlle. Bɛɛb sẽn tar pãng la sẽn kɩɩsd Wẽnnaam n da tolg n namsd a Zeova nin-buiidã, hal n da baood a Eli n na n kʋ. (1 Rĩm. 19:1, 2) Tõe tɩ bũmb a to me sẽn da namsd a Eli, yaa a sẽn da tẽed t’a Zeova no-rɛɛsdbã sʋka, yaa yẽ a ye bal n da ket n vɩ wã. (1 Rĩm. 19:10) A Zeova maana bũmb tao-tao n na n sõng a Eli. A tʋma malɛk t’a tɩ keng a no-rɛɛsã pɛlga, t’a bãng t’a pa a yembre, la tɩ neb wʋsg sẽn da yaa wẽn-sakdb n ket Israyɛlle.—1 Rĩm. 19:5, 18.

4. Wãn to la Mark 10:29, 30 wã wilgd tɩ neb nins sẽn pa le tar zo-rãmb bɩ zak rãmb sẽn na n sõng-bã yell paka a Zeova?

⁴ A Zeova miime tɩ neb nins sẽn yãk yam n na n tũ yẽ wã sʋka, kẽer segd n sak n bõna bũmb wʋsgo. Tõe tɩ b zak rãmb sẽn pa tũud a Zeova, wall b zo-rãmb na n daag-b lame n base. Daar a ye, tʋm-tʋmd a Pɩyɛɛr soka a Zeezi yaa: “Tõnd basa bũmb fãa n tũ yãmba. Woto wã, bõe la tõnd na n paame?” (Mat. 19:27) Tõe t’a Pɩyɛɛr da maanda yɩɩre. A Zeezi maaga a yĩng n wilg a karen-biisã tɩ b na n paama tẽed-n-taas sẽn na n lebg wa b zak rãmba. (Karm-y Mark 10:29, 30.) A Zeova sẽn yaa d saasẽ Ba wã pʋlmame t’a na n sõnga neb nins sẽn dat n tũ-a wã. (Yɩɩn. 9:11) D ges bũmb a wãn d sẽn tõe n maan n paam a Zeova sõngre, d sã n wa getẽ tɩ d yaa d yembre.

5. Y sã n tẽegd a Zeova sẽn maand bũmb nins n sõngd yãmba, wãn to la rẽ na n naf-yã?

⁵ Tagsd-y-yã a Zeova sẽn maand bũmb nins n sõngd yãmbã yell n tɩ yɩɩda. (Yɩɩn. 55:23) Woto na n sõng-y lame tɩ y bãng tɩ y pa y yembr ye. A Karoll * yaa sam-bi-poak sẽn pa kẽ kãadem. A zakã neb sʋka, yẽ a ye bal n tũud a Zeova. Ad a sẽn yeele: “M sã n lebg n tẽeg sẽn loogã, la m tags n ges a Zeova sẽn sõng maam to-to m zu-loeesã pʋgẽ wã, sɩd sõngda maam tɩ m pa get tɩ m yaa m yembr ye. Kɩtdame tɩ m bas m yam t’a Zeova na n ket n sõngda maam wakat fãa.”

6. Wãn to la 1 Pɩyɛɛr 5:9, 10 tõe n sõng neb nins sũy sẽn sãame, b sẽn get tɩ b yaa b yembr yĩngã?

 ⁶ Tẽegd-y bũmb nins a Zeova sẽn maand n sõngd y tẽed-n-taas nins sũy sẽn sãame, b sẽn get tɩ b yaa b yembr yĩngã. (Karm-y 1 Pɩyɛɛr 5:9, 10.) D gom saam-biig a ye yʋʋr sẽn boond t’a Irosi yelle. Yʋʋm wʋsg la woto a sẽn tũud a Zeova. A zakã neb sʋka, yẽ a ye bal n tũud a Zeova. Ad a sẽn yeele: “Tigingã pʋgẽ, d nee vẽeneg tɩ ned fãa tara a zu-loeese. D sẽn mi tɩ d ned kam fãa maanda a sẽn tõe n na n kell n tũ a Zeova wã, kengda d tẽed-n-taas nins sẽn yaa b yembr b zakã pʋgẽ n tũud a Zeova wã raoodo.”

7. Wãn to la pʋʋsgã tõe n sõng yãmba?

⁷ Wɩngd-y ne pʋʋsgo, Biiblã karengo, la tigissã kẽnde. Pelg-y y pʋg n togs a Zeova bũmb nins sẽn namsd yãmbã. (1 Pɩy. 5:7) A Masiyɛll yaa saam-bi-poak sẽn yaa pʋg-sadã. Ad a sẽn yeele: “Mam sũur sã n wa sãam m sẽn get tɩ m yaa m yembr yĩnga, bũmb sẽn sõngd maam n tɩ yɩɩd yaa m sẽn pelgd m pʋg n pʋʋsd a Zeova wã.” A sẽn wa n yãk yam n na n tũ a Zeova wã, a ra getame t’a yaa yembre, a zakã ned baa a ye sẽn pa tũud a Zeova wã yĩnga. A paasame: “A Zeova n yaa m Ba meng-menga, tɩ m pʋʋsd-a naoor wʋsg daar fãa, n togsd-a sẽn be m sũurẽ.”

8. Wãn to la Biiblã kareng la a zug bʋgsg tõe n sõng yãmba?

⁸ Karemd-y Biiblã daar fãa, n bʋgsd kibay nins sẽn wilgd t’a Zeova nonga yãmbã zugu. Sam-bi-poak a ye yʋʋr sẽn boond t’a Biyãnka zakã rãmb ra gomda goam n dat n koms a raoodo. Ad a sẽn yeele: “Mam sẽn karemd Biiblã kibay la kibay sẽn wilgd a Zeova Kaset rãmb sẽn mao ne m zu-loɛɛgã buudã, la m bʋgsd rẽ zugã sɩd sõngda maam.” Kiris-neb kẽer zãmsda vɛrse-rãmb sẽn kengd raood wʋsg ne zugu. Wala makre, Yɩɩn-sõamyã 27:10 ne Ezayi 41:10. Kẽer sã n wa segend b tigissã wall b karemd Biiblã, b rengd n kelga a goamã b sẽn dɩkã, tɩ rẽ kɩt tɩ b pa le sidgd wʋsgo, b sẽn get tɩ b yaa b yembr yĩng ye.

9. Wãn to la tigissã kẽnd tõe n naf yãmba?

⁹ Maand-y y sẽn tõe fãa, n kẽnd tigissã n pa vaandẽ ye. Y na n paama zãmsg sẽn na n keng y raoodo, la y paam me n bãng y tẽed-n-taasã sõma. (Ebre. 10:24, 25) Saam-bi-poak a Masiyɛll ning yell d sẽn gomã yeelame: “Baa ne m sẽn yaa yãnd-zoetã, m yãka yam n na n kẽnd tigissã fãa, la m modgd n kõt leoor tigissã sasa. Woto kɩtame tɩ maam ne tigingã nebã zood tar pãnga.”

10. Bõe yĩng tɩ tar yõod tɩ d bao kiris-neb tẽeb sẽn tar pãng zoodo?

 ¹⁰ Bao-y kiris-neb tẽeb sẽn tar pãng zoodo. Yõg-y zood ne tigingã neb y sẽn tõe n dɩk yam b nengẽ, baa yaa neb yʋʋm sẽn yɩɩd yãmba, bɩ sẽn pa yãmb buudã neba. Biiblã tẽegda tõnd tɩ yam bee “nin-kẽembã” nengẽ. (Zoob 12:12) Sẽn kʋʋl-bã me tõe n zãmsa bũmb wʋsg neb nins yʋʋm sẽn pa ta bãmbã nengẽ. A Davɩɩd yʋʋmã ra pa kolg a Zonatã, la rẽ pa gɩdg tɩ b pa yɩ zo-rãmb hakɩɩk ye. (1 Sãm. 18:1) B sõnga taab n kell n maan a Zeova raabã, baa zu-loe-kɛgems pʋsẽ. (1 Sãm. 23:16-18) Saam-bi-poak a ye yʋʋr sẽn boond t’a Irina zakã ned baa a ye pa tũud a Zeova ye. A yeelame: “D saam-biisã tõe n sɩd lebga wa d roagdba, d ba-bi-rap la d ba-bi-pogs meng-menga. D sã n wa rat sõngre, a Zeova tõe n tũnuga ne-b n sõng-do.”

11. Bõe la y segd n maan n paam zo-rãmb hakɩɩka?

¹¹ Yɩl n yõg zood ne ned tõeeme n pa yɩ nana, sẽn yɩɩd fãa, f sã n yaa yãn-zoɛta. A Ratna yaa saam-bi-poak sẽn yaa yãn-zoɛta. A saka sɩdã, baa ne b sẽn nams-a rẽ yĩngã. A yeelame: “M da segd n sak n deegame tɩ yaa tɩlɛ tɩ m paam m tẽed-n-taasã sõngre.” Tõe n yɩɩ toog tɩ d togs ned d sũurẽ yelle. La d sã n maan woto, d tõe n lebga zo-rãmb meng-menga. Y zo-rãmbã rat n kenga y raood la b sõng-yã. La rẽnda yãmb wilg-b y sẽn dat tɩ b maan n sõng-yã.

12. Wãn to la koɛɛgã mooneg tõe n sõng-y tɩ y paam zo-rãmb hakɩɩka?

¹² Bũmb a ye d sẽn tõe n maan n paam zo-rãmba, yaa d sẽn na n moond koɛɛgã ne d tẽed-n-taasã. A Karoll yell d sẽn gomã yeelame: “Mam sẽn naagd saam-bi-pogs a taabã tɩ d moond koɛɛgã la d tʋmd a Zeova tʋʋm a taabã, kɩtame tɩ m paam zo-rãmb hakɩɩka. Sẽn na maan yʋʋma, a Zeova tũnuga ne zo-kãensã n sõng maam.” Y sã n yõg zood ne kiris-neb tẽeb sẽn tar pãnga, na n naf-y-la wʋsgo. A Zeova tũnugda ne zo-rãmb a woto buud n sõngd yãmb tɩ y tõe n mao ne sũ-sãamse, wala makre, y sũur sã n wa sãam y sẽn get tɩ y yaa y yembr yĩnga.—Yel. 17:17.

13. Bõe la tigingã ned kam fãa segd n maane?

¹³ Tigingã ned fãa segd n sõngame tɩ nonglem la laafɩ zĩnd tigingã pʋgẽ, tɩ ned ra wa getẽ t’a yaa a yembre, tɩ sãamd a sũur ye. (Zã 13:35) Tõnd tʋʋm-tʋmdɩ wã la d no-goamã tõe n kenga d taabã raoodo. Saam-bi-poak a ye yeelame: “M sẽn bãng sɩdã, tigingã neb lebga m zak rãmba. Sã n pa b sẽn sõng maamã, m da pa na n tõog n lebg a Zeova Kaset soab ye.” Bõe la y tõe n maan n sõng d tẽed-n-taas nins sẽn yaa b ye b zakã neb sʋk n tũud a Zeova wã, tɩ b bãng tɩ tigingã neb nong-b lame?

14. Bõe la y tõe n maan n yõg zood ne nin-paalsã?

¹⁴ Yõg-y zood ne neb nins sẽn wa tigingã pʋgẽ paalmã. D reegd-b sõma, n pʋʋsd-b noog-noogo. (Rom. 15:7) La rẽ bal pa sek ye. D sẽn dat yaa d wa lebg b zo-rãmb hakɩɩka. Rẽ wã, d wilg nin-paalsã tɩ d nand-b lame, la tɩ b yell sɩd pak-d lame. D bao n bãng zu-loees nins b sẽn maood ne wã, la d gũus n da wa sok-b sogsg n na n bãng yɛl sẽn pa pak-d ye. Tõe n yɩɩ toog ne kẽer tɩ b sak n togs-d sẽn be b sũurẽ. Woto wã, yɩta sõma tɩ d ra pẽdg-b n dat tɩ b gom ye. D sok-b sogsg ne yam, la d maag d yĩng n kelg b sẽn na n leok to-to  wã. Wala makre, d tõe n sok-b lame n gese wãn to la b bãng sɩdã.

15. Wãn to la kiris-neb nins tẽeb sẽn bɩ wã tõe n sõng neb a taabã tigingã pʋgẽ?

¹⁵ Kiris-neb nins tẽeb sẽn bɩ wã, sẽn yɩɩd fãa kãsem-dãmbã sã n wilgdẽ tɩ tigingã neb yell pak-b lame, na n sõnga b fãa tɩ b tẽebã paam pãnga. Saam-bi-poak yʋʋr sẽn boond t’a Melisa ma wã n sõng-a t’a bãng sɩdã. Ad a Melisa sẽn yeele: “M sũur nooma wʋsg ne saam-biis nins sẽn yɩ wa m ba-rãmb tigingã pʋgẽ yʋʋm wʋsgã. M sã n wa rat ned n togs m yelle, ned m sẽn na n gom ne pa kongd ye.” A Morisiyo sẽn yaa bi-bɩɩgã Biibl karen-saambã wa n basa sɩdã, t’a Morisiyo sũurã sãam hal wʋsgo. Ad a sẽn yeele: “Kãsem-dãmbã sẽn wilg tɩ m yell pak-b lame wã sõng-m-la wʋsgo. B ra wae n sõsda ne maam. B ra naagda maam n moond koɛɛgã, b ra wilgda maam bũmb b sẽn karem Biiblã pʋgẽ tɩ yɩ-b noogo, la b ra naagd maam n maand ɛspoor menga.” A Melisa ne a Morisiyo fãa wa n kẽesa b meng zãng a Zeova tʋʋmdã pʋgẽ.

16-17. Bõe la d tõe n maan n sõng d taabã?

¹⁶ Maand-y bũmb takɩ n sõngd-ba. (Gal. 6:10) A Lewo yaa misioneere, n be tẽng sẽn zãr ne a ba-yirã. A yeelame: “Naoor wʋsgo, ned sã n maan f neer wakat sẽn zemse, baa yaa bõn-kɩdg la a maan-yã, kengda raood wʋsgo. M tẽrame tɩ daar a ye mam fãoo ne m mobillã. M sẽn wa n ta yirã, m da maanda yɩɩr wʋsgo. La saam-biig a ye ne a pag n bool maam b zakẽ wã tɩ d naag taab n dɩ. M pa le tẽr sẽn yɩ rɩɩb ning ye. La m ket n tẽrame tɩ b maaga b yĩng n kelg-m neere. D sẽn wa n sõs n sa wã, m yɩɩrã booga wʋsgo.”

¹⁷ D fãa nonga tigissã la tigis-kãsemsã, bala d paamda sẽk n be ne taaba, la d gomd bũmb nins d sẽn kelgã yell ne taaba. A Karoll yell d sẽn gomã yeelame: “Tigis-kãsemsã sasa, yaa toog wʋsg ne maam.” Bõe yĩng t’a yet woto? A paasame: “Baa ne m sẽn be m tẽed-n-taas kobs bɩ tusa sʋkã, m sã n get b fãa sẽn wae n zĩ ne b zags rãmb tɩ m yaool n yaa m yembrã, sãamda m sũurã wʋsgo.” Nina pag wall a sɩd kũum poor me, tigis-kãseng  ning a sẽn na n kẽng rẽ poorã pa nana ne-a ye. Yãmb mii ned sẽn be yell a woto pʋgẽ bɩ? Bõe yĩng tɩ y pa na n bool-a t’a wa naag yãmb ne y zakã rãmb tigis-kãseng ning sẽn watã sasa?

18. D sã n na n bool ned d zakẽ, wãn to la d tõe n tũ 2 Korẽnt rãmb 6:11-13 sẽn yetã?

¹⁸ Baood-y sẽk n zĩndid ne-ba. Y sã n na n kok pemsem, bɩ y wae n boond saam-biis la saam-bi-pogs toor-toor tɩ b wa naag yãmba. Sẽn yɩɩd fãa, b rãmb nins sẽn yaa b yembrã. D segd n “paka d sũyã yaleng” ne nin-kãensã. (Karm-y 2 Korẽnt rãmb 6:11-13.) A Melisa yell d sẽn gomã yeelame: “D zo-rãmb sã n bool tõnd b zakẽ fãa, bɩ n bool-d tɩ d wa tũ-b n tog sore, yaa sũ-noog wʋsg ne-do.” Ned bee yãmb tigingã pʋgẽ y sẽn tõe n bool y zakẽ, n maan-a sãand bɩ?

19. Sasa bʋs la d tõe n zĩnd ne d tẽed-n-taasã tɩ naf-b wʋsgo?

¹⁹ Wakat kẽer n be, tɩ d tẽed-n-taag sã n paam n na n zĩnd ne-do, bɩ na n yɩ-a noog wʋsgo. Tigã wakate, tõe n yɩɩ toog ne kẽer tɩ b zĩnd ne b zakã neb sẽn pa a Zeova Kaset rãmbã. Yʋʋmdã ray kẽer me, tõe n yɩɩ toog wʋsg ne sãnda, wala makre, yʋʋmdã daar ning b nin-nongr sẽn maan kaalmã. D sã n baood sẽk n zĩndid ne d tẽed-n-taas nins sẽn be yell a woto buud pʋgẽ wã, wilgdame tɩ d ‘geta b yell sõma.’—Fili. 2:20.

20. D sũur sã n wa sãam d sẽn get tɩ d yaa d yembr yĩnga, wãn to la a Zeezi goam nins sẽn be Matiye 12:48-50 wã tõe n sõng-do?

²⁰ Bũmb wʋsg n tõe n wa kɩt tɩ kiris-ned getẽ t’a yaa a yembre, t’a sũur sãamdẽ. La d ra tol n yĩm t’a Zeova mii rẽ fãa ye. Wakat ninga, a tũnugda ne d tẽed-n-taasã, n kõt tõnd sẽn yaa tɩlɛ ne-dã. (Karm-y Matiye 12:48-50.) Tõnd me tõe n wilga a Zeova tɩ d sũur nooma ne d sẽn paam n be tigingã pʋgẽ wã, n maand d sẽn tõe fãa n teend d tẽed-n-taasã. Baa d sẽn tõe n wa getẽ tɩ d yaa d yembr tɩ d sũur sãamdẽ wã, d pa tol n yaa d yembr ye. A Zeova bee ne-d wakat fãa.