1. ¿Keyej seki itaixpantijkauan Jiova kemansa kimachiliaj ke ininselti yetokej?

TINOCHIN kemansa tikmachilianij ke toselti tietokej. Sekin amo uejkauak ijkon momachilijtokej, sayoj ke oksekin kemaj. Sekin kimachiliaj ke ininselti maski miakej iniuan yetokej. Oksekin moajsij itech se yankuik nechikol uan ouij kinkisa momatiskej. Sekin momattoyaj kichiuaskej miak taman iniuan ininchankauan uan keman uejka mokaltalitij kimachiliaj ke ininselti. Oksekin momikilij se akin semi kitasojtayaj uan semi kielnamikij. Uan seki tokniuan, okachiok akin yankuixtok mochiujkej itaixpantijkauan Jiova, kimachiliaj ke ininselti porin ininchankauan oso akin kuali iniuan mouikayaj akin amo itaixpantijkauan Jiova kinixnamikij.

2. ¿Katiyejua netajtanilmej tiknankiliskej itech nejin tamachtilis?

² Jiova kuali techixmati uan techajsikamati. Yejuatsin kimati keman tikmachiliaj ke toselti tietokej uan kineki techpaleuis. Itech nejin tamachtilis tiknankiliskej nejin netajtanilmej: ¿keniuj techpaleuia Jiova?, ¿toni uelis tikchiuaskej tein techpaleuis maj amo tikmachilikan ke toselti tietokej? uan ¿keniuj uelis tikinpaleuiskej tokniuan itech nechikol akin kimachiliaj ke ininselti?

3. ¿Keniuj kinextij Jiova ke ika motekipachouaya Elías?

³ Jiova kineki maj nochin itekitikauan yolpakikan. Yejuatsin touan yetok uan kiita keman timotayokoltiaj (Sal. 145:18, 19). Maj tikitakan keniuj ika motekipachoj tanauatijkej Elías uan keniuj kipaleuij. Elías nemik itech seki tonalmej keman panotoya miak ouijkayomej itech xolal Israel. Taltikpakneminij akin kipiayaj ueyi tanauatil akin semi kiixnamikiaj Dios kintajyouiltiayaj  itekitikauan uan kinekiaj kimiktiskej Elías (1 Rey. 19:1, 2). Elías kinemiliaya ke sayoj yejua mokauaya kemej itanauatijkauj Jiova uan nejon semi kitayokoltiaya (1 Rey. 19:10). Jiova niman kipaleuij Elías: kititanik se ángel maj kimatiltiti ke amo yetoya iselti uan ke miakej israelitas kiueyichiuayajok Jiova (1 Rey. 19:5, 18).

4. ¿Keniuj kinextia Marcos 10:29, 30 ke Jiova ininka motekipachoua akin ininchankauan oso akin kuali iniuan mouikayaj amo kinpaleuiajok?

⁴ Jiova kimati ke keman tikixtalijkej tiktekitiliskej monekik tikauaskej miak taman. Tochankauan uan akin kuali iniuan timouikayaj akin amo itekitikauan Jiova xa amo techpaleuiajok. Kemej tatitanil Pedro xa kitekipachouaya nejon, se tonal kitajtanij Jesús: “Tejuan tikauke ya nochi ten tikpiayaj uan timitstoktiliaj [...]. ¿Uan toni tejuan tikseliske?” (Mat. 19:27). Ika netasojtalis, Jesús kiniluij itatojtokakauan ke tokniuan mochiuaskiaj kemej ininchankauan (xikonixtajtolti Marcos 10:29, 30). Uan toTajtsin Jiova kijtoua ke kinpaleuis akin kitekitiliaj (Sal. 9:10). Maj tikitakan keniuj uelis tikseliskej inepaleuil Jiova keman tikmachiliaj ke toselti tietokej.

5. ¿Keyej semi kuali komo tiknemiliaj keniuj techpaleuijtok Jiova?

⁵ Maj tiknemilikan keniuj techpaleuijtok Jiova (Sal. 55:22). Nejin techpaleuis maj tikitakan ke amo toselti tietokej. Carol, * se tokniuj siuat akin amo kipia inamik uan ichankauan amo itaixpantijkauan Jiova, kijtoua: “Keman niknemilia keniuj nechpaleuiani Jiova keman nikpiani ouijkayomej, nechpaleuia maj amo nikmachili ke noselti nietok. Nejon kichiua maj nitakuaujtamati ke Jiova nochipa nechpaleuis”.

6. ¿Keniuj 1 Pedro 5:9, 10 uelis kinyolchikauas akin kimachiliaj ke ininselti yetokej?

⁶ Maj tiknemilikan keniuj kinpaleuijtok Jiova okseki tokniuan akin no kipiaj ouijkayomej (xikonixtajtolti 1 Pedro 5:9, 10). Hiroshi, se tokniuj takat akin ichankauan amo itaixpantijkauan Jiova, kijtoua: “Itech nechikol niman moita ke tinochin tikpiaj ouijkayomej. Tikmatiskej ke tinochin timochikaujtokej tiktekitiliskej Jiova techyolchikaua akin tochankauan amo itaixpantijkauan”.

7. ¿Keniuj mitsonpaleuia tejuatsin netataujtil?

 ⁷ Maj nochipa tiktataujtikan Jiova, maj nochipa tikixtajtoltikan Biblia uan maj nochipa tiakan nechikolmej. Moneki tikiluiskej Jiova keniuj timomachiliaj (1 Ped. 5:7). Maj tikitakan tein kijtoj Massiel, se ichpoch akin keman peuak kitekitilia Jiova kimachilij ke iselti mokauak porin ichankauan amo kitekitiliayaj. Yejua kijtoj: “Se taman tein okachi nechpaleuij maj amo nikmachiliani ke noselti nietoya yejua keman nochipa niktataujtiaya Jiova. Nikitaya kemej noPopaj. Miakpa niktataujtiaya mojmostaj uan nikiluiaya keniuj nimomachiliaya”.

8. ¿Keniuj mitsonpaleuia tejuatsin tikonixtajtoltis iTajtol Dios uan itech tiontanemilis?

⁸ No moneki nochipa tikixtajtoltiskej iTajtol Dios uan itech titanemiliskej tajkuilolmej tein techelnamiktiaj ke Jiova semi techtasojta. Bianca, se tokniuj siuat akin semi ouij tein kipanoua porin ichankauan kijtouaj miak taman tein amo kiyolchikaua, kijtoua: “Semi nechpaleuia keman nikixtajtoltia itech Biblia uan itech amaixmej tein kipanokej seki itekitikauan Jiova akin kipiakej ouijkayomej kemej tein nejua nikpia uan itech nitanemilis tein nikixtajtoltia”. Seki tokniuan momamachtiaj tajkuilolmej tein teyolchikauaj kemej uelis kielnamikiskej, kemej Salmo 27:10 uan Isaías 41:10. Okseki tokniuan kikakij tein moitas itech nechikol oso tein monekia kiixtajtoltiskej itech Biblia. Kiitanij ke nejon kinpaleuia maj amo semi kimachilikan ke ininselti yetokej.

9. ¿Keniuj mitsonpaleuia tejuatsin tionyas nechikolmej?

⁹ Moneki timochikauaskej nochipa tiaskej nechikolmej porin techpaleuiaj maj okachi kuali tikinixmatikan tokniuan uan tein motamachtia techyolchikaua (Heb. 10:24, 25). Massiel, akin ika titajtojkej itech párrafo 7, kijtoua: “Maski amo semi nitajtouaya, nikixtalij nias nochi nechikolmej uan nitanankilis maski sayoj sepa. Nejon nechpaleuij maj nikmachiliani ke nikatka semej tokniuan itech nechikol”.

10. ¿Keyej moneki tiktemoskej kuali timouikaskej iniuan tokniuan akin kuali mouikaj iuan Jiova?

¹⁰ Maj tiktemokan kuali timouikaskej iniuan tokniuan akin kuali mouikaj iuan Jiova. Maj tiktemokan kuali timouikaskej iniuan tokniuan akin techkauiliaj se kuali neskayot, maski amo touanpoyuan oso okseko kayomej. Biblia techelnamiktia ke akin xiuejkejya “kipiaj tamatilis” (Job 12:12). Sayoj ke telpochmej uan ichpochmej no uelis kinmachtiskej miak taman tokniuan akin xiuejkejya. Jonatán miak xiujmej kiyekanaya David, maski ijkon, semi kuali mouikakej (1 Sam. 18:1). Yejuan semi mopaleuijkej, yejua ika uelik kisentokakej kitekitilijkej Jiova maski kipiakej uejueyi ouijkayomej (1 Sam. 23:16-18). Irina, se tokniuj siuat akin ichankauan amo itaixpantijkauan  Jiova, kijtoua: “Tokniuan uelis mochiuaskej kemej totatuan oso toikniuan. Jiova uelis kichiuas maj mochiuakan kemej tochankauan”.

11. ¿Keniuj uelis kuali timouikaskej iniuan oksekin?

¹¹ Sekin xa ouij kinkisa kitemoskej kuali mouikaskej iniuan oksekin, okachiok komo amo semi tajtouaj. Maj tikitakan tein kijtoua Ratna, se tokniuj siuat akin amo semi tajtoua akin semi kiixnamikkej keman peuak momachtia Biblia. Yejua kijtoua: “Monekik nikajsikamatis ke monekia maj tokniuan nechpaleuianij”. Xa ouij techkisa tiktapouiskej se tokniuj keniuj timomachiliaj, sayoj ke yejua nejon techpaleuis maj peua timouikakan iuan. Akin kuali iniuan timouikaj kinekij techyolchikauaskej uan techpaleuiskej, sayoj ke moneki tikinpaleuiskej maj kimatikan keniuj uelis kichiuaskej nejon.

12. ¿Keniuj techpaleuia keman titanojnotsaj iniuan okseki tokniuan?

¹² Keman titanojnotsaj iniuan okseki tokniuan techpaleuia maj peua timouikakan iniuan. Carol, akin ika titajtojkej itech párrafo 5, kijtoua: “Peuak kuali nimouika iniuan miakej tokniuan siuamej keman iniuan nitanojnotsaya uan keman tikchiuayaj okseki tekimej itech inechikol Jiova. Ijkon kemej panouanij xiujmej, Jiova nechpaleuiani inintechkopa nejon tokniuan”. Semi techpaleuia keman timochikauaj kuali timouikaskej iniuan tokniuan akin kuali mouikaj iuan Jiova. Yejuatsin techpaleuia inintechkopa keman amo kuali timomachiliaj, kemej neskayot, keman tikmachiliaj ke toselti tietokej (Prov. 17:17).

13. ¿Toni moneki tikchiuaskej tinochin?

¹³ Tinochin moneki titapaleuiskej maj onka yolseuilis uan netasojtalis itech nechikol. Nejon tapaleuis maj amo akin kimachili ke iselti yetok (Juan 13:35). Tein tikchiuaskej uan tein tikijtoskej uelis semi kinyolchikauas oksekin. Se tokniuj siuat kielnamiki: “Keman nikixmatik tein Biblia tamachtia, tokniuan mochiujkej kemej nochankauan. Komo yejuan amo nechpaleuiskiaj, amo ueliskia nimochiuas itaixpantijkauj Jiova”. ¿Keniuj uelis tikinpaleuiskej akin ininchankauan amo itaixpantijkauan Jiova maj kimachilikan ke tokniuan kintasojtaj?

14. ¿Keniuj uelis kuali timouikaskej iniuan akin yankuikej itech nechikol?

¹⁴ Maj tejuan tiktemokan kuali timouikaskej iniuan. Yekinika uelis kuali tikinseliskej akin yankuikej itech nechikol, kemej akin yankuixtok peuak youij nechikolmej, tokniuan akin yankuixtok panokej itech tonechikol oso akin yankuixtok moauijkej (Rom. 15:7). Sayoj ke maj amo sayoj tikintajpalokan, ta maj tikchiuakan okseki taman porin tiktemouaj kuali timouikaskej iniuan. Yejua ika maj tikualtakamej uan maj tikinnextilikan ke ininka timotekipachouaj. Maj tiktemokan tikinixmatiskej uan tikajsikamatiskej kuejmolmej tein kipiaj, sayoj ke maj amo tikinchiuilikan netajtanilmej tein kichiuas maj mopinaujmatikan. Kemej sekin xa ouij kinkisa kijtoskej keniuj momachiliaj, maj amo tikchiuakan maj kimachilikan ke moneki technankiliskej. Okachi kuali maj tikinchiuilikan netajtanilmej tein amo kichiuas maj mopinaujmatikan uan maj kuali tikinkakikan. Kemej neskayot, uelis tikintajtaniskej keniuj kiixmatkej Jiova.

15. ¿Keniuj tokniuan akin chikauak inintakuaujtamatilis uelis kinpaleuiskej oksekin?

¹⁵ Keman tokniuan akin chikauak inintakuaujtamatilis ininka motekipachouaj oksekin mochikaua inintakuaujtamatilis nochin tokniuan, okachiok komo tayekananij kichiuaj nejin. Melissa, akin imomaj kipaleuij  maj kiixmati tein Biblia tamachtia, kijtoua: “Semi niktasojkamati maj itech nochi nejin xiujmej moajsinij tokniuan takamej akin nechitanij kemej ininsiuapil. Nochipa keman teisa nechtekipachoua moajsi akin uelis nechkakis”. Se telpoch akin monotsa Mauricio semi motayokoltij uan iselti momachilij keman tokniuj akin kimachtij ika Biblia peuak amo monechikouaok nion tanojnotsaok. Yejua kijtoua: “Tayekananij kinextijkej ke noka motekipachouayaj uan nejon semi nechpaleuij. Kixelouayaj tiempo nouan tajtoskej, nouan yayaj tanojnotsatij, nechtapouiayaj toni tamachtilis kiajsikaj keman momachtiayaj Biblia uan hasta nouan kichiuayaj seki taman tein ika timoixpetaniayaj”. Nejon semi tapaleuij porin Melissa uan Mauricio kitekitilianij Jiova miak tonalmej.

16, 17. ¿Toni uelis tikchiuaskej tein ika tikinpaleuiskej seki tokniuan?

¹⁶ Maj tikchiuakan seki taman tein kinpaleuis (Gál. 6:10). Leo, se tokniuj takat akin amo yetok iniuan ichankauan porin uejka tapaleuito kemej misionero, kijtoua: “Miakpa sayoj moneki maj mitsnextilikan kualtakayot keman okachi moneki. Nikelnamiki ke se tonal nechpanok tein amo kuali keman niaya itech nocarro. Keman niajsik nochan semi amo kuali nimomachiliaya. Sayoj ke se tokniuj takat uan inamik nechyoleujkej maj nitakuati ininchan. Amo nikelnamiki toni tikuajkej, sayoj ke nochipa nikelnamiki ke semi kuali nechkakkej. Satepan kuali nimomachiliayaya”.

¹⁷ Tinochin tiyolpakij itech tonalmej keman ueli tietokej iniuan okseki tokniuan uan ueli ika titajtouaj tanojnotsmej tein tikakij, kemej keman mochiuaj uejueyi nechikolmej. Sayoj ke maj tikitakan tein kijtoua Carol, akin achto ika titajtojkej: “Itech uejueyi nechikolmej okachi noselti nimomachilia, porin maski miakej tokniuan nechyoualojtokej, miakej yetokej iniuan ininchankauan. Keman nikinita, okachi nikmachilia ke noselti nietok”. Sekin semi ouij kinkisa yaskej se ueyi nechikol satepan ke momikilij ininnamik. ¿Tikixmatij se tokniuj akin ijkon momachilia? ¿Uelis tikyoleuaskej maj touan motali itech ueyi nechikol tein mochiuas?

18. Kemej kijtoua 2 Corintios 6:11-13, ¿keniuj uelis tiknextiskej kualtakayot?

¹⁸ Maj iniuan tikchiuakan seki taman. Maj  tikinyoleuakan tataman tokniuan keman timoixpetaniaj, okachiok akin kimachiliaj ke ininselti yetokej. Tiknekij tikinnextiliskej ke tikintasojtaj, okachiok nejon tokniuan (xikonixtajtolti 2 Corintios 6:11-13). Melissa, akin ika titajtojkej itech párrafo 15, kielnamiki: “Tikuelitayaj maj seki kalyetouanij techyoleuanij maj tianij ininchan oso maj iniuan tianij keman yayaj moixpetanitij okse xolal”. ¿Moajsi se tokniuj itech tonechikol akin ueliskia tiknextiliskej kualtakayot?

19. ¿Kemanian okachi moneki tietoskej iniuan seki tokniuan?

¹⁹ Seki tokniuan semi kitasojkamatiskej maj iniuan tietokan itech seki tonalmej keman semi motayokoltiaj. Kemej neskayot, seki tokniuan akin ininchankauan amo itaixpantijkauan Jiova ininselti momachiliaj keman ininchankauan iluichiuaj. Oksekin xa amo kuali momachiliaj itech seki tonalmej porin panok teisa tein semi kintayokoltia, xa keman momikilij se ininchankauj oso se akin kuali iuan mouikayaj. Keman tikxelouaj tiempo iniuan tietoskej nejon tokniuan tikinnextiliaj ke ininka timotekipachouaj (Filip. 2:20).

20. ¿Keniuj uelis techpaleuis tein kijtoj Jesús itech Mateo 12:48-50 keman tikmachiliaj ke toselti tietokej?

²⁰ Miak taman uelis kichiuas maj se tokniuj kemansa kimachili ke iselti yetok. Sayoj ke moneki tikelnamikiskej ke Jiova kimati keniuj timomachiliaj. Miakpa techpaleuia inintechkopa tokniuan (xikonixtajtolti Mateo 12:48-50). Uan tejuan uelis tiknextiskej ke tiktasojkamatij inepaleuil keman timochikauaj tikinpaleuiskej tokniuan. Maski kemansa xa amo kuali timomachiliaj, amo keman tietokej toselti porin Jiova nochipa yetok touan.